ၼင်ႇၶမ်ႈၼိုင်ႈ ဢႆၢႈသႅင်တေၵႂႃႇမိူင်းထႆးၶိုၼ်းယဝ်ႉၼႆလႄႈ ႁိဝ်ႈတဝ်ႈလဝ်ႈမၼ်းမိူဝ်းလႄႇဢႆၢႈၼူတ်ႇယူႇ။
“ႁေႉ သြႃႇၵေႃႉမီးႁိူၼ်းယူႇၼႄႇ”
ဢႆၢႈၼူတ်ႇဢွၵ်ႇႁိူၼိးမႃးငွၵ်ႈတူၺ်း “မႃးလႄႈ ၶဝ်ႈမႃးလႄႈတိုၵ်ႉၵိၼ်ၶဝ်ႈဢိူဝ်ႈ”
“ၵိၼ်ၽၵ်းႁင်လႃႇ”
“ၽၵ်းၵုတ်ႇဢွပ်ႉ ၵႂႃႇၵဵပ်းမႃးၼႂ်းၼႃးၼၼ်ႉယိုင်”
“မိူင်းႁဝ်းၼႆႉတႄႉၼေႃ ၽၵ်းယိူဝ်ႈၼၢင်းၶဵဝ်ၼႆႉ ဢမ်ႇလႆႈသိုဝ်ႉၵိၼ်တေႉဢေႉ ယူႇမိူင်းထႆးၼႆႉတႄႉ မၢၵ်ႇႁႅင်ႈဢွၼ်ႇၵူၺ်းၵေႃႈ တင်းလႆႈသိုဝ်ႉၵွၼ်ႇဢိူဝ်ႈမႂ်း”
“မႂ်းၵေႃႈမႃးယူႇၶိုၼ်းႁေယဝ်ႉၼႃႇ”
“ဢမ်ႇမီးၵၢၼ်မီးငၢၼ်းသင်လႄႇမႂ်းၵေႃႈ”
“မီးၼႃႇမႂ်း သွၼ်ႇႁႂ်ႈၵႆႉၵူၺ်းလႃႈ မၼ်းမႃးဢိုပ်းႁေၸၢတ်ႈ”
“တေႁဵတ်းၵၢၼ်ႁင်လႃႇမႂ်းဝႃႈ”
“ႁဵတ်းသူၼ်ဢိူဝ်ႈမႂ်းၵေႃႈ သူၼ်ၶဝ်ႈၵၢပ်ႇ၊ သူၼ်ထူဝ်ႇ၊ သူၼ်ဢွႆႈ ႁဵတ်းလႆႈလႆၢမဵဝ်းလႃႈ”
“တီႈလိၼ်တီႈသူၼ်ၵေႃႈ ပိူၼ်ႈပေႃးႁဵတ်းယူႇသဵင်ႈ”
သိမ်းၽိူၼ်ၶဝ်ႈယဝ်ႉ ဢဝ်လဝ်ႈမႃးတမ်းသေ
“မႂ်းတေၵႂႃႇဢဝ်တၢင်းလႂ်သဵင်ႈ လိၼ်ပဝ်ႇလိၼ်ႁၢမ်းမီးတင်းၼမ်မႂ်းဝႃႈ ပိူၼ်ႈၵူၺ်းဢိူဝ်ႈ ၶႂၢၵ်ႈမႃးၶႂၢၵ်ႈမႃးတိၵ်းတိၵ်းၼႆႉ တၢင်းႁွင်ႇဝဵင်းၼၼ်ႉ ပီႈၼွင်ႉလွႆၶဝ်မႃးလွမ်ႉဢဝ် ပေႃးဢမ်ႇမီးတီႈပဝ်ႇမၼ်းယဝ်ႉဢိူဝ်ႈမႂ်းႁူႉ သမ်ႉပေႃးၸပ်းသႂ်ႇသူၼ်ၵူၼ်းဝၢၼ်ႈၶဝ်ယဝ်ႉၼႃႇ ပေႃးဝႃႈယႃႇမႃးဢဝ် ၶဝ်ၵေႃႈဢမ်ႇထွမ်ႇလူး ဢမ်ႇမီးၽႂ်ႁဵတ်းလႄႈ ၶဝ်ၵေႃႈဢဝ် ၼႆႁေယဝ်ႉဢိူဝ်ႈ သူၼ်ပိူၼ်ႈႁၢမ်းၸိူဝ်းၼႆႉၵေႃႈဢဝ်ယဝ်ႉ ”
“ႁဝ်းသမ်ႉဢမ်ႇဢဝ်ႁဵတ်းလႃႇဢိ”
“ဢိူဝ်ႈ ၶွင်ပေႃးႁဝ်းႁဵတ်း သမ်ႉဝႃႈမီးၸဝ်ႈၼႆလႄႇ ဢမ်ႇၶႂ်ႈပၼ်ၵၼ်ႁဵတ်းလူႉ၊ ပေႃးပိူၼ်ႈမႃးဢဝ် သမ်ႉဢမ်ႇၶႅၼ်ႁေ ပိူၼ်ဢဝ်ၵေႃႈသမ်ႉဝႃႈ ၸၢင်ႈႁဵတ်းႁိုဝ်ၼႆၼၼ်ႉယိုင်၊ မၢင်တီႈၵေႃႈ ၶဝ်ပၼ်ယူႇ ၵူၺ်းၶွင် ႁႅင်းၵူၼ်းႁဵတ်းၵေႃႈဢမ်ႇမီးယဝ်ႉၼႃႇမေႃႉ”
“လုၵ်ႈၵဝ်လၢင်းၵဝ်ၵေႃႈ ယင်းတိုၵ်ႉယူႇႁူင်းႁဵၼ်းလႄႇ ပေႃးဢဝ်မႃးယူႇတၢင်းၼႆႉ ပႆၢးပၺ်ႇၺႃႇတမ်ႉဢမ်ႇမိူၼ်ပိူၼ်ႈ ပေႃးယူႇတၢင်းပုၼ်ႉ သင်ဢမ်ႇသင်မၼ်းလီလိူဝ်တၢင်းၼႆႉယူႇၵႃႈ”
“ပိူၼ်ႈႁမ်ႉႁဵတ်းပၼ်ဝႂ်ထႆးႁေၼႆယူဝ်ႉၼၼ်ႉ”
“ဢိူဝ်ႈ ဢဝ်ဝႂ်ၵိူတ်ႇၸွမ်းမႄႈမၼ်းၼၼ်ႉၼႃႇ လႆႈယူႇဢိူဝ်ႈ”
“မၼ်းလီမႆႈၸႂ်ၼႃႇတေႉဢိူဝ်ႈမႂ်းႁူႉ တႃႇၸိူဝ်ႉၶိူဝ်းႁဝ်းၵူၼ်းတေၼမ်မႃးၼႆႉ ႁဝ်းယူႇမိူင်းပိူၼ်ႈၵေႃႈ ၶႂ်ႈပဵၼ်ပိူၼ်ႈ၊ ဢဝ်ၽူဝ်ဢဝ်မေးတၢင်ႇၶိူဝ်းၵေႃႈ ၶႂ်ႈႁႂ်ႈပဵၼ်ၶိူဝ်းပိူၼ်ႈ၊ ယူႇတီႈလႂ်မိူင်းလႂ် ယႃႇႁႂ်ႈလႆႈပဵၼ်ပိူၼ်ႈ ႁႂ်ႈႁူႉၸၵ်းၸိူဝ်ႉၶိူဝ်းၸဝ်ႈၵဝ်ႇၼႆ သင်မီးတၢင်းဝူၼ်ႉၸိူင်ႉၼႆယူႇတႄႉလီၵျဢိူဝ်ႈမႂ်းဝႃႈ။ ၼႆႉၶွင် မီးလုၵ်ႈမီးလၢင်းမႃးၵေႃႈ ၵႂၢမ်းႁဝ်းၵူၺ်းဢမ်ႇသွၼ်ဢမ်ႇလၢတ်ႈ ပၼ်လၢတ်ႈၵႂၢမ်းပိူၼ်ႈယူႇတိၵ်းတိၵ်းၸိူင်ႉၼၼ် မၼ်းဢမ်ႇယဵၼ်းႁိုဝ်လႆႈ”
ဢႆၢႈသႅင်မိုင်ဝူၼ်ႉၸွမ်းၵႂၢမ်းဢႆၢႈၼူတ်ႇၵႂႃႇၵႅပ်ႉၼိုင်ႈ
“ႁဝ်းတႄႉ ဝူၼ်ႉတႃႇလုၵ်ႈဢွၼ်ႇဢိူဝ်ႈမႂ်း ယူႇမိူင်းၼႆႉ ၸွင်ႇၶဝ်တေမီးတၢင်းၶိုၼ်ႈယႂ်ႇလႆႈယူႇႁႃႉ၊ မိူင်းဢၼ်လွင်ႈၵတ်းယဵၼ်ဢမ်ႇတႆၢတူဝ် ၶႂ်ႈပဵၼ်ပၢင်တိုၵ်းမိူဝ်ႈလႂ်ဢမ်ႇႁူႉ၊ သိုၵ်းၵေႃႈၼမ် ၽႂ်သမ်ႉတေၶႂ်ႈယူႇလႃႇမႂ်းဝႃႈ”
“ပီႈၼွင်ႉၸၢဝ်းၶိူဝ်းၶဝ်တႄႉ ယူႇလႆႈဢိူဝ်ႈ ႁႅင်းၵူၼ်းၶဝ်ၼမ်ႉတေႉဢိူဝ်ႈမႂ်းႁူႉ ထႅင်ႈဢိၼ်ႉမႃးႁဝ်းၸိူဝ်းၼႆႉ တေပဵၼ်ၵူၼ်းၸွမ်ႇၵေႈမၼ်းၵူၺ်းယဝ်ႉ၊ မိူဝ်ႈလဵဝ်ၼႆႉၽႂ်ၼမ်ၵေႃႈၽႂ်လႆႈၵူၺ်းမႂ်းဝႃႈ”
“ၵဝ်ၵူဝ်ဢမ်ႇမီးႁင်ႁဵတ်းလဵင်ႉၵၼ်ဢိူဝ်ႈမႂ်း”
“မီးၼႃႇမႂ်း တၢင်းဢၼ်မႂ်းႁဵတ်းၵေႃႇသၢင်ႈတၢင်းဝၼ်းတၢင်းဝၼ်းႁေ တၢင်းဢၼ်မႂ်းမႃးႁဵတ်းသူၼ်ၵေႃႈဢမ်ႇပႆၢႈပိူင်ႈၵၼ်၊ တၢင်းဢၼ်မႂ်းႁႃငိုၼ်းလဵင်ႉတွင်ႉႁေ ၵဝ်ႁဵတ်းၵၢၼ်လဵင်ႉတွင်ႉၼႆႉ ၵိၼ်ဢိမ်ႇမိူၼ်ၵၼ်ၵူၺ်းမႂ်းႁူႉ”
“ႁဵတ်းသူၼ်ၶဝ်ႈၵၢပ်ႇၼႆၵေႃႈ ၶၼ်မၼ်းတင်းဢမ်ႇမၢၼ်ႇလူးမႂ်းဝႃႈ ၵႃႈၽုၼ်ႇၵႃႈထႆမၼ်းၵေႃႈဢလၢင်းမီးယူႇလႄႇ၊ ပေႃးႁဵတ်းၵၢၼ်ပိူၼ်ႈတႄႉ ဢမ်ႇလႆႈသဵင်ႈဢလၢင်းသင်လူး၊ လႆႈငိုၼ်းမႃးၵေႃႈမၢၼ်ႇ ပေႃးၵုမ်ႇလိူၼ်လႂ်လိူၼ်ၼၼ်ႉယူႇလႄႇ”
“ၵၢၼ်လူင်မီးတၢင်းၼမ်ဢႃႈ မႃးႁဵတ်းလၢၵ်ႈသမ်းမႃးၵေႃႈလႆႈၵိၼ်ယူႇလေႃႇ ပေႃးၶႂ်ႈမႃးတေႉတႄႉ”
ဢႆၢႈၼူတ်ႇထူၺ်ႈၸႂ်လူင်ယဝ်ႉ ဢဝ်လဝ်ႈဢွၵ်ႉၸွမ်းသေၵမ်းၼိုင်ႈ။ ဢႆၢႈႁၢၼ်ၵေႃႈၶဝ်ႈမႃးၼင်ႈၸွမ်းသေ
“မႂ်းဢမ်ႇႁဵတ်းၵၢၼ်ယဝ်ႉၼႄႇ”
“ၵဝ်ယွၼ်းမႃးလႄႇဢိူဝ်ႈ ဢုပ်ႇသင်ၵၼ်လႃႇ”
“ၵဝ်ႁႂ်ႈမၼ်းမႃးယူႇတီႈၼႆႈၵဝ်ၼႆ” ဢႆၢႈၼူတ်ႇလၢတ်ႈ။
“သိမၼ်းဢမ်ႇၶႂ်ႈယူႇယဝ်ႉ မၼ်းၸင်ႇၵႂႃႇ ၵႃႈၶႂ်ႈလၢတ်ႈယဝ်ႉဢိူဝ်ႈ။ မၼ်းၵေႃႈ မီးၶေႃႈဢၢင်ႈတင်းၼမ်တႃႇတေၵႂႃႇယူႇယဝ်ႉ။ ၵူဝ်လႆႈႁဵတ်းသိုၵ်းႁေၵႂႃႇၵူၺ်းဢမ်ႇၸႂ်ႈႁိုဝ်။ ပေႃးထၢၼ်ႈဝႃႈဢမ်ႇၵႂႃႇမိူင်းထႆးႁေဢိုပ်း တေဢမ်ႇမီးၽႂ်ယူႇယဝ်ႉမိူင်းႁဝ်းၼႆႉ”
“မႂ်းဢမ်ႇႁူႉႁင် မႂ်းယႃႇမႃးလၢတ်ႈယူႇၼႆႉ ႁဵတ်းသိုၵ်းသမ်ႉၸွႆႈႁင်လႆႈလႃႇ ၵုမ်ႇမႃးၵဵပ်းၶွၼ်ႇၵဵပ်းငိုၼ်းၵူၺ်း တမ်ႉဢမ်ႇႁၼ်ဝႃႈပူၵ်းပွင်သင်လႆႈတေႉတေႉလႃႈ ႁဵတ်းဢမ်ႇႁဵတ်းၵၢၼ်သင်ႁေ”
“ၶႅၼ်းႁေ ပႅတ်ႈဝၢၼ်ႈပႅတ်ႈမိူင်း လိုမ်းၸိူဝ်ႉလိုမ်းၶိူဝ်းယူႇဢိူဝ်ႈမေႃႉ”
“မီးသိုၵ်းယဝ်ႉ ပၼ်တၢင်းတုၵ်ႉၶၵူၼ်းမိူင်းယူႇၸိူင်ႉၼႆ တႃႉယႃႇမီးႁေလႃႈ”
“ပေႃးဢမ်ႇမီးသိုၵ်း ၵူၼ်းပိူၼ်ႈမႃးယူႇမႃးထင် မႃးပေႉၵိၼ်သူၸိူင်ႉၼၼ်တႄႉ လီၼႃႇယဝ်ႉဢိူဝ်ႈၼေႃႈ၊ ပေႃးပဵၼ်သိုၵ်းတႆးၼႆတႄႉ ႁဝ်းၼင်ႇၵၼ်ၼႆတႄႉ ႁတ်းတွပ်ႇႁတ်းဝႃႈယဝ်ႉဝႃႈ ပေႃးပိူၼ်ႈၸႂ်လီတေႃႇသူ ပၼ်သူလႃႇလႆႈ သူၵေႃႈလႃႇလႆႈဢိူဝ်ႈ။ ပေႃးပဵၼ်တၢင်ႇၶိူဝ်း ၸွင်ႇၶဝ်တေလီတေႃႇသူႁိုဝ် လၢတ်ႈၵႂၢမ်းတင်းဢမ်ႇပွင်ႇၵၼ် ပိူၼ်ႈပေႉၵိၼ်ယူႇၵေႃႈ ၵႃႈလႆႈဢေႃႈၶႃႈတိၵ်းတိၵ်းၵူၺ်းႁိုဝ်လႃႇ လႃႇၶဝ်ၶိုၼ်းၵေႃႈသူၵေႃႈၺႃးၵိၼ်ၶိုၼ်းၵူၺ်းဢိူဝ်ႈ၊ ပေႃးမီးလွင်ႈသုၵ်ႉသၵ်ႉမႃးၵေႃႈပႆၢႈ၊ ပိူၼ်ႈမႃးယူႇဢမ်ႇၶႂ်ႈၶၢမ်ႇပိူၼ်ႈၵေႃႈပႆၢႈ၊ ပေႃးၵူဝ်ၵေႃႈပႆၢႈ ပိူၼ်ႈပႆႇတၼ်းႁိမ်ဝၢၼ်ႈႁိမ်မိူင်းႁဝ်းသမ်ႉပေႃးပၼ်ပိူၼ်ႈဢွၼ်တၢင်းယဝ်ႈ”
“မႂ်းဢမ်ႇၸႂ်ႈၵူၼ်းၶၢမ်ႇ မႂ်းတေပွင်ႇၸႂ်ၼႄႇ”
“ၵဝ်ဢမ်ႇၶႂ်ႈၶၢမ်ႇၸိူင်ႉၼၼ်လႄႈ ၸင်ႇမႃးႁဵတ်းသိုၵ်းယူႇၼႆႉၼႃႇ မႂ်းလူးႁဵတ်းသင်လႃႇ လိူဝ်သေဢမ်ႇၸွႆႈသင်ယဝ်ႉ ထိင်းသိမ်းၵူၺ်းတင်းဢမ်ႇႁဵတ်းလႆႈ”
“ပႃးဝႃႈၼၼ်ၵေႃႈ ပဵၼ်သိုၵ်းယဝ်ႉ မီးၼႃႈတီႈဢုပ်ႉပိူင်ႇယဝ်ႉ ၸွင်ႇဝူၼ်ႉသွၼ်ႇပုၼ်ႈၵူၼ်းမိူင်းၽွင်ႈႁိုဝ်။ ၵဝ်ႁၼ် ပေႃးဝႃႈပဵၼ်ၽူႈဢွၼ်ႁူဝ်ၼႆၵေႃႈ ဝူၼ်ႉတႃႇၼႂ်းတပ်ႉတႃႇလုၵ်ႈၼွင်ႉမၼ်းၵူၺ်း တႃႇၵူၼ်းမိူင်းၼႆႉ ၶႂ်ႈပဵၼ်သင်ပဵၼ်ယဝ်ႉ။ ဢမ်ႇႁၼ်ဝႆႉၼမ်ႉၼၵ်းၵႃႈၶၼ်သင်ၵႃႈႁိုဝ်ၼင်ႇၵဝ်ႇ ပဵၼ်သိုၵ်းၵေႃႈလီ ၵူၼ်းပႆၢႈမိူင်းၵေႃႈယဝ်ႉ တႃႇၸိူဝ်ႉၸၢတ်ႈၸိူဝ်ႉၶိူဝ်းၸဝ်ႈၵဝ်ႇဢၼ်ဝႃႈၼၼ်ႉ ၵွပ်ႈသင်တိုၵ်ႉလႆႈမႃးၼင်ႈထဵင်ၵၼ်ယူႇလႃႇ ၵေႃႉၼိုင်ႈဢမ်ႇၶႂ်ႈႁဵတ်းသိုၵ်း ၵေႃႉၼိုင်ႈသမ်ႉဝႃႈႁဵတ်းၵၢၼ်တႃႇၸိူဝ်ႉတႃႇၶိူဝ်း။ ၵဝ်ႁူႉယဝ်ႉယွၼ်ႉသင်လႄႈ ဢႆၢႈသႅင်မၼ်းၶႂ်ႈၵႂႃႇမိူင်းထႆး ၵူၺ်းၵႃႈ ဢႆၢႈႁၢၼ် မႂ်းႁဵတ်းသိုၵ်းၼႆႉ မႂ်းႁဵတ်းၵၢၼ်သင်တေႉတေႉလႃႇ”
“ၵဝ်ၵေႃႈႁဵတ်းၵၢၼ်ၼႂ်းတပ်ႉသိုၵ်း ဢဝ်ႁူမ်ႇလူမ်ႈ ၵႅတ်ႇၶႄၵူၼ်းမိူင်းၼၼ်ႉၼႃႇ”
“ၵႅတ်ႇၶႄၵူၼ်းမိူင်း ပေႃးယိုဝ်းၵၼ်မႃး တုမ်ႉတိူဝ်ႉၵူၼ်းမိူင်းပေႃးဢမ်ႇလႆႈယူႇ၊ လႆႈပႆၢႈ မီးၽႂ်မႃးဢဝ်ႁူမ်ႇလူမ်ႈပၼ်လႆႈ၊ ယဝ်ႉၵေႃႈ တေဢၢၼ်းၵဵပ်းၶွၼ်ႇယွၼ်းၵိၼ်ၵူၼ်းမိူင်းၵူၺ်းသေ ဢမ်ႇႁဵတ်းသင်ပၼ်ၽွင်ႈႁႃႉ၊ ၸွင်ႇႁူႉတူဝ်ၽွင်ႈယူႇႁိုဝ် ယွၼ်ႉသင်လႄႈဢမ်ႇမီးၽႂ်ၶႂ်ႈႁဵတ်းသိုၵ်း။ ပေႃးႁဵတ်းသိုၵ်း ၼႃႈႁိူၼ်းၸဝ်ႈၵဝ်ႇ ဢမ်ႇမီးလွင်ႈႁူမ်ႇလူမ်ႈယဝ်ႉ။ ႁဵတ်းသိုၵ်းယဝ်ႉ တႃႇဝႃႈတေလဵင်ႉၼႃႈႁိူၼ်းၼႆၼၼ်ႉ ယၢပ်ႇဢိူဝ်ႈ၊ ဢမ်ႇမီးငိုၼ်း ဢမ်ႇမီးသင် ၵူၼ်းၼႂ်းႁိူၼ်းၵေႃႈဢမ်ႇၵမ်ႉထႅမ်မႃး ၶႂ်ႈႁႂ်ႈႁႃငိုၼ်းႁႃတွင်းမႃး ၸွင်ႇလႂ် ၵူၼ်းပႆၢႈၵေႃႈၼမ်ဢမ်ႇႁိုဝ်”
“ဢိုဝ်ႈ”
“ၸွင်ႇယၢမ်ႈဝူၼ်ႉႁိုဝ် တေႁဵတ်းႁိုဝ် ႁႂ်ႈဝၢၼ်ႈပေႃးလီယူႇ ၵူၼ်းမိူင်းပေႃးၶႂ်ႈယူႇဢမ်ႇၶႂ်ႈပႆၢႈ၊ ၵူၼ်းပႆၢႈပေႃးၶႂ်ႈမႃးယူႇၶိုၼ်း။ ၵဝ်ယူႇမႃးၼႆႉ ဢမ်ႇႁၼ်ႁဵတ်းႁင် လိူဝ်သေ ႁဵတ်းတႃႇၵူၼ်းသိုၵ်း၊ တေဝႃႈၼၼ်ၵေႃႈ ၵူၼ်းသိုၵ်းၵမ်ႈၽွင်ႈ တင်းလႆႈမႃးႁႃယွၼ်းၵိၼ်ၵူၼ်းမိူင်းယူႇလူး။ သူမီးဢႃႇၼႃႇ မီးၼႃႈတီႈဢုပ်ႉပိူင်ႇယဝ်ႉ ၼႃႈတီႈသူ သူမီးသုၼ်ႇပူၵ်းပွင်ပၼ်ဢိူဝ်ႈ။ ဢမ်ႇၸႂ်ႈယၢမ်းမီးပၼ်ႁႃမႃးၵေႃႈ ဢဝ်ငိုၼ်းယိုၼ်ႈပၼ်မွၵ်ႈၼၼ်ႉၵူၺ်း။ ပေႃးၵူၼ်းမိူင်းယူႇသႃႇလူမ်ၸႂ် တႃႇဝႃႈၵူၼ်းမိူင်းတေဢမ်ႇၵမ်ႉထႅမ်သူၼၼ်ႉ ဢမ်ႇမီးလေႃႇမႂ်းဝႃႈ”
“ၵဝ်ၵေႃႈပဵၼ်လုၵ်ႈၼွင်ႉပိူၼ်ႈၵူၺ်း ၸၢင်ႈၵႂႃႇႁဵတ်းသင်လႆႈ”
“ၵူၼ်းၸိူင်ႉၼႆယဝ်ႉ မိူဝ်ႈပဵၼ်လုၵ်ႈၼွင်ႉဝႃႈဢမ်ႇႁဵတ်းလႆႈ ပေႃးပဵၼ်ႁူဝ်ၼႃႈမႃးၵေႃႈ ဢမ်ႇၸၢင်ႈႁဵတ်း၊ ၵဝ်ႁၼ်ၼမ်ၼႃႇယဝ်ႉမႂ်း၊ ပေႃးမီးဢႃႇၼႃႇမႃးၵေႃႈ လိုမ်းတူဝ်ယဝ်ႉ။ ၶဝ်ဢမ်ႇသူၼ်ၸႂ်ႁင် ၵူဝ်ဝႃႈဢႃႇၼႃႇတေဢမ်ႇယူႇၼႂ်းမိုဝ်းၶဝ်ၵူၺ်း ၶဝ်ႁဵတ်းၵူႈလႆၢး ပႆၢးၵူႈတၢင်းဢိူဝ်ႈ ၵူၼ်းဢမ်ႇမီးလႄႈမီးၼႆႉ လီၵူဝ်ၼႃႇမႂ်းႁူႉ ၵူၼ်းၸိူင်ႉၼၼ်သမ်ႉမီးၼမ်ၼႃႇဢမ်ႇႁိုဝ်”
“ၵူၼ်းလီမၼ်းၵေႃႈမီးယူႇဢိူဝ်ႈ မႂ်းၵူၺ်းတူၺ်းဢၼ်ဢမ်ႇလီမၼ်းၵူၺ်း”
“မီးဢိူဝ်ႈ မီးယူႇၵူၺ်း ၵူၺ်းၵႃႈမၼ်းမီးဢေႇၼႃႇ ႁႃႁၼ်ယၢပ်ႇတေႉ။ လုၵ်ႈၼွင်ႉတေပဵၼ်ၵူၼ်းလူင်မႃးၸိူင်ႉႁိုဝ်ၼၼ်ႉ မၼ်းယူႇတီႈႁူဝ်ၼႃႈမၼ်းၽွင်ႈဢိူဝ်ႈ ၵွပ်ႈၼၼ် သင်မႂ်းလိူၵ်ႈလႆႈၵေႃႈ လိူၵ်ႈယူႇၸွမ်းႁူဝ်ၼႃႈလီလီဢိတ်ႉၼိုင်ႈလႄႈ”
“မႂ်းဢမ်ႇၸႂ်ႈသိုၵ်းမႂ်းတေပွင်ႇၸႂ်ယူႇႁႃႉ ၵဝ်လႆႈထူပ်းၸိူင်ႉႁိုဝ်”
“ၵဝ်ဢမ်ႇပွင်ႇၸႂ် ၵူၺ်းၵႃႈ မႂ်းၵေႃႈယၢမ်ႈပဵၼ်ၵူၼ်းမိူင်းယူႇ မႂ်းတႄႉတေပွင်ႇၸႂ်ဢမ်ႇၸႂ်ႈႁႃႉ”
လွင်ႈၶႂ်ႈဢုပ်ႇလႄႈဢုပ်ႇ လွင်ႈၶႂ်ႈလၢတ်ႈလႄႈလၢတ်ႈ ၽႂ်ၵေႃႈဢမ်ႇႁူႉလႆႈၵၢင်ၸႂ်ၽႂ်တေႉတေႉ ဝႃႈမၼ်းလႆႈထူပ်းမႃးၸိူင်ႉႁိုဝ် ပဵၼ်ၸိူင်ႉႁိုဝ်ဝႆႉ။ ၵူၺ်းၵႃႈ ၼမ်ႉလဝ်ႈၼၼ်ႉၵေႃႈ ႁဵတ်းႁႂ်ႈႁတ်းမႃးဢိူဝ်ႈ။
ၼပ်ႉယမ်သေ
ၶူမ်ၽၢတ်ႇ
28/10/2026
