သွင်ၶႃၵေႃႈ ႁွတ်ႈၵႂႃႇတီႈတႃႈၼမ်ႉ ၼမ်ႉႁွင်ႈဢၼ်မီးယူႇႁိမ်းဝၢၼ်ႈၼၼ်ႉယဝ်ႉလႄႈ သွင်ၶႃၽႄၵၼ်ဢၢပ်ႇၵေႃႉတၢင်းတၢင်း ၸၢႆးၶိူဝ်းဢၢပ်ႇတႃႈၽၢႆႇၼိူဝ်သေ ယိင်းသႅင်ၵေႃႈၸင်ႇၵႂႃႇ ဢၢပ်ႇတႃႈၽၢႆႇတႂ်ႈၼႆယူႇ ၵူၺ်းၵႃႈမိူဝ်ႈၵႂႃႇႁွတ်ႈတီႈၼမ်ႉႁွင်ႈၼၼ်ႉ သၢႆလႅင်းလိူၼ်ပိူင်းထွင်ႇၼိူဝ်ၼမ်ႉ ၼၼ်ႉႁၢင်ႈလီၼႃႇ ငဝ်းလႅင်းလိူၼ်ၼၼ်ႉထွင်ႇပိူင်းပၼ်သမ်ႉပေႃးႁိူဝ်ႈလူင်ဝႆႉ လႆႈႁၼ်ၼမ်ႉ ၼၼ်ႉၵေႃႈ မိူၼ်တေလိုၵ်ႉၼႃႇၼႆသေ ယိင်းသႅင်ၵေႃႈ ဢမ်ႇႁတ်းဢၢပ်ႇလႄႈ ပႆၶိုၼ်ႈလူင်ၵႂႃႇၸူး တၢင်းဢၼ်ၸၢႆး ၶိူဝ်းဢၢပ်ႇၼၼ်ႉသေ
“သူ!!…ဢၢပ်ႇယဝ်ႉႁႃႉ…ၸွင်ႇၼမ်ႉလိုၵ်ႉႁိုဝ်…” ဢမ်ႇလႆႈငိၼ်းသဵင်တွပ်ႇၶိုၼ်း မၼ်းၵေႃႈၼႅတ်ႈၶိုၼ်ႈၵႂႃႇၸူးသေ ဢမ်ႇလႆႈႁၼ်ၸၢႆးၶိူဝ်းလႄႈ
“မေႃယႃ…သူမီးယူႇတီႈလႂ်…ယႃႇပေႁဵတ်းၼႆၼႃ…ႁဝ်းၵူဝ်ဢိူဝ်ႈ…” ၼင်ႈယူႇႁိမ်းၽင်ႇၼမ်ႉသေ ႁွင်ႉႁႆႈယူႇ ၵမ်းၼၼ်ႉ ၸၢႆးၶိူဝ်းၵေႃႈဢွၵ်ႇမႃးၼႂ်းၼမ်ႉ ဢဝ်ယိင်းသႅင်တူၵ်းၸႂ်သဵင်ၼၼ်ႉသေ ပလၢတ်ႈလူင်လူင်းၵႂႃႇၼႂ်းၼမ်ႉ ၼၼ်ႉယဝ်ႉ သမ်ႉၺႃးတီႈၼမ်ႉလိုၵ်ႉလႄႈ ဢဝ်မၼ်းၸူမ်လူင်လူင်းၵႂႃႇ ၸၢႆးၶိူဝ်းၼႅတ်ႈလမ်ဢဝ်ၶိုၼ်ႈၽင်ႇသေ ဢဝ်ၶိုၼ်ႈမႃးၶိုတ်းတၼ်းလႄႈ ဢမ်ႇတၼ်းၸူမ်ႁိုင် ယိင်းသႅင်ဢမ်ႇတၼ်းပဵၼ်သင်
“မႃးတၢင်းၼႆႉႁဵတ်းသင်လႃႇ…ဢၢပ်ႇယဝ်ႉႁႃႉ…”
“ဢမ်ႇ…ႁဝ်းၵူဝ်ၼမ်ႉ…ၼမ်ႉမၼ်းလိုၵ်ႉၼႃႇ…ႁဝ်းဢမ်ႇႁတ်းဢၢပ်ႇ…ႁဝ်းႁွင်ႉႁႃသူၵေႃႈဢမ်ႇတွပ်ႇလူး…မႃးႁႃၵေႃႈဢမ်ႇႁၼ်…”
“တၢင်းၼႆႉၵေႃႈလိုၵ်ႉမိူၼ်ၵၼ်…ၼၼ်ႉယဝ်ႉ…”
“ဢမ်ႇမီးထႅင်ႈတၢင်ႇတီႈႁႃႉ…ႁဝ်းတေဢမ်ႇလႆႈဢၢပ်ႇၼမ်ႉယဝ်ႉ…”
“ၸိူင်ႉႁိုဝ်ၵေႃႈယမ်းယဝ်ႉ…ဢၢပ်ႇတီႈၼႆႈသေလႄႈ…”
“တေႁႂ်ႈဢၢပ်ႇၸွမ်းသူၼႆႉၼႃ…ယဝ်ႉၵေႃႈၼမ်ႉလိုၵ်ႉသေ…ႁဝ်းတေႁဵတ်းႁိုဝ်ဢၢပ်ႇလႃႇ…”
“သူဢၢပ်ႇလႄႈ…ၼႂ်းၼမ်ႉမီးမၢၵ်ႇႁိၼ်ယူႇ…ယူႇၼိူဝ်မၢၵ်ႇႁိၼ်သေဢၢပ်ႇၵေႃႈလႆႈ…”
“ပေႃးႁဝ်းပလၢတ်ႈမၢၵ်ႇႁိၼ်လူး…တေႁဵတ်းၸိူင်ႉႁိုဝ်…ပေႃးႁဝ်းၸူမ်ၼမ်ႉၵႂႃႇထႅင်ႈလူး…ႁဝ်းတေႁဵတ်းႁိုဝ်…သုၵ်ႈၼႃႈသုၵ်ႈတိၼ်သုၵ်ႈမိုဝ်းၵူၺ်းၵေႃႈပေႃးယဝ်ႉယူဝ်ႉ…”
“သူပဵၼ်မေႃယႃမႃးလႆႈၸိူင်ႉႁိုဝ်လႃႇ…တေႃႈၼင်ႇဢၢပ်ႇၼမ်ႉယင်းတိုၵ်ႉၶၢၼ်ႉယူႇ…တႃႇလုမ်းလႃးလွင်ႈမူတ်းသႂ်တူဝ်ၶိင်းၵူၺ်းၵေႃႈဢမ်ႇမီး…”
“ၼိုင်ႈၶမ်ႈၼိုင်ႈလႂ်ၵူၺ်း…ဢမ်ႇပဵၼ်သင်လေႃႇ…ပေႃးသူဢမ်ႇလၢတ်ႈဢမ်ႇမီးၽႂ်ႁူႉၼင်ႇၵဝ်ႇသႄႈ…”
“တူဝ်ပေႃးယမ်းမူတ်းယဝ်ႉ…ယင်းတိုၵ်ႉၶၢၼ်ႉဢၢပ်ႇၼမ်ႉထႅင်ႈယူႇ…”
ၸၢႆးၶိူဝ်းၵေႃႈ ၸၼ်ဢဝ်ၶႅၼ်ယိင်းသႅင်ၵႂႃႇတီႈဢၼ်မီးမၢၵ်ႇႁိၼ်ၼၼ်ႉယဝ်ႉ သဵင်ႁွင်ႉမၼ်းပေႃးလင်ပၼ်းလူင်ၵႂႃႇၸွမ်းႁွင်ႈၼမ်ႉၼၼ်ႉယဝ်ႉ။
“တေဢၢၼ်းဢဝ်ၵၼ်တၢႆႁႃႉၼႆႉ…”
“ဢၢပ်ႇၵႂႃႇလႄႈ…ပေႃးသူၸူမ်…ႁဝ်းၵေႃႉတေဢဝ်ပုၼ်ႈၽွၼ်းၵူၺ်း…” ၸၢႆးၶိူဝ်းၵေႃႈ ယူႇၼႂ်းၼမ်ႉႁိမ်းမၼ်းၼၼ်ႉယဝ်ႉ ၵွင်လင်ၵႂႃႇပႅတ်ႈမၼ်းယူႇ။ ယိင်းသႅင်ၵေႃႈ ၼႅတ်ႈဢၢပ်ႇသေ ၼႅတ်ႈၶိုၼ်ႈၵႂႃႇၶိုၼ်းယဝ်ႉ ၸင်ႇတေႁႂ်ႈၸၢႆးၶိူဝ်းဝၢႆႇလင်မႃးလႆႈၶိုၼ်းၼၼ်ႉယဝ်ႉ။ မိူဝ်းၵႂႃႇၸွမ်းတၢင်း ယိင်းသႅင်ၵေႃႈ ႁၼ်ၸၢႆးၶိူဝ်းလႅပ်ႈၵတ်းၼႃႇလႄႈ ဢဝ်တၢင်းသိူဝ်ႈသွၼ်ႉမၼ်း ထွတ်ႇပၼ်ၵႂႃႇယူႇ။
“ပၼ်ႁဝ်းႁဵတ်းသင်လႃႇ…”
“ပၼ်ၼုင်ႈၼၼ်ႉၼႃႇ…သူၶၢမ်ႇယူႇၼႂ်းၼမ်ႉတွၼ်ႈတႃႇႁဝ်း…ထိုင်တီႈပေႃးၵတ်း…တေႁႂ်ႈႁဝ်းဢုၼ်ႇယူႇၵေႃႉလဵဝ်လႆႈၸိူင်ႉႁိုဝ်…” ၸၢႆးၶိူဝ်းၵေႃႈဢဝ်ၼုင်ႈၵႂႃႇ။
“ယဝ်ႉၵေႃႈ…ၸွင်ႇသူလႆႈလၵ်ႉဝၢႆႇတူၺ်းမိူဝ်ႈႁဝ်းဢၢပ်ႇၼမ်ႉယူႇႁႃႉ…”
“ႁဝ်းၵေႃႈဢမ်ႇလႆႈပဵၼ်ၵူၼ်းဢမ်ႇလီထိုင်တၢၼ်ႇၼၼ်ႉၼင်ႇၵဝ်ႇ…”
“ၸိူင်ႉၼၼ်ႁႃႉ…ၸူမ်းယဝ်ႉၼႃႈ…”
“ဢမ်ႇလူဝ်ႇယိၼ်းၸူမ်းၵေႃႈလႆႈ…ႁဝ်းႁဵတ်းတွၼ်ႈတႃႇႁဝ်းၵူၺ်း…ႁဝ်းၵူဝ်ဝႃႈပေႃးၶဝ်ႈမိူဝ်းၼႂ်းႁိူၼ်းဢၢႆတူဝ်တေတဵမ်ႁိူၼ်းသေ…ၼွၼ်းဢမ်ႇလပ်းလႆႈ…”
“ပေႃးတၢၼ်ႇဝႃႈႁဝ်းပဵၼ်ၵူၼ်းတၢႆယဝ်ႉ…”
“တေႃႈၼင်ႇၵူၼ်းတၢႆ…ပိူၼ်ႈယင်းဢၢပ်ႇၼမ်ႉယူႇလူး…” ယၢမ်းၼၼ်ႉ သဵင်မေႃးၼႂ်းယုမ်းမႃး ၶႅၵ်ႈၶႅၵ်ႈၼႆလႄႈ ယိင်းသႅင်ၵေႃႈ ၵျွၵ်းၵွပ်ႈသႂ်ႇပၼ်ၸၢႆၶိူဝ်းၼၼ်ႉၵႂႃႇၵမ်းလဵဝ်။
“မၼ်းဢမ်ႇမီးၽီၼႃ…”
“ၵူဝ်ငူး!…”
“ဢမ်ႇႁူႉဝႃႈပူၼ်ႉၵၢၼ်သွၼ်မႃးလႆႈၸိူင်ႉႁိုဝ်…လွင်ႈၵူဝ်ၼမ်တေႉယဝ်ႉ…ၵမ်ႉၵူဝ်ဢၼ်ၼၼ်ႉၵူဝ်ဢၼ်ၼႆႉဝႃႇ…ႁဝ်းဝႃႈတႄႉ…ထုၵ်ႇလီၵႂႃႇႁဵၼ်းမႂ်ႇၶိုၼ်းယဝ်ႉ…” ယိင်းသႅင်ၵေႃႈလူင်းသေ
“ၸိူင်ႉႁိုဝ်ၵေႃႈႁဝ်းၵေႃႈပဵၼ်ၽူႈယိင်းလူး…တေႁဵတ်းႁိုဝ်မိူၼ်ၽူႈၸၢႆးၸိူင်ႉၼင်ႇသူလႆႈလႃႇ…”
ၵၢင်ၼႂ်ၸဵမ်ၸဝ်ႉယိင်းသႅင်ၶႃၵေႃႈ သိုပ်ႇဢွၵ်ႇၶၢဝ်းတၢင်းၵႂႃႇထႅင်ႈဝၢၼ်ႈၼိုင်ႈယူႇ။ ပေႃးဝၢၼ်ႈ ဢမ်ႇပေႃးယႂ်ႇ ၵူၼ်းဢမ်ႇပေႃးၼမ်ၵေႃႈ ၸႅတ်ႈၵူၼ်းပဵၼ်ၵေႃႈၸဵဝ်းယဝ်ႉသေ ၸင်ႇသိုပ်ႇၵႂႃႇထႅင်ႈဝၢၼ်ႈ ယဝ်ႉဝၢၼ်ႈယူႇ။ မၢင်ဝၢၼ်ႈတေလႆႈၵႂႃႇၸွမ်းတၢပ်ႈလွႆ လူတ်ႉၶိုၼ်ႈလွႆဢမ်ႇလႆႈၵေႃႈ လႆႈလူင်းဢီးဢဝ်။ မၢင်တီႈလူတ်ႉဢမ်ႇၸၢင်ႈၵႂႃႇ လႆႈပႆၵႂႃႇဢဝ်ယူႇ။ သွင်ၶႃၵေႃႈ ဢွၵ်ႇၶၢဝ်းတၢင်းမႃးလႆႈသီႇဝၼ်းယဝ်ႉၼႆ မိူဝ်ႈၼႆႉၵေႃႈပဵၼ်ဝၼ်းလိုၼ်းသုတ်းယူႇ။
မိူဝ်ႈၽွင်းၵႂႃႇၸႂ်းၵူၼ်းပဵၼ်ၼၼ်ႉ တီႈႁိူၼ်းၵူၼ်းပဵၼ်သမ်ႉ တၢင်းၵႂႃႇမၼ်းၵေႃႈယၢပ်ႇလႄႈ မၢၵ်ႇႁိၼ်မၢၵ်ႇသၢႆးၵေႃႈၼမ် ၶႂ်ႈၸၼ်းဝႆႉဢိတ်းဢိတ်းတီႈလူင်းၵုင်းယူႇ ယၢမ်းၼၼ်ႉ ၸၢႆးၶိူဝ်းၵေႃႉလူင်းၵႂႃႇဢွၼ်တၢင်းယဝ်ႉ ယိင်းသႅင်ၸင်ႇၸွမ်းလူင်းၵႂႃႇလွႆးလွႆး မိူဝ်းတိုၵ်ႉလူင်းၵႂႃႇယူႇၼၼ်ႉ ၵိုင်ႉၵၢင်ႉပလၢတ်ႈယဝ်ႉၶုၼ်ႇလႅၼ်ႈလူင်း တင်းသဵင်ႁွင်ႉလႄႈ ၸၢႆးၶိူဝ်းၵေႃႈၼႅတ်ႈဝၢႆႇတူၺ်းၸူး သမ်ႉမႅၼ်ႈမိူဝ်ႈလဵဝ်ၵၼ်တၢင်းဢၼ်ယိင်းသႅင်လူင်းမႃးႁွတ်ႈဢဝ်လီလီ မၼ်းၵေႃႈတၼ်းလႅတ်းလႄႈ ႁပ်ႉဢဝ်ဝႆႉယိင်းသႅင်လႆႈ ၵူၺ်းၵႃႈယိင်းသႅင်ၵေႃႈ ၵိုတ်းၶင်ႉဝႆႉယူႇတီႈၼႂ်းဢွင်ႈဢူၵ်းမၼ်းၼၼ်ႉသေ ယွၼ်ႉတီႈမၼ်းဢမ်ႇပေႃးလီလႄႈ ၼႃႈယိင်းသႅင်ၶုၼ်ႇဝိၼ်ႇဝၢႆႇၸူးၸၢႆးၶိူဝ်း ၼႃႈသွင်ၶႃတိူဝ်ႉထိုဝ်ႉၵၼ်ဝႆးၼႃႇ သီႇသူပ်းပေႃးၸုပ်းသႂ်ႇၵၼ်ၵႂႃႇ ဢမ်ႇတၼ်းၾၢင်ႉတူဝ်လႆႈယဝ်ႉသေ ၼႅတ်ႈဢီးပၢၵ်ႈပႅတ်ႈၵၼ်ၵႂႃႇ ၵူၺ်းၵႃႈ မိူၼ်ယိင်းသႅင်တေဢၢင်ႈလူမ်ႉလူင်းၵႂႃႇလႄႈ မိုဝ်းၸၢႆးၶိူဝ်းၵေႃႈ ၼႅတ်ႈၶုၼ်ႇဝၵ်ႉတၢဝ်းႁၢဝ်ႉဢဝ်ဢႅဝ်ၼၼ်ႉ ၸၼ်ၶိုၼ်ႈမႃးၸူးတူဝ်ယိင်းသႅင် ၶဝ်ႈၵႂႃႇယူႇၼႂ်းဢွင်ႈဢူၵ်းၸၢႆးၶိူဝ်းထႅင်ႈယဝ်ႉ။ သွင်ၶႃၵေႃႈ မိုင်ယၵ်ႉတူၺ်းၼႃႈၵၼ်ယူႇၵမ်းၼိုင်ႈသေ မိူၼ်ဝႃႈမီးသတိမႃးႁင်းၽႂ်ႁင်းမၼ်းယဝ်ႉၵေႃႈ ၸၢႆးၶိူဝ်းၼႅတ်ႈပွႆႇတူဝ်ယိင်းသႅင် ဢဝ်ယိင်းသႅင်ၼင်ႈသွင်ႉလူင်းၵႂႃႇၼိူဝ်လိၼ်ၼၼ်ႉယဝ်ႉ ပႆၵႂႃႇပႅတ်ႈယူႇ ယိင်းသႅင်ၵေႃႈၼင်ႈသေတူၺ်းၸၢႆးၶိူဝ်းယဝ်ႉၵေႃႈ ပွင်ႉယူႇႁင်းၵူၺ်း
“ပေႃးႁူႉဝႃႈတေဢၢၼ်းပွႆႇသမ်ႉတေႁပ်ႉဝႆႉႁဵတ်းသင်…မႃးႁဵတ်းႁႂ်ႈႁူဝ်ၸႂ်ၵၼ်တဵၼ်ႈယဝ်ႉ…ပွႆႇပႅတ်ႈပိူၼ်ႈၸိူင်ႉၼႆႁႃႉ…” ၼႃႈမၼ်းၵေႃႈတူႇလူင်ၵႂႃႇ ၶဝ်ႈၵႂႃႇၼႂ်းႁိူၼ်းယဝ်ႉၵေႃႈ ဢမ်ႇယၵ်ႉတူၺ်းၼႃႈၸၢႆးၶိူဝ်းသေဢိတ်း။
ဝၢႆးသေၵၢၼ်ၶႃယဝ်ႉတူဝ်ႈယဝ်ႉၵေႃႈ သမ်ႉပေႃးထိုင်ဝၢႆးဝၼ်းယဝ်ႉ သင်တေမိူဝ်းႁိူၼ်းၶိုၼ်းၵေႃႈ ၵၢင်ဝၼ်းၶမ်ႈယဝ်ႉၸင်ႇတေထိုင်လႆႈ။ ၸၢႆးၶိူဝ်းႁၼ်ယိင်းသႅင်ၼႃႈတူႇမႃးတင်းဝၼ်းယဝ်ႉ ဢမ်ႇႁူႉဝႃႈ တေလႆႈလၢတ်ႈတေႃႇမၼ်းၸိူင်ႉႁိုဝ် တင်းႁတ်းဢမ်ႇႁတ်းႁေ မၼ်းၵေႃႈသုတ်ႉၶဝ်ႈၵႂႃႇၸမ်ၸမ် သေယဝ်ႉ။
“ၸွင်ႇသူတေပႃႈၶႂ်ႈမိူဝ်းမိူဝ်ႈၼႆႉႁႃႉ…” ၸွမ်းလူၺ်ႈလွင်ႈယဵၼ်ႇငႄႈ သမ်ႉဝႃႈဢမ်ႇၶႂ်ႈလၢတ်ႈတေႃႇၵေႃႈ ႁူႉၵႃႈတေလႆႈတွပ်ႇၶိုၼ်းယူႇယဝ်ႉ။
“ၵၢင်ဝၼ်းၵေႃႈၸမ်ၶမ်ႈယဝ်ႉ…တၢင်းၵေႃႈယၢပ်ႇ…ပေႃးမိူဝ်းမိူဝ်ႈၼႆႉၵေႃႈ…သင်ဢမ်ႇသင်…ယူဝ်တေၸၢင်ႈႁွတ်ႈမိူဝ်ႈၽုၵ်ႈၵူၺ်းယင်းဢမ်ႇႁူႉယဝ်ႉ…”
“ဢမ်ႇမိူဝ်းၼႆၵေႃႈလႆႈယဝ်ႉ…ပဵၼ်သင်လႄႈတေလႆႈသပ်းလႅင်းထိုင်တၢၼ်ႇၼၼ်ႉလႃႇ…”
“ပဵၼ်ၵူၼ်းမၼ်းၵေႃႈလူဝ်ႇမီးလွင်ႈတၢင်းယူႇယဝ်ႉ…ပေႃးဢမ်ႇသပ်းလႅင်းၵူဝ်တေမီးၵူၼ်းၶဝ်ႈၸႂ်ၽိတ်း”
“ၶဝ်ႈၸႂ်ၽိတ်း…ၽႂ်လႃႇ…”
“ဢမ်ႇႁူႉ!…” ၶိုၼ်ႈသဵင်သုင်ၸွမ်းသေ ဢွၵ်ႇၵႂႃႇပႅတ်ႈယဝ်ႉ။ ၵူၺ်းၵႃႈၸၢႆးၶိူဝ်းၵေႃႈ ၼႅတ်ႈၸၼ်ဢဝ်ၶႅၼ်မၼ်းဝႆႉသေ
“ၸႂ်လမ်ႁဝ်းႁႃႉ…”
“ပဵၼ်သင်ပေႉလႆႈၸႂ်ၸၼ်ၶႅၼ်ၵၼ်ၼႃႇလႃႇ…ၵူၼ်းၸိူင်ႉၼင်ႇသူၼႆႉ…မေႃၸွမ်းၸၼ်ၶႅၼ်ပိူၼ်ႈၵူၺ်းယဝ်ႉႁႃႉ!…”
“ၸႂ်လမ်ႁဝ်းတေႉလူး…”
“ႁဝ်းဢမ်ႇၶႂ်ႈသုမ်းၶၢဝ်းယၢမ်းၸွမ်းလွင်ႈဢမ်ႇမီးလွင်ႈတၢင်းလေႃႇၼႃႈ…သင်ၸိူဝ်ႉဝႃႈၶႂ်ႈမိူဝ်းၵေႃႈ…ပွၵ်ႈမိူဝ်းဢွၼ်တၢင်းလႆႈယူႇ…ႁဝ်းတေႁႃတၢင်းပွၵ်ႈမိူဝ်းႁင်းၵူၺ်းၵူၺ်း…”
“ႁဝ်း…ႁဝ်းယွမ်းၼွမ်း…”
“လၢတ်ႈငၢႆႈတေႉယဝ်ႉ…သူႁဵတ်းသင်ၽိတ်းလႃႇ…ထိုင်တီႈတေလႆႈမႃးယွမ်းၼွမ်း…”
“ႁဝ်းဢမ်ႇလႆႈတင်ႈၸႂ်သေၵႂႃႇ…ၵႂႃႇ………ဢဝ်သူပ်းႁဝ်း…” မိူဝ်ႈလၢတ်ႈလွင်ႈၼၼ်ႉမႃး ယိင်းသႅင်ၵေႃႈ ၸင်ႇၶိုၼ်းၶုၵ်းၸႂ်လႆႈ ႁၼ်ႁၢင်ႈၼၼ်ႉမႃးသေ
“ပေႃးလႃႈယႃႇလၢတ်ႈထႅင်ႈယဝ်ႉ..”
ယၢမ်းၼၼ်ႉၸၢႆးၶိူဝ်းၵေႃႈ သုတ်ႉၶဝ်ႈၵႂႃႇၸမ်ၸမ်သေ ပႆၶဝ်ႈၵႂႃႇၸူးယိင်းသႅင်ဢၼ်ၸုၵ်းၼိမ်ယူႇ ၼၼ်ႉယဝ်ႉ ဢဝ်ၼႃႈၶဝ်ႈၵႂႃႇၸူးၸမ်ၸမ်ႁူမၼ်းၼၼ်ႉယဝ်ႉၵေႃႈ
“ၽႂ်တေႉလႃႇပၢႆႈၼႃႈၵၼ်တင်းဝၼ်း…” သဵင်မၼ်းတင်းဢူၼ်ႈလႄႈ ဝၢၼ်ႁူတေႉၼၼ်ႉယဝ်ႉ သဵင်ၼၼ်ႉသမ်ႉပေႃးတုမ်ႉယွၼ်ႈထိုင်ႁူဝ်ၸႂ်မၼ်း တွတ်ႇႁႅင်းမႃးတိၵ်းတိၵ်းလႄႈ ထိုင်တီႈပေႃးလႆႈထွႆဢွၵ်ႇႁၢင်ႇၵႂႃႇယဝ်ႉ လႅၼ်ႈပၢႆႈပႅတ်ႈယူႇ။
သိုပ်ႇလူထႅင်ႈတွၼ်ႈတေမႃးၶႃႈ
