ဝၢႆးသေဝၼ်းၼၼ်ႉ ပေႃးၵႂႃႇဢၢပ်ႇၼမ်ႉၼႆ ၵႆႉၵႆႉလႆႈႁူပ်ႉၵၼ်သေ မၢင်ပွၵ်ႈၵေႃႈတင်ႈၸႂ်ႁႂ်ႈၺႃးၵၼ်တီႈတႃႈၼမ်ႉယူႇ။
ယူႇယူႇဢေးဢွင်ႇပုမ်ပွင်ႇမႃးယဝ်ႉ ႁူႉႁူႉၵၼ်ယူႇဝႃႈပဵၼ်ပီႈသူၺ်ႇဢွင်ႇ။ ၽိူဝ်ႇဢေးဢွင်ႇလၢတ်ႈဝႃႈ မၼ်းပႃးတွင်ႉၼႆၵေႃႈ ပီႈသူၺ်ႇဢွင်ႇၸင်ႇလၢတ်ႈဝႃႈ မီးမေးယဝ်ႉၼႆသေ တေဢဝ်ဢမ်ႇဢဝ်ဝႆႉယူႇဢိူဝ်ႈ၊ မေးမၼ်းၵေႃႈဢမ်ႇပႅတ်ႈ တေဝႃႈၶႂ်ႈလႆႈဢေးဢွင်ႇႁၼႆၵေႃႈ ၼႂ်းၵၢင်ၸႂ်မၼ်းတႄႉဢမ်ႇပေႃးၶႂ်ႈလႆႈသေၵႃႈႁိုဝ် မိူၼ်ၼင်ႇၶွင်လဵၼ်ႈမၼ်းၵူၺ်း၊ ၼႂ်းသၢႆတႃၶဝ်ၼႆႉ တူၺ်းၽူႈယိင်းပေႃးဢမ်ႇလႅပ်ႈမီးၵႃႈၶၼ်သေဢိတ်း။
တေဝႃႈဢေးဢွင်ႇၵေႃႈ ၽိူဝ်ႇႁူႉတူဝ်ပုမ်မၼ်းပေႃးယႂ်ႇၼႃႇယဝ်ႉလူး၊ တေယႃႉၵေႃႈဢမ်ႇၸၢင်ႈယဝ်ႉၼႃႇ၊ ၵႃႈလႆႈဝႆႉတေႃႇမၼ်းပေႃးယႂ်ႇ ပိူၼ်ႈပေႃးႁူႉၵၼ်တင်းဝၢၼ်ႈယဝ်ႉ၊ ၽူႈၵွၼ်းၶဝ်ၵေႃႈ လၢတ်ႈႁႂ်ႈပီႈသူၺ်ႇဢွင်ႇဢဝ်ပုၼ်ႈၽွၼ်းယူႇဢိူဝ်ႈ။
သမ်ႉဝႃႈဢမ်ႇၸႂ်ႈၽူဝ်ဢေးဢွင်ႇသေတႃႉၵေႃႈ ႁႂ်ႈပဵၼ်ပေႃႈလုၵ်ႈဢေးဢွင်ႇၼႆသေ တႅပ်းတတ်းၵၼ်ၵႂႃႇ သမ်ႉဝႃႈၵႃႈထၢမ်ၵႃႈယွၼ်းမၼ်းဢမ်ႇၼမ်ၵေႃႈ ဢေးဢွင်ႇတႄႉပဵၼ်ၵႂႃႇမေးၼွႆႉပိူၼ်ႈၼႆ ၵႃႈလႆႈယွမ်းႁပ်ႉယဝ်ႉ။
ဝၢႆးသေပဵၼ်လွင်ႈဢေးဢွင်ႇယဝ်ႉ ၶႃႈၵေႃႈဢမ်ႇဝႆႉၸႂ်ပီႈပိုၼ်းၶိူဝ်းမႃးယဝ်ႈ၊ ၶႃႈၸင်ႇတေပွင်ႇၸႂ်လွင်ႈဢၼ်ပေႃႈႁႄႉႁၢမ်ႈ လႄႇၵၢင်ၶိုၼ်းၸိူဝ်းၼႆႉမႃးယူႇ။
ၶႃႈၵေႃႈဢမ်ႇပေႃးၶႂ်ႈႁူပ်ႉမၼ်းသေၵႃႈႁိုဝ်ယဝ်ႉ တႃႈၼမ်ႉၵေႃႈဢမ်ႇၵႂႃႇယဝ်ႉလႄႈ ၼမ်ႉတီႈႁိူၼ်းမႃးယူႇၼႆၵေႃႈ ဢၢပ်ႇတီႈႁိူၼ်းၵႂႃႇၵူၺ်း။
ပေႃးၶႃႈႁၼ်မၼ်းၼႆ ၶႃႈၵႆႉပၢႆႈ ၵႆႉဝႄႈမၼ်းယူႇတႃႇသေႇ သမ်ႉဝႃႈၸႂ်ထိုင်ၶႂ်ႈႁၼ်ယူႇၵေႃႈ ၶႃႈဢမ်ႇႁတ်းႁူပ်ႉတေႃႇၼႃႈမၼ်းလႆႈ ၶႃႈၵူဝ်ဢေႃႈ၊ ၵူဝ်ဝႃႈဢၼ်မၼ်းလၢတ်ႈမႃးၸိူဝ်းၼၼ်ႉ ပဵၼ်ၵႂၢမ်းၽၢင်းၵူၺ်း၊ ၵူဝ်ဝႃႈလွင်ႈဢၼ်ၶႃႈဝူၼ်ႉၸွမ်းမၼ်းယူႇၼၼ်ႉ ပဵၼ်ၶႃႈၽၢႆႇလဵဝ်ၵူၺ်း။
ၶဝ်ၵေႃႈပဵၼ်ၵူၼ်းဢမ်ႇယူႇတီႈလဵဝ် ပဵၼ်ၵူၼ်းႁၢင်ႈလီႁၢင်ႈလဝ်း မေႃဢုပ်ႇမေႃၵဝ်းပဵၼ်တၢၼ်ႇၼၼ်ႉ ၶႃႈဢမ်ႇယုမ်ႇလႆႈဝႃႈ ၶဝ်တေဢမ်ႇမီးၸူႉမီးၸူဝ်း ၶေးတေမီးၼႃႈႁိူၼ်းမီးလုၵ်ႈယဝ်ႉၵွၼ်ႇလႃႈ။
သမ်ႉဝႃႈဝူၼ်ႉဢမ်ႇဢၢၼ်းႁူပ်ႉ ဢမ်ႇဢၢၼ်းၶႂ်ထူပ်းၼႆၵေႃႈ လိူၵ်ႈလိူၵ်ႈသမ်ႉမႃးသိူၵ်ႈသႂ်ႇၼႃႈ မိူဝ်ႈၵႂႃႇသိုဝ်ႉၽၵ်းတီႈသႅင်ႇဢေးလၢဝ်၊ ၶႃႈၵေႃႈဢမ်ႇလႆႈယၵ်ႉတူၺ်းၼႃႈမၼ်း မၼ်းတႄႉၶႂ်ႈၶဝ်ႈမႃးၸမ်ယူႇ ၵူၺ်းၵႃႈၶႃႈဝႄႈပႅတ်ႈလႄႈ မၼ်းၵေႃႈၸွမ်းသုတ်ႉႁႃ ဢဝ်ၶႃႈပေႃးတိူၵ်ႈၸွၵ်ႉ။ ဢမ်ႇၸၢင်ႈၵႂႃႇလႂ်ယဝ်ႉလႄႈ ဢဝ်မိုဝ်းသွင်ၶွၼ်ႁႄႉတူဝ်ၶႃႈဝႆႉသေ
“သူပၢႆႈႁဝ်းႁဵတ်းႁင်”
“ႁဝ်းဢမ်ႇလႆႈပၢႆႈ ပၼ်ႁဝ်းၵႂႃႇဢိတ်ႉၼိုင်ႈလႄႈ”
“ပေႃးသူဢမ်ႇလၢတ်ႈႁဝ်းႁဝ်းဢမ်ႇပၼ်ၵႂႃႇ”
“ပိူၼ်ႈတူၺ်းၼႃႇယဝ်ႉၼၼ်ႉ”
“တူၺ်းၵေႃႈယဝ်ႉပိူၼ်ႈလႄႈ ႁဝ်းဢမ်ႇသူၼ်”
တူဝ်ၶႃႈသမ်ႉလဵၵ်ႉဝႆႉလႄႈ ၵူမ်ႈၽုတ်ႉဢွၵ်ႇၵႂႃႇပႅတ်ႈယဝ်ႉ ၶူဝ်းၵေႃႈဢမ်ႇဢဝ်ႁေ ၼႅတ်ႈဢွၵ်ႇမိူဝ်းယဝ်ႉ။
“ဢေးၼူၼ်းမႂ်းလိုမ်းၶွင်မၼ်းယူဝ်ႉ”
“ၼပ်ႉဝႆႉလႄႈ ၵဝ်မိူဝ်းဢဝ်ငိုၼ်းမႃးၵမ်ႉ” ၶႃႈၵေႃႈၼႅတ်ႈလႅၼ်ႈမိူဝ်းယဝ်ႉ မိူဝ်းၺႃးၼွင်ႉႁွမ် ၼွင်ႉယိင်းၶႃႈ
“ဢေးၼွင်ႉ..မႃးၼႆႈၵမ်ႉလူး”
မၼ်းၵေႃႈၼႅတ်ႈလႅၼ်ႈမႃးသေ
“မိူဝ်းဢဝ်ၶူဝ်းတီႈႁိူၼ်းပီႈလၢဝ်သူပၼ်ပီႈၽွင်ႈ ပီႈဢမ်ႇပေႃးတၼ်း” ဢဝ်ငိုၼ်းယိုၼ်ႈပၼ်ယဝ်ႉ ဢၼ်လိူဝ်ၵေႃႈဢဝ်သိုဝ်ႉၵိၼ်ႁေၼႃႈ
“ၸႂ်လီၵျႃႉ” ၼႅတ်ႈလႅၼ်ႈမိူဝ်းၵႂႃႇယဝ်ႉ။
ပိုၼ်းမိူင်းၵေႃႈပႆႇၵႂႃႇလႂ် ပႂ်ႉဝႆႉယူႇတီႈသႅင်ႇသေ လႆႈငိၼ်းၼွင်ႉႁွမ်လၢတ်ႈ
“ပီႈလၢဝ် ပီႈၼူၼ်းႁႂ်ႈမႃးၸၢႆႇၵႃႈၶွင်မၼ်းဝႃႇ”
“မၼ်းၵႂႃႇလႂ်ယဝ်ႉ”
“မၼ်းဢမ်ႇတၼ်းၼႆ”
ဢေးလၢဝ်ၵေႃႈဢၢၼ်းငိုၼ်းသေ ၼွင်ႉႁွမ်သိုဝ်ႉၶဝ်ႈမုၼ်းယဝ်ႉႁိဝ်ႈထူင်ၶူဝ်းလူင်မိူဝ်း။
