“ပေႃႈၶႃႈ လုၵ်ႈတေၼွၼ်းလိုဝ်ႈၵမ်းၼိုင်ႈၶႃႈၼႃႉ လုၵ်ႈၶႂ်ႈလပ်းၼႃႇ ယဝ်ႉၶႃႈ”
“ၸႂ်ႈဢိူဝ်ႈ လုၵ်ႈလူဝ်ႇလိုဝ်ႈပၼ်ဢိတ်းၼိုင်ႈဢိူဝ်ႈ ၶမ်ႈဝႃးလုၵ်ႈတမ်ႉ ဢမ်ႇလႆႈၼွၼ်းသေဢိတ်းလူးၼၼ်ႉ”
ၼၢင်းၸေႃးယဵၼ်ႇၵေႃႈဝႃႈ “ယူဝ်မၼ်းဢမ်ႇလႆႈလပ်းသေဢိတ်းယူဝ်ႉၼၼ်ႉ ပီႈသၢႆၶိူဝ်းၼၼ်ႉ”
ၼၢင်းၶမ်းၶွင်ႇၵေႃႈဝႃႈ “တေႁိုဝ်လႆႈၼွၼ်း ၽိူဝ်ႇႁၼ်ၸၢမ်ၶမ်းၵေႃႈ ပေႃးမီးသၢမ်မွင်းယဝ်ႉ”
“ၶမ်ႈဝႃးၼႆႉ တူၺ်းပီႈသၢႆၶိူဝ်းလႅပ်ႈႁၵ်ႉၸၢမ်ၶမ်း လႅပ်ႈမႆႈၸႂ်တေႉယဝ်ႉ ဝႃႈလႅပ်ႈမႆႈၸႂ်ၼႃႇလိူဝ်ပေႃႈၶဝ်ယဝ်ႉဝႃႈ”ၼၢင်းယိင်းၵေႃႉၼိုင်ႈလၢတ်ႈ ၸိမ်မႃးယူႇ။
ထႅင်ႈၵေႃႉၼိုင်ႈသမ်ႉဝႃႈ “ႁၵ်ႉယူႇၵူၺ်းလေႃႇဢေႉ ထၢၼ်ႈဝႃႈဢမ်ႇ ႁၵ်ႉၵၼ်ၽႂ်တေဢဝ်ၵၼ်လႃႇ ၼႆႉၵေႃႈလၢႆးယဝ်ႉ”
“ဢူး မိူဝ်ႈၸၢမ်ၶမ်းလိုမ်းတူဝ်မိူဝ်ႈဝၼ်းမူတၢႆၼၼ်ႉ ႁႃးဢႃသၢင်ႇတႄႉ ယင်းပႆႇဝူၼ်ႉလႆႈ လွင်ႈဝႃႈလူဝ်ႇဢဝ်ၵႂႃႇႁူင်းယႃၼႆ မၼ်းတႄႉလႅၼ်ႈ ၶိုၼ်ႈႁိူၼ်းမႃးယဝ်ႉ မႃးဢုမ်ႈဢဝ်ၸၢမ်ၶမ်းသေ ယဝ်ႉဢဝ်မႃးသေႃးၵႃး လူး ပီႈၶမ်းလိုၼ်း ပီႈၶမ်းလိုၼ်းၵေႃႈၶိုၼ်ႈၵႃးလႄႈ ၼႆၼႅတ်ႈဢဝ်ၵႂႃႇ ႁူင်းယႃၵမ်းလဵဝ်ယဝ်ႉဝႃႈ ၶမ်ႈဝႃးၼႆႉၵေႃႈ မၼ်းဝႃႈ ၸႂ်ၶႃႈသၼ်ႇမိူၼ် ၵူၼ်းတိုၵ်ႉဢွၵ်ႇတေႃးသဝႆႉၼႆဝႃႇၼၼ်ႉ ၵျွင်းဝႃႈၸၢမ်ၶမ်းတေပဵၼ် ၼၼ် တႄႇၸၢမ်ၶမ်းၼၼ်ႉၵေႃႈသမ်ႉဝႃႈယိပ်းမိုဝ်းပီႈသၢႆၶိူဝ်းဝႆႉယူႇဝႃႇ ႁဵတ်းႁိုဝ်ၵေႃႈဢမ်ႇႁူႉ ပီႈသၢႆၶိူဝ်းဝႃႈ မိူၼ်မီးၵူၼ်းမႃးလၢၵ်ႈၸၼ်ႁိမ် ဢဝ်ၸိူင်ႉၼၼ်ၼႄႈၼႆဝႃႈ သမ်ႉလိူၵ်ႈလိူၵ်ႈ ပဵၼ်မိူဝ်ႈၶဝ်ၵႂႃႇမီးတီႈ ၽိူၼ်ပီႈၼွင်ႉလၢင်းၶိူဝ်းဝႃႈ ပီႈၼွင်ႉလၢင်းၶိူဝ်းၵေႃႈ မႃးၼမ်ၵျႃႉၼင်ႇ ၵဝ်ႇလူးၼၼ်ႉ ဢွၼ်ၵၼ်တူၵ်းၸႂ်ဢိူဝ်ႈၶဝ်”
“ၸႂ်ႈယဝ်ႉဝႃႈ ႁွင်ႉၵႂၢမ်းၵေႃႈၶဝ်မေႃၼႃႇၼေႃ ၵေႃႉလႂ်ၵေႃႈမေႃၼႃႇ ၵူၺ်းၵူၺ်းလေႃႇ ၶွင်ပဵၼ်ၸုမ်းႁႆႇတိုင်ႈၵမ်ႈၼမ်ၼႆၼၼ်ႉ ဢမ်ႇငိၼ်း ၼႄႇ ၵေႃႉလႂ်မႃးယိပ်းမႅၵ်ႉၵေႃႈ ယွၼ်းမူၼ်ႈသိူဝ်းတွၼ်ႈထိုင်ၸွၼ် ၸူမ်းပၢင်ၶႅၵ်ႇ တႆးၵေႃႉႁဝ်း ၵေႃႉပဵၼ်ၶူးသၢႆၶိူဝ်းလႄႈၵေႃႉပဵၼ်ပီႈလူဝ်း ႁဝ်း ၼၢင်းၸၢမ်ၶမ်းၼႆလၢႆလၢႆၼၼ်ႉ”
“ပီႈသၢႆၶိူဝ်းၼႆႉ ဢမ်ႇမေႃႁွင်ႉၵႂၢမ်းႁႃႉမႃႈ ဢမ်ႇႁၼ်မၼ်းႁွင်ႉၵႂၢမ်းလႃႇ ”
“ယၢပ်ႇယဝ်ႉဢိူဝ်ႈ ပီႈသၢႆၶိူဝ်းလႄႈဝႃႈဢမ်ႇမေႃႁွင်ႉၵႂၢမ်းတႄႉ”
“ယွၼ်းတူၺ်းၼႂ်းၶွမ်ႇၽိဝ်ႇတိူဝ်ႇ ၸၢမ်ၶမ်းၼၼ်ႉလူ”
“တေႉႁႃႉဢိ”
“ၶမ်ႈဝႃးၼႆႉ သင်ၸိူဝ်ႉဝႃႈ ဢမ်ႇမႃးပဵၼ်ၼၼ်တႄႉၶဝ်တေႁွင်ႉပၼ် ၵႂၢမ်းမိူၼ်ႁိုဝ်ဝႆႉၼၼ်ႉ သင်ၼၼ်တႄႉ မိူဝ်ႈၼႆႉၵေႃႈပီႈသၢႆၶိူဝ်း ဢၢၼ်း ႁွင်ႉၶဝ်ၵႂႃႇတီႈသူၼ်ပုၼ်ႉထႅင်ႈၵွၼ်ႇ”
“ၶဝ်မိူဝ်းမူတ်းယဝ်ႉဢမ်ႇၸႂ်ႈႁႃႉ”
ၼၢင်းၸေႃးယဵၼ်ႇမုင်ႈတူၺ်း “ပႆႇမိူဝ်း ၸိူဝ်းဢၼ်ၼွၼ်းတီႈႁိူၼ်းႁဝ်း ၼၼ်ႉ ၵႃးၶဝ်ၵေႃႈတိုၵ်ႉမီးယူႇၵူႈလမ်းၼၼ်ႉလူး”
ၼၢင်းၶမ်းၶွင်ႇၵေႃႈဝႃႈ “ၶမ်ႈၸူဝ်ႈၼႆႉယူဝ်ၶဝ်ၵႂႃႇတီႈသူၼ်ထႅင်ႈယူႇယဝ်ႉပေႃးၼၼ်”
“ဢမ်ႇႁူႉၵူၺ်ႉ ပီႈသၢႆၶိူဝ်းတိုၵ်ႉၶႂ်ႈၼွၼ်းယူႇ ပေႃးတႆးၵေႃႉမၼ်းပႆႇမိူဝ်း တႄႉ ၵႂႃႇၼႃႇၵူၺ်းယူဝ်ႉ”
“ပီႈသၢႆၶိူဝ်းၼႆႉၸွင်ႇမၼ်းၵိၼ်လဝ်ႈႁႃႉၼၼ်ႉၸၢမ်ၶမ်း”
“ဢမ်ႇႁူႉၶႃႈၼႃ ၼွင်ႉတႄႉပႆႇႁၼ်မၼ်းၵိၼ်သေပွၵ်ႈၵူၺ်း ပီႇယႃႇ တႄႉ ၶမ်ႈဝႃးၼႆႉ တႆးၵေႃႉမၼ်းယွၼ်းမႂ်ႇသုင်မၼ်းလႄႈ ႁၼ်ၵိၼ်ယူႇ ဢိတ်းဢွတ်းၼေႈ ႁႂ်ႈၵႂႃႇသိုဝ်ႉၵိၼ်ပဵၼ်တေႉပဵၼ်ဝႃႈတႄႉ ၼွင်ႉဢမ်ႇ ႁၼ်သေပွၵ်ႈ”
ၼၢင်းၸၢမ်ပဝ်းဝႃႈ “တႃႉၶႂ်ႈႁၼ်ပီႈသၢႆၶိူဝ်းႁဝ်းႁွင်ႉၵႂၢမ်းလႃႈမႃႈ”
ၼၢင်းၸေႃးယဵၼ်ႇဝႃႈ “ဢူးပေႃးၼွင်ႉလႆႈထွမ်ႇတႄႉၸွႆးသိုဝ်ႈသႅတ်ႉၼေႈၸၢမ်ပဝ်း”
“ၵေႃႈယဝ်ႉလႃႈ ၼွင်ႉဢမ်ႇၶႂ်ႈပဵၼ်ၼွႆႉၸၢမ်ၶမ်း”
“မိူဝ်ႈၵႆႈဝႃႈ သူတေမႃးၼွၼ်းႁဵတ်းၵေႃႉႁဝ်းၼႆဢမ်ႇၸႂ်ႈႁႃႉ”
“ႁဝ်းဢမ်ႇႁတ်းၼွၼ်းယဝ်ႉဝႃႈ ႁဝ်းၵူဝ်ၾႆးလၢမ်းပႃႇ”
ၼၢင်းၸေႃးယဵၼ်ႇၵေႃႈဝႃႈ “ဢေႃႈတေႉဢိူဝ်ႈၼၼ်ႉၸၢမ်ၶမ်း မိူဝ်း တူၺ်းပီႈသၢႆၶိူဝ်းလူး ၼွင်ႉၵေႃႈႁဵတ်းလႆႈၼႃႇ ပၼ်ပိူၼ်ႈၼွၼ်းယူႇၵေႃႉ လဵဝ်ဝႃႇ”
ၼၢင်းၸၢမ်ၶမ်းၵေႃႈဢွၵ်ႇမႃးသေ “ပေႃးၼွင်ႉၶဝ်ႈမိူဝ်းၸူးပီႈသၢႆၶိူဝ်းၵေႃႈ သူသမ်ႉတေဝႃႈႁင်းၼွင်ႉၼင်ႇ ၵဝ်ႇယဝ်ႈ” ၼႆယုမ်ႉလူင်ၶိုၼ်ႈႁိူၼ်းမိူဝ်းယဝ်ႉ။
ၸၢႆးသၢႆၶိူဝ်းငိၼ်းသဵင်ပိုတ်ႇၽၵ်းတူလႄႈ မိုၼ်းတႃလွႆးလွႆးသေ ပဵၼ် ၼၢင်းၸၢမ်ၶမ်းၼႆလႄႈ မၼ်းၸၢႆးပႆႇတၵ်းသဵင် ၸၢမ်ၶမ်းမႃးမေးႁူမ်ႇ ပၼ်ၽႃႈမၼ်းယူႇ
“တိုၼ်ႇယဝ်ႉၶႃႈႁႃႉ”
“ငိၼ်းသဵင်ၼွင်ႉပိုတ်ႇၽၵ်းတူလႄႈတိုၼ်ႇဢိူဝ်ႈ သဵင်ၵူၼ်းတိုၵ်ႉၼမ် ယူႇလူးၼၼ်ႉ ၵႂႃႇလၢတ်ႈပၼ်ပီႈၶမ်းလိုၼ်းဢဝ်တၢင်းၵိၼ်ၸိူဝ်းၼၼ်ႉ ဢွၵ်ႇမႃးလဵင်ႉၵၼ်လႄႈၼႃႉ”
မၼ်းၼၢင်းပႆႇပွင်ႇၸႂ်လီလီလႄႈ မႃးၼင်ႈၼိူဝ်ၵူႇႁိမ်းၸၢႆးသၢႆၶိူဝ်းၼၼ်ႉ သေ “တၢင်းၵိၼ်ဢၼ်လႂ်ၶႃႈၼၼ်ႉ”
“ဝၢႆႇ ပီႇယႃႇလႄႈၼမ်ႉဝၢၼ်ၸိူဝ်းၼႆႉဢိူဝ်ႈ ထၢမ်တူၺ်းပီႈၶမ်းလိုၼ်း ၼေႈ မၼ်းႁူႉဢိူဝ်ႈ ၼွင်ႉလၢတ်ႈမၼ်းႁႂ်ႈမႃးၸူးပီႈလူး”
ၸၢမ်ၶမ်းၶိုၼ်းလူင်းမႃးယဝ်ႉ “ပီႈၶမ်းလိုၼ်းမိူဝ်းၸူးပီႈသၢႆၶိူဝ်းၵမ်ႉၶႃႈဝႃႇ”
ၼၢင်းၶမ်းလိုၼ်းမႃးသေ “ဝႃႈႁိုဝ်ၶႃႈပီႈသၢႆၶိူဝ်း”
“ပီႈၶမ်းလိုၼ်းဢဝ်ဝၢႆႇလႄႈပီႇယႃႇၸိူဝ်းၼၼ်ႉ ဢွၵ်ႇမႃးလဵင်ႉၼၢင်း ယိင်းၶဝ်လႄႈ တိုၵ်ႉမီးယူႇၼႂ်းၵႃးၸၢမ်ၶမ်းၼၼ်ႉၼေႈ ၶႃႈလိုမ်းဢဝ် လူင်းဢေႃႈၼၼ်ႉ ၸင်ႇၶုၵ်းၸႂ်လႆႈၼႆႉၵူၺ်းၼႄႈ ၶဝ်လၢင်းၶိူဝ်းမိူဝ်း မူတ်းယဝ်ႉၶႃႈႁႃႉ”
“ပႆႇမိူဝ်းၶႃႈ”
“လီယဝ်ႉပေႃးၼၼ် ယႃႇၽူမ်ႈပၼ်ၶဝ်မိူဝ်းၼႃႉ ၶႃႈတေၼွၼ်းထႅင်ႈ ဢိတ်ႉၼိုင်ႈၵွၼ်ႇ ၸွင်ႇၶဝ်လႆႈၵိၼ်ၶဝ်ႈႁိုဝ်ပီႈၶမ်းလိုၼ်း လႆႈၵိၼ်ဢေႃႈ မိူဝ်ႈလဵဝ်ၵေႃႈတိုၵ်ႉႁၢင်ႈႁႅၼ်းၶဝ်ႈဝၼ်းဢေႃႈၼႆႉ”
ၼၢင်းၶမ်းလိုၼ်းလူင်းမႃးယဝ်ႉ ၸုမ်းၼၢင်းယိင်းၶဝ်ၵေႃႈဢုပ်ႇၵၼ်ၶူဝ် ၵၼ်ၵျေႃႇၵျေႃႇမူၼ်ႈမူၼ်ႈယူႇႁင်းၶဝ်၊ မီးသွင်မွင်းပၢႆယဝ်ႉ ၸၢႆးသၢႆၶိူဝ်း လုၵ်ႉမႃးယဝ်ႉ လၢတ်ႈတီႈၼၢင်းၶမ်းလိုၼ်း “ပီႈၶမ်းလိုၼ်းၶႃႈ ၶမ်ႈၼႆႉ ၶႃႈတေဢွၼ်တႆးၵေႃႉၶႃႈ ၵႂႃႇၵိၼ်ၶဝ်ႈတီႈသူၼ်ဢေႃႈ တၢင်းၵိၼ်ၼိူဝ် ၵႃးၼၼ်ႉဢဝ်လူင်းဝႆႉတီႈၼႆႈမူတ်းမူတ်း ႁဝ်းၵႂႃႇဢဝ်ထႅင်ႈတႃႇဢဝ်ၵႂႃႇ တီႈသူၼ် ၶႃႈလူဝ်ႇဢဝ်ၵႃးၵႂႃႇ ၵႃးၶႃႈဢမ်ႇၸၢင်ႈဢွၵ်ႇ လၢတ်ႈပႃးၸုမ်း ၼၢင်းယိင်းလႄႈပေႃးၶႂ်ႈၵႂႃႇၸွမ်းႁဝ်းၵေႃႈ လွင်ႈၵႂႃႇမႃးတႄႉ ၵႃးၵေႃႈမီး ၼမ်ယူႇလူး ပေႃးဢမ်ႇၶႂ်ႈၵႂႃႇၵေႃႈ ႁႂ်ႈၶဝ်မူၼ်ႈၵၼ်တီႈႁိူၼ်းၼႆႉၼၼ်ႉ ၼႃႇ”ၼၢင်းၶမ်းလိုၼ်းမႃးလၢတ်ႈၼႄၶဝ်သေယဝ်ႉ
ႁူဝ်ၼႃႈယိင်းၵေႃႈဝႃႈ “ပေႃးထၢၼ်ႈဝႃႈတေၵႂႃႇတီႈပုၼ်ႉယူႇၵေႃႈ ၸၢင်ႈ လူဝ်ႇဢဝ်လူင်းႁဵတ်းသင်လႃႇ ”
ၼၢင်းၶမ်းလိုၼ်းဝႃႈ “ပီႈသၢႆၶိူဝ်းဝႃႈၵေႃႉဢၼ်ဢမ်ႇၸၢင်ႈၵႂႃႇတီႈသူၼ်ၵေႃႈ ၵိၼ်တီႈႁိူၼ်းၼႆဝႃႇ”
ႁူဝ်ၼႃႈယိင်းၵေႃႈဝႃႈ “မႃးပွႆးပၢင်ၶႅၵ်ႇလူး ၸဝ်ႈမၢဝ်ႇၸဝ်ႈသၢဝ်ၵႂႃႇတီႈ လႂ်ၵေႃႈ ၵႂႃႇတီႈၼၼ်ႈဢိူဝ်ႈလေႃႇ ၶမ်ႈဝႃးၼႆႉဢမ်ႇတၼ်းလႆႈၵျေႃႇလီ လီ ၶမ်ႈၼႆႉတႄႉတဵမ်တီႈၵႂႃႈ”
“ၼၼ်ႉယဝ်ႉဝႃႈ”
“ဢဝ်ဝႃႈလႄႈပေႃးၼၼ်ၵေႃႈ လူဝ်ႇလႆႈပဵၼ်ၸိူင်ႉၼၼ်ႉၵႂႃႈ”
“မႃးၶႃႈဢုပ်ႇပီႈၼၢင်းႁဝ်းၵမ်ႉလူးပေႃးၼၼ်”
“ႁဵတ်းၼႆၼေႈ ၶႃႈႁႂ်ႈၶဝ်ႁဵတ်းဝႆႉမူထႅင်ႈတူဝ်ၼိုင်ႈယဝ်ႉ ႁဵတ်းမူယၢင်ႈ ယၢင်ႈဝႆႉယဝ်ႉ ၵူၺ်းၵႃႈလူဝ်ႇသင်ထႅင်ႈၼႆ ၵမ်ႉႁဝ်းၵႂႃႇတူၺ်းသေလူဝ်ႇ ဢၼ်လႂ်ၼႆၵေႃႈ ႁဝ်းၸင်ႇၶိုၼ်းမႃးဢဝ်ၼႆၵႂႃႈ မဵဝ်းထုၵ်ႇလႆႈယၢပ်ႇၸွမ်း ၵၼ်ယဝ်ႉၶႃႈၼႃႇၼေႃႈ ၸၢင်ႈႁဵတ်းႁိုဝ် ဢႃးၵူဝ်းၵၼ်ၵေႃႈဝႃႈၼၼ်ႉၶႃႈ ၼႃႇ ဢၢၼ်းတႄႉဢၢၼ်းၼႃႇၵျႃႇၼင်ႇၵဝ်ႇဢေႃႈ”
“လႆႈဢေႃႈဢမ်ႇပဵၼ်သင်”
ၼၢင်းယိင်းၶဝ်ၵေႃႈပေႃးဝႃႈ ႁူႉလွင်ႈႁူႉမဵဝ်းမၼ်းယဝ်ႉၼႆတႄႉ ၼၢင်း ယိင်းမိူင်းပၼ်ႇၼႆႉ ၶဝ်တိုၼ်းမီးၼမ်ႉၸႂ်ဝႆႉၸႂ်ၵျေႃႇၵျေႃႇသိူဝ်းသိူဝ်းသေ ၸွႆႈထႅမ်တဵမ်တဵမ်ထူၼ်ႈထူၼ်ႈ ၵေႃႉၼႆႉႁဵတ်းဢၼ်ၼၼ်ႉ ၵေႃႉၼၼ်ႉ သမ်ႉႁဵတ်းဢၼ်ၼႆႉလႄႈ ၼႆသေဢွၼ်ၵၼ်ႁဵတ်းပေႃးဢမ်ႇယူႇဢမ်ႇ သဝ်း၊ လႅတ်းၵေႃႈလႅတ်း ႁၢင်ႈၵေႃႈႁၢင်ႈလီ သမ်ႉမေႃလၢတ်ႈ ၸႂ်လီမေႃ ၵပ်းသိုပ်ႇပိူၼ်ႈ ယိုင်ႈၶဝ်ဢမ်ႇယၢမ်ႈႁၼ် ၶဝ်ယိုင်ႈၶႅၼ်းမေႃလၢတ်ႈ တေႃႇပိူၼ်ႈ ၸဵမ်ၵူၼ်းၼုမ်ႇၵူၼ်းထဝ်ႈႁၢင်ႈလီမိူၼ်ၵၼ် ၵိုင်းတင်းဝႃႈ ပဵၼ်လုၵ်ႈယိင်း မိူင်းၼၢင်းယီႈသႅင်ၵေႃႇယူႇတေႉယဝ်ႉ ႁႃတူၺ်းၵေႃႉ ဢၼ်ပဵၼ်ဢႃႉပဵၼ်ဢိူၼ် တငိုၵ်းတငၢႆႇ ၶေႃးပၢပ်ႇၶေႃးပွမ်း ၶႃလၢၵ်ႈၶႃ လိမ်ႇၵေႃႈဢမ်ႇႁၼ် တိုၼ်းဝႃႈဢမ်ႇမီးၵေႃႉလီသေႉလီၼေးသေဢိတ်း ၼၼ်ႉ ပဵၼ်လုၵ်ႈယိင်းမိူင်းၼၢင်းယီႈသႅင်ၵေႃႇၼႆႉၵမ်းလဵဝ်ယဝ်ႉ။
သိုပ်ႇလူဢၢၼ်ႇထႅင်ႈတွၼ်ႈတေမႃးၶႃႈ။
