သင်မီးလွင်ႈဢၼ်ၶႂ်ႈႁဵတ်းၵေႃႈ ယႃႇပႂ်ႉမိူဝ်ႈၽုၵ်ႈယဝ်ႉ ယွၼ်ႉဝႃႈမိူဝ်ႈၽုၵ်ႈၼၼ်ႉတေဢမ်ႇမီးတွၼ်ႈတႃႇႁဝ်းယဝ်ႉ ၵူႈဝၼ်းဝၼ်းၼၼ်ႉပဵၼ်တိုဝ်ႉတၢင်းယဝ်ႉ။
မေႃၵၼ်ႇတေႃးယွမ်းၼွမ်းလွင်ႈဢၼ်လႆႈႁဵတ်းၽိတ်းၵႂႃႇၼၼ်ႉသေ မၼ်းဢမ်ႇလႆႈႁဵတ်းႁႂ်ႈႁဝ်းပဵၼ်ၵူၼ်းဢူၼ်ႈဢွၼ်ႇ ၵူၺ်းၵႃႈမၼ်းတေၸွႆႈႁႂ်ႈလွင်ႈၸမ်ၸႂ်ႁဝ်းလီမႃးယဝ်ႉ။
ၸႂ်ႉၶၢဝ်းယၢမ်းၸွမ်းၵူၼ်းၵေႃႉဢၼ်ႁဝ်းႁၵ်ႉ ဢမ်ႇမီးသင်လမ်ႇလွင်ႈလိူဝ်သေ လႆႈၸႂ်ႉၶၢဝ်းယၢမ်းၸွမ်းၵူၼ်းၵေႃႉဢၼ်ႁဝ်းႁၵ်ႉလႄႈႁၵ်ႉႁဝ်း။
ဢမ်ႇပႂ်ႉႁႂ်ႈပၼ်ႁႃမႃးထိုင်ယဝ်ႉၸင်ႇတေၵႄႈၶႆ တႄႇႁဵတ်းလွင်ႈလီၵႂႃႇဝၼ်းမိူဝ်ႈၼႆႉလႄႈ။
ၵႆႉၵႆႉယုမ်ႉပၼ် တၢင်းယုမ်ႉၼၼ်ႉႁဵတ်းႁႂ်ႈၸႂ်လီမႃးလႄႈ ယင်းႁဵတ်းႁႂ်ႈၶူင်းၵၢင်ႁဝ်းၼၼ်ႉလီယူႇမူၼ်ႈသိူဝ်းမႃးယဝ်ႉ။
မီးယိူင်းမၢႆၼႂ်းၸၢတ်ႈပၢၼ် သင်ဢမ်ႇမီးယိူင်းမၢႆ ၵူႈဝၼ်းၵေႃႈတေပဵၼ်ဝၼ်းလဵဝ်ၵူၺ်း တႄႇႁဵတ်းမၼ်းၵႂႃႇယၢမ်းၼႆႉလႄႈ။
လွင်ႈဢၼ်တူၵ်းသုမ်းယူႇၼၼ်ႉ ဝႆႉပဵၼ်တွၼ်ႈသွၼ်သေ မၼ်းတေႁဵတ်းႁႂ်ႈႁဝ်းသိုပ်ႇၵႂႃႇတၢင်းၼႃႈလႆႈၵႅၼ်ႇၶႅင်လိူဝ်ၵဝ်ႇယဝ်ႉ။
တၢင်းသိူဝ်းၼၼ်ႉ ဢမ်ႇၸမ်ပဵၼ်တေလႆႈလုၵ်ႉမႃးတီႈလွင်ႈယႂ်ႇယႂ်ႇ မၢင်ပွၵ်ႈလႆႈႁဵတ်းလွင်ႈလဵၵ်ႉလဵၵ်ႉ သုတ်ႇလူမ်းၵတ်းလူမ်းယဵၼ်ယူႇယၢမ်းၵၢင်ၼႂ်ၼၼ်ႉၵူၺ်းၵေႃႈ ပဵၼ်တၢင်းသိူဝ်းဢၼ်ၼိုင်ႈယဝ်ႉ။
ၸႂ်ႉၵႂၢမ်းလၢတ်ႈဢၼ်သၢင်ႈပၼ်ႁႅင်းၸႂ်ပိူၼ်ႈလႄႈ ဢမ်ႇႁဵတ်းႁၢႆႉၸႂ်ၽႂ်။
ႁၵ်ႉတူဝ်ၵဝ်ႇဢွၼ်တၢင်း မိူဝ်ႈႁဝ်းမီးႁႅင်းၵွၼ်ႇ ၸင်ႇတေၸၢင်ႈႁၵ်ႉလႄႈလုမ်းလႃးပိူၼ်ႈလႆႈလီ။
ပၼ်ၶၢဝ်းယၢမ်းတႃႇတူဝ်ၵဝ်ႇ လိုဝ်ႈႁိူဝ်ႉလႄႈ ထႅမ်ႁႅင်းပၼ်တူဝ်ၵဝ်ႇၽွင်ႈ။
ႁဵတ်းလွင်ႈဢၼ်ႁဵတ်းႁႂ်ႈႁဝ်းမီးလွင်ႈၶိုပ်ႈၼႃႈၵႂႃႇလႆႈလီ ႁဵၼ်းႁူႉလွင်ႈမႂ်ႇမႂ်ႇ တွၼ်ႈတႃႇၽိူမ်ႉထႅမ်ၼမ်ႉၵတ်ႉတူဝ်ၵဝ်ႇလႆႈၵူႈၽၢႆႇ။
ပွႆႇလွင်ႈၸဵပ်းၵႂႃႇသေ ပွႆႇဝၢင်းၽွင်ႈ တေႁဵတ်းႁႂ်ႈႁဝ်းၵႂႃႇတၢင်းၼႃႈလႆႈငၢႆႈ။
မေႃႁပ်ႉထွမ်ႇပိူၼ်ႈ ၽႂ်ၵေႃႈယဝ်ႉမၼ်းမီးတၢင်းဝူၼ်ႉဢၼ်လီသူၼ်ၸႂ်လႄႈ လွင်ႈမေႃႁပ်ႉထွမ်ႇၼၼ်ႉၵေႃႈ မၼ်းၽိူမ်ႉထႅမ်ၼမ်ႉၵတ်ႉပၼ်ႁဝ်းလႆႈယဝ်ႉ။
ဢမ်ႇၵိုတ်းလိုဝ်ႈႁဵတ်းၸွမ်းလွင်ႈၶႂ်ႈပဵၼ် ဢမ်ႇဢဝ်ၵႂၢမ်းလၢတ်ႈပိူၼ်ႈမႃးပိၵ်ႉဢိုတ်းသဵၼ်ႈတၢင်းႁဝ်း။
ႁဵတ်းႁႂ်ႈလီၵူႈလွင်ႈ မိူဝ်ႈႁဝ်းႁဵတ်းသင်ၵေႃႈယဝ်ႉ ထုၵ်ႇလီႁဵတ်းႁႂ်ႈမၼ်းတဵမ်တီႈ ႁဵတ်းႁႂ်ႈလီတီႈသုတ်း။
ဢမ်ႇပႂ်ႉႁႂ်ႈမီးၸၢတ်ႈပၢၼ်လီသုတ်းတွၼ်း ယွၼ်ႉပိူဝ်ႈယၢမ်းလဵဝ်ၼႆႉ ပဵၼ်ၶၢဝ်းယၢမ်းလီလိူဝ်ပိူၼ်ႈယဝ်ႉလႄႈ သင်ႁဝ်းၸႂ်ႉႁႂ်ႈမၼ်းမီးတီႈပွင်ႇ။
ပိၼ်ႇ – ငဝ်မွင်မိုတ်းမူဝ်း
