တွၼ်ႈႁႃႈ
တႃဝၼ်းသုမ်ႇလပ်ႉလွႆ သၢႆငဝ်းလိူၼ်လႅင်းဝွႆးဝွႆး သဵင်လူတ်ႉၶိူင်ႈလင်မေႃးမႃး ၵိုတ်းယူႇၶၢင်ႈႁူင်းသဝ်းၶူးၶဝ်ၼၼ်ႉယဝ်ႉ သႅင်ၽွင်းၵေႃႈ…
“ၶမ်းႁွမ်ၵႂႃႇတူၺ်းပၼ်ၽွင်ႈလူး…မိူၼ်ဝႃႈတေမီးၶႅၵ်ႇမႃး… ”
“ၶၢဝ်းၼႆႉယဝ်ႉတိုၵ်ႉမီးၶႅၵ်ႇမႃးယူႇႁႃႇ…လိုၵ်းၼႃႇယဝ်ႉၼႃ… ”
“မႄႈဢူၺ်းၵေႃႉႁဝ်းၽၢၵ်ႇၶူဝ်းမႃးပၼ်မၼ်းဝႃႇ…မၼ်းဝႃႈတေၸႂ်ႉႁူဝ်ၼႃႈၶဝ်မႃးဢဝ်ၼႆၼေႈ…လၢတ်ႈဝႃႈတေမႃးၶမ်ႈဢိတ်းၼိုင်ႈ…ယူဝ်တေၸႂ်ႈယူႇယူဝ်ႉ…ၵႂႃႇတူၺ်းပၼ်ၽွင်ႈ… ”
ၶမ်းႁွမ်လုၵ်ႉၵႂႃႇ ပိုတ်ႇၽၵ်းတူယဝ်ႉမုင်ႈႁၼ် ႁၼ်ၽူႈၸၢႆးၵေႃႉၼိုင်ႈ ၸုၵ်းယူႇၼႂ်းငဝ်းလပ်းသိင်ႇၼၼ်ႉဝွႆးဝွႆး ၶမ်းႁွမ်လူင်းမႃးၸူးလွႆးလွႆးသေ
“ၶိုၼ်ႈမိူဝ်းပႂ်ႉတၢင်းၼိူဝ်ၵေႃႈလႆႈယူႇၶႃႈ… ”
ငဝ်းၼၼ်ႉဢွၵ်ႇမႃးယူႇတႂ်ႈသၢႆလႅင်းယဝ်ႉႁၼ်ၸႅင်ႈမႃးလႄႈ ၶမ်းႁွမ်ဢွၼ်ၶဝ်ႈၵႂႃႇ ၼႂ်းႁွင်ႈႁပ်ႉၶႅၵ်ႇသေ
“ႁဝ်းတေၵႂႃႇႁွင်ႉသႅင်ၽွင်းမႃးပၼ်ၶႃႈၼႃ… ”
လႅင်းမိူင်းၵေႃႈဢမ်ႇမီးလွင်ႈတုမ်ႉတွပ်ႇသင်ၶိုၼ်း။
ၶမ်းႁွမ်ၵႂႃႇႁွင်ႉသႅင်ၽွင်းမႃးၸူးယဝ်ႉ ဢုပ်ႇၵၼ်ၵႅပ်ႉၼိုင်ႈ လႅင်းမိူင်းၵေႃႈဢဝ်ၶူဝ်းယဝ်ႉ ၵႂႃႇပႂ်ႉယူႇတီႈလူတ်ႉၶိူင်ႈမၼ်းၼၼ်ႉလႄႈ
“ၶမ်းႁွမ်ၶဝ်တေမိူဝ်းယဝ်ႉ…ဢမ်ႇၵႂႃႇသူင်ႇသေဢိတ်းႁ…”
“ဢမ်ႇယဝ်ႉ…”
“မိူၼ်ဝႃႈၶဝ်လႅပ်ႈမီးလွင်ႈၶႂ်ႈဢုပ်ႇတင်းသူယူႇၼႃ…ၶဝ်ႁႂ်ႈသူၵႂႃႇထူပ်းဝႃႇ …”
“ဢမ်ႇယူဝ်ႉ…မိူဝ်ႈၵႆႈၵေႃႈႁၼ်ႁဝ်းယူႇ…ၶဝ်ယင်းဢမ်ႇဝႃႈသင်… ”
ၶမ်းႁွမ်ၼင်ႈယူႇတင်းႁိုင် ပႂ်ႉထွမ်ႇသဵင်လူတ်ႉတေမိူဝ်းၵေႃႈမိူၼ်ဢမ်ႇလႆႈငိၼ်း ၼႂ်းၸႂ်ဢၼ် ဢမ်ႇၶႂ်ႈထူပ်းၼႆၼၼ်ႉ ၵႆႉမီးတၢင်းယၢမ်ႈလၵ်ႉၶျွင်းဝႆႉၼေႈ ၶမ်းႁွမ်ပိုတ်ႇတူၺ်းတီႈႁူးလႅင်းသေလႄႈ ယင်းတိုၵ်ႉလႆႈႁၼ်ၼင်ႈပႂ်ႉယူႇ…
“ပေႃးတေလၵ်ႉတူၺ်းယူႇႁဵတ်းၼၼ်…ဢမ်ႇလူင်းၵႂႃႇသေ…ၶမ်ႈၵေႃႈၶမ်ႈၼႃႇယဝ်ႉ…ပေႃးသူၼၢၼ်းၵႂႃႇၵေႃႈၶဝ်တေလႆႈမိူဝ်းၶမ်ႈၵူၺ်းဢိူဝ်ႈ”
ၶမ်းႁွမ်ထူၺ်ႈၸႂ်လူင်ၵမ်းၼိုင်ႈ ပိုတ်ႇၽၵ်းတူလွႆးလွႆး ပႆၵႂႃႇၸူးလႅင်းမိူင်းဢၼ်ယူႇၼႂ်းငဝ်းလပ်းသိင်ႇၼၼ်ႉယဝ်ႉ။
“ၶၢဝ်းၼႆႉယဝ်ႉပႆႇမိူဝ်းၵွၼ်ႇႁႃႉ… ”
“ၶမ်ႈၶိုၼ်းၼႆႉ…လုၵ်ႈလၢဝ်ႁၢင်ႈလီတေႉယဝ်ႉၼေႃ…” ၶမ်းႁွမ်ႁႅၼ်မုင်ႈတူၺ်းၸွမ်းသေ
“ဢိုမ်ႉ!… မိူၼ်ဝႃႈႁဝ်းတိုၵ်ႉယၢမ်ႈႁၼ်တွင်ႉၾႃႉလီလီၶမ်ႈၼႆႉယဝ်ႉ…”
လႅင်းမိူင်းၵေႃႈၶၢႆႉသၢႆတႃမၼ်းတူၺ်းၸူးၶမ်းႁွမ်သေယုမ်ႉယူႇ ၶမ်းႁွမ်ၵေႃႈၵိုတ်းတူၺ်းယဝ်ႉ ဝၢႆႇတူၺ်းၵႂႃႇၸူးလႅင်းမိူင်းၶိုၼ်း သၢႆတႃၼၼ်ႉတုမ်ႉမႅၼ်ႈၺႃးၵၼ် ဢမ်ႇတၼ်းႁူႉတူဝ် ႁူဝ်ၸႂ်တွတ်ႇတဵၼ်ႈသၼ်ႇၶွၼ်းၼိုင် ၵိုတ်းမိုင်ၵႂႃႇၵမ်းၼိုင်ႈ တူဝ်ၸင်ႇတေမီးသတိမႃးၶိုၼ်း။
“ပေႃးဢမ်ႇမီးလွင်ႈသင်ယဝ်ႉ…ႁဝ်းတေၵႂႃႇၵွၼ်ႇယဝ်ႉၼႃႈ…”
တင်းလၢတ်ႈတၢင်းဝၢႆႇလင်ၵႂႃႇ လႅင်းမိူင်းၵေႃႈမီးလွင်ႈတုမ်ႉတွပ်ႇၶိုၼ်းၵမ်းလဵဝ်လႄႈ ၶုၼ်ႇႁၢဝ်ႉဢဝ်မိုဝ်းၶမ်းႁွမ်ဝႆႉသေ “ၵမ်ႉၵွၼ်ႇလႄႈ……”
ၶမ်းႁွမ်ၵိုတ်းမိုင်တူၺ်းတီႈၶေႃႈမိုဝ်းမၼ်းၼၼ်ႉလႄႈ လႅင်းမိူင်းၼႅတ်ႈပွႆႇ
“မိူဝ်ႈၼႆႉႁဝ်းၵႂႃႇထူပ်းၶမ်းမိူင်း…ႁဝ်းလၢတ်ႈၶဝ်ဝႃႈသူမႃးမီးတီႈၼႆႈ…ၶဝ်ၸူမ်းတေႉၼၼ်ႉယဝ်ႉ…ဝၼ်းလိုဝ်ႈၼႆႉၸွင်ႇသူမီးၶၢဝ်းယၢမ်းတၼ်းႁႃႉ…ႁဝ်းတေႁႃၶၢဝ်းယၢမ်းပၼ်ႁႂ်ႈၶဝ်လႆႈမႃးထူပ်းသူ…”
“ၵေႃႈတၼ်းယူႇ…”
“ပေႃးၼၼ်ၵေႃႈ…ဝၼ်းလိုဝ်ႈႁဝ်းတေမႃးႁပ်ႉ!…”
သူင်ႇသင်ႇယုမ်ႉၸူးၶမ်းႁွမ်သေ ႁေႃႈလူတ်ႉၶိူင်ႈမၼ်းမိူဝ်းၵႂႃႇယဝ်ႉ။
ၵၢင်ၼႂ်ၸဵမ်ၸဝ်ႉ ၶမ်းႁွမ်တိုၵ်ႉၼင်ႈၵိၼ်ၶဝ်ႈယူႇၼႂ်းႁွင်ႈၵိၼ်ၶဝ်ႈၼၼ်ႉ မီးၵူၼ်းႁွင်ႉလၢတ်ႈဝႃႈ
“ၶမ်းႁွမ်မီးၵူၼ်းမႃးႁႃ… ”
“ၽႂ်လႃႇ… ”
“ဢမ်ႇႁူႉယဝ်ႉ…မႃးတူၺ်းဢဝ်ၵူၺ်းလႃႈ… ”
ၶမ်းႁွမ်ၵေႃႈသင်ႇတီႈသႅင်ၽွင်းသေ
“ယႃႇၽွမ်ႈပေႃးပႅတ်ႈၵၼ်ၼႃႈ…”
လႅၼ်ႈဢွၵ်ႇၵႂႃႇတူၺ်းယဝ်ႉႁၼ်လႅင်းမိူင်းပႂ်ႉဝႆႉယူႇလႄႈ
“တၼ်းမႃးယဝ်ႉႁႃႉ…ႁဝ်းယင်းဢမ်ႇပႆႇလႆႈႁၢင်ႈႁႅၼ်းသင်…”
“ႁဝ်းပႂ်ႉလႆႈယူႇ…”
“ပေႃးၼၼ်ၵေႃႈပႂ်ႉၵမ်းၼိုင်ႈလႄႈ…”
ၶမ်းႁွမ်ႁိပ်ႈၵိၼ်ၶဝ်ႈထႅင်ႈၵမ်းသွင်ၵမ်းယဝ်ႉ ၼႅတ်ႈလၢင်ႉဝၢၼ်ႇသေ ႁၢင်ႈႁႅၼ်းတူဝ်ဢွၵ်ႇမႃးၸူးယူႇ။
“ယဝ်ႉယဝ်ႉႁႃႉ… ”
“ဢိုမ်ႉ!…လႆႈပႂ်ႉႁိုင်ၼႃႇႁႃႉ!…ယွမ်းၼွမ်းၶႃႈၼႃႈ…”
“ႁဝ်းၵေႃႈယွမ်းၼွမ်းမိူၼ်ၵၼ်…ဢမ်ႇလႆႈလၢတ်ႈဝႆႉၶၢဝ်းယၢမ်းဝႃႈ..တေမႃးလၢႆမူင်းၼႆ…ၵူၺ်းၵႃႈသူၵေႃႈႁၢင်ႈႁႅၼ်းတူဝ်ဝႆးတေႉယဝ်ႉ…ဢမ်ႇတၼ်းႁူႉသမ်ႉပေႃးတၼ်းယဝ်ႉယဝ်ႉ…ႁဝ်းႁၼ်ၼင်ႇႁၢင်ႈၽူႈယိင်းၼႆႉ…ပေႃးတေဢွၵ်ႇၵႂႃႇတၢင်းၼွၵ်ႈၼႆ..တေၼင်ႈႁၢင်ႈၶိူင်ႈပဵၼ်ၶိုင်ႈၸူဝ်ႈမူင်းၸိူဝ်းၼႆႉဢမ်ႇၸႂ်ႈႁိုဝ်…”
“ၼၼ်ႉတႄႉတေပဵၼ်ၽူႈယိင်းသူၵူၺ်းၶႃႈယူဝ်ႉ…ႁဝ်းၶီႇလူတ်ႉၵႂႃႇၸွမ်းသူၸိူင်ႉၼႆ…ဢမ်ႇပေႃးလီယူဝ်ႉၼႆႉ”
“ၸၢင်ႈပဵၼ်သင်”
“ၵမ်ႉမႃးမီးၵူၼ်းၶႅၼ်ၶႃႈဢေႃႈ”
“ပေႃးမီးတႄႉလႅပ်ႈတေၶႅၼ်ယူႇၶႃႈယူဝ်ႉ…”
“ႁႂ်ႈသႅင်ၽွင်းၵႂႃႇသူင်ႇၵေႃႈလႆႈယူႇ…ၵူဝ်ယၢပ်ႇၸႂ်သူဢေႃႈ…ႁဝ်းၵူဝ်သူတေမီးပၼ်ႁႃတၢင်း…”
“ႁဝ်းပႆႇမီးၵေႃႉႁၵ်ႉၶႃႈ!…” ဢဝ်ၶမ်းႁွမ်ယဵၼ်ၵႂႃႇ ပေႃးဢမ်ႇၵိုင်ႉၵၢင်ႉလၢတ်ႈသင်လႆႈယဝ်ႉ။
“ႁဝ်းဝႃႈသူထုၵ်ႇလီႁူႉဝႆႉၶႃႈဢေႃႈ…”
“ဢေႃႈ ဢမ်ႇၸမ်ပဵၼ်..” လၢတ်ႈပႆႇသုတ်း
“ၵူဝ်သူထၢင်ႇၽိတ်းဢေႃႈ”
သမ်ႉပေႃးဢဝ်ၶမ်းႁွမ်ဢမ်ႇၸၢင်ႈလၢတ်ႈသင်လႆႈထႅင်ႈယဝ်ႉ။
ၶမ်းႁွမ်ၵေႃႈ ၶိုၼ်ႈၶီႇလူတ်ႉၶိူင်ႈၸွမ်းလႅင်းမိူင်းသေ၊ သမ်ႉပဵၼ်တၢင်းၸၼ်းၶိုၼ်ႈလွႆလႄႈ ဢမ်ႇယၢမ်ႈသေပွၵ်ႈၶႂ်ႈၵူဝ်ၵူဝ်ဝႆႉ ဢဝ်မိုဝ်းဢွၼ်ႇမၼ်းၼၼ်ႉ ယိပ်းၸၼ်သိူဝ်ႈလႅင်းမိူင်း သမ်ႉပေႃးမၼ်ႈတဵင်ႈတဵင်ႈ။ လႅင်းမိူင်းၵေႃႈ ဢွၼ်ဢဝ်ၶမ်းႁွမ်မိူဝ်းၵႂႃႇတီႈလိုဝ်ႈၶဝ်ၼၼ်ႉယူႇ တီႈၼၼ်ႈ ၵူၼ်းပေႃးတဵမ်ၵႂႃႇသဵင်ႈ ၸင်ႇႁႂ်ႈၶမ်းႁွမ်ၼင်ႈပႂ်ႉ တီႈၼင်ႈလိုဝ်ႈၶဝ်ၼၼ်ႉသေ မီးၵူၼ်းတမ်းပၼ်ၼမ်ႉယဝ်ႉ ဢမ်ႇႁိုင်လႅင်းမိူင်းၸင်ႇႁွင်ႉၶမ်းမိူင်းမႃးထူပ်း။ ၶမ်းႁွမ်လႆႈႁၼ်ၼွင်ႉၸၢႆးမၼ်း သမ်ႉပေႃးယွမ်လူင်ဝႆႉလႄႈ
“ၸၢႆးဢမ်ႇယူႇလီႁႃႉ…ပဵၼ်သင်လႄႈပေႃးယွမ်လူင်ဝႆႉၸိူင်ႉၼႆ…”
“ယူႇလီဢေႃႈ…ၸၢႆးယင်းၵႅၼ်ႇၶႅင်လိူဝ်သေမိူဝ်ႈဢွၼ်တၢင်းၵွၼ်ႇယဝ်ႉၼႆႉ…”
ပိုတ်ႇၼႄၵၢမ်ႈၼိူဝ်ႉတီႈၶႅၼ်ၼူၼၼ်ႉ ပၼ်ပီႈၼၢင်းမၼ်းတူၺ်းယူႇ။
“လႆႈၵႂႃႇသွၼ်ၵၢၼ်ၸွင်ႇတုၵ်ႉၶၼႄႇ…ၸွင်ႇႁိူဝ်ႉႁိုဝ်…ၸွင်ႇမီးလွင်ႈယၢပ်ႇၽိုတ်ႇသင်ၼႄႇ…”
“ၸွင်ႇမီးၽႂ်ဢၼ်ဢမ်ႇယၢမ်ႈတုၵ်ႉၶႁိုဝ်… ” ၶမ်းမိူင်းၵေႃႈယဵၼ်ၵႂႃႇၵမ်းၼိုင်ႈ…
“ပီႈၸွင်ႇႁူႉႁ…မိူဝ်ႈၶႃႈယူႇႁိူၼ်းၶႃႈၶႂ်ႈမႃးႁဵတ်းသိုၵ်း…ၶႃႈဝူၼ်ႉဝႃႈမၼ်းမီးၾၢင်ႁၢင်ႈၶိုၵ်ႉၶႅမ်ႉ…ၶႃႈႁၼ်သိုၵ်းႁၢၼ်မိူင်းပိူၼ်ႈ…ႁၼ်ၼႂ်းၸိူင်းၼၼ်ႉ…မၼ်းၶႅမ်ႉ…လႆႈယိပ်းၵွင်ႈသေၵႅတ်ႇၶႄၽႅၼ်ႇလိၼ်ဝၢၼ်ႈမိူင်း…ၵႅတ်ႇၶႄၵူၼ်းၵေႃႉဢၼ်ၶဝ်ႁၵ်ႉ…ၵတ်ႉၶႅၼ်ႇလႄႈႁတ်းႁၢၼ်..ဢမ်ႇၵူဝ်တၢႆ…ႁတ်းတၢႆတၢင်ၸိူဝ်ႉၸၢတ်ႈတူဝ်ၵဝ်ႇ…ၶႃႈဝူၼ်ႉဝႃႈဝၼ်းၼိုင်ႈ…ၶႃႈတေၵတ်ႉၶႅၼ်ႇမိူၼ်ၶဝ်…တေႁတ်းႁၢၼ်မိူၼ်ၶဝ်…တေဢဝ်သၢႆၸႂ်သေၵႅတ်ႇၶႄၽႅၼ်ႇလိၼ်ဝၢၼ်ႈမိူင်းမိူၼ်ၶဝ်…ၵႅတ်ႇၶႄပၼ်ၵူၼ်းၵေႃႉဢၼ်ၶႃႈႁၵ်ႉ…ၵႅတ်ႇၶႄပၼ်မႄႈ…ၵႅတ်ႇၶႄပၼ်ပီႈ…ယွၼ်ႉၼၼ်ႉလႄႈ…ၶႃႈၶႂ်ႈမႃးႁဵတ်းသိုၵ်း…
မိူဝ်ႈၶႃႈတေႇမႃး…ၶႃႈဢမ်ႇႁူႉဝႃႈၶႃႈတႅပ်းတတ်းၽိတ်းႁိုဝ်ထုၵ်ႇႁိုဝ်…လွင်ႈၼွၼ်းၾၼ်ဢၼ်ၶႃႈ…ၾၼ်မႃးၸိူဝ်းၼၼ်ႉ…မၼ်းလႅၵ်ႈလၢႆႈၵႂႃႇမူတ်း…ၶႃႈၸႂ်ထိုင်ႁိူၼ်းတေႉယဝ်ႉ…ၶႃႈၶႂ်ႈမိူဝ်းႁိူၼ်း…ၶႃႈဢမ်ႇမီးၵေႃႉ…ၶႃႈဢမ်ႇမီးၶၢဝ်းယၢမ်းလႄႇ…ဢမ်ႇမီးၶၢဝ်းယၢမ်းလႆႈလဵၼ်ႈၽူင်း…ၶႃႈဢမ်ႇမီးငိုၼ်းမိူၼ်ယူႇတီႈႁိူၼ်း…ဢမ်ႇလႆႈၸႂ်ႉၸၢတ်ႈပၢၼ်ထၢင်ႇႁၢင်ႈ…ၶႃႈဢမ်ႇႁူႉဝႃႈၶႃႈတေလႆႈႁဵတ်းၸိူင်ႉႁိုဝ်…ၶႃႈဝူၼ်ႉၶိုၼ်းၵႂၢမ်းဢၼ်…မႄႈလၢတ်ႈ…ႁဵတ်းႁႂ်ႈၶႃႈပွင်ႇၸႂ်ဢၼ်မႄႈလၢတ်ႈမႃးၼၼ်ႉၵမ်းလဵဝ်ယဝ်ႉ…
မိူဝ်ႈတူဝ်ၶႃႈလႆႈထူပ်းၸိူင်ႉၼႆယဝ်ႉ…ပၢႆးဝူၼ်ႉၶႃႈၵေႃႈလႅၵ်ႈလၢႆႈ…ဢၼ်ၶႃႈမႃးႁဵတ်းသိုၵ်းၼႆႉဢမ်ႇ…ၸႂ်ႈယွၼ်ႉၶဝ်လႄႈမႃး…ယွၼ်ႉဝႃႈမၼ်းပဵၼ်ပုၼ်ႈၽွၼ်းၶႃႈထုၵ်ႇလီလႆႈမႃးၼၼ်ႉယဝ်ႉ…ဝၢၼ်ႈမိူင်းႁဝ်း…ပေႃးႁဝ်းဢမ်ႇၵႅတ်ႇၶႄ…ဢမ်ႇမီးၽႂ်တေမႃးၵႅတ်ႇၶႄပၼ်ႁဝ်း…ပေႃးႁဝ်းဢမ်ႇႁၵ်ႉၽႂ်ၵေႃႈဢမ်ႇႁၵ်ႉပၼ်ႁဝ်းလႆႈ…တေႁႂ်ႈပိူၼ်ႈမႃးႁၵ်ႉပၼ်ႁဝ်း…ပိူၼ်ႈၵေႃႈတေဢဝ်ပဵၼ်ၶွင်ပိူၼ်ႈၵႂႃႇၵူၺ်း…သင်ဢမ်ႇသင်..ၶႃႈၵေႃႈ…ပဵၼ်လုၵ်ႈမႄႈတႆးၵေႃႉၼိုင်ႈလူး…ၶႃႈၵေႃႈမီးသုၼ်ႇထုၵ်ႇလီလႆႈမႃးႁဵတ်းၼၼ်ႉယဝ်ႉ…
သမ်ႉဝႃႈၶႃႈတေတုၵ်ႉၶ…ၶႃႈဢမ်ႇလႆႈမိူဝ်းႁိူၼ်း…ၶႃႈဢမ်ႇမီးငိုၼ်းၼႆသေတ…ဢမ်ႇၸႂ်ႈဝႃႈမီးၶႃႈၵေႃႉလဵဝ်ၵူၺ်းဢၼ်ယူႇ…မီးၵူၼ်းတင်းၼမ်…ဢၼ်ႁဝ်းယူႇၸွမ်းၵၼ်…တုၵ်ႉၸွမ်းၵၼ်…မီးၵူၼ်းတင်းၼမ်ဢၼ်ၶၢမ်ႈပူၼ်ႉၵႂႃႇလႆႈ…မီးၵူၼ်းတင်းၼမ်…ဢၼ်ႁဵတ်းသိုၵ်းမႃးပၢၼ်သိုပ်ႇပၢၼ်…သမ်ႉပေႃးၵႄႇထဝ်ႈၵႂႃႇၵေႃႈမီးလူး…ၶဝ်ယင်းတေတုၵ်ႉၶလိူဝ်သေႁဝ်းလၢႆပုၼ်ႈၵွၼ်ႇ…မီးၵူၼ်းတင်းၼမ်…ဢၼ်ၶၢမ်ႇၸုၼ်ႉသၢႆၸႂ်ၵႂႃႇ…တွၼ်ႈတႃႇၵႅတ်ႇၶႄဝၢၼ်ႈမိူင်း…ႁဝ်းယင်းပႆႇတၢႆ…ႁဝ်းမီးႁႅင်း…မီးသၢႆၸႂ်သိုပ်ႇယူႇ…ပဵၼ်သင်လႄႈတေဝူၼ်ႉဝႃႈမၼ်းတုၵ်ႉၶလႃႇ…
ၶႃႈဝူၼ်ႉဝႃႈဢၼ်လႆႈမႃးႁဵတ်းသိုၵ်းၸိူင်ႉၼႆၼႆႉ…ႁဵတ်းႁႂ်ႈၶႃႈမီးတၢင်းသိူဝ်းတေႉယဝ်ႉ…လႆႈထူပ်းဢူၺ်းၵေႃႇမႂ်ႇမႂ်ႇ…လႆႈႁူႉၸၵ်းၵူၼ်းတင်းၼမ်…လႆႈႁဵၼ်းႁူႉ…လႆႈပွင်ႇၸႂ်…ၸၢတ်ႈပၢၼ်သိုၵ်းမႃး…သမ်ႉဝႃႈ…ၶၢဝ်းယၢမ်းမိူဝ်ႈသွၼ်ၵၢၼ်ၼၼ်ႉ…တေႁိူဝ်ႉ…တေၶႂ်ႈၼွၼ်း…တေလႆႈတၢၵ်ႇလႅတ်ႇတၢၵ်ႇၽူၼ်…တေၶၢၼ်ႉပဵၼ်မၢင်ပွၵ်ႈ…ၶႃႈဢမ်ႇယၢမ်ႈယွမ်းသုမ်းယွၼ်ႉမၼ်းသေပွၵ်ႈ…ၶႃႈၶတ်းၸႂ်ႁဵၼ်းႁူႉဢဝ်…ၶႃႈဢဝ်ၵူၼ်းၸိူဝ်းဢၼ်ၶၢမ်ႈပူၼ်ႉၵႂႃႇၸိူဝ်းၼၼ်ႉ…ပဵၼ်ႁႅင်းၸႂ်သေယူႇၵႂႃႇ…ဢၼ်ႁဵတ်းၵႂႃႇယဝ်ႉၵေႃႈမၼ်းၵေႃႈတေပူၼ်ႉၵႂႃႇၵူၺ်း…မိူဝ်ႈၽုၵ်ႈဢၼ်ဝႃႈၼၼ်ႉ…မၼ်းတေမိူၼ်မိူဝ်ႈဝႃးဢမ်ႇလႆႈယဝ်ႉ…ယူႇၵႂႃႇၸွမ်းၶၢဝ်းယၢမ်း…ႁဵၼ်းႁူႉၵႂႃႇၸွမ်းၸၢတ်ႈပၢၼ်…မၼ်းၵေႃႈတေၶၢမ်ႈပူၼ်ႉၵႂႃႇလႆႈ…
ၵၢၼ်ဢၼ်ပိူၼ်ႈသွၼ်မႃးၸိူဝ်းၼၼ်ႉ…ဢမ်ႇၸႂ်ႈဝႃႈပိူၼ်ႈၶႂ်ႈပေႉၵိၼ်ႁဝ်းလႄႈ…ပိူၼ်ႈၸႂ်ႉႁဝ်းႁဵတ်း…ယွၼ်ႉဝႃႈ…ပိူၼ်ႈၶႂ်ႈႁႂ်ႈႁဝ်းၵႅၼ်ႇၶႅင်လႄႈၸႂ်ႉၼၼ်ႉယဝ်ႉ…ၵၢၼ်ပဵၼ်သိုၵ်းၼၼ်ႉ…လူဝ်ႇၵၢၼ်ၽိုၵ်းႁႂ်ႈၵႅၼ်ႇၶႅင်…တပ်ႉသိုၵ်းၸင်ႇတေမီးဢဵၼ်ႁႅင်းဢၼ်ၶိုၵ်ႉၶႅမ်ႉလႄႈၶၢမ်ႇယၢပ်ႇလႆႈ…ၵူၼ်းႁဝ်းၵိူတ်ႇမႃး…ဢမ်ႇၸႂ်ႈဝႃႈယူႇတႃႇၵျေႃႇလူး…ပေႃးၵုမ်ႇယူႇတႃႇၵျေႃႇၵူၺ်း…တေႁဵတ်းႁိုဝ်ႁူႉၵႃႈၶၼ်ၸၢတ်ႈပၢၼ်ၵူၼ်းလႆႈလႃႇ…ဝၢၼ်ႈမိူင်းႁဝ်းၵေႃႈပႆႇၵတ်းယဵၼ်လူး…တေယူႇၵတ်းယဵၼ်မိူၼ်ပိူၼ်ႈၵေႃႈ…ဢမ်ႇလႆႈလေႃႇ…ၵၢၼ်သွၼ်မၼ်းႁဵတ်းႁႂ်ႈၶႃႈဝူၼ်ႉလႆႈ…ၵၢၼ်ဢၼ်ယၢပ်ႇၼၼ်ႉ…ပေႃးဝႃႈႁဝ်းမေႃဝႆႉၼႆ…မၼ်းတေပဵၼ်ၵၢၼ်ဢၼ်ငၢႆႈတႃႇႁဝ်း…လွင်ႈယၢပ်ႇၽိုတ်ႇၼၼ်ႉ…မၼ်းႁဵတ်းႁႂ်ႈႁဝ်းမီးၸႂ်ၶႂ်ႈပူၼ်ႉမၼ်းလႆႈ…လွင်ႈတဵၵ်းတဵင်မိပ်ႇငႅၼ်းၼၼ်ႉ…မၼ်းႁဵတ်းႁႂ်ႈၶႂ်ႈမီးလွင်ႈၶဵင်ႇတမႃး…ၵူၺ်းၵႃႈပၼ်ႁႃဢၼ်ၶဝ်ႈမႃးၼႂ်းၸၢတ်ႈပၢၼ်ႁဝ်းၼၼ်ႉ…မၼ်းႁဵတ်းႁႂ်ႈႁဝ်းၵႅၼ်ႇၶႅင်…။
ပီႈယႃႇမႆႈၸႂ်ၸွမ်းၸၢႆးယဝ်ႉ…ၸၢႆးမႃးပဵၼ်သိုၵ်းတဵမ်တူဝ်ယဝ်ႉ…ၸၢႆးဢမ်ႇယူႇလီၵေႃႈ…မီးမေႃယႃလုမ်းလႃးယူႇ…ၸၢႆးဢမ်ႇမီးငိုၼ်းၵေႃႈ…ၸၢႆးမီးငိုၼ်းလိူၼ်ဢၼ်ဢွၵ်ႇၵူႈလိူၼ်ယူႇ…ၸၢႆးတွင်ႉမႆႈၵေႃႈ ပိူၼ်ႈမီးၶဝ်ႈလဵင်ႉၸၢႆးယူႇ…ၸၢႆးလႆႈႁဵတ်းၵၢၼ်ဢၼ်ၸၢႆးၶႂ်ႈႁဵတ်း…ၸၢႆးဢမ်ႇလူဝ်ႇမႆႈၸႂ်သင်ယဝ်ႉ…ၸၢႆးမီးပၢႆးယူႇလီတဵမ်ထူၼ်ႈ…ၸၢႆးလႆႈၵိၼ်ဢိမ်ႇၵူၺ်းၵေႃႈပေႃးယဝ်ႉ…”
ၶမ်းႁွမ်ဢဝ်မိုဝ်းဢွၼ်ႇမၼ်း ၸဵတ်ႉလၢႆႇတႃမၼ်းဢိတ်ႉၼိုင်ႈသေ တူပ်းႁူဝ်မႃႇၼွင်ႉၸၢႆးမၼ်းလွႆးလွႆး
“ၼွင်ႉၸၢႆးပီႈ…ၵေႃႉယႂ်ႇမႃးတေႉယဝ်ႉလူး…ပီႈဝူၼ်ႉဝႃႈ…ႁၼ်ပီႈယဝ်ႉတေႁွင်ႉႁႆႈသေ…ယွၼ်းမိူဝ်းႁိူၼ်းမိူၼ်မိူဝ်ႈၵေႃႉလဵၵ်ႉလဵၵ်ႉၼၼ်ႉၼႆ…ဢမ်ႇဝႃႈၼွင်ႉတေႁဵတ်းသင်…ပီႈၵေႃႈ…ပၼ်ႁႅင်းယူႇတႃႇသေႇၼႃႈ”
“မႄႈယူႇလီယူႇႁႃႉ…ပီႈမႃးၸိူင်ႉၼႆမႄႈဢမ်ႇလႆႈႁၢမ်ႈသင်ႁႃႉ”
“မႄႈယူႇလီယူႇ…ဢမ်ႇ…မႄႈဢမ်ႇလႆႈႁၢမ်ႈသင်…ၼွင်ႉလူးၸွင်ႇလူဝ်ႇသင်ႁိုဝ်…”
“ဢမ်ႇယဝ်ႉ…ႁူဝ်ၼႃႈၵေႃႈၸွႆႈထႅမ်ၶႃႈယူႇၵူႈလွင်ႈၼၼ်ႉယဝ်ႉ…”
သိုပ်ႇလူထႅင်ႈတွၼ်ႈတေမႃးၶႃႈ။
