ပိုၼ်းမိူင်းၵေႃႈၸွမ်းမိူဝ်းၵႂႃႇ
“ၼွင်ႉတေၵႂႃႇလႂ်လႃႇ”
“မိူဝ်းႁိူၼ်းၵေးဢေႃႈ”
“မႃးလႄႈပီႈၸွႆႈ”
“ဢမ်ႇပဵၼ်ႁင်”
“ၼွင်ႉဢမ်ႇလူဝ်ႇၵႂႃႇလႂ်ႁႃႉ”
“ဢမ်ႇ..”
ထူၵ်းငိုၼ်းမၢင်မိုၼ်ႇမႃးသေ “ၼႆႉပီႈပၼ်ၵႃႈၶဝ်ႈမုၼ်း”
“ဢဝ်ၶွင်မိူဝ်းပၼ်ပီႈၼူၼ်းယဝ်ႉၵွႆႈၵႂႃႇ”
“ပၼ်ပီႈဢဝ်မိူဝ်းလႄႈ ပီႈပၼ်သွင်မိုၼ်ႇ”
“ပီႈၼူၼ်းဝႃႈႁႂ်ႈၶႃႈမိူဝ်းဝႆးဝႆးၼႆ”
ထူၵ်းဢွၵ်ႇမႃးထႅင်ႈ မၢင်မိုၼ်ႇထႅင်ႈဢၼ်ၼိုင်ႈ “ပေႃးဢမ်ႇၼႅတ်ႈမိူဝ်းပီႈၼူၼ်းတေလႃႇၶႃႈယဝ်ႉၼႆႉ”
“ဢမ်ႇၶႂ်ႈလႆႈၵေႃႈယဝ်ႉ” ပိုၼ်းမိူင်းၶိုၼ်းသိမ်းၶိုၼ်းသေ ၼွင်ႉႁွမ်ၵေႃႈၵိုတ်းၵႂႃႇယဝ်ႉ မႄးယၢင်ႈထွႆလင်ၸူးပိုၼ်းမိူင်း
“ဢူႈႁဝ်းၵေႃႈဢမ်ႇယူႇႁိူၼ်းလူင်” တင်းသၢႆတႃမၼ်းယၵ်ႉတူၺ်းပိုၼ်းမိူင်းၼင်ႇမီးၽႅၼ်ဝႆႉယူႇ။ ပိုၼ်းမိူင်းၵေႃႈထူၵ်းပၼ်ၼင်ႇႁူႉၸႂ်ၼၼ်ႉယဝ်ႉ။ ၼွင်ႉႁွမ်ၼၼ်ႉၵေႃႈ လႆႈၵႂႃႇသၢမ်မိုၼ်ႇယဝ်ႉသေ ႁၢႆၵႂႃႇတၢင်းလႂ်ဢမ်ႇႁူႉမၼ်းယဝ်ႉ။
“ၼွင်ႉယိင်းၽႂ်ဢမ်ႇႁူႉ လႅတ်းၼႃႇလူင်”
မိူဝ်ႈၶႃႈတိုၵ်ႉၸင်ႇႁႃႁဵတ်းၽၵ်းယူႇၼႂ်းသွင်ႇၾႆးၼၼ်ႉ လႆႈငိၼ်းသဵင်ၽၵ်းတူဝၢင်းလႄႈ ၶႃႈၵေႃႈထၢင်ႇဝႃႈၼွင်ႉႁွမ်၊ မိူဝ်ႈလႆႈငိၼ်းသဵင်ၵူၼ်း
“ၸွင်ႇမီးၽႂ်ယူႇႁိူၼ်းၶႃႈ”
“တင်းၵူဝ်တင်းသၼ်ႇ ၼႅတ်ႈပႅပ်ႉဝႆႉယူႇတီႈၽၵ်းတူယဝ်ႉ”
ၼႂ်းၸႂ်တႄႉဝူၼ်ႉယူႇဝႃႈ မၼ်းႁဵတ်းႁိုဝ်မႃးလႃႇ၊ မၼ်းၵေႃႈဢမ်ႇၵႂႃႇတၢင်းလႂ် ပႂ်ႉဝႆႉယူႇၼႃႈႁိူၼ်းၼၼ်ႉယဝ်ႉ၊ ၶႃႈၵေႃႈဢမ်ႇၸၢင်ႈဢွၵ်ႇၸွၵ်ႉလႆႈယဝ်ႈ။
ပႂ်ႉယူႇတၢင်းႁိုင် မၼ်းၵေႃႈဢမ်ႇၵႂႃႇ၊ ၶႃႈၵေႃႈဢမ်ႇတူင်ႉ တေႃႇဢူႈႁဝ်းပေႃးမႃး ၶႃႈၸင်ႇတေလူမ်ၸႂ်လႆႈ။
“ၸၢႆးမႃးႁႃၽႂ်လႃႇ”
“ၼူၼ်းလိုမ်းၶူဝ်းတီႈလၢၼ်ႉပီႈလူဝ်းႁဝ်းလႄႈ ဢဝ်မႃးသူင်ႇဢေႃႈ”
“ၼၼ်ႁႃႉ ဢမ်ႇမီးၽႂ်ၼႄႇတီႈႁိူၼ်း ဢေးၼူၼ်းလူးၵႂႃႇလႂ်ယဝ်ႉ”
“ဢမ်ႇႁၼ်ၽႂ်ၶႃႈၼေႈ ပႂ်ႉယူႇၸဵမ်ၵႆႈယဝ်ႉၶႃႈ”
“ဢေးလႅင်ၵေႃႈဢမ်ႇယူႇၼႄႇ”
“ဢမ်ႇႁၼ်ၶႃႈၼႃ”
“လုၵ်ႈဢွၼ်ႇၸိူဝ်းၼႆႉၵႂႃႇလႂ်မႃႈ”
“ပေႃးၼၼ်ၶႃႈမိူဝ်းၵွၼ်ႇယဝ်ႉၶႃႈ”
“ၵိၼ်ယဝ်ႉၼႄႇၶဝ်ႈ”
“ၵိၼ်မႃးယဝ်ႉ..” ယၵ်ႉတူၺ်းၵႂႃႇၼႂ်းသွင်ၾႆးၼၼ်ႉသေ “ပႆႇလႆႈၵိၼ်ၶႃႈ”
ႁၼ်ယူႇမႃးၼင်ႈၵိၼ်ၶဝ်ႈသွႆးတီႈသႅင်ႇဢေးလၢဝ်ၼၼ်ႉ
“ၵိၼ်ၶဝ်ႈႁေၵွႆႈမိူဝ်းလႄႈ”
ၶႃႈၵေႃႈပေႃးဢမ်ႇႁူႉတေလႆႈႁဵတ်းႁိုဝ်ယဝ်ႉ ၶျွင်းတူၺ်းသေ မိူဝ်ႈၶႃဢုပ်ႇၵၼ်ယူၼၼ်ႉ ၼႅတ်ႈလႅၼ်ႈဢွၵ်ႇၵႂႃႇတၢင်းလင်ႁိူၼ်း ၶၢမ်ႈႁူဝ်ႉၵႂႃႇတၢင်းႁိူၼ်းပႃႈလူႇၶဝ်ၼၼ်ႉယဝ်ႉ။ ဢူႈႁဝ်းႁၼ်မႅၼ်ႈလႄႈ
“ဢေးၼူၼ်း..”ၶႃႈၵေႃႈႁဵတ်းၵႅင်ႈဝိၼ်ႇၼႃႈမႃး“ၵႂႃႇလႂ်မႃး..”
“မိူဝ်းလႄႇပႃႈလူႇမႃး”
“ႁႅၼ်းၶဝ်ႈၽၵ်းႁဝ်းဢႄႈ ၵဝ်တွင်ႉမႆႈၶဝ်ႈယဝ်ႉ”
“ဢေႃႈ..”
ၶႃႈၵေႃႈၶိုၼ်းမႃးသေ ပိုၼ်းမိူင်းတႄႉၵၼ်ႈၶူဝ်ၵၼ်ႈယုမ်ႉယူႇယဝ်ႉ။
တီႈၽိူၼ်မူႇၶဝ်ႈ ၶႃႈဝႃႈၶႃႈတေဢမ်ႇၵိၼ် ဢူႈႁဝ်းသမ်ႉဝႃႈႁႂ်ႈၼင်ႈၸွမ်း ၶႃႈၵေႃႈၵိၼ်ႁေယဝ်ႉဢိူဝ်ႈၼႃႇ။
“ၵဝ်ႁၼ်ၶိူဝ်တွႆးၵၼ်မႃးႁိုင်ၼႃႇယဝ်ႉ” ဢူႈႁဝ်းယၵ်ႉတူၺ်းၼႃႈပိုၼ်းမိူင်းသေ “ၶိူဝ်ႁၵ်ႉၵၼ်ယူႇတေႉႁႃႉ ၵဝ်ထၢမ်ၶိူဝ်”
သမ်ႉပေႃးဢဝ်ၵမ်းၶဝ်ႈၸၢင်လူင်ၵႂႃႇၵမ်းလဵဝ်၊ ၶႃႈပေႃးဢမ်ႇႁူႉတေလၢတ်ႈသင်ယဝ်ႉ။
“ၶႃႈႁၵ်ႉလုၵ်ႈယိင်းလုင်းႁဝ်းဢေႃႈ”
“ဢၢၼ်းတေႇၼႃႈႁိူၼ်းၸွမ်ႇယူႇၼႄႇ”
သဵင်မၼ်းယဵၼ်ၵႂႃႇတင်းႁိုင်သေယဝ် ယၵ်ႉတူၺ်းၼႃႈၶႃႈ ၼင်ႇပႂ်ႉၶႃႈတွပ်ႇယူႇ၊ မိူဝ်ႈၼၼ်ႉ ၶႃႈၵေႃႈဢိုမ်တိုမ်းဢမ်ႇႁူႉတေလႆႈလၢတ်ႈသင် လွင်ႈဢၼ်ၶႃႈၵူဝ်ၼၼ်ႉ ပေႃႇၽုတ်းဢွၵ်ႇမႃးၼႂ်းႁူဝ်သေလၢတ်ႈဢွၵ်ႇယဝ်ႉ။
“သူမီးၼႃႈႁိူၼ်းယဝ်ႉႁႃႉ”
တီႈၽိူၼ်မူႇၶဝ်ႈၼၼ်ႉ လႅပ်ႈဢမ်ႇမီးၽႂ်ဢိုၼ်ၶဝ်ႈလူင်းၶေႃးလႆႈယဝ်ႉ၊ တေႃႇၼႃႈဢူႈႁဝ်း ၸွင်ႇမၼ်းတေႁတ်းလၢတ်ႈလႅၼ်ယူႇႁိုဝ် ၶႃႈၵေႃႈၶႂ်ႈႁူႉမိူၼ်ၵၼ်။
ယၵ်ႉတူၺ်းဢူႈႁဝ်းသေ လၢတ်ႈၸူးၶႃႈ “ဢမ်ႇမီးၶႃႈ”
သၢႆတႃမၼ်းၼၼ်ႉ ႁဵတ်းႁႂ်ႈၶႃႈလႆႈယုမ်ႇၵႂႃႇယဝ်ႉ။
“ပေႃးဢၢၼ်းတေႇယူႇၵေႃႈ ႁႂ်ႈၵူၼ်းလူင်သူမႃးထၢမ်လႄႈၼႃႈ”
ၶႃႈသမ်ႉပေႃးၵႅၼ်ႉၼမ်ႉၵႂႃႇၵမ်းလဵဝ်ယဝ်ႉ။
“ဢေႃႈၶႃႈ”
