ယၢမ်းႁူဝ်ၶမ်ႈ လူမ်းထွင်းယဵၼ်ယဵၼ်တွင်ႉၾႃႉၸိုၼ်ႈသႂ် ၶမ်းႁွမ်လႄႈသႅင်ၽွင်းၵေႃႈၸူဝ်းၵၼ်ဢွၵ်ႇႁႅင်းပႆလဵၼ်ႈၼႆယူႇ လုၵ်ႉတီႈႁူင်းႁဵၼ်းသေၶိုၼ်ႈလူင်မႃးတၢင်းဝၢၼ်ႈယဝ်ႉ သိုပ်ႇၵႂႃႇတၢင်းပၢင်ႇတီႈပိူၼ်ႈႁဵတ်းပွႆးၼၼ်ႉလႄႈ ဢမ်ႇမီးပွႆးယဝ်ႉ တီႈၼၼ်ႈၵေႃႈ ပဵၼ်ပၢင်ႇပဵင်းၵႂၢင်ႈ ႁႅင်ႈႁွင်ႁွင်ဝႆႉၵူၺ်း။ ပႆလႄႇလဵပ်ႈတူၺ်းႁုၼ်ႇႁၢင်ႈၸဝ်ႈသိူဝ်ၶၼ်ႇၾႃႉလႄႈ ၸဝ်ႈၵွၼ်းၸိူင်းၼၼ်ႉသေယဝ်ႉ ဢွၼ်ၵၼ်ၼင်ႈလိုဝ်ႈႁိူဝ်ႉၵၼ်ယူႇတၢင်းတူၵ်းၼၼ်ႉသေ သီငဝ်းတႃဝၼ်းၵေႃႈလိူင်ႁိူဝ်ႈၵႂႃႇလွႆးလွႆး တၢင်းႁၢင်ႈလီမၼ်းၼၼ်ႉ သမ်ႉပေႃးလႆႈဢဝ်ၾူၼ်းမႃးထႆႇယဝ်ႉ။
“ၶမ်းႁွမ်!..မႃးလႄႈႁဝ်းထႆႇပၼ်သူ”
ၶမ်းႁွမ်ၵေႃႈဢဝ်ၾူၼ်းမၼ်းပၼ်သႅင်ၽွင်းသေ သႅင်ၽွင်းႁႂ်ႈမၼ်းဝၢႆႇလင်ၵႂႃႇတူၺ်းၵၢင်ဝၼ်းတူၵ်းၼၼ်ႉသေယဝ်ႉ သၢႆႁိူဝ်ႈလႅင်းလုၵ်ႈတႃဝၼ်း တွၵ်ႈဢဝ်တူဝ်ၵူၼ်းသမ်ႉပေႃးလမ်ၽိတ်းၽိတ်း ႁၼ်ပဵၼ်ငဝ်းဝႆႉ ႁၼ်ဢဝ်ႁၢင်ႈႁုၼ်ႇၶမ်းႁွမ် တူဝ်ၶိင်းယွမ်သေးဢႅဝ်ၶႅဝ်ႉ ၶူၼ်ႁူဝ်တူင်ႉၼိုင်ၸွမ်း ထႆႇၶႅပ်းႁၢင်ႈဢွၵ်ႇမႃးၵေႃႈ ဢမ်ႇႁူႉဝႃႈပဵၼ်ၽႂ်သေတႃႉ ၵူၺ်းၵႃႈမၼ်းၵေႃႈႁၢင်ႈလီယူႇထႅင်ႈမဵဝ်းၼိုင်ႈၼၼ်ႉယဝ်ႉ။
“သႅင်ၽွင်းပႆႇယဝ်ႉႁႃႉ” ဝိၼ်ႇဝၢႆႇတူၺ်း ဢမ်ႇလႆႈႁၼ်သႅင်ၽွင်းယဝ်ႉ ၵူၺ်းပဵၼ်လႅင်းမိူင်း ဢၼ်ယိပ်းၾူၼ်းသေထႆႇပၼ်ၼၼ်ႉလႄႈ။ မိုင်ယၵ်ႉတူၺ်း လူၺ်ႈသၢႆတႃဢၼ်သိူဝ်းၸႂ် လေႃးပႃးလွင်ႈၸႂ်လမ်ယူႇဢိတ်းဢိတ်းၼၼ်ႉလႄႈ တေလၢတ်ႈသင်ၵေႃႈဢမ်ႇႁူႉ သမ်ႉပေႃးၵပ်ႉတိပ်ႇယူႇၼႂ်းၵူင်ၶေႃးၼၼ်ႉယဝ်ႉ။
လႅင်းမိူင်းၵေႃႈတေႃႈၼင်ႇၼၼ် ၸူမ်းသိူဝ်းၼႃႇလႄႈပေႃးဢမ်ႇၸၢင်ႈလၢတ်ႈႁိုဝ် ဝူၼ်ႉၽိတ်းတေႃႇၶဝ်လႄႈဢမ်ႇၶႂ်ႈႁတ်းလၢတ်ႈသင်ယဝ်ႉႁိုဝ်။
“သႅင်ၽွင်းၵႂႃႇလႂ်ယဝ်ႉၶႃႈ..”
“မၼ်းႁႂ်ႈႁဝ်းထႆႇၶႅပ်းႁၢင်ႈပၼ်သူသေ…ၵႂႃႇလႂ်ပႅတ်ႈယဝ်ႉဢမ်ႇႁူႉ…ၸွင်ႇတေထႆႇထႅင်ႈႁိုဝ်”
“ဢမ်ႇယဝ်ႉၶႃႈ..”
လႅင်းမိူင်းဢဝ်ၾူၼ်းၶမ်းႁွမ်ယိုၼ်ႈပၼ်ၵႂႃႇယဝ်ႉ “ၼႆႉၶႃႈၾူၼ်းသူ”
“ၸူမ်းယဝ်ႉၶႃႈ…”
“တေမိူဝ်းယဝ်ႉႁႃႉ..”
“ဢမ်ႇၶႃႈ..ပႂ်ႉတူၺ်းၵၢင်ဝၼ်းတူၵ်းသေၵွၼ်ႇ..သူလူး”
“ႁဝ်းၵေႃႈၶႂ်ႈႁၼ်ၵၢင်ဝၼ်းတူၵ်းလႄႈမႃးယဝ်ႉ”
သွင်ၶႃၵေႃႈ ၼင်ႈၼိမ်ယဵၼ်သုတ်ႇလူမ်းၵတ်းလူမ်းယဵၼ်ၼၼ်ႉ တူၺ်းလုၵ်ႈတႃဝၼ်းတူၵ်းယူႇ၊ သမ်ႉဝႃႈ သဵင်တၢင်းၼွၵ်ႈယဵၼ်သေတႃႉ သဵင်တၢင်းၼႂ်းတႄႉၶႂ်ႈႁွင်ႉသႅၼ်ႇဢွၵ်ႇမႃးလင်လင်ၵွၼ်ႇယဝ်ႉ။
“ႁၢင်ႈလီတေႉယဝ်ႉ!!…”
“ၼၼ်ႉယဝ်ႉ..ႁၢင်ႈလီတေႉဢေႃႈ”
“ပိူၼ်ႈဝႃႈတီႈၼႆႈ..ပေႃးၵၢင်ၶမ်ႈလပ်းသိင်ႇၼႆၽဵတ်ႇၵႆႉလွၵ်ႇၼႃႇၼႆဝႃႇ”
ၶမ်းႁွမ်ယၵ်ႉတူၺ်းလႅင်းမိူင်းသေ “ပိူၼ်ႈမႃးလႄႇပွႆးတမ်ႉဢမ်ႇႁၼ်ပိူၼ်ႈဝႃႈႁၼ်ၽဵတ်ႇသေၵေႃႉလႃႈ”
“မိူဝ်ႈၼၼ်ႉၵူၼ်းၼမ်ပေႉပႅတ်ႈယဝ်ႉၼႃႇ..ၵမ်းၼႆႉဢမ်ႇမီးၵူၼ်းယဝ်ႉမၼ်းၵေႃႈၶိုၼ်းမႃးၼၼ်ႉၼႃႇ..တီႈၼႆႈယၢမ်ႈမီးၵူၼ်းတၢႆႁေၼေႈ”
ၼင်ႇႁၢင်ႈလူမ်းၵေႃႈႁႅင်းမႃး သဵင်ၵေႃႈၶႂ်ႈငႅဝ်မႃး တႃဝၼ်းၼၼ်ႉၵေႃႈလပ်ႉလွႆၵႂႃႇ ၵိုတ်းသီႁိူဝ်ႈလိူင်မၼ်းၼၼ်ႉၵူၺ်းယဝ်ႉ။
“ႁဝ်းတေမိူဝ်းၵွၼ်ႇယဝ်ႉ..သူယူႇတီႈၼႆႈလႄႈပေႃးၼၼ်”
“ၸွမ်းတၢင်းၼၼ်ႉၵေႃႈမီးဢိူဝ်ႈ…တီႈမႆႉၵၢင်းၼၼ်ႉၸွင်ႇသူႁၼ်…ယၢမ်ႈမီးၵူၼ်းတၢႆတီႈၼၼ်ႈ…ၵႆႉၵႆႉႁၼ်ၶဝ်ဝႃႈပေႃးၵႂႃႇၵူၺ်းမႃးၵူၺ်းၼႆတေငိၼ်းဢၢႆတူႇၸိူဝ်းၼၼ်ႉဝႃႇ”
ၶမ်းႁွမ်လိူၵ်ႇတႃတူၺ်းမၼ်းသေပႆႁၢင်ႇမၼ်းၵႂႃႇယဝ်ႉ “တေမိူဝ်းၵူၺ်းတေႉတေႉႁႃႉ”
“ပေႃးၵူဝ်ၽီၵေႃႈမႃးလႄႈ..”
လႅင်းမိူင်းၵေႃႈလႅၼ်ႈမႃးသေ မႃးယိပ်းဢဝ်မိုဝ်းၶမ်းႁွမ်ပႆမိူဝ်းၵႂႃႇၸွမ်းၵၼ်ယူႇယဝ်ႉ။
“ၵူၼ်းသင်လၢတ်ႈသိုဝ်ႈသိုဝ်ႈၵေႃႈဢမ်ႇပဵၼ်…”
“ၶႃႈၵူဝ်ဢေႃႈ..ၵူဝ်ၽီတေႉယဝ်ႉ” တင်းသီၼႃႈဢွၼ်ႈဝွၼ်းၼၼ်ႉ ႁဵတ်းတေႃႇၶမ်းႁွမ်ယဝ်ႉ။
ဢဝ်ၶမ်းႁွမ်ပေႃးၶႂ်ႈလိုမ်းႁၢင်ႈၽၢင်ၵူၼ်းသိုၵ်းဢၼ်ၵႅၼ်ႇၶႅင်မၼ်းၼၼ်ႉၵႂႃႇယဝ်ႉ ယုမ်ႉဢွၵ်ႇမႃးယူႇ။
လႅင်းမိူင်းမႃးသူင်ႇၶမ်းႁွမ်ထိုင်ၼႃႈႁူင်းသဝ်းၼၼ်ႉသေ
“ၸွင်ႇတေႁႂ်ႈမိူဝ်းသူင်ႇၶိုၼ်းၼႄႇ..ၽဵတ်ႇလွၵ်ႇၸွမ်းတၢင်းသူတေႁဵတ်းႁိုဝ်”
“ႁဝ်းၵူဝ်ၽဵတ်ႇလွၵ်ႇသူလိူဝ်သေမႃးလွၵ်ႇႁဝ်းၵွၼ်ႇဢိူဝ်ႈ..”
“မေႃၼႃႇၼေႃ…”
လႅင်းမိူင်းၵေႃႈ တိုတ်ႉၼႃႈတႃမၼ်းသေယဝ်ႉ “ႁဝ်းယွမ်းၼွမ်းသူယူႇၼႃႈဝၼ်းၼၼ်ႉ…လႆႈပွႆႇသူဝႆႉႁင်းၵူၺ်း”
“ဢိုမ်ႉ!..ပွၵ်ႈမိူဝ်းလႆႈယဝ်ႉဝႃႈ…မိူဝ်ႈၼႆႉၵေႃႈသူလႆႈႁပ်ႉႁဝ်းသေမႃးသူင်ႇၶိုၼ်းယဝ်ႉလူး”
လႅင်းမိူင်းၵေႃႈမိူဝ်းႁႃဢၢပ်ႇၼမ်ႉဢၢပ်ႇသင်ယဝ်ႉၵေႃႈ ပိုတ်ႇၾူင်းတူၺ်းၶႅပ်းႁၢင်ႈ ဢၼ်သႅင်ၽွင်းသူင်ႇပၼ်ၼၼ်ႉ ယုမ်ႉယူႇႁင်းမၼ်း မိူဝ်ႈတိုၵ်ႉယုမ်ႉမိူၼ်ႇယူႇၼၼ်ႉ သဵင်ၾူၼ်းၵေႃႈမေႃးမႃး လႅင်းမိူင်းႁပ်ႉၵႂႃႇသေ ပႆႇတၼ်းလၢတ်ႈသင် သဵင်ၸၢႆးၶိူဝ်းၵေႃႈမေႃးမႃး
“ႁဵတ်းႁင်ယူႇလႃႇ…ယုမ်ႉပေႃးဢမ်ႇတုပ်ႇလႆႈဝႃႈ…”
“ၵူၼ်းမီးတၢင်းႁၵ်ႉၵေႃႈမိူၼ်ၼႆယဝ်ႉ…”
“သၢဝ်ၵေႃႉလႂ်ၼေႃ…ႁဵတ်းႁႂ်ႈႁူဝ်ၼႃႈႁဝ်းပေႃးယွင်ႇၵႂႃႇၸိူင်ႉၼႆ…”
“လၢတ်ႈပေႃးတၢၼ်ႇဝႃႈမီးလၢႆၵေႃႉယဝ်ႉ…”
“ဢမ်ႇႁူႉၵဝ်ႇသႄႈ…ပေႃးသၢဝ်သၢဝ်ၶဝ်ပၼ်မၢႆၾူၼ်းၼႆ…ဢဝ်မႃးယူႇတႃႇသေႇလူး…”
“ၵူၼ်းလဝ်းၵေႃႈတေထဵင်ၶိုၼ်းယၢပ်ႇဝႆႉယူႇၵူၺ်းၵႂႃႈ…ပေႃးဢမ်ႇဢဝ်ၵေႃႈၵမ်ႉပိူၼ်ႈတေဝႃႈ…လဝ်းၵေႃႈလဝ်းလၢႆလၢႆၵူၺ်း…ဢမ်ႇမီးၼမ်ႉၸႂ်ၼႆႁေယဝ်ႉလေႃႇ…”
“ၶႃႈၵႂႃႇယဝ်ႉ…ဢဝ်ၵၢင်ၸႂ်ယူႇလႄႈ…”
လႅင်းမိူင်းၵိုင်ႉၵၢင်ႉႁၼ်ၾူၼ်းမၼ်း မီးယူႇၼႂ်းသၢႆၶမ်းႁွမ်ယဝ်ႉ ပေႃးတူၵ်းၸႂ်ၵႂႃႇ
“ႁဝ်းတၼ်းႁပ်ႉၵႂႃႇမိူဝ်ႈလႂ်လႃႇၼႆႉ…ငိၼ်းမူတ်းယဝ်ႉယူဝ်ႉ!!…”
“ၵူၼ်းလဝ်းၸိူင်ႉသူၼႆႉတေဝႆႉၸႂ်လႆႈယူႇႁ…လိူဝ်သေလဝ်းယဝ်ႉသမ်ႉပၢႆမီးၼမ်ႉၸႂ်သေ…ထုၵ်ႇလီလႆႈယိၼ်းၸူမ်းယူႇယူဝ်ႉ…ယွၼ်ႉၼမ်ႉၸႂ်လီသူသေ…ႁဵတ်းႁႂ်ႈလႆႈမႃးထူပ်းၵၼ်ၸိူင်ႉၼႆ…”
“ႁူၼ်ၵႂၢမ်းၶိုၼ်းလႆႈလီတေႉယဝ်ႉ…ၶႅၼ်ႁဝ်းယူႇၸွင်ႇၸႂ်ႈ…” တေႁဵတ်းႁိုဝ်တွပ်ႇယဝ်ႉၵမ်းၼႆႉ
“ထိုင်တီႈယူႇယဝ်ႉႁႃႉ…”
“သူယင်းပႆႇတွပ်ႇၵႂၢမ်းထၢမ်ႁဝ်းသမ်ႉပေႃးလၢႆႈၵႂၢမ်းၵႂႃႇယဝ်ႉ…ၶႂ်ႈဝႃႈၶႅၼ်တေႉတေႉႁႃႉ…”
“ႁဝ်းတေဝၢင်းယဝ်ႉ…”
“ၵမ်ႉၵွၼ်ႇလႄႈ…မိူဝ်ႈၵႆႈ…ႁဝ်းၵေႃႈလၢတ်ႈၵႂႃႇၸိူင်ႉၼၼ်ႉၵူၺ်း…ယႃႇဢဝ်သႂ်ႇၸႂ်လႄႈၼႃႈ…”
“တေႁႂ်ႈႁဝ်းသႂ်ႇၸႂ်လႆႈၸိူင်ႉႁိုဝ်…တေႃႈၼင်ႇပိူၼ်ႈထိုင်ယဝ်ႉၵေႃႈယင်းဢမ်ႇလၢတ်ႈၵၼ်ၶိုၼ်းလႃႈ”
“တိုၵ်ႉဢၢင်ႈတေလၢတ်ႈယူႇဢေႃႈ..”
“ ႁဝ်းဝၢင်းယဝ်ႉ…ၵူဝ်ဢမ်ႇတၼ်းသိုပ်ႇတူၺ်းမၢႆၾူၼ်းဢၼ်ပိူၼ်ႈပၼ်မႃး”
“တိုၵ်ႉဝႃႈယူႇ…တေဢဝ်မၢႆၾူၼ်းၶဝ်ပၼ်သူၵပ်းၵႂႃႇၼႆ…”
သွင်ၵေႃႉဢုပ်ႇလၢတ်ႈၵဝ်းၵၼ် လၢတ်ႈတႄႉဝႃႈတေဝၢင်း သၢႆၵႂၢမ်းပေႃးဢမ်ႇၶၢတ်ႇ ၵူၼ်းယူႇၸွမ်းပေႃးၶႂ်ႈၶၢၼ်ႉငိၼ်းတင်းဢမ်ႇႁူႉတူဝ်။
သမ်ႉဝႃႈသွင်ၶႃဢမ်ႇၸႂ်ႈၵေႃႉႁၵ်ႉၵၼ်သေတႃႉ ပေႃးတူၺ်းလၢႆးႁဵတ်းလၢႆးသၢင်ႈမၼ်းတႄႉ လၢတ်ႈၼႄလႆႈၸႅင်ႈလႅင်းလီယူႇဝႃႈပဵၼ်ၵေႃႉႁၵ်ႉၵၼ်ယဝ်ႉ၊ လိူဝ်သေဢမ်ႇမီးၽၢႆႇလႂ်လၢတ်ႈဢွၵ်ႇမႃးလႄႈ မၵ်းမၼ်ႈဝႃႈပဵၼ်ၵေႃႉႁၵ်ႉၵၼ်ၼႆၵူၺ်း။ သမ်ႉဝႃႈဢမ်ႇတွၼ်ႉလၢတ်ႈႁၵ်ႉၵၼ်သေပွၵ်ႈၼႆၵေႃႈ ၶေႃႈၵႂၢမ်းဢၼ်သိုဝ်ႇထိုင်ဝႃႈႁၵ်ႉၼၼ်ႉ တိုၼ်းပႃးယူႇၵူႈၶေႃႈၵူႈၵမ်းယဝ်ႉ။ ဢမ်ႇၸမ်ပဵၼ်တေလႆႈလၢတ်ႈဝႃႈ“ႁၵ်ႉ”ယဝ်ႉၸင်ႇတေႁူႉဝႃႈႁၵ်ႉ။ ပေႃးဝႃႈႁၵ်ႉၼႆ ဢမ်ႇလူဝ်ႇသပ်းလႅင်းၼႄၵေႃႈလႆႈယဝ်ႉ ႁူဝ်ၸႂ်မၼ်းႁပ်ႉႁူႉလႆႈႁင်းၵူၺ်း။ တႃႇတေလႆႈလၢတ်ႈဝႃႈ“ႁၵ်ႉ”ၼႆၼိုင်ႈၶေႃႈတေႃႇၽႂ်သေၵေႃႉၼႆႉ မၼ်းမီးၵႃႈၶၼ်ၼႃႇ မိူၼ်ႁဝ်းတေဢဝ်ၸၢတ်ႈပၢၼ်ႁဝ်းၵႂႃႇၽၢၵ်ႇဝႆႉတီႈပိူၼ်ႈၼၼ်ႉယဝ်ႉ။
“ႁၵ်ႉ” ၼႆၼၼ်ႉလၢတ်ႈငၢႆႈငၢႆႈၵေႃႈ မၼ်းၵေႃႈတေပဵၼ်တၢင်းႁၵ်ႉဢၼ်ငၢႆႈငၢႆႈၵူၺ်း ဝူၼ်ႉဝႃႈတၢင်းႁၵ်ႉၼႆႉ မၼ်းပဵၼ်တၢင်းႁၵ်ႉဢၼ်ဢမ်ႇမီးတီႈပွင်ႇသင်ၵေႃႈတေဢမ်ႇမီးတီႈပွင်ႇၵူၺ်း၊ ပေႃးႁဝ်းဝႆႉၵႃႈၶၼ်မၼ်းၵေႃႈ မၼ်းတေမီးၵႃႈၶၼ်မၼ်းမႃး ပေႃးဢမ်ႇဝႆႉၵႃႈၶၼ်ၵေႃႈ ႁိုဝ်တေမီးၵႃႈၶၼ်လႃႇ။
တွၼ်ႈတႃႇၶမ်းႁွမ်ၶႃတႄႉ ဢမ်ႇလူဝ်ႇလၢတ်ႈယဝ်ႉ ၵူႈလွင်ႈၸႅင်ႈလႅင်းလိူဝ်သေၸႅင်ႈလႅင်း ဢမ်ႇတွၼ်ႉလၢတ်ႈၼႆသေတႃႉၵေႃႈ ႁူႉဝႆႉၼႂ်းၸႂ်ၽႂ်မၼ်းယူႇ လိူဝ်သေဢမ်ႇလၢတ်ႈဢွၵ်ႇမႃးၵူၺ်း တႃႇတေလၢတ်ႈဢွၵ်ႇမႃးၼၼ်ႉ ဝႆႉမိူဝ်ႈၶၢဝ်းယၢမ်းမၼ်းၵိုင်ႇတၢၼ်ႇၸင်ႇတေလၢတ်ႈယဝ်ႉ။ ယွၼ်ႉမၼ်းမီးၵႃႈၶၼ်ၼႃႇလူး ႁႂ်ႈလၢတ်ႈဢွၵ်ႇမႃးၵေႃႈမၼ်းႁိုဝ်ငၢႆႈ။
သိုပ်ႇလူထႅင်ႈတွၼ်ႈတေမႃးၶႃႈ။
