ဝၼ်းယဝ်ႉဝၼ်းသုတ်းၵႂႃႇ ငိုၼ်းသႅင်ၶတ်းၸႂ်ၶဝ်ႈႁႃမိူၼ်မိူဝ်ႈဢွၼ်တၢင်းၼၼ်ႉယူႇၵေႃႈ ဢမ်ႇပဵၼ်မႃးၼင်ႇဢၼ်တင်ႈၸႂ်ဝႆႉ ၵူၺ်းလႆႈႁပ်ႉလွင်ႈဢမ်ႇသူၼ်ၸႂ် ၼင်ႇၵူၼ်းဢမ်ႇယၢမ်ႈႁူႉၸၵ်းၵၼ်ၼၼ်ႉၵူၺ်း။
ငိုၼ်းသႅင်ၼၼ်ႉတႄႉ ပေႃးတေၵႂႃႇႁူင်းႁဵၼ်းၼႆ တေၵႆႉၵႆႉမႃးပႂ်ႉယူႇတီႈႁူမ်ႈမႆႉၼၼ်ႉၸဵမ်ၸဝ်ႉ ပႂ်ႉတေႃႇထိုင်ၶၢဝ်းယၢမ်းၵႂႃႇႁူင်းႁဵၼ်းလႄႈ ပေႃးတၢၼ်ႇတေဢမ်ႇတူၵ်းလိုၼ်းယဝ်ႉၸင်ႇတေၼႅတ်ႈၵႂႃႇယူႇ။ ပေႃးလူင်းႁူင်းႁဵၼ်းမႃးၵေႃႈ ၸွမ်းႁႃသႅင်ပိုၼ်းယူႇၵေႃႈဢမ်ႇႁၼ် ပၼ်ႇလႅင်ထိပ်ႇၵႂႃႇတၢင်းၼႃႈၵေႃႈ သၢႆတႃမၼ်းၸႂ်မၼ်းတႄႉ ပၵ်းၸွမ်းဝႆႉယူႇတၢင်းလင် ၵမ်းၵမ်းယၵ်ႉတူၺ်းတၢင်းလင်တိၵ်းတိၵ်း။ ႁဵတ်းႁႂ်ႈမၼ်းၶိုၼ်းၶုၵ်းၸႂ်လႆႈ ၶၢဝ်းယၢမ်းဢၼ်လႅၼ်ႈပၼ်ႇလႅင်ထိပ်ႇပွၵ်ႈမိူဝ်း လႅၼ်ႈလမ်းၵၼ်မိူဝ်းၵႂႃႇ ပေႃးပဵၼ်သူပ်းပဵၼ်သဵင်ယူႇသဵင်ႈ ယၢမ်းၼႆႉ သဵင်ၼၼ်ႉတဵတ်ႇယဵၼ် ထိုင်တီႈႁွင်ႉၸိုဝ်ႈၶဝ်လင်လင်ၵေႃႈဢမ်ႇလႆႈငိၼ်းသဵင်သင်တုမ်ႉတွပ်ႇၶိုၼ်း။
လွင်ႈတူင်ႉၼိုင်ႈၵူႈဢၼ် ယၢမ်ႈလႆႈႁဵတ်းႁူမ်ႈၵၼ်မႃး သမ်ႉဝႃႈပဵၼ်လွင်ႈဝၼ်းလင်ၵေႃႈ တွၼ်ႈတႃႇငိုၼ်းသႅင်တႄႉ ယင်းတိုၵ်ႉၵႂႃႇၸွမ်းၵူႈၶၵ်ႉၵူႈတွၼ်ႈ ႁဵတ်းၸွမ်းၵူႈၶၵ်ႉၵူႈတွၼ်ႈ သၢင်ႈၵႂႃႇႁင်းၵူၺ်းလူၺ်ႈဝူၼ်ႉထိုင်သႅင်ပိုၼ်းယူႇတႃႇသေႇယဝ်ႉ၊ သမ်ႉဝႃႈဢမ်ႇလႆႈႁၼ်ၸွမ်းတၢင်းသေတႃႉ သင်ဢမ်ႇသင် လႆႈႁၼ်ၸူဝ်ႈၵႅပ်ႉၸူဝ်ႈၵမ်းၵူၺ်းၵေႃႈသိူဝ်းၸႂ်ယဝ်ႉ။
ငိုၼ်းသႅင်ၼႆၵေႃႈ ပေႃးဝၼ်းလိုဝ်ႈၼႆ ၵႆႉၵႆႉမႃးၼင်ႈလူလိၵ်ႈသေ လွမ်လွမ်ငွၵ်ႈတူၺ်းၵႂႃႇတီႈႁူးလႅင်းဢၼ်ၵႆႉႁၼ်သႅင်ပိုၼ်းမႃးငွၵ်ႈၼၼ်ႉယူႇတႃႇသေႇ ဝူၼ်ႉဝႆႉယူႇဝႃႈတေမီးၶဝ်ယူႇၼႂ်းႁွင်ႈၼၼ်ႉယူႇၼႆ။
ၶၢဝ်းယၢမ်းပူၼ်ႉၵႂႃႇဢမ်ႇႁိုင် ထိုင်ပၢင်တွပ်ႇလိၵ်ႈမႃး ပဵၼ်ပၢင်တွပ်ႇလိၵ်ႈဢၼ် မႆႈၸႂ် ပဵၼ်ပၢင်တွပ်ႇလိၵ်ႈ ဢၼ်ၶမ်ၸႂ်လႄႈ ပဵၼ်ပၢင်တွပ်ႇလိၵ်ႈဢၼ်မုင်ႈမွင်း ႁႂ်ႈမၼ်းယဝ်ႉၵႂႃႇၼၼ်ႉယဝ်ႉ၊ ဝၼ်းလိုၼ်းသုတ်းဢၼ်တွပ်ႇၵႂႃႇယဝ်ႉၼၼ်ႉ ငိုၼ်းသႅင်ၵေႃႈလႆႈႁူပ်ႉတင်းသႅင်ပိုၼ်းတီႈၼႃႈႁွင်ႈႁဵၼ်းၼၼ်ႉသေ
“တွပ်ႇလိၵ်ႈပဵၼ်ၸိူင်ႉႁိုဝ်ၽွင်ႈ” ပဵၼ်ၶေႃႈၵႂၢမ်းဢၼ်ၶဝ်လၢတ်ႈတေႃႇၸူးဝၢႆးသေဝၼ်းၼၼ်ႉ။
“ဢေႃႈ..လႆႈယူႇၶႃႈ” သဵင်ၵေႃႈယဵၼ်ၵႂႃႇ ၵႂၢမ်းၶႃၵေႃႈၶၢတ်ႇၵႂႃႇ။
ဝၢႆးသေတွပ်ႇလိၵ်ႈယဝ်ႉသေ ပိၵ်ႉဢိုတ်းႁူင်းႁဵၼ်းၶၢဝ်းမႆႈယဝ်ႉၵေႃႈ တွၼ်ႈတႃႇငိုၼ်းသႅင်တႄႉ ၶၢဝ်းမႆႈၼႆႉဢမ်ႇႁူႉဝႃႈတေလႆႈႁဵတ်းသင် လိူဝ်သေဝႃႈ တႂ်ႈႁူမ်ႈမႆႉၼၼ်ႉမၼ်းၵတ်းယဵၼ်လီလႄႈ ပႃးတင်းပပ်ႉလိၵ်ႈမၼ်းသေ ၵႂႃႇၼင်ႈၵႂႃႇၼွၼ်းလဵၼ်ႈယူႇတႂ်ႈႁူမ်ႈမႆႉၼၼ်ႉတင်းဝၼ်းတင်းဝၼ်း။
မီးယူႇတီႈၼၼ်ႈယဝ်ႉ ဢမ်ႇလႆႈႁၼ်ၵေႃႈဢမ်ႇပဵၼ်သင် လႆႈႁၼ်ၵေႃႈၶႅၼ်းလီယဝ်ႉ၊ လႆႈငိၼ်းသဵင်မႄႈမၼ်း ပီႈဢၢႆႈမၼ်း ႁွင်ႉၸိုဝ်ႈမၼ်းၵူၺ်းၵေႃႈ ၸႂ်သမ်ႉပေႃးတဵၼ်ႈတွတ်ႇႁႅင်းမႃးယဝ်ႉ။ သမ်ႉဝႃႈယူႇတီႈဢမ်ႇၸႅင်ႈသေလႆႈယၵ်ႉတူၺ်း ယူႇတီႈၵႆၵႆသေလႆႈႁၼ် လႆႈငိၼ်းသဵင်ၶဝ်ၵူၺ်းၵေႃႈ ပဵၼ်တၢင်းသိူဝ်းတွၼ်ႈတႃႇမၼ်းၼႃႇယဝ်ႉ။
ဝၼ်းၼိုင်ႈ ပေႃႈလႄႈတင်းငိုၼ်းသႅင်ၵေႃႈ ၸူဝ်းၵၼ်မိူဝ်းသိုဝ်ႉၵုၼ်ႇၼႂ်းဝဵင်းယဝ်ႉ ဢမ်ႇလႆႈမိူဝ်းႁိုင်ၼႃႇယဝ်ႉလႄႈ ၸူမ်းၸူမ်းသိူဝ်းသိူဝ်းလူင်မိူဝ်းယူႇ။ ဢွၼ်ၵၼ်မိူဝ်းသိုဝ်ႉမိူဝ်းလႄႇမိူဝ်းၵိၼ်သေယဝ်ႉ ၵၢင်ဝၼ်းၶမ်ႈၸင်ႇတေဢွၼ်ၵၼ်ပွၵ်ႈၶိုၼ်း။
ၼိူဝ်သဵၼ်ႈတၢင်းလူင်ၼၼ်ႉ မၢင်ၵမ်းမၢင်ၵမ်းၵေႃႈ မွင်းႁႂ်ႈလႆႈထူပ်းၽႂ်သေၵေႃႉၼိုင်ႈယူႇယဝ်ႉ။ ၵူၺ်းၵႃႈ ၸိူင်ႉႁိုဝ်ၵေႃႈ ဢမ်ႇပဵၼ်လႆႈယဝ်ႉလႄႈ ပွႆႇႁႂ်ႈမၼ်းၽၢၼ်ႇပူၼ်ႉၵႂႃႇသေ ပၵ်းၸႂ်ၸွမ်းၵႂႃႇဢၼ်မီးယူႇယၢမ်းလဵဝ်ၼႆႉၵူၺ်း။
ထိုင်ႁိူၼ်းၶိုၼ်းယဝ်ႉ မိူဝ်းၸွႆႈပေႃႈၶဝ်ၶပ်ႉၶူဝ်းၶပ်ႉၵုၼ်ႇၼႂ်းသႅင်ႇယဝ်ႉၵေႃႈ ဢဝ်တင်းၶဝ်ႈမုၼ်းသေ လႅၼ်ႈလူင်မႃးတၢင်းတူၼ်ႈမႆႉၼၼ်ႉယဝ်ႉၼႃႇ၊ ၵူၺ်းၵႃႈ ၼင်ႇဝႃႈၼႂ်းႁိူၼ်းလင်ၼႆႉ ႁၢင်ႈယဵၼ်သီႇသီႇငဝ်ငႅဝ်ဝႆႉယူႇယဝ်ႉ။ ယူႇယူႇၽၵ်းတူၼႃႈႁိူၼ်းၼၼ်ႉၽုၺ်ႇမႃးသေ ၵေႃႉပဵၼ်မႄႈသႅင်ပိုၼ်းမႃးၸူးမၼ်းယဝ်ႉ။
“ယိင်း..”
“ဢေႃႈ..”
“ပႂ်ႉသႅင်ပိုၼ်းယူႇႁႃႉ သႅင်ပိုၼ်းၵႂႃႇယဝ်ႉဝႃႈ”
“ၵႂႃႇလႂ်ၶႃႈလႃႇ”
“ၵႂႃႇၶိုၼ်ႈႁဵၼ်းယဝ်ႉ”
မိူဝ်ႈလႆႈငိၼ်းၸိူင်ႉၼၼ် ႁူဝ်ၸႂ်ၼႆႉသမ်ႉပေႃးတၢၼ်ႇတေတႅၵ်ႇလႅဝ်ၵႂႃႇမူတ်းယဝ်ႉဢိူဝ်ႈလေႃႇ။ ၼမ်ႉတႃၵေႃႈၸိုမ်ႉယမ်းႁူၺ်ႇတႃမႃး ၼႅတ်ႈလႅၼ်ႈမိူဝ်းတီႈႁိူၼ်းမၼ်းၵမ်းလဵဝ်သေ ၶူတ်းၽႃႈယဝ်ႉဢိုတ်ႇႁႆႈယူႇတင်းႁိုင်။
ပေႃးဝႃႈမီးလွင်ႈၶႂ်ႈလၢတ်ႈ ၵူၺ်းၵႃႈဢမ်ႇႁူႉတေလၢတ်ႈၼႄၽႂ်မႃးၼႆ သႅင်ပိုၼ်းၵေႃႈယၢမ်ႈလၢတ်ႈမၼ်းဝႃႈ ႁႂ်ႈတႅမ်ႈသႂ်ႇၼႂ်းပပ်ႉၼႆသေ၊ မၼ်းၵေႃႈႁဵတ်းၸွမ်းလႄႈ ၼႂ်းပပ်ႉမၼ်းၼၼ်ႉ သမ်ႉပေႃးပဵၼ်လွင်ႈသႅင်ပိုၼ်းယူႇသဵင်ႈယဝ်ႉ။
ၼင်ႇဢၼ်မၼ်းၶႂ်ႈလၢတ်ႈ ၶႂ်ႈပွင်ႉၼၼ်ႉ လၢတ်ႈဢွၵ်ႇမႃးတင်းသဵင်ႈ ၼင်ႇဝႃႈ ပပ်ႉၼၼ်ႉပဵၼ်သႅင်ပိုၼ်းသေ ပိုတ်ႇလၢတ်ႈမွၵ်ႇဢွၵ်ႇမႃးတင်းသဵင်ႈယူႇယဝ်ႉ။
မိူဝ်ႈလႆႈႁူႉဝႃႈၶဝ်ဢမ်ႇမီးယဝ်ႉၼႆ ၼႂ်းၸႂ်ၵေႃႈႁိုဝ်သိူဝ်း ၵူဝ်ဝႃႈၵႂႃႇယဝ်ႉဢမ်ႇၶိုၼ်းပွၵ်ႈ တေဢမ်ႇၸၢင်ႈငွၵ်ႈၸွမ်းတူၺ်းၶဝ်လႆႈထႅင်ႈယဝ်ႉ။ မၼ်းၵေႃႈၼင်ႈဝူၼ်ႉသေ ပွႆႇၼမ်ႉတႃလႆယွတ်ႇယွႆႉလူင်းလွႆးလွႆး ယူႇႁင်းမၼ်းယဝ်ႉ။
ဝၼ်းယဝ်ႉဝၼ်း ငိုၼ်းသႅင်ၵေႃႈယူႇၵႂႃႇလူၺ်ႈဢမ်ႇမီးသႅင်ပိုၼ်း မိူဝ်ႈလႆႈႁၼ်ဢွင်ႈၵဝ်ႇဢၼ်ယၢမ်ႈမီးမၢႆတွင်းႁူမ်ႈၵၼ်ၼၼ်ႉ ႁဵတ်းႁႂ်ႈငိုၼ်းသႅင်ၵိုတ်းလိုဝ်ႈလွင်ႈၸႂ်ထိုင်ၼၼ်ႉဢမ်ႇလႆႈ ယူႇယူႇၵေႃႈလႆႈပွႆႇၼမ်ႉတႃၼၼ်ႉဢွၵ်ႇမႃးၵူၺ်း။ ၸႂ်ထိုင်ယူႇၵေႃႈ ဢမ်ႇႁူႉဝႃႈၶဝ်ယူႇလႂ်လူး တေၵပ်းသိုပ်ႇၸူးၼႆၼၼ်ႉ ယင်းႁႃတၢင်းဢမ်ႇႁၼ် တေႃႈၼင်ႇႁၼ်တူဝ်ၶဝ်ယူႇၶဝ်တင်းဢမ်ႇဝၢႆႇတူၺ်း ၼႆႉ ဢမ်ႇလႆႈႁၼ်ၼႃႈဢမ်ႇလႆႈငိၼ်းသဵင် ဢမ်ႇလႆႈႁူႉသင်ၸွမ်းၼႆႉ မၢင်ပွၵ်ႈမၢင်ပွၵ်ႈမႃးၵေႃႈ ဢိုၵ်ႉၼိုၵ်ႉထိုင်ၸႂ်ယူႇဢိူဝ်ႈ။
လွင်ႈၼႂ်းဢူၵ်းၼႂ်းၸႂ် ဢၼ်ဢမ်ႇၸၢင်ႈလၢတ်ႈမွၵ်ႇၼႄၽႂ်ၼၼ်ႉၵေႃႈ လႆႈၶဵၼ်ႇတႅမ်ႈလူင်းၵႂႃႇၼႂ်းၽိုၼ်ၸေႈမၢင် ပပ်ႉမၢႆတွင်းမၼ်းၼၼ်ႉဝႆႉယူႇယဝ်ႉ။
