ၶမ်ႈၼႆႉၵေႃႈ ပႃႈသူၺ်ႇၼူႉ ဝႆႉၽြႃးယဝ်ႉသေ
“ၸေႃးယဵၼ်ႇဢိူၺ်”
“ဢေႃႈၶႃႈပႃႈ”
“မႃးၼႆႉၵမ်ႉလူးလုၵ်ႈ ” ၼၢင်းၸေႃးယဵၼ်ႇမႃးယဝ်ႉ။
“ၼႆႉလုၵ်ႈမႃးၼူတ်ႈပၼ်လင်မႄႈၼႆႉဢိတ်ႉၼိုင်ႈလူး”
ၼၢင်းၸေႃးယဵၼ်ႇၵေႃႈ မႃးၼင်ႈတူပ်ႉၶဝ်ႇၶုပ်ႉၶဝ်ႇသေ ၼူတ်ႈပၼ်ပႃႈ ၶဝ်ယူႇ။ “မိူဝ်ႈလဵဝ်ပႃႈၶႂ်ႈပီးမႃးဢိတ်ႉၼိုင်ႈၶႃႈဢေႃႈၼႆႉ ၼိူဝ်ႉပႃႈပေႃး ၵႅၼ်ႇၵုၵ်းၵုၵ်းၶႃႈၼႆႉ”
“ၸႂ်ႈဢိူဝ်ႈ မိူဝ်ႈလဵဝ်ၶဝ်ႈၵေႃႈၵိၼ်ဝၢၼ်ၼႃႇ ၼွၼ်းၵေႃႈလပ်းလီၼႃႇ ၼေႈလုၵ်ႈၶႂ်ႈႁူႉ”
“ႁိုဝ်ႉ ပီႈသၢႆၶိူဝ်းၼၼ်ႉ ဝွင်ႇၽၵ်းတူတၢင်းႁူဝ်ၼွၼ်းမၼ်းၼၼ်ႉ ဢမ်ႇ လႆႈပိၵ်ႉၶႃႈလူးၼၼ်ႉ” မၼ်းၼၢင်းၶဝ်ႈမိူဝ်းပိၵ်ႉသေ “တူၺ်းလေႃႇ ပေႇတူဝ်ႇၶူဝ်းမၼ်းၵေႃႈဢမ်ႇတၼ်းပိၵ်ႉၼႆႉ” မၼ်းၼၢင်းမႄးပိၵ်ႉယဝ်ႉသေ ၶိုၼ်းမႃးၼူတ်ႈပၼ်ပႃႈၶဝ်ယူႇ။
“လုၵ်ႈလူဝ်ႇၵႆႉꧦတူၺ်းပႃးဢိူဝ်ႈ။ ၵူၼ်းၸၢႆးၼႆႉ ၶဝ်ၵႆႉယူႇဝူၺ်ႇၼႃႇ ၼေႈ”
“ဢူး ပီႈသၢႆၶိူဝ်းၼႆႉတႄႉဢမ်ႇယူႇဝူၺ်ႇ ဢမ်ႇမၢၵ်ႇမိူဝ်သင်ၶႃႈၵူၺ်းပႃႈ ပပ်ႉမၼ်းၶူဝ်းမၼ်းၸိူဝ်းၼၼ်ႉ သၢင်ႉဝႆႉ သိမ်းဝႆႉ ပဵၼ်မဵဝ်းပဵၼ်မဵဝ်း ဢေႃႈ။ ၼႂ်းၶွင်ႉၼွၼ်းမၼ်းၸိူဝ်းၼၼ်ႉ တိုၼ်းမူတ်းသႂ်ယူႇတႃႇသေႇ ဢေႃႈ။ ႁွမ်ၵေႃႈႁွမ်ၼႃႇ မၢင်ပွၵ်ႈလုၵ်ႈဝႃႈ တႃႉၶႂ်ႈၼွၼ်းတူၺ်းလႃႈ လုၵ်ႈဝႃႈၼႆ”
“ဢိုဝ်း ၼွၼ်းတူၺ်းႁေယဝ်ႉဢိူဝ်ႈ ပေႃးဢမ်ႇၵူဝ်ၸဝ်ႈပိူၼ်ႈမႃးလႃႇႁူဝ် လုၵ်ႈၵေႃႈ”
“ဢမ်ႇလႃႇၶႃႈလေႃႇပႃႈ ပီႈသၢႆၶိူဝ်းၸႂ်လီပေႃးတၢၼ်ႇၼၼ်ႉဢိူဝ်ႈ ၵူၺ်း ၼႃႇ ပႃႈၵေႃႈဢၢမ်းၵျႃႉမႂ်း တၢင်းၵျၢမ်ႇတၢင်းပွင် လၢႆးႁဵတ်းလၢႆးသၢင်ႈ တၢင်းၶတ်းၸႂ်လႄႈၼမ်ႉၸႂ်ၸိူဝ်းၼႆႉ မႃးပုတ်ႈဢဝ်လုင်းသူလီလီ မိူၼ် ဢဝ်လုင်းသူၵူႈမဵဝ်းၼႆႉမေႃႉ။ လုင်းသူၵေႃႈ ၸွင်ႇဢမ်ႇမိူၼ်ၼၼ်ႁိုဝ် ၼၼ်ႉ။ ၶဝ်ႈၽၵ်းၵေႃႈပိူၼ်ႈႁဵတ်းဝႆႉၸိူင်ႉႁိုဝ်ၵေႃႈၵိၼ်ၸိူင်ႉၼၼ် ပဵၼ် ၼၼ်ပဵၼ်ၼႆဝႃႇၼႆၵေႃႈ ဢမ်ႇတွၼ်ႉဝႃႈသေပွၵ်ႈ”
“ၸွင်ႇပႃႈၶဝ်ၵႆႉမေႃးၵၼ်ၶႃႈႁႃႉ”
“တၢင်းၽႂ်တၢင်းလုင်းသူႁႃႉ”
“ဢေႃႈ”
“ဢူး..ၸူဝ်ႈဢဝ်ၵၼ်မႃးတေႃႇပေႃးတၢႆၽၢတ်ႇၵၼ်ၼႆႉ ႁႂ်ႈၽိတ်းမေႃး ၵၼ်တႄႉတႄႉဝႃႈဝႃႈၼႆႉဢမ်ႇမီးသေပွၵ်ႈလႃႈ မိူဝ်ႈမႄႈပႃးတွင်ႉၼၼ်ႉ ၵူၺ်းဢိူဝ်ႈ ၵႆႉၸႂ်လမ်ႁင်းမၼ်း ၵူၺ်းၼႃႇၸႂ်လမ်ၵေႃႈၵမ်းဢွၼ်ႇၵူၺ်း ပေႃးၶိုၼ်းလၢတ်ႈတေႃႇၵၼ်ယဝ်ႉဝႃႈ။ ၽိူဝ်ႇထိုင်မၼ်းလၢတ်ႈဝႃႈ မႄႈ ပႃးတွင်ႉၼႆႉ ဢမ်ႇပေႃးလီၶႂ်ႈၸႃႉ ၸႂ်လမ်ႁင်းပိူၼ်ႈၵူၺ်ႉၼႃႉ သူၶႂ်ႈႁူႉ သင်ဝႃႈ မႄႈပႃးတွင်ႉၼၼ်ႉ ၸႂ်လမ်ႁင်းၵူၼ်းတၢင်ႇၵေႃႉၼႆႉ လုၵ်ႈ ဢွၼ်ႇတိုၵ်ႉယူႇဝႆႉၼႂ်းတွင်ႉၼၼ်ႉ ၸၢင်ႈၵိူတ်ႇမႃးလိူတ်ႈၸင်းသေ တေ ၸင်းၵေႃႉဢၼ် မႄႈမၼ်းၸႂ်လမ်တေႃႇၼၼ်ႉတေႃႇၸူဝ်ႈဢိူဝ်ႈ။ သမ်ႉ ဝႃႈမႄႈမၼ်းၼၼ်ႉ လႆႈၸႂ်လမ်ႁင်းပိူၼ်ႈၵႅပ်ႉဢွၼ်ႇၼိုင်ႈသေ ၶိုၼ်းလီ တေႃႇၵၼ်ယဝ်ႉၼႆသေတႃႉၵေႃႈ လုၵ်ႈဢွၼ်ႇၼၼ်ႉတႄႉ ဢမ်ႇၶိုၼ်း လီလႆႈၵူၺ်ႉၼႃၼႆဝႃႇ ဝၢႆးၼႆႉမႃးတႄႉပႃႈၵေႃႈဢမ်ႇႁတ်းၸႂ်လမ်ထႅင်ႈ မႄႈပႃးတွင်ႉၼႆႉသမ်ႉ ၵႆႉၸႂ်လမ်ငၢႆႈၼႃႇႁိုဝ်လႃႇမႃႈ။ ပိူၼ်ႈႁဵတ်းသင် ၵေႃႈပေႃးဢမ်ႇထုၵ်ႇမႅၼ်ႈၸႂ်သေမဵဝ်းယဝ်ႉဝႃႈ”
“လုၵ်ႈပႃႈၼၼ်ႉ သင်ဝႃႈလႆႈလဵင်ႉၼႆ ဢသၢၵ်ႈမၼ်းတေမီးမွၵ်ႈၵႃႈႁိုဝ် ၼႆႉၶႃႈၼၼ်ႉ”
“ယႂ်ႇလိူဝ်သၢႆၶိူဝ်းၼႆႉသၢမ်ပီယူဝ်ႉၼၼ်”
“သင်ၸိူဝ်ႉဝႃႈၶဝ်ပီႈၼွင်ႉ လႆႈမႃးယူႇၸွမ်းၵၼ်တႄႉၼေႃ”
“ဢႃး ၸႂ်ႈတေႉမႂ်း မႃးမႄႈလုၵ်ႉၵမ်ႉလူး” ၶဝ်ႈမိူဝ်းၼႂ်းလုၵ်းၼွၼ်းမၼ်း သေ “လုၵ်ႈမႃးၼႆႉလူး ၼေႈလုၵ်ႈၽုၺ်ႇတိူၵ်ႈႁူၺ်ႇၼႆႉလူး ႁိူဝ်ႈၼႆႉ” ဢဝ်သေႃးပၼ်ၼၢင်းၸေႃးယဵၼ်ႇပိုတ်ႇသေ
“မီးပပ်ႉလိၵ်ႈၵူၺ်းဢေႃႈ”
“ဢိူဝ်ႈဢဝ်မႃးတူၺ်းပပ်ႉၶဵဝ်ၶဵဝ်ၼႃၼႃၼၼ်ႉလူး”
“ပပ်ႉမၢႆတွင်းၼၢင်းသူၺ်ႇၼူႉၼႆၼႆႉၶႃႈႁႃႉ”
“ဢိူဝ်ႈၸႂ်ႈယဝ်ႉဝႃႈ”
“ဢေႃႈၶႃႈ” ပႃႈသူၺ်ႇၼူႉယိပ်းဢဝ်သေ
“မီးထႅင်ႈပပ်ႉၼိုင်ႈ ပဵၼ်သီလိူင် တၢင်းၼႃမၼ်းမွၵ်ႈၼႆႉၼင်ႇၵဝ်ႇ ၼၼ်ႉသမ်ႉ ပဵၼ်ပပ်ႉမၢႆတွင်းလုင်းသူဢိူဝ်ႈ ဢဝ်မႃးတူၺ်းထႅင်ႈလူး လုၵ်ႈဢၢၼ်ႇတူၺ်းလႄႈ” ၼႆသေ ၼၢင်းၸေႃးယဵၼ်ႇၽိုၼ်ႉဢၢၼ်ႇတူၺ်းမၢင်ၼိုင်ႈယဝ်ႉမၢင်ၼိုင်ႈယူႇ။
ၶမ်ႈၼႆႉ ၵႂႃႇပိတ်ႉမၢၵ်ႇၼင်တီႈဝၢၼ်ႈၼမ်ႉတိုင်းလႄႈ ဢမ်ႇလႆႈၵႂႃႇႁႃ လမ်းဝူဝ်း ဝူဝ်းၵေႃႈဢမ်ႇမႃးမူတ်း ၵိုတ်း 3 တူဝ် ၵိုတ်းဢီႇမူၼ်ႇလူင် လႄႈဢီႇသႅဝ်းၶႃမႄႈလုၵ်ႈၼႆၶႃႈဝႃႇ “ၸိူင်ႉၼႆၵေႃႈဝႃႈတႅမ်ႈဝႆႉဝႃႇၼေႃ”
“ၼႆႉသမ်ႉ” မိူဝ်ႈၼႆႉၵႂႃႇပၢတ်ႇၶဝ်ႈၼႃးလုင်းၽေႃးၵၶဝ် ၵႂႃႇၺႃးၵၼ် တင်းၼွင်ႉဢိင်ႇၵူၼ်းပုင်ႇၵိူဝ် ၼွင်ႉၶွင်ႇမိူင်းႁွင်း ၵူၼ်းပၢတ်ႇၶဝ်ႈလုင်း ၽေႃးၵႃႉၶဝ် မိူဝ်ႈၼႆႉမီး 38 ၵေႃႉ “ႁိူၺ်း တႃႉလီၶႂ်ႈၶူဝ်တေႉလႃႈၼေႃပႃႈ ၸိူင်ႉၼႆၵေႃႈတႅမ်ႈဝႆႉဝႃႈ”
“ပပ်ႉမၢႆတွင်းၼႆၼႃႇလုၵ်ႈၵေႃႈ လုၵ်ႈႁႃတူၺ်းတီႈဢၼ်လုင်းသူၼွၼ်းၾၼ်ၼၼ်ႉလူး”
“မၼ်းပဵၼ်လိၵ်ႈတႆးၵဝ်ႇ လုၵ်ႈဢမ်ႇပေႃးမေႃဢၢၼ်ႇၶႃႈၼႃပႃႈ ၼႆႉ သမ်ႉဝႃႈႁိုဝ်ၶႃႈၼႆႉ ၼွၼ်းၾၼ်လႆႈပဵၼ်မုၼ်ၸဝ်ႈ၊ ၼွၼ်းၾၼ်လႆႈ ၶီႇၸၢင်ႉ၊ ၼွၼ်းၾၼ်လႆႈႁႅမ်ပိူၼ်ႈတၢႆ၊ ၶမ်ႈၼႆႉ ၼွၼ်းၾၼ်ဝႃႈလုၵ်ႈ ၸၢႆးႁဝ်း မၼ်းလၢတ်ႈဝႃႈ ပေႃႈယႃႇမႆႈၸႂ်ၸွမ်းလုၵ်ႈၶႃႈၼႃႉ မိူဝ်ႈလဵဝ်ၼႆႉ ပႆႇၸႂ်ႈၶၢဝ်းယၢမ်း ဢၼ်တေလႆႈယူႇၸွမ်းပေႃႈလႄႈမႄႈ မိူဝ်ႈလႂ်ထိုင် ၶၢဝ်းယၢမ်းမၼ်းယဝ်ႉၼႆ လုၵ်ႈၸင်ႇၶိုၼ်းမႃးယူႇတႂ်ႈႁူမ်ႈငဝ်းမႅတ်ႉတႃႇ ပေႃႈတင်းမႄႈသေ တွပ်ႇပၼ်ၵုင်ႇမုၼ် ၵေႃႉပဵၼ်ပေႃႈလႄႈတင်းမႄႈ ၶိုၼ်းၶႃႈၼႃႉ မိူဝ်ႈလဵဝ်တႄႉ လုၵ်ႈယွၼ်းၽၢတ်ႇၵႂႃႇၵွၼ်ႇၶႃႈ”
ပႃႈသူၺ်ႇၼူႉၸင်ႇဝႃႈ “ဢၼ်ၼႆႉယဝ်ႉပႃႈဝႃႈ မၼ်းလီဢၢမ်းၼႃႇၼႆႉ တူၺ်းဝၼ်းမၼ်းၼၼ်ႉလူး ၸွင်ႇတေမိူၼ်ၵၼ်တင်းဢၼ်ပႃႈၼွၼ်းၾၼ်ၼႆႉႁႃႉ”
“ၶမ်ႈလိူၼ်ပႅတ်ႇမူၼ်းၼႆၶႃႈဝႃႇပႃႈ”
“ဢိူဝ်ႈဢၼ်ပႃႈၾၼ်ၼႆႉၵေႃႈ သမ်ႉမႅၼ်ႈၶမ်ႈလိူၼ်ပႅတ်ႇမူၼ်းၼင်ႇ ၵဝ်ႇၼႆႉ လုၵ်ႈဢမ်ႇဢၢၼ်ႇတူၺ်းလႃႇ”
ၼၢင်းၸေႃးယဵၼ်ႇဢၢၼ်ႇတူၺ်းဢၼ်လုင်းလႄႈပႃႈၼွၼ်းၾၼ်သေတႅမ်ႈမၢႆဝႆႉၼႂ်းပပ်ႉမၢႆတွင်းၽႂ်မၼ်းသေ ၶေႃႈၵႂၢမ်းၵေႃႈမိူၼ်ၵၼ် သမ်ႉဝႃႈပဵၼ်ဝၼ်းလဵဝ်ၵၼ်ထႅင်ႈၼႆလႄႈ မၼ်းၼၢင်းၼႅတ်ႈၸူမ်းသေ “ပေႃးၸိူင်ႉၼၼ် ယူဝ်ၶေးမၼ်းၶိုၼ်းမႃးၵိူတ်ႇပဵၼ်ပီႈသၢႆၶိူဝ်းၼႆႉယဝ်ႉ ၶႃႈယူဝ်ႉၼေႃပႃႈ”
“ဢိူဝ်ႈ ၼႆႉယဝ်ႉပႃႈၵေႃႈတိုၵ်ႉဝူၼ်ႉၵႂင်ယူႇၼႆႉ ပေႃးတူၺ်းၸွမ်းဢၼ် မၼ်းႁၵ်ႉပႃႈ ပေႃးဢမ်ႇၼူၵ်ႇဢမ်ႇတိုဝ် ဢမ်ႇတွပ်ႇဢမ်ႇထဵင်ၼႆႉတႄႉ လႅပ်ႈမိူၼ်ၼင်ႇဝႃႈ ပဵၼ်ၵွပ်ႈၵၢမ်ႇမႄႈလႄႈတင်းလုၵ်ႈၼၼ်ႉ ဢမ်ႇပႆႇ သုတ်းသဵင်ႈတီႈၵၼ်လႄႈ လႆႈယူႇၸွမ်းၵၼ် လုမ်းလႃးတွပ်ႇၵုင်ႇမုၼ် ၵၼ်ၶိုၼ်းႁိုဝ်ၼႆယူႇဢိူဝ်ႈ။ ဝႃႈလႃးၵေႃႈပေႃးတေႇၼႃႈႁိူၼ်း မီးလုၵ်ႈ မေးမႃးယဝ်ႉသမ်ႉဢမ်ႇမိူၼ်ၼႆယဝ်ႉႁိုဝ်ၼႆဢိူဝ်ႈ။ ဝၢႆးၼႆႉမႃးပေႃးလုၵ်ႈ ၵေႃႈသမ်ႉတေႇၼႃႈႁိူၼ်းၵႂႃႇပႅတ်ႈမႄႈသေယဝ်ႉ ပေႃးမီးၵၢၼ်ႁိူၼ်း ၵၢၼ်ယေးမႃးယဝ်ႉၼႆ ၵူဝ်ပိူၼ်ႈဢမ်ႇမႃးၸႂ်ယၢဝ်းမိူၼ်လုၵ်ႈဢိူဝ်ႈ”
“ဢူး လုၵ်ႈဢမ်ႇတေႇၶႃႈလေႃႇပႃႈ သင်ဝႃႈမီးၵေႃႉႁၵ်ႉၵေႃႉၵျိူၵ်ႈၼႆ ၵေႃႈ လုၵ်ႈဢၢၼ်းဢဝ်ပိူၼ်ႈမႃးၶိုၼ်ႈၶူၺ် ယူႇၸွမ်းပႃႈသေလုမ်းလႃး ပႃႈၵႂႃႇၵူၺ်းၶႃႈ ပဵၼ်ႁိုဝ်မႃးၵေႃႈ လုၵ်ႈတိုၼ်းတေဢမ်ႇပွႆႇပႅတ်ႈပႃႈၶႃႈ လုၵ်ႈတေလုမ်းလႃးပႃႈ မိူၼ်ၼင်ႇမႄႈၵေႃႉၼိုင်ႈသေ ယူႇၸွမ်းပႃႈၵႂႃႇ ၸိူင်ႉၼႆၵူၺ်းယဝ်ႉၶႃႈ”
“ဢိူဝ်ႈၵႂႃႇပိၵ်ႉၾႆးႁႃးသေ မႃးၼွၼ်းႁဵတ်းၵေႃႉမႄႈၼႂ်းလုၵ်းၼႆႉလႄႈ ပႃႈမီးလွင်ႈလူဝ်ႇဢုပ်ႇလုၵ်ႈထႅင်ႈဢိူဝ်ႈ”
မၼ်းၼၢင်းၵေႃႈၵဵပ်းပပ်ႉၸိူဝ်းၼၼ်ႉၶိုၼ်းသိမ်းဝႆႉယဝ်ႉ ပိၵ်ႉၾႆးသေ မႃးၼွၼ်းယူႇၽၢႆႇၶၢင်ႈပႃႈၶဝ်ၼႆႉယဝ်ႉ ။
“မႄႈဝႃႈတႄႉ တႃႉၶိူဝ်တေႇၼႃႈႁိူၼ်းၸွမ်းၵၼ်ႁေလႃႈလုၵ်ႈဢိူၺ်း”
“တင်းၽႂ်ၶႃႈ တင်းပီႈသၢႆၶိူဝ်းၶႃႈႁႃႉ”
“ဢိူဝ်ႈၸႂ်ႈဢိူဝ်ႈ”
“ဢူး ဢမ်ႇပဵၼ်လႆႈၶႃႈယူဝ်းပႃႈ ယူဝ်မၼ်းမီးတၢင်ႇၵေႃႉယဝ်ႉၶႃႈယူဝ်ႉ”
“ၸၢမ်ၶမ်းႁႃႉလုၵ်ႈၶႂ်ႈဝႃႈ”
“ၸႂ်ႈဢေႃႈ”
“ဢိူဝ်ႈ ၸွင်ႇတေပဵၼ်လႆႈႁႃႉ”
“ဢူး ပိူၼ်ႈတမ်ႉဢမ်ႇၽၢတ်ႇၵၼ်သေပွၵ်ႈၶႃႈလူးပႃႈၵေႃႈ လုၵ်ႈလႄႈ တင်းမၼ်းတႄႉတမ်ႉပႆႇဝႃႈၵႂၢမ်းမၢဝ်ႇၵႂၢမ်းသၢဝ်လွင်ႈႁၵ်ႉလွင်ႈပႅင်းလႃႈ လွင်ႈၵၢၼ်လွင်ႈငၢၼ်း လွင်ႈယူႇလွင်ႈၵိၼ်ၸိူဝ်းၼႆႉၵူၺ်းၵေႃႈ ႁႂ်ႈၼင်ႈ ဢုပ်ႇၵၼ်မွၵ်ႈႁႃႈမိၼိတ်ႉၼႆႉၵေႃႈ ပႆႇမီးသေပွၵ်ႈၶႃႈၵူၺ်ႉၼၼ်ႉ ပႃႈၶႂ်ႈ ႁူႉ”
ပႃႈၶဝ်ပေႃးလၵ်ႉလပ်းပႅတ်ႈမၼ်းၼၢင်းယဝ်ႉၼႆၵေႃႈ မၼ်းၼၢင်းၸင်ႇ ႁႃႁူႉသေယိုတ်းၶေႃႈၵႂၢမ်းမၼ်းပႅတ်ႈသေၼွၼ်းလပ်းၵႂႃႇယဝ်ႉ။
သိုပ်ႇလူဢၢၼ်ႇထႅင်ႈတွၼ်ႈတေမႃးၶႃႈ။
