တွၼ်ႈသွင်
မိူၼ်ဝႃႈလွင်ႈၼႆႉ ၶိူဝ်းၾႃႉၼၼ်ႉ လႆႈဢဝ်ပုၼ်ႈၽွၼ်းၵႂႃႇယဝ်ႉ။ ဢူႈမႄႈတင်းသွင်ၽၢႆႇၵေႃႈ လႆႈဢဝ်လုၵ်ႈဢွၼ်ႇသွင်ၶႃၼၼ်ႉ ဢၢပ်ႈပၼ်ၵၼ် ၵူပ်ႉၵူႈပဵၼ်ႁိူၼ်းၵႂႃႇယူႇ၊ ၼႂ်းဝၼ်းပၢင်ၶႅၵ်ႇၼၼ်ႉ မူဝ်ၶၢဝ်ၵေႃႈ လႆႈယၵ်ႉတူၺ်းတီႈ မႄႈမၼ်းၼၼ်ႉသေ ႁၼ်ယုမ်ႉၼင်ႇမီးတၢင်းသိူဝ်းလိူဝ်ပိူၼ်ႈယူႇ၊ ဢူႈၶဝ်ၵေႃႈ ၼင်ႇၸူမ်းသိူဝ်းမိူၼ်ၵၼ် မၼ်းဢၼ်လႆႈႁၼ်ၼင်ႇၼၼ်တႄႉ ဢမ်ႇႁၼ်ဝႃႈတေသိူဝ်းလႆႈ ၼမ်ႉတႃဢွၼ်ႇၼၼ်ႉၵေႃႈ လႆႈယွႆႉတူၵ်းလူင်းမႃးယူႇ၊ ၽႅၼ်ႇၸဵတ်ႉၼႃႈၶၢဝ်ၶၢဝ်ဢွၼ်ႇဢၼ်ၼိုင်ႈ မႃးမီးၽၢႆႇၼႃႈမၼ်း လူၺ်ႈမိုဝ်းၽူႈၸၢႆးဢၼ်မၼ်းၵူပ်ႉၵူႈၸွမ်းၼၼ်ႉလႄႈ
“လႆႈတေႇၼႃႈႁိူၼ်းၸွမ်းႁဝ်းၼႆႉ ၸူမ်းၸူမ်းပေႃးႁႆႈၵႃႈ ၸိုင်ဝႃႈၸၢတ်ႈၼႆႉ တေႃႇတၢႆၵေႃႈဢမ်ႇဢၢၼ်းဢဝ်ႁဝ်းၼႆႁိုဝ်လႃႇ”
“တူၺ်းၶိုၼ်းၸဝ်ႈၵဝ်ႇၵွၼ်ႇလႄႈ ၸိုင်ဝႃႈၽူႈယိင်းၼႂ်းမိူင်းၵူၼ်းၼႆႉ ၵိုတ်းႁဝ်းၵေႃႉလဵဝ်ၵူၺ်းၵေႃႈဢမ်ႇဢၢၼ်းဢဝ်ၼႆႁိုဝ် ”
ၶိူဝ်းၾႃႉၵေႃႈ ဢမ်ႇသူၼ်ၸႂ်သင်သေ ဝၢႆႇၼႃႈတူၺ်းၵႂႃႇတၢင်းဢူႈမႄႈမၼ်းၼၼ်ႉယူႇ။
“ဢူႈမႄႈသူ ဝၼ်းၼၼ်ႉလႄႈဝၼ်းၼႆႉ ႁၢင်ႈဢမ်ႇၸႂ်ႈၵေႃႉလဵဝ်ၵၼ်ၼေႃ”
“ၵေႃႈၸႂ်ႈယူႇယဝ်ႉ ႁဝ်းႁဵတ်းပၼ်လွင်ႈဢၼ်ၶဝ်မုင်ႈမွင်းၼၼ်ႉလႆႈယဝ်ႉလူး မိူၼ်တေၸႂ်လမ် ၵူၺ်းၵႃႈ သမ်ႉလၵ်ႉမွင်းမီးလုၵ်ႈၶူၺ်ယူႇၵူၺ်းၼင်ႇၵဝ်ႇ ယိၼ်းၸူမ်းယဝ်ႉၼႃႈ” တင်းလၢတ်ႈတင်းပၼ်ၶိုၼ်းၽႅၼ်ႇၸဵတ်ႉၼၼ်ႉယဝ်ႉ။
ၶိူဝ်းၾႃႉဢၼ်ဢမ်ႇတွၼ်ႉႁၼ် မူဝ်ၶၢဝ်လၢတ်ႈၵႂၢမ်းသဵင်လီတေႃႇမၼ်းၸိူင်ႉၼၼ်ၵေႃႈ ယၵ်ႉတူၺ်းၼႃႈမူဝ်ၶၢဝ်သေ “သူ..မေႃလၢတ်ႈၵႂၢမ်းၸိူင်ႉၼႆႁေႁႃႉၼႆႉ မီးၸႂ်ၼိူဝ်ႁဝ်းမႃးယဝ်ႉၸွင်ႇၸႂ်ႈ”
“ႁႂ်ႈတၢႆၵေႃႈ ၵူၼ်းၸိူင်ႉၼင်ႇသူၼႆႉ ႁဝ်းႁၵ်ႉဢမ်ႇလႆႈ”
“ဢူဝ်.. တၢင်းႁၵ်ႉၼၼ်ႉဢမ်ႇလွင်ႈယႂ်ႇတၢၼ်ႇ ဢၼ်ႁဝ်းလႆႈႁူမ်ႈပဵၼ်ႁိူၼ်းလဵဝ်ယဝ်ႉလေႃႇၼႃႈ”
“မီးၸႂ်ၼိူဝ်ႁဝ်းမႃးယဝ်ႉၵႃႈပေႃးၼၼ်..”
“ဢမ်ႇၸၢင်ႈဝႃႈ တႄႇဢဝ်ၼႆႉၵႂႃႇ ပဵၼ်ႁိူၼ်းလဵဝ်ၵၼ်ယဝ်ႉလူး ယူဝ်တေၸၢင်ႈမီးၸႂ်ႁၵ်ႉမႃးၸွမ်းၵေႃႈပဵၼ်လႆႈ ဢမ်ႇဝႃႈႁႃႉ”
သၢႆတႃမၼ်းၼၼ်ႉယၵ်ႉတူၺ်းၸူးမူဝ်ၶၢဝ် သိုဝ်ႇၼႄႁႂ်ႈႁၼ်မိူၼ်လၢတ်ႈလွင်ႈတေႉယူႇ၊ ၵူၺ်းၵႃႈ ၵူၼ်းၸိူင်ႉၼင်ႇမူဝ်ၶၢဝ်ၼၼ်ႉတႄႉ ဢမ်ႇတၼ်းၾၢင်ႉႁၼ်ၺႃးလႄႈ ၼႂ်းၸႂ်ၼႂ်းၶေႃး ဝၼ်းဢၼ်လီဢၼ်သိူဝ်းၸႂ်လိူဝ်ပိူၼ်ႈ ၼႂ်းၽဝၸၢတ်ႈပၢၼ်ၽူႈယိင်းမၼ်းၼၼ်ႉ မိူၼ်တေဢမ်ႇပဵၼ်ၼင်ႇဢၼ်ပိူၼ်ႈလၢတ်ႈၼႄမၼ်းၼၼ်ႉသေဢိတ်းလူး။
ပၢင်ၶႅၵ်ႇယဝ်ႉၵႂႃႇ ၼႂ်းႁိူၼ်းႁေႃဢၼ်မီးၶႃသွင်ၵေႃႉၵူၺ်းယဝ်ႉၼၼ်ႉ သဵင်ပေႃးယဵၼ်သႅပ်းယူႇ ၼင်ႇႁၢင်ႈၵိုတ်းၵႅၼ်ႇသဵင်ထူၺ်ႈၸႂ်ၵူၺ်းယဝ်ႉ။ ၼႂ်းၶမ်ႈၶိုၼ်းလပ်းသိင်ႇလူင်ၼၼ်ႉ ၵူၼ်းတၢင်းၼွၵ်ႈတူၺ်းတႄႉ လႅပ်ႈတေလႆႈၼွၼ်းဢုၼ်ႇယူႇ၊ ၵူၺ်းၵႃႈ ၶိူဝ်းၾႃႉတႄႉ ၼွၼ်းၵတ်းယူႇၶၢင်ႈၵူႇၼၼ်ႉလႄႈ မီးၽႃႈဝႆဢွၼ်ႇၽိုၼ်လဵဝ်ၵူၺ်း သမ်ႉပဵၼ်ၶၢဝ်းၵတ်းထႅင်ႈသေ။
ပၢင်ၶႅၵ်ႇသွင်ၶႃၼၼ်ႉ မိူၼ်ပဵၼ်ၼႃႈပဵၼ်တႃပၼ်ဢူႈမႄႈၵူၺ်းၵေႃႈဝႃႈ ဢႃႇယုယႂ်ႇတင်းသွင်ၵေႃႉယဝ်ႉ သမ်ႉဢမ်ႇၶႂ်ႈတေႇၼႃႈႁိူၼ်းသေပွၵ်ႈၼၼ်ႉ ႁဵတ်းႁႂ်ႈဢူႈမႄႈမႆႈၸႂ်မႆႈၶေႃး ၸွမ်းႁႃၵေႃႉႁႃၵူႈပၼ်တိၵ်းတိၵ်းၼၼ်ႉလႄႈ မိူဝ်ႈတေႇယဝ်ႉၵေႃႈ ဢူႈမႄႈၶဝ်တႄႉပဵၼ်ဢၼ်ၵတ်းယဵၼ်ၸႂ်မႃးယဝ်ႉ။ ၵူၺ်းၵႃႈ တေႇပၼ်ယဝ်ႉသမ်ႉဢမ်ႇပႆႇယဝ်ႉ သမ်ႉဝႃႈႁႂ်ႈမီးလၢၼ်ပၼ်ၼႆထႅင်ႈ ပဵၼ်ၵၢၼ်ဢူႈမႄႈယဝ်ႉၵႂႃႈထၢင်ႇ။
သမ်ႉဝႃႈတေႇၼႃႈႁိူၼ်းသေတႃႉ မိူဝ်ႈဢူႈမႄႈပွၵ်ႈၵႂႃႇႁင်းၽႂ်ႁင်းမၼ်းၼၼ်ႉၵေႃႈ မူဝ်ၶၢဝ်လႄႈၶိူဝ်းၾႃႉ ဢမ်ႇလႆႈယူႇၸွမ်းၵၼ် ယူႇႁိူၼ်းၽႂ်ႁိူၼ်းမၼ်းၶိုၼ်းၵူၺ်း။ ဝၼ်းၼိုင်ႈ မူဝ်ၶၢဝ်ဢၼ်လုၵ်ႉတီႈႁဵတ်းၵၢၼ်သေ တေပွၵ်ႈမိူဝ်းႁိူၼ်းၼၼ်ႉ ၸင်ႇမီးၾူင်းဢၼ်ၼိုင်ႈသိုပ်ႇၶဝ်ႈမႃးၸူး ၼၼ်ႉတႄႉပဵၼ်မၢႆၾူင်းတီႈႁူင်းယႃၵပ်းသိုပ်ႇမႃးၼၼ်ႉယဝ်ႉ။ ဝၢႆးသေႁပ်ႉယဝ်ႉၵေႃႈ မၼ်းၼႅတ်ႈၵႂႃႇတီႈႁူင်းယႃဝႆးဝႆးယူႇ။
မိူဝ်ႈဢွၵ်ႇႁူင်းယႃမႃး ၼင်ႇဝႃႈၼႂ်းတူဝ်ၼႂ်းၸႂ်ၼၼ်ႉ ၵပ်ႉဢူၵ်းၸဵပ်းၵႅၼ်းလူင်ၵႂႃႇသဵင်ႈယဝ်ႉ။ မိူဝ်ႈဢွၼ်တၢင်းၼၼ်ႉ တွင်ႉမၼ်းၸဵပ်းႁႅင်းၼႃႇလႄႈ လႆႈၵႂႃႇၵူတ်ႇၸႅတ်ႈတီႈႁူင်းယႃသေ မေႃယႃၶဝ်ၵေႃႈ ထတ်းသၢင်ၼႄမၼ်းဝႃႈ တေၸၢင်ႈပဵၼ်ၵႅၼ်ႇသႃႇႁူင်းၶဝ်ႈလႆႈၼႆသေ ႁဵတ်းႁႂ်ႈမၼ်းၸႂ်ဢမ်ႇလီ ထိုင်တီႈၵိၼ်မႃးၵိၼ်လဝ်ႈမဝ်းၵႅပ်ႇယူႇၼႂ်းဝၼ်းဢၼ် ၶိူဝ်းၾႃႉဢွၼ်ပွၵ်ႈမိူဝ်းၼၼ်ႉယဝ်ႉ။ ဝၼ်းမိူဝ်ႈၼႆႉၵေႃႈ လႆႈမႃးထွမ်ႇဢၼ်မေႃယႃၶဝ် ၵူတ်ႇၸႅတ်ႈႁၼ်မႃးဝႃႈ မၼ်းၼၼ်ႉ ပဵၼ်ၵႅၼ်ႇသႃႇႁူင်းၶဝ်ႈၶၵ်ႉလိုၼ်းသုတ်းယဝ်ႉ ယူႇၵႂႃႇၵေႃႈတေဢမ်ႇပူၼ်ႉလႆႈထႅင်ႈ 2 လိူၼ်ၵူၺ်း ၼႆသေ တူဝ်ၶိင်းပေႃးဢူၼ်ႈဢွၼ်ႇၵႂႃႇမူတ်း ဢမ်ႇမီးႁႅင်းတႃႇသိုပ်ႇယၢင်ႈၵႂႃႇထႅင်ႈ သေဢိတ်းယဝ်ႉ။
တွၼ်ႈသွင်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသၢမ်ၶႃႈ။
