ၵၢပ်ႈပၢၼ်ဝၢၼ်ႈမိူင်းလႅၵ်ႈလၢႆႈ ၶိုၼ်ႈယႂ်ႇၶိုၼ်ႈသၢင်ႉၶိုတ်းၵၢပ်ႈမႃးၵူႈမိုဝ်ႈၵူႈဝၼ်းတိၵ်းတိၵ်းယဝ်ႉလႄႈ လွင်ႈမၢပ်ႇလွင်ႈလႅၼ်ၽၢမ်းၵၼ်ၵေႃႈငၢႆႈတႄႉတႄႉ။ လွင်ႈဢမ်ႇၸိုဝ်ႈဢမ်ႇၸႂ်ႈၵေႃႈ ၸၢင်ႈမေႃပဵၼ်တေႉမႃးယဝ်ႉဢိူဝ်ႈ၊ လွင်ႈတေႉၵေႃႈယဵၼ်းပဵၼ်တီႈပိူၼ်ႈဢမ်ႇယုမ်ႇယမ်မႃးယဝ်ႉ။
မိူဝ်ႈယၢမ်း ၸၢႆးသႂ် ၼင်ႈလဵၼ်ႈၵဵမ်းယူႇၼၼ်ႉ မီးၶေႃႈၵႂၢမ်းတၵ်ႉၸူးမႃး ၼၼ်ႉတႄႉပဵၼ်သၢဝ်မၼ်းယဝ်ႉဝႃႈ မၼ်းၵေႃႈပိုတ်ႇတူၺ်းသေ
“ႁဵတ်းႁင်ယူႇသူ”
မၼ်းၸၢႆးၵေႃႈတူၺ်းယဝ်ႉသေ တွပ်ႇပွတ်းပွတ်းၵႂႃႇ “ၵမ်ႉထူဝ်းႁႃၼ”
ဝၢႆးသေလဵၼ်ႈၵဵမ်းယဝ်ႉၵေႃႈ သိုပ်ႇၾူၼ်းၸူးသၢဝ်မၼ်းသေ ၵူၺ်းၵႃႈဢမ်ႇလႆႈႁပ်ႉလႄႈ လၢတ်ႈၶေႃႈၵႂၢမ်းတွပ်ႇၸူး “ပႆႇတၼ်းၶႃႈမိူဝ်ႈလဵဝ် ထူဝ်းဢမ်ႇလႆႈလၢတ်ႈတေႃႇတႄႉလႆႈယူႇ”
ၵူႈပွၵ်ႈပေႃးလူဝ်ႇဢုပ်ႇၵၼ်ၼႆ တေဢမ်ႇပေႃးသူင်ႇၶေႃႈၵႂၢမ်းလႄႈ တေဢမ်ႇပေႃးၵႆႉတႅမ်ႈတေႃႇၵၼ် သင်ဢမ်ႇၸမ်ပဵၼ်ၼႃႇ။ ပေႃးထၢမ်ဝႃႈ ႁဵတ်းႁင်ယူႇၼႆၵေႃႈ တေဢမ်ႇတွပ်ႇတေထႆႇၶႅပ်းႁၢင်ႈၼႄဢဝ်လၢႆလၢႆ။
မၼ်းၸၢႆးၵေႃႈ ဢမ်ႇဝႆႉၼႂ်းၸႂ်သင် ႁိုင်ယူႇသွင်သၢမ်ဝၼ်းၼႆႉ ဢူၺ်းၵေႃႉမၼ်းမႃးလႄႇတီႈႁိူၼ်းသေ
“မႂ်းလႄႈတင်းၼွင်ႉလၢဝ်ၽိတ်းၵၼ်ႁႃႉ”
“ဢမ်ႇၽိတ်း ႁဵတ်းႁင်လႃႇ”
“မၼ်းဝႃႈႁင်းၵဝ် မၼ်းၽိတ်းၵၼ်တင်းမႂ်းၼႆၼႃႇ”
“ႁႃးၵေႃႈတိုၵ်ႉလၢတ်ႈတေႃႇၵၼ်ယူႇ ၵူၺ်းၵႃႈမၼ်းၶႂ်ႈပိူင်ႈဝႆႉဢိူဝ်ႈမႂ်း”
“မၼ်းဝႃႈ..ၶိူဝ်ၽိတ်းၵၼ်ၼႆၼႃႇ မႄႈၶဝ်ဢမ်ႇယူႇလီ မႃးယွၼ်းယိမ်ငိုၼ်းၵဝ်ဢိူဝ်ႈ”
“မႂ်းပၼ်မၼ်းယူႇႁႃႉ”
“မၼ်းယွၼ်းယိမ်သွင်မိုၼ်ႇ ၵဝ်ပၼ်မၼ်းသွင်ႁဵင် ၶွင်ၵဝ်တမ်ႉဢမ်ႇမီးငိုၼ်းၵွၼ်ႇလႄႇမေႃႉ”
“မၼ်းလၢတ်ႈၵဝ်မႃးယူႇဢိူဝ်ႈ ၵဝ်ဝႃႈၵဝ်ဢမ်ႇမီးငိုၼ်းၼႂ်းပၢၼ်ႇ တေဢဝ်တူဝ်ငိုၼ်းၵႂႃႇပၼ်ၼႆ သမ်ႉဝႃႈႁႂ်ႈဢူၼ်းပၼ်ၼႆဢိူဝ်ႈၼႆႉ မၼ်းမီးတီႈႁိူၼ်းယဝ်ႉၼႆ မၼ်းတေမိူဝ်းႁိူၼ်းၵေႃႈတင်းဢမ်ႇလၢတ်ႈၵဝ်ႁေၶေႃႈ”
“မႂ်းသူင်ႇပၼ်ယဝ်ႉႁႃႉ”
“ၵဝ်ဢၢင်ႈဝႃႈတေဢွၵ်ႇၵႂႃႇသႂ်ႇငိုၼ်းယူႇဢိူဝ်ႈၼႆႉ”
“ၵဝ်ဝႃႈလွင်ႈၼႆႉ မၼ်းၶႂ်ႈမိူၼ်ႁိုဝ်မိူၼ်ႁိုဝ်ဝႆႉမႂ်း”
“ဢိူဝ်ႈ မိူၼ်မၼ်းလႅၵ်ႈလၢႆႈမႃးၵျႃႉဢိူဝ်ႈၼႆႉၵဝ်ဝႃႈ မၢင်ပွၵ်ႈၵေႃႈ ၵဝ်လၵ်ႉဝူၼ်ႉယူႇမၼ်းမီးမႂ်ႇထႅင်ႈယဝ်ႉႁႃႉၼႆ ၵဝ်ထူဝ်းႁႃလၢႆပွၵ်ႈယဝ်ႉ မၼ်းဢမ်ႇႁပ်ႉႁေပွၵ်ႈ”
“ၵဝ်ဝႃႈ ၵူၼ်းၸိူင်ႉၼင်ႇၼွင်ႉလၢဝ်ၼႆႉ ပေႃးဢမ်ႇၵိၼ်းၼႃႇမၼ်းတင်းဢမ်ႇႁတ်းယွၼ်းတၢင်းၸွႆႈထႅမ်ပိူၼ်ႈၼႆ ယူႇယူႇမႃးယွၼ်းငိုၼ်းၸိူင်ႉၼႆၼႆႉ ၸွင်ႇၶႂ်ႈလၢၵ်ႇလၢႆးဝႆႉႁႃႉမႂ်းဝႃႈ”
“ၵဝ်ၵေႃႈဝႃႈယူႇ ၸူဝ်ႈပဵၼ်ၸူႉၵၼ်မႃးၼႆႉ ပေႃးဝႃႈလွင်ႈငိုၼ်းလွင်ႈတွင်းၼႆ မၼ်းဝႆႉၵႃႈၶၼ်ၼႃႇ ဢမ်ႇတွၼ်ႉယွၼ်း ဢမ်ႇတွၼ်ႉႁႂ်ႈၸၢႆႇပၼ်သိုဝ်ႉပၼ်မၼ်းသေပွၵ်ႈ”
“ၼၼ်ႉယဝ်ႉ..”
“လၢတ်ႈတေႃႇမၼ်းတူၺ်းလူး”
“သူယူႇလႂ်မိူဝ်ႈလဵဝ်” ၸၢႆးသႂ်ၵေႃႈထၢမ်ၵႂႃႇတီႈၵေႃႉႁၵ်ႉမၼ်းယဝ်ႉ။
“မီးၸိူင်ႉႁိုဝ်”
“ၶႂ်ႈႁၼ်ၼႃႈသူၵူၺ်း ႁဝ်းၸႂ်ထိုင်”
“ႁဝ်းမႃးယူႇတီႈႁိူၼ်းယဝ်ႉ မႄႈႁဝ်းဢမ်ႇယူႇလီလၢတ်ႈသူယဝ်ႉ”
“ၸိူင်ႉၼၼ်ႁႃႉ”
“လႅင်းဢမ်ႇလီတီႈၼႆႈ”
ယူႇၸူဝ်ႈၼိုင်ႈ တီႈႁိူၼ်းၸၢႆးသႂ်ၵေႃႈ မီးၵူၼ်းမႃးထႅင်ႈ
“ၸၢႆးသႂ် ႁဝ်းဢမ်ႇႁၼ်လၢဝ်ၵႂႃႇႁဵတ်းၵၢၼ်လၢႆဝၼ်းယဝ်ႉ” ဢူၺ်းၵေႃႉၼွင်ႉလၢဝ်
“မၼ်းလၢတ်ႈဝႃႈမႄႈဢမ်ႇယူႇလီမိူဝ်းႁိူၼ်းၼႆ”
“မၼ်းတမ်ႉဢမ်ႇလၢတ်ႈတီႈႁဵတ်းၵၢၼ်လႃႇထၢၼ်ႈၼၼ် မၼ်းႁၢႆၵႂႃႇသၢမ်သီႇဝၼ်းယဝ်ႉဢိူဝ်ႈၼႆႉ”
“ၸႂ်ဢမ်ႇလီယဝ်ႉၼႆႉၵဝ်”
“မိူဝ်းတူၺ်းတီႈႁွင်ႈမၼ်းလီယူဝ်ႉပေႃးၼၼ်”
ၶဝ်သမ်ႉပေႃးလိုမ်းယဝ်ႉဝႃႈ ဢၼ်ၼွင်ႉလၢဝ်လၢတ်ႈမီးတီႈႁိူၼ်းၼႆၼၼ်ႉယဝ်ႉ။
ဢွၼ်ၵၼ်ၵႂႃႇႁွင်ႉၵႂႃႇတွႆႇၼႃႈၽၵ်းတူႁွင်ႈၼၼ်ႉ ယူႇၸူဝ်ႈၼိုင်ႈ ၽၵ်းတူၵေႃႈၽုၺ်ႇဢွၵ်ႇ။ လႆႈႁၼ်ၾၢင်ႁၢင်ႈၼွင်ႉလၢဝ် သမ်ႉပေႃးဢမ်ႇလီသေဢိတ်း ၼင်ႇဝႃႈမီးလွင်ႈသုၵ်ႉၸႂ်ၼႃႇၼၼ်ႉယဝ်ႈ။
“ၸိုင်ဝႃႈမိူဝ်းႁိူၼ်း”
ၼွင်ႉလၢဝ်ၵေႃႈႁႆႈဢွၵ်ႇမႃးသေ
“ယႃႇပေမႃးၸူးၶႃႈယဝ်ႉၼႃ”
“ပဵၼ်သင် သူပဵၼ်သင်လႃႇလၢဝ်”
“ႁဝ်းဢမ်ႇပဵၼ်သင်”
“လၢတ်ႈႁဝ်းလႄႈ”
“ႁဝ်းဢမ်ႇပဵၼ်သင်တေႉဢိူဝ်ႈ မိူဝ်းၶိုၼ်းလႄႈ”
“ႁဝ်းဝႃႈတေဢဝ်ငိုၼ်းမႃးပၼ်”
“မၼ်းယွၼ်းငိုၼ်းသူႁႃႉ”
သဵင်တီႈၼၼ်ႈၵိုင်ႉၵၢင်ႉယဵၼ်ၵႂႃႇၼင်ႇဢမ်ႇမီးၵူၼ်းယဝ်ႉ။
“ၽႂ်!!..”
ၶမ်ႈၼိုင်ႈၼွင်ႉလၢဝ်ႁဵတ်းၵၢၼ်မႃးႁွတ်ႈႁိူၼ်းလိုၵ်းၼႃႇယဝ်ႉသေ တူၺ်းၸိူင်းပွတ်းၼႂ်းၾဵတ်ႉၸွမ်းၼၼ်ႉယဝ်ႉ ၵႂႃႇတဵၵ်းသႂ်ႇၺႃးလိင်ႉဢၼ်ၼိုင်ႈ ၵူၺ်းၵႃႈဢမ်ႇပဵၼ်သင် ၽုၺ်ႇၵႂၢမ်းသေပႃးၶဝ်ႈၼႂ်းႁွင်ႈၼမ်ႉ ဢၢပ်ႇၼမ်ႉလၢႆႈၶူဝ်း ၶိုၼ်ႈထၢင်ၵႂႃႇၸွမ်း။
ၽိူဝ်ႇၵၢင်ၼႂ်မႃး မီးၶွင်ႉဢၼ်ၼိုင်ႈတၵ်ႉမႃး ပႃးတင်းၶႅပ်းႁၢင်ႈၼႃႈတႃၼွင်ႉလၢဝ် ဢၼ်မီးယူႇတီႈၼၼ်ႈယၢမ်းၼၼ်ႉၵမ်းလဵဝ် ယၵ်ႉတူၺ်းၾူၼ်းယူႇလႄႈ။
“မႂ်ႇသုင်ၼွင်ႉသၢဝ်”
“မႂ်းပဵၼ်ၽႂ် မႂ်းမီးယူႇလႂ်”
“ဢူဝ်ႉ ဢမ်ႇႁၼ်ႁဝ်းႁႃႉ ႁဝ်းၵေႃႈပဵၼ်သူၼႆႉယဝ်ႉ ၵေႃႉႁၵ်ႉလဝ်းတေႉလူး ၵႂႃႇၵဝ်းမၼ်းလီႁိုဝ်”
“မႂ်းၶႂ်ႈလႆႈသင်”
“ၶႂ်ႈဢၼ်မီးယူႇၼႂ်းၾူၼ်းသူၼႆႉ”
“ပေႃးၵဝ်ဢမ်ႇပၼ်လူး”
“မႂ်းတေယူႇလႆႈယူႇႁႃႉ ဢူၺ်းၵေႃႉမႂ်းၵေႃႉႁၵ်ႉမႂ်းပေႃႈမႄႈမႂ်းတေပဵၼ်ႁိုဝ်ၸွင်ႇၶႂ်ႈႁူႉၼႄႇ”
“မႂ်းတေႁဵတ်းသင်လႃႇ”
“မၼ်းတေပဵၼ်ၸိူင်ႉၼင်ႇမႂ်းပဵၼ်ၼႆႉၼႃႇ”
“ဢဝ်လႄႈ မႂ်းၶႂ်ႈလႆႈၵေႃႈ”
“ဢမ်ႇ မၼ်းငၢႆႈၼႃႇ မႂ်းတေလႆႈႁဵတ်းၵၢၼ်ပၼ်ၵဝ်ဢိူဝ်ႈ”
“တေႁႂ်ႈၵဝ်ႁဵတ်းသင်”
“ယွၼ်းႁိမ်ငိုၼ်းၶဝ်လႄႈ ယဝ်ႉၵေႃႈပႂ်ႉထွၼ်ငိုၼ်းပၼ်ၵဝ်”
“ဢမ်ႇ..ၵဝ်ႁဵတ်းဢမ်ႇလႆႈ”
“မႂ်းႁဵတ်းဢမ်ႇလႆႈၵေႃႈ ၵဝ်ၵေႃႉတေႁဵတ်းၵူၺ်း..”
ၾူၼ်းမၼ်းၵေႃႈ ႁဵတ်းၵၢၼ်ႁင်းၵူၺ်းမၼ်း ၼင်ႇဝႃႈမီးတၢင်ႇၵေႃႉလဵၼ်ႈဝႆႉယူႇယဝ်ႉ၊ ပိၵ်ႉယဝ်ႉၵေႃႈ ၽုၺ်ႇႁင်းၵူၺ်း တဵၵ်းသင်ႁဵတ်းသင်ၵေႃႈဢမ်ႇလႆႈသေမဵဝ်း ယူႇဢမ်ႇသိူဝ်းၼွၼ်းဢမ်ႇလႆႈ ၵႂႃႇလႂ်ပႆလႂ်ၵေႃႈ မၼ်းၸွမ်းႁူႉၸွမ်းႁၼ်ယူႇၵူႈတီႈ ထူဝ်းလွၵ်ႇယူႇၵူႈတၢင်း ဢဝ်မၼ်းသမ်ႉပေႃးဢမ်ႇၸၢင်ႈၵႂႃႇတၢင်းလႂ်သေ သမ်ႉပေႃးၶႂ်ႈယွင်ႇၵႂႃႇႁင်းမၼ်းယဝ်ႉ။
တေလၢတ်ႈပိူၼ်ႈၵေႃႈဢမ်ႇႁတ်း ၵူဝ်ဢူၺ်းၵေႃႉမၼ်းတေၺႃးၵိၼ်ၸိူင်ႉၼင်ႇမၼ်းၼႆႉလႄႈ ဢမ်ႇႁတ်းလၢတ်ႈ။ ငိုၼ်းမၼ်းဢၼ်မီးၼႂ်းပၢၼ်ႇၼၼ်ႉၵေႃႈ ဢမ်ႇၵိုတ်းသင်သေဢိတ်းယဝ်ႉၼႃႇ။
ၵူၼ်းႁူႉၸၵ်းၵူၼ်းႁိမ်းၸမ် ဢၼ်မၼ်းယိမ်ငိုၼ်းၵႂႃႇၸိူဝ်းၼၼ်ႉၵေႃႈ ပေႃးႁၼ်ၼႃႈၼႆ ဢွၼ်ၵၼ်မႃးယွၼ်းၼီႈမၼ်း သမ်ႉပေႃးဢမ်ႇႁတ်းၵႂႃႇလႂ်ယဝ်ႉ။
ဝူၼ်ႉသင်ပေႃးဢမ်ႇပွင်ႇယဝ်ႉ ဝူၼ်ႉပွတ်းထိုင်တီႈမတ်ႉၸိူၵ်ႈဝႆႉယူႇယဝ်ႉဢိူဝ်ႈ၊ ဢူၺ်းၵေႃႉမၼ်းမႃးသေလႄႈ လႆႈၽုၺ်ႇၽၵ်းတူပၼ်ယူႇယဝ်ႉၼႆႉၼႃႇ။
ၶဝ်ၵေႃႈဢွၼ်ၵၼ်ထၢမ်ႁႂ်ႈပေႃးႁူႉလွင်ႈႁူႉတၢင်းသေ ႁႃလၢႆးၸွႆႈထႅမ်ၵႄႈၶႆၸွႆႈမၼ်းၵႂႃႇယူႇယဝ်ႉ။ ပၢၼ်ႇမၼ်းၵေႃႈလႆႈပိၵ်ႉဢိုတ်းၵႂႃႇသေ ၾူၼ်းမၼ်းၵေႃႈ လႆႈပႅတ်ႈၵႂႃႇၵူၺ်းယဝ်ႉ ၶေႃႈမုၼ်းၸိူဝ်းၼၼ်ႉၵေႃႈ ဢမ်ႇလီဢဝ်ၶိုၼ်းယဝ်ႉလႄႈ ငိုၼ်းမၼ်းၼႆၵေႃႈၵိုတ်းတူဝ်ငိုၼ်းဝႆႉၵူၺ်းယဝ်ႉ။
ဢမ်ႇႁိုင် ဝၢႆးၼၼ်ႉ မီးၵူၼ်းဢွၼ်ၵၼ်မႃးပိုၼ်ၽၢဝ်ႇဝႃႈ မၼ်းပဵၼ်ၵူၼ်းလႅၼ်ၵိၼ်ငိုၼ်းပိူၼ်ႈၼႆထႅင်ႈ တင်းၶႅပ်းႁၢင်ႈမၼ်းသေ တင်းသၢၵ်ႈသေႇဢၼ်မၼ်းလႅၼ်ၵိၼ်ပိူၼ်ႈၼၼ်ႉ ပေႃးဝၢၵ်ႇပေႃးဝိူဝ်ယူႇသဵင်ႈ။
ၵူၼ်းၵေႃႉၼၼ်ႉ ဢဝ်ၶေႃႈမုၼ်းမၼ်းၵႂႃႇလႆႈယဝ်ႉလႄႈ ၶိုၼ်းမႄးသၢင်ႈသွင်ႉမႂ်ႇယဝ်ႉ ႁႃလႅၼ်ၵိၼ်ပိူၼ်ႈထႅင်ႈယူႇ။
ၼွင်ႉလၢဝ်ၵေႃႈ လိူဝ်သေၵူၼ်းႁူႉၸၵ်း ၵူၼ်းမိုတ်ႈၵူၺ်းၼၼ်ႉ ဢမ်ႇႁပ်ႉၽႂ်ယဝ်ႉလႄႈ ဢမ်ႇသႂ်ႇႁၢင်ႈတူဝ်တေႉမၼ်းယဝ်ႉ၊ ၸိုဝ်ႈသဵင်မၼ်းဢၼ်ၶဝ်ယႃႉလူႉၵႂႃႇၼၼ်ႉၵေႃႈ ဢူၺ်းၵေႃႉမၼ်းၸွႆႈၵႄႈပၼ်ၵႂႃႇသေ ၼင်ႇႁိုဝ်တေဢမ်ႇၸၢင်ႈဢၢင်ႈၸိုဝ်ႈသဵင်လႄႈ ႁၢင်ႈမၼ်းၼၼ်ႉ တႅမ်ႈလိၵ်ႈယိုၼ်ႈထိုင်ၸုမ်းသိုဝ်ႇၶၢဝ်ႇၶဝ် ႁႂ်ႈၸွႆႈသေဢမ်ႇၵႃး ပၼ်ၾၢင်ႉၽေးတၢင်းဢွၼ်ႇလၢႆးၸိူင်ႉၼႆပႃးယူႇယဝ်ႉ။
လိင်ႉ ဢၼ်သူင်ႇမႃး ဢၼ်ဝၢင်းဝႆႉ ဢမ်ႇႁူႉငိူၼ်ႈငဝ်ႈ ဢမ်ႇႁၼ်တီႈမႃးၸိူဝ်းၼႆႉ ဢမ်ႇၸႂ်ႈတီႈလီတဵၵ်းလဵၼ်ႈလႄႈ မၢင်ၽဝ်ႇမၼ်းၸၢင်ႈပဵၼ်ႁႅဝ်ႉဢၼ်ပိူၼ်ႈၵၢင်ဝႆႉ တႃႇႁႅၵ်ႉဢဝ်ၶေႃႈမုၼ်းႁဝ်းၵႂႃႇလႆႈယဝ်ႉ။
ပေႃးဝႃႈၶဝ်ႁႅၵ်ႉမႃးလႆႈယဝ်ႉၼႆၾူၼ်းႁဝ်းၼႆႉ မိူၼ်တင်းပဵၼ်ၶွင်ၶဝ်ၵူၺ်း ၶႂ်ႈႁဵတ်းသင်ၵေႃႈလႆႈ မိူၼ်ၼင်ႇႁဝ်းလဵၼ်ႈၼၼ်ႉၵူႈလွင်ႈ၊ ႁဝ်းလၢတ်ႈသင်ၵေႃႈၶဝ်ႁူႉၶဝ်ငိၼ်းၸွမ်းၵူႈၶေႃႈၵူႈၵမ်းယဝ်ႉ။ ၶဝ်ၶႂ်ႈထႆႇၶႅပ်းႁၢင်ႈႁဝ်းၸိူင်ႉႁိုဝ်ၵေႃႈလႆႈ ၶေႃႈမုၼ်းႁဝ်းၶႅပ်းႁၢင်ႈႁဝ်းဢၼ်မီးယူႇၼႂ်းၾူၼ်းၼၼ်ႉ ၵႂႃႇမီးတီႈၶဝ်မူတ်းလႄႈ ဢၵွင်ႉဢၼ်ႁဝ်းသၢင်ႈဝႆႉၸိူဝ်းၼၼ်ႉ ၶဝ်ၶဝ်ႈလဵၼ်ႈလႆႈၸွမ်းၼင်ႇၵၢင်ႇၸႂ်ၶဝ်ယဝ်ႉ။ မၢင်ပွၵ်ႈၶဝ်တေပွႆႇမႅင်းၶဝ်ႈမႃးယူႇၼႂ်းၾူၼ်းႁဝ်းသေ ပႂ်ႉတူၺ်းၸွမ်းႁဝ်းၵူႈလွင်ႈ ၵူၺ်းၵႃႈဢမ်ႇႁဵတ်းသင်ႁဝ်းၵေႃႈမီး။
လိူဝ်သေလိင်ႉယဝ်ႉ မၢင်ပွၵ်ႈတေႁဵတ်းၶႅပ်းႁၢင်ႈ၊ ငဝ်းႁၢင်ႈ ၸိူဝ်းၼႆႉသူင်ႇမႃးပၼ်ယဝ်ႉ။ ႁဝ်းတႄႉတေႁၼ်ဝႃႈပဵၼ်ၶႅပ်းႁၢင်ႈလႄႈငဝ်းႁၢင်ႈမွၵ်ႈၼၼ်ႉၵူၺ်း ႁဝ်းတင်းဢမ်ႇႁူႉတူဝ်ၵွၼ်ႇယဝ်ႉဝႃႈ ႁဝ်းထုၵ်ႇၶဝ်ႁႅၵ်ႉၵႂႃႇယဝ်ႉၼႆ။
သင်ဝႃႈဝႆႉဝၢင်းၾူၼ်းတီႈဢၼ် ႁၼ်ၶွင်လပ်ႉႁဝ်းလႆႈၼႆၵေႃႈ ၶဝ်ၵေႃႈႁၼ်လႆႈယဝ်ႉ။
လိူဝ်သေၼၼ်ႉ ၵူၼ်းတၢၼ်ႇမိုတ်ႈႁိုဝ်ၸမ်ၸႂ်ၵေႃႈယဝ်ႉ ပေႃးဝႃႈယွၼ်းယိမ်ငိုၼ်းၼႆ ထုၵ်ႇလီလႆႈၾၢင်ႉတူၺ်းတႄႉတႄႉ သမ်ႉဝႃႈပဵၼ်ၵူၼ်းတႄႉၵေႃႈ ဢူၺ်းၵေႃႉတႄႉၵေႃႈ တႃႇလႆႈၶိုၼ်းၼႆႉမၼ်းယၢပ်ႇ။
ပေႃးဝႃႈႁၼ်ၵူၼ်းယွၼ်းပဵၼ်ၵေႃႉမႃး ၸိုဝ်ႈတေႉႁိုဝ်ဢမ်ႇတေႉၼၼ်ႉ ႁႂ်ႈတူၺ်းၼႂ်းၶွင်ႉၶဝ် ၶၢဝ်းယၢမ်းၶဝ်တၢင်ႇၶေႃႈမုၼ်းၶႅပ်းႁၢင်ႈၼၼ်ႉ ၸွင်ႇမၼ်းသွၼ်ႉၵၼ် ၸွင်ႇၸႂ်ႈဝၼ်းလဵဝ်ၵၼ် လႄႈ တူၺ်းလီလီဝႃႈၼႂ်းဝၼ်းလဵဝ်ၵူၺ်းၼၼ်ႉ မၼ်းတၢင်ႇၶႅပ်းႁၢင်ႈပဵၼ်လၢႆၽႃၸိူင်ႉၼၼ် ႁႂ်ႈႁၼ်ဝႃႈ ၼႂ်းၶေႃႈမုၼ်းၶဝ်ၼၼ်ႉ ပဵၼ်တေႉမီးတေႉယူႇၼၼ်ႉယဝ်ႉ။
ပၢႆၵမ် – သႅၼ်ငဝ်း
13/08/2026
