တွၼ်ႈသၢမ်
ၵၢင်ၼႂ်ၾႃႉပၢင်ႇမိူင်းလႅင်းမႃး လႅင်းမိူင်းတင်းၸၢႆးၶိူဝ်းဢဝ်ၵႃးသေ မႃးပႂ်ႉႁပ်ႉၶမ်းမိူင်းယူႇတီႈၼႃႈႁိူၼ်းၶဝ်ၼၼ်ႉယဝ်ႉ။ ၶမ်းမိူင်းၵေႃႈပႃးထူင်ၶူဝ်းသေ သူင်ႇသင်ႇမႄႈတင်းပီႈၶမ်းႁွမ်မၼ်းယဝ်ႉၵေႃႈ ယၢၼ်ဢွၵ်ႇႁၢင်ႇႁိူၼ်းၵႂႃႇလွႆးလွႆး။ မႄႈၶႃၵေႃႈ တူၺ်းၸွမ်းလင်တေႃႇပေႃးသုတ်းသၢႆတႃယဝ်ႉ ၵွတ်ႇၵၼ်သေ ဢဝ်ၼမ်ႉတႃၸိုမ်ႉယမ်းၸူးၵၼ်ယဝ်ႉ ပွႆႇၼမ်ႉတႃလႆ သူင်ႇသင်ႇၸွမ်းလွင်ႈႁၢင်ႇၵႆၼၼ်ႉယူႇ။
လွင်ႈၶီငဝ်ၵေႃႈႁၢႆၵႂႃႇၸွမ်းၶၢဝ်းယၢမ်း ႁိုင်ႁိုင်မႃးၵေႃႈမေႃယူႇမႃးယဝ်ႉ။ ၵၢင်ဝၼ်းလႅတ်ႇမႆႈတႅင်ႈတႅင်ႈ ၸင်ႇမီးသဵင်ၵူၼ်းႁွင်ႉယူႇတီႈၼႃႈႁိူၼ်း ၶမ်းႁွမ်ဢွၵ်ႇမႃးတူၺ်းလႆႈႁၼ် သႅင်ၽွင်းပႂ်ႉဝႆႉယူႇလႄႈ ၼႅတ်ႈပိုတ်ႇၽၵ်းတူပၼ်သေ ႁွင်ႉၶဝ်ႈႁိူၼ်းမိူဝ်းၵႂႃႇ ၼင်ႈလီလီငၢမ်းငၢမ်းယဝ်ႉ။
“ပၢၵ်ႇဝၼ်းႁဵင်ပီ…မိူဝ်ႈၼႆႉပဵၼ်ဝၼ်းသင်လႄႈ…ၵူၼ်းလီၸိူင်ႉၼင်ႇ…သႅင်ၽွင်းမီးၶၢဝ်းယၢမ်းတၼ်းသေ…မႃးလႄႇႁွတ်ႈႁိူၼ်းၸိူင်ႉၼႆ… ”
“ဝၼ်းသင်တႄႉဢမ်ႇႁူႉ…ႁူႉဝႃႈၸႂ်ထိုင်လႄႈၶႂ်ႈႁၼ်ၼၼ်ႉယဝ်ႉ…လႆႈႁၼ်ၼႂ်းၽူင်းၵူၺ်း…ဢမ်ႇဢိမ်ႇၸႂ်… ၸင်ႇလႆႈမႃးထိုင်ႁိူၼ်းယဝ်ႉ…”
“ယႃႇမႃးလၢတ်ႈၵႂၢမ်းဝၢၼ်ယူႇ…ႁူႉယူႇဝႃႈဢမ်ႇလႆႈမႃးလႄႇလၢႆလၢႆ…လၢတ်ႈမႃးသိုဝ်ႈသိုဝ်ႈလႄႈ…”
“ၵေႃႈ…မီးလွင်ႈၶႂ်ႈႁႂ်ႈၸွႆႈ…”
“မီးလွင်ႈသင်ၵေႃႈ…လၢတ်ႈမႃးၼႂ်းၽူင်းၵေႃႈလႆႈလူး…ဢမ်ႇၸမ်ပဵၼ်တေသုမ်းၶၢဝ်းယၢမ်းသေ…မႃးႁွတ်ႈထိုင်ႁိူၼ်းၵေႃႈလႆႈ…ၵႃႈလူတ်ႉၵႃႈၶၢဝ်းတၢင်းၵေႃႈဢမ်ႇငၢႆႈငၢႆႈ… ”
“ႁဝ်းမီးၵၢၼ်တၢင်ႇလွင်ႈပႃးယဝ်ႉ..ဢဝ်တိုဝ်ႉတၢင်းဢၼ်ၼႆႉသေ…လႆႈမႃးၸႂ်းသူလႄႈ…မႃးယွၼ်းတၢင်းၸွႆႈထႅမ်ပႃး… ”
“မီးလွင်ႈသင်ၵေႃႈလၢတ်ႈမႃးလႄႈ…ယႃႇၵဵင်ၸႂ်…ပေႃးၸွႆႈလႆႈၵေႃႈတေၸွႆႈ… ”
“မိူဝ်ႈလဵဝ်သူယင်းဢမ်ႇလႆႈၶဝ်ႈႁဵတ်းၵၢၼ်တီႈလႂ်ဢမ်ႇၸႂ်ႈႁ… ”
“ဢမ်ႇ…တိုၵ်ႉႁႃၵၢၼ်ယူႇ…”
“ၵူၼ်းသုတ်းၸၼ်ႉၸွမ်ၼင်ႇသူၼႆႉ တိုၵ်ႉႁႃၵၢၼ်ယၢပ်ႇယူႇႁ… ”
“ၼၼ်ႉယဝ်ႉ…ႁဝ်းဢမ်ႇႁူႉဝႃႈတေလႆႈႁဵတ်းၵၢၼ်သင်…မိူဝ်ႈယူႇႁူင်းႁဵၼ်းၵေႃႈႁဵၼ်းလႆႈယူႇ…ပေႃးဢွၵ်ႇႁဵတ်းၵၢၼ်မႃးတေႉယဝ်ႉ…သမ်ႉဢမ်ႇမိူၼ်ၵၼ်လူး…”
“ၵူၼ်းၶႅၼ်ႇၸိူင်ႉၼင်ႇသူၼႆႉ…ႁဵၼ်းမေႃယႃၵူၺ်းၵေႃႈပေႃးလႆႈ…ပဵၼ်သင်လႄႈဢမ်ႇႁဵၼ်းလႃႇ…”
“ႁဝ်းဢမ်ႇလႆႈသူၼ်ၸႂ်လူး…မႄႈၵေႃႈဢမ်ႇလႆႈၸႂ်ႁႂ်ႈႁဝ်းႁဵတ်းမေႃယႃ…ႁဝ်းလႆႈၸႂ်ၸၼ်ႁၢင်ႈ…မႄႈၵေႃႈပၼ်ႁႅင်း…သမ်ႉဝႃႈတေႁႃၵၢၼ်ဢမ်ႇလႆႈၵေႃႈ…တီႈႁိူၼ်းၵေႃႈ..မီးၵၢၼ်ယဵပ်ႉၶူဝ်း…ဢၼ်ႁဝ်းႁဵၼ်းမႃးၸိူဝ်းၼၼ်ႉ…ၶဝ်ႈၵၼ်တင်းၵၢၼ်တီႈႁိူၼ်းလႆႈ…ပဵၼ်ၵူၼ်းၶူင်သၢင်ႈဢွၵ်ႇသိူဝ်ႈၶူဝ်းလၢႆးမႂ်ႇၵေႃႈလႆႈ…ႁဝ်းမီးၵၢၼ်ပၼ်ႁဝ်းႁဵတ်းပေႃးဢမ်ႇယဝ်ႉ…ႁဝ်းလႆႈႁဵတ်းၵၢၼ်ဢၼ်ႁဝ်းႁၵ်ႉ…ၵႃႈၼႆႉၵူၺ်းၵေႃႈပဵင်းပေႃးယဝ်ႉ…ဢမ်ႇၸမ်ပဵၼ်ဝႃႈ..တေလႆႈၵႂႃႇႁႃၵၢၼ်..တေလႆႈႁဵတ်းၵၢၼ်ဢၼ်လႆႈငိုၼ်းၼမ်…ၸင်ႇတေပဵၼ်ၵၢၼ်ၵိုင်ႇလႅပ်ႈတင်းၼမ်ႉၵတ်ႉႁဝ်း…ပေႃးဝႃႈႁဝ်းဢမ်ႇလႆႈၸႂ်သေႁဵတ်း…ႁဵတ်းၵႂႃႇၵေႃႈပၼ်လွင်ႈယၢပ်ႇၽိုတ်ႇတူဝ်ၵဝ်ႇၶိုၼ်းၵူၺ်း… ”
“သူဢမ်ႇဝူၼ်ႉတႃႇတေၸၢမ်းႁဵတ်းတူၺ်းတၢင်ႇလွင်ႈၽွင်ႈၼႄႇ..”
“ဢမ်ႇယဝ်ႉယူဝ်ႉ…ႁဝ်းတေႁဵတ်းၵၢၼ်ၸွမ်းမႄႈ…ယူႇတူၺ်းထိုင်လုမ်းလႃးမႄႈၵူၺ်းယဝ်ႉ ”
“ၶမ်းမိူင်းလူး…ၵႂႃႇလႂ်ယဝ်ႉ…”
“ၵႂႃႇႁဵတ်းသိုၵ်းယဝ်ႉ… ”
“ၼႆဝႃႈ…မႄႈဢမ်ႇပၼ်ႁဵတ်းလႃႇ…ပၼ်ၵႂႃႇလႆႈယူႇႁ…”
“တေၸၢင်ႈႁဵတ်းႁိုဝ်…ဢမ်ႇၽွင်းလိူဝ်းလႆႈတၢင်းသူင်မၼ်းလူး…သူႁဵတ်းမေႃသွၼ်…ပဵၼ်ၸိူင်ႉႁိုဝ်လႃႇ… ”
“ႁဝ်းလၢႆႈပုၼ်ႈၽွၼ်းမႃးပဵၼ်ၽူႈမၢႆယဝ်ႉမိူဝ်ႈလဵဝ်… ”
“ႁဵတ်းၼၼ်ၵႂႃႈ…ဝႃႈယူႇယဝ်ႉပေႃးပဵၼ်မေႃသွၼ်တႄႉ..လႅပ်ႈတေဢမ်ႇမႃးႁဵတ်းၵၢၼ်ထိုင်ၼႂ်းဝဵင်းလူင်ၸိူင်ႉၼႆလႆႈ ”
“ဢိုမ်ႈ……ၵွပ်ႈဝႃႈ…ႁဝ်းၶႂ်ႈယွၼ်းတၢင်းၸွႆႈထႅမ်သူ လွင်ႈၼိုင်ႈၸွင်ႇလႆႈ… ”
“လၢတ်ႈမႃတူၺ်းလႄႈ…တေဝူၼ်ႉတူၺ်း… ”
“ၵွပ်ႈဝႃႈ……တီႈႁဝ်းလူဝ်ႇမေႃသွၼ် မီးမေႃသွၼ်ၵေႃႉၼိုင်ႈ…တေၵိူတ်ႇလုၵ်ႈလႄႈယွၼ်းလိုဝ်ႈဝႆႉ…တီႈၼႂ်းႁဝ်းၼၼ်ႉ သမ်ႉဢမ်ႇမီးမေႃသွၼ်သေၵေႃႉဢၼ်တၼ်း…ယႃႇဝႃႈတေတၼ်းလႃႈ…တေႃႈၼင်ႇမေႃသွၼ်ၵူၺ်းပေႃးဢမ်ႇၶႂ်ႈပေႃးယဝ်ႉ…ဢမ်ႇမီးၽႂ်ပုတ်ႈတႅၼ်းပၼ်လႆႈလႄႈ…သင်ႁႃဢမ်ႇလႆႈၵေႃႈ…တေလႆႈဢိုတ်းႁဵၼ်းပၼ်တေႃႇမေႃသွၼ်မၼ်းပေႃးတေမႃးသွၼ်လႆႈၼၼ်ႉယဝ်ႉ…ၼင်ႇႁိုဝ်တေဢမ်ႇလႆႈဢိုတ်းႁဵၼ်းၼၼ်ႉ..ႁဝ်းၵေႃႈဝူၼ်ႉထိုင်သူပဵၼ်ၵေႃႉဢွၼ်တၢင်းသုတ်းၼၼ်ႉယဝ်ႉ…”
“ပဵၼ်သင်လႄႈတေလႆႈဝူၼ်ႉထိုင်ႁဝ်း!… ”
“ႁဝ်းဝူၼ်ႉဝႃႈ…သူဢမ်ႇလႆႈႁဵတ်းၵၢၼ်တၢင်းၼွၵ်ႈ…ယဝ်ႉသူၵေႃႈ…ယၢမ်ႈၶိုၼ်ႈပၢင်ၽိုၵ်းၽွၼ်ႉမႃး…သူပဵၼ်ၵူၼ်းမီးတူဝ်ထူပ်းၵၢၼ်ႁဵၼ်းၼမ်ၵေႃႉၼိုင်ႈ…လိူဝ်သေသူ…ႁဝ်းဢမ်ႇႁူႉဝႃႈမီးၽႂ်ထႅင်ႈယဝ်ႉ…မၼ်းၸမ်ပဵၼ်ၼႃႇလႄႈ…သူၸွႆႈႁဝ်းဢိတ်းၼိုင်ႈလႄႈၼႃႈ… ”
“တေဝူၼ်ႉတူၺ်းၵွၼ်ႇ…”
“ဝႆႉဝႃႈႁၼ်ထိုင်ႁဝ်းလုၵ်ႉမႃးၵႆသေ…မႃးယွၼ်းတၢင်းၸွႆႈထႅမ်ထိုင်ႁိူၼ်းလႄႈ……ဢမ်ႇၼၼ်…ဝႆႉဝႃႈႁၼ်ထိုင်လုၵ်ႈဢွၼ်ႇတႃလမ်လမ်…ဢၼ်ၶႂ်ႈၶိုၼ်ႈႁဵၼ်းယူႇဢမ်ႇမီးမေႃသွၼ်…တေၵႂႃႇႁဵၼ်းႁူင်းႁဵၼ်းပိူၼ်ႈဢမ်ႇမီးငိုၼ်းၵႃႈၶိုၼ်ႈႁဵၼ်း ၼၼ်ႉၽွင်ႈလႄႈ… ” ၵႂၢမ်းၶေႃႈၼႆႉႁဵတ်းႁႂ်ႈၶမ်းႁွမ်ယဵၼ်ၵႂႃႇၵမ်းၼိုင်ႈယဝ်ႉ။
“ဢိုမ်ႈ!!…ၵေႃႈလႆႈ!… ”
“မိူဝ်ႈႁိုဝ်းႁဝ်းတေမႃးႁပ်ႉ…တူၵ်းလူင်းၵၼ်ယဝ်ႉၼႃႈ…” လုၵ်ႉပႆဢွၵ်ႇႁိူၼ်းၵႂႃႇယဝ်ႉ။
“ပေႉဝႆးလႃႇ…ႁဝ်းယင်းပႆႇတၼ်းလၢတ်ႈမႄႈႁဝ်း…”
မိူၼ်ဝႃႈသႅင်ၽွင်းလႅပ်ႈတေဢမ်ႇလႆႈငိၼ်း။
ၵၢင်ၶိုၼ်းလိုၵ်းယဵၼ် ယွၼ်ႉၵႂၢမ်းဢၼ်သႅင်ၽွင်းၽၢၵ်ႇဝႆႉ မိူဝ်ႈၵၢင်ဝၼ်းၼၼ်ႉ ဢဝ်ၶမ်ၸႂ်ဝႆႉယူႇ ၼွၼ်းပေႃးဢမ်ႇလပ်းလႆႈယဝ်ႉ ဢမ်ႇႁူႉဝႃႈတေလႆႈလၢတ်ႈၸိူင်ႉႁိုဝ် ၸင်ႇၶဝ်ႈမိူဝ်းၵႂႃႇၼႂ်းႁွင်ႈ ၼွၼ်းမႄႈသေ
“ၶဝ်ႈမႃးႁႃမႄႈ…ၼွၼ်းဢမ်ႇလပ်းႁႃႉ…မီးလွင်ႈၶမ်ၸႂ်သင်လႃႇ…”
“မိူဝ်ႈၵၢင်ဝၼ်း…သႅင်ၽွင်းမႃးလႄႇ… ”
“မႃးလၢတ်ႈသင်တီႈလုၵ်ႈလႃႇ…ထိုင်တီႈၼွၼ်းပေႃးဢမ်ႇလပ်းၸိူင်ႉၼႆ…”
“သင်ယိင်းပဵၼ်မေႃသွၼ်ၸွင်ႇလီႁိုဝ်… ”
“လီယူႇလူး…”
“သႅင်ၽွင်းလၢတ်ႈႁႂ်ႈလုၵ်ႈၵႂႃႇၸွႆႈၵၢၼ်ၶဝ်ၼႆဝႃႇ… ”
“လႆႈယူႇလူး… ” ၶမ်းႁွမ်ၵေႃႈမိူၼ် ဢမ်ႇပဵၼ်မႃးၼင်ႇဝူၼ်ႉၼၼ်ႉယဝ်ႉ။
“မႄႈဢမ်ႇႁၢမ်ႈသင်ႁ…”
“ မႄႈတေႁၢမ်ႈလႆႈယူႇႁ…မိူဝ်ႈၶမ်းမိူင်းၵေႃႈၵႂႃႇယဝ်ႉ… ”
“သင်မႄႈဝႃႈဢမ်ႇၵႂႃႇၼႆၵေႃႈ…ယိင်းတေဢမ်ႇၵႂႃႇၵေႃႈလႆႈ… ”
“ယိင်းၵေႃႈၵေႃႉယႂ်ႇယဝ်ႉ…မေႃဝူၼ်ႉမေႃတႅပ်းတတ်းလႆႈယဝ်ႉ…ဢမ်ႇဝႃႈယိင်းတေႁဵတ်းသင်…မႄႈၵေႃႈတေပၼ်ႁႅင်းယူႇတႃႇသေႇၼၼ်ႉယဝ်ႉ…ယူႇတီႈလုၵ်ႈၵေႃႉတႅပ်းတတ်းၵူၺ်းၼႃ…” ၶမ်းႁွမ်ၵေႃႈၵွတ်ႇဢဝ်မႄႈသေ
“ပေႃးယိင်းၵႂႃႇယဝ်ႉ…မႄႈတေယူႇၸွမ်းၽႂ်… ”
“ဢမ်ႇမီးယိင်းၵေႃႈမႄႈယူႇလႆႈယူႇလူး…တေႃႈၼင်ႇယိင်းၵႂႃႇၶိုၼ်ႈႁဵၼ်းပဵၼ်လိူၼ်လိူၼ်…မႄႈတင်းယူႇလႆႈ…ပေႃးၸႂ်ထိုင်ၵေႃႈ သိုပ်ႇၽူင်းႁႃၵေႃႈလႆႈ… ”
“ၽႂ်ၵေႃႉတေၸွႆႈမႄႈႁဵတ်းၵၢၼ်… ”
“ပေႃးတေမႆႈၸႂ်မႄႈပေႃးတၢၼ်ႇၼႆႉ…လုၵ်ႈသမ်ႉတေၵႂႃႇႁဵတ်းသင်ယဝ်ႉလႃႇ… ”
“ၵေႃႈမႄႈဢမ်ႇႁၢမ်ႈယိင်းလူး… ”
“လုၵ်ႈဢွၼ်ႇၵေႃႈဢမ်ႇၸႂ်ႈတေႁႂ်ႈမႄႈၸွမ်းႁၢမ်ႈ…ယိင်းတေၵႂႃႇႁိုင်ၵႃႈႁိုဝ်လႃႇ… ”
“မွၵ်ႈသွင်လိူၼ်ၼႆႉၶႃႈယူဝ်ႉ… ”
“မွၵ်ႈၼႆႉၵူၺ်းပေႃးတၢၼ်ႇဝႃႈဢမ်ႇယၢမ်ႈၽၢတ်ႇလႃႈ… ”
ထိုင်မိူဝ်ႈႁိုဝ်းမႃးယဝ်ႉ မႄႈၵေႃႈဢွၵ်ႇသူင်ႇၶမ်းႁွမ်ၼႃႈၽၵ်းတူသေ…
“တေယူႇလႆႈယူႇႁ…မၼ်းဢမ်ႇမိူၼ်တီႈႁိူၼ်းႁဝ်းၼႃႈ… ”
“ယိင်းႁူႉယဝ်ႉၶႃႈ…မႄႈၵေႃႈလုမ်းလႃးပၢႆးယူႇလီၽွင်ႈ…မႄႈယႃႇပေႁဵတ်းၵၢၼ်ၼမ်ၼႃႇ…ပေႃးမႄႈႁဵတ်းဢမ်ႇပေႉလႆႈၵေႃႈၸၢင်ႈၵူၼ်းၽွင်ႈၵေႃႈလႆႈ… ”
“မႄႈႁူႉယဝ်ႉ…ၸဵဝ်းၵႂႃႇၸဵဝ်းမႃးလႄႈ…”
“ဢေႃႈၶႃႈ……”
“ပေႃးၺႃးၵူၼ်းထုၵ်ႇၸႂ်ၵေႃႈ…ႁွင်ႉမႃးလႄႇႁိူၼ်းၽွင်ႈၼႃႈ…ယႃႇၵႆႉၼႃႈတူႇတေႃႇပိူၼ်ႈၼႃႇၽႅဝ်…ဢႃႇယုၵေႃႈယႂ်ႇယဝ်ႉ…”
ၶမ်းႁွမ်ပၢႆႈၶဝ်ႈၵႃးၵႂႃႇယဝ်ႉ ပူၵ်းမိုဝ်းပၢႆးပၢႆတေႃႇမႄႈသေ လူတ်ႉၵေႃႈသိုပ်ႇဢွၵ်ႇၵႂႃႇလွႆးလွႆး
မႄႈၵေႃႈ မုင်ႈတူၺ်းၸွမ်းလူတ်ႉတေႃႇပေႃးပူၼ်ႉသၢႆတႃၵႂႃႇ…
“ၵူႈလွင်ႈ…မၼ်းထုၵ်ႇမၵ်းမၼ်ႈမႃးယဝ်ႉ…ဝူၼ်ႉဝႃႈလုၵ်ႈတေၵၢမ်ႇလီ…ၸွမ်းသဵၼ်ႈတၢင်းဢၼ်လုၵ်ႈလိူၵ်ႈၼၼ်ႉယူႇ… ”
သိုပ်ႇတူၺ်းထႅင်ႈတွၼ်ႈတေမႃးၶႃႈ။
