ငိုၼ်းသႅင်ၼၼ်ႉတႄႉ ၼင်ႈႁႆႈၵၢင်ဝၼ်းပေႃးလိပ်းသိင်ႇၵေႃႈ ၼမ်ႉၼႃမၼ်းယင်းပႆႇမူတ်း ဢမ်ႇပႆႇတူင်ႉတီႈလႆႈ။ သႅင်ပိုၼ်းတင်းမႆႈၸႂ်လႄႈ သမ်ႉဝႃႈၶႂ်ႈႁေႃႈလူတ်ႉဝႆးဝႆးၼႆၵေႃႈ ၵူဝ်ဢမ်ႇႁၼ်လႄႈ ႁေႃႈၵႂႃႇလွႆးလွႆးတူၺ်းၵႂႃႇလွႆးလွႆး ၸင်ႇလႆႈႁၼ်ငဝ်းလမ်လမ် သဵင်ႁႆႈၵူၼ်းမေႃး “ႁိုဝ်း…ႁိုဝ်းႁိုဝ်း..” ၶူၼ်တုမ်ႇၼိူဝ်ႉၵီႈပိုဝ်းမႃးယူႇၵေႃႈ ၵႃႈလႆႈလဵဝ်ႉႁူဝ်လူတ်ႉၼၼ်ႉထွင်ႇတူၺ်းဢိတ်ႉၼိုင်ႈ ၾႆးလူတ်ႉၼၼ်ႉထွင်ႇႁၼ်တူဝ်ၵူၼ်းလႄႈ ၵႂႃႇၵိုတ်းလူတ်ႉမၼ်းသေ “မႃးႁွတ်ႈၵႆထိုင်တၢၼ်ႇၼႆႉၵွၼ်ႇႁႃႉ”
လူင်းလူတ်ႉယဝ်ႉၵႂႃႇၸူးငိုၼ်းသႅင်သေ ၼင်ႈထူၺ်ႈၸႂ်လူင်ၵမ်ႉၼိုင်ႈယဝ်ႉ
“လႆႈၵိၼ်ၶဝ်ႈယူႇႁႃႉ..”
ငိုၼ်းသႅင်ၵေႃႈ ဢဝ်ၶႅၼ်သိူဝ်ႈၸဵတ်ႉၼမ်ႉတႃမၼ်းသေယဝ်ႉ “ၶူး..ၶႃႈဢမ်ႇၶႂ်ႈမိူဝ်းႁိူၼ်း ၶႃႈဢမ်ႇၶႂ်ႈယူႇတီႈႁိူၼ်း”
“မီးလွင်ႈသင်ဢၼ်ႁဵတ်းႁႂ်ႈသူဢမ်ႇၶႂ်ႈယူႇ ထိုင်တီႈပၢႆႈမႃးၵႆထိုင်တၢၼ်ႇၼႆႉလႃႇ ၸွင်ႇႁူႉႁိုဝ် မီးၵူၼ်းမႆႈၸႂ်သူယူႇ ပေႃးဝႃႈသူပဵၼ်သေလွင်ႈလွင်ႈၵႂႃႇ တေမီးၵူၼ်းတိူဝ်ႉၸႂ်တၢၼ်ႇႁိုဝ်ၼႆ”
“ၵူၼ်းၸိူင်ႉၼင်ႇၶႃႈၼႆႉ တေမီးၽႂ်မႃးမႆႈၸႂ် ဢမ်ႇယူႇၵေႃႈပိူၼ်ႈၶႅၼ်းၸူမ်းယဝ်ႉ”
“မီးဢိူဝ်ႈ ဝူၼ်ႉတူၺ်းလႄႈ ပေႃးၼွင်ႉဢမ်ႇယူႇယဝ်ႉ တေမီးၽႂ်လႃႇဢၼ်မႆႈၸႂ် ဢၼ်ၸွမ်းႁႃၼွင်ႉယူႇၼၼ်ႉ”
လူမ်းထွင်းၽတ်ႉဢဝ်ၶူၼ်ႁူဝ်ငိုၼ်းသႅင်ပိဝ်သုမ်ႇၼႃႈမႃးလႄႈ မၼ်းၵေႃႈပၢၵ်ႈၶူၼ်ႁူဝ်သေ သုတ်ႇလူမ်းၶဝ်ႈလိုၵ်ႉလိုၵ်ႉယဝ်ႉ။ သဵင်တီႈၼၼ်ႈၵေႃႈယဵၼ်ၵႂႃႇသေ ငိုၼ်းသႅင်ၸင်ႇလႆႈလၢတ်ႈဢွၵ်ႇမႃး
“ပဵၼ်ယွၼ်ႉၶႃႈဢေႃႈ”
“ပဵၼ်သင်လႄႈဝႃႈၸိူင်ႉၼႆလႃႇ မၼ်းဢမ်ႇၸႂ်ႈလေႃႇၼႃႈ”
“ၶႃႈၶႂ်ႈႁႂ်ႈမႄႈ ႁၵ်ႉၶႃႈ၊ တူၺ်းထိုင်သႂ်ႇၸႂ်ၶႃႈမိူၼ်ၼင်ႇ မႄႈပိူၼ်ႈ ၶႃႈၶတ်းၸႂ်ႁဵၼ်း၊ ၶတ်းၸႂ်ႁဵတ်းၵၢၼ်တီႈႁိူၼ်း ၶတ်းၸႂ်ပဵၼ်လုၵ်ႈဢွၼ်ႇလီ ဝူၼ်ႉဝႃႈ မႄႈတေႁၼ်ၶႃႈယူႇၼႂ်းသၢႆတႃသေဢိတ်ႉၼိုင်ႈ ၵူၺ်းၵႃႈ မႄႈၵေႃႈဢမ်ႇလႆႈႁၵ်ႉၶႃႈ မႄႈၸင်းၶႃႈတေႉယဝ်ႉ မႄႈဢမ်ႇၶႂ်ႈႁႂ်ႈၶႃႈၵိူတ်ႇမႃး ယွၼ်ႉမီးၶႃႈလႄႈ ၶႃႈႁဵတ်းႁႂ်ႈမႄႈပဵၼ်ၸိူင်ႉၼႆ ပေႃႈတင်းမႄႈ ဢမ်ႇလႆႈႁၵ်ႉၵၼ် ပဵၼ်သင် ပဵၼ်သင် သမ်ႉတေၵိူတ်ႇၶႃႈမႃး ၶႃႈတေလႆႈႁဵတ်းၸိူင်ႉႁိုဝ်ၶႃႈ မႄႈဢမ်ႇၶႂ်ႈယူႇၸွမ်းႁဝ်းယဝ်ႉ သင်ဢမ်ႇမီးၶႃႈ မႄႈၵေႃႈတေဢမ်ႇလႆႈမႃးယူႇၸွမ်းပေႃႈၸိူင်ႉၼႆ ပေႃႈၵေႃႈတေဢမ်ႇလႆႈမႃးတုၵ်ႉၶၸွမ်းၶႃႈၸိူင်ႉၼႆ ၶႃႈဢမ်ႇၶႂ်ႈယူႇယဝ်ႉ”
“ဢမ်ႇၶႂ်ႈယူႇယဝ်ႉ ၼွင်ႉသမ်ႉတေၵႂႃႇယူႇတီႈလႂ်”
“ဢမ်ႇႁူႉ ၶႃႈဢမ်ႇၶႂ်ႈမိူဝ်းႁိူၼ်းၵူၺ်း”
“ဢမ်ႇၶႂ်ႈမိူဝ်းၵေႃႈဢမ်ႇပဵၼ်သင် ၵႂႃႇတၢင်ႇတီႈၵေႃႈလႆႈယူႇ ၵူၺ်းၵႃႈၼွင်ႉတေယူႇတီႈၼႆႈၸိူင်ႉၼႆဢမ်ႇလႆႈၼႃ” ဝၢႆႇတူၺ်းၵႂႃႇတၢင်းၼိုင်ႈယဝ်ႉတၢင်းၼိုင်ႈသေ “တီႈၼႆႈၽဵတ်ႇလိူင်ႇၼႃႇၵူၺ်ႉၼႆႉ တၢင်းပုၼ်ႉမီးပႃႇႁဵဝ်ႈႁေဢိူဝ်ႈ ဢမ်ႇၵူဝ်ၼႄႇ”
ငိုၼ်းသႅင်ၵေႃႈ ႁၢင်ႈၶႂ်ႈၵူဝ်ၵူဝ်မႃးသေ ပွၵ်ႈမိူဝ်းၵႂႃႇၸွမ်းသႅင်ပိုၼ်းယဝ်ႉ။ သႅင်ပိုၼ်းႁၼ်ဝႃႈ ငိုၼ်းသႅင်ဢၢပ်ႈၵတ်းၼႃႇၼႆၵေႃႈ ထွတ်ႇဢဝ်သိူဝ်ႈမၼ်းပၼ်ၼုင်ႈသေ ႁေႃႈလူတ်ႉပွၵ်ႈမိူဝ်းၵႂႃႇၸွမ်းၵၼ်ယဝ်ႉ။ တူဝ်ဢွၼ်ႇမၼ်းၼၼ်ႉၵေႃႈ ၼင်ႇဝႃႈဢမ်ႇမီးႁႅင်းသင်သေ ဢဝ်ႁူဝ်ဢွၼ်ႇမၼ်းဢိင်သႂ်ႇလင်သႅင်ပိုၼ်းမိူဝ်းၵႂႃႇ တေႃႇပေႃးႁွတ်ႈထိုင်ႁိူၼ်း ၶိူဝ်းႁွမ်ၶဝ်ၼၼ်ႉယဝ်ႉ။
မိူဝ်ႈဢၼ်သႅင်ပိုၼ်း ၸမ်မိူဝ်းထိုင်ႁိူၼ်းၼၼ်ႉၵေႃႈ လႆႈႁၼ်ပေႃႈငိုၼ်းသႅင်ၶဝ်မီးယူႇတႂ်ႈႁူမ်ႈမႆႉၼၼ်ႉလႄႈ
“ပေႃႈငိုၼ်းသႅင်..လိုၵ်းတၢၼ်ႇၼႆႉယဝ်ႉ ပႆႇပွၵ်ႈမိူဝ်းၵွၼ်ႇၶႃႈႁႃႉ”
“ၸွင်ႇၶူးႁၼ်ငိုၼ်းသႅင်ၶႃႈႁိုဝ် ၶႃႈၸွမ်းႁႃပေႃးၸွတ်ႇၵေႃႈဢမ်ႇႁၼ်ၶႃႈဢေႃႈၼႆႉ”
“ႁၼ်ဢေႃႈ မၼ်းၵႂႃႇၸွမ်းတၢင်းလူင်သမ်ႉပေႃးၵႆဝႃႈၵႆၶႃႈဢေႃႈ ၶႃႈလႆႈဢဝ်မႃးဝႆႉတီႈႁိူၼ်းၶိူဝ်းႁွမ်ၶဝ်ယဝ်ႉၶႃႈ”
“ၼၼ်ၶႃႈႁႃႉ..ၸူမ်းယဝ်ႉၶႃႈၶူး”
“မၼ်းလၢတ်ႈဝႃႈမၼ်းဢမ်ႇၶႂ်ႈမႃးတီႈႁိူၼ်းၼႆၶႃႈဢေႃႈ” သႅင်ပိုၼ်း မႃးၼင်ႈၸွမ်းသေဢုပ်ႇၵၼ်ၵႂႃႇ။
“ပဵၼ်တၢင်းၽိတ်းၶႃႈၵူၺ်း ၶႃႈၵူဝ်ဝႃႈလုၵ်ႈတေဢမ်ႇမီးမႄႈမိူၼ်ပိူၼ်ႈၼႆလႄႈ ၵူဝ်ဝႃႈမႄႈၶဝ်တေၽၢတ်ႇဢွၵ်ႇသေ ၶတ်းၸႂ်ႁၢမ်ႈဝႆႉယူႇတႃႇသေႇ လႄႈ ႁႃးၵေႃႈၵႆႉၽိတ်းၵၼ်ယူႇတႃႇသေႇၶႃႈဢေႃႈ ၶႃႈၵေႃႈဢမ်ႇႁူႉတေႁဵတ်းႁိုဝ်ယဝ်ႉၶႃႈ”
သႅင်ပိုၼ်းထူၺ်ႈၸႂ်လူင်ၸွမ်းယဝ်ႉ “ပေႃးဝႃႈၶႂ်ႈႁဵတ်းတွၼ်ႈတႃႇလုၵ်ႈၼႆၸိုင် ထၢမ်ၵၢင်ၸႂ်လုၵ်ႈၽွင်ႈၵေႃႈလီဢေႃႈ ၸွင်ႇၶဝ်သမ်ႉၶႂ်ႈလႆႈၸိူင်ႉၼၼ်ယူႇႁိုဝ်ၼႆ”
“ၼၼ်ၶႃႈႁႃႉ ၸူမ်းယဝ်ႉၶႃႈၶူး”
ဝၼ်းၼိုင်ႈ ၶၢဝ်းလူင်းႁူင်းႁဵၼ်းမႃးၼၼ်ႉ ပေႃႈငိုၼ်းသႅင်ၶဝ်ၵေႃႈ ဢဝ်တင်းၵႃးၶဝ်ၼၼ်ႉ မႃးပႂ်ႉယူႇတီႈၼႃႈႁူင်းႁဵၼ်းၼၼ်ႉသေ ပႂ်ႉႁပ်ႉမၼ်းယူႇ။
“ငိုၼ်းသႅင်..”
ၸဵမ်မိူဝ်ႈမၼ်းမေႃၵႂႃႇႁင်းၵူၺ်း ႁိုင်ၼႃႇယဝ်ႉ မၼ်းဢမ်ႇလႆႈႁၼ်ပေႃႈမၼ်းမႃးႁပ်ႉၸိူင်ႉၼႆ မၼ်းၵေႃႈလႅၼ်ႈလူင်မႃးသေ ၶိုၼ်ႈၵႃးယဝ်ႉ။
“ပေႃႈႁဝ်းတေၵႂႃႇတၢင်းလႂ်လႃႇ”
“တေဢွၼ်ၵႂႃႇတီႈၵႆၵႆဢိူဝ်ႈ ၸွင်ႇၶႂ်ႈၵႂႃႇႁိုဝ်”
ငိုၼ်းသႅင်ယဵၼ်ၵႂႃႇယူႇယဝ်ႉ။
“ၸွင်ႇလုၵ်ႈၶႂ်ႈလႆႈသင်ႁိုဝ် မိူဝ်ႈၼႆႉၵေႃႈဝၼ်းၵိူတ်ႇလုၵ်ႈတဵမ် 14 ယဝ်ႉလူး”
ၵူႈပွၵ်ႈဝၼ်းၵိူတ်ႇမၼ်းၼႆ မီးပေႃႈမၼ်းၵူၺ်းၵႆႉႁဵတ်းပၼ်မၼ်းသေ မႄႈမၼ်းတႄႉၵေႃႈ ဢမ်ႇတွၼ်ႉယူႇႁိူၼ်းသေပွၵ်ႈ ၵၢင်ၼႂ်ပွၵ်ႈမႃးၶိုၼ်းၵေႃႈ မဝ်းလူင်မႃးယဝ်ႉ။
“ပေႃႈ” သဵင်မိူၼ်ၵပ်ႉတိပ်ႇတၼ်ၸႂ်ဝႆႉယူႇ တႃႇတေလၢတ်ႈဢွၵ်ႇမႃးၼၼ်ႉ ၼင်ႇဝႃႈၶမ်ၸႂ်ဝႆႉယဝ်ႉ။
“ဝႃႈႁိုဝ်” ယဵၼ်ၼိမ်သေထွမ်ႇယူႇ။
“ယိင်းၶႂ်ႈယူႇၸွမ်းပေႃႈၸိူင်ႉၼႆ ၵူၺ်းယဝ်ႉ မၼ်းယဵၼ်ၸႂ်လီ”
သမ်ႉပေႃးဢဝ်ၵႃးၶုၼ်ႇၵိုတ်းၵႂႃႇယူႇ။ “ၸိူင်ႉၼၼ်ႁႃႉ”
“ဢိုမ်ႈ ယိင်းဝႃႈယူႇၸိူင်ႉၼႆၵေႃႈဢမ်ႇပဵၼ်သင်ၼႃႇ”
“ဢမ်ႇမီးမႄႈၵေႃႈဢမ်ႇပဵၼ်သင်ႁႃႉ”
“ဢမ်ႇပဵၼ်သင် ပေႃးယိင်းလႆႈယူႇၸွမ်းပေႃႈၵူၺ်းၵေႃႈလႆႈယဝ်ႉ”
“ဢိုမ်ႈ..”
“ပေႃႈလူး ပေႃးဢမ်ႇမီးမႄႈ ၸွင်ႇပဵၼ်သင်ႁိုဝ်”
“ဢမ်ႇပဵၼ်သင် မီးလုၵ်ႈၵူၺ်းၵေႃႈလႆႈယဝ်ႉ ၸူမ်းယဝ်ႉၼႃႈ”
သဵင်ယဵၼ်ၵႂႃႇတေႃႇသုတ်းတၢင်း သမ်ႉပေႃးထိုင်ၼႂ်းၵၢတ်ႇလူင်ၵၢင်ဝဵင်းၼၼ်ႉယဝ်ႉၼႃႇ။
သိုပ်ႇလူထႅင်ႈတွၼ်ႈတေမႃးၶႃႈ
