ၸၢႆးသၢႆၶိူဝ်းၵေႃႈ ၼင်ႇႁိုဝ်ပေႃးတေဢမ်ႇမီးလွင်ႈသုၵ်ႉယုင်ႈ ၸွမ်းမႃးၼၼ်ႉ မၼ်းၸၢႆးၽိတ်ႈမွၵ်ႇၵူၼ်းႁိမ်းႁွမ်းၸိူဝ်းၼၼ်ႉလႄႈ ၵူၼ်းယႂ်ႇၵူၼ်းလူင်ဢၼ်မၼ်းႁူႉၸၵ်းၸိူဝ်းၼၼ်ႉ ႁႂ်ႈလႆႈမႃးႁူမ်ႈၵျေႃႇ မူၼ်ႈၸွမ်းႁဝ်းၶႃႈၼႆလႄႈ ၶဝ်ၵေႃႈဢွၼ်ၵၼ်မႃးဢဝ်ၼႃႈဢဝ်တႃၼမ် ဝႆႉတေႉၼင်ႇၵဝ်ႇ။
“သင်ဝႃႈၽိတ်ႈမွၵ်ႇပႃးတီႈႁၢၼ်ၶဝ်ၸွင်ႇတေသၢင်ႇထုၵ်ႇၶႃႈႁႃႉၼႆႉ”
“လႆႈဢေႃႈလီယူႇလူး လႆႈဝႃႈႁႃလွင်ႈၸမ်ၸႂ်ၵၼ်လွင်ႈယုမ်ႇယမ်ၵၼ် ၼႆၵေႃႈဝႃႈၼၼ်ႉၶႃႈၼႃႇ”
“မိူဝ်ႈႁဝ်းမီးလွင်ႈလိူတ်ႇမႆႈၵေႃႈ ႁဝ်းသမ်ႉႁူႉလႅၼ်ႈႁႃပိူၼ်ႈယူႇၼၼ်ႉ ၶႃႈၼႃႇၼေႃႈ”
“ၸႂ်ႈယဝ်ႉဝႃႈ”
ႁၢၼ်ၶဝ်ၵေႃႈမႃးသေ ဢွၼ်ၵၼ်ၵိၼ်မူၼ်ႈမူၼ်ႈသိူဝ်းသိူဝ်း
ႁူဝ်ၼႃႈၼၢင်းယိင်းၶဝ်ၼၼ်ႉ မႃးၸၼ်ၶႅၼ်မၼ်းသေ
“ယွၼ်းၸၢႆးသၢႆၶိူဝ်းလုၵ်ႉပၼ်ၵမ်းၼိုင်ႈလူး”
မၼ်းၸၢႆးလုၵ်ႉၸုၵ်းဝႆႉယဝ်ႉ။
“ၵေႃႉၼႆႉၸိုဝ်ႈႁွင်ႉဝႃႈ ၶူးၸၢႆးသၢႆၶိူဝ်းၼႆ ၵူႈၵေႃႉၵေႃႈတေႁူႉၸၵ်းၼမ် ယူႇ ၵူၺ်းၵႃႈဢၼ်ၵူႈၵေႃႉပႆႇယၢမ်ႈႁၼ်ပႆႇယၢမ်ႈငိၼ်းၼၼ်ႉ ၵျွင်းဝႃႈ ၸၢႆးသၢႆၶိူဝ်းၼႆႉ ပဵၼ်ၵူၼ်းမေႃႁွင်ႉၵႂၢမ်းသဵင်လီၵေႃႉၼိုင်ႈၼႆလႄႈ ၶႃႈ တၢင်တူဝ်ၵူႈၵေႃႉသေ ယွၼ်းၽိတ်ႈမွၵ်ႇႁႂ်ႈႁွင်ႉပၼ်သေၵမ်းၶႃႈ ဢဝ် တိင်ႇပၼ်ၸဝ်ႈမၢဝ်ႇႁဝ်းလႄႈ ၼွင်ႉမၢဝ်ႇ”
ၸၢႆးသၢႆၶိူဝ်းယိပ်းဢဝ်သေ “ၶႃႈထၢင်ႇဝႃႈမႄႈႁၢင်ႉၶဝ်တေမႃးယွၼ်းပေႃႉၶႅပ်းႁၢင်ႈၸွမ်းၼႆၼႃး ၶႃႈ ၵၢၼ်ႉၸူမ်းပႂ်ႉထႃႈယူႇၼႆႉ ပီႈၼၢင်းၸဵဝ်းတေႇၼႃႇၶႃႈလူး ၶႃႈယင်းပႆႇ ပေႃးမဝ်းလီ ယူဝ်ဢမ်ႇမေႃႁွင်ႉၶႃႈယူဝ်ႉဝႃႈ ၸၢမ်းတူၺ်းၵႂႃႈၼေႃႈ ၵူၺ်းၼႃႇတေလႆႈႁွင်ႉပၼ်ၵႂၢမ်းႁူဝ်လႂ်ၶႃႈၼႆႉ”
“ႁႂ်ႈႁွင်ႉပၼ် ၶွၼ်ႉတဝ်ႉလီ ၼႆၶႃႈဝႃႇ”
“ဢေႃႈ ပေႃးလၢတ်ႈၸိူင်ႉၼႆတႄႉလႆႈၵႂႃႇ ထွမ်ႇတူၺ်းၶႃႈၼေႃႈ” မၼ်း ၸၢႆးၵေႃႈတွႆႇတိင်ႇသေ
VI ႁိူၼ်းယေးသဝ်းမီးယၢၼ်ၽၢတ်ႇ တၢင်းႁၵ်ႉတၢင်းပဵင်းၸၼ်ၶၢတ်ႇ ယၢၼ်လိၼ်ၽင်ႁူၵ်ႉၽင်ႁႄႇသေ ပေႃႈမႄႈပီႈၼွင်ႉၸိူဝ်းၵိုတ်း တင်းလင် တေမိုင်ၵႂင်ယဝ်ႉၸွမ်းမႆႈၸႂ် ၶၢဝ်းတၢင်းၼၢင်းယၢင်ႈပႆ တေႃႇသူႈၵေႃႉလဵဝ် ၸွင်ႇပၼ်ၵႅၼ်ႇႁတ်းတတ်းၸႂ် ၸွင်ႇၵၼ်ႈ သႅၼ်ႇႁတ်းပေႉၸႂ် တိုဝ်တၼ်သေ ဢၢၼ်းလတ်းၶၢမ်ႈပူၼ်ႉပၢင်ႇ လၢႆႇတုၵ်ႉၶလူင် ၸွင်ႇၼပ်ႉသွၼ်ႇဝႆႉတၢင်းဢၢႆ တေႃႇသူႈၵႂႃႇၵႂၢမ်း ၶႃႉၶၢႆ ၵၢင်လၢႆဢၼ်ၼေးသေႉၽူႈယိင်း ဢွၵ်ႇဝၢၼ်ႈမိူင်းႁိုဝ် ႁႃး /G../A../D…/
Vll ယုၵ်ႉယၢၵ်းယုၵ်းယိၵ်းၼၢမ်ၶႂၢၵ်ႇ ဢူးလုၵ်းဢႃးလၢၵ်းလၢႆပၢၵ်ႇ ၽႂ် တေပၢၵ်ႈပတ်းထူသိူဝ်ႇပၼ် ႁႂ်ႈပီႈလႆႈႁဵတ်းၶွၼ်ႉတဝ်ႉလီ ႁႂ်ႈပီႈၸွမ်း ႁေႉၶေပၼ်ၽေး ၼၢင်းၵၢင်းပၢႆႈၵႆ သိုပ်ႇပႆၶၢဝ်းၼႃႈ ၸွင်ႇၵူဝ်ၼႄႇ ၽေးႁွပ်ႈတူဝ် ၸွင်ႇတေလူဝ်ႇၶွၼ်ႉတဝ်ႉလီ ၵၢၼ်ၶီ ၵၢၼ်တုၵ်ႉဝႆႉ ပုၼ်ႈၸၢႆး တႃႇၵျေႃႇဝႆႉပုၼ်ႈသူ ၸွင်ႇၸႂ်ယႂ်ႇၵိူဝ်းပိုင်ႈဢိင် မွၵ်ႇလီ ယုမ်ႇမႅင်းၽိုင်ႈမိၼ် လိၼ်ဢိုၼ်ၵေႃႈယဝ်ႉ ႁဝ်းႁိုဝ် ပႅတ်ႉယွၵ်ႇ လႅၼ်ၵဝ်းလဵၼ်ႈ ႁႃး/G../A../D…/
ၵမ်ႈၽွင်ႈဝႃႈ “တၢၼ်ႇတၢင်းလႆႈမႃးပဵၼ်လုၵ်ႈၶူၺ်သထေးယူႇတေႉမႃႈ ၵၢၼ်ၵေႃႈမေႃၵူႈမဵဝ်း ၸိူဝ်းၼႆႉၶုတ်းႁင်းၵူၺ်းမၼ်းလၢႆလၢႆၼႆၼၼ်ႉ”
“ပေႃႈၶဝ်ၵေႃႈလႆႈၸႂ်ၼႃႇလူင် ဢဝ်ၵႃးဝီးၵူဝ်ႉလီးဝူဝ်ႉလူင်မတ်ႉမိုဝ်း ဢဝ်ၼၼ်ႉလူး တၢၼ်ႇတၢင်းၸၢမ်ၶမ်းၶီႈသဵတ်ႈယူႇတေႉယဝ်ႉ”
“တူၺ်းၶဝ်လဵင်ႉပွႆးၼႆႉလေႃႇ ၶႂ်ႈသဵင်ႈၵႃႈႁိုဝ်ၼၼ်ႉၼႆ သထေးၼင်ႇ ၵၼ် မႃးၺႃးၵၼ်ယဝ်ႉလူး”
ၸၢႆးသၢႆၶိူဝ်းႁွင်ႉၵႂၢမ်းယဝ်ႉသေ “ပီႈၼၢင်းႁဝ်းဢဝ်ၶႃႈၸပ်းယၢမ်ႈယဝ်ႉလႄႈ ၶႃႈတေႁွင်ႉထႅင်ႈ မွၼ်း ၼႆၶႃႈၼႃ”
Key D INTRO D/Bm/G/A/D
VI တီႈပႅၼ်ႈပုၼ်းလူင်ၶူးတႅမ်ႈၼေၵေႃႈ မီးၼႃႈမွၼ်းဢွၼ်ႇ ၼႂ်းပပ်ႉ ဢၢၼ်ႇသွၼ်လိၵ်ႈၸၢႆးၵေႃႈ (မွၼ်းတၼ်းမႃးမိူဝ်ႈလႂ်) ႒ ပူဝ်ႇသတႃႇၵိုၵ်း ယူႇၼႂ်းႁွင်ႈသွၼ်ၵေႃႈ (ယဵၼ်းပဵၼ်ၼႃႈမွၼ်းမူတ်း)႒ မွၼ်း…
VII မိူဝ်ႈပွၵ်ႈႁိူၼ်းယဝ်ႉ ဢၢင်ႈတဵၵ်းၼမ်ႉသေလႄႈ ဢၢၼ်းႁူတ်းၼမ်ႉ မွၵ်ႇ ၼႂ်းၼမ်ႉမေႃႈလူင်ႁၼ်ၼႃႈမွၼ်းထႅင်ႈ (မွၼ်းတၼ်းမႃးမိူဝ်ႈလႂ်)႒ လူင်ႇမွၵ်ႇလႅင်ၶွင်ႇၸိူဝ်းၵီႈတဵမ်တူၼ်ႈၵေႃႈ (ယဵၼ်းပဵၼ်ၼႃႈမွၼ်းမူတ်း)႒ မွၼ်း…
VIII ၵွပ်ႈပိူဝ်ႈဝူၼ်ႉလွင်ႈမွၼ်းလႄႈ ထူၺ်ႈၸႂ်လူင် ၼွၼ်းၼၢၼ်းလပ်း ၼႃႇ မွင်းၽႃႈႁူမ်ႇဢုၼ်ႇ ပဵၼ်ၼွင်ႉမွၼ်းၵေႃႈ (မွၼ်းမွၼ်းၵေႃႉၸၢႆး ႁၵ်ႉဢိူၺ်)႒ ၵူမ်ႇၵွမ်ႇၽႃႈႁူမ်ႇၼွၼ်းမွႆႈႁၼ်လွင်ႈ ၼွၼ်းႁၼ်ၼွင်ႉ မွၼ်းၵူၺ်း ၼွၼ်းၾၼ်ၼွင်ႉမွၼ်းၵူၺ်း မွၼ်း…မွၼ်း..
မၼ်းၸၢႆးႁွင်ႉၵႂၢမ်းယဝ်ႉသေ ၼၢင်းၶၢမ်းလိုၼ်းၸင်ႇဝႃႈ
“ဢေႃ ပီႈသၢႆၶိူဝ်းလူဝ်ႇၵၼ်ႇတေႃးမႄႈၶဝ်ဢိူဝ်ႈၼၼ်ႉ မၼ်းလိုမ်းယဝ်ႉ ယဝ်ႉထၢင်ႇတႄႉ” မၼ်းၼၢင်းမႃးၸူးၸၢႆးသၢႆၶိူဝ်းသေယဝ်ႉ “ပီႈသၢႆၶိူဝ်း လူဝ်ႇၵၼ်တေႃးမႄႈပီႈသၢႆၶိူဝ်းဢမ်ႇၸႂ်ႈႁႃႉ”
“တေႉဢိူဝ်ႈၼေႃ ၶႃႈလိုမ်းပႅတ်ႈယဝ်ႉဢေႃႈၼၼ်ႉ ၵူႈၵေႃႉယႃႇၽူမ်ႈ ၼႅတ်ႈမိူဝ်းၶႃႈၼႃႈ ႁဝ်းၶႃႈယွၼ်းမိူဝ်းၵၼ်ႇတေႃးမႄႈၵမ်ႉဢွၼ်ႇၼိုင်ႈ ၶႃႈ ၵူႈၵေႃႉၵိၼ်ဝၢၼ်ဝၢၼ်ၵိၼ်ပႂ်ႉလွႆးလွႆးၶႃႈၼႃႉ”
“ၼၢင်းၶမ်းလိုၼ်းၵေႃႈဝႃႈ ၸွင်ႇၶႃႈတေလႆႈမိူဝ်းၸွမ်းႁႃႉ ပီႈသၢႆၶိူဝ်း”
“ပီႈၶမ်းလိုၼ်းတင်းၼၢင်းၸေႃးယဵၼ်ႇပႂ်ႉဝႆႉတီႈၼႆႈၶႃႈလႃႈ ပေႃးႁဝ်း မိူဝ်းသဵင်ႈၵေႃႈ ၵမ်ႉပိူၼ်ႈၵေႃႈမိူဝ်းႁေယဝ်ႉဢေႃႈ မႃးႁဝ်းမိူဝ်းၼွင်ႉ” ပႃးၵၼ်မႃးယဝ်ႉ။
တီႈႁိူၼ်းၼႆႉသမ်ႉၸၢႆးသၢႆၶိူဝ်းယုၵ်ႉဢဝ်ၶူဝ်းလူႇလႄႈၵွၵ်းမွၵ်ႇယိုၼ်ႈၸူးမႄႈၶဝ်ႁပ်ႉဢဝ်သေ ႁေႃးပၼ်ၶဝ်သေယဝ်ႉ ယုမ်ႉသေဝႃႈ “မႃးၸမ် ၸမ်မႄႈၼႆႉလူးလုၵ်ႈ မႄႈတေမတ်ႉဝႆႉဢမ်ႇႁႂ်ႈၵႂႃႇတၢင်းလႂ်ယဝ်ႉၼႃႉ လုၵ်ႈယိင်းဢိူၺ်ႉ” ဢဝ်သၢႆၶေႃးသဵၼ်ႈသွင်ဝၢတ်ႇႁွႆႈပၼ်ၸၢမ်ၶမ်းယူႇ။
ၼၢင်းၸၢမ်ၶမ်းၵေႃႈ ၵွပ်ႈဢမ်ႇလႆႈယူႇၸွမ်းမႄႈဢမ်ႇမီးမႄႈၸဵမ်လဵၵ်ႉ လႄႈ မွင်းပႂ်ႉထွမ်ႇၶႂ်ႈငိၼ်းၶေႃႈၵႂၢမ်းမႄႈႁွင်ႉမၼ်းၼၢင်းဝႃႈလုၵ်ႈယိင်း မႄႈၼႆၼၼ်ႉမႃးႁိုင်ၼႃႇယဝ်ႉလႄႈ မိူဝ်ႈလႆႈငိၼ်းမႄႈၸဝ်ႈၶဝ်ႁွင်ႉ မၼ်းၼၢင်းဝႃႈ လုၵ်ႈယိင်းၼႆၼၼ်ႉ ၼမ်ႉတႃလုၵ်ႈၽၢၼ်မႄႈဢွၼ်ႇ မၼ်းၼၢင်းၵေႃႈ ယိုင်ႈတဵမ်ႁူၺ်ႇဢွၼ်ႇသေ “မႄႈၶႃႈ မႄႈလုၵ်ႈယိင်း ယွၼ်းၵွတ်ႇမႄႈဢိတ်ႉၼိုင်ႈၶႃႈ”
“မႄႈၵေႃႈၶႂ်ႈၵွတ်ႇလုၵ်ႈယိင်းၼင်ႇၵဝ်ႇဢိူဝ်ႈ” ၼႆသေ ၼူမ်ပၼ်ၵႅမ်ႈ ၼၢင်းၸၢမ်ၶမ်းၼၼ်ႉယူႇ သလွတ်ႉ သွတ်ႉ “ႁိုဝ် လီႁၵ်ႉတေႉယဝ်ႉမႂ်း လုၵ်ႈယိင်းမႄႈၼႆႉ”
“ၵမ်းၼႆႉတႄႉလုၵ်ႈယိင်းၵေႃႈမီးမႄႈ လႆႈၵွတ်ႇမႄႈမိူၼ်ပိူၼ်ႈယဝ်ႉၶႃ ၼေႃမႄႈ” ယုမ်ႉတင်းၼမ်ႉတႃဢွၼ်ႇဝႆႉယူႇ။
ၶဝ်မႄႈလုၵ်ႈၵုမ်ၵၼ်တၢၼ်ႇတၢၼ်ႇသေ ၸၢႆးသၢႆၶိူဝ်းၸင်ႇဝႃႈ
“လုၵ်ႈတေၵႂႃႇၶိုၼ်းတီႈသူၼ်ဢေႃႈမႄႈ”
“ဢိူဝ်ႈၵႂႃႇလႄႈမႄႈ”
ၼႆသေဢွၵ်ႇမႃးယဝ်ႉ ၼၢင်းၸၢမ်ၶမ်းယွမ်းသဵင်ၽဵင်းၵႂၢမ်းသေ
“ၶမ်ႈဝႃးမိူဝ်ႈၼွင်ႉႁၢႆၵႂႃႇၼၼ်ႉ ၸႂ်ပီႈသၢႆၶိူဝ်းပဵၼ်ႁိုဝ်လႃႇၼၼ်ႉ”
“သိူဝ်ႈယၢဝ်းပီႈၵႂႃႇထွတ်ႇပႅတ်ႈတီႈလႂ်လႃႇ ပေႃးဢမ်ႇတၼ်းႁူႉယဝ်ႉ”
“သင်ဝႃႈႁႃတီႈလႂ်ၵေႃႈဢမ်ႇႁၼ် မိူင်းလႅင်းယဝ်ႉၵေႃႈဢမ်ႇႁၼ်ၼွင်ႉ ၼႆ ပီႈတေႁဵတ်းႁိုဝ်ၶႃႈလႃႇ”
“ပီႈတေၶဝ်ႈထိူၼ်ႇၶိုၼ်ႈလွႆၵႂႃႇတိၵ်းတိၵ်း ၶႂ်ႈတၢႆတီႈလႂ်ၵေႃႈတၢႆယဝ်ႉ လႃႈ ပေႃးဢမ်ႇမီးၼွင်ႉယဝ်ႉၵေႃႈ တေယူႇႁဵတ်းသင်ယဝ်ႉလႃႇ”
မၼ်းၼၢင်းၵေႃႈၵိူင်းႁူဝ်ဢွၼ်ႇသေ ၼႃႈယုမ်ႉယုမ်ႉဢွၼ်ႇယၵ်ႉတူၺ်း ၼႃႈၵေႃႉႁၵ်ႉမၼ်းယဝ်ႉ “တေႁဵတ်းလႆႈတေႉယူႇႁႃႉ ယူဝ်ပဵၼ်ၼမ်ႉ မၼ်းၵမ်ႈၼမ်ၵူၺ်းၶႃႈယူဝ်ႉ”
မၼ်းၸၢႆးၵေႃႈၶိုၼ်းယုမ်ႉသေ “ၸႂ်ႈဢိူဝ်ႈႁဝ်းတႄႉ ၶွင်ႁဝ်းဢမ်ႇႁၵ်ႉ ပိူၼ်ႈလူး ပဵၼ်ၼမ်ႉမၼ်းလူင်လၢႆလၢႆၵွၼ်ႇဢိူဝ်ႈ ပေႃးၼၼ်သင်ပီႈတၢႆ ပႅတ်ႈမိူဝ်ႉလူမ်ႉလူတ်ႉၼၼ်ႉလူး ၼွင်ႉတေႁဵတ်းႁိုဝ်ၼၼ်ႉ”
မၼ်းၼၢင်းၵေႃႈႁဵတ်းၵႅင်ႈတင်ႈၸႂ်လၢတ်ႈယွၵ်ႇဝႃႈ “ၼွင်ႉတေၼုင်ႈသိူဝ်ႈၵိၼ်းၵူၼ်ၵိၼ်းတၢင်ႇမုၼ်ႈယွမ်ႉသူပ်း ယွမ်ႉၶူၼ် တႃလမ်လမ် ၽေႇၶူၼ်ႁူဝ်တိုၵ်းသွၵ်းတိၼ်သေယဝ်ႉ ႁေႃႈၵႃးဢဝ် မၢၼ်ႇၵႃးလူင်းသေ ပိုတ်ႇၵႂၢမ်းလင်လင်ယဝ်ႉ လႄႇႁႂ်ႈပေႃးၸွတ်ႇဝဵင်း ဢေႃႈ”
ၸၢႆးသၢႆၶိူဝ်းၵေႃႈ ယုမ်ႇ ထၢင်ႇမၼ်းဝႃႈတေႉၼႆသေ ၼႃႈငဝ်ငဝ်ဢွၼ်ႇ ယၵ်ႉတူၺ်းမၼ်းၼၢင်းယဝ်ႉ ၶုၼ်ႇယဵပ်ႇလီႇပႃႇၵႃးႁႅင်းႁႅင်း ႁႂ်ႈၵႃးလႅၼ်ႈ ပုင်ႈၵႂႃႇဝႆးဝႆးယူႇ မၼ်းၼၢင်းၵူဝ်ၼႃႇသေ မႃးၵွတ်ႇမၼ်းၸၢႆးဝႆႉယူႇ မၼ်း ၵိုတ်းၵႃးမၼ်းသေ
“ပွႆႇပီႈလႄႈ ႁိုဝ်ႈပေႃးၼွင်ႉၵူဝ်တၢႆၸွမ်းပီႈၵေႃႈ ႁေႃႈၵႂႃႇႁင်းၵူၺ်းလႄႈ ပီႈတေၵႂႃႇၵေႃႉလဵဝ်ပီႈ”
ၼႆသေ ပိုတ်ႇၽၵ်းတူၵႃး ဢၢင်ႈလူင်းယူႇ ၼၢင်းၸၢမ်ၶမ်းၶုၵ်းၸႂ်လႆႈ ဢၼ်ၸၢႆးသၢႆၶိူဝ်းဝႃႈ ယႃႇပေယႃၶႃႈယဝ်ႉလႃႈ ပွႆႇၶႃႈတၢႆႁေလႃႈၼႆ ၼၼ်ႉလႄႈ
“ဢမ်ႇၶႃႈ ၼွင်ႉဝႃႈလဵၼ်ႈၵူၺ်း ၼွင်ႉႁၵ်ႉပီႈဢေႃႈ ၼွင်ႉဢမ်ႇထၢင်ႇဝႃႈ ပီႈတေတိူဝ်ႉၸႂ် ၸိူင်ႉၼႆ ၼွင်ႉဝႃႈလဵၼ်ႈၵူၺ်းၶႃႈ”
“ၸၢမ်ၶမ်းပီႈႁၵ်ႉၼွင်ႉၼႆႉ ႁၵ်ႉၼႃႇလိူဝ်သၢႆၸႂ်ပီႈၵွၼ်ႇဢိူဝ်ႈ ၵွပ်ႈဝႃႈ ပီႈႁၵ်ႉပူၼ်ႉလိူဝ်ၼႃႇလႄႈ မိူဝ်ႈလႆႈငိၼ်းၼွင်ႉလၢတ်ႈမႃးၸိူင်ႉၼၼ် ပီႈၸႂ်လဵၵ်ႉတေႉတေႉဢိူဝ်ႈ”
“ၶႂၢင်းပၼ်ၼွင်ႉဢိတ်ႉၼိုင်ႈၶႃႈ”
“လႆႈယူႇ ၼွင်ႉယႃႇပေႁႆႈယဝ်ႉလႃႈ ပီႈႁၵ်ႉၼွင်ႉပေႃးၼႃႇလိူဝ်သၢႆၸႂ် ပီႈယဝ်ႉလူး ၵွပ်ႈသင်လႄႈပီႈတေဢမ်ႇဝၢင်းၶႂၢင်းပၼ်ၼွင်ႉလႆႈလႃႇ”
ၶိုၼ်းၵွတ်ႇဢဝ်တူဝ်ၸၢမ်ၶမ်းသေ ၸဵတ်ႉပၼ်ၼမ်ႉတႃးမၼ်းၼၢင်း ယူႇ။
“ၼွင်ႉယႃႇပေႁႆႈယဝ်ႉ မႃးပီႈႁွမ်ၵႅမ်ႈၵမ်းၼိုင်ႈလူး”
“ပီႈပေႃးပဵၼ်ၸဝ်ႈမၼ်းယဝ်ႉလူး တေယွၼ်းၶႂၢင်ႉၽႂ်ထႅင်ႈလႃႇ ၸွပ်ႉ! ႁိုဝ်ႈ ၼွင်ႉတႄႉတိုၼ်းဢမ်ႇယွၼ်းၶႂၢင်ႉၽႂ်ယဝ်ႉ ပဵၼ်ၶွင်ၼွင်ႉၸႅတ်ႈ ၸၢင်ႇယဝ်ႉလူး”
မၼ်းၸၢႆးၵေႃႈ ၸွပ်ႉ! ၸွပ်ႉ ၼႆသေ “သင်ဝႃႈပီႈၸၢႆပႅတ်ႈဝၼ်းၼၼ်ႉ ၼႆ ၽႂ်တေလႆႈမႃးၼူမ်ၼေႃ”
“ႁိုဝ်ႉ ၽႂ်တိုၼ်းဢမ်ႇလႆႈၼူမ်လေႃႇ ဝၼ်းၼၼ်ႉသင်ပီႈတၢႆတႄႉ ၼွင်ႉ ၵေႃႈတိုၼ်းဢမ်ႇယူႇယဝ်ႉဝႃႈ”
ၸၢႆးသၢႆၶိူဝ်းၵေႃႈ တူၺ်းၼႃႈမၼ်းတၢင်းလီလီယဝ်ႉ ယုမ်ႉယုမ်ႉသေ “တေႁဵတ်းလႆႈယူႇတေႉႁႃႉ ပေႃးတၢၼ်ႇပဵၼ်လႆႈ ယႃႇပေၶီႈလႅၼ်ၼႃ”
“ႁိုဝ်ႉ ၼွင်ႉဢီးလူ ၼွင်ႉၵွတ်ႇပီႈသေႁႆႈ ႁႆႈပေႃးလိုမ်းတူဝ် သိူဝ်ႈၼွင်ႉ ၵေႃႈပေႃးပဵၼ်လိူတ်ႈၵႂႃႇသဵင်ႈ ၵႃႈပီႈပႆႇႁူႉတူဝ်ၶိုၼ်းလီလီ ၼွင်ႉတမ်ႉ ၵိၼ်ၶဝ်ႈၵိၼ်ၼမ်ႉႁင်”
“တေႉႁႃႉ လီႁၵ်ႉၼႃႇတေႉယဝ်ႉ” ၸွပ်ႉ ၼႆသေ ႁေႃႈၵႃးမႃးလွႆးလွႆး သေ ၶဝ်ႈမႃးၼင်ႈၶိုၼ်းယဝ်ႉ ယိပ်းဢဝ်တိင်ႇသေ ႁွင်ႉၵႂၢမ်းဢၼ်ဝႃႈ
VI တၢင်းႁၵ်ႉလႄႈတၢင်းႁၵ်ႉလေႃးၵၼ် ပဵင်းပေႃးၸႂ်တင်းၼွင်ႉဢွၼ်ႇ ဢမ်ႇၽၢတ်ႇၵႆ ပႆၸမ်ႁိမ်းၵၼ်မႃး ၸၢႆးယုမ်ႉၵေႃႈပေႃးၼွင်ႉၶူဝ် ၸၢႆး ၸူမ်းၵေႃႈပႃးၼွင်ႉသိူဝ်းၵျေႃႇ
VII ၸိူဝ်းသေႉၵေႃႈတွၼ်ႉသေႉယဝ်ႉသေ ၸိူဝ်းယႃႉၵေႃႈၸွမ်းယႃႉႁဝ်း ၽၢတ်ႇ ၶၢမ်ႇၵႅၼ်ႇလႄႈလႆႈပူၼ်ႉၶၢမ်ႈလွတ်ႈမႃး တူၵ်းၵိၼ်းၵေႃႈပႃး လူၺ်ႈၵၼ် မိုဝ်းတိုတ်ႉၸၼ်မႃးႁွတ်ႈတီႈသႃႇ ႁိူၼ်းႁၵ်ႉဢွၼ်ႇမၼ်ႈ ၵိုမ်းယူႇ
Cho မီးၸၢႆးသၢမ်လေႃးလႄႈ ၵေႃႉပဵၼ်ၼၢင်းဢူးပဵမ်ႇ ၵိုၵ်းပိုၼ်းဝႆႉပၼ် မႃး ႁႃးသွင်ၵေႃႉၵေႃႈႁၵ်ႉၵၼ် ၵိၼ်းမႃးၸိူင်ႉႁိုဝ် ၸိူဝ်းႁႃးထူပ်းၺႃး ၵဵပ်းဝႆႉပဵၼ်ပိုၼ်း
VII ဝၢႆးၼႆႉၸိုင်ႁႃးမီးလုၵ်ႈလၢၼ် ပိုၼ်းႁႃးတေၵိုတ်းၸွမ်းလၢတ်ႈပၼ် ဢပုမ်ႇဢွၼ်ႇဢၼ်လွင်ႈလႆႈႁၵ်ႉၵၼ်မႃး တူၵ်းၵိၼ်းၵေႃႈပႃး လူၺ်ႈ ၵၼ် မိုဝ်းတိုတ်ႉၸၼ်မႃး ႁွတ်ႈတီႈသႃႇ ပိုၼ်းႁၵ်ႉဢွၼ်ႇတႅမ်ႈၼႂ်းၸႂ်
ၸၢႆးသၢႆၶိူဝ်းႁွင်ႉယဝ်ႉသေ ႁူဝ်ၼႃႈယိင်းၶဝ်ၵေႃႈ
“ၵမ်းၼႆႉႁဝ်းၶႃႈတေယွၼ်းထွမ်ႇသဵင်ၵႂၢမ်းဝၢၼ်ဢွၼ်ႇၸဝ်ႈသၢဝ်ႁဝ်း ယွၼ်းၸဝ်ႈသၢဝ်ႁဝ်းႁွင်ႉပၼ်သေၵမ်းၶႃႈ
“ၶႃႈယိင်းဢမ်ႇမေႃႁွင်ႉၶႃႈ ၶႃႈတေႁႂ်ႈပီႈသၢႆၶိူဝ်းႁွင်ႉတၢင်ၼွင်ႉဢဝ်ၶႃႈၼႃႉ”
“ဢႃ မႃႇလႆႈမႃႇလႆႈ”
“မၼ်းၼၢင်းဝၢႆႇမႃးၸူးၸၢႆးသၢႆၶိူဝ်းသေ”
မၼ်းၼၢင်းဝၢႆႇမႃးၸူးၸၢႆးသၢႆၶိူဝ်းသေ “ၼွင်ႉတေႁွင်ႉၵႂၢမ်းဢၼ်ၸိုဝ်ႈဝႃႈ တေပဵၼ်ၵေႃႉယူႇၸမ်ၼႆၼၼ်ႉဢေႃႈ”
VII ယူႇလႂ်ၵေႃႈတၢင်းႁၵ်ႉၼွင်ႉဢမ်ႇယွမ်းသင် တႃႇပဵၼ်ၵူႈၼွင်ႉမၵ်း မၼ်ႈတီႈၸႂ်လႄႈ ဢမ်ႇယႃႉပႅတ်ႈၵႂၢမ်းမၼ်ႈၼၢင်းဝႆႉသႅတ်ႉၸႃႇ တႃႇ ပုၼ်ႈၸၢႆးၼၢင်းပဵၼ်ၵေႃႉတေယူႇၸမ်။
ၸၢမ်ၶမ်းႁွင်ႉလႆႈလီလီယူႇလႄႈ ၸၢမ်ၶမ်းပေႉမေႃႁွင်ႉၵႂၢမ်းလႃႇၼၼ်ႉ မႃႈ ၵႃႈပူၼ်ႉမႃးမိူၼ်ႁၢင်ႈဢမ်ႇႁၼ်မၼ်းႁွင်ႉသေပွၵ်ႈ။
“မႃးႁဝ်းၸႂ်ႉၶဝ်ႁွင်ႉၵႂၢမ်းၵူႈတူၺ်းၼေႃႈ”
“တေႁႂ်ႈၶဝ်ႁွင်ႉပုၵ်ႈလႂ်လႃႇမႃႈ”
“ဝၢင်းပႅတ်ႈၸႂ်မႃႇၼႃႉ ဢဝ်ယူဝ်ႉ”
“ၵေႃႉႁၵ်ႉၼင်ႇၵၼ်ၵေႃႈၶႅမ်ႉဢိူဝ်ႈ”
“ဢိူဝ်ႈၸႂ်ႈယဝ်ႉဝႃႈ”
ႁူဝ်ၼႃႈယိင်းၶဝ်ၵေႃႈ “ၵမ်းၼႆႉ ႁဝ်းၶႃႈယွၼ်းထွမ်ႇၵႂၢမ်းၵူႈၶႃႈၼႃ ယွၼ်းၸဝ်ႈမၢဝ်ႇၸဝ်ႈသၢဝ်ႁဝ်း ႁွင်ႉပၼ်ၵႂၢမ်းဢၼ်ၸိုဝ်ႈဝႃႈ ႁၵ်ႉၼင်ႇၵၼ် ၼႆၼၼ်ႉသေၵမ်းၶႃႈ”
“ၶႃႈၸဝ်ႈမၢဝ်ႇ ဢၼ်မီးၸဝ်ႈသၢဝ်ၼႆႉသမ်ႉ ၸႂ်ႉႁွင်ႉယူႇတိၵ်းတိၵ်း ဢၼ်ပဵၼ်မၢဝ်ႇၸႅတ်ႈၸႅတ်ႈၸိူဝ်းၼႆႉ မီးပဵၼ်လၢႆၵေႃႉ သမ်ႉဢမ်ႇၸႂ်ႉ ႁွင်ႉ ၽႂ်ၵေႃႈပေႃးဢမ်ႇမီးမႅတ်ႉတႃႇၼိူဝ်ၶဝ်သေဢိတ်းၼေႃ”
“ပေႃႈၸဝ်ႈမၢဝ်ႇၸဝ်ႈသၢဝ်ႁွင်ႉယဝ်ႉယဝ်ႉၼႆ ႁဝ်းၶႃႈတေယွၼ်းႁႂ်ႈပီႈ ၼွင်ႉလၢင်းၶိူဝ်းၶဝ်ၼႆႉ ႁွင်ႉၵူႈၵေႃႉဢေႃႈၼႆႉ”
“ၼေႈတႆးၵေႃႉၶႃႈၼႆႉဝႃႈ ႁႂ်ႈၶႃႈႁွင်ႉပၼ် မႄႈႁၢင်ႉၵေႃႈႁၵ်ႉလႆႈယူႇ ၼႆ ၼၼ်ႉၶႃႈဝႃႇ မၼ်းဝႃႈပေႃးပႆႇလႆႈငိၼ်းၵႂၢမ်းပုၵ်ႈၼႆႉတႄႉ တႃႇတေ ၽၢတ်ႇယၢၼ်ဝဵင်းမိူင်းပၼ်ႇၼႆႉ ၶႂ်ႈယၢပ်ႇဝႆႉၼႆဝႃႇၼႆႉၼႃ”
“ဢႃ မိူဝ်းယၢပ်ႇႁိုဝ်မိူဝ်းငၢႆႈႁိုဝ်တႄႉဢမ်ႇႁူႉ မိူဝ်ႈလဵဝ်တႄႉၶႂ်ႈထွမ်ႇၵႂၢမ်း ၵူႈၼႃႇယဝ်ႉၼႆႉ”
“ဢေႃႈၶႃႈ လႆႈဢေႃႈလႆႈဢေႃႈ ၼၢင်းၸၢမ်ၶမ်းၵေႃႈတင်ႈၸႂ်သုတ်ႉမႃး ၸုၵ်းၸမ်ၸမ် ၸၢႆးသၢႆၶိူဝ်းတႃႇဢဝ်ၼမ်ႉၸႂ်ၸုမ်းဝူၺ်ႇယႃႇဝိၵ်ႉၸႃႉၶဝ် ႁႂ်ႈၶဝ်ပေႃးႁၢၼ်ႉၸႂ်ၼႆယူႇ။
Vl ၶမ်းဢွၼ်ႇပီႈသၢဝ်တႆး ၵေႃႉယူႇၸမ်လူၺ်ႈၸၢႆး ၼွင်ႉဢွၼ်ႇၸၢမ် ၶမ်းယုမ်ႉတူၺ်းလႄႈယႃႇဢၢႆ ၽွင်းၶိင်ႇမိူဝ်ႈလဵဝ်ၼႆႉ ၽ်ဢမ်ႇယၢၼ်ၽႂ် လႆႈ ဢိင်ဢူၵ်းၸၢႆးသေ သိူဝ်းမူၼ်ႈၸွမ်းၸၢႆးၼႃႈ။
Vll ၽွင်းၶိင်ႇမိူဝ်ႈလိၼ်လႅင်း ယုမ်ႉတေႃႇၵၼ်ႁၵ်ႉပႅင်း ၸႂ်ဢွၼ်ႇၸၢမ် ၶမ်းႁၵ်ႉၸၢႆးႁႅင်းၼႃႇလႄႈ ၽွင်းၶိင်ႇမိူဝ်ႈလဵဝ်ၼႆႉ ႁၵ်ႉယူႇယၢၼ်ဢမ်ႇ လႆႈ ၸုင်ယိပ်းမိုဝ်းသေ ၼွင်ႉတေၸွမ်းၸၢႆးပႆ။
CHO ၼွင်ႉဢူၺ် ၸၢႆးဢူၺ် ၵဵဝ်ႇလူၺ်ႈၸွမ်းတၢင်းႁၵ်ႉသူႁဝ်းၼႆႉ တေ ႁႂ်ႈမၼ်ႈၵိုမ်းတႃႇသေႇၼႃႈၸၢႆး မိူၼ်ၼင်ႇၵၼ်ယဝ်ႉ ၼွင်ႉဢွၼ်ႇၸၢမ် ၶမ်းဢူၺ် တၢင်းႁၵ်ႉႁဝ်းသူ..
ၽွင်းတိုၵ်ႉႁွင်ႉၵႂၢမ်းယူႇၼၼ်ႉ ၸၢႆးသၢႆၶိူဝ်းပူတ်းတိင်ႇမၼ်း ယိပ်းဝႆႉၽၢႆႇၼိုင်ႈၽၢႆႇၼိုင်ႈ သမ်ႉယိုၼ်းၵွတ်ႇဢဝ်တူဝ်ၼၢင်းၸၢမ်ၶမ်း မႃးၸပ်းဢူၵ်းမၼ်းဝႆႉယူႇလႄႈ ၵမ်ႈၽွင်ႈၵေႃႈပေႃႉၶႅပ်းႁၢင်ႈ ၵမ်ႈၽွင်ႈ သမ်ႉၵုမ်ႇတူၺ်းသေဢၢမ်းပေႃးဢမ်ႇတၼ်းၵိၼ် ႁဵတ်းၼၼ်သေ ၶဝ် ၵေႃႉၼိုင်ႈယဝ်ႉၵေႃႉၼိုင်ႈ ပၼ်ႇပုတ်ႈၵၼ်ႁွင်ႉၵႂၢမ်း ၵျေႃႇၵျေႃႇသိူဝ်း သိူဝ်းသေ လိုၵ်းမႃးတၢၼ်ႇတၢၼ်ႇ ၼၢင်းယိင်းၸုမ်းဝူၺ်ႇယႃႇဝိၵ်ႉၸႃႇ ၶဝ်ဝႃႈ ၶႂ်ႈၼွၼ်းယဝ်ႉၼႆလႄႈ ၸၢႆးသၢႆၶိူဝ်းလႄႈတႆးၵေႃႉမၼ်း ၸွႆႈဢဝ် ၵႃးသူင်ႇၶဝ်ၵူႈၵေႃႉသေ တႆးၵေႃႉမၼ်းၸိူဝ်းၼၼ်ႉ ၶႂ်ႈမႃးၼွၼ်းတီႈ ႁိူၼ်းၶဝ်ၼႆယဝ်ႉ။
“ပီႈၶမ်းလိုၼ်းလႄႈၼၢင်းၸေႃးယဵၼ်ႇၵေႃႈ ၼွၼ်းတီႈသူၼ်ၼႆႉသေ ယဝ်ႉၼေႃႈ”
ၼၢင်းၸေႃးယဵၼ်ႇၸင်ႇဝႃႈ “ဢမ်ႇလႆႈလေႃႇပီႈသၢႆၶိူဝ်း ၶႃႈလူဝ်ႇလုၵ်ႉ ၸဝ်ႉဢေႃႈ ၶႅၵ်ႇပေႃးတဵမ်ၵႂႃႇသဵင်ႈၼၼ်ႉ”
“မိူဝ်းပေႃးၼၼ် ၶႃႈမိူဝ်းသူင်ႇၶိူဝ် ၶႃႈတႄႉတေလႆႈၼွၼ်းတီႈသူၼ်ၼႆ ဢေႃႈ ၸၢမ်ၶမ်းလပ်းယဝ်ႉလူး”
မၼ်းၸၢႆးၶိုၼ်းပွၵ်ႈမႃးသေ “ပီႈဢမ်ႇမီးၵေႃႉမႃး ႁဵတ်းႁင်ဢမ်ႇႁွင်ႉ ၼွင်ႉၶႃႈလႃႇ”
“ၼွင်ႉတိုၵ်ႉလပ်းဝႆႉလႄႈ ၸင်ႇဢမ်ႇႁွင်ႉဢိူဝ်ႈ”
“ၵမ်းၼႆႉတႄႉ ပေႃးဢမ်ႇပႃးၼွင်ႉ ပီႈဢမ်ႇလႆႈၵႂႃႇႁင်းၵူၺ်းၶႃႈၼႃ”
“ပဵၼ်သင်လႃႇၸၢမ်ၶမ်း”
“ၼွင်ႉမႆႈၸႂ်ဢေႃႈ ၼွင်ႉၵူဝ်ပီႈႁဵတ်းမိူၼ်မိူဝ်ႈၵႆႈၼၼ်ႉ”
“ပေႃးၼွင်ႉဢမ်ႇလီၸင်းပီႈတႄႉ ပီႈဢမ်ႇႁဵတ်းလေႃႇ”
“ပီႈႁၵ်ႉၼွင်ႉ ၵူဝ်ၼွင်ႉလႆႈတိူဝ်ႉၸႂ်လူး”
“ၼွင်ႉဢမ်ႇၸင်းလေႃႇ ပီႈၵူၺ်းဢေႃႈ ပေႃးၼွင်ႉမီးလုၵ်ႈပဵၼ်မႄႈ လုၵ်ႈလၢင်းမႃးၼႆ ၵူဝ်ပီႈဢမ်ႇႁၵ်ႉၼွင်ႉၵူၺ်းဢေႃႈ ယူဝ်သမ်ႉဝႃႈၶႂ်ႈလႆႈ မေးထႅင်ႈၼႆသေ ပၢႆႈလႄႇပႅတ်ႈၼွင်ႉတင်းၶိုၼ်းတင်းၶိုၼ်းၼႆ ယူဝ်ႉ”
“ဢူး ပီႈဢမ်ႇႁဵတ်းလႆႈလေႃႇ ပီႈလၢတ်ႈယဝ်ႉလူးဝႃႈပီႈတေဢမ်ႇႁဵတ်း ႁႂ်ႈၼွင်ႉလႆႈမႆႈၸႂ်တိူဝ်ႉၸႂ်ၼႆ ပီႈတေႁၵ်ႉၼွင်ႉၵေႃႉလဵဝ် မိူၼ်ၼင်ႇပေႃႈ ႁၵ်ႉမႄႈ တေႁၵ်ႉလုၵ်ႈမိူၼ်ပေႃႈႁၵ်ႉၼွင်ႉၼၼ်ႉၼႆ”
“ၸွင်ႇတေႁဵတ်းလႆႈတႄႉႁႃႉမီးလႂ်ယွၼ်းတူၺ်းၼႃႈၸဝ်ႈၼမ်ႉဢွႆႈၶဝ်ၼႆႉလီလီဢိတ်ႉၼိုင်ႈလူး”
“လႆႈၵႂႃႈႁဝ်းၵေႃႉၸၢႆးလႆႈမေးႁၢင်ႈလီ သမ်ႉပၢႆမေႃလၢတ်ႈ လီႁၵ်ႉပေႃး တၢၼ်ႇၼႆႉ တေႁဵတ်းႁိုဝ်ၸင်းလႆႈလႃႇ ၵမ်းၼႆႉတႄႉ တိုၼ်းဢမ်ႇပၼ် ၵႂႃႇတၢင်းလႂ်ယဝ်ႉဝႃႈၼႆႉ”
“တေႁဵတ်းႁိုဝ်ၵႂႃႇလႆႈ ၶွင်ၵွတ်ႇပၼ်ပေႃးတၢၼ်ႇၼႆႉယဝ်ႉ”
“ဢိူဝ်ႈ ႁဵတ်းသင်ႁူဝ်ၸႂ်ၼွင်ႉ ဢမ်ႇတဵၼ်ႈႁႅင်းမိူၼ်မိူဝ်ႈဝၼ်းၼၼ်ႉ ယဝ်ႉလႃႇ”
“ၶွင် ဝၼ်းၼၼ်ႉတႄႉတိုၵ်ႉပဵၼ်ပွၵ်ႈဢွၼ်တၢင်းသုတ်းၼႂ်းၸူဝ်ႈပၢၼ် ၼွင်ႉလူး ယဝ်ႉၵေႃႈပႆႇမၼ်ႈၸႂ်လႆႈ ပႆႇႁူႉလီလီလူးဝႃႈ ၸႂ်ႈၸဝ်ႈမၼ်း တေႉယဝ်ႉႁႃႉ ဢမ်ႇၸႂ်ႈႁႃႉၼႆ”
“ၵမ်းၼႆႉတႄႉ ႁူႉယဝ်ႉႁႃႉ ၸႂ်ႈဢမ်ႇၸႂ်ႈၼႆ”
“ႁူႉယဝ်ႉဝႃႈ ၵမ်းၼႆႉတႄႉ ၶွင်ၸဝ်ႈပိူၼ်ႈပေႃးဢဝ်သၢႆၶေႃးၶမ်းမတ်ႉဝႆႉ တင်းမႄႈတင်းလုၵ်ႈယဝ်ႉလူး”
ႁဵတ်းၼၼ်သေ ၸွမ်းၼင်ႇၵႂၢမ်းတႆးႁဝ်းၵႆႉဝႃႈ ၸဝ်ႈၽူဝ်ၼႆၼၼ်ႉ ၼၢင်းၸၢမ်ၶမ်းၵေႃႈလုမ်းလႃးၸၢႆးသၢႆၶိူဝ်းမႃး မိူၼ်ၼင်ႇၸဝ်ႈၵေႃႈၸႂ်ႈ ၽူဝ်ၵေႃႈပဵၼ်ၼၼ်ႉယဝ်ႉ။ ၸၢႆးသၢႆၶိူဝ်းၵေႃႈ ၸွမ်းဢဝ်ၶေႃႈၵႂၢမ်းဢၼ် ဝႃႈ လုၵ်ႈမေးၼႆၼၼ်ႉ မၼ်းၸၢႆးၵေႃႈ ႁၵ်ႉၼၢင်းၸၢမ်ၶမ်းမိူၼ်ၼင်ႇ လုၵ်ႈၵေႃႉၼိုင်ႈသေ ၸင်ႇလႆႈဝႃႈပဵၼ်လုၵ်ႈမေးၼႆၼၼ်ႉယဝ်ႉ။
ယူႇၸွမ်းၵၼ်မႃး မိူဝ်ႈလဵဝ်မီးပီ ပၢႆၸမ်သွင်ပီယဝ်ႉ ၵႂၢမ်းတႂ်ႈ သိၼ်ႈတႂ်ႈသိူဝ်ႈ ဢၢႆႈငိူဝ်ႈဢီႇၵႅၵ်း ဢမ်ႇတွၼ်ႉဝႃႈႁင်းၵၼ်သေပွၵ်ႈ တေႃႇထိုင်မိူဝ်ႈလဵဝ် ၵေႃႉလႂ်တူၺ်းႁၼ်မႅၼ်ႈၵေႃႈ ယင်းတိုၵ်ႉႁၼ်မႂ်ႇ ယူႇသိူင်ႁိူင်၊ တၢင်းႁၵ်ႉၶဝ်ၵေႃႈ ဢမ်ႇသဝ်ႈဢမ်ႇမွင် ယေႈၶႅၼ်းၼမ် တိူဝ်းမႃးလိူဝ်ၵဝ်ႇ ၵေႃႉၵႂႃႇၵေႃႈမေႃၸႂ်ထိုင်ၵေႃႉယူႇ၊ ၵေႃႉယူႇၵေႃႈ သမ်ႉ ယေႈၶႅၼ်းမွင်း ယေႈၶႅၼ်းမေႃမႆႈၸႂ် ၸွမ်းၵေႃႉၵႂႃႇယဝ်ႉ။
ၸၢႆးသၢႆၶိူဝ်းၵေႃႈ မၼ်းၸၢႆးတေႁဵတ်းသင်ၼႆၵေႃႈ တိူင်ႇပၢင်ႇ ယွၼ်းတၢင်းႁၼ်ထိုင်ၵေႃႉပဵၼ်ပေႃႈပဵၼ်မႄႈဝႃႈ ပေႃႈၶႃႈ လုၵ်ႈတေ ႁဵတ်းဢၼ်ၼၼ်ႉဢၼ်ၼႆႉ မႄႈၶႃႈလုၵ်ႈတေႁဵတ်းၼၼ်ႁဵတ်းၼႆဢေႃႈ ၼႆယူႇတႃႇသေႇလႄႈ တၢၼ်ႇတၢင်းလုင်းသၢင်ႇမွင်ႇဝႃႈ ပေႃႈဢမ်ႇၶႂ်ႈလႆႈ လုၵ်ႈၶူၺ် ပေႃႈၶႂ်ႈလႆႈလုၵ်ႈၸၢႆးဢိူဝ်ႈၼႃႈ ၼႆၼၼ်ႉယူႇယဝ်ႉ။ ၵွပ်ႈ မၼ်းၵေႃႈ ႁၵ်ႉၸၢႆးသၢႆၶိူဝ်းမိူၼ်ၼင်ႇ လုၵ်ႈၸၢႆးမၼ်းၼၼ်ႉယဝ်ႉ။
ၼၢင်းၸၢမ်ၶမ်းၵေႃႈ ၵွပ်ႈဢမ်ႇလႆႈယူႇတႂ်ႈႁူမ်ႈငဝ်းမႅတ်ႉတႃႇ ၵေႃႉပဵၼ်မႄႈလႄႈ မိူဝ်ႈလဵဝ်တႄႉ ပေႃးလၢတ်ႈတေႃႇမႄႈၵေႃႈ မႃးၵွတ်ႇ သေဢဝ်ႁူဝ်ၸႂ်မၼ်းၼၢင်းဢိင်ၸပ်းဢူၵ်းမႄႈၶဝ်ယဝ်ႉ ၸင်ႇလၢတ်ႈ တေႃႇ ပေႃးလၢတ်ႈယဝ်ႉၵေႃႈ ႁွမ်ပၼ်ၵႅမ်ႈမႄႈၶဝ်ယဝ်ႉ ၸင်ႇဢွၵ်ႇၵႂႃႇ ႁဵတ်းၼႆတႃႇသေႇယဝ်ႉ၊ ၸင်ႇဝႃႈ ပႃႈသူၺ်ႇၼူႉၵေႃႈ ႁၵ်ႉၼၢင်းၸၢမ် ၶမ်းမိူၼ်လုၵ်ႈဢွၵ်ႇလုၵ်ႈၸႂ်မၼ်းၼၼ်ႉသေ မီးၶူဝ်းၶွင်ၵႃႈၶၼ်ယႂ်ႇ ဢၼ်ဢမ်ႇတွၼ်ႉဢဝ်ဢွၵ်ႇႁွႆႈဢွၵ်ႇတိုဝ်းၵေႃႈ ဢဝ်ဢွၵ်ႇပၼ်လုၵ်ႈ မၼ်းႁွႆႈႁွႆႈတိုဝ်းတိုဝ်းယူႇယဝ်ႉ။
ၵွပ်ႈၼၼ်လႄႈ ၵေႃႉဢၼ်ပဵၼ်ႁူမ်ႈမႅတ်ႉတႃႇလႄႈတၢင်းၵေႃႉ ဢၼ်သွၼ်ႈတႂ်ႈႁူမ်ႈမႅတ်ႉတႃႇၼၼ်ႉ လႆႈဢဝ်ၵေႃႉယိုၼ်ႈပၼ်လႄႈ တၢင်းၵေႃႉပႂ်ႉႁပ်ႉဢဝ်ၼၼ်ႉ မႃးတႅၵ်ႈၼႄဝႃႈ ၵေႃႉယိုၼ်ႈပၼ်ၼၼ်ႉ ပၼ်မႃးၼမ်တၢၼ်ႇလႂ်ၵေႃႈၵေႃႉလႆႈႁပ်ႉဢဝ်ၼၼ်ႉယေႈၶႅၼ်းမီးတၢင်းၸူမ်းသိူဝ်းၼမ်မႃးၼၼ်ႉယဝ်ႉ။
“ႁူမ်ႈငဝ်းမႅတ်ႉတႃႇဢၼ်ပေႃႈမႄႈပၼ်လုၵ်ႈလၢင်းၼၼ်ႉၵေႃႈ သင်ဝႃႈ လုၵ်ႈလၢင်းၶိုၼ်းမေႃႁူႉၵုင်ႇမုၼ်သေ ၶိုၼ်းဢဝ်လွင်ႈဢၼ်ပေႃႈမႄႈ သွင်ၸဝ်ႈမီးတၢင်းမုင်ႈမွင်းၼိူဝ်လုၵ်ႈလၢင်းၵူႈၵေႃႉၼၼ်ႉ ၶႂ်ႈႁႂ်ႈလုၵ်ႈ လၢတ်ႈငၢႆႈယဵၼ်ႇငႄႈ လၵ်းလႅမ်ဢူၼ်ႈဢွၼ်ႇတၢင်းယၢမ်ႈလီ ၸိူဝ်းၼႆႉ တွပ်ႇတႅၼ်းပၼ်ၶဝ်ၸဝ်ႈၶိုၼ်းၼႆၵေႃႈ ၶဝ်ၸူမ်းသိူဝ်းၼႃႇယဝ်ႉ။
ၸင်ႇဝႃႈၵေႃႈဢၼ်ပဵၼ်ႁူမ်ႈသိူဝ်းသႃႇ ၵေႃႉဢၼ်လႆႈသွၼ်ႈ ႁူမ်ႈမႅတ်ႉတႃႇၵေႃႈၵတ်းယဵၼ်ၼၼ်ႉယဝ်ႉ။
တႅမ်ႈ – ဢွၼ်သႂ်လႅင်း ထုင်ႉယႃႈၶၼ်းဝၢၼ်
တႄႇတႅမ်ႈမိူဝ်ႈ 14/02/2021
တႅမ်ႈယဝ်ႉမိူဝ်ႈ 13/02/2021
ၽူႈထတ်းလိၵ်ႈ – ၼမ်ႉတဵင်းသႂ် (ၽႃသွၼ်ႉ)
- ၶူးသႃႇဢွင်ႇ လၢင်းၶိူဝ်း
- ၼၢင်းၵဵင်ၶမ်း လၢင်းၶိူဝ်း
- မေႃသွၼ်ၼၢင်းၶမ်းယဵၼ်ႇ လၢင်းၶိူဝ်း
- မေႃသွၼ်ၼၢင်းၶမ်းဢွင်ႇ ၼမ်ႉလၼ်ႈ
- မေႃသွၼ်ၼၢင်းမွၼ်းၶမ်း လၢင်းၶိူဝ်း
***တႃႇတွင်း ၸိူင်းႁူဝ်ၼႆႉလႆႈဢိတ်ႇဢွၵ်ႇဝႆႉပဵၼ်ပပ်ႉသေယဝ်ႉ ၶၢႆဝႆႉယူႇတီႈႁၢၼ်ႉၶၢႆပပ်ႉလိၵ်ႈတႆးႁဝ်းယူႇဢေႃႈ
