ၶမ်ႈၼႆႉတၢင်းၸၢမ်ၶမ်းမိတ်ႉမွတ်ႉမိတ်ႉမွတ်ႉလႅပ်ႈတေမီးလွင်ႈၶမ်ၸႂ်သေလွင်ႈလွင်ႈဝႆႉယူႇ။ ၼႃႈမၼ်းၼၢင်းၵေႃႈ လႅင်ဢွၵ်ႇလႅင်ဢွၵ်ႇ လႄႈ ၼၢင်းၶမ်းလိုၼ်းႁၼ်ပႅၵ်ႇပိူင်ႈလၢၵ်ႇလၢႆးၼႃႇသေ ၸင်ႇထၢမ်ဝႃႈ “ၸၢမ်ၶမ်းၼွင်ႉပဵၼ်သင် ႁဵတ်းသင်ၼႃႈၼွင်ႉလႅင်လႅင်ဝႆႉလႃႇ”
“ပီႈၶမ်းလိုၼ်း ပီႈသၢႆၶိူဝ်း”
“ပီႈသၢႆၶိူဝ်းဝႃႈသင်ၼွင်ႉလႃႇ”
“ဢမ်ႇဝႃႈသင်ၶႃႈ ပီႈသၢႆၶိူဝ်းမႃးတေယွၼ်းၼွင်ႉၼႆဝႃႇ ၼွင်ႉဢမ်ႇႁတ်း လၢတ်ႈပေႃႈ ပီႈၶမ်းလိုၼ်းလၢတ်ႈပၼ်ၼွင်ႉလႄႈ”
“ပိူၼ်ႈဢမ်ႇလႆႈထၢမ်ပေႃႈမႄႈလေႃႇၼွင်ႉ ပေႃးၼွင်ႉဢိူဝ်ႈၼွင်ႉၽွမ်ႉ ၼႆၵေႃႈ ၵူၼ်းၸၢႆးၼၼ်ႉႁႃႁွင်ႉၵူၼ်းလူင်မႃးယွၼ်းၸိူင်ႉၼၼ်ဢိူဝ်ႈ”
“ၼွင်ႉတေႁဵတ်းႁိုဝ်ႁူႉလႃႇ ပီႈၶမ်းလိုၼ်းၵေႃႈ ၶွင်ပီႈသၢႆၶိူဝ်းၸႂ်ႉထၢမ် ၵူၺ်းၶႃႈၼႃႇ”
“တေပီႈသၢႆၶိူဝ်းၼၼ်ႉၵေႃႈ ၶႂ်ႈလႆႈမေးၵေႃႈဝႃႈဢမ်ႇႁူႉလၢႆးယွၼ်းဝႃႇ ဢမ်ႇႁူႉဝႃႈဢမ်ႇႁူႉယဝ်ႉၼေႃ။ ၸၢမ်ၶမ်းႁွင်ႉမၼ်းမႃးလႄႈ ပီႈၶမ်း လိုၼ်းတေလၢတ်ႈၼေမၼ်း”
ၼၢင်းၸၢမ်ၶမ်းမႃးသေ “ပီႈသၢႆၶိူဝ်းၶႃႈ မိူဝ်းၸူးပီႈၶမ်းလိုၼ်းၶႃႈဝႃႇ” မၼ်းၸၢႆးၼႅတ်ႈမႃးယဝ်ႉ။
“ဝႃႈႁိုဝ်ၶႃႈပီႈၼၢင်းၶမ်းလိုၼ်းႁဝ်း”
“ဝႃႈႁိုဝ်ဝႃႈႁိုဝ်ယူႇ ၶႂ်ႈလႆႈမေးၵေႃႈဢမ်ႇမေႃယွၼ်းဝႃႇ ယႃႇပေဢဝ် ယဝ်ႉလႃႈ ပေႃးဢမ်ႇမေႃယွၼ်းလႃးလႃးၵေႃႈ”
“တေလႆႈႁဵတ်းႁိုဝ်ၶႃႈလႃႇပေႃးၼၼ်”
“လၢတ်ႈၼေၶႃႈၼွင်ႉဢိတ်ႉၼိုင်ႈၶႃႈလႄႈ”
“ႁဵတ်းမႃးႁႃဝႃႈ ၶႃႈၼွင်ႉၶႃႈၼွင်ႉယူႇ ၼေႈပီႈသၢႆၶိူဝ်းလူဝ်ႇလႆႈထၢမ် တူၺ်းၸၢမ်ၶမ်း ပေႃးၸၢမ်ၶမ်းၽွမ်ႉယဝ်ႉၵေႃႈ ပီႈသၢႆၶိူဝ်းတေလႆႈႁႃ ၵူၼ်းလူင်ၵေႃႉဢၼ်ပီႈသၢႆၶိူဝ်းယုမ်ႇၸႂ် ဝႆႉၸႂ်လႆႈ မေႃလၢတ်ႈမေႃၸႃ ၵေႃႉဢၼ်မီးတၢင်းႁူႉ။ ဢၼ်ပိူၼ်ႈၼပ်ႉၼႃႈ ထိုဝ်တႃၸိူဝ်းၼၼ်ႉမႃး ထၢမ်မႃးယွၼ်းၶႃႈၼေႈ။ ပိူၼ်ႈဢမ်ႇလႆႈၸႂ်ႉ လုၵ်ႈယိင်းပိူၼ်ႈမႃးထၢမ် ပေႃႈမႄႈဢွၼ်တၢင်းၸိူင်ႉၼႆ ၵတ်ႉၵႃႈ ၸၢမ်ၶမ်းဢမ်ႇတၼ်းလႆႈထၢမ် ဢႃသၢင်ႇလႃႈ လီဢၢႆပိူၼ်ႈတၢင်ၶိူဝ်ၼႃႇ ပေႃးပဵၼ်ယၢပ်ႇၼႃႇတၢၼ်ႇ ၼၼ်ႉၵေႃႈ ၸူဝ်းၵၼ်လၵ်ႉၵၼ်ပၢႆႈဢဝ်လႃႈ ဢမ်ႇလူဝ်ႇထၢမ်လူဝ်ႇ ယွၼ်းယဝ်ႉ”
“ဢႃဢမ်ႇႁဵတ်းႁေႉ လၵ်ႉဢဝ်ၵၼ်တႄႉ ၶီၸႂ်ၵမ်းၶိုၼ်းမႃးၵၼ်ႇတေႃး ၼၼ်ႉၼႃႇ။ ပိူၼ်ႈလႃႇပေႃးၼႃႇလိူဝ်မူလိူဝ်မႃ ပိူၼ်ႈဝႃႈၸိူင်ႉႁိုဝ်ၵေႃႈ ၵႃႈလႆႈၵူမ်ႈႁူဝ်ထွမ်ႇသေ ဢေႃႈဢဝ် ဢေႃႈဢဝ်ဝႃႈ။ ၵေႃႉၸၢႆးၼႆၼႃႇ တေၶၢမ်ႇၼႃႈလဵၵ်ႉႁဵတ်းသင် ပိူၼ်ႈၵေႃႈထၢမ်ၵၼ်ယွၼ်းၵၼ်ယူႇတၢင်း ဝၢၼ်ႈတၢင်းမိူင်း ပိူၼ်ႈၵေႃႈၵူၼ်းႁဝ်းၵေႃႈၵူၼ်း ပိူၼ်ႈပဵၼ်လႆႈ ႁဝ်းၵေႃႈ တိုၼ်းလူဝ်ႇပဵၼ်လႆႈၵႂႃႈ”
ၼၢင်းၶမ်းလိုၼ်းပူၵ်းႁူဝ်မႄႈမိုဝ်းၼေသေ “ၼႆႉယဝ်ႉပိူၼ်ႈႁွင်ႉဝႃႈၵေႃႉၸၢႆးၸႅတ်ႈၸၢင်ႇ ဢၢႆၵေႃႈတမ်ႉဢမ်ႇဢၢႆ ယဝ်ႉဢမ်ႇႁိုဝ်”
“ဢႃႉ ဢၢႆတႄႉဢၢႆယူႇၵူၺ်းလေႃႇ ပိူၼ်ႈသမ်ႉၵႆႉတင်ႈၸႂ်ယွၵ်ႇလူင်ၼႆႉ ၼႃ”
“ၼႄႉၼွၼ်း ႁၢင်ႈႁႅၼ်းပႂ်ႉႁပ်ႉဢဝ်ၵေႃႈဢမ်ႇၽိတ်းယဝ်ႉၶိူဝ် ၶႂ်ႈၸႃႉ ႁင်းပိူၼ်ႈသမ်ႉဢမ်ႇလႆႈလူင်ၼႆႉ”
“ဢူဝ်းၶေးၶႃႈပေႃးၼၼ် ငိၼ်းၸူမ်းတေႉတေႉ ၶႃႈၼႃပီႈၼၢင်းၶမ်း လိုၼ်းႁဝ်း ၶႃႈယွၼ်းပွၵ်ႈမိူဝ်းၵွၼ်ႇၶႃႈ လူဝ်ႇၵႂႃႇလႄႇ” ၼႆသေ ဢွၵ်ႇမႃး ယဝ်ႉ ၶိုၼ်းဝၢႆႇတူၺ်းၶဝ်သွင်ၵေႃႉသေ ႁဵတ်းၵႅင်ႈဝႃႈ “မႃးလႄႈၸၢမ်ၶမ်း ၵႂႃႇၸွမ်းပီႈၵေႃႈ” ၼႆၶဝ်ဢွၼ်ၵၼ်ၶူဝ်မၼ်းယူႇ။
ၵွပ်ႈဝႃႈၸၢႆးသၢႆၶိူဝ်း ပဵၼ်ၵူၼ်းမေႃၶဝ်ႈၼႃႈဢွၵ်ႇတႃပိူၼ်ႈ မီး ၵၢၼ်ၵိၼ်ၵၢၼ်လူႇ ၼႂ်းပွၵ်ႉၼႂ်းဝၢၼ်ႈမႃးၵေႃႈ ၵႆႉၸွႆႈထႅမ်ပိူၼ်ႈတဵမ် တဵမ်ထူၼ်ႈထူၼ်ႈ ဢူၼ်ႈဢူၼ်ႈဢွၼ်ႇဢွၼ်ႇ ၵႂႃႇၵႂႃႇပႆပႆၽၢႆႇၼႃႈၽူႈ ယႂ်ႇၵူၼ်းလူင်ၶဝ်ၵေႃႈ မေႃၵူမ်ႈၵႂႃႇၵွမ်းမႃး တူဝ်ယဵၼ်ႇငႄႈ ၸႂ်ယဵၼ်ႇငႄႈ သူပ်းယဵၼ်ႇငႄႈ လၢတ်ႈတေႃႇပိူၼ်ႈၵေႃႈ တၢၼ်ႇႁွင်ႉပီႈၵေႃႈႁွင်ႉႁွင်ႉပီႈ တၢၼ်ႇပၢၼ်ၼွင်ႉၵေႃႈႁွင်ႉၼွင်ႉလႄႈ ၵေႃႉလႂ်ႁၼ်ၵေႃႈ ဢၢမ်းသေ ထၢမ်ထိုင်ပေႃႈထၢမ်ထိုင်မႄႈ ထၢမ်ထိုင်ၸိူဝ်ႉ ထိုင်ၶိူဝ်းမၼ်းတႃႇသေႇ ၼၼ်ႉယဝ်ႉ။
ၵွပ်ႈၼၼ်လႄႈ ၽူႈယႂ်ႇၵူၼ်းလူင်ၶဝ်ၵေႃႈ ၶတ်းၸႂ်ပၼ်မၼ်း တဵမ်တဵမ်ထူၼ်ႈထူၼ်ႈၵူႈလွင်ႈၵူႈမဵဝ်းယူႇ။ ၶမ်ႈၼႆႉတႄႉပဵၼ်ၶမ်ႈ မေး လိုမ်ႉသေမၼ်ႈမၢႆၵၼ်ၵႂႃႇ တေလႆႈဢၢပ်ႈပႃး ၶူဝ်းၾၢၵ်ႇၶွင်မၼ်ႈယဝ်ႉ ၼႆလႄႈ မၼ်းၸၢႆးၵေႃႈ မႃးႁၢင်ႈႁႅၼ်းတၢင်းၵိၼ်တၢင်းယႅမ်ႉၸွမ်းၼၢင်း ၶမ်းလိုၼ်းလႄႈၼၢင်းၸေႃးယဵၼ်ႇၶဝ် ၼႂ်းႁွင်ႈမိုဝ်ႉၼႆႉယူႇ တင်းၶမ်ႈ ယဝ်ႉ။
ၵူၼ်းလူင်ၶဝ်တႄႉ ဢုပ်ႇဢုပ်ႇၶူဝ်ၶူဝ်ၵၼ်ယူႇ ၼိူဝ်ႁိူၼ်းၼၼ်ႉလႄႈ “ပီႈသၢႆၶိူဝ်းၶႃႈ ၶိုၼ်ႈမႃးၼိူဝ်ႁိူၼ်းၼႆႉၶႃႈဝႃႇ”
မၼ်းၸၢႆးၶိုၼ်ႈယဝ်ႉ “ဢေႃႈၶႃႈ မႂ်ႇသုင်ၶႃႈ မႂ်ႇသုင်ၵူႈၵေႃႉၶႃႈဢေႃႈ”
ၵူၼ်းလူင်ၵေႃႉၼိုင်ႈၸင်ႇဝႃႈ “ၶဝ်ႈမႃးလႄႈလုၵ်ႈ ၶဝ်ႈမႃးတၢင်းၼႂ်း မႃး ၼင်ႈႁိမ်းၸဝ်ႈသၢဝ်ၼႆႉလႄႈ”
မၼ်းၸၢႆးၵေႃႈ ၵၼ်ႇတေႃးၶႃႈ ၵၼ်ႇတေႃးၶႃႈ ၼႆပူၼ်ႉၶဝ်ႈၵႂႃႇၼင်ႈယူႇ ႁိမ်းၼၢင်းၸၢမ်ၶမ်းၼႆႉယဝ်ႉ။
ၵူၼ်းလူင်ထႅင်ႈၵေႃႉၼိုင်ႈ ဢၼ်မၼ်းၸၢႆးၽိတ်ႈမွၵ်ႇမႃးၼၼ်ႉ ၸင်ႇလၢတ်ႈဝႃႈ “ဢိူဝ်ႈ..ဢၼ်လွင်ႈၶေႃလွင်ႈယွၼ်းတႄႉ ႁဝ်းၵူၼ်း ထဝ်ႈၵူၼ်းၵႄႇၵေႃႈဢွၼ်ၵၼ်ၶေႃပၼ်ယွၼ်းပၼ်တွင်ႈထၢမ်ပၼ်ယဝ်ႉယဝ်ႉ။ ပုၼ်ႈၽွၼ်းႁဝ်း ၵူၼ်းထဝ်ႈတႄႉ လႆႈဝႃႈယဝ်ႉၵႂႃႇတွၼ်ႈၼိုင်ႈ ယဝ်ႉ၊ ၵမ်းၼႆႉသမ်ႉတိုၵ်းၵိုတ်းထႅင်ႈပုၼ်ႈၽွၼ်းၸဝ်ႈမၢဝ်ႇ ဢၼ်ပဵၼ် လၢၼ်ၸၢႆးႁဝ်း ၸၢႆးသၢႆၶိူဝ်းၼႆလႄႈ လွင်ႈမၼ်ႈလွင်ႈမၢႆဢၼ်ပဵၼ်ၶူဝ်း ၾၢၵ်ႇၼႆႉ ၸဝ်ႈသၢဝ်ၼၢင်းၸၢမ်ၶမ်းတႄႉဝႃႈ သိပ်းဝၢတ်ႇၼႆဝႃႇ ၸၢႆးသၢႆ ၶိူဝ်းသမ်ႉတေဝႃႈႁိုဝ် ၼမ်ၵႂႃႇႁႃႉ ၵေႇၼႃႇႁႃႉ ပေႃႈလုင်းတၢင်တူဝ်ၽူႈ ယႂ်ႇၵူၼ်းလူင်ၵူႈၵေႃႉသေ ယွၼ်းထၢမ်တူၺ်းၸၢႆးသၢႆၶိူဝ်းႁဝ်း တေဝႃႈ ႁိုဝ် ၸွင်ႇတေပဵၼ်လႆႈၼႆၵႂႃႈၼေႃႈ”
“ဢေႃႈၶႃႈ ပဵၼ်လႆႈယူႇၶႃႈ ”
ၵမ်ႈၽွင်ႈဢုပ်ႇၵၼ်ဝႃႈ “ပိူၼ်ႈသွင်ၵေႃႉတႄႉဢုပ်ႇၵၼ် တူၵ်းလူင်း ၵၼ်ယဝ်ႉယဝ်ႉလူင်မေႃႉ။ သၢႆၶိူဝ်းမေႃႁႃငိုၼ်းပေႃးတၢၼ်ႇၼၼ်ႉ မႄႈ ၶဝ်ၵေႃႈပၢႆပဵၼ်ၵူၼ်းမီးထႅင်ႈသေ ပေႉလႆႈၼႃႇလေႃႇ ၼႆယူႇႁင်းၶဝ်”
“ပေႃးၼၼ်ၸွင်ႇၸၢႆးသၢႆၶိူဝ်း ပႃႈႁၢင်ႈႁႅၼ်းမႃးယဝ်ႉႁိုဝ်”
“ဢဝ်မႃးယဝ်ႉၶႃႈ” မၼ်းၸၢႆးဢဝ်ဢွၵ်ႇမႃးသၢႆၶေႃးသွင်သဵၼ်ႈ ပဵၼ် သဵၼ်ႈႁႃႈဝၢတ်ႇၼင်ႇၵၼ်။
“ဢဝ်ဢၢပ်ႈပၼ်ၸဝ်ႈသၢဝ်လႄႈလုၵ်ႈ”
ၼႆမၼ်းၸၢႆးပႆႇပၼ်ၸဝ်ႈသၢဝ် ဢဝ်ယိုၼ်ႈပၼ် ၵူၼ်းလူင်ၶဝ်တူၺ်း ဢွၼ်တၢင်းယူႇ“ပၼ်ၸဝ်ႈသႅင်ႇၶမ်းၶဝ်တူၺ်းလႄႈ” လုင်းၸဝ်ႈ သႅင်ႇ ၶမ်းၼၼ်ႉတူၺ်းသေ “သဵၼ်ႈႁႃႈဝၢတ်ႇတေႉဢိူဝ်ႈ”
ၵမ်ႈၽွင်ႈလၵ်ႉဝႃႈ “ပေႃးပဵၼ်ၶမ်းတူႉတႄႉ ၽႂ်ၵေႃႈဢမ်ႇဢဝ်မႃးၽၢၵ်ႇ ၼင်ႇၵဝ်ႇယူဝ်ႉၼေႃႈ”
ၵေႃႉၼိုင်ႈသမ်ႉဝႃႈ “ၸွင်ႇၸႂ်ႈၵူၼ်းတၢင်ႇဝၢၼ်ႈတၢင်ႇမိူင်းၵေႃႈဢမ်ႇၸိုဝ်ႈမႂ်းၵေႃႈ ၽႂ်တေ ဢဝ်ၸိုဝ်ႈလူႉၼေႇ မဵဝ်းတူဝ်တၢႆၸိုဝ်ႈဢမ်ႇႁၢႆလူင်မဵဝ်းၼၼ်ႉ တေႃႈ ၼင်ႇဢၢႆႈၼၼ်ႉႁႆႇပၼ် မူမၼ်းတၢႆပဵၼ်သီႇႁႃႈသိပ်း မၼ်းတင်းဢမ်ႇ ၸႂ်ႉသၢႆႈၶိုၼ်းသေပျႃးၼႆႉ ပေႃးပဵၼ်တၢင်ႇၵေႃႉတႄႉ တေလႆႈၼႄႇ ၼၼ်ႉ”
“ဢၼ်မၼ်းဝႃႈၼၼ်ႉၵေႃႈၸႂ်ယူႇၼႃႇ သင်ဝႃႈသၢႆႈတႅၼ်းၶိုၼ်းၼႆၵေႃႈ ၵေႃႉဢၼ်တေသဵင်ႈငိုၼ်းတွင်းၼႆႉ တိုၼ်းပဵၼ်ပေႃႈမႄႈပီႈၼွင်ႉမၼ်း ၵူၺ်းတေလႆႈသဵင်ႈ ဢမ်ႇမီးပေႃႈမႄႈၵေႃႉလႂ် ပၼ်ႁႅင်းႁႂ်ႈလုၵ်ႈလၢင်း ႁဵတ်းလွင်ႈဢမ်ႇလီသေၵေႃႉ။ ၵူၼ်းၵေႃႉဢၼ်ဢမ်ႇႁဵတ်းၽိတ်းၼၼ်ႉ ဢမ်ႇႁူႉသင်ၸွမ်းလႄႈ လႆႈႁပ်ႉတၢမ်ႇၸွမ်းၼႆႉၶႃႈဢမ်ႇၶႂ်ႈႁႂ်ႈပဵၼ်ၵေႃႉ လႂ်ၽိတ်းၵေႃႈႁႂ်ႈၵေႃႉၼၼ်ႉၶၢမ်ႇၼႆႉ လီလိူဝ်ပိူၼ်ႈယဝ်ႉၼႆၼၼ်ႉၼႃႇ ၸႂ်ႈယူႇလူးၼၼ်ႉ”
“ဢၢႆႈၼၼ်ႉတႄႉပိူၼ်ႈဢဝ်ၵႂႃႇမိူင်းမၢၼ်ႈယဝ်ႉၼႆဢမ်ႇၸႂ်ႈႁႃႉ”
“ဢဝ်ၵႂႃႇယဝ်ႉဝႃႈ ၵမ်ႈၽွင်ႈဝႃႈတၢႆယဝ်ႉၼႆၵွၼ်ႇၼေႈ”
ၼႆယူႇႁင်းၶဝ်ယဝ်ႉ။
ၸၢႆးသၢႆၶိူဝ်းဢဝ်သၢႆၶေႃးသဵၼ်ႈသွင်ဝၢတ်ႇမီးပႃးတေႃႇလႃႇ ႁၢင်ႈႁူဝ်ၸႂ် ဢၼ်မီးတူဝ်လိၵ်ႈဝႃႈ “သၢႆၸၢမ်” တႃႇၽၢႆႇၼိုင်ႈသမ်ႉ“ၶိူဝ်းၶမ်း” ၼႆ ၼၼ်ႉဢွၵ်ႇမႃးသေလၢတ်ႈဝႃႈ
“ၼႆႉတေႉၶႃႈယွၼ်းမတ်ႉႁူဝ်ၸႂ်ၸၢမ်ၶမ်းဝႆႉၶႃႈၼႃႉ” ၼႆသေ ဢဝ်ႁွႆႈ ပၼ်ၼၢင်းၸၢမ်ၶမ်းယဝ်ႉလၢတ်ႈဝႃႈ “မႃးပီႈယွၼ်းမတ်ႉႁူဝ်ၸႂ်ၼွင်ႉဝႆႉ တေႇဢဝ်ၼႆႉၵႂႃႇပီႈတေပဵၼ်ၸဝ်ႈၽူဝ်လီ ၵေႃႉဢၼ်ၼွင်ႉပိုင်ႈဢိင်ၸႂ် ယႂ်ႇလႆႈ တေႁူမ်ႈတုၵ်ႉႁူမ်ႈၵျေႃႇၸွမ်းၵၼ်သေ ႁၵ်ႉၼွင်ႉၵေႃႉလဵဝ် တေႃႇၸူဝ်ႈယဝ်ႉၼႃႈ”
“ၼၢင်းၸၢမ်ၶမ်းလူးတေဝႃႈႁိုဝ် ၸၢႆးသၢႆၶိူဝ်းတႄႉဝႃႈၸိူင်ႉၼၼ်ယဝ်ႉ ၼေႈ”
မၼ်းၼၢင်းငွၵ်ႈႁူဝ်ၶိုၼ်ႈမႃးသေ “ၶႃႈယိင်းတႄႉဢႃႇယုၵေေႃႈလဵၵ်ႉလိူဝ်ပီႈသၢႆၶိူဝ်း တၢင်းႁူႉၵေႃႈဢမ်ႇႁူႉ တၢၼ်ႇပီႈသၢႆၶိူဝ်းၶႃႈ ပဵၼ်ႁိုဝ်မႃးၵေႃႈ ၵႃႈတလႆႈဢဝ်ပီႈသၢႆၶိူဝ်းၵေႃႉ ဢၼ်ဢႃႇယုလႄႈတၢင်းႁူႉယႂ်ႇၼၼ်ႉဝႃႈၵူၺ်းယဝ်ႉၶႃႈ။ ၵူၺ်းၵႃႈၵၢၼ် ၼႃႈႁိူၼ်းဢၼ်ပဵၼ်ပုၼ်ႈၽွၼ်းၼၢင်းယိင်းၼၼ်ႉတႄႉ ၶႃႈယိင်းတေ ဢဝ်ပုၼ်ႈၽွၼ်းၼၢင်းမေးလီ ၵေႃႉၼိုင်ႈသေ လုမ်းလႃးၸဝ်ႈၽူဝ်ၵႂႃႇႁႂ်ႈ တဵမ်ထူၼ်ႈသေယဝ်ႉ တေပဵၼ်ၼၢင်းမေးလီ မီးသတ်ႉၸႃႇသေယဝ်ႉ တေႁၵ်ႉပီႈသၢႆၶိူဝ်းၵေႃႉလဵဝ်ၵႂႃႇတေႃႇၸူဝ်ႈယူႇၶႃႈ”
“ဢိူဝ်ႈလီယဝ်ႉပေႃးၼၼ် ၵေႃႉၽူဝ်ၵေႃႈ တွင်းဝႆႉၵႂၢမ်းၵေႃႉမေးသေ ၵေႃႉမေးၵေႃႈတွင်းဝႆႉၵႂၢမ်းၸဝ်ႈၽူဝ်လႄႈ ၵူၺ်းၵႃႈ လွင်ႈယူႇၼႆႉလူး တေယူႇၽၢႆႇလႂ် ၶိူဝ်လၢတ်ႈၵၼ်ဝႆႉၸိူင်ႉႁိုဝ်လႃႇ။ ၽၢႆႇၵူၼ်းၸၢႆးၵေႃႈ သမ်ႉမီးမႄႈၵေႃႉလဵဝ် တေဝႃႈၽၢႆႇၼၢင်းယိင်းၵေႃႈ မီးပေႃႈၵေႃႉလဵဝ် ၸိူင်ႉၼႆ ၽႂ်တေယူႇၽၢႆႇလႂ်ၽႂ်တေၶၢမ်ႇၵႂႃႇၸွမ်းၽႂ်လႃႇ”
ၸၢႆးသၢႆၶိူဝ်းၸင်ႇဝႃႈ “လုၵ်ႈဝႃႈႁိူၼ်းၵေႃႈၸမ်ၵၼ်ယူႇ လီလၢတ်ႈဢမ်ႇ လီပဵၼ်သင်ဝႃႈမီးလွင်ႈ ႁိပ်ႈၼႅတ်ႈၸမ်ပဵၼ်မႃးၼႆ ႁွင်ႉႁႃၵၼ်မၼ်း ၵေႃႈငၢႆႈယူႇၼၼ်ႉၶႃႈၼႃႇၼေႃႈ။ လွင်ႈလုမ်းလႃး ပေႃႈမႄႈလုမ်းလႃး ၼႃႈႁိူၼ်းတႄႉ ႁဝ်းၶႃႈတေဢမ်ႇဝႆႉဝႃႈ ပေႃႈၵဝ်မႄႈမႂ်းႁဝ်းၶႃႈတေဢဝ် ပုၼ်ႈၽွၼ်းတင်းသွင်ၽၢႆႇယူႇၶႃႈ။
ၼင်ႇႁိုဝ်ပေႃႈလႄႈမႄႈ ပေႃးတေၸၢင်ႈၸႂ်ယႂ်ႇလႆႈလႄႈ ဢမ်ႇ လႆႈမႆႈၸႂ်ၼၼ်ႉ ႁဝ်းၶႃႈတေလုမ်းလႃးၶဝ်ၸဝ်ႈၵႂႃႇ တဵမ်တဵမ်ထူၼ်ႈ ထူၼ်ႈတင်းသွင်ၽၢႆႇယူႇၶႃႈ”
“ဢိူဝ်ႈ ပေႃးၵေႃႉပဵၼ်ပေႃႈ ပဵၼ်မႄႈဝႃႈလီယူႇ လႆႈယူႇၼႆၵေႃႈ လူဝ်ႇ လိူၵ်ႈ ႁႃတူၺ်းဝၼ်းလီပၢင်ၶႅၵ်ႇပၼ်ၶဝ်ၵူၺ်းယဝ်ႉယူဝ်ႉၼေႃႈ ၸၢမ် ၶမ်းၼႆၼႆႉ ပဵၼ်ၵူၼ်းဝၼ်းၸၼ်ၼေႃ သၢႆၶိူဝ်းၼႆသမ်ႉပဵၼ်ၵူၼ်းဝၼ်း သုၵ်း ဢႃ ၺႃးၼႂ်းဝၼ်းလိူၼ်သီႇမႂ်ႇၼႆႉယဝ်ႉဢိူဝ်ႈ လိူၼ်သီႇမႂ်ႇသၢမ် ၶမ်ႈၵေႃႈလီယူႇယူဝ်ႉၼေႃႈ ဢမ်ႇပေႃးလႆႈပႂ်ႉႁိုင်”
ၼႆသေၶဝ်ဢွၼ်ၵၼ်ၵိၼ်ၵျေႃႇၵိၼ်မူၼ်ႈၵၼ်သေယဝ်ႉ မိူဝ်းၵႂႃႇယဝ်ႉ။
သိုပ်ႇလူထႅင်ႈတွၼ်ႈတေမႃၶႃႈ
