ဝၼ်းပိုတ်ႇႁူင်းႁဵၼ်းဝၼ်းဢွၼ်တၢင်းသုတ်း
ယၢမ်းၵၢင်ၼႂ်ၶၢဝ်းလႅတ်ႇဢုၼ်ႇဢုၼ်ႇ မႅၼ်ႈၽွင်းယူႇၶႅမ်ႉၼၼ်ႉ လုၵ်ႈႁဵၼ်းဢၼ်ယူႇဝႆႉတီႈ ႁူင်းႁဵၼ်းၸိူဝ်ႉၸၢတ်ႈ ၸၼ်ႉသုင် လွႆတႆးလႅင်း ၶဝ်ၵေႃႈ ဢွၼ်ၵၼ်မႃးၶိုၼ်ႈႁူင်းႁဵၼ်းယူႇယဝ်ႉ။
တီႈၼႂ်းႁူင်းႁေႃးလူင်ၼၼ်ႉ ၶူးလႄႈလုၵ်ႈႁဵၼ်း ဢွၼ်ၵၼ်ၸုၵ်းပဵၼ်တူင်ႇမူၼ်း လဵၼ်ႈၵဵမ်းမီတႅပ်းမိုဝ်းၼႆယူႇ။
သွင်ၵေႃႉလႅၼ်ႈလမ်းတႅပ်းမိုဝ်း သွင်ၵေႃႉလႅၼ်ႈပၼ်ႇၶတ်းၵၼ် ၵဝ်လႄႈမႂ်းဢွၼ်ၵၼ်ႁၢင်ႈႁႅၼ်းတူဝ်ၵၼ်ယဝ်ႉ၊ ၼႂ်းၼၼ်ႉၵေႃႈ သမ်ႉမီးပႃး ၸၢႆးၶိူဝ်းမိူင်း လုၵ်ႈႁဵၼ်းမႂ်ႇ လုၵ်ႉၼႂ်းမိူင်းသေ မႃးၶိုၼ်ႈႁွတ်ႈလႄႈ ပဵၼ်ၵူၼ်းယဵၼ်ႇငႄႈ ဢမ်ႇသူပ်းဢမ်ႇသဵင်ဝႆႉ ဢမ်ႇပေႃးႁတ်းဢုပ်ႇႁတ်းလၢတ်ႈတေႃႇၽႂ် ယၢမ်းၼင်ႇၼၼ် မိုဝ်းၼုမ်ႇဢွၼ်ႇ ယိင်းၵေႃႉၼိုင်ႈ ၸုင်ၸၼ်ဢဝ်မၼ်းလႅၼ်ႈ သမ်ႉပေႃးဢမ်ႇတၼ်းႁူႉတူဝ်ယဝ်ႉ။
ၶိူဝ်းမိူင်းၵေႃႈ လႅၼ်ႈၵႂႃႇၸွမ်းယိင်းတိၵ်းတိၵ်း ၵူၺ်းလႅၼ်ႈဢမ်ႇၶိုတ်းပိူၼ်ႈလႄႈ ပိူၼ်ႈသမ်ႉပေႃးမႃးပုတ်ႈသႂ်ႇတီႈၶႃယူႇၼၼ်ႉသေ လႆႈပဵၼ်မီပႂ်ႉလႅၼ်ႈလမ်းၽတ်ႉမိုဝ်းပိူၼ်ႈၵႂႃႇယဝ်ႉ၊ ယိင်းၵေႃႈ ၸၼ်မိုဝ်းမၼ်းပၼ်ႇလႅပ်ႈႁႃတႅပ်းမိုဝ်းပိူၼ်ႈသေ တႅပ်းယဝ်ႉၵေႃႈ ၶုၼ်ႇႁုၵ်ႉၸၼ်ၶႅၼ်မၼ်းလႅၼ်ႈၵႂႃႇ ၵမ်မိုဝ်းမၼ်းဝႆႉသမ်ႉပေႃးမၼ်းတဵင်ႈတဵင်ႈ ၶႃၸင်ႇၶိုၼ်းလႆႈတီႈယူႇသေ ၸုၵ်းလိုဝ်ႈႁိူဝ်ႉထူၺ်ႈၸႂ်ယူႇႁိမ်းၵၼ်ယဝ်ႉ။
သၢႆတႃၶိူဝ်းမိူင်း ဝိၼ်ႇယၵ်ႉတူၺ်းယိင်းၼၼ်ႉသေ သဵင်လူမ်းထူၺ်ႈၸႂ်ၶဝ်ၼၼ်ႉၵေႃႈ မေႃးငိၼ်းၼႂ်းႁူ သဵင်ထူၺ်ႈၸႂ်ၸဝ်ႈၵဝ်ႇၵေႃႈ လင်မေႃးမိူၼ်ၵၼ် သၢႆတႃတူၺ်းယိင်းသေ ယုမ်ႉဢွၵ်ႇမႃးဢမ်ႇတၼ်းႁူႉတူဝ်ယဝ်ႉ။
လဵၼ်ႈႁိူဝ်ႉၵၼ်ယဝ်ႉ ၶိုၼ်းၼင်ႈဢဝ်တီႈယူႇၽႂ်မၼ်း တီႈဢၼ်မီးၽိူၼ်တမ်းပဵၼ်တူင်ႇမူၼ်းယူႇၼၼ်ႉလႄႈ ၶူးၵေႃႈဢွၼ်ၼႄႉၼမ်းတူဝ်ၵႂႃႇ လၢတ်ႈပၼ်ၸိုဝ်ႈလႄႈ ၸၼ်ႉႁဵၼ်းၸဝ်ႈၵဝ်ႇ ၵႂႃႇၵမ်းၵေႃႉၵေႃႉၼႆယဝ်ႉ။
ၶိူဝ်းမိူင်းၵေႃႈ ဝိၼ်ႇယၵ်ႉတူၺ်းၸွမ်းၵႂႃႇၵေႃႉလႂ်ၵေႃႉၼၼ်ႉ ၼင်ႇၶႂ်ႈႁူႉၸၵ်းဝႆႉသေ ၸင်ႇပၵ်းၸႂ်တူၺ်းၵႂႃႇတီႈယိင်းၼၼ်ႉလႄႈ လႆႈႁူႉဝႃႈ ၶဝ်ၸိုဝ်ႈ ႁွမ်လႅင်း ယူႇဝႆႉ ၸၼ်ႉ 12 ယဝ်ႉ၊ ပၼ်ႇပုတ်ႈၵၼ်ၵႂႃႇ ထိုင်ၵမ်းၶိူဝ်းမိူင်းယဝ်ႉၼႆၵေႃႈ မၼ်းလုၵ်ႉၸုၵ်းသေ ၼႂ်းၸႂ်ၼႆႉတင်းသၼ်ႇတင်းၵူဝ် သဵင်လွႆးလေႃးပႃးသဵင်သၼ်ႇဢိတ်းဢိတ်းၼၼ်ႉ လၢတ်ႈဢွၵ်ႇၵႂႃႇ
“မႂ်ႇသုင်ၶႃႈ ၶႃႈၸိုဝ်ႈ ၶိူဝ်းမိူင်း လုၵ်ႈႁဵၼ်းၸၼ်ႉ 10 ” ၼႅတ်ႈၶိုၼ်းၼင်ႈဝႆးဝႆးယဝ်ႉ ၼႃႈပေႃးလႅင်ၵႂႃႇမူတ်း။
ဝၢႆးသေၵပ်းသိုပ်ႇတူဝ်ယဝ်ႉ ၶူးၶဝ်ၵေႃႈ ၸတ်းႁႂ်ႈလုၵ်ႈႁဵၼ်း ႁဵတ်းပဵၼ်ၸုမ်းသေယဝ်ႉ ၸွႆႈၵၼ်ႁဵတ်းပၵ်းပိူင် တွၼ်ႈတႃႇႁူင်းႁဵၼ်း လွင်ႈၶိုၼ်ႈႁဵၼ်း၊ လွင်ႈယူႇသဝ်းလုၵ်ႈႁဵၼ်း တေလႆႈႁဵတ်းသင် တေဢမ်ႇလႆႈႁဵတ်းသင်ၸိူဝ်းၼႆႉလႄႈ ပၵ်းပိူင်ဢၼ်ႁဵတ်းမႃးၼၼ်ႉ တႃႇႁႂ်ႈယူႇသဝ်းၵႂႃႇလႆႈၸွမ်းၵၼ်ငၢႆႈလူမ် ဢမ်ႇၸႂ်ႈတႃႇႁတ်ႉမၼ်ႈႁႂ်ႈယႃႇမီးတီႈထူၺ်ႈၸႂ် ႁဝ်းၵူၼ်းၵေႃႉႁဵတ်းဢွၵ်ႇမႃး မၵ်းမၼ်ႈမႃးယဝ်ႉၼၼ်ႉ ႁဝ်းၵေႃႈတေလႆႈပဵၼ်ၵူၼ်းႁဵတ်းၸွမ်းယဝ်ႉ။
ထိုင်ဝၢႆးဝၼ်းမႃး လႆႈမီးၵၢၼ်ၸႅၵ်ႇၽႄပုၼ်ႈၽွၼ်းလုၵ်ႈႁဵၼ်းၶဝ်ၼႆသေ ဢွၼ်တၢင်းသုတ်းၵေႃႈ လိူၵ်ႈႁူဝ်ၼႃႈလုၵ်ႈႁဵၼ်း လူၺ်ႈလၢႆးတွတ်ႈၶႅပ်းၵၢင်ၸႂ်ယဝ်ႉ။ သဵင်ဢၼ်လႆႈၼမ်လိူဝ်ပိူၼ်ႈၼၼ်ႉတႄႉ ပဵၼ်ႁွမ်လႅင်းယဝ်ႉ ဢၼ်လႆႈၼမ်ထီႉသွင်ၵေႃႈ ႁဵတ်းၵႅမ်မၼ်းၵႂႃႇ။ ယဝ်ႉၵေႃႈ လိူၵ်ႈဝႃႈ ၽႂ်တေႁဵတ်းၽူႈမၢႆ ၽႂ်တေပဵၼ်ၵူၼ်းယိပ်းငိုၼ်းၸႂ်ႉၸၢႆႇ တွၼ်ႈတႃႇငိုၼ်းၸႂ်ႉလွင်ႈၵိၼ်ယႅမ်ႉ၊ ၽႂ်တေၸတ်းၵၢၼ်ၽၢႆႇၼမ်ႉ၊ ၽႂ်တေပဵၼ်ၽူႈၵုမ်းႁူင်းသဝ်းယိင်း ႁူင်းသဝ်းၸၢႆးလႄႈ ၽႂ်တေပဵၼ်ၵူၼ်းၵဵပ်းၶေႃႈမုၼ်း သေယဝ်ႉ ၸင်ႇလိူၵ်ႈသီတွၼ်ႈတႃႇ ႁုင်မိုဝ်ႉၸွမ်းဝၼ်း ၼိုင်ႈၸုမ်းႁဵတ်းလၢႆၵေႃႉလႄႈ ၼႂ်းၼိုင်ႈၸုမ်းၼၼ်ႉသမ်ႉမီးၽႂ်လၢႆလၢႆ ၸႅၵ်ႇၵၼ်ၸူၵ်းမေးၵႂႃႇယဝ်ႉ။
သမ်ႉဝႃႈၶိူဝ်းမိူင်းပဵၼ်ၵူၼ်းမႂ်ႇသေတႃႉ မၼ်းၼၼ်ႉသမ်ႉ မီးၼမ်ႉၵတ်ႉတၢင်းသူၼ်ၸႂ် ၽၢႆႇထႆႇႁၢင်ႈဝႆႉလႄႈ လိူၵ်ႈလိူၵ်ႈမၼ်းသမ်ႉမီးၵွင်ႈထႆႇထႅင်ႈသေ ပိူၼ်ႈၵေႃႈ ၼႄႉၼမ်းႁႂ်ႈမၼ်းႁဵတ်း ၵူၼ်းၵဵပ်းၶေႃႈမုၼ်းၼႆယူႇ၊ မၼ်းၼၼ်ႉၵေႃႈ ဢမ်ႇပေႃးမေႃထဵင်ထႅင်ႈ ယၵ်ႉတူၺ်းၼႃႈႁွမ်လႅင်း ဢၼ်ယုမ်ႉတေႃႇမၼ်းၼၼ်ႉသေယဝ်ႉ ႁပ်ႉႁဵတ်းၵႂႃႇ။
ပေႃးဝႃႈႁူဝ်ၶမ်ႈမႃးၼႆ လုၵ်ႈႁဵၼ်းၸၢႆးၶဝ်လႄႈ ၶူးၵမ်ႈၽွင်ႈၵေႃႈ ၸူဝ်းဢွၼ်ၵၼ်လဵၼ်ႈမၢၵ်ႇၼင် ၼႂ်းပၢင်ႇႁူင်းႁဵၼ်းၼၼ်ႉ သဵင်ပေႃးဢူၼ်ပၼ်း ႁွင်ႉသႅၼ်ႈမူၼ်ႈၵၼ်ယူႇယဝ်ႉ။ ၶိူဝ်းမိူင်းၼၼ်ႉၵေႃႈ ပိူၼ်ႈၸူဝ်းလဵၼ်ႈၼႆလဵၼ်ႈၸွမ်းပိူၼ်ႈယူႇ။
ႁွမ်လႅင်းလႄႈဢူၺ်းၵေႃႉသွင်သၢမ်ၵေႃႉ ဢွၼ်ၵၼ်ပႃးတင်းမၢၵ်ႇၶူၼ်ၵႆႇသေ ပႆမႃးၼႂ်းပၢင်ႇႁူင်းႁဵၼ်းၼၼ်ႉလႄႈ ၶိူဝ်းမိူင်းႁၼ်ၼင်ႇၼၼ်ၵေႃႈ မိူၼ်ႇတူၺ်းၸွမ်းၵႂႃႇ သမ်ႉပေႃးလိုမ်းတူၺ်းမၢၵ်ႇၼင်ဢၼ်မႃးၸူးမၼ်း ဢမ်ႇတၼ်းပိတ်ႉသေ ပၼ်ၵိင်ႈၵႂႃႇတၢင်းႁူင်းႁေႃးၼၼ်ႉယူႇ။
“ၶိူဝ်းမိူင်း! ၵႂႃႇၵဵပ်းမႃးလႄႈ”
မၼ်းၸင်ႇၼႅတ်ႈဢႅၼ်ႇလႅၼ်ႈလမ်းဢဝ်ယဝ်ႉ။
ႁွမ်လႅင်းၶဝ်ၵေႃႈ ၶဝ်ႈၵႂႃႇၼႂ်းႁူင်းႁေႃးၼၼ်ႉသေ ပေႃႉမၢၵ်ႇၶူၼ်ၵႆႇၶဝ်လဵၼ်ႈယူႇႁင်းၶဝ်။ သမ်ႉဝႃႈ ၶိူဝ်းမိူင်းၼၼ်ႉတႄႉ ၵဵပ်းမၢၵ်ႇၼင်မႃးယဝ်ႉသေတႃႉ ၼႃႈလႄႈၶေႃးမၼ်းယင်းတိုၵ်ႉဝိၼ်ႇတူၺ်းၸွမ်းယူႇ။
ၶိူဝ်းမိူင်းၼၼ်ႉ ပဵၼ်ၵူၼ်းယဵၼ်ယဵၼ်ၵူၺ်းလႄႈၼႃႈယုမ်ႉယုမ်ႉဢွၼ်ႇသေ ဢမ်ႇပေႃးမေႃၶဝ်ႈႁႃပိူၼ်ႈၵႃႈႁိုဝ် ၵူၺ်းၵႃႈ သင်ဝႃႈမီးၵူၼ်းၶဝ်ႈႁႃမၼ်းၵေႃႈ မၼ်းမေႃယုမ်ႉၸူးပိူၼ်ႈလႄႈ မေႃလၢတ်ႈမေႃဢုပ်ႇတေႃႇပိူၼ်ႈယူႇ။
ယၢမ်းၵၢင်ၼႂ် 8:00 မူင်းၸမ်ၸမ်ၼၼ်ႉ ၶိူဝ်းမိူင်းၵေႃႈ တင်းထူင်ပႃးၶွၼ်ႇဢွၼ်ႇၵွင်ႉမႃႇ ၼုင်ႈသုပ်းၵူၼ်တႆးၶွၼ်ႇ သိူဝ်ႈသီၶၢဝ်ၶၢဝ်သေလႄႈ ပႆလူင်ၶိုၼ်ႈၵႂႃႇတၢင်းလႅင်းယိင်းၶဝ်ဢၼ်တေႃႇႁွတ်ႈတၢင်းလူင်ၼၼ်ႉ ႁင်းၵူၺ်းမၼ်းသေ ၵိုင်ႉၵၢင်ႉႁူပ်ႉတေႃႇ ႁွမ်လႅင်းၶဝ် ၽွင်းၶိုၼ်ႈမိူဝ်းၵႂႃႇႁူင်းႁဵၼ်းၼၼ်ႉၼႆၵေႃႈ ၼႅတ်ႈဢႅၼ်ႇလႅၼ်ႈလူင်းၵႂႃႇၶိုၼ်းတၢင်းၵဝ်ႇသေယဝ်ႉ ၵၢၼ်းတၢပ်ႈၶိုၼ်ႈမိူဝ်းၵႂႃႇၸွမ်းပိူၼ်ႈၸိူဝ်းၼၼ်ႉယူႇ။
ပေႃးဝႃႈထိုင်မႃး 8:15 မူင်း ၶဝ်ႈထႅဝ်တၢင်ႇၸွမ်ပိဝ်သေယဝ်ႉ ႁူဝ်ၼႃႈလုၵ်ႈႁဵၼ်းၵေႃႈ ဢွၵ်ႇမႃးလၢတ်ႈႁႂ်ႈၸၼ်ႉလႂ်ၸၼ်ႉၼၼ်ႉ ႁဵတ်းလိူမ်ႈလႆႇၸွမ်းႁွင်ႈႁဵၼ်းႁူင်းႁဵၼ်းယဝ်ႉ ၸင်ႇတေၶဝ်ႈႁဵၼ်းႁွင်ႈၽႂ်ႁွင်ႈမၼ်း 8:30 မူင်း ၸင်ႇတႄႇၶိုၼ်ႈႁဵၼ်း ၼႆယဝ်ႉ။
လုၵ်ႈႁဵၼ်းၶဝ်ၵေႃႈ ဢွၼ်ၵၼ်ၽဵဝ်ႈပတ်းၼႂ်းႁွင်ႈႁဵၼ်းၵႂႃႇ ၵမ်ႈၼမ်လုၵ်ႈႁဵၼ်းၸၼ်ႉ 10 ၼႆႉ ၵူၼ်းၼမ်လႄႈ တေၵႆႉလႆႈယူႇၼႂ်းႁူင်းႁေႃးလူင်ၼၼ်ႉယဝ်ႉ။
သိုပ်ႇလူတွၼ်ႈတေမႃးၶႃႈ
