တႂ်ႈငဝ်းလုၵ်ႈလိူၼ်လႅင်း ငိုၼ်းသႅင်ပႆယူႇၼိူဝ်သဵၼ်ႈတၢင်းဢၼ်တဵတ်ႇယဵၼ်လူင်ၼၼ်ႉ ၼင်ႇဝႃႈဢမ်ႇၵူဝ်သင်ယဝ်ႉလႄႈ လဵပ်ႈပၼ်ႇၵႂႃႇတၢင်းတႂ်ႈႁူမ်ႈမႆႉဢၼ်သုမ်ႇငိုပ်းတၼ် ဢၼ်ယၢမ်ႈပဵၼ်တီႈသေႃႉႁူမ်ႈၵူႈပွၵ်ႈၼၼ်ႉယဝ်ႉ ယၢမ်းလဵဝ်ပဵၼ်ယုမ်းၼၢမ်သုမ်ႇႁူၵ်ႉ ႁိူၼ်းလင်ၼၼ်ႉၵေႃႈ ပဵၼ်ႁိူၼ်းဢမ်ႇမီးၵူၼ်းယူႇၵႂႃႇပႅတ်ႈယဝ်ႉၼႃႇ။ မုင်ႈႁၼ်ၵႂႃႇယဝ်ႉၵေႃႈ ၶိုၼ်းသိုပ်ႇပွၵ်ႈမႃးၼင်ႈယူႇတီႈၼႃႈသႅင်ႇၵဝ်ႇၶဝ်ၼၼ်ႉသေ ထူၺ်ႈၸႂ်လူင် ၽိုဝ်ႈၽိုဝ်ႈယူႇႁင်းမၼ်း။
မိူဝ်ႈလႂ်မီးၵူၼ်းႁဵတ်းႁႂ်ႈႁူဝ်ၸႂ်မၼ်းသၼ်ႇဝႆ မၼ်းၵေႃႈၶုၵ်းၸႂ်လႆႈသႅင်ပိုၼ်းမႃးယဝ်ႉ၊ ၵူၺ်းၵႃႈ မိူဝ်ႈမၼ်းၼင်ႈလိုဝ်ႈယူႇၼၼ်ႉ ၼႂ်းတႃမၼ်းႁၼ်ၸွမ်သႅင်ပေႃးဢမ်ႇၽၢတ်ႇလႆႈ ယၢမ်းၼၼ်သမ်ႉမႃးမီးယူႇတၢင်းၼႃႈမၼ်းၼၼ်ႉသေ ဢဝ်မၼ်းပေႃးတူၵ်းၸႂ်လူင်ၵႂႃႇယူႇ။
“ဢမ်ႇၸႂ်ႈလၢႆးမၼ်းယဝ်ႉ” သီႁူသီတႃတူၺ်းၵေႃႈ ၵွႆႈယူႇၵွႆႈမႃးၸမ်တိၵ်းတိၵ်းယဝ်ႉၼႃႇ။
“မႃးႁဵတ်းသင်လႃႇ”
“ယူႇယူႇၵေႃႈလႅၼ်ႈဢွၵ်ႇမႃး”
“ပဵၼ်သူတေႉလူး ယူဝ်ဝႃႈၽဵတ်ႇ”
“တေႁႂ်ႈႁဝ်းၸွမ်းႁႃပၼ်ၼႄႇ ၵူၼ်းၵေႃႉၼၼ်” မႃးၼင်ႈႁိမ်းငိုၼ်းသႅင်သေလၢတ်ႈယဝ်ႉ။
“ဢီႈသင်သူ”
“ၵူၼ်းၵေႃႉဢၼ်မီးယူႇၼႂ်းႁူဝ်ၸႂ်သူၼၼ်ႉဢိူဝ်ႈ”
ငိုၼ်းသႅင်ထူၺ်ႈၸႂ်လူင်ၵမ်ႉၼိုင်ႈယဝ်ႉ “ၶဝ်ဢမ်ႇမီးဝၼ်းပွၵ်ႈမႃးၶိုၼ်းလေႃႇ”
“သင်ဝႃႈၵူၼ်းၵေႃႉၼၼ်ႉဢမ်ႇၸႂ်ႈႁဝ်းသေပဵၼ်မၼ်း သူၵေႃႈတေမီးတၢင်းသိူဝ်းဢမ်ႇၸႂ်ႈႁိုဝ်”
“ပူၼ်ႉမႃးပဵၼ်သိပ်းပီပၢႆယဝ်ႉ ၵူႈလွင်ႈမၼ်းၵေႃႈဢမ်ႇမိူၼ်ၵဝ်ႇလႆႈယဝ်ႉလေႃႇ ၶေးမၼ်းတေမီးၼႃႈႁိူၼ်းမီးလုၵ်ႈမီးမေးယဝ်ႉတင်းဢမ်ႇႁူႉ”
“ၵူၺ်းၵႃႈသူၵေႃႈပႂ်ႉမွင်းမၼ်းယူႇဢမ်ႇၸႂ်ႈႁိုဝ်”
သဵင်ၵေႃႈယဵၼ်ၵႂႃႇ ၵိုတ်းသဵင်လူမ်းထွင်းဝႂ်မႆႉၶွၼ်းၼိုင်ၼၼ်ႉၵူၺ်းသေ
“ႁဝ်းၵေႃႈဢမ်ႇႁူႉမိူၼ်ၵၼ်ဝႃႈႁဝ်းပႂ်ႉသင်ယူႇတေႉလႃႇ”
ၸွမ်သႅင်ႁၼ်ငိုၼ်းသႅင်ဝၢင်းမိုဝ်းယူႇႁိမ်းၶၢင်ႈၼၼ်ႉ မိုဝ်းမၼ်းၶွၼ်ၼိုင်ႈၶႂ်ႈၶိုင်ထိတူၺ်းယူႇ ၵူၺ်းၵႃႈ
“လိုၵ်းယဝ်ႉၵႂႃႇႁဝ်းမိူဝ်း”
“ပႂ်ႉႁဝ်းလႄႈ ႁဝ်းၵူဝ်ဢိူဝ်ႈ”
“သူလီၵူဝ်လိူဝ်ၽဵတ်ႇၸိူဝ်းၼႆႉၵွၼ်ႇ”
“လီၵူဝ်တီႈလႂ် ႁဝ်းလဝ်းပေႉတၢၼ်ႇၼႆႉ”
“မေႃထၢင်ႇယႂ်ႇတူဝ်ထႅင်ႈႁေ” ငိုၼ်းသႅင်တင်းလႅၼ်ႈတင်းလၢတ်ႈ “ထၢမ်လဵၼ်ႈလဵၼ်ႈၼႃ သူလၵ်ႉလႆႈၸႂ်ႁဝ်းယူႇၸွင်ႇၸႂ်ႈ”
“တွပ်ႇလဵၼ်ႈလဵၼ်ႈၼႃ ၸႂ်ႈယဝ်ႉ”
ယၢမ်းၵၢင်ၼႂ် ၸွမ်သႅင် လႄႈ ငိုၼ်းသႅင်တင်းပေႃႈၵေႃႈ ဢွၼ်ၵၼ်ၵႂႃႇထႆႇၶႅပ်းႁၢင်ႈၵၼ်ယဝ်ႉ၊ ငိုၼ်းသႅင်ၼႆၵေႃႈ မိူဝ်ႈၼႆႉႁၢင်ႈၶိူင်ႈႁၢင်ႈလီဝႆႉလိူဝ်သေၵူႈဝၼ်းဝၼ်းယူႇ။ ဢွၼ်ၵၼ်ထႆႇၶႅပ်းႁၢင်ႈႁူမ်ႈၵၼ်ၵႂႃႇ သၢမ်ၵေႃႉ၊ သွင်ၵေႃႉ၊ ၼိုင်ႈၵေႃႉသေလႄႈ တင်းၵူၼ်းထႆႇၶႅပ်းႁၢင်ႈ ၵူၼ်းႁၢင်ႈၶိူင်ႈသေ ဢွၼ်ၵႂႃႇႁႃထႆႇတီႈၼိုင်ႈယဝ်ႉတီႈၼိုင်ႈ ဝၼ်းၼိုင်ႈသမ်ႉပေႃးသုတ်းသဵင်ႈၵႂႃႇသေ၊ ၸင်ႇၸူဝ်းဝႄႉႁွင်ႉၵၼ်ၵိၼ်ၶဝ်ႈၶမ်ႈၵႂႃႇယဝ်ႉ။
ဢၼ်ၵိုတ်းလိူဝ်ၵေႃႈပၢင်ၶႅၵ်ႇၵူၺ်းယဝ်ႉ၊ ယိင်ႈၸဵဝ်းယိင်ႈလီလႄႈ ၶဝ်ၵေႃႈလိူၵ်ႈဝၼ်းသေၸတ်းႁဵတ်းၵႂႃႇ။ တင်းထၢမ်တင်းႁဵတ်းၶႅၵ်ႇၵႂႃႇမိူဝ်ႈလဵဝ်ၵၼ်ၼႆသေ ၸွမ်သႅင်ၵေႃႈ ၼႂ်းၸူဝ်ႈပၢၼ်မၼ်းၼၼ်ႉ ဢၢပ်ႈတေဝႃႈပဵၼ်ပွၵ်ႈဢွၼ်တၢင်းသုတ်းလႄႈပွၵ်ႈလိုၼ်းသုတ်းမိူၼ်ၵၼ် ဢူၺ်းၵေႃႉဢၼ်ၸမ်ၸႂ်မၼ်းၸိူဝ်းၼၼ်ႉ မႃးၵၼ်မူတ်းယဝ်ႉ။
ငိုၼ်းသႅင်တႄႉၵေႃႈဢမ်ႇလႆႈႁဵတ်းသင် ၵူႈလွင်ႈပဵၼ်ၸွမ်သႅင်ၸတ်းမူတ်းလႄႈ ၵူၺ်းမီးၶိူဝ်းႁွမ်ယူႇၸွမ်းမွၵ်ႈၼၼ်ႉၵူၺ်း။
“ဝၼ်းမိူဝ်ႈၼႆႉၵေႃႈမႃးထိုင် ယူဝ်ဝႃႈတေဢမ်ႇမီးဝၼ်းလႆႈႁၼ်ယဝ်ႉ”
တၢင်းၸူမ်းသိူဝ်းၼမ်ႉတႃသမ်ႉပေႃးၸိုမ်ႉႁူၺ်ႇတႃမႃးယူႇ။
ဢွၼ်ၵၼ်ၵၼ်ႇတေႃးပေႃႈလႄႈၵူၼ်းထဝ်ႈၵူၼ်းၵႄႇသေယဝ်ႉ ပၢင်ၵိၼ်လဵင်ႉၶဝ်ၵေႃႈတႄႇၵႂႃႇ၊ ၵေႃႉပဵၼ်ပေႃႈလႆႈႁၼ်လုၵ်ႈယိင်းမၼ်း ပဵၼ်ႁေႃပဵၼ်ႁိူၼ်းယဝ်ႉၼႆၵေႃႈ ၸူမ်းၸူမ်းသမ်ႉပေႃးႁႆႈမႃးမိူၼ်ၵၼ်ယဝ်ႉ။
ၵွပ်ႈပဵၼ်ၵၢင်ၶမ်ႈလႄႈ လဵင်ႉလီၵၼ်ဝၢၼ်သေ ၸုမ်းဢူၺ်းၵေႃႉၼၼ်ႉတႄႉၵိၼ်ၵျေႃႇၵၼ်တေႃႇပေႃးလိုၵ်း လဵင်ႉလဝ်ႈသွင်ၵေႃႉၽူဝ်မေးသမ်ႉပေႃးမဝ်းယဝ်ႉၵေႃႈ ၶင်ဝႆႉၼႂ်းႁိူၼ်း ဢမ်ႇပၼ်ၶႃဢွၵ်ႇမႃးယဝ်ႉၼႃႇ။
ငိုၼ်းသႅင်ၼၼ်ႉ မဝ်းပၼ်ဢေႃႉဢေႃႉႁၢၵ်ႈႁၢၵ်ႈ ၸွမ်သႅင်ၵေႃႈၸၢင်ႈတေႁဵတ်းႁိုဝ် လႆႈလုမ်းလႃးမၼ်းၵႂႃႇတင်းၶိုၼ်းယဝ်ႉ။
သမ်ႉဝႃႈႁဵတ်းၶႅၵ်ႇၵၼ်ၼႆသေတႃႉ ၵူၼ်းတီႈႁဵတ်းၵၼ်တႄႉ ဢမ်ႇႁူႉၸွမ်းလႄႈ ၵႂႃႇႁဵတ်းၵၢၼ်ၼႆၵေႃႈ ဢမ်ႇပၼ်ပိူၼ်ႈႁူႉဝႃႈၶႃဢဝ်ၵၼ်ယဝ်ႉ။
“မိူဝ်ႈၼႆႉ ငိုၼ်းသႅင်ဢမ်ႇမႃးႁဵတ်းၵၢၼ်” ၸွမ်သႅင်လၢတ်ႈၵႂႃႇတီႈ ၽူႈမၢႆၸွႆႈငိုၼ်းသႅင် ၼွင်ႉၽွင်းၼၼ်ႉၵႂႃႇယဝ်ႉ။
“ဢေႃႈ..မိူဝ်ႈၼႆႉမီးပၢင်ၵုမ်ၶႃႈ”
“ႁူႉယဝ်ႉ..ၵႂႃႇႁၢင်ႈႁႅၼ်းလႆႈယဝ်ႉ”
ငိုၼ်းသႅင်တိုၼ်ႇမႃး သဵင်သမ်ႉပေႃးယဵၼ်သီႇသီႇ ဢွၵ်ႇမႃးတူၺ်းၼွၵ်ႈႁိူၼ်း ပိူၼ်ႈပေႃးသိမ်းၵႂႃႇသဵင်ႈယဝ်ႉၼႃႇ၊ ၵူၺ်းလႆႈႁၼ်ပေႃႈၼင်ႈယူႇတီႈၼွၵ်ႈႁိူၼ်းၼၼ်ႉသေ ငိုၼ်းသႅင်မႃးၼင်ႈၸွမ်းယဝ်ႉ။
“ပေႃႈ တူၺ်းသင်ယူႇလႃႇ” ၼင်ႈၵႂႃႇႁိမ်းပေႃႈၼၼ်ႉသေ
“ပေႃႈမီးတၢင်းသိူဝ်းတေႉယဝ်ႉ လုၵ်ႈယိင်း” ယၵ်ႉတူၺ်းၼႃႈငိုၼ်းသႅင်သေယုမ်ႉယူႇ။
ငိုၼ်းသႅင်ၵေႃႈယုမ်ႉၸူး ၼႂ်းႁူၺ်ႇတႃၼၼ်ႉတႄႉ ၸိုမ်းၼမ်ႉတႃဝႆႉယူႇယဝ်ႉၼႃႇ။ မိုင်ၼင်ႈယူႇၸိူင်ႉၼၼ်ၸူဝ်ႈၼိုင်ႈ ပေႃႈၵေႃႈဢဝ်တူဝ်မၼ်းလူမ်ႉဢိင်သႂ်ႇငိုၼ်းသႅင်သေ သဵင်ႁူဝ်ၸႂ်ပေႃႈၵေႃႈသုတ်းထွၼ်ႁၢႆၵႂႃႇလွႆးလွႆး ယူႇႁိမ်းၶၢင်ႈငိုၼ်းသႅင်ၼၼ်ႉယဝ်ႉ။
“ပေႃႈ..ပေႃႈ..ပေႃႈ…” ငိုၼ်းသႅင်တင်းႁွင်ႉတင်းႁႆႈ ၶဝ်ႇၶဝ်ႇၶွၼ်းၶွၼ်းပေႃႈမၼ်းယူႇတင်းႁိုင်ၵေႃႈ ပေႃႈဢမ်ႇလုၵ်ႉတိုၼ်ႇၶိုၼ်ႈမႃးၶိုၼ်းလႆႈယဝ်ႉ။
“ပေႃႈဢူၺ် ပေႃႈဢိူၺ် ပွႆႇယိင်းၵႂႃႇယဝ်ႉတေႉႁႃႉ”
သိုပ်ႇလူထႅင်ႈတွၼ်ႈတေမႃးၶႃႈ
