ၽႅတ်ႈၽၢၼ်ႇၵႂႃႇတီႈ သႅင်ႇလႅင်ထိပ်ႇဢၼ်ၼိုင်ႈ ငိုၼ်းသႅင်ၵေႃႈၵိုတ်းၸုၵ်းၸိူဝ်ႈဝႆႉသေ ပေႃႈၶဝ်ၾၢင်ႉႁၼ်မႅၼ်ႈလႄႈ
“ၸွင်ႇတေဢဝ်ႁိုဝ်”
ငိုၼ်းသႅင်ငွၵ်းႁူဝ်ၼႄယဝ်ႉ ဢူႈၶဝ်ၵေႃႈသိုဝ်ႉပၼ်မၼ်းသေ၊ သွင်ၶႃၵေႃႈ သိုပ်ႇၵႂႃႇႁႃၵိၼ်ၶဝ်ႈတီႈသႅင်ႇယဝ်ႉ။
“ႁိုင်ၵႃႈႁိုဝ်ယဝ်ႉဢမ်ႇလႆႈဢွၼ်လုၵ်ႈမႃးလႄႇၸိူင်ႉၼႆ”
“ၸဵမ်မိူဝ်ႈယိင်းယူႇၸၼ်ႉသၢမ်ပုၼ်ႉယဝ်ႉ”
“ၼၼ်ႁႃႉ ႁိုင်တေႉဢိူဝ်ႈၼႆ၊ ၸွင်ႇတေၶႂ်ႈသိုဝ်ႉသင်ထႅင်ႈႁိုဝ်”
“ဢမ်ႇယဝ်ႉ”
“သိူဝ်ႈၶူဝ်းလူးဢမ်ႇၶႂ်ႈလႆႈႁႃႉ”
“တေပႂ်ႉၸူဝ်းၶိူဝ်းႁွမ်မႃးဢဝ်”
သွင်ၶႃၵေႃႈဢွၼ်ၵၼ်ပွၵ်ႈမိူဝ်းယဝ်ႉ လႆႈႁၼ်မႄႈလႄႈတင်းၵူၼ်းႁေႃႈၵႃးၼၼ်ႉ ၵွတ်ႇၵၼ်ယူႇၼႃႈႁိူၼ်းသေ သူင်ႇသင်ႇၵၼ်ယဝ်ႉ မႄႈၵေႃႈၶဝ်ႈၵႂႃႇၼႂ်းႁိူၼ်းယူႇ။ လႆႈႁၼ်ၸိူင်ႉၼၼ်ၵေႃႈ ၼႂ်းၸႂ်ၼႆႉဢိုၵ်ႉၼိုၵ်ႉမႃးဝႆႉယူႇသေတႃႉ သွင်ၶႃၵေႃႈၼိမ်ယဵၼ်တူၺ်းယူႇၸိူင်ႉၼၼ်ၵႂႃႇႁင်းၽႂ်မၼ်း။
ငိုၼ်းသႅင်ၵေႃႈ ဢဝ်ၶူဝ်းမၼ်းၶဝ်ႈမိူဝ်းၼႂ်းႁွင်ႈၼွၼ်းမၼ်းယဝ်ႉ ပေႃႈမႄႈမၼ်းၵေႃႈ ႁွင်ႉဢုပ်ႇၵၼ်ၵႂႃႇတီႈၼႂ်းႁွင်ႈႁပ်ႉၶႅၵ်ႇၼၼ်ႉယဝ်ႉ။ ပွၵ်ႈၼႆႉ ပဵၼ်ၵၢၼ်ဢုပ်ႇၵၼ်လူၺ်ႈသဵင်ယဵၼ်လိူဝ်ပိူၼ်ႈယဝ်ႉႁိုဝ်ဢမ်ႇႁူႉ ငိုၼ်းသႅင်ၼၼ်ႉတႄႉၵေႃႈ လၵ်ႉဢိုတ်ႇႁႆႈယူႇၼႂ်းႁွင်ႈၼွၼ်းႁင်းၵူၺ်းမၼ်းယဝ်ႉ။
ယၢမ်းၵၢင်ၼႂ်မႃး မႄႈၵေႃႈသိမ်းၶူဝ်းသိမ်းလဵင်းမၼ်းၸဵမ်ၸဝ်ႉသေ ငိုၼ်းသႅင်ၵေႃႈ ႁႅၼ်းၶဝ်ႈၽၵ်းမၼ်းယူႇႁင်းၵူၺ်းၼႂ်းသိုင်ႇၾႆးၼၼ်ႉယဝ်ႉ၊ သွင်ၵေႃႉယူႇၸွမ်းၵၼ်ၵေႃႈ ဢမ်ႇလႆႈလၢတ်ႈတေႃႇၵၼ် ႁဵတ်းယူႇႁင်းၽႂ်ႁင်းမၼ်း။
ႁႅၼ်းၶူဝ်းယဝ်ႉၵေႃႈမီးၵႃးမႃးတဵၵ်းႁွၼ်းယူႇယဝ်ႉၼႃႇ မႄႈၵေႃႈၼႅတ်ႈယွင်ႈထူင်ၶူဝ်းမၼ်းဢွၵ်ႇႁိူၼ်းမႃးဝႆးဝႆးယဝ်ႉဢိူဝ်ႈ။ သမ်ႉဝႃႈၼင်ႇၼၼ်ၵေႃႈ ၼႂ်းၸႂ်ၶိုင်ႈၼိုင်ႈၼၼ်ႉတႄႉ ၵပ်ႉတိပ်ႇဝႆႉယူႇ မိူဝ်ႈၵႃးဢွၵ်ႇၵႂႃႇၼၼ်ႉ ငိုၼ်းသႅင်ပႃးတင်းၵၢၵ်ႇၵွၼ်ႉၽၵ်းသေလႅၼ်ႈလမ်းၵႂႃႇယဝ်ႉ။
“မႄႈ..”
“ၵႃးၼၼ်ႉၵိုင်ႉၵၢင်ႉၵိုတ်းၵႂႃႇသေ”
ငိုၼ်းသႅင်လႅၼ်ႈၵႂႃႇၶိုတ်းယဝ်ႉၵေႃႈ မႄႈမၼ်းပႆလူင်းၵႃးမႃးယဝ်ႉ
“မီးလွင်ႈႁင်”
“မႄႈၸွင်ႇယၢမ်ႈႁၵ်ႉယိင်းႁိုဝ်” တင်းသၢႆတႃၶီမွင် လေႃးပႃးလွင်ႈမုင်ႈမွင်းယူႇၼၼ်ႉ ယၵ်ႉဝၢႆႇတူၺ်းၼႃႈမႄႈမၼ်းယူႇ။
မိူဝ်ႈလႆႈငိၼ်းၵႂၢမ်းၶေႃႈၼၼ်ႉ မႄႈမၼ်းၵေႃႈၼိမ်ယဵၼ်ၵႂႃႇတင်းႁိုင်လႄႈ ယၵ်ႉတူၺ်းၼႃႈငိုၼ်းသႅင်ယဝ်ႉ ပၢႆႈသၢႆတႃပႅတ်ႈသေ “ဢမ်ႇႁၵ်ႉ” ၶိုၼ်ႈၵႃး ပိၵ်ႉၽၵ်းတူသဵင်လင်ယဝ်ႉ ၵႃးၵေႃႈပၢႆႈၽၢတ်ႇဢွၵ်ႇၵႂႃႇယူႇ။ ငိုၼ်းသႅင်ၼၼ်ႉတႄႉ ၶႃသမ်ႉပေႃးဢူၼ်ႈဢွၼ်ႇ ၼင်ႈယူႇၼႂ်းၵၢင်တၢင်းၼၼ်ႉသေ ဢဝ်ၼမ်ႉတႃၸိုမ်းယမ်းၼႃႈဝႆႉယူႇဢိူဝ်ႈ။
ငိုၼ်းသႅင်ၵေႃႈ ၵၢၼ်ႉၵူၵ်ႉၵၢၼ်ႉၵၢၵ်ႉသေ မိူဝ်းၵႂႃႇလွႆးလွႆးယူႇႁင်းမၼ်း၊ မိူဝ်ႈၼႆႉၵေႃႈ ၵႂႃႇႁူင်းႁဵၼ်းပႆၵႂႃႇၵူၺ်း ၵွပ်ႈပိူဝ်ႈလႅင်ထိပ်ႇဢၼ်သိုဝ်ႉမႃးၼၼ်ႉ ဢမ်ႇပႆႇမေႃၶီႇလႄႈ ဝူၼ်ႉဝႃႈဝၼ်းလိုဝ်ႈမႃးၸင်ႇတေၽိုၵ်းၶီႇၵူၺ်းယဝ်ႉ။
ဝၼ်းလိုဝ်ႈယဝ်ႉၼႆၵေႃႈ ဢဝ်တင်းလႅင်ထိပ်ႇမၼ်းထူဝ်းၵႂႃႇတၢင်းတူၼ်ႈမႆႉၼၼ်ႉသေ ငွၵ်ႈသၢႆႉငွၵ်ႈၶႂႃ ငွၵ်ႈၸွမ်းပႃႇၽၵ်းတူၸိူဝ်းၼၼ်ႉ ၼင်ႇဝႃႈမွင်းၽႂ်သေၵေႃႉၵေႃႉဝႆႉယူႇ။ ယၢမ်းၼၼ်ႉ ၸင်ႇမီးမၢၵ်ႇဢူမ်ႁေႃႇၸေႈဢၼ်ၼိုင်ႈ တူၵ်းလူင်းမႃးယူႇတီႈၼိူဝ်ႁူဝ်မၼ်း တႅမ်ႈဝႆႉဝႃႈ
“ပေႃးတေငွၵ်ႈပေႉတၢၼ်ႇၼၼ်ႉ ဢမ်ႇၶဝ်ႈမႃးၼႂ်းဝၢင်းႁိူၼ်းၼႆႉႁေ”
ႁႅၼ်မုင်ႈၶဝ်ႈၵႂႃႇၼႂ်းႁူဝ်ႉ တီႈႁိူၼ်းထၢပ်ႈၼိူဝ်ၼၼ်ႉၵေႃႈ လႆႈႁၼ်သႅင်ပိုၼ်းငွၵ်ႈယၵ်ႉတူၺ်းမၼ်းဝႆႉယူႇယဝ်ႉၼႃႇ။
“ၶူး…ၶႃႈၸဵပ်းဢေႃႈ”
“မႃးႁဵတ်းသင်”
“မႃးပၼ်ႇလႅင်ထိပ်ႇ”
“ပၼ်ႇလႅင်ထိပ်ႇႁင် တႂ်ႈတူၼ်ႈမႆႉၼႆႉ”
“ၶႃႈဢမ်ႇမေႃပၼ်ႇ..”
“ပႂ်ႉၼၼ်ႈလႄႈ..” သႅင်ပိုၼ်းၵေႃႈ ၼႅတ်ႈလႅၼ်ႈဢွၵ်ႇမႃးၸူးမၼ်းသေ ဢဝ်တင်းလႅင်ထိပ်ႇမၼ်းဢွၵ်ႇမႃးယူႇ။
သွင်ၶႃၵေႃႈၽိုၵ်းပၼ်ၵၼ်ယူႇၸွမ်းတၢင်းၸိူဝ်းၼၼ်ႉယဝ်ႉ ငိုၼ်းသႅင်ၼၼ်ႉၵေႃႈ ဢမ်ႇယၢမ်ႈၶီႇလႄႈ လႆႈၽိုၵ်းယူႇတင်းႁိုင် ထိုင်မိူဝ်ႈၶီႇလႆႈမႃးယဝ်ႉၼႆၵေႃႈ သမ်ႉမႃးလူမ်ႉၽႃႇသႂ်ႇႁူဝ်ႉၼၼ်ႉသေ ဢဝ်မၼ်းသမ်ႉပေႃးႁႆႈဢွၵ်ႇမႃးယူႇ။
သႅင်ပိုၼ်းၼႅတ်ႈလႅၼ်ႈမႃးဢဝ်ယဝ်ႉ “ၸွင်ႇပဵၼ်သင်ႁိုဝ် ၸဵပ်းတီႈလႂ်”
ငိုၼ်းသႅင်ၼၼ်ႉၵေႃႈ ဢမ်ႇလုၵ်ႉလႆႈယဝ်ႉလႄႈ ႁူဝ်ၶဝ်ႇၵေႃႈလွၵ်ႈ ၶႃၵေႃႈၸဵပ်း တိၼ်ၵေႃႈၶတ်းယဝ်ႉ သႅင်ပိုၼ်းသမ်ႉပေႃးလႆႈႁွင်းဢဝ်မၼ်းလုၵ်ႉၶိုၼ်ႈမႃး ဢမ်ႇၶႂ်ႈပေႉတူဝ်လႆႈယဝ်ႉ။
“ၵမ်ႉၶူးမိူဝ်းဢဝ်ယႃမႃးတႃးပၼ်”
“ၸဵပ်းတေႉယဝ်ႉၶူး မၼ်းၸဵပ်းတေႉယဝ်ႉ” တင်းလၢတ်ႈတင်းႁႆႈ တွႆႇသႂ်ႇၼႃႈဢူၵ်းမၼ်းၼင်ႇၵပ်ႉၵိၼ်းမႃးၼႃႇၼၼ်ႉယဝ်ႉ။
ၶူးၵေႃႈတေယၢင်ႈၵႂႃႇတၢင်းၼႃႈထႅင်ႈၵူၺ်းပေႃးဢမ်ႇၸၢင်ႈယဝ်ႉ ၶိုၼ်းမႄးထွႆလင်သေၼင်ႈၵႂႃႇႁိမ်းမၼ်းၼၼ်ႉလႄႈ “ဢမ်ႇပဵၼ်သင်ၶူးမီးယူႇတီႈၼႆႈၵူၺ်း”
ႁႆႈယူႇတင်းႁိုင် ထိုင်တီႈမၼ်းပေႃးတဵတ်ႇၵႂႃႇႁင်းၵူၺ်းယဝ်ႉ၊ သႅင်ပိုၼ်းၵေႃႈ မိူဝ်းဢဝ်ယႃမႃးတႃးပၼ်သေ ဢဝ်လႅင်ထိပ်ႇမိူဝ်းသူင်ႇမၼ်းၵႂႃႇတီႈသႅင်ႇၶဝ်ၼၼ်ႉယဝ်ႉ။
တီႈၼႂ်းႁိူၼ်း ဢၼ်ၵႆႉလႆႈငိၼ်းဢၢႆလဝ်ႈ သဵင်ၵႂၢမ်းသဵင်ပွင်ႉၶၢင်းယူႇၼၼ်ႉ ယၢမ်းၼႆႉၵေႃႈယဵၼ်သီႇသီႇ မၢင်ၵမ်းၵေႃႈ ၶုၵ်းၸႂ်လႆႈဢၢႆမၼ်းမႃးယူႇဢိူဝ်ႈ၊ ၵူၺ်းၵႃႈ သွင်ၵေႃႉပေႃႈလုၵ်ႈၵေႃႈ ၼင်ႈၵိၼ်ၶဝ်ႈၵုမ်းၵၼ်ႁေ ယူႇၵႂႃႇႁင်းၽႂ်ႁင်းမၼ်းၵူၺ်းယဝ်ႉ။
“ၶူး..ပႂ်ႉၶႃႈၽွင်ႈ”
“လမ်းမႃးႁႂ်ႈၶိုတ်းလႄႈ”
သွင်ၶႃၵေႃႈၶီႇတင်းလႅင်ထိပ်ႇသေ လႅၼ်ႈလူၺ်းလမ်းၵၼ်လူင်ၵႂႃႇတၢင်းႁူင်းႁဵၼ်းၼၼ်ႉယဝ်ႉ။ ၵႆႉႁူပ်ႉၵႆႉထူပ်းၵၼ် ၵႆႉဢုပ်ႇၵႆႉလၢတ်ႈတေႃႇၵၼ် လွင်ႈၸမ်ၸႂ်သွင်ၶႃတိူဝ်းၼမ်မႃး၊ လွင်ႈမႆႈၸႂ်ၵေႃႈမီးၼမ်မႃး လွင်ႈသႂ်ႇၸႂ်ဢၼ်ဝူၼ်ႉဝႃႈပဵၼ်လုၵ်ႈႁဵၼ်းၵေႃႉၼိုင်ႈၼႆၼၼ်ႉ ၼင်ႇဝႃႈမၼ်းပူၼ်ႉလူၼ်ႉလိူဝ်မႃးလိူဝ်သေၽႂ်လႄႈ လွင်ႈဢၼ်ဝႃႈၶူးၼႆၼၼ်ႉၵေႃႈ ၶၢမ်ႈသဵၼ်ႈမၼ်းၵႂႃႇယဝ်ႉ။ ႁူႉတူဝ်မႃးၵေႃႈ သမ်ႉပေႃးဢမ်ႇၸၢင်ႈႁႄႉႁၢမ်ႈၸႂ်လႆႈယဝ်ႉၼႃႇ။
သိုပ်ႇလူတွၼ်ႈတေမႃးၶႃႈ
