ငိုၼ်းသႅင်ၼၼ်ႉၵေႃႈ ၼႅတ်ႈလုၵ်ႉၵႂႃႇၸွမ်းႁူဝ်ၼႃႈမၼ်းတီႈႁွင်ႈၼၼ်ႉသေ ၼင်ႈလီလီငၢမ်းငၢမ်းယဝ်ႉဢုပ်ႇၵၼ်ၵႂႃႇ
“သူမႃးႁဵတ်းၵၢၼ်ၸွမ်းႁဝ်းၼႆႉႁိုင်ၵႃႈႁိုဝ်ယဝ်ႉ”
“ၸမ် 10 ပီ ယဝ်ႉၶႃႈ”
“ၸမ် 10 ယဝ်ႉဢိူဝ်ႈၼေႃႈ”
“မီးလွင်ႈၸိူင်ႉႁိုဝ်ဢမ်ႇႁူႉၶႃႈ”
“ႁဝ်းဝႃႈႁဝ်းတေလိုဝ်ႈယဝ်ႉၼႆဢိူဝ်ႈ သူလူးပေႃးဝႃႈဢမ်ႇမီးႁဝ်းယဝ်ႉ ၸွင်ႇတေသိုပ်ႇႁဵတ်းၵၢၼ်ထႅင်ႈႁိုဝ်”
“ၵိုင်ႉၵၢင်ႉပဵၼ်တၢၼ်ႇၼႆႉၶႃႈလႃႇ”
“ဢိူဝ်ႈ မိူၼ်ဝႃႈႁဝ်းတေမီးလုၵ်ႈထႅင်ႈၵေႃႉၼိုင်ႈယဝ်ႉ ဝူၼ်ႉဝႃႈသင်ၵိူတ်ႇလုၵ်ႈမႃးထႅင်ႈၵေႃႈ တေယူႇႁိူၼ်းသေလဵင်ႉလုၵ်ႈၵူၺ်းယဝ်ႉ ၽူဝ်ႁဝ်းၵေႃႈဢမ်ႇၶႂ်ႈပၼ်ႁဝ်းႁဵတ်းၵၢၼ်ယဝ်ႉၼႃႇ”
“ယဝ်ႉတီႈၼႆႈၶႃႈလူး”
“တေမီးႁူဝ်ၼႃႈၵေႃႉမႂ်ႇမႃးတႅၼ်း ပိူၼ်ႈႁႃဝႆႉယဝ်ႉၼင်ႇၵွၼ်ႇဝႃႈ”
ငိုၼ်းသႅင်ၵေႃႈဢမ်ႇတၵ်းသဵင် ၼင်ႈၼိမ်ယူႇၸိူင်ႉၼၼ်ၵူၺ်း။
“ႁဝ်းယူႇၸွမ်းၵၼ်မႃးၵေႃႈ လႆႈဝႃႈႁိုင်ၼႃႇတေႉ လႆႈႁၼ်သူမီးလွင်ႈၶိုပ်ႈၼႃႈမီးလွင်ႈလႅၵ်ႈလၢႆႈမႃးတင်းၼမ် ႁဝ်းတင်းဢမ်ႇထၢင်ႇဝႃႈသူတေယူႇၸွမ်းႁဝ်းမႃးလႆႈႁိုင်တၢၼ်ႇၼႆႉၵွၼ်ႇ ၸွင်ႇသူမီးၽႅၼ်တေဢွၵ်ႇၽွင်ႈႁိုဝ်လႃႇ”
“ပႆႇႁူႉယဝ်ႉၶႃႈ”
“သူၵေႃႈ ထုၵ်ႇလီတေႇၼႃႈႁိူၼ်းလႆႈယဝ်ႉဝႃႈ ၸဵမ်မိူဝ်ႈယူႇၸွမ်းၵၼ်မႃး ဢမ်ႇတွၼ်ႉႁၼ်သူလၢတ်ႈၶိူဝ်းမၢဝ်ႇ လွင်ႈႁၵ်ႉလွင်ႈပႅင်းႁေပွၵ်ႈ သူမီးၵေႃႉႁၵ်ႉယူႇႁႃႉၼႆႉ”
“ဢမ်ႇမီးၶႃႈ”
“ဢမ်ႇမီးၵေႃႈလီႁႃယဝ်ႉဢိူဝ်ႈၼႆႉ ႁႂ်ႈႁဝ်းႁႃပၼ်ၼႄႇ”
“ဢမ်ႇပဵၼ်သင်ၶႃႈ”
“မီးၵူၼ်းၼႂ်းၸႂ်ဝႆႉယူႇႁႃႉတေႃႈ”
မၼ်းၵေႃႈၼင်ႈဝူၼ်ႉတၢင်းႁိုင် “ဢမ်ႇမီးၶႃႈ”
“ပဵၼ်သၢဝ်ၸိူင်ႉသူၼႆႉၵေႃႈလီမိူၼ်ၵၼ်” ႁူဝ်ၼႃႈယုမ်ႉယုမ်ႉသေ “သမ်ႉဝႃႈႁဝ်းဢမ်ႇယူႇယဝ်ႉၵေႃႈ မိူဝ်းလႄႇမိူဝ်းႁႃၵၼ်ၽွင်ႈဢိူဝ်ႈ ႁဝ်းၵေႃႈဢမ်ႇလႆႈဝူၼ်ႉဝႃႈသူပဵၼ်လုၵ်ႈၼွင်ႉၵူၺ်း ႁဝ်းဝႆႉသူမိူၼ်ၼင်ႇၼွင်ႉယိင်းႁဝ်းၵေႃႉၼိုင်ႈယဝ်ႉ”
“ၶႃႈႁူႉလီယူႇၶႃႈ ၵွပ်ႈၼၼ်လႄႈ ၶႃႈၸင်ႇယူႇလႆႈႁိုင်ၶႃႈယူဝ်ႉ”
“ယိၼ်းၸူမ်းၵူႈလွင်ႈ ၸဵမ်လွင်ႈၵၢၼ် လွင်ႈၸွႆႈထႅမ်ယူႇၸွမ်းၵၼ်မႃး”
“ၸူမ်းမိူၼ်ၵၼ်ၶႃႈ”
“ဝူင်ႈၼႃႈၼႆႉ ဝၼ်းၵိူတ်ႇလုၵ်ႈယိင်းလူင်ႁဝ်း မိူဝ်းလႄႈၼႃႈ”
“ဢေႃႈၶႃႈ”
“မီးလွင်ႈသင်ႁႂ်ႈႁဝ်းၸွႆႈၼႆၵေႃႈ လၢတ်ႈမႃးလႆႈတႃႇသေႇဢိူဝ်ႈၼႃႈ”
“ဢေႃႈဢေႃႈ”
ဝၢႆးသေလိုဝ်ႈၵၢၼ်ယဝ်ႉၵေႃႈ ငိုၼ်းသႅင်ပႃးတင်း ၶွင်ၵိၼ်သေ ၵႂႃႇတီႈႁူင်းယႃၼၼ်ႉယဝ်ႉ၊ မိူဝ်ႈႁွတ်ႈၵႂႃႇတီႈႁူင်းယႃၼၼ်ႉ လႆႈႁၼ်ပေႃႈၶဝ်ၼင်ႈလေႃႉဢီးသေယဝ်ႉ မုင်ႈတူၺ်းၵၢင်ဝၼ်းတူၵ်းယူႇတီႈၼႃႈႁူင်းယႃၼၼ်ႉယဝ်ႉ။ ငိုၼ်းသႅင်ပႆၶဝ်ႈၵႂႃႇၸူးသေ
“ပေႃႈ..ယိင်းမႃးယဝ်ႉ” လႅၼ်ႈၶဝ်ႈၵႂႃႇၸူး ၼင်ႇၸူမ်းသိူဝ်းဝႆႉယူႇ။
“မႃးယဝ်ႉႁႃႉ”
ငိုၼ်းသႅင်ထူဝ်းလေႃႉဢီးၶဝ်ႈၵႂႃႇၼႂ်းႁူင်းယႃယဝ်ႉ ပွၵ်ႇမၢၵ်ႇမႆႉဢၼ်ပေႃႈလႆႈၸႂ်ၼၼ်ႉ ၵိၼ်ၵႂႃႇၸွမ်းၵၼ်သေ။
“ယိင်း..”
“ဢေႃႈ”
“ႁဵတ်းပၼ်ပေႃႈလွင်ႈၼိုင်ႈၸွင်ႇလႆႈႁိုဝ်”
“ယိင်းႁဵတ်းပၼ်ပေႃႈလႆႈၵူႈလွင်ႈယဝ်ႉ ဢမ်ႇဝႃႈလွင်ႈလႂ်ၵေႃႈယဝ်ႉ”
“ႁႂ်ႈပေႃႈလႆႈပဵၼ် ၵေႃႉသူင်ႇလုၵ်ႈဢွၵ်ႇႁိူၼ်းၸွင်ႇလႆႈ”
မၼ်းၵေႃႈၼိမ်ယဵၼ်သေ ယၵ်ႉတူၺ်းပေႃႈယူႇၸိူင်ႉၼၼ် ဢမ်ႇႁူႉတေတွပ်ႇၵႂႃႇၸိူင်ႉႁိုဝ်ယဝ်ႉ။ ပေႃႈၶဝ်ၵေႃႈတူၺ်းၼႃႈမၼ်း ပႃးတင်းလွင်ႈမုင်ႈမွင်းဢၼ်ဢမ်ႇႁဵတ်းဢမ်ႇလႆႈၼၼ်ႉသေ ငိုၼ်းသႅင်ၵေႃႈလႆႈတွပ်ႇၽွမ်ႉၸွမ်းၵႂႃႇယဝ်ႉ။
ယူႇၸွမ်းပေႃႈၶဝ်တေႃႇပေႃးလပ်းၵႂႃႇပႅတ်ႈယဝ်ႉသေ ဢွၵ်ႇမႃးထၢမ်မေႃယႃၵႂႃႇ
“ပေႃႈၶႃႈပဵၼ်ၸိူင်ႉႁိုဝ်မႃးၶႃႈမိူဝ်ႈလဵဝ်”
မေႃယႃၵေႃႈႁွင်ႉထူပ်းၼႂ်းႁွင်ႈ ဢုပ်ႇလၢတ်ႈလွင်ႈတၢင်းပဵၼ်ပေႃႈၶဝ်ၵႂႃႇ၊ ဢွၵ်ႇႁွင်ႈမႃးၵေႃႈၼႃႈသမ်ႉပေႃးဢမ်ႇလီမႃးသေဢိတ်းယဝ်ႉ။ ၶဝ်ႈၵႂႃႇၸူးပေႃႈၶဝ်ၶိုၼ်း
“ပေႃႈ ၸွႆႈယူႇၸွမ်းလုၵ်ႈႁိုင်လိူဝ်သေၼႆႉဢမ်ႇလႆႈႁႃႉ”
ယိပ်းဢဝ်မိုဝ်းပေႃႈယဝ်ႉပွႆႇၼမ်ႉတႃမၼ်းလႆတူၵ်းလူင်းယူႇ။
ပေႃႈတိုၼ်ႇမႃးယဝ်ႉ မၼ်းၼႅတ်ႈၸဵတ်ႉၼမ်ႉတႃမၼ်းသေ
“ယိင်းႁႆႈႁဵတ်းသင်လႃႇ”
“မေႃယႃဝႃႈ ပေႃႈဢမ်ႇယွမ်းႁႂ်ႈယူတ်းယႃၼႆႁႃႉ ယိင်းလၢတ်ႈယဝ်ႉလူး ယႃႇမႆႈၸႂ်ယိင်းၼႆ ႁႂ်ႈပေႃႈယူႇၸွမ်းယိင်းႁိုင်ႁိုင်ၵူၺ်းၵေႃႈလႆႈယဝ်ႉ”
ပေႃႈၵေႃႈ ယၵ်ႉတူၺ်းၼႃႈလုၵ်ႈယိင်းမၼ်းသေ ဢဝ်မိုဝ်းယိုၼ်ႈမႃးၸဵတ်ႉၼမ်ႉတႃပၼ် “လုၵ်ႈယိင်းပေႃႈ ၵေႃႉယႂ်ႇပေႃးတၢၼ်ႇၼႆႉယဝ်ႉ တိုၵ်ႉၶီႈႁႆႈယူႇလႃႇ”
“ၶဝ်ႈယူတ်းယႃလႄႈၼႃႈပေႃႈ မေႃဝႃႈ ပေႃးပေႃႈဢမ်ႇယူတ်းယႃၼႆ တေယူႇလႆႈဢမ်ႇပူၼ်ႉ သွင်လိူၼ် ပေႃးပေႃႈၽႃႇတတ်း တေယူႇလႆႈၼိုင်ႈပီဢမ်ႇၼၼ်ႁူၵ်းလိူၼ်ၼႆ”
“ပေႃႈပၼ်တၢင်းမႆႈလုၵ်ႈၵဝ်မႃးၼမ်ၼႃႇယဝ်ႉ ပေႃႈၶႂ်ႈလိုဝ်ႈႁိူဝ်ႉယဝ်ႉဢိူဝ်ႈၼႃႈ”
ယိင်ႈၶႅၼ်းတိူဝ်းႁႂ်ႈငိုၼ်းသႅင်ဢိုတ်ႇႁႆႈမႃးထႅင်ႈ “ၸွင်ႇႁူႉႁိုဝ် ယိင်းမီးပေႃႈၵေႃႉလဵဝ်ၵူၺ်းၼႆ”
“ယႃႇႁႆႈယဝ်ႉၼႃႈ..” ပေႃႈၵေႃႈယဵၼ်ၵႂႃႇသေ “ပေႃးၶႂ်ႈႁႂ်ႈပေႃႈယူတ်းယႃၵေႃႈ ႁႃလုၵ်ႈၶူၺ်ပၼ်ပေႃႈၵွၼ်ႇလႄႈ”
ၼမ်ႉတႃသမ်ႉပေႃးၵိုတ်းၵႂႃႇၵမ်းလဵဝ်ယဝ်ႉ။
သိုပ်ႇလူဢၢၼ်ႇတွၼ်ႈတေမႃးၶႃႈ
