ပေႃးၶႂ်ႈႁႂ်ႈတူဝ်ၵဝ်ႇပဵၼ်ၵူၼ်းလီၼၼ်ႉ ဢမ်ႇလူဝ်ႇလႆႈပႂ်ႉႁႅင်းၸႂ်တီႈၽႂ်သေၸင်ႇတႄႇၵေႃႈလႆႈ ႁဝ်းၸၢင်ႈသၢင်ႈဢဝ်ႁင်းၵူၺ်းလႆႈ ယူႇတီႈတၢင်းဝူၼ်ႉႁဝ်းၵူၺ်း။
ယုမ်ႇယမ်ဝႃႈတူဝ်ၵဝ်ႇ မီးလွင်ႈၶိုပ်ႈၼႃႈလႆႈတႃႇသေႇ ဢမ်ႇဝူၼ်ႉဝႃႈတူဝ်ၵဝ်ႇဢမ်ႇၵတ်ႉၶႅၼ်ႇ မၼ်းယင်းပႆႇထိုင်ၶိင်ႇထိုင်ၶၢဝ်းမၼ်းၵူၺ်း ၵူၼ်းၶႅၼ်ႇၵေႃႈပဵၼ်ၵူၼ်းၵေႃႉဢၼ်ႁတ်းႁဵတ်းႁတ်းၸၢမ်း ဢမ်ႇၵူဝ်ဝႃႈတေၽိတ်း မၼ်းတေႁဵၼ်းႁူႉသေဢွင်ႇမၢၼ်ၵႂႃႇယူႇၵူၺ်း။
လူမ်ႉလႆႈ တိူဝ်ႉၸႂ်လႆႈ ၵူၺ်းၵႃႈတေလႆႈမေႃၶႂၢင်းပၼ်တူဝ်ၵဝ်ႇယဝ်ႉ လွင်ႈမေႃယွၼ်ႇယၢၼ်းပၼ်တူဝ်ၵဝ်ႇ ၸႂ်လီတေႃႇတူဝ်ၵဝ်ႇၼၼ်ႉၵေႃႈ ပဵၼ်ႁႅင်းဢၼ်ၵမ်ႉၸွႆႈလႆႈလီယဝ်ႉ။
မိူဝ်ႈတူၵ်းသုမ်းယူႇၼၼ်ႉ ဢဝ်ဝႆႉပဵၼ်တွၼ်ႈသွၼ်သေ တေလႆႈတူၺ်းႁၼ်ဝႃႈၶူင်းၵၢင်ၼႆႉမၼ်းၵေႃႈဢမ်ႇလႆႈႁၢင်ႈႁၢႆႉသင် လႄႈ သိုပ်ႇၵႂႃႇၼႃႈႁႂ်ႈၵႆၵႂႃႇထႅင်ႈ။
ၶႂ်ႈလႅၵ်ႈလၢႆႈၵေႃႈ ထၢမ်တူၺ်းတူဝ်ၵဝ်ႇၵွၼ်ႇလႄႈဝႃႈ ၶႂ်ႈပဵၼ်ၽႂ် ယႃႇထၢမ်ဝႃႈတေႁဵတ်းသင် ၵူၺ်းၵႃႈ ႁႂ်ႈထၢမ်ဝႃႈ ၶႂ်ႈပဵၼ်ၵူၼ်းၸိူင်ႉႁိုဝ် ယဝ်ႉၵေႃႈလူင်းမိုဝ်းႁဵတ်းၵမ်းလဵဝ်လႄႈ။
ယဵၼ်ႉၵၼ်ႈဝႆႉမိူဝ်ႈၼႆႉ တွၼ်ႈတႃႇၽွၼ်းလီတၢင်းၼႃႈဢၼ်တေထိုင် လွင်ႈဢွင်ႇမၢၼ်ၶၢဝ်းယၢဝ်းၼၼ်ႉ မၼ်းဢမ်ႇၼႅတ်ႈဢဝ်လွင်ႈလူမ်ၸႂ်ဝၼ်းမိူဝ်ႈၼႆႉၵူၺ်း။
ဝူၼ်ႉႁႂ်ႈႁၼ်လွင်ႈဢွင်ႇမၢၼ်မႃးၼႂ်းတႃၸႅင်ႈၸႅင်ႈလႅင်းလႅင်း ၸၢမ်းလပ်းတႃသေ တူၺ်းႁၼ်ႁၢင်ႈဢၼ်တူဝ်ၵဝ်ႇဢွင်ႇမၢၼ်ယဝ်ႉ ဢွၵ်းဢေႃတေယုမ်ႇဝႃႈ ႁဝ်းႁဵတ်းလႆႈတေႉယူႇ။
ယူႇၸွမ်းၵူၼ်းၵေႃႉဢၼ်ၶႂ်ႈၶိုၼ်ႈယႂ်ႇၵႂႃႇၸွမ်းၵၼ် ႁႅင်းဢီးႁိမ်းႁွမ်းၼၼ်ႉၵေႃႈ လမ်ႇလွင်ႈၼႃႇ ယိုင်ႈယူႇၸွမ်းၵူၼ်းၶႅၼ်ႇလႄႈဝူၼ်ႉလီ မၼ်းၵေႃႈတေၸိုမ်းဢဝ်လွင်ႈလီလီမႃးႁႃႁဝ်းလူၺ်ႈဢမ်ႇႁူႉတူဝ်။
ထွမ်ႇသဵင်တူဝ်ၵဝ်ႇႁႂ်ႈၼမ်မႃး ႁဵတ်းသင်ၵေႃႈယဝ်ႉ ႁႂ်ႈထၢမ်တူဝ်ၸဝ်ႈၵဝ်ႇတႃႇသေႇဝႃႈ လွင်ႈၼႆႉမၼ်းၸႂ်ႈတွၼ်ႈတႃႇႁဝ်းယူႇႁႃႉ ဢမ်ႇၸမ်ပဵၼ်တေလႆႈထၢမ်ပိူၼ်ႈတႃႇသေႇၵေႃႈလႆႈ။
တႄႇႁဵတ်းလွင်ႈလဵၵ်ႉလဵၵ်ႉၵႂႃႇဢွၼ်တၢင်း ၸွင်ႇၵွႆႈသိုပ်ႇၵႂႃႇတၢင်းၼႃႈ ယႃႇပႂ်ႉႁႂ်ႈၵူႈလွင်ႈၽွမ်ႉယဝ်ႉ ၸွင်ႇၵွႆႈႁဵတ်း၊ ႁဵတ်းလွင်ႈလဵၵ်ႉလဵၵ်ႉ ယဝ်ႉလႅၵ်ႈလၢႆႈၵႂႃႇတိၵ်းတိၵ်း မၼ်းတေဢွၼ်ႁဝ်းၵႂႃႇၵႆလိူဝ်သေဢၼ်ဝူၼ်ႉဝႆႉၼၼ်ႉယဝ်ႉ။
ထတ်းသၢင်တူၺ်းတူဝ်ၵဝ်ႇတႃႇသေႇဝႃႈဝူၼ်ႉၸိူင်ႉႁိုဝ်ယူႇ ႁိူဝ်ႉယူႇၸွင်ႇၸႂ်ႈ ၶႂ်ႈလႆႈၸိူင်ႉႁိုဝ် တႃႇႁႂ်ႈမၼ်းၶိုၼ်ႈယႂ်ႇၵႂႃႇၼၼ်ႉ တေလႆႈမေႃႁပ်ႉထွမ်ႇတူဝ်ၵဝ်ႇၵွၼ်ႇ။
ပိၼ်ႇ – ငဝ်မွင်မိုတ်းမူဝ်း
