“မႃးယဝ်ႉႁႃႉ..” လႆႈငိၼ်းသဵင်ပေႃႈ လၢတ်ႈဢွၵ်ႇမႃး ၼင်ႇဝႃႈပႂ်ႉဝႆႉယူႇ လႆႈႁၼ်ၸွမ်သႅင်ၼႆၵေႃႈ “လုၵ်ႈၸၢႆးၵေႃႈမႃးၸွမ်းႁႃႈ”
ၸွမ်သႅင်ယိပ်းတင်းထူင်ၶူဝ်းမႃးပၼ်ယူႇ။
“ၵိၼ်ၶဝ်ႈမႃးယဝ်ႉၼႄႇလုၵ်ႈ”
“ပႆႇလႆႈၵိၼ်ၶႃႈ”
“ပေႃႈႁဵတ်းၶဝ်ႈၽၵ်းဝႆႉဢိူဝ်ႈ ဢွၼ်ၵၼ်ၵိၼ်ၶဝ်ႈႁေၵွၼ်ႇလႄႈ ” ၵႂႃႇၼႂ်းသွင်ႇၾႆးသေ ၵွၼ်ႉၶဝ်ႈပၼ်ၶႃၵႂႃႇ။
မိူဝ်ႈပေႃႈဢမ်ႇႁၼ်ၼၼ်ႉ ငိုၼ်းသႅင်ၵေႃႈ ဢဝ်ၼမ်ႉသႂ်ႇၼႂ်းၽၵ်းသေ ၸွမ်သႅင်ယၵ်ႉတူၺ်း သမ်ႉပေႃးဝူၼ်ႉၵႂင်ၸွမ်းယဝ်ႉ။ မၼ်းၸင်ႇတၵ်းဢဝ်ၽၵ်းၶူဝ်ႈၼႂ်းဝၢၼ်ႇၼၼ်ႉ ဢဝ်မႃးၵိၼ်သေ ၼႃႈသမ်ႉပေႃးႁူႇပေႃးႁမ်းလူင်ဝႆႉ မၼ်းၸဵမ်းႁႅင်းထိုင်တီႈ လႆႈၵိၼ်ၼမ်ႉသေဢိုၼ်ၵႂႃႇဢဝ်ယဝ်ႉ။
ၸွမ်သႅင်ၵေႃႈဢဝ်တင်းၶူဝ်းဢၼ်မၼ်းႁိဝ်ႈမႃးၼၼ်ႉ ပၼ်တီႈပေႃႈငိုၼ်းသႅင်သေယဝ်ႉ။
“ၼႆႉပဵၼ်သိူဝ်ႈၶူဝ်းၼုင်ႈ တႃႇထႆႇၶႅပ်းႁၢင်ႈၶႃႈဢေႃႈ မိူဝ်ႈၽုၵ်ႈၼႆႉ ဢွၼ်ၵၼ်ၵႂႃႇထႆႇၶႅပ်းႁၢင်ႈၵၼ်ဝႆႉၶႃႈၼႃ”
“လႆႈဢိူဝ်ႈလႆႈဢိူဝ်ႈ”
“ၶမ်ႈၼႆႉၵေႃႈ ႁဵတ်းၶႅၵ်ႇတီႈၼႆႈႁေယဝ်ႉၼႃႇ”
“လီဢေႃႈ”
ၵူၺ်းၵႃႈငိုၼ်းသႅင်တႄႉဢမ်ႇပေႃးလႅပ်ႈလီသေၵႃႈႁိုဝ် “တေဢဝ်ၽႃႈဢွၵ်ႇမႃးႁႅၼ်းပၼ်တီႈၼွၼ်း”
“ၼွၼ်းၸွမ်းၵၼ်ၼႂ်းႁွင်ႈၵေႃႈလႆႈယူႇလူးၼၼ်ႉ တီႈၼွၼ်းၵႂၢင်ႈပေႃးတၢၼ်ႇသင်ႁိုဝ်လႃႇ” ပေႃႈယၵ်ႉတူၺ်းငိုၼ်းသႅင်သေ ၸွမ်သႅင်တႄႉယုမ်ႉယုမ်ႉယူႇ။
“ပႆႇဢဝ်ၵၼ်ပိူၼ်ႈဢမ်ႇလီယူႇၸွမ်းၵၼ်ၼႆ ပေႃႈလၢတ်ႈယူႇသေႇသေႇႁိုဝ်လႃႇ”
“တေဢဝ်ယဝ်ႉလူး ဢသၢၵ်ႈပေႉပဵၼ်တၢၼ်ႇၼႆႉယဝ်ႉ တင်းတိုၵ်ႉတေလႆႈလၢတ်ႈမိူၼ်လုၵ်ႈဢွၼ်ႇယူႇၵႃႈ”
ဢမ်ႇၸၢင်ႈႁဵတ်းႁိုဝ် မၼ်းၵေႃႈမိူဝ်းသိူဝ်ႇၽႃႈယူႇၼႂ်းႁွင်ႈၼွၼ်းမၼ်းၼၼ်ႉယဝ်ႉ။
ၸွမ်သႅင်ၵေႃႈၶဝ်ႈမိူဝ်းၵႂႃႇၼႂ်းႁွင်ႈ လႆႈႁၼ်ႁွင်ႈဢၼ်ၵႂၢင်ႈယႂ်ႇ သိူဝ်ႈၶူဝ်းၵေႃႈဢမ်ႇၼမ်၊ ၶိူင်ႈႁဵတ်းႁၢင်ႈၵေႃႈဢမ်ႇၼမ် တူၺ်းယဝ်ႉယူႇၸိုၼ်ႈပၢင်ႇတႃတႄႉတႄႉ။
“ႁွင်ႈႁဝ်းဢမ်ႇတၼ်းႁဵတ်းဝိူဝ်လေႃႇၼႃႈ သင်ဢမ်ႇသင်ၵေႃႈ တေမီးၶီႈၽုၼ်ႇယူႇၵႃႈ ႁဝ်းၵေႃႈဢမ်ႇတၼ်းၽဵဝ်ႈမိူၼ်ၵၼ်”
“ၸႂ်ႉလႆႈယူႇၵူၺ်း”
“သူၼွၼ်းၼိူဝ်ၵူႇလႄႈ ႁဝ်းတေၼွၼ်းတီႈတႂ်ႈ”
“သူၼွၼ်းလႄႈ ၵူႇသူလူင် ၵမ်ႉတေၼွၼ်းဢမ်ႇလပ်းယဝ်ႉ”
“ဢမ်ႇပဵၼ်သင်လေႃႇ တူဝ်ယၢဝ်းပေႉတၢၼ်ႇၼၼ်ႉ သူတေႁဵတ်းႁိုဝ်ၼွၼ်းလႃႇ တီႈတႂ်ႈမၼ်းပွတ်း”
“ၼွၼ်းၸွမ်းၵၼ်ၼိူဝ်ၼႆႉလႄႈ”
“ယွင်ႇယဝ်ႉၼႄႇ ၸွင်ႇႁဝ်းၸႂ်ႈၽူဝ်မေးၵၼ်တေႉၵေႃႈဢမ်ႇၸႂ်ႈ” သွပ်ႉသႅပ်ႉလၢတ်ႈၵႂႃႇလွႆးလွႆးယဝ်ႉ။
“ႁဵတ်းႁႂ်ႈမၼ်းပဵၼ်တေႉႁေယဝ်ႉၼႃႇ”
“သူတေႁႂ်ႈႁဝ်းလိုပ်ႈၵႂႃႇၼွၼ်းၵၢင်ၸၢၼ်းပုၼ်ႉႁႃႉ”
ၸွမ်သႅင်ၼွၼ်းၵႂႃႇယဝ်ႉ ႁၼ်ငိုၼ်းသႅင်ၼွၼ်းယူႇတၢင်းတႂ်ႈ ဢမ်ႇယွမ်းလုၵ်ႉၶိုၼ်ႈမႃးလႄႈ
“မႃးၼွၼ်းၼိူဝ်ၵူႇသူလႄႈ ပေႃးဢမ်ႇၶႂ်ႈႁႂ်ႈႁဝ်းၵႂႃႇၼွၼ်းၸွမ်းတီႈၼၼ်ႈၵေႃႈ”
“ၵႅပ်ႈပေႃးတၢၼ်ႇၼႆႉသူဢမ်ႇၸၢင်ႈၼွၼ်းလေႃႇၼႃႈ”
ၸွမ်သႅင်ၵေႃႈဢဝ်တူဝ်မၼ်းၵႂႃႇၽိုတ်ႉသႂ်ႇငိုၼ်းသႅင်ၼၼ်ႉသေ
“မၼ်းၵႅပ်ႈတၢၼ်ႇႁိုဝ်လႃႇ”
သဵင်ၼၼ်ႉမေႃးယူႇႁိမ်းႁူ ငိုၼ်းသႅင်ဝၢႆႇၼႃႈၸူးၼင်ႇတူၵ်းၸႂ် ၵူၺ်းၵႃႈ ၼႃႈၽၢၵ်ႇမၼ်းၼၼ်ႉ သမ်ႉသိူၵ်ႈမႅၼ်ႈသႂ်ႇသူပ်းၸွမ်သႅင်ၼၼ်ႉဢဝ်လီလီ။ ၼႃႈမႆႈလိူတ်ႇလႅင်မႃးယဝ်ႉ ၸႂ်ၵေႃႈသၼ်ႇမႃး တေလၢတ်ႈသင်ၵေႃႈဢမ်ႇႁူႉယဝ်ႉ၊ ၽုၼ်ႇၽၢၼ်ႇလုၵ်ႉမႃးသေ
“ၼွၼ်းလႄႈ! ၼွၼ်းလႄႈ ႁဝ်းဢမ်ႇၼွၼ်းယဝ်ႉ”
“တေၵႂႃႇလႂ်လႃႇ!” ၸွမ်သႅင်ၵေႃႈလမ်းၵႂႃႇၸွမ်းၵမ်းလဵဝ်။
သိုပ်ႇလူထႅင်ႈတွၼ်ႈတေမႃးၶႃႈ
