လူမ်းထူဝ်းထွင်းၸႂ်ၵတ်းယဵၼ် ၽွင်းမိူဝ်ႈလႅတ်ႇဢွၵ်ႇႁူဝ်လွႆမႃး ၵေႃႉပဵၼ်ယိင်းငိုၼ်းၵေႃႈ ဢဝ်တင်းထူင်ပႃးမၼ်းသေ ယွၼ်းငိုၼ်းမႄႈၶဝ်ယဝ်ႉ တင်းၸူမ်းတင်းသိူဝ်းလူင်ၵႂႃႇႁူင်းႁဵၼ်းယူႇ။ ပေႃးလႆႈၵႂႃႇႁူင်းႁဵၼ်းၼႆတႄႉ ၸူမ်းသိူဝ်းၼႃႇတေႉယဝ်ႉ၊ ထိုင်ၶၢဝ်းလူင်းႁူင်းႁဵၼ်းယဝ်ႉၵေႃႈ မိူဝ်းၵိၼ်ၶဝ်ႈၼင်ႈလဵၼ်ႈၽူင်းသေ ႁဵတ်းၼၼ်ၵူႈဝၼ်းၵူႈဝၼ်း၊ ၵၢၼ်တီႈႁိူၼ်းၵေႃႈဢမ်ႇၸွႆႈ၊ ပေႃးဢမ်ႇၸႂ်ႉၵေႃႈဢမ်ႇႁဵတ်း ပေႃးၸႂ်ႉၼႃႇသမ်ႉပွင်ႉ၊ မႄႈၶဝ်ၵေႃႈ ပေႃးတေၸႂ်ႉၵေႃႈလႆႈပွင်ႉပႃးယဝ်ႉ ပေႃးပိူၼ်ႈပွင်ႉသမ်ႉတွပ်ႇ၊ ပေႃးတွပ်ႇၵႂႃႇတွပ်ႇၶိုၼ်းသမ်ႉၶၢၼ်ႉႁဵတ်းႁေ ပၢႆႈပႅတ်ႈႁေ ဢမ်ႇသူၼ်ၸႂ်သင်ႁေ ဢမ်ႇႁဵတ်းႁေယဝ်ႉ။
တေဝႃႈဢမ်ႇႁဵတ်းၵေႃႈမၢင်ပွၵ်ႈၵေႃႈသမ်ႉႁဵတ်းယူႇ ၵူၺ်းသမ်ႉႁဵတ်းယဝ်ႉၵႂႃႇဢၼ်လႂ်ဢၼ်ၼၼ်ႉၵူၺ်း၊ ဢၼ်မၼ်းႁဵတ်းယူႇသေႇသေႇ ဢမ်ႇၽႃႈလႆႈႁေပွၵ်ႈၼၼ်ႉတႄႉ ၽူင်းမၼ်းၼၼ်ႉၵူၺ်းယဝ်ႉ။ တႃႇဝႃႈတေမေႃႁူႉမေႃႁႃႁဵတ်းႁင်းၵူၺ်းၼၼ်ႉတႄႉဢမ်ႇမီးသေမဵဝ်း လႆႈၸႂ်ႉၵမ်းၶဝ်ႈၵမ်းၽၵ်း ၵမ်းယွႆႈၵမ်းယႅမ်း၊ ပေႃးႁဵတ်းၵေႃႈ သမ်ႉဢမ်ႇမေႃႁဵတ်းလီလီ မေႃႁဵတ်းႁႃတၢင်းႁႂ်ႈပိူၼ်ႈလႃႇၼႃႇ ၵူႈဝၼ်းဝၼ်းၼႆႉ ပေႃးပေႃႈဢမ်ႇလႃႇၵေႃႈ မႄႈလႃႇယူႇတႃႇသေႇၼၼ်ႉယဝ်ႉ၊ ယူႇၸမ်ၽႂ်ၽႂ်ၵေႃႈပေႃးလႆႈလႃႇလႆႈလၢတ်ႈယူႇသေႇသေႇၼၼ်ႉၼႃႇ။
ၵွပ်ႈပိူဝ်ႈၼႆလႄႈ ပေႃးဝၼ်းလိုဝ်ႈမႃး မၼ်းၵေႃႈဢမ်ႇပေႃးၶႂ်ႈယူႇႁိူၼ်းသေၵႃႈႁိုဝ် ႁႃတၢင်းပၢႆႈပႅတ်ႈယူႇတႃႇသေႇယဝ်ႉ။ ၵွပ်ႈၼၼ်လႄႈ ပေႃးၵႂႃႇႁူင်းႁဵၼ်းၼႆ မၼ်းၸူမ်းၼႃႇ ၵွပ်ႈလႆႈမႃးယူႇၸွမ်းဢူၺ်းၵေႃႉမၼ်း၊ လႆႈလဵၼ်ႈၸွမ်းဢူၺ်းၵေႃႉမၼ်း၊ လႆႈဢုပ်ႇမူၼ်ႈၵျေႃႇၸွမ်းဢူၺ်းၵေႃႉမၼ်း ဢမ်ႇလေႃးၵႂၢမ်းလႃႇမိူၼ်တီႈႁိူၼ်းၼၼ်ႉလူး။
ပေႃးဝႃႈဝၼ်းၶိုၼ်ႈႁူင်းႁဵၼ်းၼႆတႄႉ မၼ်းၼႆႉဢမ်ႇတွၼ်ႉၶၢတ်ႇႁဵၼ်းႁေပွၵ်ႈ၊ ပေႃးဝၼ်းလိုဝ်ႈၼႆၵေႃႈ ၵႂႃႇလႄႇဢူၺ်းၵေႃႉမၼ်း ႁိူၼ်းၼိုင်ႈယဝ်ႉႁိူၼ်းၼိုင်ႈယူႇ၊ ပေႃးလႄႇၼႃႇ ၼၢၼ်းပွၵ်ႈမိူဝ်းသမ်ႉ မိူဝ်းၺႃးဢဝ်ၵႂၢမ်းလႃႇထႅင်ႈ၊ ပေႃးဢမ်ႇႁဵတ်းၵၢၼ်ၵေႃႈလႃႇ၊ ႁဵတ်းၵၢၼ်ၵေႃႈလႃႇ၊ ၵႂႃႇလႄႇၵေႃႈလႃႇ မၼ်းသမ်ႉပေႃးဝႃႈ “ၵူၼ်းတီႈႁိူၼ်းၼႆႉ ၸၢင်ႈလႃႇၼႃႇ” လၢတ်ႈတီႈဢူၺ်းၵေႃႉမၼ်းၸိူင်ႉၼႆယူႇ။
ၵွပ်ႈဝႃႈၵူၼ်းတီႈႁိူၼ်းၼၼ်ႉၸၢင်ႈလႃႇၼႃႇလႄႈ မၼ်းၵေႃႈဢမ်ႇၶႂ်ႈယူႇတီႈႁိူၼ်း ဢမ်ႇသူၼ်ၸႂ်တီႈႁိူၼ်းမႃးယဝ်ႉ၊ ၶဝ်ၶႂ်ႈလႃႇၵေႃႈ ပၼ်ႁႂ်ႈၶဝ်လႃႇႁဵတ်းၼၼ်ၵႂႃႇလႄႈ ၶဝ်ႈႁူးသၢႆႉဢွၵ်ႇႁူးၶႂႃႇ ပဵၼ်ႁိုဝ်မီးႁိုဝ်ၵေႃႈ မၼ်းဢမ်ႇသူၼ်ၸႂ်သင်သေဢိတ်းယဝ်ႉ။
ဝၼ်းၼိုင်ႈ မႄႈၶဝ်ၵေႃႈပဵၼ်တၢင်းပဵၼ် ဢမ်ႇယူႇလီပဵၼ်ႁႅင်းဝႆႉလႄႈ မၼ်းၵေႃႈဢမ်ႇဝူၼ်ႉတႃႇတေလိုဝ်ႈႁဵၼ်း၊ ၵႂႃႇႁူင်းႁဵၼ်းၸဵမ်ၸဝ်ႉယဝ်ႉ ဢမ်ႇၶဝ်ႈၸႂ်ဝႃႈ ၵူၼ်းတီႈႁိူၼ်းတေႁဵတ်းသင် တေပဵၼ်သင်သေဢိတ်း။ ၵူၺ်းၵႃႈ မိူဝ်ႈၼႆႉၵေႃႈ ၼင်ႇဝႃႈၼႂ်းၸႂ်မၼ်းၼၼ်ႉ ဢမ်ႇပေႃးလီၵႃႈႁိုဝ်မိူၼ်ၵၼ်လႄႈ တူၺ်းၼႃႈၾႃႉၼႃႈမိူင်းၵေႃႈဢမ်ႇၸိုၼ်ႈဢမ်ႇပၢင်ႇ သုမ်ႇၵုမ်ႈလမ်မိုတ်းတၼ်ဝႆႉ ၼင်ႇၸႂ်မၼ်းၼၼ်ႉၵေႃႈ ႁၢင်ႈၶႂ်ႈမိူၼ်ၼၼ်မႃးယူႇ။
ထိုင်ၶၢဝ်းလူင်းႁူင်းႁဵၼ်းမႃးယဝ်ႉ မၼ်းၵေႃႈလႆႈႁၼ်ၵူၼ်းတီႈႁိူၼ်းမၼ်း ၵူၼ်းပေႃးတဵမ်ၵႂႃႇမူတ်း ၸင်ႇလႅၼ်ႈပုင်ႈၶဝ်ႈၵႂႃႇ ၼႂ်းၵႄႈၵူၼ်းၼမ်ၸိူဝ်းၼၼ်ႉသေ ၶိုၼ်ႈႁွတ်ႈမိူဝ်းၼိူဝ်ႁိူၼ်းၼၼ်ႉယဝ်ႉ တေၸၢင်ႈႁဵတ်းႁိုဝ်ယဝ်ႉလႃႇၵမ်းၼၼ်ႉ ၵွပ်ႈဢမ်ႇလႆႈသူၼ်ၸႂ်ၵူၼ်းတီႈႁိူၼ်းမႃးႁိုင်ယဝ်ႉလူး မိူဝ်ႈလႆႈႁၼ်ၸိူင်ႉၼႆယဝ်ႉ၊ တင်းတူဝ်တင်းၸႂ် သမ်ႉပေႃးႁိူဝ်ႉဢူၼ်ႈလူင်းၵႂႃႇၵမ်းလဵဝ် တေသိုပ်ႈယၢင်ႈၶဝ်ႈၸူးၵေႃႈ ဢမ်ႇမီးႁႅင်းယဝ်ႉ၊ ၼင်ႈယူႇတီႈပႃႇၽၵ်းတူၼၼ်ႉယဝ်ႉ ႁွင်ႉႁႆႈဢွၵ်ႇမႃးၵမ်းလဵဝ်၊ မိူဝ်ႈဢၼ်လႆႈႁၼ်မႄႈၶဝ်ဢမ်ႇမီးၸႂ်သေ ၼွၼ်းဝႆႉယူႇၸိူင်ႉၼၼ်။
တႄႇၸဵမ်ဝၼ်းၼၼ်ႉမႃး ဢမ်ႇမီးၽႂ်မႃးလႃႇမႃးပွင်ႉမၼ်းထႅင်ႈယဝ်ႉ၊ ၵူၺ်းၵႃႈ ႁဵတ်းႁႂ်ႈၼႂ်းၸႂ်ၼၼ်ႉ မီးလွင်ႈသဝ်ႈမွင်တိူဝ်ႉၸႂ်ဝႆႉယူႇ၊ သမ်ႉဝႃႈၵႂႃႇႁူင်းႁဵၼ်းႁူပ်ႉဢူၺ်းၵေႃႉယူႇၵူႈဝၼ်းသေတႃႉ ႁၼ်ၼႃႈၶဝ်ယဝ်ႉႁဵတ်းႁႂ်ႈမၼ်းဢမ်ႇလိုမ်း လွင်ႈႁဵတ်းသၢင်ႈမၼ်းၼၼ်ႉလႆႈ လွင်ႈၵျေႃႇမူၼ်ႈမၼ်းၼႂ်းဝၼ်းၼၼ်ႉ ၵပ်ႉဢူၵ်းမွင်ၸႂ်မႃးယူႇၼႂ်းဝၼ်းၼႆႉလႄႈ ဢမ်ႇႁဵတ်းႁႂ်ႈမၼ်းၵျေႃႇမူၼ်ႈလႆႈ၊ ၶႂ်ႈယုမ်ႉၶႂ်ႈၶူဝ်ထႅင်ႈယဝ်ႉ။
ၼႂ်းၶမ်ႈၶိုၼ်းဢၼ်လပ်းသိင်ႇ ၼႃႈၾႃႉမိုတ်းတၼ် သၢႆလႅင်းဝွႆးဝွႆး တၢင်းၼွၵ်ႈႁိူၼ်းၼၼ်ႉ မီးငဝ်းလမ်ၽိုတ်းၽိုတ်း ၼင်ႈယူႇၼိူဝ်တင်ႇတၢင်းၼွၵ်ႈၼၼ်ႉလႄႈ ယိင်းငိုၼ်းၼၼ်ႉၵေႃႈ ယူႇတႂ်ႈသၢႆလႅင်းဝွႆးဝွႆးၼၼ်ႉသေ လပ်းတႃလူင်းလွႆးလွႆးယဝ်ႉ လၢတ်ႈလွင်ႈၶမ်ၸႂ်ဢၼ်မီးယူႇတီႈၼႂ်းၸႂ်မၼ်း ဢၼ်ဝူၼ်ႉဝႃႈ ႁိမ်းမၼ်းၼၼ်ႉ မီးမႄႈႁပ်ႉထွမ်ႇယူႇၼႆလႄႈ
“မႄႈ…လုၵ်ႈၵႆႉလၢတ်ႈဝႃႈမႄႈၸၢင်ႈလႃႇၼႃႇ ၵႂၢမ်းလႃႇမႄႈၼၼ်ႉ လုၵ်ႈဢမ်ႇလႆႈငိၼ်းယဝ်ႉၵေႃႈ လုၵ်ႈမိူၼ်ၵူၼ်းႁူၼူၵ်ႇၵႂႃႇပႅတ်ႈယဝ်ႉ၊ လုၵ်ႈၵႆႉဝႃႈမႄႈၵႆႉၸႂ်ႉၼႃႇ ဢမ်ႇမီးၽႂ်ၸႂ်ႉလုၵ်ႈယဝ်ႉ လုၵ်ႈၵေႃႈဢမ်ႇမေႃႁဵတ်းသင်၊ လုၵ်ႈၵႆႉဝႃႈ မႄႈဢမ်ႇႁဵတ်းႁႂ်ႈၶႃႈသိူဝ်းၸႂ်လႆႈသေပွၵ်ႈ ၵူၺ်းၵႃႈမႄႈၵေႃႈ ဢမ်ႇယၢမ်ႈပၢၼ်ႁႂ်ႈလုၵ်ႈတုၵ်ႉၶယၢပ်ႇၽိုတ်ႇ၊ မိူဝ်ႈလုၵ်ႈၵတ်းၼၼ်ႉ မႄႈၸွႆႈႁႃၽႃႈမႃးႁူမ်ႇပၼ်၊ မိူဝ်ႈလုၵ်ႈဢမ်ႇယူႇလီၼၼ်ႉ မႄႈၸွႆႈလုမ်းလႃးပၼ်ႁႂ်ႈပေႃးၶႅၼ်း၊ မိူဝ်ႈလုၵ်ႈႁဵတ်းဢမ်ႇမေႃၼၼ်ႉ မႄႈၸွႆႈသွၼ်ႁႂ်ႈၶႃႈႁဵတ်း၊ သမ်ႉဝႃႈမႄႈတေလႃႇၶႃႈယူႇသေတႃႉ မႄႈၵေႃႈလဵင်ႉၶဝ်ႈၽၵ်းလုၵ်ႈယူႇၵူႈတႃႇ၊ မႄႈဢမ်ႇႁဵတ်းႁႂ်ႈၶႃႈၶူဝ်လႆႈတႃႇသေႇ ၵူၺ်းၵႃႈမႄႈႁဵတ်းႁႂ်ႈၶႃႈဢုၼ်ႇၸႂ်လႆႈတႃႇသေႇယဝ်ႉ။
မီးလုၵ်ႈၵူၺ်းယဝ်ႉ လိူဝ်သေဢမ်ႇႁဵတ်းသင်ပၼ်မႄႈ ဢမ်ႇၸွႆႈၵၢၼ်သင် ဢမ်ႇၶႂ်ႈႁဵတ်းသင်ယဝ်ႉ သမ်ႉပၢႆဝႃႈမႄႈၸၢင်ႈလႃႇၼႃႇ၊ ဢမ်ႇၶႂ်ႈယူႇႁိူၼ်းသေ ပၢႆႈၵႂႃႇလႄႇယူႇတႃႇသေႇ၊ မႄႈတေပဵၼ်ၸိူင်ႉႁိုဝ်ၵေႃႈ ဢမ်ႇပွင်ႇၸႂ်ၶဝ်ႈၸႂ် ယင်းတိုၵ်ႉသိုပ်ႇၵႂႃႇႁူင်းႁဵၼ်းထႅင်ႈယူႇ၊ လုၵ်ႈဢမ်ႇယၢမ်ႈဝူၼ်ႉထိုင်ၵူၼ်းၼႂ်းႁိူၼ်းသေပွၵ်ႈ မိူဝ်ႈလဵဝ်လုၵ်ႈပွင်ႇၸႂ်ယဝ်ႉ လုၵ်ႈႁူႉယဝ်ႉ ဢမ်ႇမီးမႄႈၼၼ်ႉမၼ်းပဵၼ်ၸိူင်ႉႁိုဝ်၊ လုၵ်ႈႁူႉယဝ်ႉဝႃႈၵူၼ်းၼႂ်းၼႃႈႁိူၼ်းၼႆႉ မၼ်းလမ်ႇလွင်ႈတၢၼ်ႇႁိုဝ် မႄႈၸွႆႈပွၵ်ႈမႃးၶိုၼ်းၸွင်ႇလႆႈႁႃႉ လုၵ်ႈၸႂ်ထိုင်မႄႈ လုၵ်ႈၸႂ်ထိုင်မႄႈတေႉယဝ်ႉ”
ႁႆႈယူႇႁင်းမၼ်းသိုတ်ႉသိုတ်ႉယူႇတႂ်ႈငဝ်းၾႆးၼၼ်ႉယဝ်ႉ။
သုတ်းယဝ်ႉ။
- ၵွပ်ႈၵုမ်ႇတူၺ်းလွင်ႈဢမ်ႇလီၵူၺ်းလႄႈ ၸင်ႇထုၵ်ႇလိုမ်းပႅတ်ႈလွင်ႈလီလီဢၼ်မီးဝႆႉတေႃႇၵၼ်မႃးၼၼ်ႉယဝ်ႉ။
- သမ်ႉဝႃႈပဵၼ်ၶွင်ႁဝ်းၵေႃႈယဝ်ႉ မိူဝ်ႈဢမ်ႇဝႆႉၵႃႈၶၼ်မၼ်းၼၼ်ႉ တေမႃးသေလၢႆဝၢႆးလင်ၵေႃႈ ဢမ်ႇပွင်ႇလွင်ႈသင်။
ၼပ်ႉယမ်ၽူႈလူလိၵ်ႈႁဝ်းယူႇဢေႃႈ
ပၢႆၵမ်−ငဝ်မွင်မိုတ်းမူဝ်း
25/01/2019
