ဢပုမ်ႇတူၼ်ႈမႆႉၼႂ်းၸႂ်

တီႈဝၢၼ်ႈဢွၼ်ႇဝၢၼ်ႈၼိုင်ႈ မီးယူႇတီႈၼႂ်းထိူၼ်ႇၼၼ်ႉ မီးဢွၼ်ႇၸၢႆးၵေႃႉၼိုင်ႈ ပဵၼ်ၵူၼ်းလႅတ်းသႅဝ်း ၵူၺ်းၵႃႈ ၶီႈၶၢၼ်ႉ ဢမ်ႇၵႆႉႁဵတ်းၵၢၼ်တီႈႁိူၼ်း ၵႆႉၵႆႉႁႃၶေႃႈဢၢင်ႈတႃႇပၢႆႈၵၢၼ်တႃႇသေႇ။

ဝၼ်းၼိုင်ႈ ပူႇမၼ်းဢွၼ်ၵႂႃႇလႄႇၼႂ်းထိူၼ်ႇသေ ၵိုတ်းယူႇတီႈတူၼ်ႈမႆႉယႂ်ႇတူၼ်ႈၼိုင်ႈယဝ်ႉ။

“ၸၢႆး တူၺ်းတူၼ်ႈမႆႉၼႆႉလူး” ပူႇမၼ်းဢဝ်မိုဝ်းတူပ်းသႂ်ႇလမ်းတူၼ်ႈမႆႉၼၼ်ႉသေ “ဢမ်ႇၸႂ်ႈဝႃႈမၼ်းယႂ်ႇသုင်မႃးၼႂ်းၶၢဝ်းတၢင်းဝၼ်းလဵဝ်ၵူၺ်း မၼ်းလုၵ်ႉတီႈမဵတ်ႉၸိူဝ်ႉၽၼ်းလဵၵ်ႉလဵၵ်ႉဢွၼ် ဢၼ်ၽုၵ်ႇသွမ်ႈမႃးလီၼၼ်ႉယဝ်ႉ”

ၸၢႆးဢွၼ်ႇထၢမ်ပူႇမၼ်း “သင်ဝႃႈမၼ်းပဵၼ်တူၼ်ႈမႆႉဢမ်ႇလီလႃႇ မိူၼ်ၼင်ႇ တူၼ်ႈမႆႉဢၼ်မီးၼၢမ် ၵူၺ်းၵႃႈဢမ်ႇမီးၽွၼ်းလီၼၼ်ႉလႃႇ”

ပူႇယုမ်ႉသေယဝ်ႉ ဢဝ်ၸိူဝ်ႉၽၼ်းတီႈၼႂ်းထူင်ၼၼ်ႉ မဵတ်ႉၼိုင်ႈတူၺ်းယဝ်ႉႁၢင်ႈလီတႃ ထႅင်ႈမဵတ်ႉႁဵဝ်ႇႁႅင်ႈလႄႈ မီးၼၢမ်ဢွၼ်ႇဢွၵ်ႇမႃးၸွမ်း “မၼ်းပဵၼ်မဵတ်ႉတၢင်းယၢမ်ႈ” ပူႇလၢတ်ႈသေယဝ်ႉ “ၵူႈဝၼ်းၼၼ်ႉ သင်ႁဝ်းၽုၵ်ႇမၼ်းသႂ်ႇၼႂ်းၸႂ်ႁဝ်း မၢင်ပွၵ်ႈၵေႃႈဢမ်ႇႁူႉတူဝ်၊ မၢင်ပွၵ်ႈၵေႃႈတင်ႈၸႂ် သင်ႁဝ်းႁူတ်းၼမ်ႉ ၸိူဝ်ႉဢၼ်ၶီႈၶၢၼ်ႉ ဢမ်ႇမီးပိူင်သေ ပၼ်ႁႂ်ႈမၼ်းယႂ်ႇ မၼ်းၵေႃႈတေယင်ႇႁၢၵ်ႈလိုၵ်ႉၵႂႃႇထႅင်ႈ သင်ႁဝ်းတႄႇလိူၵ်ႈဢဝ်မဵတ်ႉဢၼ်လီလီ မိူၼ်ၼင်ႇ မဵတ်ႉတၢင်းၶတ်းၸႂ် လွင်ႈသိုဝ်ႈယူဝ်းလႄႈ ၼမ်ႉၸႂ်လီမီးမႅတ်ႉတႃႇၵႂႃႇၼႆ မၼ်းတေယႂ်ႇမႃးပဵၼ်ၼင်ႇၸၢတ်ႈပၢၼ်ဢၼ်ႁဝ်းၶႂ်ႈမီးၼၼ်ႉယဝ်ႉ”

ၸၢႆးၼုမ်ႇယဵၼ်ၵႂႃႇၵႅပ်ႉၼိုင်ႈသေ “ပေႃးဝႃႈၶႃႈၽုၵ်ႇၽိတ်းၵႂႃႇယဝ်ႉၼႆ ၸွင်ႇတေထွၼ်မၼ်းလႆႈႁိုဝ်”

ပူႇငွၵ်းၼႃႈၼႄသေ “လႆႈဢိူဝ်ႈ ယိုင်ႈမၼ်းႁိုင်ႁၢၵ်ႈမၼ်းယိုင်ႈယင်ႇလိုၵ်ႉ ၵွပ်ႈၼၼ် တေလႆႈၸႂ်ႉတၢင်းၶတ်းၸႂ်တေႉဢိူဝ်ႈ တႃႇတေထွၼ်မၼ်းၶိုၼ်ႈမႃးလႆႈ ၵူၺ်းၵႃႈ မၼ်းၵေႃႈဢမ်ႇတူၵ်းလိုၼ်းလေႃႇ သင်ဝႃႈတႄႇႁဵတ်းမိူဝ်ႈၼႆႉ”

ဝၢႆးသေၼၼ်ႉ ၸၢႆးၼုမ်ႇၵေႃႈ တႄႇလႅၵ်ႈလၢႆႈၵႂႃႇ ၵမ်းဢိတ်းဢိတ်း မၼ်းတႄႇလုၵ်ႉၸဝ်ႉ လၢင်ႉဝၢၼ်ႇတူဝ်ၵဝ်ႇ ဢၢၼ်ႇလိၵ်ႈ ဢမ်ႇလူဝ်ႇႁႂ်ႈမႄႈမၼ်းလၢတ်ႈယဝ်ႉ သမ်ႉဝႃႈမၼ်းယၢပ်ႇသေတႃႉ ၵူႈဝၼ်းဝၼ်းၼၼ်ႉ မၼ်းၵေႃႈၶတ်းၸႂ်ထွၼ်ႁၢၵ်ႈမႆႉဢၼ်ယင်ႇလိုၵ်ႉယူႇၼၼ်ႉသေ ၽုၵ်ႇတူၼ်ႈမႆႉမႂ်ႇမႃးထႅင်ႈယူႇယဝ်ႉ။

လၢႆပီပူၼ်ႉၵႂႃႇ ၸၢႆးၼုမ်ႇၵေႃႈ ပဵၼ်ၵူၼ်းဢၼ် ၸႂ်လီလႄႈ ၶတ်းၸႂ် သေ ပိူၼ်ႈဢွၼ်ၵၼ်ထၢမ်မၼ်း “ဢီႈႁင်ႁဵတ်းႁႂ်ႈမႂ်းပေႃးလႅၵ်ႈလၢႆႈၵႂႃႇလႃႇ”

မၼ်းယုမ်ႉသေ “ယွၼ်ႉၵဝ်လိူၵ်ႈၽုၵ်ႇတူၼ်ႈမႆႉ ၼႂ်းၸႂ်ထႅင်ႈမႂ်ႇၼၼ်ႉၼႃႇ”

ႁဝ်းၶႂ်ႈမီးၸၢတ်ႈပၢၼ်ၸိူင်ႉႁိုဝ်ၵေႃႈ လိူၵ်ႈၽုၵ်ႇတူၼ်ႈမႆႉဢၼ်ႁဝ်းၶႂ်ႈလႆႈၼၼ်ႉ လူၺ်ႈႁူဝ်ၸႂ်ႁဝ်းလႄႈ။

ပိၼ်ႇ-ငဝ်မွင်မိုတ်းမူဝ်း

ၵႂၢမ်းလႅၼ်ၽၢင်း

သိုဝ်ႉၵိၼ်ဢမ်ႇမူတ်း ၵူတ်ႉၵိၼ်ဢမ်ႇႁိုင် မိူဝ်ႈထိုင်ၶၢဝ်းယၢမ်း မၼ်းတေၼႄဢွၵ်ႇမႃးၵူၺ်း ၽႂ်ထုၵ်ႇလီလႆႈႁပ်ႉလွင်ႈယုမ်ႇယမ်။ ၵႂၢမ်းလႅၼ်ၽၢင်းၼၼ်ႉ မၼ်းတုမ်ႉတိူဝ်ႉလႆႈၶၢဝ်းယၢဝ်းယဝ်ႉ သမ်ႉဝႃႈဝၼ်းၼိုင်ႈ ၶႂ်ႈလၢတ်ႈလွင်ႈတေႉယူႇၵေႃႈ ဢမ်ႇမီးၼမ်ႉၼၵ်းႁႂ်ႈပိူၼ်ႈပေႃးယုမ်ႇၸႂ်လႆႈ။ ၵႂၢမ်းယွၵ်ႇလႅၼ်...

ၵႂၢမ်းလၢတ်ႈဢၼ်ႁဵတ်းႁႂ်ႈလီထွမ်ႇ

သင်ထူပ်းၺႃးၵူၼ်းတိုၵ်ႉမွင်ၸႂ်ယူႇ ဢမ်ႇလၢတ်ႈဝႃႈ “သူတေလႆႈၵႅၼ်ႇၶႅင်ဢိူဝ်ႈ ၽႂ်ၵေႃႈမီးလွင်ႈဢမ်ႇလီၵၼ်ၵူႈၵေႃႉယဝ်ႉ” သင်ၸၢမ်းလၢတ်ႈဝႃႈ“ႁဝ်းဢမ်ႇႁူႉသူလႆႈထူပ်းလွင်ႈသင်မႃးလၢႆလၢႆ သူပဵၼ်ယူႇယၢမ်းလဵဝ်ၼႆႉလႆႈၵေႃႈ ၶႅၼ်ႇၼႃႇယဝ်ႉဢိူဝ်ႈၼႃႈ” သင်ထူပ်းၺႃးၵူၼ်းၵေႃႉဢၼ်ဝူၼ်ႉၽိတ်းယူႇ ဢမ်ႇလၢတ်ႈဝႃႈ “လၢတ်ႈယဝ်ႉဝႃႈယႃႇႁဵတ်းၸိူင်ႉၼၼ်ၼႆ” သင်လၢတ်ႈဝႃႈ “ၽႂ်ၵေႃႈယၢမ်ႈႁဵတ်းၽိတ်းၵၼ်ၵူႈၵေႃႉယဝ်ႉ ၵူၺ်းၵႃႈ လွင်ႈဢၼ်သူႁတ်းယွမ်းႁပ်ႉမၼ်းၼႆႉၵူၺ်းၵေႃႈ...

ပၢႆးဝူၼ်ႉၵူၼ်းၶႂ်ႈၶိုၼ်ႈယႂ်ႇ

ပေႃးၶႂ်ႈႁႂ်ႈတူဝ်ၵဝ်ႇပဵၼ်ၵူၼ်းလီၼၼ်ႉ ဢမ်ႇလူဝ်ႇလႆႈပႂ်ႉႁႅင်းၸႂ်တီႈၽႂ်သေၸင်ႇတႄႇၵေႃႈလႆႈ ႁဝ်းၸၢင်ႈသၢင်ႈဢဝ်ႁင်းၵူၺ်းလႆႈ ယူႇတီႈတၢင်းဝူၼ်ႉႁဝ်းၵူၺ်း။ ယုမ်ႇယမ်ဝႃႈတူဝ်ၵဝ်ႇ မီးလွင်ႈၶိုပ်ႈၼႃႈလႆႈတႃႇသေႇ ဢမ်ႇဝူၼ်ႉဝႃႈတူဝ်ၵဝ်ႇဢမ်ႇၵတ်ႉၶႅၼ်ႇ မၼ်းယင်းပႆႇထိုင်ၶိင်ႇထိုင်ၶၢဝ်းမၼ်းၵူၺ်း ၵူၼ်းၶႅၼ်ႇၵေႃႈပဵၼ်ၵူၼ်းၵေႃႉဢၼ်ႁတ်းႁဵတ်းႁတ်းၸၢမ်း ဢမ်ႇၵူဝ်ဝႃႈတေၽိတ်း...