ၸၢႆးသၢႆၶိူဝ်းၶဝ်ႈမႃးၼႂ်းႁွင်ႈမိုဝ်ႉသေ
“ၼၢင်းၸေႃးယဵၼ်ႇ မိူဝ်ႈၼႆႉၶႃႈတေယွၼ်းဢွၼ်မႄႈၵႂႃႇလႄႇတီႈသူၼ် တေလႆႈၵႂႃႇၵိၼ်ၶဝ်ႈဝၼ်းတီႈပုၼ်ႉယူဝ်ႉၸွင်ႇမီးၽၵ်းႁိုဝ်”
“မီးထူဝ်ႇၶၢမ်း တင်းၼိူဝ်ႉမူၵူၺ်းဢေႃႈ ၸွင်ႇတေပႃႈပေႃးႁိုဝ်”
“ပေႃးဢမ်ႇမိူၼ်တေပေႃးၵေႃႈသိုဝ်ႉထႅင်ႈဢေႃႈ”
မၼ်းၸၢႆးမႃးတီႈႁိူၼ်းၶဝ်ၼၼ်ႉယဝ်ႉ “ဢဝ်ၵႃးၼွင်ႉၵႂႃႇထႅင်ႈလမ်းၼိုင်ႈ ႁွင်ႉပႃးပီႈၶမ်းလိုၼ်းလႄႈၼႃႉ မႄႈ တင်းၼၢင်းၸေႃးယဵၼ်ႇတေၵႂႃႇဢိူဝ်ႈ”
ၼၢင်းၸၢမ်ၶမ်းငွၵ်းႁူဝ်ၼေယူႇ မၼ်းၸၢႆးယုမ်ႉယုမ်ႉသေဝႃႈ
“ၼွင်ႉဢမ်ႇၵႂႃႇၼႆႁႃႉတေႃႈ”
မၼ်းၼၢင်းၵေႃႈၵိူင်းႁူဝ်လပ်းတႃၸင်းသေယုမ်ႉၼႄၶိုၼ်းယူႇ၊ ၸၢႆးသၢႆၶိူဝ်းၶိုၼ်းမိူဝ်းၵႂႃႇယဝ်ႉၶဝ်ႈႁိူၼ်းမႃးသေ
“မႄႈၶႃႈ မိူဝ်ႈၼႆႉလုၵ်ႈတေဢွၼ်မႄႈၵႂႃႇလႄႇတီႈသူၼ်ဢေႃႈ”
“လီဢိူဝ်ႈလုၵ်ႈ မႄႈၶႂ်ႈႁၼ်ၸဵမ်လႂ်ယဝ်ႉဝႃႈၼၼ်ႉ လုၵ်ႈပႆႇလႅပ်ႈတၼ်း လႄႈမႄႈပႆႇလၢတ်ႈၵူၺ်းဢိူဝ်ႈ ၸေႃးယဵၼ်ႇ ဢိုတ်းၽၵ်းတူႁႃးသဵင်ႈ သဵင်ႈလႄႈလုၵ်ႈ ၵျွင်းပိူၼ်ႈတေမႃးသူင်ႇႁႃးၶၢဝ်းလႂ်”
“ၼၢင်းၸေႃးယဵၼ်ႇၵႂႃႇၶီႇၸွမ်းၸၢမ်ၶမ်းလႄႈ လႆႈၼင်ႈလီ မီးၼၢင်း ၶမ်းလိုၼ်းၵူၺ်းဢိူဝ်ႈၼၼ်ႉ”
ၸၢႆးသၢႆၶိူဝ်းႁေႃႈၵႃးမႃးလွႆးလွႆးသေ ၶဝ်မႄႈလုၵ်ႈဢုပ်ႇၵၼ်မႃးယူႇမဵဝ်း ၼိုင်ႈယဝ်ႉမဵဝ်းၼိုင်ႈသေ မၼ်းၸၢႆးၸင်ႇဝႃႈ“မႄႈၶႃႈ လုၵ်ႈတေၶႂ်ႈ ယွၼ်းထၢမ်မေးဢေႃႈ”
“လုၵ်ႈတေယွၼ်းၽႂ်”
“ၸၢမ်ၶမ်းၶႃႈမႄႈ”
“ယွၼ်းလႄႈမႄႈၸၢင်ႈဝႃႈသင် မိူဝ်ႈဢွၼ်တၢင်းတႄႉမႄႈဝူၼ်ႉဝႆႉဝႃႈ ႁႂ်ႈလုၵ်ႈဢဝ်ၸေႃးယဵၼ်ႇၼႆဢိူဝ်ႈ ၵူၺ်းၼႃႇ ၵွႆႈယူႇႁိုင်မႃးသမ်ႉလီဢီး လူၸၢမ်ၶမ်း။ ပေႃႈၶဝ်ၵေႃႈ သမ်ႉလႆႈၸႂ်ဝႃႈလုၵ်ႈၸႂ်ယၢဝ်းၸွမ်းၸႂ်ၸၢမ် ၶမ်းလႆႈၵူႈမဵဝ်းၼႆဝႃႇ”
“လုၵ်ႈၵေႃႈဢမ်ႇၸႂ်ႈဝႃႈ ၸွမ်းၸႂ်မၼ်းၵူႈမဵဝ်းၶႃႈလေႃႇၼၼ်ႉမႄႈ လုၵ်ႈ သင်ႇသွၼ်မၼ်းလၢတ်ႈၼႄ ဢၼ်လီဢၼ်ၸႃႉၸိူင်ႉၼၼ်ၵူၺ်းၼင်ႇ ၵဝ်ႇဢေႃႈၼၼ်ႉ”
“ဢိူဝ်ႈမႄႈဝႃႈ ၸေႃးယဵၼ်ႇၼႆႉႁဝ်းႁူႉၼွၵ်ႈႁၼ်ၼႂ်းၵၼ် မၼ်းၵေႃႈယူႇ ၸွမ်းမႄႈလုမ်းလႃးမႄႈမႃးၸဵမ်လႂ်ယဝ်ႉ သင်ဝႃႈမီးၵၢၼ်ႁိူၼ်းယေးမႃး ၼႆၵေႃႈ ယူဝ်မၼ်းၸႂ်ယႂ်ႇၸႂ်ယၢဝ်းမႄႈဝႃႈၼႆၼေႈ”
“ဢူး မႄႈၶႃႈ လွင်ႈတႃႇလုမ်းလႃးမႄႈၼႆႉ လုၵ်ႈတိုၼ်းဢမ်ႇပၼ်ၽႂ် ယၢပ်ႇဢမ်ႇပၼ်ၽႂ်ႁဵတ်းၶႃႈ။ လုၵ်ႈၵေႃႉတေလုမ်းလႃးမႄႈ တဵမ်တဵမ် ထူၼ်ႈထူၼ်ႈၵူၺ်းၶႃႈ။ မႄႈဢမ်ႇတၢပ်ႈမႆႈၸႂ်ၶႃႈလႃႈ မႄႈဝႃႈႁႂ်ႈလုၵ်ႈ ဢဝ်ၼၢင်းၸေႃးယဵၼ်ႇၼႆၼၼ်ႉ လုၵ်ႈလႄႈတင်းမၼ်းဢမ်ႇတွၼ်ႉလႆႈ လၢတ်ႈတေႃႇၵၼ်လီလီသေပွၵ်ႈၶႃႈလူးမႄႈ။ ထႅင်ႈလွင်ႈၼိုင်ႈၵေႃႈ ယူႇႁိူၼ်းလဵဝ်ၵၼ် မၢင်ပွၵ်ႈမီးႁဝ်းၶႃႈသွင်ၵေႃႉၵူၺ်း သမ်ႉလိူၵ်ႈမႃးဢဝ် ၵၼ်ထႅင်ႈၼႆတႄႉ ယူဝ်ၸိုဝ်ႈသဵင်ႁႃးမႄႈလုၵ်ႈတႄႉ ၼႃႇလိူဝ်ၸၢင်ႉ သၢမ်ငႃးဢၼ်ဝႃႈၼၼ်ႉၵွၼ်ႇၶႃႈယူဝ်ႉမႄႈ။ လုၵ်ႈၶႂ်ႈတိုဝ်ၵႂၢမ်းမႄႈတႄႉ ဢမ်ႇၸႂ်ႈၶႃႈၼႃမႄႈ။ ယဝ်ႉထႅင်ႈ ၸၢမ်ၶမ်းၵေႃႈလုၵ်ႈဢီးလူဢေႃႈ ၵမ်ႉ မႃးမႄႈတေၵႂႃႇႁၼ်ယူႇၶႃႈ။ မၼ်းမႃးၸွမ်းလုၵ်ႈ ၵူႈဝၼ်းၵူႈဝၼ်းၼႆႉ မၼ်းမႃးၽုၵ်ႇမွၵ်ႇ ၽုၵ်ႇမၢၵ်ႇၸိူဝ်းၼႆႉဢေႃႈၼၼ်ႉ။ ယဝ်ႉၵေႃႈဢၼ် မၼ်းၵႂႃႇၵႂႃႇပႆပႆၸွမ်းလုၵ်ႈယူႇၸိူဝ်းၼၼ်ႉ ၸိုဝ်ႈမၼ်းၵေႃႈ ၸၢင်ႈလူႉ ယွၼ်ႉလုၵ်ႈဢေႃႈ။ မိူၼ်မိူဝ်ႈလဵဝ်ၶဵၼ်းၼႃႇယဝ်ႉ ပေႃးလုၵ်ႈၵႂႃႇလႂ်ဢမ်ႇ ႁွင်ႉမၼ်းၼႆ ဝႃႈလုၵ်ႈဢမ်ႇႁၵ်ႉမၼ်းၼႆၶႃႈဢေႃႈၼၼ်ႉ သင်ဝႃႈလုၵ်ႈ ဢဝ်ၼၢင်းၸေႃးယဵၼ်ႇၼႆတႄႉ ယူဝ်ပေႃႈၶဝ်ၵေႃႈ ၶႂ်ႈဢဝ်ႁႃးမႄႈလုၵ်ႈ တၢႆၵွၼ်ႇၶႃႈယူဝ်ႉမႄႈ”
“ဢိူဝ်ႈ ယႃႇဢဝ်ၼႆတႄႉမႄႈၵေႃႈဢမ်ႇဝႃႈၼင်ႇၵဝ်ႇ မႄႈဝူၼ်ႉဝႆႉၼႆၵႃႈ ၸၢမ်ၶမ်းၵေႃႈ လီဢီးလူယူႇတေႉၼင်ႇၵဝ်ႇ။ ပေႃးလုၵ်ႈဢမ်ႇဢဝ်မၼ်း မၼ်းၵေႃႈႁူႉၵႃႈတေမိူၼ်ၼၼ်ယူႇတေႉ။ ဢဝ်ၵေႃႈ ဢဝ်ဢိူဝ်ႈမႄႈ လုၵ်ႈတေယွၼ်းမိူဝ်ႈလႂ် တေၽၢၵ်ႇၵႃႈႁိုဝ် မၼ်းယွၼ်းလုၵ်ႈၵႃႈႁိုဝ်လႃႇ ”
“ပႆႇႁူႉၶႃႈ လုၵ်ႈတမ်ႉပႆႇလႆႈထၢမ်မၼ်း လုၵ်ႈဝႃႈထၢမ်တူၺ်းမႄႈၵွၼ်ႇ ၼႆၼၼ်ႉၶႃႈၼႃႇ”
“ဢိူဝ်ႈထၢမ်တူၺ်းမၼ်းလႄႈမႄႈ ဢမ်ႇယွမ်းယူဝ်ႉ ပေႃးသိပ်းပျႃးတႄႉ ”
ၸၢႆးသၢႆၶိူဝ်းလူင်းၵႃးသေ မႃးလုၵ်ႈတေမႄႈႁဝ်း
“ၼႆႉတေႉ လုၵ်းၼွၼ်းတႃႇမႄႈ ၼႆႉသမ်ႉ လုၵ်းၼၢင်းၸေႃးယဵၼ်ႇ လုၵ်းၼႆႉတႄႉပႆႇႁူႉၸဝ်ႈမၼ်းပႆႇမၼ်းၸဝ်ႈၶွင် ၼႆႉသမ်ႉပဵၼ်ႁွင်ႈၶႅၵ်ႇ မႄႈမႃးၼင်ႈလဵၼ်ႈ တီႈၼႆႈၶႃႈလေႃႇမႄႈ ၸွင်ႇမႄႈ ထုၵ်ႇၸႂ်ၶႃႈႁိုဝ် ၼၢင်းၸေႃးယဵၼ်ႇလူးဝႃႈႁိုဝ်လႃႇ ၸွင်ႇၵျိူၵ်ႈႁိုဝ်”
“ၶႅမ်ႉဢေႃႈ”
“မႄႈၶႃႈ လုၵ်ႈတေဢွၵ်ႇၵႂႃႇတၢင်းၼွၵ်ႈၵမ်ႉၶႃႈၼႃႉ”
“ဢိူဝ်ႈၵႂႃႇလႄႈမႄႈ”
“ၸၢမ်ၶမ်း မႃးႁဝ်းၵႂႃႇၼွင်ႉ” ၼႆသေပႃးၵၼ်ၵႂႃႇယဝ်ႉ။
ပႃႈသူၺ်ႇၼူႉမႃးၼင်ႈသေ “တီႈၼႆႈတႃႉလီယဵၼ်ၸႂ်တေႉလႃႈမႂ်းၸေႃးယဵၼ်ႇဢိူၺ်ႉ မႄႈပေႃး ဢမ်ႇ ၶႂ်ႈယူႇၼႂ်းဝႅင်းယဝ်ႉမႂ်း”
“ပီႈသၢႆၶိူဝ်းတႃႉမေႃဝူၼ်ႉၶႃႈၼေႃပႃႈ ၶႅမ်ႉတေႉယဝ်ႉဝႃႈ တေသဵင်ႈပဵၼ် ၵႃႈႁိုဝ်ၶႃႈၼႆႉ”
ပႃႈသူၺ်ႇၼူႉၵေႃႈၼင်ႈသေဝူၼ်ႉယူႇဝႃႈ “လုၵ်ႈပႂ်ႉမႄႈၼႆႉတၢၼ်ႇလီပဵၼ်မႂ်းဢိူဝ်ႈၸေႃးယဵၼ်ႇဢိူၺ်ႉ” သမ်ႉယၵ်ႉၵႂႃႇၼႂ်းသူၼ် ၸွမ်းၽင်ႇၼွင်ၸိူဝ်းၼၼ်ႉလႄႈ ႁၼ်ၵႂႃႇ တူၼ်ႈမွၵ်ႇတူၼ်ႈမၢၵ်ႇဢွၼ်ႇၸိူဝ်းၼၼ်ႉ ပဵၼ်တႅဝ်းပဵၼ်တႅဝ်းဢွၼ်ႇ ၸုၵ်းသွၼ်းမူၺ် သွၼ်းၼၢႆးဝႆႉယူႇလႄႈ သမ်ႉၶိုၼ်းဝူၼ်ႉဝႃႈ“ၵေႃႈယဝ်ႉ လႃႈ ၸၢမ်ၶမ်းဢိူၺ်း လုၵ်ႈၵေႃႈၵၢၼ်ႉၶတ်းၸႂ်ပေႃးပဵၼ်တၢၼ်ႇၼႆႉ ယဝ်ႉ မႄႈဢမ်ႇႁေႉႁၢမ်ႈသင်ယဝ်ႉ ပေႃးလုၵ်ႈဢမ်ႇမႃးၵေႃႈ တူၼ်ႈမွၵ်ႇ တူၼ်ႈမၢၵ်ႇဢွၼ်ႇၸိူဝ်းၼႆႉသမ်ႉတေၸႂ်ထိုင်တေမွင်းၸဝ်ႈမၼ်းဢိူဝ်ႈၼေႃ”
ၸၢႆးသၢႆၶိူဝ်းမႃးတီႈၵွင်းမူးၵွင်းလွႆၼႆႉယဝ်ႉ “ၸၢမ်ၶမ်း”
“ဢေႃႈၶႃႈ”
“ၸွင်ႇၼွင်ႉတိုၵ်ႉတွင်းလႆႈယူႇႁႃႉ တီႈၼႆႈပဵၼ်တီႈသင်ၼႆ”
“တွင်းဢေႃႈ ပဵၼ်တီႈဢၼ်ၼွင်ႉလႆႈႁူႉၸွမ်းလွင်ႈၸၢတ်ႈပၢၼ်ပီႈလႄႈ ပဵၼ်တီႈဢၼ်ၼွင်ႉယုမ်ႇၸႂ်ပီႈလႆႈၶႃႈ”
“ယုမ်ႇၸႂ်ပီႈလႆႈၸိူင်ႉႁိုဝ်”
“ပီႈဢမ်ႇမေႃလႅၼ် မေႃလၢတ်ႈၸွမ်း လွင်ႈဢၼ်ပဵၼ်တေႉမီးတေႉ ၼၼ်ႉဢေႃႈ”
“ပေႃးၼၼ်ၵေႃႈ ပီႈၶႂ်ႈလၢတ်ႈၼႄၼွင်ႉထႅင်ႈၶေႃႈၼိုင်ႈဢိူဝ်ႈ ၵႂၢမ်းၶေႃႈ ၼႆႉပီႈပႆႇတွၼ်ႉယၢမ်ႈလၢတ်ႈၼေၽႂ်ၵေႃႉလႂ်သေပွၵ်ႈ”
“ဝႃႈႁိုဝ်ၶႃႈ”
“ပီႈႁၵ်ႉၼွင်ႉ ပီႈတေမိူဝ်းယွၼ်းမိူဝ်းထၢမ်ၼွင်ႉၼႃႉ”
မၼ်းၼၢင်းပႆႇတၵ်းသဵင်တိုၵ်ႉဝူၼ်ႉယူႇဝႃႈ “ၵႂၢမ်းၶေႃႈၼႆႉၼွင်ႉမွင်းပႂ်ႉထွမ်ႇယူႇၸဵမ်လႂ်ယဝ်ႉဝႃႈ ယူဝ်ဝႃႈဢမ်ႇမီး တႃႇလၢတ်ႈၼႄၼွင်ႉယဝ်ႉၼႃး”
“ၸၢမ်ၶမ်းၽိတ်းၸႂ်ၵႂႃႇယဝ်ႉႁႃႉ”
“ဢမ်ႇၽိတ်းၸႂ်ၶႃႈ ၼွင်ႉၵေႃႈႁၵ်ႉပီႈဢေႃႈ ပီႈပေႃးငမ်ဢဝ်ႁူဝ်ၸႂ်ၼွင်ႉ ၵႂႃႇၸဵမ်လႂ်ယဝ်ႉၶႃႈလူး”
“ပေႃးၼၼ်ပီႈမိူဝ်းယွၼ်းၼွင်ႉၼႃႈ”
မၼ်းၼၢင်းငွၵ်းႁူဝ်ၼေယူႇ။
“ၼွင်ႉတေႁႂ်ႈပီႈၽၢၵ်ႇၵႃႈႁိုဝ်လႃႇ”
“ၼၼ်ႉတႄႉၼွင်ႉဢမ်ႇမေႃလၢတ်ႈၶႃႈ ဢဝ်ပီႈဝႃႈၵူၺ်းဢေႃႈ”
“ပေႃးၼၼ်ပီႈတေၽၢၵ်ႇသိပ်းဝၢတ်ႇ ၼွင်ႉတေဝႃႈႁိုဝ်”
“ၼွင်ႉဝႃႈယဝ်ႉၼွင်ႉဢမ်ႇမေႃလၢတ်ႈၼႆ”
“တေဝႃႈၽၢၵ်ႇၼမ်ၼမ်ၼႆၵေႃႈ ပီႈဢမ်ႇမီးလူး တေႃႈၼင်ႇသိပ်းဝၢတ်ႇ ၼႆႉၵူၺ်း ယင်းတေလႆႈယွၼ်းၶမ်းတီႈမႄႈၵွၼ်ႇၼေႈ”
“ၼၼ်ႉၼႃႇပေႃးၶီႈလႅၼ်ၸိူင်ႉၼႆ ဢမ်ႇလူဝ်ႇမႃးယွၼ်းၼွင်ႉယဝ်ႉလႃႈ ၼွင်ႉဢမ်ႇၵျိူၵ်ႈၵူၼ်းၸၢင်ႈလႅၼ်ၼႆ”
“တေႁႂ်ႈပီႈဝႃႈႁိုဝ်လႃႇဢေႉ ႁႂ်ႈပီႈဝႃႈ ႁဝ်းၸၢႆးသၢႆၶိူဝ်းၼႆႉမီးၼႃႇ ပေႃး လွင်ႈဝႃႈမွၵ်ႈၶမ်းတႃႇၽၢၵ်ႇသူသိပ်းဝၢတ်ႇဢွၼ်ႇၵူၼ်းတႄႉ ဢမ်ႇတၢပ်ႈ လူဝ်ႇလႆႈဝွၼ်းၽႂ် ႁႂ်ႈလႆႈၼႃႈလဵၵ်ႉႁဵတ်းသင်ၼႆႁႃႉ”
မၼ်းၸၢႆးၼေပႃးမိုဝ်းၸိူင်ႉၼၼ် ၼၢင်းၸၢမ်ၶမ်းၶတ်းလူမ်းၼႃႇလႄႈ ဢၢင်ႈထုပ်ႉမင်ပၼ်မၼ်းၼႆႉ မၼ်းၸၢႆးသမ်ႉငိူင်ႉဝႄႈ ပႅတ်ႈႁဵတ်းႁႂ်ႈ မၼ်းၼၢင်းသၢင်ႉတူဝ်လႆႈလႄႈ ဢၢင်ႈလူမ်ႉၸၢႆးသၢႆၶိူဝ်းပေႃးတၼ်းဝၵ်ႉ ၵွတ်ႇဢဝ်တူဝ်မၼ်းၼၢင်း မႃးမီးယူႇၼႂ်းၵႄႈၶႅၼ်မၼ်းၼႆႉယဝ်ႉ။
မိူဝ်ႈလဵဝ်သဵင်ႁူဝ်ၸႂ်ဢွၼ်ႇ မၼ်းၼၢင်းၼၼ်ႉ ၼပ်ႉဢၢၼ်ႇ ၸွမ်းပေႃးဢမ်ႇၶိုတ်းလႆႈယဝ်ႉ။ မၼ်းၼၢင်းၾၢင်ႉတူဝ်လႆႈသေ ၽိုတ်ႉ ဢွၵ်ႇလွႆးလွႆးယူႇ “ၵတ်ႉၵႃႈပီႈသၢႆၶိူဝ်းယင်းတၼ်းဝၵ်ႉလႆႈၼွင်ႉလႃႈ”
“ဢူး ၼွင်ႉပဵၼ်ၵေႃႉဢၼ်ပီႈႁၵ်ႉ သမ်ႉမၢႆပဵၼ်ၵေႃႉဢွၼ်တၢင်းသုတ်း ၼႂ်းၸၢတ်ႈပၢၼ်ပီႈယဝ်ႉလူး။ ပီႈတိုၼ်းဢမ်ႇပွႆႇၼွင်ႉထူပ်းၽေးတေႃႇ ၼႃႈတေႃႇတႃပီႈလေႃႇ” ၼႆသေပႃးၵၼ်မႃးယူႇယဝ်ႉ။
“ၼွင်ႉယႃႇလိုမ်းထၢမ် ယႃႇၼၢၼ်းထၢမ်ပေႃႈၼႃႉ”
“ပေႃးပေႃႈဝႃႈဢမ်ႇလႆႈၼႆၶႃႈလူး”
“ပေႃးဢမ်ႇလႆႈၼႆၵေႃႈ ယူႇၵႆၵႆသေ ၸွၼ်မုင်ႈတူၺ်းလၵ်ႉၸွၼ်ႁၵ်ႉ ဢဝ်ၸိူင်ႉၵူၼ်းဢိူဝ်ႈ တေၸၢင်ႈႁဵတ်းႁိုဝ်”
“တေႁဵတ်းလႆႈယူႇတေႉႁႃႉ”
“ဢမ်ႇၼၼ်ၵေႃႈ တေႃႉၶူဝ်းမိူဝ်းယူႇၸွမ်းၼွင်ႉ ႁဵတ်းၼၼ်ဢဝ်ႁေ ယဝ်ႉဢိူဝ်ႈ”
“ႁိုဝ်ႉ!”
သိုပ်ႇလူထႅင်ႈတွၼ်ႈတေမႃးၶႃႈ
