ႁႃႈဝၼ်းပူၼ်ႉၵႂႃႇယဝ်ႉ မိူဝ်ႈၼႆႉတႄႉၸၢႆးသၢႆၶိူဝ်းမႃးႁေႃႈၵႃး ၶုတ်းမႅၵ်ႉၶူဝ်းၶုတ်းၼွင်မၼ်းယူႇ၊ ၼၢင်းၸၢမ်ၶမ်းသမ်ႉၵေႃႉၽုၵ်ႇမၢၵ်ႇ မူင်ႈမၢၵ်ႇလၢင်း မၢၵ်ႇသၢင်းၽေႃး၊ မၢၵ်ႇၽႃႈလႄႈ မွၵ်ႇဢၼ်မၼ်းၼၢင်း ၵျိူၵ်ႈၸိူဝ်းၼၼ်ႉၵူႈဝၼ်းၵူႈဝၼ်း။
ၸၢႆးသၢႆၶိူဝ်းၵေႃႈ ၵွပ်ႈဝႃႈမၼ်းၸၢႆးၵေႃႉႁေႃႈမႅၵ်ႉၶူဝ်းႁင်းၵူၺ်း လႄႈ ပေႃးဢမ်ႇလႆႈယူႇလႆႈသဝ်းယဝ်ႉ ၼႂ်ၼႆႉၸဝ်ႈလူတ်ႉမႅၵ်ႉၶူဝ်းမႃး ၸူးတီႈၸၢႆးသၢႆၶိူဝ်းသေလၢတ်ႈဝႃႈ
“မိူဝ်ႈလဵဝ်ႁဝ်းၶႃႈၼႆႉ မီးၸၢၵ်ႈၵေႃႈဢမ်ႇမီးၵူၼ်းႁေႃႈ ဢမ်ႇမီးၵူၼ်း ယိပ်းမၼ်းယဝ်ႉဢေႃႈၼႆႉ ဢၢႆႈၸၢႆးႁဝ်းသမ်ႉလႆႈၵႂႃႇႁဵတ်းၵၢၼ်ပႅတ်ႈ ယဝ်ႉဢေႃႈ”
“ပေႃႈလုင်းႁဝ်းၶႃႈမီးလွင်ႈယၢပ်ႇၽိုတ်ႇၸိူင်ႉႁိုဝ်ၶႃႈ လႆႈႁပ်ႉၵၢၼ်ပိူၼ်ႈ ဝႆႉၶႃႈႁႃႉ”
“ၸႂ်ႈဢေႃႈ ၶႃႈဝႃႈပေႃးပီႈသၢႆၶိူဝ်းယဝ်ႉတီႈၼႆႈယဝ်ႉၼႆ ၶႃႈၵေႃႈၶႂ်ႈ ယွၼ်းဢႃးၵူဝ်း ပီႈသၢႆၶိူဝ်းၵႂႃႇၶုတ်းၶၢတ်းပၼ်သေၶႃႈဝႃႈၼႆ”
“ဢေႃႈလႆႈၶႃႈဢေႃႈ ၵူၼ်းၶဵင်ႇဢႃးၵူဝ်းၵၼ်ၶႃႈလူင် ပေႃႈလုင်းၵေႃႈ ၶႃႈၵေႃႈၸမ်ယဝ်ႉယဝ်ႉၼင်ႇၵဝ်ႇၶႃႈဝႃႈ။ ၶွင်ၶႃႈၵေႃႈ သမ်ႉဢဝ်ၵၢတ်ႈ ပႅတ်ႈပဵၼ်လၢႆဝၼ်းယဝ်ႉၶႃႈၼႃႇ သင်ၼၼ်တႄႉယဝ်ႉၸဵမ်လႂ်ယဝ်ႉၶႃႈ ဝႃႈၼႆႉ”
“ၶႃႈၵေႃႈၸင်ႇႁႃႁူႉၵူၺ်းဢေႃႈၼႆႉ မိူဝ်ႈဢွၼ်တၢင်းၶႃႈမႃးတီႈၼႆႈ မႃး ထၢမ်ၵူၼ်းႁဵတ်းၵၢၼ်ၵေႃႈဝႃႈ ပေႃႈလဵင်ႉဢမ်ႇမႃးတီႈၼႆႈမီးသီႇႁႃႈဝၼ်း ယဝ်ႉၶႃႈၼႆဝႃႈ ၵမ်းၼႆႉတႄႉႁၢႆလီယဝ်ႉၼေႃႈ”
“ဢေႃႈၶႃႈ မေႃယႃၶဝ်လၢတ်ႈမႃးတႄႉဝႃႈ ယႃႇၽူမ်ႈယွင်ႈဢၼ်ၼၵ်း ယႃႇပေႃးႁဵတ်းၵၢၼ်ဢၼ်ၼၵ်းၼႆယူႇဢေႃႈ ၵူၺ်းၼႃႇ ႁဵတ်းၵႂႃႇလွႆးလွႆး ၵေႃႈဢမ်ႇပဵၼ်သင်ၼင်ႇၵဝ်ႇၶႃႈ။ ဢၼ်ပေႃႈလုင်းႁပ်ႉၵၢၼ်ၶဝ်ဝႆႉၼႆႉ သမ်ႉမီးတၢင်းလႂ်ၶႃႈလႃႇ”
“မီးတီႈမႆႉၼိဝ်ႉယဝ်ႉၵေႃႈတီႈပူင်းၶေႇၼေႈ”
“ဢေႃႈလႆႈယူႇၶႃႈပေႃႈလုင်း ဢမ်ႇပဵၼ်သင်ၶႃႈၵူၺ်ႉ လၢတ်ႈၵၼ်ဝႆႉ ယဝ်ႉၶႃႈလူး ဝႃႈဢမ်ႇလူဝ်ႇဢၢၼ်းၼႃႇၵၼ်ၼႆၼႃႇၶႃႈၼေႃႈ တီႈၼႆႈ ၵေႃႈ ထႅင်ႈမိူဝ်ႈၼႆႉမိူဝ်ႈၽုၵ်ႈၶႃႈၵႂႃႈ”
“ဢေႃႈၶႃႈလီယဝ်ႉပေႃးၼၼ် ၶႃႈယွၼ်းပွၵ်ႈမိူဝ်းၵွၼ်ႇၼႃႉ”
“ဢေႃႈၶႃႈ ပေႃးၶႃႈယဝ်ႉယဝ်ႉၼႆ ၶႃႈၸင်ႇမိူဝ်းလေႇၶႃႈၼႃ”
မၼ်းၸၢႆးၵေႃႈသိုပ်ႇၶုတ်းၼွင်မၼ်းတေႃႇပေႃးယဝ်ႉသေ ၶမ်ႈၼႆႉမၼ်း ၸၢႆးၵိုတ်းၸၢၵ်ႈၵႃးၶုတ်းမၼ်းသေ ပႆၶဝ်ႈႁိူၼ်းမႃးယဝ်ႉ ၼၢင်းၸၢမ်ၶမ်း ႁၢင်ႈႁႅၼ်းၶဝ်ႈၽၵ်းဝႆႉသေ မၼ်းတၢင်းတိုၵ်ႉဢၢပ်ႇၼမ်ႉယဝ်ႉဢွၵ်ႇမႃး ယူႇလႄႈ။
“ၸၢမ်ၶမ်းပေႃးၼွင်ႉလၢႆႈၶူဝ်းယဝ်ႉၼႆ ၼွင်ႉႁူမ်ႈဝႆႉသၢႆမၢႆၶၢဝ်းယၢမ်းၵႃး ၶုတ်းၼႆႉလူး ၼေႈၼႆႉသမ်ႉပဵၼ်တႃႇမိူဝ်ႈၼႆႉဢိူဝ်ႈၼႃႉ”
“ဢေႃႈၶႃႈ ၵႂႃႇဢၢပ်ႇၼမ်ႉၵမ်းလဵဝ်ၶႃႈလႃႈ ၵမ်ႉၵိၼ်ၶဝ်ႈဢေႃႈ ၼွင်ႉ ပေႃးႁႅၼ်းဝႆႉယဝ်ႉၼႆႉ”
မၼ်းၼၢင်းတႄႉ ၼင်ႈႁဵတ်းသၢႆမၢႆမၼ်းယူႇ၊ ၸၢႆးသၢႆၶိူဝ်းဢၢပ်ႇၼမ်ႉ ယဝ်ႉသေ ဢွၼ်ၵၼ်မႃးၼင်ႈၵိၼ်ၶဝ်ႈယူႇ။
“လုင်းၸၢႆးသၢမ်မႃးႁဵတ်းသင်ၶႃႈၼၼ်ႉ ၶဝ်လူဝ်ႇၸႂ်ႉၵႃးၶုတ်းၶႃႈယူဝ်ႉ”
“လူဝ်ႇၸႂ်ႉၼႆၵေႃႈ ဢမ်ႇဝႃႈၼင်ႇၵဝ်ႇ မၼ်းဝႃႈလုၵ်ႈၸၢႆးမၼ်းၵေႃႉ ဢၼ်ႁေႃႈမႅၵ်ႉၶူဝ်းၼႆႉ လႆႈၵႂႃႇႁဵတ်းၵၢၼ်ပႅတ်ႈယဝ်ႉဢေႃႈၼႆႉ လိူၵ်ႈ လိူၵ်ႈသမ်ႉလႆႈႁပ်ႉၵၢၼ်ပိူၼ်ႈဝႆႉၼႄႈ သင်ၼၼ်တေၶႂ်ႈဢႃးၵူဝ်းပီႈသၢႆ ၶိူဝ်းၵႂႃႇၸွႆႈၶုတ်းပၼ်ဢိတ်ႉၼိုင်ႈၼႆဝႃႇ လႆႈဢေႃႈ ၵူၼ်းၶဵင်ႇဢႃးၵူဝ်း ၵၼ်လူး ပီႈဝႃႈၼႆ ဢေႃႈၼွင်ႉႁဵတ်းသၢႆမၢႆမိူဝ်ႈၵႆႈၼႆႉ မႅၼ်ႈတႃႇငိုၼ်းၵႃႈ ႁိုဝ်ၼၼ်ႉ”
“ဢိုဝ်း သၢင်ႉငိုၼ်းတႄႉၼွင်ႉဢမ်ႇႁူႉၶႃႈလေႃႇ ၼွင်ႉတမ်ႉဢမ်ႇႁူႉဝႃႈ ၼိုင်ႈပၢတ်ႈၵႃႈႁိုဝ်ၶႃႈလူး”
“ၼိုင်ႈပၢတ်ႈသၢမ်မိုၼ်ႇႁႃႈၼႆဝႃႇ”
“မီးလၢႆပၢတ်ႈၼၼ်ႉ”
“သၢမ်သိပ်းႁူၵ်းပၢတ်ႈ”
“ၵုၼ်းတူၺ်းလေႃႇ ၵူၼ်းယဝ်ႉၸၼ်ႉသိပ်းၶဝ်”
“ႁိုဝ်ႉ ပီႈသၢႆၶိူဝ်းၵေႃႉၵုၼ်းၶႃႈလႄႈ ပေႃးၼၼ်ပီႈသၢႆၶိူဝ်းယဝ်ႉၵျွင်းမိူင်း ထႆးသေၵွၼ်ႇ”
“ဢႃၼွင်ႉၵေႃႉႁဵတ်းလႃႈ” ၸၢမ်ၶမ်းတိုၵ်ႉၵုၼ်းတိုၵ်ႉၸႅၵ်ႇယူႇ ၸၢႆးသၢႆ ၶိူဝ်းၸင်ႇဝႃႈ “မႅၼ်ႈတႃႇသိပ်းသွင်သႅၼ်ပၢႆႁူၵ်းမိုၼ်ႇၸွင်ႇၸႂ်ႈ”
“ၵမ်ႉလေႃႇ ဢေႃႈၸႂ်ႈယဝ်ႉဝႃႈ ဢႃ ပီႈသၢႆၶိူဝ်းတိုၵ်ႉၸႂ်ႉၸၢၵ်ႈၼပ်ႉ”
“ပီႈၸၢင်ႈမီးၸၢၵ်ႈၼပ်ႉတီႈလႂ် ပီႈလၢမ်းဝႃႈၼၼ်ၵူၺ်းဢိူဝ်ႈ”
“ၵျႃႉၶႅၼ်ႇတေႉတၢၼ်ႇတင်းပဵၼ်ၸဝ်ႈမႅၵ်ႉၶူဝ်းယူႇဢေႃႈၸိူင်ႉၼႆတႄႉ”
“ၸႂ်ႈတေႉဢိူဝ်ႈ ဢၼ်ၶွင်ပိူၼ်ႈႁဵတ်းႁၢင်ႈၼႆၵူၺ်းဢိူဝ်ႈၼၼ်ႉ”
“ဝႃႈလႃးၵေႃႈဢီးပၢၵ်ႈပႅတ်ႈသေဢၢပ်ႈပၼ်ပိူၼ်ႈသေယဝ်ႉႁႃႈတေႃႈ”
“ပေႃးလႃႈ..”
“ၵုမ်ႇထဵင်ၵၼ်ယူႇၸိူင်ႉၼႆပႆႇယဝ်ႉၵူၺ်ႉ လူဝ်ႇမိူဝ်းလႄႇႁိူၼ်းလုင်းၸၢႆး သၢမ်ၶဝ်ထႅင်ႈၼေႈ”
“မႃးၼွင်ႉၵေႃႉႁေႃႈၵႃးၼႆသေ ပႃးၵၼ်မႃးတီႈႁိူၼ်းလုင်းၸၢႆးသၢမ် ၼၼ်ႉယဝ်ႉ။ မႃးသွၼ်ႇပၼ်သၢႆမၢႆသဵင်ႈသဵင်ႈသေ လုင်းၸၢႆးသၢမ်ၸင်ႇ ဝႃႈ
“ဢမ်ႇဢဝ်ပဵၼ်တၢၼ်ႇၼၼ်ႉသႄႈ ႁေႃႈၵေႃႈၸၢႆးသၢႆၶိူဝ်းၵေႃႉႁေႃႈ ၼမ်ႉမၼ်းၵေႃႈၸၢႆးသၢႆၶိူဝ်းၵေႃႉသႂ်ႇ ၸွင်ႇပိူၼ်ႈတီႈလႂ်ၵေႃႈဢမ်ႇၸႂ်ႈ ယေႃႈဢဝ်ဝႆႉၶိုၼ်းလႄႈၼႆႉ ၶႃႈဢမ်ႇဢဝ် ဢဝ်ၼႆႉၵူၺ်းယဝ်ႉဝႃႈ ၵူၼ်း ၶဵင်ႇဢႃးၵူဝ်းၵၼ်ၼႆၼႃႇ။ ႁဝ်းလူဝ်ႇဢႃးၵူဝ်း သူၵေႃႈၸၢင်ႈမီးထႅင်ႈ တင်းၼမ်မိူၼ်ၼင်ႇဝႃႈၼၼ်ႉယဝ်ႉ”
“ဢေႃႈၶႃႈပေႃးၼၼ်ၵေႃႈ ပေႃႈလုင်းႁဝ်းၵေႃႈဢမ်ႇလူဝ်ႇဢၢၼ်းၼႃႇ ႁဝ်းၶႃႈၼၼ်ႉၶႃႈၼႃႇၼေႃႈ ပေႃးၵုမ်ႇဢၢၼ်းၼႃႇၵၼ်ယူႇၵေႃႈ ၵၢၼ် ငၢႆႈၵေႃႈၸၢင်ႈပဵၼ် ၵၢၼ်ယၢပ်ႇၵႂႃႇၼၼ်ႉၶႃႈၼႃႇၼေႃႈ”
“ၼၼ်ႉယဝ်ႉဝႃႈ”
“ဢေႃႈၵႃးၶုတ်းၼၼ်ႉတႄႉ ၶႃႈတိုၵ်ႉဝႆႉယူႇတီႈပုၼ်ႉဢေႃႈၼၼ်ႉ ပေႃး တေၵႂႃႇၶုတ်းတီႈမႆႉၼိဝ်ႉယူႇၵေႃႈ ၸင်ႇၵွႆႈဢဝ်ပူၼ်ႉၵႂႃႇတီႈပုၼ်ႉၵမ်း လဵဝ်ႁေယဝ်ႉၶႃႈဝႃႈၼႆ ၵူၺ်းၵႃႈတေလႆႈၵႂႃႇဝၼ်းလႂ်ၼႆတႄႉၵေႃႈ ပေႃႈ လုင်းဢုပ်ႇတူၺ်းၶဝ်ထႅင်ႈၵမ်းၼိုင်ႈသေၶိုၼ်းပွင်ႇပၼ်ၶႃႈယဝ်ႉဢေႃႈ။ ႁဝ်းၶႃႈတေယွၼ်းပွၵ်ႈမိူဝ်းၵွၼ်ႇၶႃႈ ပေႃးမိူဝ်းၶမ်ႈၼႃႇၼႆၵူဝ်ၵူၼ်းတီႈ ႁိူၼ်းမွင်းၸၢမ်ၶမ်းဢေႃႈ”
“ၸႂ်ႈဢိူဝ်ႈၸႂ်ႈဢိူဝ်ႈ ၶွင်မဵဝ်းပႆႇယဝ်ႉပႆႇတူဝ်ႈၼႆႉလႆႈဝူၼ်ႉယၢပ်ႇဝႆႉတေႉ ဢိူဝ်ႈ လွႆးလွႆးလႄႈပေႃးၼၼ်”
“ဢေႃႈၶႃႈ” ၸၢႆးသၢႆၶိူဝ်းၶဝ်မိူဝ်းၵႂႃႇယဝ်ႉ။
လုင်းၸၢႆးသၢမ်တူၺ်းတၢင်းလင်မၼ်းသေဢၢမ်းယူႇဝႃႈ
“ဢိူဝ်ႈဢၢႆႈသၢင်ႇၼႆႉၵူၼ်းၼုမ်ႇဢွၼ်ႇၵူၺ်း လွင်ႈယူႇလွင်ႈသဝ်းလၢႆး ႁဵတ်းလၢႆးသၢင်ႈမၼ်းဢမ်ႇငၢႆႈလူးၼႆႉ ၵၢၼ်ၵေႃႈမေႃၸေးၵႆႉၵေႃႈၵႆႉ ဢိူဝ်ႈသၢင်ႇမွင်ႇတႄႉလႆႈလုၵ်ႈၶူၺ်လီယဝ်ႉမႂ်း မၼ်းတႄႉ” ၼႆယူႇႁင်း မၼ်း။
သိုပ်ႇလူတွၼ်ႈတေမႃးၶႃႈ
