ၸွမ်းၼင်ႇ ၶၢဝ်းယၢမ်းဢၼ် ဢမ်ႇဢဝ်ၵိုတ်းဝႆႉလႆႈ ဢမ်ႇပႂ်ႉ ၵူၼ်းႁဝ်းလႆႈၼၼ်ႉ ဝၼ်းၼိုင်ႈယဝ်ႉဝၼ်းၼိုင်ႈပူၼ်ႉၵႂႃႇ ပူၼ်ႉၵႂႃႇတိၵ်း တိၵ်းယဝ်ႉ။ ၸၢႆးသၢႆၶိူဝ်းၵေႃႈ ၸွမ်းၼင်ႇၵႂၢမ်းမႄႈၶဝ်ဝႃႈ ယႃႇၸႂ်တူၵ်း ယႃႇယွမ်းသုမ်းၵၢၼ်ႉၼႆၼၼ်ႉသေ ၶတ်းၸႂ်သိုပ်ႇႁၢင်ႈႁႅၼ်း လဵင်ႉမူ ထႅင်ႈၼႆလႄႈ သိုဝ်ႉမႃးထႅင်ႈႁဵတ်းႁူဝ်ႉလွမ်ႉဝႆႉ ႁႃၵူၼ်းမႃးပႂ်ႉဝႆႉဢမ်ႇ ပၼ်ၵူၼ်းတၢင်းၼွၵ်ႈၶဝ်ႈ ၸုပ်ႈၼႆႉတႄႉ မီးၼိုင်ႈပၢၵ်ႇတူဝ်ၼႆလႄႈ ၸင်ႇၵိုင်ႇတၢင်းဢဝ်လုၵ်ႈလဵင်ႉၼႆၼၼ်ႉယဝ်ႉ။
တူဝ်မၼ်းတႄႉ ဢမ်ႇလႆႈမႃးၼွၼ်းပႂ်ႉၼႆသေတႃႉၵေႃႈ ဢဝ် ႁဵတ်းပဵၼ်ၼႃႈၵၢၼ်လူင်ဢၼ်ၼိုင်ႈသေ ၵႂႃႇၵႂႃႇမႃးမႃးၸိူင်ႉၼၼ်ၵူၺ်း မီးမႃးလိူၼ်ပၢႆၸမ်သွင်လိူၼ်ယဝ်ႉ။
ၼၢင်းၸၢမ်ၶမ်းၵေႃႈ တေႃႈၼင်ႇၼၼ်ယဝ်ႉ မိူဝ်ႈၼႆႉဢမ်ႇၵႂႃႇၸွမ်းၸၢႆး သၢႆၶိူဝ်းၼႆၵေႃႈ ဢမ်ႇမီးသေဝၼ်း မၼ်းၼၢင်းၵေႃႈဝႆႉမိူၼ်ၼင်ႇၼႃႈ ၵၢၼ်လူင်ဢၼ်ၼိုင်ႈ တွၼ်ႈတႃႇမၼ်းၼၢင်းသေ ၶတ်းၸႂ်ၸွႆႈထႅမ်ၸၢႆး သၢႆၶိူဝ်းႁဵတ်းၵၢၼ်ၼင်ႇဢၼ်မၼ်းတၢင်းပဵၼ်လႆႈၼၼ်ႉယဝ်ႉ။
ဝႃႈလႃးၵေႃႈ လွင်ႈမိုတ်ႈၵိုဝ်းၼၼ်ႉ လႅၵ်ႈလၢႆႈၶၢႆႉမႃးထိုင်လွင်ႈ ယုမ်ႇၸႂ်မႃးၽႅဝ်ၸၼ်ႉၸမ်ၸႂ်သေပူၼ်ႉမႃးထိုင်ၸၼ်ႉတၢင်းႁၵ်ႉယဝ်ႉႁိုဝ်ၼႆ လိူဝ်သေမၼ်းၼၢင်းတႄႉၽႂ်ပႆႇႁူႉလႆႈၼင်ႇၵဝ်ႇ။ ၸၢႆးသၢႆၶိူဝ်းၵႃႉ ၼိုင်ႈၵေႃႈ မိူဝ်ႈဢွၼ်တၢင်းဝူၼ်ႉတႄႉဝႃႈ ၸၢမ်ၶမ်းပဵၼ်ၵူၼ်းဢမ်ႇမီး မႄႈပဵၼ်ၵေႃႉၸမ်ၸႂ် ဢမ်ႇလႆႈႁၼ်မႄႈၼႆလႄႈ ယိၼ်းဢီးလူ မၼ်း ၼၢင်းၵေႃႉဢၼ်ဢမ်ႇတၼ်းလႆႈ ပိုင်ႈႁူမ်ႈငဝ်းမႅတ်ႉတႃႇ ၵေႃႉပဵၼ်မႄႈ လႄႈၸွမ်းၸႂ်ၸၢမ်ၶမ်းမႃးတႃႇသေႇႁိုဝ်။ လွင်ႈဢီးလူၼၼ်ႉလူး မိူဝ်ႈ လဵဝ်လႅၵ်ႈလၢႆႈမႃးထိုင်ၸၼ်ႉလႂ်ယဝ်ႉလႃႇၼႆၼၼ်ႉတႄႉ လိူဝ်သေမၼ်း ၸၢႆး ၽႂ်ၵေႃႈ ဢမ်ႇႁူႉလႆႈၼင်ႇၵဝ်ႇ။
ႁၼ်ဝႃႈ ၶဝ်သွင်ၵေႃႉၵႂႃႇၵႂႃႇပႆပႆၸွမ်းၵၼ် ၸိူင်ႉၼႆသေတႃႉ ၵေႃႈ ၶေႃႈၵႂၢမ်းယဝ်ႉယွၵ်ႇၵႂၢမ်းႁၵ်ႉၵႂၢမ်းပႅင်းၵၼ် ဢၼ်ဝႃႈၼၼ်ႉ ၽႂ်ပႆႇ တွၼ်ႉယၢမ်ႈလၢတ်ႈဢွၵ်ႇသေပွၵ်ႈ။ ၸၢႆးသၢႆၶိူဝ်းၵေႃႈလၢတ်ႈဢၼ်ၸိုဝ်ႈ ၸႂ်ႈဢၼ်လူဝ်ႇႁဵတ်းလူဝ်ႇပဵၼ် ဢၼ်ပဵၼ်တေႉမီးတေႉၼၼ်ႉၵူၺ်းၼႆ သေတႃႉၵေႃႈ ၵူၺ်းၵႃႈ ၼႂ်းၸႂ်ဢွၼ်ႇၶဝ်တႄႉ ပေႃးဝႃႈၽၢတ်ႇယၢၼ် ၵၼ် ဢမ်ႇလႆႈႁၼ်ၵၼ်ၼႆတႄႉ ပႅၵ်ႉသမ်ႉဝႃႈ ၸူဝ်ႈၵႅပ်ႉဢွၼ်ႇၵူၺ်း ၼႆၵေႃႈ ၵေႃႉၽၢတ်ႇၵႂႃႇၵေႃႈမေႃၸႂ်ထိုင် ၵေႃႉယူႇသမ်ႉယေႈၶႅၼ်းမွင်း ၼၼ်ႉယဝ်ႉ။
ၼႂ်ၼႆႉၵေႃႈၼၢင်းၸၢမ်ၶမ်းလႄႈၼၢင်းၶမ်းလိုၼ်းဢုပ်ႇၵၼ်ယူႇဢိၼ်းဢွၼ်းဢိၼ်းဢွၼ်းၼႂ်းႁွင်ႈမိုဝ်ႉၼႆႉယဝ်ႉ။
“မိူဝ်ႈဝၼ်းၼွင်ႉလိုမ်းတူဝ်ၼၼ်ႉ ပီႈသၢႆၶိူဝ်းႁဵတ်းႁိုဝ်ႁူႉၶႃႈလႃႇပီႈၶမ်း လိုၼ်း”
“ပီႈၵေႃႈဢမ်ႇတၼ်းႁူႉၼင်ႇၵဝ်ႇ ႁႃးဢႃသၢင်ႇတိုၵ်ႉၵႂင်ၵႂင်ၵႃးၵႃးႁွင်ႉ တူၺ်းၼွင်ႉယူႇ မၼ်းပေႃးတၼ်းလႅၼ်ႈၶိုၼ်ႈႁိူၼ်းမႃး ဢုမ်ႈဢဝ်တူဝ် ၼွင်ႉယဝ်ႉ။ ယွၼ်းဢဝ်သေႃးၵႃးသေဝႃႈ ၶိုၼ်ႈၵႃးလႄႈပီႈၶမ်းလိုၼ်းၼႆ ယဝ်ႉၵႃႈ ႁေႃႈၵႃးဢွၵ်ႇၵႂႃႇၵမ်းလဵဝ်ယဝ်ႉဝႃႈ ၵႃးၵေႃႈႁေႃႈဝႆးဝႃႈဝႆး ၼႃႈ မၼ်းၵေႃႈလႅင်လႅင်ပေႃးၶႂ်ႈလမ်ယဝ်ႉဝႃႈ။ ယဝ်ႉၵေႃႈပွင်ႉယူႇႁင်းမၼ်း ဝႃႈ မႄႈမႂ်းလႃႈ ပေႃးၸၢမ်ၶမ်းပဵၼ်ၵႂႃႇသေလွင်ႈလွင်ႈတႄႉ ထၢင်ႇဝႃႈၵဝ် တေဝၢင်းၶႂၢင်းပၼ်မႂ်းလႆႈၼႆႁႃႉ ၼႆဝႃႈ ပီႈၶမ်းလိုၼ်းပေႃးၶႂ်ႈၵူဝ်ယဝ်ႉ ဝႃႈ”
“ပီႈသၢႆၶိူဝ်းမႃးဢုမ်ႈဢဝ်ၼွင်ႉၸိူင်ႉၼၼ်ႉ ပေႃႈဢမ်ႇဝႃႈသင်ၶႃႈႁႃႉ ပီႈ ၶမ်းလိုၼ်း”
“တေႁိုဝ်ဝႃႈၼႄႇၼွင်ႉၼႆႉၵေႃႈ ပိူၼ်ႈၵေႃႈႁူႉယူႇၵူၺ်းလေႃႇ။ ၵူၼ်း ႁဵတ်းလီႁဵတ်းႁၢႆႉၼႆ ၵူၺ်းၼႃႇဝၼ်းၼၼ်ႉတႄႉ သင်ၸိူဝ်ႉဝႃႈမီးသေ ၵေႃႉၵေႃႉႁၢမ်ႈ ဢမ်ႇႁႂ်ႈဢဝ်ၼွင်ႉၵႂႃႇႁူင်းယႃၼႆတႄႉ ပဵၼ်ဢႃသၢင်ႇ ၵေႃႉႁၢမ်ႈၵေႃႈ ယူဝ်မၼ်းယင်းတေဢမ်ႇထွမ်ႇၵွၼ်ႇယူဝ်ႉ မၼ်းမႆႈၸႂ် ၼႃႇတေႉယဝ်ႉလူး ဢေႃႈ..ၸႂ်ႈတေႉမိူဝ်ႈယူႇတီႈႁူင်းယႃၼၼ်ႉ ၼွင်ႉ ႁၼ်မႄႈႁႃႉ”
“ဢေႃႈႁၼ်ဢေႃႈ တီႈၼွင်ႉၵႂႃႇႁၼ်မႄႈၼၼ်ႉၵူၼ်းၼမ်ဝႃႈၼမ်ၼေႈ ပီႈၶမ်းလိုၼ်း။ ပေႃးၼွင်ႉၽႅဝ်ၵႂႃႇၵေႃႈ မႄႈဢွၵ်ႇမႃးဝႃႈႁင်းၼွင်ႉဝႃႈ ၸၢမ်ၶမ်းလုၵ်ႈယိင်းမႄႈ လုၵ်ႈယိင်းမႃးႁဵတ်းသင်တီႈၼႆႈ လုၵ်ႈယႃႇပေ မႃးမိူဝ်းၶိုၼ်းလႄႈၼႆသေ မႄႈၵေႃႈၶိုၼ်းၶဝ်ႈၵႂႃႇ တီႈၵူၼ်းၼမ်ၼမ် ၼၼ်ႉလႄႈ ၼွင်ႉႁွင်ႉၸွမ်းယူႇၵေႃႈ မႄႈဢမ်ႇဝၢႆႇတူၺ်းၼွင်ႉႁင်”
“ဢမ်ႇႁွင်ႉဢမ်ႇဝၢႆႇတူၺ်းၼၼ်ႉ လီၼႃႇယဝ်ႉဝႃႈ။ ၸၢမ်ၶမ်း ၵူၼ်းဢၼ်တၢႆၵႂႃႇၼၼ်ႉ ပေႃးၼွၼ်းၾၼ်ဝႃႈၶဝ်မႃးႁွင်ႉၼႆ ယႃႇၵႂႃႇ ၸွမ်းလႃးလႃး။ ပေႃးႁဝ်းၵႂႃႇၸွမ်းၶဝ်ၼႆၵေႃႈ ပွင်ႇဝႃႈတၢႆၸွမ်းၶဝ်ယဝ်ႉ ၼၼ်ႉၼႃႇ”
“ပေႃးပဵၼ်မႄႈမႃးႁွင်ႉတႄႉ တိုၼ်းၵႂႃႇၼၼ်ႉယဝ်ႉၼွင်ႉတႄႉ”
“ၼွင်ႉဢမ်ႇႁၵ်ႉ ဢမ်ႇဢီးလူ ပေႃႈၼွင်ႉႁႃႉဢေႉ ပီႈၶမ်းလိုၼ်းၵေႃႈ ဢမ်ႇဢီးလူယဝ်ႉႁႃႉ”
“ဢီးလူယူႇၵူၺ်းဢေႃႈ”
“ယဝ်ႉၵေႃႈ”
“ယဝ်ႉၵေႃႈၽႂ်..”ၼႃႈယုမ်ႉယုမ်ႉဢွၼ်ႇသေ “ဢမ်ႇႁူႉလႄႇပေႃးပဵၼ်ၵေႃႉဢၼ်ၼွင်ႉႁၵ်ႉတႄႉ ၼွင်ႉတိုၼ်းမႃးၵဵပ်း ဢဝ်မူတ်းမူတ်းၼၼ်ႉယဝ်ႉဝႃႈ။ ပေႃးၼွင်ႉတၢႆတႄႉ ႁၢင်ႈႁႅၼ်းဝႆႉလႃႈ”
“ဢူး..ဢမ်ႇလူဝ်ႇမႃးႁွင်ႉပီႈၶမ်းလိုၼ်းၵူၺ်း ပီႈဢမ်ႇၶႂ်ႈၵႂႃႇ ထၢင်ႇဝႃႈ ပိူၼ်ႈလီလၢတ်ႈလဵၼ်ႈႁႃႉၼၼ်ႉ ၸၢမ်ၶမ်း”
“ဢေႃႈ ဢမ်ႇဝႃႈယဝ်ႉၶႃႈ ဢမ်ႇဝႃႈယဝ်ႉၶႃႈ တွင်းပၢၼ်ႇၶႃႈ”
“ၼေႈၸၢမ်ၶမ်း ၼႂ်ၼႆႉႁဵတ်းသင်ပီႈသၢႆၶိူဝ်း ဢမ်ႇမႃးႁွင်ႉၼွင်ႉယဝ်ႉ လႃႇ မိူဝ်ႈၼႂ်ဝႃးတႄႉဝႃႈ လုၵ်ႉၵႂႃႇၸဵမ်ၸဝ်ႉၵႂႃႇၵိၼ်ထူဝ်ႇၽူးဢုၼ်ႇၼႆ ၼႂ်ၼႆႉၵေႃႈၵႂႃႇထႅင်ႈယဝ်ႉလူး”
“ႁိုဝ်ႉ ဢမ်ႇၵႂႃႇၶႃႈလေႃႇ ၵႃးမၼ်းယင်းတိုၵ်ႉမီးယူႇလူး ထၢင်ႇဝႃႈၼွင်ႉ ဢမ်ႇႁၼ်ၼႆႁႃႉၼၼ်ႉ”
“မၼ်းၶီႇလူတ်ႉၶိူင်ႈၵႂႃႇၵူၺ်းဢိူဝ်ႈ ၼွင်ႉပႆႇႁူႉၵွၼ်ႇႁႃႉၼႆႉ ပီႈသၢႆၶိူဝ်း သိုဝ်ႉလူတ်ႉထႅင်ႈလမ်းၼိုင်ႈယဝ်ႉၼႆ”
“မၼ်းသိုဝ်ႉပၼ် ပီႈၸေႃးယဵၼ်ႇၵူၺ်းလူး ၵူၺ်းၼႃႇလူတ်ႉတႄႉၼွင်ႉ ပႆႇႁၼ်”
“မိူဝ်ႈဝႃးမိူဝ်ႈသိုၼ်းၼႆႉၵူၺ်း သိုဝ်ႉထႅင်ႈလမ်းၼိုင်ႈယဝ်ႉ တႃႇမၼ်း ၵူၺ်း ပဵၼ်လူတ်ႉ DT ၼႆ ” ၼၢင်းၶမ်းလိုၼ်းလႅၼ်ၸိူင်ႉၼၼ် ၸၢမ်ၶမ်း ၵေႃႈမိူၼ်ႁၢင်ႈၶႂ်ႈယုမ်ႇဢမ်ႇပေႃးယုမ်ႇသေ
“ဢမ်ႇၸႂ်ႈယူဝ်ႉ မႃးၼွင်ႉမိူဝ်းတူၺ်း” ၼႆသေၺႃးမိူဝ်ႈၸၢႆးသၢႆၶိူဝ်း လုၵ်ႉၼႂ်းသူၼ်မႃးလႄႈ
“ပီႈသၢႆၶိူဝ်းၵႂႃႇလႂ်မႃးၶႃႈလႃႇ”
“ဢမ်ႇၵႂႃႇလႂ် ပီႈလုၵ်ႉၼႂ်းသူၼ်ၼႆႉမႃးဢိူဝ်ႈ”
“ဢမ်ႇၸႂ်ႈယူဝ်ႉ ၵႂႃႇၵိၼ်ထူဝ်ႇၽူးဢုၼ်ႇမႃးၼႆဢမ်ႇၸႂ်ႈႁႃႉ” ယုမ်ႉၵိူင်း ႁူဝ်ဢွၼ်ႇမၼ်းသေပႂ်ႉထွမ်ႇယူႇ။
ၸၢႆးသၢႆၶိူဝ်းၵေႃႈဝူၼ်ႉလႆႈဝႃႈ ၸၢမ်ၶမ်းၺႃးၼၢင်းၶမ်းလိုၼ်းလႅၼ်မႃးယဝ်ႉၼႆသေ ၶိုၼ်းဝႆႉၼႃႈယုမ်ႉယုမ်ႉသေ
“ၸၢမ်ၶမ်းၼႆႉတႄႉ ထိုဝ်တေႉၼၼ်ႉယဝ်ႉဝႃႈႁေး ပိူၼ်ႈလႅၼ်ဝႃႈႁိုဝ် ၵေႃႈယုမ်ႇၼႆႉတႄႉ ပီႈၶမ်းလိုၼ်းလၢတ်ႈၼွင်ႉၸွင်ႇၸႂ်ႈ” ၸၢမ်ၶမ်းငွၵ်း ႁူဝ်ၼႄယူႇ။
“ၼၼ်ႉၼႃႇပီႈဝႃႈယူႇယဝ်ႉ ပီႈၶမ်းလိုၼ်းလူဝ်ႇဢၢၼ်ႇလိၵ်ႈဢၼ်ၸူႉ မၼ်းပၼ်မႃးၼၼ်ႉလႄႈ မၼ်းၵူဝ်ၼွင်ႉႁၼ်မၼ်းလီဢၢႆလႄႈ လႅၼ် ၼွင်ႉႁႂ်ႈဢွၵ်ႇမႃးတၢင်းၼွၵ်ႈဢိူဝ်ႈ။ ၸၢမ်ၶမ်း ၼွင်ႉပေႉမႃးဢမ်ႇလႅတ်း သေဢိတ်းလႃႇ မႃးပီႈမိူဝ်းတူၺ်းၼႆသေ” ႁဵတ်းၵႅင်ႈပႆဢွၵ်ႇမႃးဢိတ်း ၼိုင်ႈယူႇ။
“မႃး ၼွင်ႉၵေႃႉမိူဝ်းတူၺ်း” ၼႆသေ လႅၼ်ႈမိူဝ်းၵမ်းလဵဝ်ယဝ်ႉ။
“ပီႈၶမ်းလိုၼ်း လႅၼ်ၼွင်ႉႁဵတ်းသင်။ လူဝ်ႇဢၢၼ်ႇလိၵ်ႈၸူႉ ပီႈၶမ်း လိုၼ်းလႄႈ လႅၼ်ၼွင်ႉႁႂ်ႈၼွင်ႉဢွၵ်ႇၵႂႃႇၸွင်ႇၸႂ်ႈ။ မီးလႂ် မီးလႂ်လိၵ်ႈ ၼၼ်ႉ ဢဝ်မႃးၼွင်ႉတူၺ်းလူး”ၼႆသေ ႁႃသွၵ်ႈတူၺ်းၸွမ်းတူဝ်ၼၢင်း ၶမ်းလိုၼ်းယူႇ။
“ၸၢမ်ၶမ်းၼွင်ႉယႃႇမႃးႁဵတ်းၼၼ်လူႉ ပီႈၶမ်းလိုၼ်းၼၵ်းၼဵၼ်ၼႃႇ တေတၢႆယဝ်ႉ ပီႈၸၢင်ႈၵႂႃႇဢဝ် လိၵ်ႈၸူႉလိၵ်ႈၸူဝ်းလူင်တီႈလႂ် ဢမ်ႇ မိူၼ်ၼွင်ႉလေႃႇ”
“ဢူး..ၼွင်ႉဢမ်ႇမီးၶႃႈလေႃႇ”
“တေႁိုဝ်ၵႂႃႇမီး ၸွမ်းၵၼ်ၵူႈဝၼ်းၵူႈဝၼ်းၸိူင်ႉၼၼ်”
“ႁိုဝ်ႉ..ၵမ်းၼႆႉတႄႉၼွင်ႉဢမ်ႇၵႂႃႇယဝ်ႉၶႃႈဝႃႈ”
“ဢိူဝ်ႈဢမ်ႇၵႂႃႇတေႉဢိူဝ်ႈ ၵမ်ႉပေႃးတေမႃးႁွင်ႉယဝ်ႉဝႃႈ”
“ၵႃႈၶႂ်ႈႁွင်ႉလႃႈ ပေႃးၼွင်ႉဝႃႈ ဢမ်ႇၵႂႃႇၼႆၵေႃႈ ၼွင်ႉတိုၼ်းဢမ်ႇၵႂႃႇ ၼၼ်ႉယဝ်ႉဝႃႈ”
ၸၢႆးသၢႆၶိူဝ်းဢဝ်ၵႅင်ႉၶဝ်ႈမႃးဝႆႉသေ ၼူဝ်းၵႃးဝႆႉယဝ်ႉ မႃးႁွင်ႉၼၢင်းၸၢမ် ၶမ်းမိူၼ်ၵူႈဝၼ်းၼၼ်ႉယူႇ။
“ၸၢမ်ၶမ်းၸွင်ႇပႃႈတၼ်းႁိုဝ် ပေႃးတၼ်းယဝ်ႉၵေႃႈၵႂႃႇယဝ်ႉဢိူဝ်ႈ”
“တၼ်းယဝ်ႉၶႃႈ”
ၼၢင်းၶမ်းလိုၼ်းယုမ်ႉယုမ်ႉသေဝႃႈ “ၸၢမ်ၶမ်းဢမ်ႇၵႂႃႇၶႃႈဝႃႇပီႈသၢႆၶိူဝ်းပိူၼ်ႈလူဝ်ႇၵႂႃႇလႄႇမိၼ်းၶႅၼ်ႇဝႃႇ”
ၸၢႆးသၢႆၶိူဝ်း ဢမ်ႇတၼ်းငိၼ်းပႃး လွင်ႈပိူၼ်ႈလူဝ်ႇၵႂႃႇ မိၼ်းၶႅၼ်ႇၼႆ ၼၼ်ႉသေ “ဢမ်ႇၵႂႃႇတေလႆႈၼႄႇ လၢၵ်ႈၵႂႃႇဢိူဝ်ႈလေႃႇ”
ၼၢင်းၶမ်းလိုၼ်းၸင်ႇဝႃႈ “ၶႃႈၵေႃႈတႃႉၶႂ်ႈၵႂႃႇလႄႇၸွမ်းပီႈသၢႆၶိူဝ်းၶဝ်လႃႈ”
“ပေႃးၶုတ်းၼွင်ယဝ်ႉၸွင်ႇၵွႆႈၵႂႃႇလႄႈ မိူဝ်ႈလဵဝ်တႄႉတီႈယူႇတီႈလဵၼ်ႈ ပႆႇယဝ်ႉတူဝ်ႈသေမဵဝ်း ပေႃးယဝ်ႉလီလီငၢမ်းငၢမ်းယဝ်ႉတႄႉ ဢမ်ႇၶႂ်ႈၵႂႃႇ ၵေႃႈတေလႆႈၵႂႃႇၼၼ်ႉယဝ်ႉဝႃႈ။ ၵႂႃႇၼွင်ႉပေႃးတၼ်းယဝ်ႉၵေႃႈ” ၼႆ သေဢွၵ်ႇၵႂႃႇယဝ်ႉ။
ၼၢင်းၶမ်းလိုၼ်းၶဝ်လုင်းသၢင်ႇမွင်ႇၶဝ်ၵေႃႈ ႁၼ်ၼၢင်းၸၢမ် ၶမ်းၵႂႃႇၵႂႃႇပႆပႆၸွမ်းၸၢႆးသၢႆၶိူဝ်းယူႇၸိူင်ႉၼႆ ဢမ်ႇတွၼ်ႉဝႃႈ ၵူဝ်ပဵၼ် ၼၼ် ၵူဝ်ပဵၼ်ၼႆဢိူဝ်ႈသေပွၵ်ႈ။ ပေႃးလုၵ်ႈယိင်းမၼ်းတေၵႂႃႇလႂ်ၼႆ ယင်းႁႂ်ႈႁွင်ႉၸၢႆးသၢႆၶိူဝ်းၸွမ်းသူင်ႇၼႆၵွၼ်ႇယဝ်ႉ။
ၸၢႆးသၢႆၶိူဝ်းၵေႃႈ ဢမ်ႇတွၼ်ႉတီႉတီႉတွႆႇတွႆႇ ဢမ်ႇတွၼ်ႉ လၢတ်ႈၵႂၢမ်းလိူင်းၸိူင်းပူၼ်ႉပႅၼ် ၼိူဝ်မၼ်းၼၢင်းသေပွၵ်ႈ။ ယွၼ်ႉ ၼၼ်လႄႈၼၢင်းၸၢမ်ၶမ်းၵေႃႈ တိုၼ်းဝႃႈယုမ်ႇယမ်ဝႆႉၸႂ်လႆႈႁူဝ်ပၢၵ်ႇ တဵမ်ယဝ်ႉၼႆလႄႈၸင်ႇဝႃႈ ဢမ်ႇၵူဝ်ဢမ်ႇဢၢႆသေ ႁတ်းၵႂႃႇႁတ်းပႆၸွမ်း မၼ်းၸၢႆးၼၼ်ႉယဝ်ႉ။
ထႅင်ႈလွင်ႈၼိုင်ႈၵေႃႈ ၵွပ်ႈဝႃႈၸၢႆးသၢႆၶိူဝ်းၼႆႉ တိုၼ်းပဵၼ်ၵူၼ်း မီးတၢင်းႁူႉ မေႃၸႅၵ်ႇၽႄဢၼ်လီဢၼ်ၸႃႉ မေႃၸွမ်းၸႂ်ပိူၼ်ႈ မေႃ လၢတ်ႈၵႂၢမ်းပၼ်ႁႅင်းပိူၼ်ႈ ဢမ်ႇမီးၸႂ်ၶႂ်ႈဢဝ်လိူဝ်ပေႉပုၼ်ႈပိူၼ်ႈ တၢင်း ယၢမ်ႈ ဢၵျၢင်ႉၵေႃႈလီ ဢမ်ႇမီးတီႈၼေးသင်သေဢိတ်းလႄႈ ၵေႃႉလႂ် ၵေႃႈဢမ်ႇမိုတ်ႈမၼ်းၼႆ ဢမ်ႇမီးၽႂ်ယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
