သႅင်ပိုၼ်းပဵၼ်ၵူၼ်း မေႃဢုပ်ႇမေႃလၢတ်ႈ ႁဵတ်းႁႂ်ႈလုၵ်ႈႁဵၼ်းမိုတ်ႈငၢႆႈမႃး။ ၵိုတ်းငိုၼ်းသႅင်ၵူၺ်း ဢမ်ႇပေႃးမိူၼ်ပိူၼ်ႈၵႃႈႁိုဝ်၊ မိူဝ်ႈၶူးသွၼ်ယဝ်ႉၼၼ်ႉ လုၵ်ႈႁဵၼ်းၵေႃႈ ဢွၼ်ၵၼ်ဢုပ်ႇၸွမ်းၶူးၶဝ် ဢၼ်ၵႆႉဢုပ်ႇၼႃႇႁေ ၵူၼ်းတွပ်ႇပေႃးဢမ်ႇတၼ်းၶိုတ်းၼၼ်ႉတႄႉ ပဵၼ်ၶိူဝ်းႁွမ်ယဝ်ႉ။ ငိုၼ်းသႅင်ၼၼ်ႉတႄႉ ယိပ်းတင်းပပ်ႉလိၵ်ႈသေယဝ်ႉ ၵူမ်ႈၼႃႈၵူမ်ႈတႃလူယူႇႁင်းမၼ်းၼၼ်ႉၵူၺ်း။
ဝၢႆးသေၶူးဢမ်ႇယူႇၼႂ်းႁွင်ႈႁဵၼ်းယဝ်ႉၼႆ ၶိူဝ်းႁွမ်ၼၼ်ႉတႄႉ ၼင်ႇဢၼ်မၼ်းႁူႉမၼ်းငိၼ်းမႃးၼၼ်ႉ မႃးလၢတ်ႈၼႄငိုၼ်းသႅင်ယဝ်ႉ။
“ၵဝ်ႁူႉယဝ်ႉဝႃႈ ၶူးသႅင်ပိုၼ်းပဵၼ်ၼွင်ႉၶူးၶိူဝ်းမိူင်း ၵဝ်ငိၼ်းမႃးဝႃႈ ၶူးၶိူဝ်းမိူင်း မႃးသိုဝ်ႉႁိူၼ်းဝႆႉတီႈၼႆႈလႄႈ ဢွၼ်ၼႃႈႁိူၼ်းၶဝ်မႃးယူႇတီႈၼႆႈၼႆဝႃႇ ပေႃးလၢမ်းဢမ်ႇၽိတ်းတႄႉ တေယူႇတၢင်းပွၵ်ႉမႂ်းၼၼ်ႉယဝ်ႈ”
“ၵဝ်ဝႃႈမႂ်းၼႆႉ ၵႂႃႇႁဵတ်းၽူႈၸွပ်ႇဢဝ်ဢမ်ႇလီႁႃႉ”
“ပိူၼ်ႈၵၢၼ်ႉမႃးလၢတ်ႈၼႄၵေႃႈ”
တွၼ်ႈတႃႇငိုၼ်းသႅင်တႄႉ ႁိုဝ်မီးၶၢဝ်းယၢမ်းမႃးသူၼ်ၸႂ်လွင်ႈပိူၼ်ႈ တေႃႈၼင်ႇတူဝ်ၵဝ်ႇၵူၺ်း ၵႄႈၶႆပေႃးဢမ်ႇလႆႈယဝ်ႉ။ မၢင်ပွၵ်ႈမႃးၵေႃႈ ပေႃးဢိမ်ႇၸၢၼ်ႈၼႃႇၼႆၵေႃႈ ၵႆႉလၵ်ႉၵႂႃႇယူႇတီႈယဵၼ်ယဵၼ်သေ လူပပ်ႉလိၵ်ႈ ပပ်ႉၸိူင်းၸိူဝ်းၼႆႉယႃၸႂ်မၼ်းၵႂႃႇ။ ပေႃးဝႃႈမၼ်းလႆႈလူၸိူင်းၼႆသမ်ႉ ၵႃႈဢမ်ႇသုတ်းမိုဝ်းမၼ်းတိုၼ်းၽႃႈဢမ်ႇလႆႈယဝ်ႉ။
ဝၢႆးလူင်းႁူင်းႁဵၼ်းယဝ်ႉၼႆၵေႃႈ မၼ်းၼၼ်ႉတႄႉ တင်းပပ်ႉၸိူင်းသေ ၵူမ်ႈၼႃႈၵူမ်ႈတႃလူလူင်မိူဝ်းၵႂႃႇၸွမ်းတၢင်းလွႆးလွႆးႁင်းၵူၺ်းယဝ်ႉ။ ၵူၺ်းၵႃႈ သႅင်ပိုၼ်းၵေႃႈ ၶီႇတင်းလႅင်ထိပ်ႇၼၼ်ႉ ႁေႃႈၵႂႃႇၸွမ်းလင်မၼ်းယူႇ။ မၼ်းၼၼ်ႉတႄႉ ဢမ်ႇႁူႉတူဝ် ၵုမ်ႇၵူမ်ႈယူႇၵူၺ်း ႁၼ်တၢင်းၵူၺ်းၵေႃႈၵၢမ်ႇလီၼႃႇယဝ်ႉ။
မိူဝ်ႈၸမ်တေၶဝ်ႈၵိဝ်ႇပွၵ်ႉၶဝ်ၼၼ်ႉသမ်ႉ မီးႁူမ်ႈမႆႉတီႈၼင်ႈလိုဝ်ႈယူႇလႄႈ ငိုၼ်းသႅင်ၵေႃႈ မႄးၼင်ႈတီႈၼၼ်ႈလီလီသေ သႅင်ပိုၼ်းၼၼ်ႉတႄႉၵေႃႈ ပူၼ်ႉၶဝ်ႈမိူဝ်းၵႂႃႇၼႂ်းဝၢင်းႁိူၼ်းၶဝ် ဢၼ်တိတ်းၸမ်တင်း ႁူမ်ႈငိုၼ်းသႅင်ယူႇၼၼ်ႉယဝ်ႉ။
ၵၢင်ဝၼ်းၸၢႆႉၸိူၼ်းႁူင်ႈတူၵ်းလိၼ် တိုၵ်ႉႁၼ်မီးၵူၼ်းယူႇတႂ်ႈႁူမ်ႈမႆႉလႄႈ သႅင်ပိုၼ်းၵေႃႈယူႇတီႈၼႂ်းဝၢင်းႁူဝ်ႉၼၼ်ႉသေ ငွၵ်ႈတူၺ်းငိုၼ်းသႅင်။
“ဢေးၼွင်ႉ! ၶမ်ႈၼႃႇယဝ်ႉပႆႇပွၵ်ႈၵွၼ်ႇႁႃႉ..”
ငိုၼ်းသႅင်ငိၼ်းသဵင် ငွၵ်ႈတူၺ်းၵႂႃႇတူၺ်းမႃး ၸင်ႇသမ်ႉဝၢႆႇတူၺ်းတၢင်းလင် ႁၼ်ႁူဝ်ၵူၼ်းပႅၼ်ယူႇလႄႈ တူၵ်းၸႂ် သမ်ႉပေႃးပိုဝ်ႈပပ်ႉမၼ်းလူၼ်ႇမိုဝ်းၵႂႃႇယဝ်ႉ ၼႅတ်ႈၵဵပ်းဢဝ်ပပ်ႉမၼ်းသေ လႅၼ်ႈၵႂႃႇဝႆးဝႆး၊ ဢဝ်သႅင်ပိုၼ်းသမ်ႉပေႃးတူၺ်းမၼ်းယဝ်ႉယုမ်ႉၶူဝ်ဢွၵ်ႇမႃး။
ငိုၼ်းသႅင်ၵေႃႈႁွတ်ႈၵႂႃႇတီႈသႅင်ႇၶဝ် ဢၼ်မီးၾႆးလႅင်းထွင်ႇယူႇၼႃႈသႅင်ႇၼၼ်ႉ မႄႈၵေႃႈမီးယူႇၼႂ်းသႅင်ႇလႄႈ ၶိုၼ်ႈသဵင်လၢတ်ႈၸူးမၼ်း
“လူင်းႁူင်းႁဵၼ်းၸဵမ်မိူဝ်ႈၸဝ်ႉ တိုၵ်ႉႁွတ်ႈမႃးမိူဝ်ႈလဵဝ်ၵူၺ်းၼႆႉ”
“သူၵေႃႈ..ပွင်ႇၸႂ်ပၼ်လုၵ်ႈၽွင်ႈလႄႈ လုၵ်ႈတေမီးၵၢၼ်ၼမ်ၵေႃႈပဵၼ်လႆႈ”
“ႁိုဝ်ႉ!” ဢဝ်ၶူဝ်ထူင်ၶူဝ်းမၼ်းၼၼ်ႉသေ ဢွၵ်ႇသႅင်ႇမိူဝ်းၵႂႃႇယဝ်ႉ။
ၽွင်းငိုၼ်းသႅင်လႄႈပေႃႈၶဝ် တိုၵ်ႉၽဵဝ်ႈသိမ်းသႅင်ႇယူႇၼၼ်ႉ သႅင်ပိုၼ်းၸင်ႇၶဝ်ႈသႅင်ႇမႃးသေယဝ်ႉ ငိုၼ်းသႅင်လႆႈႁၼ်ၵေႃႈ ၼႅတ်ႈပႅပ်ႉဝႆႉယူႇၼႂ်းႁွင်ႈၵဵပ်းၶူဝ်းၶွင်ၶဝ်ၼၼ်ႉသေ ထွမ်ႇသဵင်ႁူဝ်ၸႂ်မၼ်းတွတ်ႇယူႇ။ ထၢင်ႇတႄႉ တေပဵၼ်လွင်ႈဢၼ်မၼ်းတူၵ်းၸႂ်မိူဝ်ႈၵႆႈၼၼ်ႉပႆႇႁၢႆ။
သႅင်ပိုၼ်းတင်းပေႃႈၶဝ်ၼၼ်ႉၵေႃႈ ဢုပ်ႇၵၼ်ယူႇတင်းႁိုင် ၵေႃႉၼိုင်ႈသမ်ႉမေႃလၢတ်ႈ ထႅင်ႈၵေႃႉၼိုင်ႈသမ်ႉၵႆႉလၢတ်ႈ တိုၵ်ႉႁူႉၸၵ်းၵၼ်ၵူၺ်းလႄႈ တႃႇႁႂ်ႈပေႃးမိုတ်ႈၵိုဝ်းၸမ်ၸႂ်ၵၼ်ၼၼ်ႉ ဢုပ်ႇၵၼ်လွင်ႈၼိုင်ႈယဝ်ႉလွင်ႈၼိုင်ႈ ထိုင်ၵၢင်ၶမ်ႈလပ်းသိင်ႇၼႃႇၼၼ်ႉယဝ်ႉ။
ငိုၼ်းသႅင်ၼၼ်ႉၵေႃႈ ထၢင်ႇသႅင်ပိုၼ်းတေၵႂႃႇၵမ်းလႂ်ၵေႃႈဢမ်ႇၵႂႃႇ ၼင်ႈဢိင်ၽႃသေၼွၼ်းလပ်းၵႂႃႇယဝ်ႉ။ ပေႃႈၶဝ်ၵေႃႈ ၵုမ်ႇဢုပ်ႇသႅင်ပိုၼ်းၵူၺ်းလႄႈ ပေႃးလိုမ်းတူၺ်းလုၵ်ႈမၼ်းယဝ်ႉ တင်းသူင်ႇသင်ႇသႅင်ပိုၼ်း တင်းဢိုတ်းသႅင်ႇမၼ်းၵႂႃႇသေ မိူဝ်းၵႂႃႇႁင်းၽႂ်ႁင်းမၼ်း။
ပွၵ်ႈမိူဝ်းထိုင်ႁိူၼ်း မိူဝ်းႁုင်ၶဝ်ႈမိုဝ်ႉၽၵ်းယဝ်ႉသေ ၵႂႃႇႁွင်ႉလိုၼ်းသႅင်ၼႂ်းႁွင်ႈ ႁႂ်ႈမႃးၵိၼ်ၶဝ်ႈ ၵူၺ်းသမ်ႉဢမ်ႇလႆႈႁၼ်သေ ထၢမ်မႄႈၶဝ်
“ဢေးလုၵ်ႈ ၵႂႃႇလႂ်ယဝ်ႉ!”
မႄႈၶဝ် ဢၼ်ၼင်ႈလႅၼ်းၶႃယၢဝ်း ၼင်ႈဢိင်တင်ႇႁေတူၺ်းထီႇဝီႇယူႇၼၼ်ႉၵေႃႈ “ၸွင်ႇမၼ်းပႃႈမႃးႁိူၼ်းႁိုဝ်”
“ဢမ်ႇၸႂ်ႈမၼ်းမႃးၸွမ်းသူႁႃႉမိူဝ်ႈၵႆႈ..”
“ပေႃးမႃးၵေႃႈမီးယူႇတီႈႁိူၼ်းၼႆႉၵူၺ်းယဝ်ႉလေႃႇ”
“လုၵ်ႈယူႇၸွမ်းသူ သူမႃးထၢမ်ႁဝ်း ပဵၼ်သင်ဢမ်ႇတူၺ်းလီလီလႃႇ မၼ်းၸၢင်ႈၵႂႃႇတီႈလႂ် မီးယူႇတီႈသႅင်ႇၼၼ်ႉၵူၺ်းယူဝ်ႉ”
“ဢမ်ႇမီး မိူဝ်ႈႁဝ်းဢိုတ်း ႁဝ်းတူၺ်းလီၼႃႇယဝ်ႉ!! ပေႃးထၢၼ်ႈဝႃႈမၼ်းယူႇ မိူဝ်ႈႁဝ်းဢိုတ်းၽၵ်းတူမၼ်းတၢၼ်ႇလီႁွင်ႉယဝ်ႉလေႃႇ”
“တေမႃးလၢတ်ႈၼႄႁဝ်းႁဵတ်းသင်လႃႇ ၵႂႃႇႁႃလႄႈ!”
ပေႃႈပႃးတင်းၾႆးထၢတ်ႈလူင်ႁေ ပၼ်ႇႁႃလေႇပေႃးၸွတ်ႇဝၢၼ်ႈၵေႃႈဢမ်ႇႁၼ် တီႈသႅင်ႇၼၼ်ႉတႄႉၵေႃႈ ယုမ်ႇဝႃႈမၼ်းတေဢမ်ႇယူႇလႄႈဢမ်ႇၵႂႃႇၽုၺ်ႇတူၺ်းယဝ်ႉ ၵႂႃႇတီႈႁူမ်ႈမႆႉဢၼ်ငိုၼ်းသႅင်ၵႆႉမႃးၼင်ႈယူႇတႃႇသေႇၼၼ်ႉၵေႃႈ ဢမ်ႇႁၼ်။ မိူဝ်ႈသႅင်ပိုၼ်းလႆႈႁၼ် ၾႆးထၢတ်ႈလႅင်းထွင်ႇၵႂႃႇမႃးတီႈသႅင်ႇၼၼ်ႉ ၸင်ႇဢွၵ်ႇမႃးတူၺ်းယဝ်ႉ။
“ပဵၼ်လုင်းႁဝ်းၶႃႈႁႃႉ..”
“ဢိူဝ်ႈ..ၸွင်ႇႁၼ်လုၵ်ႈယိင်းလုင်းႁႃႉ!”
“လုၵ်ႈယိင်းလုင်း..”
“ၵူၼ်းၵေႃႉဢၼ်ၵႆႉမႃးၼင်ႈယူႇတီႈၼႆႈၼႆႉယဝ်ႉ”
“မိူဝ်ႈၸဝ်ႉတႄႉႁၼ်မႃးၼင်ႈယူႇၵေႃႉၼိုင်ႈၶႃႈ ၸွင်ႇၸႂ်ႈဢမ်ႇၸႂ်ႈၵေႃႉလဵဝ်ၵၼ်တႄႉဢမ်ႇႁူႉ”
“ဢိူဝ်ႈ..ၵေႃႉၼၼ်ႉယဝ်ႉ မိူဝ်ႈၵၢင်ၶမ်ႈၼႆႉလူး ဢမ်ႇႁၼ်ၺႃးႁႃႉ”
“ဢမ်ႇလႆႈႁၼ်ၽႂ်ၶႃႈ”
“လုၵ်ႈဢွၼ်ႇၵေႃႉၼႆႉ မၼ်းတေၵႂႃႇတၢင်းလႂ်လႃႇၼႆႉ ဢမ်ႇတွၼ်ႉႁၢႆၵႂႃႇၸိူင်ႉၼႆႁေပွၵ်ႈ”
မိူဝ်ႈငိၼ်းသဵင်ၵူၼ်းဢုပ်ႇၵၼ်ငိၼ်းၶေႃႈဢမ်ႇငိၼ်းၶေႃႈၼၼ်ႉ ၶူးၶိူဝ်းမိူင်းဢွၵ်ႇမႃးတူၺ်းသေ
“မီးလွင်ႈသင်ၶႃႈ”
“ဢေႃ ငိုၼ်းသႅင်မၼ်းႁၢႆၵႂႃႇတၢင်းလႂ်ၵေႃႈဢမ်ႇႁူႉယဝ်ႉ”
“ၸိူင်ႉၼၼ်ၶႃႈႁႃႉ ၵႂႃႇလႄႈၸၢႆး ႁဝ်းၵႂႃႇႁႃၸွႆႈလုင်းႁဝ်း”
ၶဝ်ၵေႃႈဢွၼ်ၵၼ်ၸွမ်းႁႃငိုၼ်းသႅင်ယဝ်ႉ။ ငိုၼ်းသႅင်ဢၼ်ၼွၼ်းလပ်းယူႇလီလီၼၼ်ႉၵေႃႈ မိူဝ်ႈဢၼ်မီးသဵင်ၼူႁွင်ႉၸူၸူ မေႃးယူႇၸွမ်းၸွၵ်ႉၸွမ်းၸဵင်ႇ လႅၼ်ႈလူၺ်းလမ်းၵၼ်ယူႇတႂ်ႈၶဵင်ႇႁၢၼ်ႉ တႆႇၶိုၼ်ႈၸွမ်းတူဝ်မၼ်းမႃးၼႆၵေႃႈ ၽႅတ်းတိုၼ်ႇမႃးသေ ၶုၼ်ႇႁွင်ႉသႅၼ်ႇလင်ဢွၵ်ႇမႃး ၶဝ်သၢမ်ၵေႃႉဢၼ်ၸွမ်းႁႃယူႇၼၼ်ႉၵေႃႈ ၼႅတ်ႈဢႅၼ်ႇလႅၼ်ႈမႃးတၢင်းသဵင်မေႃးၼၼ်ႉ သမ်ႉပဵၼ်တီႈသႅင်ႇၶဝ်ၼၼ်ႉသေ ၼႅတ်ႈၽုၺ်ႇၽၵ်းတူသေယဝ်ႉ ပိုတ်ႇၾႆးၵႂႃႇ ဢမ်ႇႁၼ်ၽႂ် ၵူၺ်းသမ်ႉငိၼ်းသဵင်တွႆႇၽၵ်းတူယူႇၼႂ်းႁွင်ႈၵဵပ်းၶွင်ၼၼ်ႉ
“ပေႃႈ!! ၸွႆႈယိင်းၽွင်ႈ! ၼူၼမ်ၼႃႇ ယိင်းၵူဝ်!!” တင်းႁွင်ႉႁႆႈႁွင်ႉသႅၼ်ႇ မိုဝ်းပေႃႈၶဝ်ၽုၺ်ႇၽၵ်းတူပၼ်သမ်ႉပေႃးသၼ်ႇယဝ်ႉၼႃႇ။
သႅင်ပိုၼ်းၵေႃႉလႆႈၽုၺ်ႇပၼ်ၵႂႃႇယဝ်ႉ မွင်းၽၵ်းတူၽုၺ်ႇလႆႈၵူၺ်း ငိုၼ်းသႅင်ၼႅတ်ႈၸၼ်ၽၵ်းတူဢွၵ်ႇသေ ၵျွၵ်းၵွပ်ႈသႂ်ႇပၼ်သႅင်ပိုၼ်းၼၼ်ႉၵမ်းလဵဝ် တင်းႁွင်ႉတင်းႁႆႈ မိူၼ်လုၵ်ႈဢွၼ်ႇသွင်သၢမ်ၶူပ်ႇၼၼ်ႉယဝ်ႉယိုင်။ သႅင်ပိုၼ်းၵေႃႈ ၸၢင်ႈတေႁဵတ်းႁိုဝ် လုပ်ႈလင်ပၼ်မၼ်းလွႆးလွႆးႁေ
“ဢမ်ႇပဵၼ်သင်ယဝ်ႉ မၼ်းၵႂႃႇယဝ်ႉ ဢမ်ႇမီးယဝ်ႉၼႃႈ”
ၽိူဝ်ႇလႆႈငိၼ်းသဵင်ၼၼ်ႉ ဢမ်ႇၸႂ်ႈသဵင်ပေႃႈမၼ်းယဝ်ႉၵေႃႈ တူၺ်းၼႃႈၵူၼ်းၵေႃႉၼၼ်ႉယဝ်ႉ ပွႆႇတူဝ်မၼ်းလူင်းသေ လႅၼ်ႈဢွၵ်ႇၵႂႃႇၵမ်းလဵဝ်။
မိူဝ်းထိုင်ႁိူၼ်း မႄႈၶဝ်ၵေႃႈထၢမ်ဢိူဝ်ႈ “မႂ်းၵႂႃႇလႂ်မႃး!”
“ၼွၼ်းလပ်းၼႂ်းသႅင်ႇ”
ပေႃးဝႃႈၼၼ်ၵေႃႈ ႁၼ်ၼႃႈပေႃႈၶဝ်ယဝ်ႉၼႆ ပွင်ႉပၼ်သမ်ႉပေႃးဢမ်ႇၸၢင်ႈလၢတ်ႈသင်လႆႈ ပွင်ႉယူႇတၢင်းၶိုၼ်းၼွၼ်းထွမ်ႇပေႃးဢမ်ႇၸၢင်ႈလပ်းယဝ်ႉ။ ပေႃႈၵေႃႈ ပေႃးမီးလွင်ႈမီးတၢင်းမၼ်းယူႇတႄႉ မၼ်းတေဢမ်ႇထဵင်ၶိုၼ်း။
သိုပ်ႇလူထႅင်ႈတွၼ်ႈတေမႃးၶႃႈ
