သဵင်ၵွင်ႈသဵင်မၢၵ်ႇလင်မေႃးပၼ်း ယွၼ်ႈႁူၺ်ႈယွၼ်ႈလွႆဢမ်ႇထၢတ်ႇဢမ်ႇဝၢႆးလႆႈ ၵမ်ႉလင်မေႃး တီႈၼိုင်ႈယဝ်ႉတီႈၼိုင်ႈ မၢၵ်ႇၵွင်ႈဢမ်ႇလိူၵ်ႈတၢင်း ယူႇတီႈၵူၼ်းဝၢင်းမိုဝ်းၵူၺ်းၼၼ်ႉယဝ်ႉ။ မိူဝ်ႈမၢၵ်ႇၵွင်ႈလင်မေႃး မၢၵ်ႇတႅၵ်ႇလင်မႃး ၵူၼ်းမိူင်းၸိူဝ်းယူႇႁိမ်းႁွမ်းၸိူဝ်းၼၼ်ႉၵေႃႈႁိုဝ်တေယူႇလႆႈ တႃႇတေလွတ်ႈသၢႆၸႂ်ၵႂႃႇလႆႈ ပၢႆႈၵႆယၢၼ်ပၢင်တိုၵ်းၼၼ်ႉ လႆႈတေႃႉၶူဝ်းသေဢွၵ်ႇပၢႆႈၽၢတ်ႇယၢၼ်ႁိူၼ်းယၢၼ်ယေး သမ်ႉဝႃႈတေမီးၶူဝ်းၶွင်ၵႃႈၶၼ်ယႂ်ႇ မီးၶူဝ်းၶွင်ဢၼ်သေလၢႆၵေႃႈ ဢမ်ႇၸၢင်ႈဢဝ်ၵႂႃႇပႃးလႆႈ ႁူႉၵႃႈတေလႆႈပၢႆႈပႅတ်ႈၵႂႃႇၵူၺ်းယဝ်ႉ။
သမ်ႉဝႃႈၶတ်းၸႂ်ပၢႆႈႁႂ်ႈပူၼ်ႉပၢင်တိုၵ်း ႁႂ်ႈပူၼ်ႉတၢင်းတၢႆၼႆသေတႃႉၵေႃႈ ဢမ်ႇၽွင်းလိူဝ်လႆႈ မိူဝ်ႈယူႇသဝ်းၼႂ်းၵႄႈပၢင်တိုၵ်း ၵႂႃႇၸွမ်းသဵၼ်ႈတၢင်းၵေႃႈၺႃးမၢၵ်ႇၵၢင်ဝႆႉလႄႈ လႆႈမၢတ်ႇၸဵပ်း လႆႈလူႉတၢႆၵႂႃႇၵေႃႈမီး။ မိူဝ်ႈယူႇၵႂႃႇၼႂ်းၵႄႈပၢင်တိုၵ်းယူႇၼၼ်ႉ ဢမ်ႇမေႃလၢႆးၵႅတ်ႇၶႄတူဝ် ဢမ်ႇႁူႉမေႃ လၢႆးဢဝ်တူဝ်လွတ်ႈ ဢမ်ႇမီးၵူၼ်းၵႅတ်ႇၶႄပၼ်ၵေႃႈ မၼ်းၵေႃႈတိုၼ်းတေမီးၵူၼ်းလႆႈမၢတ်ႇၸဵပ်း၊ တၢႆယူႇယဝ်ႉ။
သဵင်ၵွင်ႈဢွၵ်ႇၽၢႆႇလဵဝ်သေပဵၼ်ပၢင်တိုၵ်းၼၼ်ႉ မၼ်းၵေႃႈဢမ်ႇမီးၼင်ႇၵဝ်ႇ မိူဝ်ႈၽၢႆႇၼိုင်ႈယိုဝ်းမႃး ထႅင်ႈၽၢႆႇၼိုင်ႈၵေႃႈဢမ်ႇတုမ်ႉတွပ်ႇၶိုၼ်းၼၼ်ႉ မၼ်းမိူၼ်ပိူၼ်ႈမႃးယိုဝ်းသၢႆၸႂ်ႁဝ်းၵႂႃႇလၢႆလၢႆၵူၺ်း တႃႇၵႅတ်ႇၶႄတူဝ်လႄႈ လႆႈတုမ်ႉတွပ်ႇၵႂႃႇၶိုၼ်းၼၼ်ႉယဝ်ႉ။ မီးပၢင်တိုၵ်းၵေႃႈ မီးလွင်ႈသုၵ်ႉယုင်ႈ ဝၢၼ်ႈမိူင်းသုၵ်ႉယုင်ႈ ၵူၼ်းမိူင်းလႆႈပၢႆႈၽေးသိုၵ်း တွၼ်ႈတႃႇလွင်ႈလွတ်ႈၽေးၵူၼ်းမိူင်းၵေႃႈ သိုၵ်းၵေႃႈ တေလႆႈဢဝ်ႁူမ်ႇလူမ်ႈပၼ်ယဝ်ႉ။ ၸုမ်းၼူၵ်ႉဢႅၼ်ႇၾႃႉၶဝ်ၵေႃႈ လႆႈဢဝ်ႁႅင်းသိုၵ်းသေမႃးၽိူမ်ႉထႅမ်ၸွႆႈပၼ် တီႈပဵၼ်ပၢင်တိုၵ်းယူႇယဝ်ႉ။
ၸုမ်းတိုၵ်းၶိုၵ်ႉတွၼ်း ႁိုဝ်ႁွၼ်ႇယွမ်းၽႂ် တီႈၼႂ်းပၢင်တိုၵ်းသုၵ်ႉသၵ်ႉလူင်ၼၼ်ႉ တိုၼ်းတူင်ႉတိုၼ်ႇယူႇတႃႇသေႇ ႁႃလဵပ်ႈႁဵၼ်းငဝ်းလၢႆး သွၵ်ႈႁႃပၢႆးတိုၵ်းၶိုၵ်ႉၶႅမ်ႉယူႇတႃႇသေႇ ၵူၺ်းၵႃႈႁွတ်ႈမႃးပွၵ်ႈၼႆႉ ဢမ်ႇလႆႈမီးပဝ်ႉမၢႆတႅတ်ႈတေႃးလႄႈ လႆႈၶေႃႈၸိသင်ႇႁႂ်ႈမႃးၸွႆႈၼႆၵေႃႈလႆႈမႃးၵူၺ်း။ ဢမ်ႇလႆႈဝၢင်းၽႅၼ် ဢမ်ႇလႆႈႁၢင်ႈႁႅၼ်းဝႆႉ ဢမ်ႇမီးငဝ်းလၢႆးဢၼ်မၼ်ႈၼိမ် ဢမ်ႇၸႂ်ႈၵၢၼ်တိုၵ်းဢၼ်ၶဝ်ယၢမ်ႈႁဵတ်းမႃးမိူၼ်ၵူႈပွၵ်ႈ တေလႆႈတူၺ်းဢွင်ႈတီႈ ၶၢဝ်းယၢမ်းငဝ်းလၢႆးယဝ်ႉၸင်ႇႁဵတ်း။
ၸုမ်းၶဝ်ပဵၼ်ၸုမ်းသိုၵ်းၶိုၵ်ႉတွၼ်း ပဵၼ်ၸုမ်းႁဵတ်းၵၢၼ်လပ်ႉလႄႈ ဢမ်ႇၸႂ်ႈၸုမ်းဢၼ်တေ ဢွၵ်ႇၼႄတူဝ်လႆႈငၢႆႈငၢႆႈ။ တႃႇႁႂ်ႈပိူၼ်ႈတေဢမ်ႇၺွပ်းလႆႈၶဝ်ၼၼ်ႉ ၸုမ်းၶဝ်ၵေႃႈဢွၼ်ၵၼ်ဝၢင်းၽႅၼ် လွမ်ငွႆးယိုဝ်းၼႆသေ ၸင်ႇလႆႈဢွၼ်ႁဵတ်းသၢင်ႈၵႂႃႇယဝ်ႉ။ ၸွမ်းလူၺ်ႈပဵၼ်ၸုမ်းၶိုၵ်ႉတွၼ်းလႄႈ တိုၼ်းတေလႆႈမိုဝ်းမႅၼ်ႈ၊ ပဝ်ႉမၢႆမၼ်ႈၵိုမ်း၊ မၢၵ်ႇၵွင်ႈၼိုင်ႈလုၵ်ႈ ၵူၼ်းလူဝ်ႇတၢႆၼိုင်ႈၵေႃႉ၊ ယိူင်းဢဝ်တီႈႁူဝ်လၢႆလၢႆ ယိုဝ်းဢမ်ႇတၢႆၵေႃႈ တိုၼ်းတေလႆႈႁႂ်ႈဝၢတ်ႇၼၼ်ႉယဝ်ႉ။
တီႈၼႂ်းပၢင်တိုၵ်းသုၵ်ႉယုင်ႈယူႇၼၼ်ႉ ယူႇယူႇၵေႃႈသဵင်ၵွင်ႈလင်မေႃးမႃးပဵၼ်ၵမ်း ပေႃးႁႃတူၺ်းသမ်ႉဢမ်ႇႁၼ် လၢမ်းယိုဝ်းဢေႃႇတေႃႇမၼ်း ပေႃးၸွတ်ႇႁူၺ်ႈၸွတ်ႇလွႆၵေႃႈဢမ်ႇႁၼ် ဢၼ်ႁၼ်တႄႉ ၵူၼ်းၶဝ်ၵူၺ်းဢၼ်လူမ်ႉတၢႆၵႂႃႇ။ ပေႃးၶဝ်ယဵၼ်ၵႂႃႇ မၢၵ်ႇၵွင်ႈၵေႃႈလင်မေႃးထႅင်ႈ ၵူၼ်းၶဝ်ၵေႃႈလူမ်ႉၵႂႃႇထႅင်ႈလႄႈ ၸင်ႇယိုဝ်းဢေႃႇတေႃႇသေ ယိုဝ်းပဵၼ်လၢႆၵမ်းၵေႃႈဢမ်ႇႁၼ်ၵူၼ်း။ ဢမ်ႇဝႃႈမိူဝ်ႈတိုၵ်ႉၼင်ႈၵိၼ်ၶဝ်ႈယူႇ ဢမ်ႇဝႃႈမိူဝ်ႈၶဝ်ႈၼွၼ်းယူႇၵေႃႈ မီးၵူၼ်းပႂ်ႉငွႆးယိုဝ်းယူႇတႃႇသေႇၼၼ်ႉယဝ်ႉ။
ယွၼ်ႉပိူဝ်ႈ ယူႇယူႇၵေႃႈမီးၵူၼ်းလၵ်ႉငွႆးယိုဝ်းတိၵ်းတိၵ်းလႄႈ ၵူၼ်းၽူႈၶဵၼ်ၶဝ်ၵေႃႈလႆႈတၢႆၵႂႃႇတင်းၼမ် ႁဵတ်းႁႂ်ႈၶဝ်ဢမ်ႇယူႇလႆႈ ၾၢင်ႉတူဝ်ယူႇတႃႇသေႇၼၼ်ႉယဝ်ႉ။ သမ်ႉဝႃႈၾၢင်ႉတူဝ်ယူႇၼႆသေ တႃႉၵေႃႈ ၵူၼ်းၶဝ်ၵေႃႈယင်းတိုၵ်ႉထုၵ်ႇငွႆးယိုဝ်းယူႇတိၵ်းတိၵ်း။ ၶဝ်လႆႈၽိူမ်ႉႁႅင်းၵူၼ်း မႃးထႅင်ႈ ၽိူမ်ႉလွင်ႈႁူမ်ႇလူမ်ႈထႅင်ႈ ယိုင်ႈၽိူမ်ႉၵူၼ်းၼမ်မႃးၵႃႈႁိုဝ်ၵေႃႈ ယိုင်ႈၶႅၼ်းႁဵတ်းႁႂ်ႈၵူၼ်းၶဝ်တၢႆၼမ်မႃးမွၵ်ႈၼၼ်ႉယဝ်ႉ။
ၵူၼ်းၶဝ်တၢႆယွၼ်ႉၵူၼ်းလွမ်ငွႆးယိုဝ်းၼၼ်ႉၼမ်ၼႃႇလႄႈ တူဝ်ၵေႃႈသမ်ႉ ဢမ်ႇႁၼ် ၵူၼ်းသမ်ႉတၢႆယူႇတိၵ်းတိၵ်းၸိူင်ႉၼၼ် ႁဵတ်းႁႂ်ႈႁႅင်းၸႂ်တူၵ်းမႃး ၵမ်ႈၽွင်ႈႁၵ်ႉတူဝ်ၵူဝ်တၢႆၵေႃႈလႆႈလၵ်ႉပၢႆႈၵႂႃႇထႅင်ႈ ႁဵတ်းႁႂ်ႈဢဵၼ်ႁႅင်းၶဝ်ယွမ်းမႃးတင်းၼမ်ယူႇ။ ၸွမ်းလူၺ်ႈဢဵၼ်ႁႅင်းၵူၼ်း မီးၵူၼ်းတၢႆၼမ်လိူဝ်ၵူၼ်းၵိုတ်းသွင်ပုၼ်ႈယဝ်ႉ။ ၵမ်ႈၼမ်ဢၼ်လႆႈတၢႆၵႂႃႇၼႆႉ ဢမ်ႇၸႂ်ႈယွၼ်ႉ ပၢင်တိုၵ်းသေတၢႆ တေပဵၼ်ယွၼ်ႉငွႆးယိုဝ်းလႄႈတၢႆၵႂႃႇၼၼ်ႉယဝ်ႉ ၶဝ်ၵေႃႈဢမ်ႇၶၢမ်ႇလႆႈယဝ်ႉလႄႈ ၽူႈၵွၼ်းတပ်ႉၶဝ်ၸိူဝ်းၼၼ်ႉၵေႃႈ လႆႈဢွၼ်ဢဝ်လုၵ်ႈၼွင်ႉမၼ်းထွႆၵႂႃႇၶိုၼ်းသေ ဢွၼ်ဢဝ်ပွၵ်ႈမိူဝ်း ၶိုၼ်းယူႇယဝ်ႉ။
ၸုမ်းၼူၵ်ႉဢႅၼ်ႇၾႃႉၶဝ် ဢဝ်ဢဵၼ်ႁႅင်းမႃးၸွႆႈမီးသွင်ဝူင်ႈလိူဝ်လိူဝ်ယဝ်ႉ ၽူႈၶဵၼ်ၸိူဝ်းၼၼ်ႉၵေႃႈ တင်းတၢႆတင်းႁၢႆတင်းပၢႆႈ လႄႈထွႆၵႂႃႇၵမ်းဢိတ်းၵမ်းဢိတ်း ပၢင်တိုၵ်းၵေႃႈလႆႈႁၢႆၵႂႃႇယူႇ။ ၸုမ်းၼူၵ်ႉဢႅၼ်ႇၾႃႉၶဝ်ၵေႃႈလႆႈထွႆပွၵ်ႈမိူဝ်းၵႂႃႇၶိုၼ်းယဝ်ႉ။
မိူဝ်ႈတိုၵ်ႉဢွၵ်ႇၶၢဝ်းတၢင်းမိူဝ်းယူႇၼၼ်ႉ လႆႈထူပ်းႁၼ်သိုၵ်းၸုမ်းၼိုင်ႈ ပေႉၵိၼ်ႁႅမ်ၽူႈယိင်းၵေႃႉၼိုင်ႈယူႇတီႈၼႂ်းၵၢင်တၢင်းယဝ်ႉ ၽူႈယိင်းၵေႃႉၼၼ်ႉၵေႃႈ တင်းႁွင်ႉတၢင်းႁႆႈ။ ၵူၺ်းၵႃႈၵူၼ်းၸိူဝ်းၼၼ်ႉၵေႃႈယိုင်ႈႁဵတ်းႁၢႆႉမၼ်းထႅင်ႈ လႄႈၵမ်းၼၼ်ႉသမ်ႉမီးလုၵ်ႈဢွၼ်ႇၵေႃႉၼိုင်ႈ လႅၼ်ႈၶဝ်ႈမႃးၸူး ၵူၼ်းၸိူဝ်းၼၼ်ႉၵေႃႈ ပေႃႉထုပ်ႉပႃးလုၵ်ႈဢွၼ်ႇထႅင်ႈ။ လႅင်းမိူင်းၵေႃႈ မိူဝ်ႈတူၺ်းႁၼ်ၸိူင်ႉၼၼ်ယဝ်ႉ ႁိုဝ်တေယဵၼ်ႉၸႂ်လႆႈ လူင်းလူတ်ႉဢွၵ်ႇမႃးယဝ်ႉ ပုင်ႈၶဝ်ႈၵႂႃႇတီႈၼႂ်းၽုင်ၵူၼ်းၸိူဝ်းၼၼ်ႉလႄႈ ၶဝ်ႈၵႂႃႇၵႅတ်ႇၶႄပၼ်လုၵ်ႈဢွၼ်ႇ တင်းၽူႈယိင်းၵေႃႉၼၼ်ႉယူႇ လုၵ်ႈၼွင်ႉမၼ်းၸိူဝ်းၼၼ်ႉၵေႃႈ ႁိုဝ်တၼ်းႁၢမ်ႈလႆႈ။
ၵူၼ်းၸိူဝ်းၼၼ်ႉပႃးၵွင်ႈတဵမ်မိုဝ်း ၵူၺ်းၵႃႈလႅင်းမိူင်းဢမ်ႇလႆႈပႃးသင်လူင်းလူတ်ႉသေဢိတ်း မၼ်းၵေႃႈတေမိူၼ်ပဵၼ်ၵူၼ်းမိူင်းၵေႃႉၼိုင်ႈၼၼ်ႉယူႇ။ ၵူၼ်းၸိူဝ်းၼၼ်ႉ ႁၼ်လႅင်းမိူင်းယဝ်ႉ။
“မႂ်းမႃးႁဵတ်းသင်…မႂ်းဢမ်ႇႁၼ်ႁႃႉ…ႁဝ်းတိုၵ်ႉႁဵတ်းသင်ယူႇ…မႂ်းၶႂ်ႈတၢႆႁႃႉတေႃႈ…”
ၵူၼ်းၸိူဝ်းၼၼ်ႉၵေႃႈ ဢဝ်ၵွင်ႈငႃၸူးတီႈမၼ်းၵႂႃႇယဝ်ႉ
“ၵဝ်ႁၼ်လႄႈၵဝ်မႃး…ယဝ်ႉၵေႃႈမိူဝ်ႈၼႆႉပႆႇၸႂ်ႈဝၼ်းတၢႆၵဝ်…သူႁဵတ်းၸိူင်ႉၼႆ…မၼ်းထုၵ်ႇယူႇႁႃႉ…ၽူႈယိင်းလႄႈလုၵ်ႈဢွၼ်ႇမီးတၢင်းၽိတ်းသင်လႃႇ…ထိုင်တီႈပေႃးလႆႈႁဵတ်းႁၢႆႉၶဝ်…”
“ဢမ်ႇၵပ်းၵၢႆႇသင်တင်းမႂ်း!…မႂ်းယႃႇမႃးၵဝ်းၸွမ်း!…”
ၶဝ်ၵေႃႈဢၢင်ႈႁႅမ်လုၵ်ႈဢွၼ်ႇယူႇ ယၢမ်းၼၼ်ႉ လႅင်းမိူင်းၵေႃႈ ႁပ်ႉဢဝ်မိုဝ်းၵူၼ်းၵေႃႉဢၼ်ႁႅမ်ၼၼ်ႉယဝ်ႉ ၸုမ်းၶဝ်ၵေႃႈဢွၼ်သၢင်းၵွင်ႈသေ ဢၢၼ်းတေၼၢဝ်ႉၼဵၼ်ၵွင်ႈယူႇ ၵူၺ်းၵႃႈလႅင်းမိူင်းဢဝ်ၵူၼ်းၵေႃႉၼၼ်ႉ မႃးယူႇတၢင်းၼႃႈမၼ်းပႅတ်ႈ လႄႈ ၵူၼ်းၸိူဝ်းၼၼ်ႉၵေႃႈလႆႈၵိုတ်းယိုဝ်းၵႂႃႇၶိုၼ်း။
“ပေႃးဢမ်ႇၶႂ်ႈႁႂ်ႈဢၢႆႈၼႆႉတၢႆၵေႃႈ…ထွႆမိူဝ်းၵႂႃႇၶိုၼ်းလႄႈ…ပေႃးဢမ်ႇထွႆၵေႃႈ…သူတိုၼ်းတေဢမ်ႇမီးတိုဝ်ႉတၢင်းပွၵ်ႈမိူဝ်းၶိုၼ်းၼၼ်ႉယဝ်ႉ…” ပၼ်သၢႆငၢႆႁႂ်ႈလုၵ်ႈၼွင်ႉမၼ်းႁၢင်ႈႁႅၼ်းတူဝ်ယူႇ။
“မီးၵေႃႉလဵဝ်ၵူၺ်း…ႁတ်းမႃးၶဵင်ႇတႃႉႁဝ်းၸိူင်ႉၼႆ…မႂ်းဢမ်ႇဝူၼ်ႉဝႃႈၵူၼ်းၵေႃႉဢၼ်ဢမ်ႇၸၢင်ႈပွၵ်ႈမိူဝ်းၶိုၼ်းၼၼ်ႉ…တေပဵၼ်မႂ်းႁႃႉ…”
“ယွၼ်ႉပိူဝ်ႈဝႃႈ…မိူဝ်ႈၼႆႉဢမ်ႇပႆႇၸႂ်ႈဝၼ်းတၢႆၵဝ်…ၵူၺ်းၵႃႈဢၢႆႈဢၼ်ယူႇၼႂ်းမိုဝ်းၵဝ်ၼႆႉၵူၺ်းဢိူဝ်ႈ…တေပဵၼ်ဝၼ်းတၢႆမၼ်း…သင်သူၸွႆႈမၼ်းၵေႃႈ…တေဢမ်ႇတၢႆၼင်ႇၵဝ်ႇ…သူတေသုမ်းၵူၼ်းသိုၵ်းလီလီသူၵႂႃႇသေ…လႅၵ်ႈဢဝ်ဢသၢၵ်ႈၵူၼ်းပႅတ်ႈလၢႆၸိူင်ႉၼင်ႇၵဝ်လႆႈယူႇႁႃႉ…”
“ၸွင်ႇမႂ်းယၢမ်ႈႁၼ်ႁႃႉ…ၵူၼ်းႁၢႆႉၺွပ်းၵူၼ်းလီဢဝ်ႁဵတ်းတူဝ်ၶၢမ်ႇသေ…လိုၼ်းသုတ်းမႃးၵေႃႈၵူၼ်းႁၢႆႉၵူၺ်းတၢႆ…”
“ၼၼ်ႉမၼ်းပဵၼ်ၼႂ်းၸိူင်းၵူၺ်း…ၵူၺ်းၵႃႈၼႆႉ…ၵူၼ်းလီၺွပ်းၵူၺ်းႁၢႆႉမႃးပဵၼ်တူဝ်ၶၢမ်ႇ…ၸုမ်းသူဝူၼ်ႉဝႃႈ…ၵူၼ်းႁၢႆႉတေပေႉလႆႈယူႇႁႃႉ…သင်ၸိူဝ်ႉဝႃႈၵူၼ်းႁၢႆႉပေႉ…ၼႂ်းမိူင်းႁဝ်းၼႆႉတေဢမ်ႇမီးၽႂ်ယူႇလႆႈယဝ်ႉ…” လႅင်းမိူင်းၵေႃႈ ၺွပ်းတူဝ်ၵူၼ်းၵေႃႉၼၼ်ႉ ၵႂႃႇၸူးသွင်ၵေႃႉမႄႈလုၵ်ႈၼၼ်ႉသေ ႁႂ်ႈသွင်ၵေႃႉမႄႈလုၵ်ႈၼၼ်ႉ ထွႆဢွၵ်ႇၵႂႃႇယူႇ။ မိူဝ်ႈယၢမ်းသွင်ၵေႃႉမႄႈလုၵ်ႈ ထွႆဢွၵ်ႇၵႂႃႇၼၼ်ႉ မီးၵူၼ်းၵေႃႉဢၼ်ယူႇတၢင်းၶၢင်ႈၼၼ်ႉ ငႃၵွင်ႈယိုဝ်းသႂ်ႇသွင်ၵေႃႉမႄႈလုၵ်ႈၼႆယူႇ ၵူၺ်းၵႃႈလႅင်းမိူင်းလႅတ်းဢွၼ်တၢင်းလႄႈ ဢီးဢၢႆႈဢၼ်ၺွပ်းဝႆႉၼၼ်ႉသႂ်ႇသေ ဢၢႆႈၵေႃႉၼၼ်ႉၵေႃႈ လူမ်ႉလူင်းတၢႆၵႂႃႇၵမ်းလဵဝ် ယၢမ်းၼၼ်ႉၶဝ်ၵေႃႈဢဝ်ပၢႆၵွင်ႈ ယိူင်းၸူးတီႈမၼ်းမူတ်းမူတ်းသေယဝ်ႉ ၶဝ်ၸိူဝ်းၼၼ်ႉၵေႃႈဢွၼ်ၵၼ်ၶူဝ်မၼ်းယူႇ။
“မီးလႂ်လႃႇၽႂ်ၵေႃႉလၢတ်ႈလႃႇဝႃႈဢမ်ႇၸႂ်ႈဝၼ်းတၢႆမႂ်း…”
ၶဝ်ၵေႃႈဢွၼ်ၵၼ်လွမ်ႉလႅင်းမိူင်းတၢင်းသွင်ၵေႃႉမႄႈလုၵ်ႈၼၼ်ႉသေ မိူဝ်ႈၶဝ်တိုၵ်ႉလွမ်ႉဝႆႉယူႇၼၼ်ႉ လႅင်းမိူင်းၵေႃႈ ၵိုင်ႉၵၢင်ႉၵူမ်ႈလူင်း ၵွတ်ႇဢဝ်လုၵ်ႈဢွၼ်ႇလႄႈ ဢဝ်တူဝ်မၼ်းႁႄႉဝႆႉ သွင်မႄႈလုၵ်ႈၼၼ်ႉ ဢမ်ႇပၼ်ႁႂ်ႈႁၼ်သင်ၼႆယူႇ။ ယၢမ်းၼၼ်ႉ သဵင်ၵွင်ႈၵေႃႈလင်မေႃးမႃးၽွမ်ႉၵၼ် ႁဵတ်းႁႂ်ႈၵူၼ်းၸိူဝ်းဢၼ်ယူႇၽၢႆႇလင်ၼၼ်ႉ လူမ်ႉလူင်းၵႂႃႇမူတ်းယူႇ။ ဝၢႆးသဵင်ၵွင်ႈယဵၼ် လိူတ်ႈလႅင်လႅင်ၼၼ်ႉၵေႃႈ လႆႈလႆဢွၵ်ႇမႃးတီႈတၢင်းၵွင်းလင်လႅင်းမိူင်းၼၼ်ႉၵမ်းလွႆးလွႆးယဝ်ႉ လုၵ်ႈဢွၼ်ႇႁၼ်ယဝ်ႉၵေႃႈ တူၵ်းၸႂ်သေ ႁွင်ႉဢွၵ်ႇမႃး။
“လိူတ်ႈ!!…လိူတ်ႈဢေႃႈမႄႈ…” ၶဝ်ၵေႃႈဢွၵ်ႇၵႂႃႇၵႆတူဝ်လႅင်းမိူင်းယဝ်ႉ ၵူၺ်းၵႃႈလႅင်းမိူင်းသမ်ႉပေႃးဢမ်ႇႁူႉၼိူဝ်ႉယဝ်ႉလူး။
သိုပ်ႇလူထႅင်ႈတွၼ်ႈတေမႃးၶႃႈ
