ၶမ်ႈမႃးလိုၵ်းမႃးယဝ်ႉလႄႈ ၸဝ်ႈပိုၼ်းႁၢၼ်ၵေႃႈ ဢမ်ႇလႆႈႁၼ်ၼၢင်းသိုဝ်ႉလူႇသေ ၵႂႃႇႁႃၸွမ်းၶႆႈႁိူၼ်းႁွင်ႇႁိူၼ်းၸၢၼ်း ႁိူၼ်းပီႈႁိူၼ်းၼွင်ႉယဝ်ႉ။ လႆႈႁၼ်ၼၢင်းသိုဝ်ႉလူႇၶႃမႄႈလုၵ်ႈ ၼွၼ်းၵွမ်ႇၵၼ်ယူႇၼႂ်းၵၢင်ႁိူၼ်း ႁိူၼ်းပီႈသၢင်ၶဝ် ပီႈလူဝ်းၶဝ်ၼၢႆးမူၼ်းၼၼ်ႉယဝ်ႉၼႃႇ။
“ၼၢႆးၼႆႉလုၵ်ႉလႄႈ ၵႂႃႇႁဝ်းမိူဝ်း”
“ဢမ်ႇမိူဝ်း”
“ယႃႇပေဝႃႈၼၼ်လႄႈ ႁဝ်းမိူဝ်းႁိူၼ်းႁဝ်းဢိူဝ်ႈၼႃႈ”
“မေးသူမႃးယဝ်ႉလူး ၸၢင်ႈတေမိူဝ်းႁဵတ်းသင်”
“သူၵေႃႈပဵၼ်မေးႁဝ်းယူႇႁိုဝ်”
“ဢေးလုၵ်ႈလပ်းယဝ်ႉ ပေႃးပူၵ်းမၼ်းၵမ်ႉမၼ်းႁႆႈဢိူဝ်ႈ”
“ဢမ်ႇပဵၼ်ႁင် ႁဝ်းတေဢုမ်ႈမိူဝ်းၵူၺ်း”
ၸဝ်ႈပိုၼ်းႁၢၼ်ၵေႃႈ မႃးႁွပ်ႇဢဝ်လုၵ်ႈယိင်းဢွၼ်ႇမၼ်းသႂ်ႇမႃႇသေ ၸုင်ၶႅၼ်ၼၢင်းသိုဝ်ႉလူႇလုၵ်ႉယဝ်ႉ ဢွၼ်ၵၼ်မိူဝ်းၵႂႃႇ။ ၼႂ်းသဵၼ်ႈတၢင်းဢၼ်တဵတ်ႇယဵၼ် သဵင်ၵူၼ်းၵေႃႈတဵတ်ႇယဵၼ် ၵိုတ်းၵႅၼ်ႇသဵင်တိၼ်ၵူၺ်း ဢၼ်မေႃးတမ်းယူႇၼိူဝ်လိၼ်ၼၼ်ႉ ယၢင်ႈယဝ်ႉယၢင်ႈ။ ၵေႃႉလႂ်ၵေႃႈ သမ်ႉပေႃးဢမ်ႇႁူႉတေလၢတ်ႈသင် တေႃႇပေႃးႁွတ်ႈႁိူၼ်းၵႂႃႇ။ ၸဝ်ႈပိုၼ်းႁၢၼ်ၵေႃႈ ၶဝ်ႈမိူဝ်းဝၢင်းလုၵ်ႈမၼ်းသေယဝ်ႉ ၼၢင်းသိုဝ်ႉလူႇၵေႃႈ ၶဝ်ႈၼွၼ်းၵႂႃႇသေ တူဝ်မၼ်းတႄႉ ဢွၵ်ႇၵႂႃႇၼွၼ်းၸွမ်းလုၵ်ႈမေးမၼ်း ၼႂ်းၵၢင်ႁိူၼ်းၶဝ်ၼၼ်ႉယူႇ။
ၶမ်ႈၶိုၼ်းၼၼ်ႉ ၼႂ်းဢူၵ်းၼႂ်းၸႂ်ၼၢင်းသိုဝ်ႉလူႇၼၼ်ႉၵေႃႈ ၼမ်ႉတႃလႆဢမ်ႇဢွၵ်ႇသဵင်လႆႈ မွၼ်ႁူဝ်သမ်ႉပေႃးယမ်းမူတ်းယဝ်ႉဢိူဝ်ႈၼႃႇ။
ၶမ်ႈၶိုၼ်းလိုၵ်းယဵၼ် သဵင်ႁိမ်းၶၢင်ႈၼၼ်ႉလပ်းယူႇၵေႃႈ ၸဝ်ႈပိုၼ်းႁၢၼ်ၼၼ်ႉတႄႉ ၼင်ႇႁၢင်ႈၼွၼ်းၸိူင်ႉႁိုဝ်ၵေႃႈဢမ်ႇလပ်း ယၵ်ႉတူၺ်းလုၵ်ႈမေးဢၼ်ၼွၼ်းယူႇႁိမ်းၶၢင်ႈၼၼ်ႉသေ ထူၺ်ႈၸႂ်လူင်မႃးပဵၼ်ၵမ်းယူႇဢိူဝ်ႈ။
လႆႈၵိၼ်ၶဝ်ႈႁူမ်ႈမူႇ ယူႇႁိူၼ်းလင်လဵဝ်ၵၼ် ၼၼ်ႉပဵၼ်ၼႃႈႁိူၼ်းဢၼ်ဢုၼ်ႇၸႂ်ယဝ်ႉ၊ ၵူၺ်းၵႃႈ မိူဝ်ႈလႂ် မီးၽူဝ်ႁူမ်ႈၸဝ်ႈလဵဝ်ၵၼ်တႄႉ တႃႇယၵ်ႉတူၺ်းၼႃႈၵၼ်ၼၼ်ႉယၢပ်ႇယူႇ။ ယၢပ်ႇတၢၼ်ႇႁိုဝ်ၵေႃႈ ဢမ်ႇဝႄႈလွတ်ႈလႆႈလူး ႁူႉၵႃႈတေလႆႈယဵၼ်ႉသေ ယူႇၵႂႃႇႁင်းၽႂ်ႁင်းမၼ်းယူႇဢိူဝ်ႈ။
ၸွႆႈၵၼ်ႁဵတ်းၸွႆႈၵၼ်သၢင်ႈယူႇဢိူဝ်ႈ ၵၢၼ်ႁိူၼ်းၵၢၼ်ယေး ႁုင်ၶဝ်ႈမိုဝ်ႉၽၵ်း တဵၵ်းၼမ်ႉ ၵၢၼ်သူၼ်ၸိူဝ်းၼႆႉ။
ၼႂ်းသူၼ်ၶဝ်ႈၵၢပ်ႇၼၼ်ႉ ၶဝ်ၵေႃႈဢွၼ်ၵၼ်ၵႂႃႇၽုၵ်ႇတင်းႁိူၼ်းယဝ်ႉ၊ ၸဝ်ႈပိုၼ်းႁၢၼ်ၼၼ်ႉၵေႃႈ ၶုတ်းၽုၵ်ႇလူင်ၵႂႃႇတင်းၼၢင်းၶမ်းသွႆႈ၊ ၼၢင်းသိုဝ်ႉလူႇၼၼ်ႉတႄႉၽုၵ်ႇၸွမ်းၵၼ်တင်း ဢၢႆႈလႅင် သဵင်သမ်ႉပေႃးယဵၼ်သီႇသီႇ။ ၸဝ်ႈပိုၼ်းႁၢၼ်ၶႃၼၼ်ႉတႄႉ ဢုပ်ႇတူတီတူတီ ယုမ်ႉယုမ်ႉၶူဝ်ၶူဝ်ၵၼ်ယူႇယဝ်ႉ။
ဢေးၼၢင်းဢွၼ်ႇလႄႈတင်း ပီႈၼၢင်းၶဝ်ၼၢင်းယိင်းၼၼ်ႉတႄႉၵေႃႈ လဵၼ်ႈၵေႃႉၵၼ်ယူႇတီႈႁိူၼ်းၼၼ်ႉၵူၺ်း။ ဢေးၼၢင်းဢွၼ်ႇၼၼ်ႉၵေႃႈ ဢမ်ႇတေႃႇတေႃႇယဝ်ႉ တၢင်းလူၼ်းၼႆႉတႄႉ လႅၼ်ႈလမ်းပေႃးဢမ်ႇၶိုတ်း ပေႃးတွင်ႉမႆႈၵေႃႈႁႆႈယဝ်ႉဢိူဝ်ႈ ပီႈၼၢင်းၶဝ်ၵေႃႈ ၵွၼ်ႉၶဝ်ႈလဵင်ႉမၼ်းသေ ဢမ်ႇႁူႉတေလဵင်ႉၽၵ်းႁင် ႁဵတ်းၶဝ်ႈၸၢၼ်ထူဝ်ႇၼဝ်ႈလဵင်ႉမၼ်းၵႂႃႇ ၵိၼ်ဢိမ်ႇယဝ်ႉၼႆၵေႃႈ ၼွၼ်းတွင်ႉတဵမ်ယူႇယဝ်ႉ။
ၶမ်ႈၼိုင်ႈ ၸဝ်ႈပိုၼ်းႁၢၼ်ၵေႃႈ ၵႂႃႇႁဵတ်းၵၢၼ်မၼ်းသေ ၼႂ်းႁိူၼ်းၼၼ်ႉ မီးမႄႈလုၵ်ႈဢွၼ်ႇၶဝ်ၵူၺ်းယဝ်ႉလႄႈ။
“သူဢမ်ႇႁူႉႁႃႉ ဝႃႈမၼ်းမီးမေးယဝ်ႉၼႆ”
“ပေႃးထၢၼ်ႈဝႃႈႁဝ်းႁူႉ ႁဝ်းတေႁဵတ်းႁိုဝ်ဢဝ်မၼ်းလႃႇ”
“မၼ်းလၢတ်ႈယူႇလူး ဝႃႈမၼ်းမီးမေးယဝ်ႉၼႆ”
“မၼ်းလၢတ်ႈတႄႉဝႃႈ မေးမၼ်းပၢႆႈၵႂႃႇၸွမ်းၽူဝ်ယဝ်ႉၼႆလူး ၶွင်မေးမၼ်းတမ်ႉဢမ်ႇမႃးႁႃႁေပွၵ်ႈ ပိူၼ်ႈၵေႃႈဝႃႈမၼ်းဢမ်ႇမီးမေးၼႆလၢႆလၢႆယဝ်ႈ”
“ႁဵတ်းႁိုဝ် မၼ်းၵေႃႈဢမ်ႇၵပ်းသိုပ်ႇႁႃႁႃးႁေပွၵ်ႈ ႁႃးပၢႆႈၵႂႃႇတႄႉၸႂ်ႈဢိူဝ်ႈ ၸွင်ႇၶႅၼ်းႁႃးမေႃၵႂႃႇၵေႃႈဢမ်ႇၸႂ်ႈ ပေႃးပိူၼ်ႈဢမ်ႇႁွင်ႉႁႃးၵႂႃႇ ၸိူင်ႉႁိုဝ်ၵေႃႈ ႁႃးတင်းပႆႇလႆႈပႅတ်ႈၵၼ်လူး ပေႃးပႆႇပႅတ်ႈၵၼ်ၵေႃႈ တိုၵ်ႉပဵၼ်ၽူဝ်မေးၵၼ်ယူႇၵူၺ်းဢိူဝ်ႈ”
ၼၢင်းသိုဝ်ႉလူႇၵေႃႈယဵၼ်ၵႂႃႇၵႅပ်ႉၼိုင်ႈ “ဢမ်ႇၸႂ်ႈဝႃႈၶႂ်ႈႁဵတ်းၼွႆႉပိူၼ်ႈၼႃႇလေႃႇ မိူဝ်ႈလဵဝ် လုၵ်ႈဢွၼ်ႇႁႃးၵေႃႈတိုၵ်ႉၵေႃႈလဵၵ်ႉၼႃႇ ၼႃႈပေႃႈၵူၺ်းတင်းပႆႇတွင်းလီ ၼႂ်းတွင်ႉၵေႃႈ မီးဝႆႉထႅင်ႈၵေႃႉၼိုင်ႈယဝ်ႉဢိူဝ်ႈ၊ ႁဝ်းၵေႃႈ ဢမ်ႇၶႂ်ႈႁႂ်ႈလုၵ်ႈဢွၼ်ႇႁဝ်း ဢမ်ႇမီးပေႃႈမိူၼ်ၵၼ် ပဵၼ်မႄႈၵူၼ်းၼႆႉ မၼ်းၵေႃႈ ၵႃႈတေလႆႈဝူၼ်ႉႁၼ်ပႃးၼႃႈလုၵ်ႈဢမ်ႇၸႂ်ႈႁိုဝ် ပီႈၼၢင်းၵေႃႈ ဢမ်ႇၶႂ်ႈႁႂ်ႈလုၵ်ႈပီႈၼၢင်း ဢမ်ႇမီးပေႃႈဢမ်ႇၸႂ်ႈၼႄႇ”
“တေႁႂ်ႈယူႇၸွမ်းၵၼ်ၸိူင်ႉၼႆႁႃႉ ၵဝ်ဢမ်ႇၶႂ်ႈယူႇၼင်ႇၵွၼ်ႇ”
“ႁဝ်းၵေႃႈဢမ်ႇၶႂ်ႈယူႇမိူၼ်ၵၼ် ပေႃးပီႈၼၢင်းယူႇလႆႈၵေႃႈ ႁဝ်းတေယဵၼ်ႉယူႇၵႂႃႇၵႂႃႈ”
ယူႇၵႂႃႇယူႇမႃး ယူႇၸွမ်းၵၼ်သမ်ႉပေႃးမီးယူႇ သွင်လိူၼ်ၼႆႉယဝ်ႉ။ ၸဵမ်လွင်ႈယူႇသၢင်ႈၵိၼ်သဝ်း လွင်ႈၼႃႈႁိူၼ်းတႃယေး ဢမ်ႇမိူၼ်ၼင်ႇ ဢၼ်ဢၢင်ႈဢၢၼ်းဝႆႉၼၼ်ႉသေ ၸင်ႇယွၼ်းၵႂႃႇႁဵတ်းၵၢၼ်မိူင်းထႆးၶိုၼ်းယဝ်ႉ။ ၸဝ်ႈပိုၼ်းႁၢၼ်ၵေႃႈ မိူဝ်ႈဝႃႈၼၢင်းၶမ်းသွႆႈၵႂႃႇယဝ်ႉ ဢမ်ႇႁႄႉႁၢမ်ႈသင် တေဝႃႈပႅတ်ႈၼႆၵေႃႈ ဢမ်ႇလႆႈဝႃႈပႅတ်ႈၵႂႃႇ ၵွပ်ႈဝူၼ်ႉႁၼ်ၼႃႈလုၵ်ႈလႄႈ ဢမ်ႇလႆႈလၢတ်ႈၵႂၢမ်းၶေႃႈၼၼ်ႉဢွၵ်ႇမႃး၊ ၶဝ်ၵေႃႈယင်းတိုၵ်ႉၵပ်းသိုပ်ႇတိတ်းတေႃႇၵၼ်ယူႇ။
“ႁဝ်းၵေႃႈလႆႈဢဝ်မေးထႅင်ႈယဝ်ႉ ပေႃးဝႃႈ သူၶႂ်ႈလႆႈၽူဝ်ၵေႃႈဢဝ်လႄႈၼႃႈ ႁဝ်းဢမ်ႇဝႃႈသင် မိူဝ်ႈလႂ်သူဢဝ်ၽူဝ်ယဝ်ႉ ၸွင်ႇၵွႆႈဝႃႈႁဝ်းပႅတ်ႈၵၼ်ၵေႃႈလႆႈ ႁဝ်းၵေႃႈဢမ်ႇလႆႈလုမ်းလႃး သူလႄႈလုၵ်ႈလႆႈတဵမ်တီႈလူး”
ၶဝ်ၵေႃႈၽၢတ်ႇယၢၼ်ၵၼ်ၵႂႃႇလီလီၵူၺ်းလႄႈ ဢမ်ႇႁိုင် မွၵ်ႈသွင်လိူၼ်ၼႆႉ ၼၢင်းၶမ်းသွႆႈၵေႃႈ ပွင်ႇၶၢဝ်ႇမႃးဝႃႈ ဢဝ်ၽူဝ်ယဝ်ႉ ၽူဝ်မၼ်းၼၼ်ႉတႄႉၵေႃႈ ပဵၼ်ၵူၼ်းၵေႃႉဢၼ်မႃးမိူင်းထႆးၸွမ်းၼၼ်ႉယူႇ။
