“ႁဝ်းၵႂႃႇၵွၼ်ႇၼႃႈ” ၶမ်းႁွမ်လၢတ်ႈသေဢၢင်ႈယၢၼ်ဢွၵ်ႇၵႂႃႇ လႅင်းမိူင်းၸၼ်ၶႅၼ်ဝႆႉလႄႈ
“သူတေၵႂႃႇတၢင်းလႂ်ထႅင်ႈ…ယူႇၸွမ်းႁဝ်းၼႆႉလႄႈ…ႁဝ်းဢမ်ႇမီးသင်တေလႆႈသိင်ႇသိမ်းသူသင်ယဝ်ႉ…ႁဝ်းတေလၢတ်ႈသူတီႈၼႆႈၵူႈလွင်ႈ…”
“ပီႈလႅင်းမိူင်းၶႂ်ႈဝႃႈၸိူင်ႉႁိုဝ်လႃႇ…”
“သႅင်ႁွမ်ပီႈၼွမ်းၽိတ်းၼႃႈ…ၼႆႉပဵၼ်ၽူႈယိင်းၵေႃႉဢၼ်ပီႈဢမ်ႇတွၼ်ႉလိုမ်းၶဝ်လႆႈလႄႈ…ၶဝ်ၵေႃႈမီးလုၵ်ႈၸွမ်းပီႈယဝ်ႉဢိူဝ်ႈ…”
သႅင်ႁွမ်ယၵ်ႉတူၺ်းလႅင်းမိူင်း သမ်ႉပေႃးဢမ်ႇၸၢင်ႈလၢတ်ႈၵႂၢမ်းလႆႈယဝ်ႉ။
“ၵႂႃႇႁႃတီႈယဵၼ်ယဵၼ်သေဢုပ်ႇၵၼ်လႄႈၼႃႈ” ၶမ်းႁွမ်လၢတ်ႈၼင်ႇၸႂ်ယဵၼ်သေ ၸုင်ယိပ်းမိုဝ်းလုၵ်ႈမၼ်းယဝ်ႉ ဢွၼ်ၵၼ်ၵႂႃႇတီႈၼႂ်းပၢင်ပွႆးၼၼ်ႉယူႇ။
“ၸွင်ႇၵွႆႈဢုပ်ႇၵၼ်ဝၢႆးလင်ၼႃႈၼွင်ႉ…ပီႈတေၵႂႃႇၵွၼ်ႇ” လႅင်းမိူင်းပၢႆႈၽၢတ်ႇသႅင်ႁွမ် ၸွမ်းလင်ၶမ်းႁွမ်ၶဝ်ၶဝ်ႈၵႂႃႇၼႂ်းပၢင်ပွႆးၼၼ်ႉယဝ်ႉ။
သႅင်ႁွမ်ၼၼ်ႉတႄႉ သမ်ႉပေႃးဢမ်ႇႁူႉတေႁဵတ်းၸိူင်ႉႁိုဝ် တႃႇတေသိုပ်ႇယၢင်ႈၵႂႃႇတၢင်းၼႃႈၵေႃႈဢမ်ႇၸၢင်ႈ တေထွႆလင်ၵေႃႈဢမ်ႇလႆႈ လႆႈမႆႈယူႇတီႈၼႂ်းဢူၵ်း ၸူၵ်ႉတႅင်းယူႇၼႂ်းၸႂ် မိူဝ်ႈႁၼ်ၶဝ်လႅၼ်ႈလမ်းၸွမ်းၵေႃႉႁၵ်ႉၵဝ်ႇ ဢၼ်ႁၼ်သိုဝ်ႈၼႃႈသိုဝ်ႈတႃလႄႈ ၶေႃႈၵႂၢမ်းဢၼ်ၸူၵ်ႉတႅင်းၸူးၸႂ် ပဵၼ်ၽႂ်လႃႇတေဢမ်ႇမေႃၸဵပ်း မိူဝ်ႈၵေႃႉႁၵ်ႉသုတ်းႁူဝ်ၸႂ်ပွႆႇၽႃႈပႅတ်ႈၸိူင်ႉၼၼ်။
လႅင်းမိူင်းဢၼ်ၸွမ်းလင်ၶမ်းႁွမ်ၼၼ်ႉၵေႃႈ လႆႈဢဝ်ၶမ်းႁွမ်ပၢႆႈၽၢတ်ႇသၢႆတႃမၼ်းၵႂႃႇယူႇယဝ်ႉ။ ယူႇၼိူဝ်ၶဵင်ႇသိူဝ်ဝႅၼ်ၼၼ်ႉၵေႃႈ ဢမ်ႇလႆႈႁၼ်သေဢိတ်း ၵူၺ်းဝၢႆႇႁၼ်မႅၼ်ႈၺႃး သႅင်ႁွမ် ဢၼ်ၼင်ႈယူႇတီႈၼႃႈႁွင်ႈၼႄပိုၼ်းၼၼ်ႉ ဢဝ်မၼ်းသမ်ႉပေႃးဢိုၵ်ႉၼိုၵ်ႉၸႂ်မႃးသေ ထူၺ်ႈၸႂ်လူင်ယဝ်ႉၵေႃႈ လူင်းၼိူဝ်ၶဵင်ႇၼၼ်ႉလႄႈ ပႆလူင်းၵႂႃႇၸူးသႅင်ႁွမ်ၶိုၼ်းယဝ်ႉ။
“လုၵ်ႉလႆႈယဝ်ႉၼႃႈ…”
“ပီႈပွႆႇၶႃႈၵႂႃႇပႅတ်ႈယဝ်ႉ…မႃးၶိုၼ်းႁဵတ်းသင်…”
ၵႂႃႇၼင်ႈတီႈဢၼ်ၶႃၶမ်းႁွမ်ၼင်ႈမိူဝ်ႈၵႆႈၼၼ်ႉသေယဝ်ႉ။
“ပီႈၼွမ်းၽိတ်း…ပီႈဢမ်ႇမီးၶေႃႈၵႄႈတူဝ်သင်ယဝ်ႉၼႃႈ…”
“ပဵၼ်သင်လႄႈလၢတ်ႈသိုဝ်ႈတႃႇသေႇလႃႇ…လႅၼ်ၵၼ်ၽွင်ႈဢမ်ႇလႆႈႁႃႉ…ၶႃႈတေတၢႆယူႇယဝ်ႉ” ဢဝ်မိုဝ်းဢွၼ်ႇမၼ်းပေႃႉပေႃႉထုပ်ႉထုပ်ႉသႂ်ႇလႅင်းမိူင်း သမ်ႉပေႃးဢမ်ႇၸၢင်ႈႁႄႉႁၢမ်ႈသင်လႆႈၼၼ်ႉယဝ်ႉ။
ၶမ်းႁွမ်ၵေႃႈမိူဝ်ႈဢၢင်ႈတေၶဝ်ႈၵႂႃႇၼႂ်းပၢင်ပွႆးၼၼ်ႉ သမ်ႉႁူပ်ႉမႅၼ်ႈၺႃးယိင်းသႅင်ၸွမ်းတၢင်းလႄႈ တူင်ႉတၵ်ႉၵၼ်သေ ၸူဝ်းၵၼ်ဢွၵ်ႇပၢင်ပွႆးမႃးယဝ်ႉ။
“သူမႃးလိုဝ်ႈတီႈလႂ်လႃႇ…ၸဵမ်ဝၼ်းၼၼ်ႉၵေႃႈဢမ်ႇလႆႈၵပ်းသိုပ်ႇၵၼ်ထႅင်ႈ”
“ႁဝ်းမႃးလိုဝ်ႈတီႈႁိူၼ်းဢူၺ်းၵေႃႉ…”
“ဢူၺ်းၵေႃႉၵေႃႉလႂ်…ၸွင်ႇႁဝ်းႁူႉၸၵ်းႁိုဝ်…ဢမ်ႇၼၼ်ပဵၼ်ၵူၼ်းဢၼ်ႁဝ်းႁူႉၸၵ်းယူႇ”
“ႁဝ်းၵေႃႈဢမ်ႇႁူႉၼႃ…ဢူၺ်းၵေႃႉဢၼ်ႁဝ်းယၢမ်ႈၶိုၼ်ႈပၢင်ၽိုၵ်းၽွၼ်ႉၸွမ်းၵၼ်မိူဝ်ႈႁဝ်းတႄႇမႃးတီႈၼႆႈၼၼ်ႉယဝ်ႉ”
ယိင်းသႅင်ယၵ်ႉတူၺ်းဢွၼ်ႇယိင်းၼၼ်ႉလႄႈဢွၼ်ႇၸၢႆးၼၼ်ႉသေ
“ဢမ်ႇၸႂ်ႈၼေႃႇမိူင်းႁိုဝ်လႃႇ…ၵေႃႉယႂ်ႇပဵၼ်မၢဝ်ႇယဝ်ႉလူး…ၵေႃႉၼႆႉၼႃႇလုၵ်ႈသူၵူၺ်းယူဝ်ႉၼႆႉ…သူပ်းမွင်ႉမွင်ႉၼႃႈသဵမ်ႈသဵမ်ႈမိူၼ်သူၼႃႇလူး”
“ၸႂ်ႈယဝ်ႉဝႃႈ…”
“လႆႈလၢႆၶူပ်ႇယဝ်ႉလႃႇ…”
“သၢမ်ၶူပ်ႇပၢႆ…”
ဢဝ်ယိင်းသႅင်မိူၼ်ႇၼႃႈတူၵ်းၸႂ်သေယုမ်ႉၸုတ်းၵုတ်းယဝ်ႉ။
“ပဵၼ်ၵူၼ်းလိူၼ်လႂ်လႃႇ”
“ပဵၼ်ၵူၼ်းလိူၼ်ၵဝ်ႈ”
“လိူၼ်တႆးႁႃႉဢင်းၵိတ်ႉ”
“ဢင်းၵိတ်ႉ…တေဢဝ်မိူဝ်းႁဵတ်းလုၵ်ႈပႂ်ႉႁႃႉထၢမ်ၸေးပေႃးတၢၼ်ႇၼႆႉ”
“ဢိုမ်ႈ…ႁဝ်းၵေႃႈမီးလုၵ်ႈၸၢႆးယဝ်ႉဢိူဝ်ႈ”
“ၸႂ်ႈႁႃႉ…”
“ၶႂ်ႈဝႃႈပေႃးမႃးၼပ်ႉတူၺ်းလီလီယဝ်ႉၺႃးလိူၼ်ဢၼ်ႁဝ်းဢွၵ်ႇမႃးၼၼ်ႉလီလီလူး” ဢဝ်ယိင်းသႅင်ယုမ်ႉယုမ်ႉဢၢႆဢၢႆဢွၵ်ႇမႃးယူႇ။
မိူၼ်ၶမ်းႁွမ်တေႁူႉတူဝ်မႃးလႄႈ “သူႁူႉ..”
“ႁူႉၽႅဝ်လေႃႇ…ၸွင်ႇႁဝ်းပေႃးဢမ်ႇၸၢင်ႈမိူဝ်းၼွၼ်းႁိူၼ်းလႆႈ”
“လုၵ်ႈဢွၼ်ႇထွမ်ႇယူႇၼႃႈ…”
“ပေႃးဢမ်ႇမီးၶမ်ႈၼၼ်ႉၵေႃႈၶေးတေဢမ်ႇလႆႈႁၼ်လုၵ်ႈဢွၼ်ႇလီႁၵ်ႉၸိူင်ႉၼႆမႃးၼင်ႇၵဝ်ႇယဝ်ႈ”
ၶမ်းႁွမ်ၵေႃႈဢဝ်လုၵ်ႈဢွၼ်ႇမၼ်းၵႂႃႇၶီႇတၢင်းလဵၼ်ႈသေ သွင်ၶႃယိင်းသႅင်ၼင်ႈဢုပ်ႇၵၼ်ယူႇၼႂ်းသႅင်ႇၼၼ်ႉယဝ်ႉ။
“ယွၼ်ႉလွင်ႈၼႆႉသေဢဝ်ႁၢႆလူင်ၵႂႃႇဢိူဝ်ႈၼေႃႈ”
“ဢိုမ်ႈ..”
“သူၵေႃႈပဵၼ်ၵူၼ်းၸႂ်ႁၢႆႉဢမ်ႇဢေႇၼႃ…ၸႂ်ႁၢႆႉတေႃႇၶဝ်…ၸႂ်ႁၢႆႉတေႃႇလုၵ်ႈလုၵ်ႈသူ…လႄႈၸႂ်ႁၢႆႉတေႃႇတူဝ်သူတေႉယဝ်ႉ”
“သူလၢတ်ႈမႃးၵေႃႈၸႂ်ႈယူႇ”
“ၶဝ်လူးႁူႉယူႇႁႃႉ..”
“ႁဝ်းတိုၵ်ႉထူပ်းၶဝ်သေမႃးၺႃးသူၼႆႉယဝ်ႉ…တင်းၽူႈယိင်းဢၼ်ၶဝ်တေတေႇၼႃႈႁိူၼ်းၸွမ်း…သႅင်ႁွမ်ၼႆႁႃႉ…တူၺ်းမိူၼ်တေပဵၼ်ၽူႈယိင်းဢၼ်ႁၵ်ႉၶဝ်တေႉယဝ်ႉ…”
“ယဝ်ႉသူလူးဢမ်ႇႁၵ်ႉၶဝ်ၼႄႇ…”
သိုပ်ႇလူထႅင်ႈတွၼ်ႈတေမႃးၶႃႈ
