သၢႆလႅင်းတႃဝၼ်းထွင်ႇႁိူဝ်ႈလႅင်းမႃး ပႃးတင်းမွၵ်ႇၵုမ်ႈၶႅပ်းၶပ်ႉယႆၸႅၼ်ႇတၢမ်းၵၼ် ပဵၼ်ဢၼ်ႁၢင်ႈလီထုၵ်ႇတႃတေႉၼၼ်ႉယဝ်ႉ။ တွင်ႉၾႃႉသွမ်ႇသွမ်ႇၼၼ်ႉသေ မုင်ႈတူၺ်းၵႂႃႇၼိူဝ်ၵၢင်ႁၢဝ်ၼၼ်ႉၵေႃႈ ၸိုင်ပေႉၸိုၼ်ႈပၢင်ႇသႂ် ၶမ်းႁွမ်ဢွၵ်ႇၶၢဝ်းတၢင်းမႃး ပႃးတင်းလူမ်းယဵၼ်ယဵၼ်ၼၼ်ႉယူႇ။
ယိင်းသႅင်ၵေႃႈ ႁူႉဝႃႈထိုင်ဝၼ်းဢၼ်ၶမ်းႁွမ်တေပွၵ်ႈမႃးလႄႈ လႆႈႁၢင်ႈၶိူင်ႈႁၢင်ႈၽၢင်သေ ႁၢင်ႈႁႅၼ်းတူဝ် ဢွၵ်ႇၶၢဝ်းတၢင်းမိူဝ်းဝဵင်းၸဵမ်ၸဝ်ႉ။ မိူဝ်ႈယင်းတိုၵ်ႉမိူဝ်းၸွမ်းတၢင်း ၸမ်တေႁွတ်ႈဝဵင်းၼၼ်ႉ လႆႈႁၼ်လႅင်းမိူင်းတင်းၸၢႆးၶိူဝ်း ၶီႇလူတ်ႉလုၵ်ႉမႃးတၢင်းဝဵင်းၼၼ်ႉသေ ၶႃလႆႈႁၼ်ယိင်းသႅင်ၼႆၵေႃႈ ၼႅတ်ႈၵိုတ်းလူတ်ႉႁႄႉဝႆႉ
“မိူဝ်းဝဵင်းႁႃႉ?…” လႅင်းမိူင်းထၢမ်
“ၸႂ်ႈယဝ်ႉၶႃႈ…”
“မိူဝ်းႁဵတ်းသင်လႃႇ…သိုဝ်ႉၶူဝ်းႁႃႉ?…ႁႂ်ႈၸၢႆးၶိူဝ်းမိူဝ်းတေႃႉၸွႆႈၼႄႇ”
“ဢမ်ႇၸႂ်ႈၶႃႈ..မိူဝ်းႁပ်ႉၶမ်းႁွမ်ၶႃ…”
“ၸိူင်ႉၼၼ်ႁႃႉ!…ပိၼ်ႇႁူဝ်လူတ်ႉႁႃးလႄႈသြႃႇ..” လႅင်းမိူင်းၼႅတ်ႈၸႂ်ႉၸၢႆးၶိူဝ်းပိၼ်ႇႁူဝ်လူတ်ႉမၼ်းမိူဝ်းဝဵင်းၶိုၼ်းယူႇ။
လႅင်းမိူင်းတႄႉပႂ်ႉၶမ်းႁွမ်ယူႇတီႈႁိူၼ်း ၸၢႆးၶိူဝ်းၵေႃႈ ၵႂႃႇၸွႆႈသိုဝ်ႉၶူဝ်းၶွင်ယိင်းသႅင်တီႈၼႂ်းၵၢတ်ႇယဝ်ႉ။ ၸၢႆးၶိူဝ်းၵႂႃႇႁိမ်းယိင်းသႅင်သေ
“မိူဝ်ႈၼႆႉ…သူပေႉပိူင်ႈႁူပိူင်ႈတႃၼႃႇလႃႇ…”
“ႁၢင်ႈလီၸွင်ႇၸႂ်ႈ…”
“တေဝႃႈၸႂ်ႈၵေႃႈသမ်ႉပိူင်ႈပိူင်ႈဝႆႉ…”
“ဢမ်ႇႁၢင်ႈလီႁႃႉ…”
“ပေႃးလၢတ်ႈသိုဝ်ႈသိုဝ်ႈ…သူၵေႃႈႁၢင်ႈလီယူႇတႃႇသေႇၼၼ်ႉယဝ်ႉ…ႁဵတ်းႁၢင်ႈႁိုဝ်ဢမ်ႇႁဵတ်း…မၼ်းၵေႃႈတိုၵ်ႉပဵၼ်ယိင်းသႅင်ႁဝ်းယူႇၵူၺ်း…ႁၢင်ႈလီဢမ်ႇႁၢင်ႈလီ…ၸိုဝ်ႈသူၵေႃႈဢမ်ႇလၢႆႈၼင်ႇၵဝ်…”
ယိင်းသႅင်ၵေႃႈဢမ်ႇၸၢင်ႈလၢတ်ႈသင်သေ လၵ်ႉယုမ်ႉယူႇႁင်းၵူၺ်းယဝ်ႉ ၵႂႃႇပႅတ်ႈဢွၼ်တၢင်းယူႇ။
ၶဝ်ဢွၼ်ၵၼ်ပႂ်ႉၶမ်းႁွမ်ယူႇတင်းႁိုင်ယဝ်ႉ ဢမ်ႇႁၼ်ႁွတ်ႈမႃးသေပွၵ်ႈလႄႈ လႅင်းမိူင်းၵေႃႈ တေပဵၼ်ၵူၼ်းၵေႃႉပႂ်ႉၵူၺ်းၼႆသေ ႁႂ်ႈၸၢႆးၶိူဝ်းၶႃမိူဝ်းထႃႈယူႇ။ လႅင်းမိူင်းပႂ်ႉသမ်ႉပေႃးထိုင်ဝၢႆးဝၼ်း ဢမ်ႇလႆႈႁၼ်ၶမ်းႁွမ်ႁွတ်ႈမႃးသေပွၵ်ႈ။ မိူဝ်ႈယၢမ်းတိုၵ်ႉပႂ်ႉယူႇၼၼ်ႉ ၵိုင်ႉၵၢင်ႉမီးၵၢၼ်လမ်ႇလွင်ႈႁႂ်ႈၵႂႃႇၵမ်းလဵဝ်ၼႆသေ လႆႈၵႂႃႇပႅတ်ႈယဝ်ႉ။ ဝၢႆးသေလႅင်းမိူင်းဢွၵ်ႇၵႂႃႇ ဢမ်ႇႁိုင်သင် ၶမ်းႁွမ်လႄႈၼေႃႇမိူင်းၵေႃႈလႆႈႁွတ်ႈမႃး မိူဝ်ႈဝၢင်းၶူဝ်းလူင်းၼၼ်ႉ ၵူၼ်းပႂ်ႉတီႈႁိူၼ်းၵေႃႈ။
“သူမႃးတူၵ်းလိုၼ်းပႅတ်ႈဢိတ်းၼိုင်ႈဢေႃႈ…ၵူၼ်းမႃးပႂ်ႉႁပ်ႉသူၼၼ်ႉ…တိုၵ်ႉပွၵ်ႈမိူဝ်းၵႂႃႇမိူဝ်ႈၵႆႈၼႆႉၵူၺ်း…ၶဝ်လၢတ်ႈဝႆႉႁႂ်ႈသူၵႂႃႇတီႈမႄးလူတ်ႉၸၢႆးၶမ်းၶဝ်ၼႆဝႃႇ…” ဢဝ်ၸေႈၽိုၼ်ၼိုင်ႈဢၼ်ပဵၼ်ဢွင်ႈတီႈလႄႈသဵၼ်ႈတၢင်း တီႈမေးလူတ်ႉၸၢႆးၶမ်း ဢၼ်လႅင်းမိူင်းၽၢၵ်ႇဝႆႉပၼ်ၼၼ်ႉ ပၼ်ၶမ်းႁွမ်ၵႂႃႇ။
ၶမ်းႁွမ်ၸုင်ဢဝ်မိုဝ်းၼေႃႇမိူင်းသေ တူၺ်းၸေႈယဝ်ႉၵႂႃႇၸွမ်းသဵၼ်ႈတၢင်းၼၼ်ႉလွႆးလွႆး ႁွတ်ႈၵႂႃႇတီႈၼႃႈသႅင်ႇယဝ်ႉလႄႈ ဢမ်ႇလႆႈႁၼ်ၽႂ် မၼ်းၵေႃႈပႆၶဝ်ႈၵႂႃႇၼႂ်းသႅင်ႇၼၼ်ႉသေ ယၢမ်းၼၼ်ႉ မီးၽူႈၸၢႆးၵေႃႉၼိုင်ႈမႃး တူင်ႉတၵ်ႉမၼ်း
“သူ…ပဵၼ်ၶမ်းႁွမ်ၸွင်ႇၸႂ်ႈၶႃႈ…”
“ၸႂ်ႈယဝ်ႉၶႃႈ…သူပဵၼ်……”
“ႁဝ်းပဵၼ်ၸၢႆးၶမ်း…ဢူၺ်းၵေႃႉလႅင်းမိူင်း…လႅင်းမိူင်းလၢတ်ႈဝႆႉမူတ်းယဝ်ႉ…ပေႃးဝႃႈသူႁွတ်ႈမႃး…ႁႂ်ႈႁဝ်းမိူဝ်းသူင်ႇသူသွင်ၵေႃႉၼႆဝႃႇ…”
“လႅင်းမိူင်းၼႆၶႃႈႁႃႉ!…” ၶမ်းႁွမ်တူၵ်းၸႂ်မႃး ယွၼ်ႉမၼ်းဝူၼ်ႉဝႃႈယိင်းသႅင်တေမႃးႁပ်ႉမၼ်း ၵူၺ်းၵႃႈသမ်ႉမႃးပဵၼ်လႅင်းမိူင်းပႅတ်ႈ။
“ပဵၼ်သင်ၶႃႈ…”
“ဢေႃႈ..ဢမ်ႇပဵၼ်သင်ၶႃႈ…မီးလႅင်းမိူင်းၵူၺ်းၶႃႈႁႃႉ…”
“ႁၼ်မၼ်းမႃးၵေႃႉလဵဝ်ၵူၺ်း…ပႂ်ႉၵမ်းၼိုင်ႈၶႃႈလႄႈ…ၶႃႈတေမိူဝ်းသူင်ႇ…”
ၸၢႆၶမ်းၵေႃႈ ၵႂႃႇဢဝ်လူတ်ႉဢွၵ်ႇမႃးႁပ်ႉၶမ်းႁွမ်းၶႃမိူဝ်းၵႂႃႇယဝ်ႉ။ မိူဝ်ႈမိူဝ်းၸွမ်းတၢင်းၼၼ်ႉ သွင်ၶႃၵေႃႈဢုပ်ႇၵၼ်လူင်မိူဝ်း။
“သူပဵၼ်မေႃသွၼ်တီႈဝၢၼ်ႈၼႆႉမႃးႁိုင်ယဝ်ႉၶႃႈႁႃႉ…”
“တိုၵ်ႉမႃးပီၼႆႉၵူၺ်းၶႃႈ…”
“ၸိူင်ႉၼၼ်ၶႃႈႁႃႉ…ၵေႃႈဝႃႈဢမ်ႇယၢမ်ႈႁၼ်မေႃသွၼ်သေပွၵ်ႈ”
“ၼၼ်ႉယဝ်ႉၶႃႈ…ပီႈၸၢႆးၶမ်းႁဝ်း…ႁဵတ်းႁိုဝ်ႁူႉၸၵ်းၵၼ်တင်းလႅင်းမိူင်းၶဝ်ၶႃႈလႃႇ..”
“ၸဵမ်မိူဝ်ႈၸဵတ်းပီပူၼ်ႉမႃးၼၼ်ႉၶႃႈယဝ်ႉ…မိူဝ်ႈၶႃႈၵႂႃႇၶိုၼ်ႈၸၼ်ႉၸွမ်ၼၼ်ႉၶႃႈယဝ်ႉ…မိူဝ်ႈမႃးၸွမ်းတၢင်းၼၼ်ႉ…မႃးၺႃးၸူၼ်ဢၢင်ႈၸူၼ်ၵႃးၶႃႈၸွမ်းတၢင်းၶႃႈဢေႃႈ…ၸူၼ်ၼၼ်ႉယိုဝ်းဢူၺ်းၵေႃႉၶႃႈတၢႆၵႂႃႇဢေႃႈ…ၶႃႈၵေႃႈဝူၼ်ႉဝႃႈၶႃႈတေဢမ်ႇလွတ်ႈယဝ်ႉ…မိူဝ်ႈငိၼ်းသဵင်ၵွင်ႈၶႃႈဝႃႈၶႃႈတၢႆယဝ်ႉ…ၵူၺ်းၵႃႈ ၵူၼ်းၵေႃႉဢၼ်တၢႆၼၼ်ႉသမ်ႉပဵၼ်ၸုမ်းၸူၼ်ၶဝ်ၼၼ်ႉယဝ်ႉ…တႄႇဢဝ်ၼၼ်ႉမႃး…ၶႃႈပဵၼ်ၼီႈၵုင်ႇမုၼ်ၶဝ်ၵေႃႈဝႃႈလႆႈၶႃႈယဝ်ႉ…”
ဢုပ်ႇၵၼ်လူင်မိူဝ်း တေႃႇပေႃးႁွတ်ႈထိုင်ႁိူၼ်းယူႇယဝ်ႉ။
ၽွင်းၶၢဝ်းလပ်းသိင်ႇၸွမ်ႉႁွမ်ႉၼၼ်ႉ ၶမ်းႁွမ်ၶႃၼေႃႇမိူင်းၵေႃႈ ဢွၼ်ၵၼ်ၶဝ်ႈမိူဝ်းၼႂ်းႁိူၼ်းဢၼ်လပ်းသိင်ႇၼၼ်ႉသေ ဢမ်ႇႁၼ်ယိင်းသႅင်လႄႈ ၸင်ႇၵႂႃႇထၢမ်တူၺ်းႁိူၼ်းႁိမ်းၼၼ်ႉသေ လႆႈႁူႉဝႃႈ
“ပႃႈၶမ်း…မေႃယႃၵႂႃႇတၢင်းလႂ်ၶႃႈ..ၸွင်ႇလႆႈလၢတ်ႈသင်ဝႆႉၶႃႈႁိုဝ်”
“ဢမ်ႇလႆႈလၢတ်ႈသင်ဝႆႉၶႃႈ”
“ဢေႃႈ…ၸူမ်းယဝ်ႉၶႃႈ…”
ၶမ်းႁွမ်ၵေႃႈလႆႈတၢင်းမွင်သေ ပွၵ်ႈမိူဝ်းၶိုၼ်း မိူဝ်ႈၶဝ်ႈမိူဝ်းပိုတ်ႇၾႆးပိူင်းလႅင်းယူႇၼၼ်ႉ ၸင်ႇသမ်ႉလႆႈႁၼ် ၽိုၼ်လိၵ်ႈတမ်းဝႆႉယူႇၼိူဝ်ၽိူၼ်ၼၼ်ႉ ၶမ်းႁွမ်ပိုတ်ႇဢၢၼ်ႇတူၺ်း
“ၶမ်းႁွမ်..ႁဝ်းတေဢမ်ႇယူႇႁိူၼ်းၸူဝ်ႈၶၢဝ်းၼႃႈ…ႁဝ်းတေပွၵ်ႈမႃးယူႇၸွမ်းသူၶိုၼ်းယူႇယႃႇမႆႈၸႂ်”
သိုပ်ႇလူထႅင်ႈတွၼ်ႈတေမႃးၶႃႈ။
