ၵိုတ်းလိုဝ်ႈဝူၼ်ႉတၢင်ပိူၼ်ႈသေ ႁဝ်းဢမ်ႇမီးဝၼ်းႁူႉလႆႈလေႃႇဝႃႈ ပိူၼ်ႈဝူၼ်ႉသင်ယူႇ ယႃႇၵုမ်ႇၶၢတ်ႈလၢမ်းသေဝူၼ်ႉၵႂင်ၸႂ်ၸွမ်းမၼ်းယူႇ။
ပွႆႇပႅတ်ႈသေလွင်ႈဢၼ်ၵုမ်းၵမ်ဢမ်ႇလႆႈၼၼ်ႉ မီးလၢႆလၢႆလွင်ႈဢၼ်ႁဝ်းၵုမ်းၵမ်ဢမ်ႇလႆႈ မိူၼ်ၼင်ႇသိင်ႇဝႅတ်ႉလွမ်ႉ လွင်ႈႁဵတ်းသၢင်ႈပိူၼ်ႈ လွင်ႈဝၼ်းလင် ၸိူဝ်းၼႆႉ ပွႆႇဝၢင်းမၼ်းယဝ်ႉသိုပ်ႇၵႂႃႇတၢင်းၼႃႈထႅင်ႈသေ။
ၸႂ်ႉၸၢတ်ႈပၢၼ်ယၢမ်းလဵဝ်ႁႂ်ႈလီ လွင်ႈဝၼ်းလင်ဢမ်ႇမီးဝၼ်းၵႄႈၶႆလႆႈ လွင်ႈမိူဝ်းၼႃႈၵေႃႈယင်းမႃးပႆႇထိုင် ဢၼ်ႁဵတ်းလႆႈယူႇၼႆႉၵေႃႈ ပဵၼ်မိူဝ်ႈလဵဝ်ယၢမ်းလဵဝ်လႄႈမိူဝ်ႈၼႆႉယဝ်ႉ ႁဵတ်းႁႂ်ႈမၼ်းတဵမ်တီႈလႄႈ။
ႁဵတ်းၵႂႃႇလွႆးလွႆးၵေႃႈလႆႈ ဢမ်ႇလူဝ်ႇလႆႈႁိပ်ႈၼႅတ်ႈၵူႈမဵဝ်း ၵိၼ်လွႆးလွႆး ပႆလဵၼ်ႈလွႆးလွႆးဢမ်ႇလူဝ်ႇႁိပ်ႈ။
ၵိုတ်းလိုဝ်ႈတႅၵ်ႈၼိူင်းတင်းပိူၼ်ႈသေ ၽႂ်ၵေႃႈမီးသဵၼ်ႈတၢင်းၶွင်တူဝ်ၵဝ်ႇယူႇယဝ်ႉ ၵၢၼ်တႅၵ်ႈၼိူင်းတင်းပိူၼ်ႈၼၼ်ႉဢမ်ႇႁဵတ်းႁႂ်ႈႁဝ်းမီးတၢင်းသိူဝ်းယူႇယဝ်ႉ လိူဝ်သေတေႁဵတ်းႁႂ်ႈၸႂ်ဢမ်ႇလီမႃးထႅင်ႈၵူၺ်း။
သႂ်ႇၸႂ်လွင်ႈဢၼ်ႁဵတ်းႁႂ်ႈႁဝ်းမီးတၢင်းသိူဝ်းယူႇလႄႈ ၸၢတ်ႈပၢၼ်ႁဝ်းၼၼ်ႉပွတ်းၼႃႇ တေၵႂႃႇသုမ်းၶၢဝ်းယၢမ်းၸွမ်းလွင်ႈဢၼ်ဢမ်ႇၸမ်ပဵၼ်ႁဵတ်းသင် ၸႂ်ႉၶၢဝ်းယၢမ်းၸွမ်းလွင်ႈဢၼ်ႁဝ်းႁၵ်ႉလႄႈႁဵတ်းႁႂ်ႈမီးတၢင်းသိူဝ်းၼၼ်ႉသေ။
ၵိုတ်းလိုဝ်ႈၵၢၼ်လဵၼ်ႈသူဝ်ႇသႄႇလ်မီႇတီႇယႃႇၽွင်ႈ ၼိူဝ်ဢွၼ်ႇလၢႆးၼၼ်ႉ မီးၶေႃႈမုၼ်းလႄႈတင်းႁၼ်ထိုင်ၼမ်ၼႃႇ ၸၢမ်းပိၵ်ႉၾူၼ်းသေၸႂ်ႉၸၢတ်ႈပၢၼ်ယူႇၸွမ်းၸၢတ်ႈပၢၼ်ႁဝ်းတေႉတေႉၽွင်ႈ။
ယႃႇၵူဝ်တေလၢတ်ႈဝႃႈ “ဢမ်ႇ” ဢမ်ႇၸမ်ပဵၼ်တေလႆႈႁဵတ်းၵူႈလွင်ႈၸိူင်ႉၼင်ႇဢၼ်ပိူၼ်ႈတုၵ်းယွၼ်း မၢင်ပွၵ်ႈလွင်ႈမေႃထဵင်ၶိုၼ်းၵေႃႈ ပဵၼ်ၵၢၼ်တူၺ်းထိုင်တူဝ်ၸဝ်ႈၵဝ်ႇႁႂ်ႈလီတီႈသုတ်းယဝ်ႉ။
ယုမ်ႉၶူဝ်ၼမ်ၼမ် လွင်ႈယုမ်ႉၶူဝ်ၼၼ်ႉတေၸွႆႈႁဵတ်းႁႂ်ႈလူတ်းယွမ်းလွင်ႈသုၵ်ႉၸႂ်လႄႈႁဵတ်းႁႂ်ႈၸၢတ်ႈပၢၼ်မီးလွင်ႈႁၢင်ႈလီမႃးထႅင်ႈယဝ်ႉ။
ဢမ်ႇလူဝ်ႇလႆႈတဵမ်ထူၼ်ႈၵူႈလွင်ႈ ဢမ်ႇမီးၽႂ်တဵမ်ထူၼ်ႈ လႄႈ ႁဝ်းၵေႃႈဢမ်ႇၸမ်ပဵၼ်တေလႆႈတဵမ်ထူၼ်ႈၵူႈလွင်ႈ လိူဝ်သေဝႃႈႁဵတ်းႁႂ်ႈမၼ်းလီလိူဝ်ပိူၼ်ႈၵေႃႈပဵင်းပေႃးယဝ်ႉ။
လိူၵ်ႈၶဝ်ႈႁႃၵူၼ်းၵေႃႉဢၼ်ပၼ်ႁႅင်းၽၢႆႇလီ ယူႇၸွမ်းၵူၼ်းဢၼ်ႁဵတ်းႁႂ်ႈၸႂ်သိူဝ်းၸွမ်း ငိူင်ႉဝႄႈၵူၼ်းဢၼ်တူၺ်းႁၼ်ပဵၼ်လွင်ႈဢမ်ႇလီ။
ၸတ်းၵၢၼ်လွင်ႈယူႇသဝ်းၸဝ်ႈၵဝ်ႇႁႂ်ႈယူႇငၢႆႈလူမ် ဢမ်ႇဝႃႈ ၽိူၼ်ႁဵတ်းၵၢၼ် လွင်ႈႁဵတ်းတၢင်းသၢင်ႈ ဢၼ်ယူႇငၢႆႈလႄႈၵတ်းၸႂ်လူမ်ၸႂ်။
ၸႂ်ႉၶၢဝ်းယၢမ်းၸွမ်းသၽႃႇဝ ယူႇၸွမ်းသၽႃႇဝၼၼ်ႉတေႁဵတ်းႁႂ်ႈၸႂ်ႁဝ်းၵတ်းၼိမ်ယဵၼ်။
မေႃၶႂၢင်းပၼ်ပိူၼ်ႈလႄႈတူဝ်ၵဝ်ႇ ၵၢၼ်တၢင်ႇတၢင်းၽိတ်းတူဝ်ၵဝ်ႇလႄႈၸႂ်လမ်ပိူၼ်ႈၼၼ်ႉဢမ်ႇမီးသင်လီမႃး တေႁဵတ်းႁႂ်ႈမႅၵ်ႇႁပ်ႉတၢင်းတုၵ်ႉမႃးၵူၺ်း။
ယႃႇၵူဝ်တေၶိုၼ်းတႄႇမႂ်ႇ မၢင်ပွၵ်ႈလွင်ႈလႅၵ်ႈလၢႆႈၵေႃႈ ပဵၼ်လွင်ႈဢၼ်လမ်ႇလွင်ႈ ယႃႇၸူမ်ယူႇၸွမ်းလွင်ႈၵဝ်ႇၵဝ်ႇ ဢၼ်ႁဵတ်းႁႂ်ႈဢမ်ႇမီးတၢင်းသိူဝ်း။
ႁႃၶၢဝ်းယၢမ်းယူႇၸွမ်းတူဝ်ၵဝ်ႇ ဢမ်ႇၸမ်ပဵၼ်တေလႆႈယူႇၸွမ်းတူဝ်ၵဝ်ႇတႃႇသေႇ မၢင်ပွၵ်ႈၵၢၼ်ယူႇယဵၼ်ယဵၼ်ၼၼ်ႉၵေႃႈ ၸွႆႈႁႂ်ႈတူဝ်ၵဝ်ႇၸႂ်ၼိမ်မႃးလႆႈယဝ်ႉ။
မေႃယိၼ်းၸူမ်းၸွမ်းလွင်ႈဢၼ်မီးယူႇ တႅၼ်းတီႈတေၸွမ်းႁႃလွင်ႈဢၼ်ဢမ်ႇမီးၼၼ်ႉ ၸၢမ်းယိၼ်းၸူမ်းဢၼ်မီးယူႇယဝ်ႉၼႆ ၸၢတ်ႈပၢၼ်ၵေႃႈတေလီမႃးၶိုၼ်းယဝ်ႉ။
လူတ်းယွမ်းလွင်ႈမုင်ႈမွင်း ယိင်ႈမုင်ႈမွင်းၼမ်ၵေႃႈ ယိင်ႈမီးလွင်ႈဢမ်ႇမိူၼ်ၸႂ်မႃး ႁဵၼ်းႁူႉတေပွႆႇမၼ်းၽွင်ႈ။
တူၺ်းထိုင်တူဝ်ၵဝ်ႇတင်းတူဝ်လႄႈၸႂ် ၵၢၼ်ဢွၵ်ႇဢဵၼ်ႁႅင်း ၵၢၼ်ၵိၼ်တၢင်းၵိၼ်လီလီ လႄႈၵၢၼ်ၼွၼ်းလပ်းတဵမ်ဢိမ်ႇ ပဵၼ်ပိုၼ်ႉထၢၼ်ၸၢတ်ႈပၢၼ်ဢၼ်လီ။
ၸႂ်ႉၸၢတ်ႈပၢၼ်ႁႂ်ႈသိူဝ်းၸႂ် လိုၼ်းသုတ်းမႃး ၸၢတ်ႈပၢၼ်ၵေႃႈပဵၼ်လွင်ႈဢၼ်တေလႆႈသိူဝ်းၸႂ်ၸွမ်းမၼ်း ဢမ်ႇဢဝ်တေႉဢဝ်ဝႃႈၼႃႇၽႅဝ်ထိုင်တီႈလိုမ်းၸႂ်ႉၸၢတ်ႈပၢၼ်။
ပိၼ်ႇ – ငဝ်မွင်မိုတ်းမူဝ်း
