ထႅင်ႈဝၼ်းၼိုင်ႈ ၼၢင်းၸေႃးယဵၼ်ႇၵေႃႈ ဢဝ်ၶၢဝ်းယၢမ်းဢၼ် တူဝ်တၼ်းၼၼ်ႉသေ မႃးယဵပ်ႉၶူဝ်းၸွမ်းၼၢင်းၶမ်းလိုၼ်းမိူၼ်ၵူႈဝၼ်း ၼၼ်ႉယူႇ၊ ၶဝ်သွင်ၵေႃႉတင်းယဵပ်ႉၶူဝ်းတင်းဢုပ်ႇၵၼ်ယူႇဢိၼ်းဢွၼ်း ဢိၼ်းဢႅၼ်းမိူၼ်ၼင်ႇၵူႈဝၼ်းၼၼ်ႉယူႇ။ ၼၢင်းၸေႃးယဵၼ်ႇၸင်ႇဝႃႈ
“သူၼႆႉၵေႃႈဝူၼ်ႉဢွၵ်ႇလၢတ်ႈဢွၵ်ႇမႃးလႆႈၸိူင်ႉႁိုဝ်ၵေႃႈဢမ်ႇႁူႉယဝ်ႉ မိူၼ်ၵၼ်ယဝ်ႉဝႃႈတင်းပႃႈ ပႃႈၵေႃႈဝႃႈ ႁႂ်ႈႁဝ်းတေႇၼႃႈႁိူၼ်းၸွမ်းပီႈ သၢႆၶိူဝ်းၼႆဝႃႇ”
ယၢမ်းၼၼ်ႉၼၢင်းၸၢမ်ၶမ်းမႃးငိၼ်းသေၼႅတ်ႈၵိုတ်းပႅပ်ႉဝႆႉယူႇလပ်ႉလပ်ႉသေပႂ်ႉထွမ်ႇထႅင်ႈယူႇ၊ ၼၢင်းၶမ်းလိုၼ်းၶိုၼ်းထၢမ်ဝႃႈ
“သူသမ်ႉၶိုၼ်းတွပ်ႇပႃႈဝႃႈႁိုဝ်လႃႇ”
“လုၵ်ႈဢမ်ႇမေႃလၢတ်ႈၶႃႈ ၼႆၵူၺ်းဢိူဝ်ႈလေႃႇ ၶွင်ႁဝ်းဢမ်ႇမေႃ လၢတ်ႈတေႉလူး”
ၼၢင်းၶမ်းလိုၼ်းႁူႉဝႃႈၼၢင်းၸေႃးယဵၼ်ႇဢမ်ႇပေႃးၶႂ်ႈလၢတ်ႈၼမ်ၼႆလႄႈ မၼ်းၼၢင်းၵေႃႈဢမ်ႇပေႃးထၢမ်ၼမ်ၼႆ ၼၢင်းၸေႃးယဵၼ်ႇၵေႃႈ ဝူၼ်ႉဝႃႈ ပေႃးလၢတ်ႈၼမ်ၵေႃႈဢမ်ႇပေႃးၶႂ်ႈသၢင်ႇထုၵ်ႇၼႆသေ ၸင်ႇ ဢမ်ႇပေႃးလၢတ်ႈၼမ်။
ၼၢင်းၸၢမ်ၶမ်းၵေႃႉၼိုင်ႈတႄႉ လႆႈငိၼ်း ၼၢင်းၸေႃးယဵၼ်ႇ လၢတ်ႈမႃးၸိူင်ႉၼၼ်ၼၼ်ႉသေယဝ်ႉ ဢဝ်မႃးပဵၼ်လွင်ႈၶမ်ၸႂ်လူင် မၼ်းၼၢင်းသေဝူၼ်ႉယူႇဝႃႈ “ဢေႃႈ ပီႈသၢႆၶိူဝ်းဢိူၺ် ဢၼ်ၼွင်ႉၵႂႃႇၵႂႃႇ ပႆပႆၸွမ်းပီႈယူႇၸိူင်ႉၼႆၼႆႉ ၵမ်းလိုၼ်းမႃးပိူၼ်ႈၸၢင်ႈထၢင်ႇၽိတ်းၼိူဝ် ၼွင်ႉသေ ဝၢႆးၼႆႉမႃးၼွင်ႉၸၢင်ႈလႆႈၼႃႈလဵၵ်ႉဢေႃႈၼႆၼႆႉ ၼွင်ႉၵိုတ်း ထၢင်ႇဝႃႈ ဢႃႉ ၵေႃႈယဝ်ႉလႃႈတေႃႈ ၼွင်ႉၵေႃႈတေၸွမ်းငဝ်းလၢႆးဢၼ် ပဵၼ်မႃးမီးမႃးၼၼ်ႉသေယူႇၵႂႃႇၵူၺ်းၵေႃႉလဵဝ်ၼွင်ႉသေ ဝႆႉၸႂ်ၵျေႃႇꧦ ၵႂႃႈ”
ၸၢႆးသၢႆၶိူဝ်းမႃးႁွင်ႉပွၵ်ႈလႂ်ပွၵ်ႈလႂ်ၵေႃႈ ဢမ်ႇဢမ်ႇၵႂႃႇ ၵမ်ႉဝႃႈဢမ်ႇ တၼ်း၊ ၵမ်ႉဝႃႈပဵၼ်ၼၼ်ပဵၼ်ၼႆယူႇၵူႈဝၼ်းၵူႈဝၼ်းယဝ်ႉ။ ၸၢႆးသၢႆ ၶိူဝ်းၵေႃႈဢမ်ႇႁူႉလွင်ႈႁူႉတၢင်းသေ ယူႇယူႇမႃးပဵၼ်ၸိူင်ႉၼႆၵႂႃႇလႄႈ မၼ်းၸၢႆးမႃးႁေႃႈၵႃးၶုတ်းၼွင်ယူႇၵေႃႈဢမ်ႇလႅပ်ႈမီးႁႅင်းၸႂ်သေဢိတ်းၼၼ်ႉယဝ်ႉ၊ ပေႃးမၼ်းၸၢႆးတူၺ်းႁၼ်မႅၼ်ႈ တူၼ်ႈမွၵ်ႇတူၼ်ႈမႆႉၸိူဝ်း ဢၼ်ၸၢမ်ၶမ်းၵေႃႉၽုၵ်ႇသွမ်ႈဝႆႉၸိူဝ်းၼၼ်ႉယေႈၶႅၼ်းဝူၼ်ႉဢမ်ႇပွင်ႇယဝ်ႉ။ မၢင်ဝၼ်းဝၼ်းမႃးၼင်ႈငဝ်ယူႇၸိူင်ႉၼၼ်သုတ်းပဵၼ်ဝၼ်းပဵၼ် ဝၼ်းၵေႃႈမီးယဝ်ႉ၊ ၶဝ်ႈၵေႃႈဢမ်ႇၵိၼ်မီးမႃးလၢႆဝၼ်းယဝ်ႉ၊ မႃးထိုင် ႁိူၼ်းယဝ်ႉၼႆၵေႃႈ ဢမ်ႇလၢတ်ႈၵႂၢမ်းသင်။ ဢမ်ႇလၢတ်ႈတေႃႇၽႂ် ပူၼ်ႉ ၶဝ်ႈၼႂ်းလုၵ်းၼွၼ်း ၼွၼ်းပႅတ်ႈႁဵတ်းၼၼ်လၢႆဝၼ်းယဝ်ႉ မႄႈၶဝ်ႁၼ် ၸိူင်ႉၼၼ်မႆႈၸႂ်ၸွမ်းသေ
“ဢၢႆႈလုၵ်ႈ ဢၢႆႈလုၵ်ႈ”
“ဢေႃႈၶႃႈ မႄႈ”
“လုၵ်ႈပဵၼ်သင်လႃႇ”
“လုၵ်ႈဢမ်ႇပဵၼ်သင်ၶႃႈမႄႈ”
“ပိုတ်ႇၽၵ်းတူပၼ်မႄႈလူး”
“မႄႈၶႃႈလုၵ်ႈၶႂ်ႈယူႇႁင်းၵူၺ်းဢေႃႈ”
“ဢမ်ႇလႆႈၼႃလုၵ်ႈ မႄႈမႆႈၸႂ်ဢိူဝ်ႈ”
မၼ်းၸၢႆးၵေႃႈ ၵွပ်ႈဝႃႈၵူဝ်မႄႈၶဝ်မႆႈၸႂ်ပဵၼ်ၸႂ်ဢမ်ႇလီၼႆလႄႈ လုၵ်ႉ မႃးပိုတ်ႇၽၵ်းတူသေယဝ်ႉ ၶိုၼ်းမႃးၼွၼ်းငူပ်ႉၼႃႈဝႆႉယူႇ မႄႈၶဝ်မႃး ၼင်ႈႁိမ်းမၼ်းၸၢႆးသေ
“လုၵ်ႈပဵၼ်သင်လၢတ်ႈၼႄမႄႈလူး”
“လုၵ်ႈဢမ်ႇပဵၼ်သင်ၶႃႈမႄႈ လုၵ်ႈႁေႃႈၵႃးၶုတ်းသေ ၶုတ်းၼွင်ႁိူဝ်ႉ ၼႃႇလႄႈ လုၵ်ႈၶႂ်ႈလိုဝ်ႈလီလီၵူၺ်းၶႃႈ”
“ဢမ်ႇၸႂ်ႈယူဝ်ႉလုၵ်ႈ ၶဝ်ႈၵေႃႈလုၵ်ႈဢမ်ႇၵိၼ်ပဵၼ်လၢႆဝၼ်းယဝ်ႉ”
“လုၵ်ႈဢမ်ႇတွင်ႉမႆႈၶႃႈမႄႈ”
မႄႈၶဝ်ၵေႃႈ ဢမ်ႇၸၢင်ႈဝႃႈႁိုဝ် ၵွမ်ႉၵူၺ်းလႆႈ လၵ်ႉမႆႈၸႂ်ၸိူင်ႉၼၼ် ၵူၺ်းယဝ်ႉ။ မိူင်းလႅင်းယဝ်ႉမၼ်းၸၢႆးလုၵ်ႉမႃးသေ
“ၼၢင်းၸေႃးယဵၼ်ႇၸွင်ႇတေၵႂႃႇလႂ်ႁႃႉ”
“ဢမ်ႇၵႂႃႇလႂ်ၶႃႈ”
“ပေႃးဢမ်ႇၵႂႃႇလႂ်ၵေႃႈ ၶႃႈတေဢဝ်လူတ်ႉၶိူင်ႈၵႂႃႇၵမ်ႉၼိုင်ႈၼႃႉ”
“သေႃးလူတ်ႉမီးၼိူဝ်ၽိူၼ်ၼႆႉၶႃႈၼေႈ” ၼႆမၼ်းၸၢႆးမႃးဢဝ်သေႃးသေၶီႇလူတ်ႉဢွၵ်ႇၵႂႃႇယဝ်ႉ။ မၼ်းၸၢႆးၵေႃႈ ၵွပ်ႈဝႃႈၵုမ်ႇဝူၼ်ႉၶူၼ်ႉၶိုၼ်းသေယဝ်ႉ ဝူၼ်ႉထၢမ်ၶိုၼ်းတူဝ်ၵဝ်ႇသွၵ်ႈ ႁႃတူၺ်းလွင်ႈၽိတ်းပိူင်ႈၼႆႉ ၸဝ်ႈၵဝ်ႇလႆႈႁဵတ်း လႆႈလၢတ်ႈမႅၼ်ႈၵႂႃႇ သေဢၼ်ဢၼ်ယူႇႁိုဝ် မိူၼ်ႁၢင်ႈဢမ်ႇတွၼ်ႉလႆႈႁဵတ်းလႆႈလၢတ်ႈသေ ပွၵ်ႈၼေႃၼႆယူႇ။ တင်းၶိုၼ်းတင်းဝၼ်းၵေႃႈ ဢမ်ႇႁၼ်ၶေႃႈတွပ်ႇသင် ၼႆသေ ဢမ်ႇပဵၼ်လပ်းပဵၼ်ၼွၼ်းလၢႆၶိုၼ်းယဝ်ႉလႄႈ ၶဝ်ႈၵေႃႈဢမ်ႇ ၵိၼ် မိူၼ်ႁၢင်ႈၶႂ်ႈလိုမ်းတူဝ်ၵႂႃႇပဵၼ်ၵမ်းပဵၼ်ၵမ်းၵေႃႈမီးလႄႈ ႁွတ်ႈမႃး တီႈၶူဝ်တေႃးၼိူဝ်သဵၼ်ႈတၢင်းၶဝ်ႈဝဵင်းၼႆႉယဝ်ႉၵေႃႈ ၵူၵ်ႉၵၢၵ်ႉၼႆသေ မၼ်းၸၢႆးတႄႉဢမ်ႇႁူႉတူဝ်ယဝ်ႉ။ လူတ်ႉမၼ်းၽၢႆႇတၢင်းၼႃႈၼၼ်ႉ လႅဝ်မူတ်းယဝ်ႉလႄႈ ၵေႃႉလႂ်မႃးႁၼ်ၵေႃႈ ၵိုတ်းထၢင်ႇဝႃႈမၼ်းတၢႆယဝ်ႉ ၼႆသေ ၽႂ်ဢမ်ႇႁတ်းၸွႆႈ ဢွၼ်ၵၼ်တူၺ်းသေပူၼ်ႉၵႂႃႇပူၼ်ႉၵႂႃႇၵူၺ်း။
တီႈႁိူၼ်းၼႆႉသမ်ႉ ပႃႈသူၺ်ႇၼူႉပဵၼ်ၸႂ်ဢမ်ႇလီၸွမ်းလုၵ်ႈ ၸၢႆးမၼ်းသေ မႃးတီႈၸၢမ်ၶမ်းၼႆႉယဝ်ႉ။
“ၸၢမ်ၶမ်း သူမေႃးၵၼ်တင်းပီႈသၢင်ႇသူႁႃႉလုၵ်ႈ”
“ဢမ်ႇမေႃးသင်ၵၼ်ၶႃႈပႃႈ ႁဝ်းၶႃႈဢမ်ႇၺႃးၵၼ် ဢမ်ႇလႆႈလၢတ်ႈ တေႃႇၵၼ်လၢႆဝၼ်းယဝ်ႉဢေႃႈ”
“ဢိူဝ်ႈပႃႈတူၺ်းမၼ်းပႅၵ်ႇပိူင်ႈၼႃႇယဝ်ႉ ၶဝ်ႈၵေႃႈဢမ်ႇၵိၼ်ၼႆၼေႈ ၼႂ်ၼႆႉၵေႃႈဢွၵ်ႇႁိူၼ်းၵႂႃႇထႅင်ႈယဝ်ႉ ဢဝ်လူတ်ႉၶိူင်ႈၵႂႃႇ ႁေႃႈဝႆးဝႃႈဝႆး ၼႆဝႃႇမႂ်း ပႃႈဝႃႈတႃႉလုၵ်ႈဢွၵ်ႇၵႂႃႇၸွမ်းတူၺ်းမၼ်းဢိတ်ႉၼိုင်ႈလူး ပႃႈ မႆႈၸႂ်ၼႃႇ”
ၼၢင်းၸၢမ်ၶမ်းၵေႃႈပေႃးတေဝႃႈဢမ်ႇသႅင်ႇသင်ၵၼ်တင်းလုၵ်ႈၶႃႈလူး ၸိုင်ပႃႈဢမ်ႇၸႂ်ႉၼၢင်းၸေႃးယဵၼ်ႇၵႂႃႇၶႃႈလႃႇၼႆၵေႃႈ သမ်ႉဢမ်ႇၶႂ်ႈဝႃႈ မၼ်းၼၢင်းၸင်ႇဝႃႈ “လႆႈၶႃႈဢေႃႈ လုၵ်ႈတေၵႂႃႇၵမ်းလဵဝ်ယဝ်ႉၶႃႈ” ႁေႃႈၵႃးမၼ်းဢွၵ်ႇႁိူၼ်းၵႂႃႇယဝ်ႉ။
ၽႅဝ်မႃးတီႈၶူဝ်တေႃးၼႆႉယဝ်ႉ ႁၢၼ်ၶဝ်တိုၵ်ႉယွင်ႈလူတ်ႉၶိူင်ႈ လမ်းၼိုင်ႈၶိုၼ်ႈတၢင်ႇၵႃးယူႇ၊ တူဝ်ၵူၼ်းၸဵပ်းတႄႉဢမ်ႇႁၼ် လူတ်ႉ ၶိူင်ႈၼၼ်ႉၵေႃႈ မၼ်းၼၢင်းဢမ်ႇတွင်းလႆႈ ဢမ်ႇႁူႉဝႃႈပဵၼ်လူတ်ႉၽႂ် ၼႆသေ ပူၼ်ႉမႃးတီႈၶွၵ်ႈမူၼႆႉယဝ်ႉ။
“ပီႈၼၢင်းၶႃႈ ပီႈသၢႆၶိူဝ်းပႆႇမႃးၶႃႈႁႃႉ”
ၵူၼ်းႁဵတ်းၵၢၼ်ၼၼ်ႉဝၢႆႇမႃးသေ “ဢေႃႈပေႃႈလဵင်ႉတႄႉပႆႇႁၼ်မႃးၶႃႈမႄႈလဵင်ႉ”
“မိူဝ်ႈဝႃးၸွင်ႇမၼ်းမႃးတီႈၼႆႈၶႃႈႁိုဝ်”
“မႃးၶႃႈဢေႃႈ မႃးၵူႈဝၼ်းယဝ်ႉၶႃႈဝႃႈ ၵူၺ်းၼႃႇမၼ်းဢမ်ႇပေႃးလၢတ်ႈ သင်ၵူၺ်းဢေႃႈ။ ၶဝ်ႈၵေႃႈဢမ်ႇၵိၼ်ၶႃႈဝႃႈၼႆၼေႈ မိူဝ်ႈဝႃးၼႆႉၶႃႈထၢမ် မၼ်းဝႃႈ မႄႈလဵင်ႉဢမ်ႇမႃးၶႃႈၼႄႇပေႃႈလဵင်ႉၼႆ မၼ်းၵေႃႈဝႃႈဢမ်ႇ မႃးၶႃႈ ၼႆၶေႃႈလဵဝ်ၵူၺ်းၶႃႈၼေႈ”
“ဢေႃႈၶႃႈ ၶႃႈတေပွၵ်ႈမိူဝ်းၵွၼ်ႇပေႃးၼၼ်”
“ဢေႃႈၶႃႈ ဢေႃႈၶႃႈ”
တီႈႁူင်းယႃၼႆႉသမ်ႉ ႁၢၼ်ၵေႃႉၼိုင်ႈ သင်ႇလၢတ်ႈဝႆႉပၼ်တီႈ မေႃယႃၶဝ်ဝႃႈ “ၵူၼ်းၸဵပ်းၵေႃႉၼႆႉ ပဵၼ်ပေႃႈလဵင်ႉၸဝ်ႈသူၼ်မူ ပဵၼ် လုၵ်ႈၶူၺ်လုင်းသၢင်ႇမွင်ႇ ပွၵ်ႉတူၵ်းၶႃႈၼႃ ယွၼ်းႁႂ်ႈဝႆႉပၼ်ၼႂ်းၶွင်ႉၶိုၵ်ႉ တွၼ်းၼၼ်ႉၶႃႈၼႃႉ ၸူဝ်ႈပီႈၼွင်ႉမၼ်းပႆႇမႃးထိုင်ၼႆႉ ဢႃးၵူဝ်းၸွႆႈ တူၺ်းပၼ်လီလီဢိတ်ႉၼိုင်ႈ ၵႃႈၸႂ်ႉၸၢႆႇတႄႉယႃႇမႆႈၸႂ်ၶႃႈၼႃႉ”
ႁၢၼ်ၶဝ်မိူဝ်းၵႂႃႇယဝ်ႉ ၼၢင်းၸၢမ်ၶမ်းဝူၼ်ႉယူႇ “ဝႃႈလႃးၵေႃႈလူတ်ႉ ၶိူင်ႈလမ်းဢၼ်ႁၢၼ်ၶဝ် ယွင်ႈၶိုၼ်ႈၵႃးယူႇမိူဝ်ႈၵႆႈၼၼ်ႉ ပဵၼ်လူတ်ႉ ပီႈသၢႆၶိူဝ်းတေႉႁႃႉ” မၼ်းၼၢင်းမႃးၶျွင်းတူၺ်း တီႈၼႂ်းႁူင်းယႃၵေႃႈ ဢမ်ႇႁၼ် ၶိုၼ်းပွၵ်ႈမႃးတီႈႁိူၼ်းၼႆႉသေ “ပီႈၸႃးယဵၼ်ႇၶႃႈ လူတ်ႉ ဢၼ်ပီႈသၢႆၶိူဝ်းၶီႇၵႂႃႇၼၼ်ႉ ပဵၼ်လူတ်ႉမဵဝ်းလႂ်ၶႃႈၼၼ်ႉ”
“လူတ်ႉလိမ်းသီသွမ်ႇ ပဵၼ်လူတ်ႉမိူင်းထႆးဢိူဝ်ႈၼွင်ႉ လူတ်ႉၵေႃႈတိုၵ်ႉ မႂ်ႇယူႇဢိူဝ်ႈ ပဵၼ်သင်လႃႇ”
“ဢမ်ႇပဵၼ်သင်ၶႃႈ ၼွင်ႉၵႂႃႇတူၺ်း တီႈသူၼ်ၵေႃႈဢမ်ႇႁၼ်ၼႆၼေႈ ၵူၺ်းၼႃႇ လူတ်ႉဢၼ်ႁၢၼ်ၶဝ် ယွင်ႈတၢင်ႇၵႃးယူႇမိူဝ်ႈၵႆႈၼၼ်ႉတႄႉ မိူၼ်ၼင်ႇ ပီႈၸေႃးယဵၼ်ႇလၢတ်ႈၼၼ်ႉယဝ်ႉဝႃႈ ၼွင်ႉၵႂႃႇတူၺ်းတီႈ ႁူင်းယႃၵေႃႈသမ်ႉဢမ်ႇႁၼ်”
“ၼွင်ႉဢမ်ႇထၢမ်တူၺ်းတီႈမေႃယႃၶဝ်ႁႃႉ”
“ဢိုဝ်း ၼွင်ႉဢမ်ႇလႆႈထၢမ်ၶႃႈ”
“မႃးႁဝ်းၵႂႃႇတူၺ်း တီႈလုမ်းႁၢၼ်ၶဝ် ၼွင်ႉၵႂႃႇသူင်ႇ ပီႈၸေႃးယဵၼ်ႇ လႄႈ ပီႈဢမ်ႇမီးလူတ်ႉယဝ်ႉလူး”
ၼၢင်းၸၢမ်ၶမ်းတူၺ်းၼၢင်းၸေႃးယဵၼ်ႇ လႅပ်ႈမႆႈၸႂ် တႃႇၸၢႆးသၢႆၶိူဝ်း ၼႃႇၼႆသေ ၶတ်းလူမ်းတေႉယဝ်ႈယူႇ ၼႂ်းၸႂ်မၼ်းၼၢင်းၼၼ်ႉယဝ်ႉ ၸင်ႇလၢတ်ႈဝႃႈ
“ပီႈၸေႃးယဵၼ်ႇ မႃးဢဝ်လူတ်ႉၼွင်ႉၼႆႉ ၶီႇၵႂႃႇႁင်းၵူၺ်းၶႃႈလႃႈ ၼွင်ႉ ၶၢၼ်ႉၵႂႃႇ။ ၼွင်ႉဢမ်ႇၵႂႃႇယဝ်ႉၶႃႈ ဢမ်ႇၸၢပ်ႈသႅင်ႇသင် တင်းၼွင်ႉ ယဝ်ႉ”
“ႁိူဝ်ႇ ၸၢမ်ၶမ်းၼွင်ႉသမ်ႉဝႃႈၼၼ်လႃႇ ၸူဝ်ႈသူမေႃးၵၼ်မႃးၼႆႉ မၼ်း ပေႃးဢမ်ႇၵိၼ်ၶဝ်ႈၵိၼ်ၼမ်ႉဢိူဝ်ႈၼႆႉ”
ၼၢင်းၸၢမ်ၶမ်းပႆႇတၵ်းသဵင် ယၢမ်းၼၼ်ႉႁၢၼ်ၵေႃႉၼိုင်ႈမႃးလၢတ်ႈဝႃႈ “ၼွင်ႉၸၢမ်ၶမ်း မိူဝ်ႈလဵဝ် ပီႈၸၢႆးသၢႆၶိူဝ်းလူမ်ႉလူတ်ႉသေ မီးတီႈႁူင်း ယႃဢိူဝ်ႈ”
ၽိူဝ်ႇလႆႈငိၼ်းၸိူင်ႉၼၼ်ယဝ်ႉတႄႉ ၼၢင်းၸၢမ်ၶမ်းၵေႃႈ ၵွပ်ႈဝႃႈမႆႈ ၸႂ်ၼႃႇလႄႈ ႁေႃႈၵႃးဢွၵ်ႇၵႂႃႇမိူဝ်ႈလႂ်ၵေႃႈဢမ်ႇတၼ်းႁူႉတူဝ်ယဝ်ႉ။
ၸၢႆးသၢႆၶိူဝ်းၼၼ်ႉ မေႃယႃၶဝ်လုမ်းလႃးယဝ်ႉသေ ၶၢႆႉၶဝ်ႈမႃးဝႆႉၼႂ်းႁွင်ႈ ၽိသဵတ်ႇၼႆႉယဝ်ႉ ၼၢင်းၸၢမ်ၶမ်းမႃးထိုင်ယဝ်ႉၵေႃႈ
“ၶဝ်ႈတူၺ်းၸွင်ႇလႆႈၶႃႈႁႃႉမေႃ”
“ၶႃႈလႆႈဢေႃႈ ၵူၺ်းၵႃႈၵူၼ်းၸဵပ်းတႄႉပႆႇႁူႉတူဝ်ၶႃႈၼႃ”
မၼ်းၼၢင်းပိုတ်ႇၽၵ်းတူ ၶဝ်ႈမႃးႁၼ်ၸၢႆးသၢႆၶိူဝ်း ပူၵ်ႉၼႃႈပူၵ်ႉတႃ ၼွၼ်းဝႆႉယူႇၼိမ်ၼိမ်မိူၼ်ၼင်ႇ ၵူၼ်းတၢႆၼၼ်ႉလႄႈ မၼ်းၼၢင်းၵေႃႈ ငိၼ်းဢီးလူ ငိၼ်းၶေႃးၶူမ် မွင်ၸႂ်ၼႃႇလႄႈ ယိူၼ်ႉၵၼ်ႈတၢၼ်ႇလႂ်ၵေႃႈ ဢမ်ႇလႆႈယဝ်ႉ မၼ်းၼၢင်းၵေႃႈ မႃးၵူမ်ႈၵွတ်ႇတူဝ်ၸၢႆးသၢႆၶိူဝ်းသေ ႁႆႈ ယူႇတင်းႁိုင်ယဝ်ႉ၊ ယၢမ်းၼၼ်ႉၸၢႆးသၢႆၶိူဝ်းတူင်ႉတူဝ်မႃးသေယဝ်ႉ။
“ၼႆႉပဵၼ်တီႈလႂ်”
“ပဵၼ်ႁူင်းယႃဢေႃႈ” မၼ်းၸၢႆးဢမ်ႇႁူႉဝႃႈပဵၼ်သဵင်ၼၢင်းၸၢမ်ၶမ်း ၵွပ်ႈမၼ်းၸၢႆးတေႃႉတႄႉငိၼ်းၵူၺ်းလႄႈ “ယႃႇပေႉယႃၶႃႈယဝ်ႉလႃႈမေႃ ၶႃႈဢမ်ႇၶႂ်ႈပဵၼ်ၵူၼ်းယဝ်ႉ ပွႆႇၶႃႈတၢႆႁေ လႃႈ”
“ပီႈသၢႆၶိူဝ်းၶႃႈ ၼႆႉပဵၼ်ၸၢမ်ၶမ်းဢေႃႈ ပီႈသၢႆၶိူဝ်းဢမ်ႇလႆႈငိၼ်းႁႃႉ”
“ယႃႇပေမႃးတူၺ်း ယႃႇမႃးယႃၶႃႈ ပွႆႇၶႃႈတၢႆႁေလႃႈၼႆယူႇ” ၵွပ်ႈလိူတ်ႈ ဢွၵ်ႇတင်းၶူႈၼင်မၼ်း ၸွမ်းဢူၵ်းၸွမ်းၶႅၼ်မၼ်းၸိူဝ်းၼႆႉၼမ်လႄႈ မဝ်းလိူတ်ႈၵေႃႈပိူင်ၼိုင်ႈ။ ယဝ်ႉၵေႃႈ ဢၼ်ၸၢမ်ၶမ်းၸဵပ်းၸႂ်ၼိူဝ်ၵဝ် ၵႂႃႇၼႆႉ သင်ဝႃႈၵဝ်လႆႈၽိတ်းၵႂႃႇသေလွင်ႈလွင်ႈၼႆၵေႃႈ ၵဝ်ၵေႃႉၸၢႆး ၼႆႉတေၵေႃႉဢဝ်ပုၼ်ႈၽွၼ်း သၢႆႈတႅၼ်းပၼ်ၶိုၼ်းၵႂႃႇၼႆသေ ၽုၼ်ႇ လုၵ်ႉမႃးၸၼ်ပႅတ်ႈသၢႆၶဵမ်တီႈမိုဝ်းမၼ်းလႄႈ ႁုၵ်ႉၸၼ်ပႅတ်ႈၽႅၼ်ႇ ပတ်ႉတီး ၸွမ်းႁူဝ်ၸွမ်းတူဝ်မၼ်းသေတေဢဝ်လွင်ႈၸဵပ်းသႅပ်ႇလွင်ႈ ၶၢၼ်ၸႂ်လႄႈ သၢႆၸႂ်ၸဝ်ႈၵဝ်ႇၼႆႉ သၢႆႈတႅၼ်းပၼ်ႁႂ်ႈၸၢမ်ၶမ်းပေႇၸႂ် ႁၢၼ်ႉၸႂ်ၼႆသေ လၢတ်ႈဢွၵ်ႇသူပ်းႁႅင်းႁႅင်းဝႃႈ “ဢၼ်ၼွင်ႉၶႂ်ႈပဵၼ် ၶႂ်ႈလႆႈၼၼ်ႉပႂ်ႉဢဝ်တဵမ်တဵမ်ထူၼ်ႈထူၼ်ႈလႄႈ ၸၢမ်ၶမ်းဢိူၺ်” ၼႆ သေ ပွႆႇတူဝ်မၼ်းပိၼ်ႈတူၵ်းၵူႇၵႂႃႇယဝ်ႉၵေႃႈ ဢမ်ႇႁူႉတူဝ်ယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ။
