တွၼ်ႈသၢမ်
မၼ်းၵေႃႈ လႆႈၼင်ႈသေငဝ်မိုင်ယူႇတီႈတင်ႇၼင်ႈ ၵူၼ်းပဵၼ်ၼႂ်းႁူင်းယႃယူႇၼၼ်ႉတင်းႁိုင်၊ လိူၵ်ႈလိူၵ်ႈသမ်ႉမီးၵူၼ်းပဵၼ်ၵေႃႉၼိုင်ႈ ပိုတ်ႇၽူင်းသေထွမ်ႇလွင်ႈဢၼ် ပိူၼ်ႈလၢတ်ႈၶေႃႈၵႂၢမ်းပၼ်ႁႅင်းၸႂ်ၼၼ်ႉမႃး မၼ်းၸင်ႇလႆႈငိၼ်းၶေႃႈၵႂၢမ်းဢၼ်ဝႃႈ “ႁဝ်းၶႃႈၵူႈၵေႃႉဢမ်ႇဝႃႈလဵၵ်ႉယႂ်ႇၼုမ်ႇထဝ်ႈ ဢမ်ႇႁူႉဝႃႈႁဝ်းတေတၢႆၵႂႃႇမိူဝ်ႈလႆႈ ၵွပ်ႈၼၼ်လႄႈ ၸႂ်ႉၸၢတ်ႈပၢၼ်ဝၼ်းမိူဝ်ႈၼႆႉ ႁႂ်ႈမိူၼ်ဝၼ်းလိုၼ်းသုတ်းၶႃႈလႄႈ ၶႂ်ႈႁဵတ်းသင်ၵေႃႈ လူင်းမိုဝ်းႁဵတ်းၵႂႃႇယၢမ်းလဵဝ်ၼႆႉၶႃႈလႄႈ မၢင်လွင်ႈဢၼ်ႁဝ်းၶႂ်ႈႁဵတ်းလႄႈ ဢမ်ႇလႆႈႁဵတ်းၼၼ်ႉ ၸၢင်ႈႁဵတ်းႁႂ်ႈႁဝ်းၼႅင်ၸႂ်လိူဝ်သေ ဢၼ်ႁဝ်းလႆႈႁဵတ်းၼၼ်ႉလူးၵွၼ်ႇယဝ်ႉ၊ သမ်ႉဝႃႈႁဝ်းတေႁဵတ်းဢွၵ်ႇမႃး ဢမ်ႇဢွင်ႇမၢၼ်ဢမ်ႇပဵၼ်ၼင်ႇၵၢင်ၸႂ်ၵေႃႈ ႁဝ်းၵေႃႈလႆႈႁဵတ်းမၼ်းယူႇၶႃႈလူး လွင်ႈတူၵ်းသုမ်းၼၼ်ႉ မၼ်းလႆႈႁဵၼ်းႁူႉလႄႈလႆႈတွၼ်ႈသွၼ်မႃးဢေႃႈ ဢၼ်ႁဝ်းဢမ်ႇႁဵတ်းသင်ၼၼ်ႉ လိူဝ်သေလႆႈလွင်ႈၵူဝ်ယဝ်ႉ ဢမ်ႇမီးသင်ၶိုပ်ႈၼႃႈမႃးလႆႈၶႃႈလူး ႁဝ်းတေဢမ်ႇမီးဝၼ်းႁဵတ်းလႆႈထႅင်ႈၵွၼ်ႇ ဢမ်ႇၸႂ်ႈၶႃႈႁိုဝ်၊ ၶႃႈႁဝ်း ၶိူဝ်းၶူမ် ယုမ်ႇယမ်ဝႃႈ ၽူႈႁပ်ႉထွမ်ႇႁဝ်းၶဝ် တေဢဝ်ၶၢမ်ႈပူၼ်ႉမၼ်းၵႂႃႇလႆႈယူႇၶႃႈၼႃ မႂ်ႇသုင်ၶႃႈ”
မိူဝ်ႈဢၼ်လႆႈငိၼ်းၶေႃႈၵႂၢမ်းၼႆႉမႃးၼႆၵေႃႈ မူဝ်ၶၢဝ်ၼၼ်ႉ ၸင်ႇၶိုၼ်းၶုၵ်းၶူၼ်ႉတူၺ်း ၽဝၸၢတ်ႈပၢၼ်မၼ်းၸိူဝ်းပူၼ်ႉမႃးၼၼ်ႉ မိူၼ်ၵူႈလွင်ႈတူၵ်းလိုၼ်းၵႂႃႇတေႉလႄႈ ဢၼ်မၼ်းၶႂ်ႈႁဵတ်းၸိူဝ်းၼၼ်ႉလႄႈ ဢၼ်မၼ်းတေဢၢၼ်းႁဵတ်းၸိူဝ်းၼၼ်ႉၵေႃႈ မိူၼ်ဝႃႈဢမ်ႇပဵၼ်မႃးသေမဵဝ်း ၵူၺ်းၸၢတ်ႈပၢၼ်မၼ်းၼၼ်ႉ ပေႃးတေသုတ်းသဵင်ႈၵႂႃႇယဝ်ႉ၊ ၶၢဝ်းတၢင်းဢၼ်မီးသၢႆၸႂ်မႃးၼၼ်ႉ မၼ်းၵူၺ်းၵုမ်ႇ ႁဵတ်းၵၢၼ်ပၼ်ပိူၼ်ႈ ဝၼ်းဝၼ်းၶိုၼ်းၶိုၼ်းၵူၺ်း ဢမ်ႇတၼ်းတူၺ်းတွၼ်ႈတႃႇတူဝ်ၸဝ်ႈၵဝ်ႇလူးၵွၼ်ႇ၊ ဢမ်ႇတွၼ်ႉပၼ်ၶၢဝ်းယၢမ်း တွၼ်ႈတႃႇတူဝ်ၸဝ်ႈၵဝ်ႇမႃးသေပွၵ်ႈ။ ၼင်ႈသေထူၺ်ႈၸႂ်လူင်မႃးၵမ်းယဝ်ႉၵမ်း ၸင်ႇၶိုၼ်းၸိုၼ်ႇတူဝ်လုၵ်ႉပွၵ်ႈမိူဝ်းၵႂႃႇယူႇ။
မိူဝ်းႁွတ်ႈထိုင်ႁိူၼ်းယဝ်ႉ လႆႈႁၼ်ၶိူဝ်းၾႃႉပႂ်ႉယူႇတီႈၼႃႈႁိူၼ်းမၼ်းၼၼ်ႉသေ
“ၵိၼ်ၶဝ်ႈမႃးယဝ်ႉႁႃႉ..”
မူဝ်ၶၢဝ်ၼၼ်ႉၵေႃႈ ၶွၼ်းႁူဝ်ၼႄယူႇ၊ ၶိူဝ်းၾႃႉၵေႃႈၸုင်ၸၼ်ဢဝ်ၶေႃႈမိုဝ်း မူဝ်ၶၢဝ်ၼၼ်ႉ မိူဝ်းၵႂႃႇတၢင်းႁိူၼ်းမၼ်းၼၼ်ႉလႄႈ ဢွၼ်မိူဝ်းၼင်ႈသႂ်ႇၼိူဝ်ၽိူၼ်ၶဝ်ႈ ဢၼ်မၼ်းၸၢႆးႁၢင်ႈႁႅၼ်းဝႆႉပၼ်ၼၼ်ႉယူႇယဝ်ႉ။
“မိူဝ်ႈၼႆႉႁဝ်းလူမ်းလီ ႁဵတ်းၶဝ်ႈၽၵ်းၼမ်လႄႈ ၵိၼ်ၵေႃႉလဵဝ်ၵေႃႈဢမ်ႇပေႃးဝၢၼ် မိူဝ်ႈလႂ်မိူဝ်ႈမီးမေးယဝ်ႉ ႁွင်ႉမေးမႃးၵိၼ်ၸွမ်းၼႆႉ ဢၢပ်ႈတေလီၼႆၵူၺ်းၼင်ႇၵဝ်ႇ”
“ႁဝ်းႁိူဝ်ႉယဝ်ႉၼႃႈ! တေမိူဝ်းလိုဝ်ႈႁိူဝ်ႉၵွၼ်ႇယဝ်ႉ” တင်းသီၼႃႈဢၼ်ဢမ်ႇသိူဝ်းၸႂ်သေဢိတ်းၼၼ်ႉလႄႈ ပႆလူင်ဢွၵ်ႇႁိူၼ်းမႃးယူႇ။
“ႁဝ်းတေဢဝ်မိူဝ်းဝႆႉပၼ်တီႈႁိူၼ်းၼႃႈ ပေႃးတွင်ႉမႆႈၵေႃႈလုၵ်ႉၵိၼ်လႄႈ”
သမ်ႉဝႃႈၶိူဝ်းၾႃႉႁွင်ႉလၢတ်ႈၸူးသေတႃႉ မူဝ်ၶၢဝ်တႄႉဢမ်ႇလႆႈသူၼ်ၸႂ်သင်ၸွမ်းယဝ်ႉ။
ၼႂ်းၶမ်ႈၶိုၼ်းဢၼ်လပ်းသိင်ႇ သၢႆလႅင်းၾႆးဝွႆးဝွႆးၼႂ်းႁိူၼ်း ၵူၼ်းၵေႃႉလဵဝ်ၵွႆးဢမ်ႇၼွၼ်းလပ်းလႆႈ ၼင်ႈယူႇၼိူဝ်ၽိူၼ် ဢၼ်မီးယူႇႁိမ်းႁူးလႅင်းၼၼ်ႉသေ လွမ်ငွၵ်ႈတူၺ်းဢွၵ်ႇၵႂႃႇတၢင်းၼွၵ်ႈႁူးလႅင်းၼၼ်ႉ ယူႇႁင်းၵူၺ်း တူၺ်းၵႂႃႇတင်းႁိုင်ၵေႃႈ မိူၼ်တေဢမ်ႇလႆႈသင်မႃး ယၵ်ႉတူၺ်းၸိူင်ႉႁိုဝ်ၵေႃႈ သမ်ႉပေႃးလပ်းသိင်ႇတၼ်တိၵ်းၼိၵ်းလူင်ဝႆႉယဝ်ႉ။
ယၢမ်းၼၼ်ႉၸင်ႇမီးသဵင်ၽူင်းမေႃးမႃး မၼ်းၸင်ႇယိပ်းသေတူၺ်းယဝ်ႉ ၼၼ်ႉတႄႉပဵၼ်ၶိူဝ်းၾႃႉသူင်ႇမႃးယူႇ “ၶၢဝ်းၼႆႉယဝ်ႉပႆႇၼွၼ်းၵွၼ်ႇႁႃႉ ၸွင်ႇလူဝ်ႇၵူၼ်းမိူဝ်းၼွၼ်းႁဵတ်းၵေႃႉၼႄႇ”
မူဝ်ၶၢဝ်ၵေႃႈ တူၺ်းယူႇ ၵူၺ်းဢမ်ႇလႆႈတွပ်ႇသင်ၶိုၼ်း ၶိူဝ်းၾႃႉၸင်ႇသိုပ်ႇၽူင်းၸူးမႃးယဝ်ႉ မၼ်းၵေႃႈႁပ်ႉသေ ၶိူဝ်းၾႃႉၸင်ႇပိုတ်ႇလၢတ်ႈၸူး
“ႁဝ်းၼွၼ်းဢမ်ႇလပ်း ၾႆးၼႂ်းႁိူၼ်းသူၼၼ်ႉထွင်ႇမႃးႁွတ်ႈထိုင်ၼႂ်းႁွင်ႈႁဝ်းၼႆႉ တေႁႂ်ႈႁဝ်းလႆႈမိူဝ်းမွတ်ႇပၼ်ၼႄႇ”
“ဢိုမ်ႈ..ႁဝ်းတေမွတ်ႇယဝ်ႉ ၵူၺ်းၵႃႈမၼ်းလပ်းသိင်ႇၼႃႇ ႁဝ်းဢမ်ႇႁၼ်သင် သမ်ႉဝႃႈမိုၼ်းတႃယူႇၵေႃႈ ႁဝ်းဢမ်ႇႁၼ်သင်သေဢိတ်းယဝ်ႉ” မူဝ်ၶၢဝ်ၵေႃႈ ႁွင်ႉႁႆႈဢွၵ်ႇမႃးၸူး ၶိူဝ်းၾႃႉၵႂႃႇယူႇ။ ၶိူဝ်းၾႃႉၼၼ်ႉၵေႃႈ ႁိုဝ်ၸၢင်ႈလၢတ်ႈသင်လႆႈထႅင်ႈယဝ်ႉ ၼွၼ်းသေထွမ်ႇသဵင်ႁႆႈမူဝ်ၶၢဝ်ၼၼ်ႉၵူၺ်း။
ၶမ်ႈၶိုၼ်းဢၼ်လပ်းသိင်ႇၼၼ်ႉၵေႃႈသုတ်းၵႂႃႇ ၵၢင်ဝၼ်းဢၼ်ႁိူဝ်ႈလႅင်းထွင်ႇမႃးၼၼ်ႉၵေႃႈ လႆႈပိူင်းသႂ်ႇၼႂ်းႁွင်ႈမူဝ်ၶၢဝ်မႃး ဢၼ်မီးၶိူဝ်းၾႃႉမႃးၽုၺ်ႇမၢၼ်ႇႁူးလႅင်းပၼ်သေယဝ်ႉ
“သူပဵၼ်ၸိူင်ႉႁိုဝ်လႃႇ ၸွင်ႇပဵၼ်သင်ႁိုဝ်”
“ဢိုမ်ႈ..”
ၶိူဝ်းၾႃႉၵေႃႈ မႃးၵမ်းၼႃႈၽၢၵ်ႇမူဝ်ၶၢဝ်တူၺ်း ၵူၺ်းဢမ်ႇမီးလူမ်းမႆႈသင်လႄႈ တူၺ်းမိူၼ်တေပဵၼ်တီႈၸႂ်လိူဝ် ၼႆသေ ယၵ်ႉတူၺ်းမူဝ်ၶၢဝ်ယဝ်ႉ “လိုဝ်ႈႁိူဝ်ႉၼမ်ၼမ်လႄႈ ႁဝ်းတေႁဵတ်းၶဝ်ႈမႃးလဵင်ႉၵူၺ်း”
မိူဝ်ႈၶိူဝ်းၾႃႉတေဢွၵ်ႇၵႂႃႇ မူဝ်ၶၢဝ်ၵေႃႈလၢတ်ႈဢွၵ်ႇမႃးလူၺ်ႈသဵင်ၸႅင်ႈလႅင်းၵႂႃႇ
“ႁဝ်းဝႃႈ..သူထုၵ်ႇလီႁႃၽူႈယိင်းဢၼ်လီလီ မႃးယူႇႁိမ်းၶၢင်ႈသူဢိူဝ်ႈ ယႃႇၵုမ်ႇသုမ်းၶၢဝ်းယၢမ်းၸွမ်းၵူၼ်းၸိူင်ႉၼင်ႇႁဝ်းၼႆႉယဝ်ႉလႃႈ”
သမ်ႉပေႃးဢဝ်ၶိူဝ်းၾႃႉၵိုတ်းမိုင်လူင်ၵႂႃႇလႄႈ ၶိုၼ်းဝၢႆႇယၵ်ႉတူၺ်းမူဝ်ၶၢဝ်လီလီသေ
“ပဵၼ်သင်လႄႈလၢတ်ႈၸိူင်ႉၼႆလႃႇ”
“တိူင်းမၼ်းလႃႈ သူၵေႃႈဢမ်ႇလႆႈမီးၸႂ်ၼိူဝ်ႁဝ်းယူႇယဝ်ႉဢမ်ႇၸႂ်ႈႁိုဝ် တေသူၼ်ၸႂ်ႁဵတ်းသင်လႃႇ”
“ဢမ်ႇၼႃ မီးဢိူဝ်ႈ တေမီးၽူႈၸၢႆးၵေႃႉလႂ် ဢၼ်ယွမ်းပႅတ်ႈပၢၼ်မၢဝ်ႇသေ ယွမ်းတေႇၼႃႈႁိူၼ်းၸွမ်း ၵူၼ်းၵေႃႉဢၼ်ဢမ်ႇလႆႈမီးၸႂ်ၼၼ်ႉငၢႆႈငၢႆႈလႃႇ ဢမ်ႇၸႂ်ႈဝႃႈႁဝ်းထဵင်ဢမ်ႇလႆႈ ႁဝ်းဢမ်ႇၶႂ်ႈထဵင်ၵူၺ်း” ဝိၼ်ႇၼႃႈယၵ်ႉၸူးမူၺ်ၶၢဝ် လူၺ်ႈဢဝ်သၢႆတႃမၼ်းတူၺ်းၵႂႃႇတီႈၼႂ်းသၢႆတႃမူၺ်ၶၢဝ်ၼၼ်ႉသေ လၢတ်ႈဢွၵ်ႇမႃး
“ႁိုင်ယဝ်ႉၼႃႈ လိူဝ်သေဝႃႈႁဝ်းဢမ်ႇမီးလွင်ႈႁတ်းႁၢၼ်ပဵင်းပေႃး တႃႇတေလၢတ်ႈဢွၵ်ႇမႃးၵူၺ်း ႁဝ်းပဵၼ်ၵူၼ်းဢမ်ႇလႆႈလွင်ႈ တေႃႈၼင်ႇတေလၢတ်ႈဝႃႈ လႆႈၸႂ်ၵူၼ်းၵေႃႉဢၼ်ႁဝ်းလၵ်ႉၵျိူၵ်ႈၼၼ်ႉၵူၺ်း ႁဝ်းယင်းဢမ်ႇႁတ်း တေဢဝ်သင်မႃးႁပ်ႉႁွင်းလႆႈဝႃႈ ႁဝ်းၼၼ်ႉၵိုင်ႇထိူၵ်ႈတင်းသူလႆႈလႃႇ၊ ၵူၺ်းၵႃႈ လႆႈယူႇႁိမ်းၶၢင်ႈၵူၺ်းၵေႃႈ လီၵႃႈႁိုဝ်ယဝ်ႉ တေထဵင်ၶိုၼ်းပဵၼ်လၢႆပွၵ်ႈၵေႃႈ ႁဝ်းတေဢမ်ႇမီးဝၼ်းၽၢတ်ႇသူၵႂႃႇလႆႈလေႃႇၼႃ”
တွၼ်ႈသၢမ်သုတ်းၵႂႃႇယဝ်ႉ သိုပ်ႇတူၺ်းထႅင်ႈတွၼ်ႈသီႇၶႃႈ။
