တႄႇၸဵမ်မိူဝ်ႈပေႃႈထူပ်းၽေးၵိုင်ႉၵၢင်ႉၵႃးပိၼ်ႈ သၢမ်ပီပူၼ်ႉမႃး ဢဝ်ပဵၼ်ၶႃႁၵ်းပႅတ်ႈလႄႈ ၵႂႃႇလႂ်မႃးလႂ်ၵေႃႈလႆႈဢီးလေႃႉထူဝ်းယူႇတႃႇသေႇ ပဵၼ်ၵႂႃႇပွၵ်ႈၼႆႉၵေႃႈ ႁဵတ်းႁႂ်ႈငိုၼ်းဢၼ်မၼ်းလႆႈႁႃမႃးတင်းမူတ်းၼၼ်ႉ မူတ်းသဵင်ႈၵႂႃႇၸွမ်းၵႃႈယူတ်းယႃပေႃႈယဝ်ႉ။ ၸဵမ်မိူဝ်ႈမႃးႁဵတ်းၵၢၼ် မၼ်းၵေႃႈမႃးၶၢတ်ႈယူႇဝႆႉႁိူၼ်းလင်ၼိုင်ႈတီႈၼႂ်းဝဵင်းလူင်သေ ဝၢႆးသေပေႃႈဢမ်ႇယူႇလီမႃးၵေႃႈ လႆႈမႃးယူႇၸွမ်းၵၼ်ၵႂႃႇ ဢမ်ႇႁိုင်ၼႆႉပေႃႈၵေႃႈၵႆႉၵႆႉၶၢင်းတွင်ႉၸဵပ်းႁႅင်းၼႃႇလႄႈ လႆႈဢဝ်မႃးၸႅတ်ႈတူၺ်းတၢင်းပဵၼ်သေ လႆႈႁူႉဝႃႈပဵၼ်ၵႅၼ်ႇသႃႇသႆႈလူင် ၶၵ်ႉႁၢႆႉႁႅင်းၼႃႇယဝ်ႉလႄႈ တေလႆႈၽႃႇတတ်း ပေႃးဢမ်ႇၽႃႇၼႆတေတၢႆလႆႈၼႂ်းလိူၼ်သွင်လိူၼ်ၼႆႉၵူၺ်းၼႆယဝ်ႉ။
ဝူၼ်ႉဝႃႈမၼ်းတေလီမႃးယဝ်ႉ ၵူၺ်းၵႃႈ လွင်ႈဢၼ်ဢမ်ႇမုင်ႈမွင်းၼၼ်ႉၵေႃႈ ၵိူတ်ႇပဵၼ်မႃးထႅင်ႈ၊ ဢၼ်ႁဵတ်းၵၢၼ်ၵေႃႈ ၵုမ်ႇသဵင်ႈၸွမ်းၵႃႈၸႂ်ႉၸၢႆႇၼႂ်းႁိူၼ်းသေ ၵႃႈယူတ်းယႃပေႃႈသေ ငိုၼ်းၵဵပ်းပေႃးဢမ်ႇမီးသေဢိတ်းယဝ်ႉ၊ တႃႇတေၽႃႇတတ်းပၼ်ပေႃႈပွၵ်ႈၼႆႉၵေႃႈ မၼ်းတင်းဝူၼ်ႉယၢပ်ႇယူႇ ဝႃႈတေဢဝ်တီႈလႂ်မႃး။ သမ်ႉဝႃႈၼၼ်ၵေႃႈ ၶႂ်ႈႁႂ်ႈပေႃႈသိုပ်ႇယူႇၵႂႃႇထႅင်ႈလႄႈ ဢမ်ႇမီးၵေႃႈတေၵႃႈလႆႈႁႃမႃးႁႂ်ႈလႆႈယဝ်ႉ။ ဝူၼ်ႉဢမ်ႇပွင်ႇ ၶႂ်ႈယွင်ႇၵႂႃႇၵေႃႈ တွၼ်ႈတႃႇပေႃႈၵေႃႉလဵဝ်မၼ်းၼၼ်ႉ ၶတ်းၸႂ်မႃးယူႇတႃႇသေႇ။
သမ်ႉဝႃႈတေထူပ်းလွင်ႈတုၵ်ႉတၢၼ်ႇႁိုဝ်ၵေႃႈ ၼႃႈၵၢၼ်လႄႈသုၼ်ႇတူဝ်ၼၼ်ႉ ဢမ်ႇပၼ်လေႃးၵၼ်သေ၊ ယုမ်ႉယုမ်ႉယၢႆႈယၢႆႈတူင်ႉတၵ်ႉၵူၼ်းႁဵတ်းၵၢၼ်ၶဝ် ၼင်ႇသိူဝ်းၸႂ်ယူႇ။ ၵူၺ်းၵႃႈဝၼ်းမိူဝ်ႈၼႆႉၵေႃႈ မီးလွင်ႈပႅၵ်ႇပိူင်ႈဝႆႉ ၼႂ်းတီႈႁဵတ်းၵၢၼ်ၼႆၵေႃႈ သမ်ႉပေႃးယဵၼ်သီႇသီႇ။
“ပဵၼ်ႁင်ၵၼ်မူတ်းယဝ်ႉလႃႇ”
ၶဝ်ၵေႃႈၸီႉၵႂႃႇတီႈၼင်ႈၽူႈၸတ်းၵၢၼ်ၼၼ်ႉယဝ်ႉ မၼ်းၵေႃႈၼႅတ်ႈၵႂႃႇၸူး ပႆႇတၼ်းလႆႈဢႃႈသူပ်း
“ပဵၼ်ၽူႈမၢႆၸိူင်ႉႁိုဝ်လႃႇ မႃးႁဵတ်းၵၢၼ်တူၵ်းလိုၼ်းႁူဝ်ၼႃႈၸိူင်ႉၼႆ ဢမ်ႇႁူႉႁႃႉ ပုၼ်ႈၽွၼ်းသူမီးသင် လူဝ်ႇႁဵတ်းသင် မိူဝ်ႈၼႆႉႁဝ်းတေမႃးၼႆ သူဢမ်ႇႁူႉႁႃႉ ထၢမ်ၽႂ်ၵေႃႈဝႃႈဢမ်ႇႁူႉၼႆႉ မၼ်းပဵၼ်လွင်ႈသင် မိူဝ်ႈပူၼ်ႉမႃးသူႁဵတ်းၵၢၼ်ၸိူင်ႉႁိုဝ်လႃႇ ထိုင်တီႈဢဝ်ၵူၼ်းၸိူင်ႉၼႆမႃးႁဵတ်းၵၢၼ်ၼႆႉ”
လၢတ်ႈဢဝ်ငိုၼ်းသႅင်သမ်ႉပေႃးဢမ်ႇၸၢင်ႈတၵ်းသဵင်လႆႈယဝ်ႉ။ ၵႂႃႇဢဝ်ၶေႃႈမုၼ်းဢၼ်မၼ်းႁၢင်ႈႁႅၼ်းဝႆႉၼၼ်ႉမႃးပၼ်ယူႇ။
“ဢွၵ်ႇၵႂႃႇလႆႈယဝ်ႉ”
မႃးထူပ်းၵူၼ်းၸိူင်ႉၼႆ ၸႂ်လီပေႃးလမ်ယဝ်ႉယိုင်၊ ၶၢဝ်းၵိၼ်ၶဝ်ႈၼႆၵေႃႈ ၶိူဝ်းႁွမ်ၵပ်းသိုပ်ႇမႃး ၸူဝ်းၵၼ်ၵႂႃႇၵိၼ်ၶဝ်ႈသေ
“ၼႆႉ..ငိၼ်းသူၶၢင်းဝႃႈ ဢူႈသူႁႂ်ႈတေႇၼႃႈႁိူၼ်းၼႆဢမ်ႇၸႂ်ႈႁိုဝ်လႃႇ”
“ၼၼ်ႉယဝ်ႉ..ပေႃးဢမ်ႇတေႇၵေႃႈ တေဢမ်ႇယွမ်းယူတ်းယႃ”
“လူဝ်ႇႁိပ်ႈၼႃႇယဝ်ႉဢိူဝ်ႈပေႃးၼႆ”
“ပေႃးတၢၼ်ႇဝႃႈမၼ်းငၢႆႈၼႃႇယဝ်ႉ”
“ႁဝ်းမီးယူႇၵေႃႉၼိုင်ႈ မၢဝ်ႇၵေႇၼင်ႇၵွၼ်ႇဝႃႈ တိုၵ်ႉႁႃလုၵ်ႉၼွၵ်ႈမိူင်းမႃး ဢူၺ်းၵေႃႉၽူဝ်ႁဝ်းၵူၺ်း လႅပ်ႈဝႃႈႁဵတ်းၵၢၼ်တီႈသူၼႆႁိုဝ်ဢမ်ႇႁူႉယဝ်ႉ ၸိုဝ်ႈမၼ်းတႄႉဝႃႈ ဝႃႈ ၸွမ်သႅင်ၼႆၼေႈ”
ငိုၼ်းသႅင်ထူၺ်ႈၸႂ်လူင်မႃးသေ “မႃးႁဵတ်းၽူႈၸတ်းၵၢၼ်ႁဝ်းၼၼ်ႉၼႃႇ ႁၼ်ယဝ်ႉဝႃႈ ဢမ်ႇမႅၼ်ႈလူမ်းသေဢိတ်း”
“ဢူဝ်ႉ!! ၼမ်ႉယၢတ်ႇမၼ်းမႃးယဝ်ႉပေႃးၼႆ”
“ၼမ်ႉယၢတ်ႇႁင်သူ..”
“ၶဝ်မႃးပဵၼ်ႁူဝ်ၼႃႈသူ..ယဝ်ႉၵေႃႈသူသမ်ႉပဵၼ်ၽူႈမၢႆမၼ်းၼႆ”
“ဢိုမ်ႈ..ဝူၼ်ႉယဝ်ႉဢမ်ႇႁူႉႁဝ်းတေယူႇလႆႈႁိုင်ၵႃႈႁိုဝ်”
“ဢမ်ႇလေႃႇၼႃႈ..ႁဝ်းယၢမ်ႈႁူပ်ႉၶဝ်ယူႇၶဝ်ဢမ်ႇၸႂ်ႈၵူၼ်းၸႂ်ၵႅပ်ႈပဵၼ်တၢၼ်ႇၼၼ်ႉ”
“မိူဝ်ႈသူႁၼ်လႄႈႁဝ်းႁၼ်ၸွင်ႇမိူၼ်ၵၼ်ၵေႃႈဢမ်ႇၸႂ်”
“ဢမ်ႇၼၼ်ၵေႃႈ ပႂ်ႉၵူၼ်းၵေႃႉၼၼ်ႉယူႇႁႃႉတေႃႈ”
“ပႂ်ႉၽႂ်..”
“ၵူၼ်းၵေႃႉဢၼ်မီးၼႂ်းပပ်ႉမၢႆတွင်းသူၼၼ်ႉၼႃႇ”
သီၼႃႈငိုၼ်းသႅင်ပိူင်ႈမႃးသေ “သူတၼ်းၵႂႃႇလူပပ်ႉႁဝ်းမိူဝ်ႈလႂ်”
“မိူဝ်ႈႁဝ်းမိူဝ်းလႄႇသူၼၼ်ႉၼႃႇ”
ၵိၼ်ၶဝ်ႈၵိၼ်သင်ယဝ်ႉၵေႃႈ ပွၵ်ႈမႃးႁဵတ်းၵၢၼ်ၶိုၼ်း၊ မိူဝ်ႈႁူဝ်ၼႃႈၵေႃႉမႂ်ႇမႃးၼႆၵေႃႈ ၵႃႈတေလႆႈလႅၵ်ႈလၢႆႈမႃးၸွမ်းယဝ်ႉ ၸဵမ်လွင်ႈယူႇလွင်ႈသၢင်ႈ ဢၵျၢင်ႉတၢင်းယၢမ်ႈမၼ်း ပဵၼ်ၸိူင်ႉႁိုဝ်ၼႆ မၼ်းၵေႃႈၶတ်းၸႂ်လဵပ်ႈႁဵၼ်းၵႂႃႇ တႄႇၸဵမ်လွင်ႈဢၼ်ၶဝ်ၵျိူၵ်ႈဢမ်ႇၵျိူၵ်ႈၸိူဝ်းၼႆႉယူႇ။
သိုပ်ႇလူထႅင်ႈတွၼ်ႈတေမႃးၶႃႈ
