ႁၼ်ၵၼ်ယူႇဢိူဝ်ႈ ၵူၺ်းၵႃႈ ဢမ်ႇမိူၼ်ၼင်ႇမိူဝ်ႈဢွၼ်တၢင်းလႆႈယဝ်ႉ၊ ႁူႉယူႇဢိူဝ်ႈဝႃႈမႂ်းမီးယူႇတီႈၼၼ်ႈ ၵူၺ်းၵႃႈဢမ်ႇၸၢင်ႈၶိုၼ်းမိူၼ်ၵဝ်ႇလႆႈယဝ်ႉလူး။
ႁိုတ်ႈ…ႁိုတ်ႈ…ႁိုတ်ႈ..
“ႁႃလူဝ်”
“သႅင်ဢႃႈ..”
“မႂ်းမီးလွင်ႈႁင်..”
“ၸႂ်ထိုင်မႂ်းဢိူဝ်ႈ..”
“ၸႂ်ထိုင်ၸူႉၵဝ်ႇမႂ်းၵူၺ်းယူဝ်ႉ”
“ဢိုမ်ႈ..”
ၶႃႈၼိမ်ယဵၼ်ၵႂႃႇ ပႂ်ႉၵေႃႉၶႃႈပဝ်းႁွမ် တွပ်ႇယူႇၵူၺ်းၵႃႈဢမ်ႇလႆႈငိၼ်းသဵင်သင်တုမ်ႉတွပ်ႇၶိုၼ်း ၼင်ႇဝႃႈမၼ်းႁၢႆၵႂႃႇပႅတ်ႈၼၼ်ႉယဝ်ႉ။
“ဝၢင်းၾူၼ်းယဝ်ႉႁႃႉ”
“ပႆႇ..”
“မီးလွင်ႈသင်ၶႂ်ႈလၢတ်ႈလႃႇ ထွမ်ႇယဝ်ႉသဵင်ဢမ်ႇလီသေဢိတ်း”
“ဢမ်ႇလႆႈပဵၼ်ႁင်”
“ပႅတ်ႈၸူႉမႂ်းထႅင်ႈယဝ်ႉၵႃႈထၢင်ႇ”
“ဢိူဝ်ႈ..ၵေႃႉၼႆႉၵဝ်ဝႃႈၵဝ်ႁၵ်ႉတေႉဢိူဝ်ႈ”
“မႂ်းလၢတ်ႈၸိူင်ႉၼႆပဵၼ်ၵေႃႉမၢႆလႂ်ယဝ်ႉဢမ်ႇႁူႉ”
“တေႉဢိူဝ်ႈဢေး..ၵဝ်ၶတ်းၸႂ်တတ်းယဝ်ႉၵူၺ်းၵႃႈ..တတ်းၸိူင်ႉႁိုဝ်ၵေႃႈဢမ်ႇလႆႈ”
“မိူဝ်ႈမႂ်းပႆႇလႆႈၸူႉမႂ်ႇၵူၺ်းႁိုဝ်လႃႇ ပေႃးလႆႈမႂ်ႇမႃးၵေႃႈပေႃးလိုမ်းၸူႉၵဝ်ႇမႂ်းယဝ်ႉလူး”
“ၵဝ်ႁၵ်ႉမၼ်းတေႉဢိူဝ်ႈ”
လၢတ်ႈယဝ်ႉၵေႃႈၼင်ႈႁေႁႆႈယူႇ၊ ၶႃႈတႄႉၵေႃႈၵိၼ်ၶဝ်ႈမုၼ်းသေၼင်ႈတူၺ်းၸိူင်းယူႇႁဵတ်းၼၼ်၊ ၾူၼ်းတႄႉၵေႃႈဢမ်ႇဝၢင်း ပၼ်မၼ်းႁႆႈႁဵတ်းၼၼ်ဝႃႈ။
တေဝႃႈၸိူင်ႉႁိုဝ်ၵေႃႈ ၵိုတ်းမၼ်းလႄႈၶႃႈၵူၺ်းယဝ်ႉ ဢၼ်ပႆႇမီးၼႃႈႁိူၼ်းၸိူင်ႉပိူၼ်ႈ၊ တေၵႂႃႇႁႃဢုပ်ႇဢူၺ်းၵေႃႉၼင်ႇၵူႈပွၵ်ႈၼၼ်ႉ မၼ်းဢမ်ႇငၢႆႈယဝ်ႉၼႃႇ မိူၼ်ၼင်ႇဝႃႈပိူၼ်ႈပွႆႇပႅတ်ႈႁႃးၼၼ်ႉယဝ်ႉ။
မၼ်းတႄႉၵေႃႈ ၶႂ်ႈတႄႇၼႃႈႁိူၼ်းၸဵမ်မိူဝ်ႈလႂ်ယဝ်ႉၵွၼ်ႇ ၵေႃႉႁၵ်ႉၼႆၵေႃႈလိူၵ်ႈမႃးဢမ်ႇဢေႇ တေတေႇတေတေႇ ပေႃးပိူၼ်ႈဢမ်ႇပႅတ်ႈမၼ်းၵေႃႈမၼ်းသမ်ႉပႅတ်ႈပိူၼ်ႈႁေ ဢဝ်ဢမ်ႇပဵၼ်ႁေပွၵ်ႈ။
ပေႃးမၼ်းဢူၵ်းႁၵ်းမႃးၼႆ ၶႃႈတႄႉလၵ်ႉၸူမ်းဝႆႉယူႇ ၶႃႈတေလႆႈမီးၵေႃႉဢိတ်ႉၼိုင်ႈ၊ ၵူၺ်းၵႃႈ ၵမ်းလိုၼ်းမႃးၵေႃႈ လႆႈယူႇႁင်းၵူၺ်းသေ မၼ်းၵေႃႈၵႂႃႇၸွမ်းၸူႉမၼ်းသေ ပေႃးသုမ်းႁၵ်ႉမႃးၵေႃႈ မႃးႁႃၶႃႈသေ ၶႃႈပဵၼ်သင်တွၼ်ႈတႃႇမၼ်းလႃႇ မၢင်ပွၵ်ႈၵေႃႈလီဢိမ်ႇယူႇ မၢင်ၵမ်းၵေႃႈဢီးလူမၼ်းယူႇ။ ၵူၺ်းၵႃႈ ဢၼ်တီႈမီးမၼ်းဝႆႉသေ ဢမ်ႇပႆႇတေႇၼႃႈႁိူၼ်းပႅတ်ႈၶႃႈၼၼ်ႉၵေႃႈ တွၼ်ႈတႃႇၶႃႈတႄႉ ပဵင်းပေႃးယဝ်ႉ မၢင်ၵမ်းၵေႃႈ လၵ်ႉၵူဝ်မၼ်းဢဝ်ၽူဝ်ပႅတ်ႈၶႃႈယူႇဢိူဝ်ႈ။
ဝၼ်းၼိုင်ႈ ၶႃႈၵေႃႈဢဝ်တင်းၶွမ်းသေၵႂႃႇႁဵတ်းၵၢၼ်ယူႇတီႈသႅင်ႇဢူၺ်းၵေႃႉၶႃႈ ၶမ်းၼုမ်ႇ
“ပၢတ်ႈၼႆႉမႃးယူႇႁိူၼ်းလၢႆဝၼ်းလႃႇ”
“မွၵ်ႈလိူၼ်ၼႆႉၵႃႈ”
“ႁဵတ်းၵၢၼ်ၸိူင်ႉမႂ်းၼႆႉၵေႃႈဢၢပ်ႈၵျေႃႇၼႃႇၼေႃ”
“ၵျေႃႇၵႃႈ..လႄႇဝႃႈဢမ်ႇၵျေႃႇလႃႇ”
“မႂ်းပေႉမီးငိုၼ်းလႄႇလႃႇ..”
“ပေႃးမီးငိုၼ်းၵေႃႈလႄႇ..ဢမ်ႇမီးငိုၼ်းၸင်ႇႁႃႁဵတ်းၵၢၼ်ၶိုၼ်းၵေႃႈ..ဢမ်ႇလႆႈမႆႈၽႂ်လူးမႂ်းဝႃႈ”
“ၸႂ်ႈဢိူဝ်ႈ..တႃႉႁေဝႃႈဢမ်ႇမီးၼႃႈႁိူၼ်းၵေႃႈထၢင်ႇႁၢင်ႈလၢတ်ႈၼႃႇမႂ်း”
“ထၢင်ႇႁၢင်ႈၼႃႇၵူၺ်းဢိူဝ်ႈပေႃးလႆႈလၢတ်ႈမႃး..မိူဝ်ႈပိူၼ်ႈဝႃႈႁင်းၵဝ်ၵေႃႈၵႃႈဝႃႈၵႃႈပဵၼ်ၵဝ်ႇလူး”
“ဢေးပဝ်းလူးဢမ်ႇမႃးၸွမ်းၵၼ်ၼႄႇ”
“မၼ်းဢူၵ်းႁၵ်းဝႃႇ..ၵႂႃႇမီးလႂ်ဢမ်ႇႁူႉမၼ်းယဝ်ႉၼၼ်ႉ”
“မႂ်းပေႃးဢမ်ႇတူၺ်းမၼ်းႁေဢိတ်းလႃႇ”
“ၵဝ်ႁိူဝ်ႉယွၼ်ႉမၼ်းၼႆႉၶႂ်ႈၼႃႇလိူဝ်ႁဵတ်းၵၢၼ်ယဝ်ႉဢိူဝ်ႈ မၢင်ပွၵ်ႈမႃးၵေႃႈၶႂ်ႈဝႃႈ မႂ်းဢဝ်ၽူဝ်ႁေလႃႈၼႆယဝ်ႉ”
“မႂ်းႁမ်ႉတေဢမ်ႇမီးၵေႃႉၵွၼ်ႇလႃႈ”
“မီးၵေႃႈမိူၼ်ဢမ်ႇမီးၵူၺ်းၸိူင်ႉၼၼ်..ပေႃးမၼ်းလႆႈၸူႉယဝ်ႉၵေႃႈ ပေႃးပႅတ်ႈၵဝ်ယဝ်ႉလႃႈ”
“မႂ်းၵေႃႈဢဝ်ပႅတ်ႈမၼ်းႁေယဝ်ႉၼႃႇ”
ပေႃးလၢတ်ႈၸိူင်ႉၼႆမႃးၵေႃႈ ႁၼ်ၼႃႈၵူၼ်းၵေႃႉၼၼ်ႉမီးယူႇၼႂ်းတႃမႃးယဝ်ႉ။
“ၵဝ်ဢမ်ႇၶႂ်ႈလႆႈမႂ်းႁူႉ ႁၼ်ၸိူဝ်းသူဢဝ် ၵဝ်သုၵ်ႉသၵ်ႉတၢင်သူၼႃႇမႂ်း”
“သင်ဢမ်ႇသင်ဢမ်ႇဢဝ်ၽူဝ်ၵေႃႈ ဝႆႉၸူႉတူၺ်းၽွင်ႈလူႉၵဝ်ဝႃႈ ၵဝ်ၶႂ်ႈႁၼ်မႂ်းမီးၸူႉၼႃႇၵဝ်”
“သုမ်းၶၢဝ်းယၢမ်းၵူၺ်းဢိူဝ်ႈ ၸၢင်ႈဢဝ်ႁဵတ်းသင် သုၵ်ႉသၵ်ႉ”
“မႂ်းဢမ်ႇၵျိူၵ်ႈၽူႈၸၢႆးႁႃႉတေႃႈ”
“ၵဝ်လႆႈၸႂ်တူဝ်ၵဝ်ႇလိူဝ်ပိူၼ်ႈယဝ်ႉမႂ်းဝႃႈ ဢမ်ႇလႆႈဝူၼ်ႉတၢင်ၽႂ်၊ ဢမ်ႇလႆႈဝႆႉပႃးၽႂ်၊ ဢမ်ႇလႆႈသုၵ်ႉသၵ်ႉၸွမ်းၽႂ်၊ ၶႂ်ႈၵႂႃႇလႂ်ၵႂႃႇ၊ ၶႂ်ႈႁဵတ်းသင်ႁဵတ်း၊ ၵူၼ်းဢမ်ႇမီးၼႃႈႁိူၼ်း၊ ဢမ်ႇမီးၽႂ်ပႂ်ႉထႃႈ ၸွမ်းႁွင်ႉၸွမ်းဝႃႈ ဢမ်ႇလႆႈဝူၼ်ႉထိုင်ၽႂ် မၼ်းဢမ်ႇၵျေႃႇၸႂ်ၼႃႇႁိုဝ်မႂ်းဝႃႈ”
ၶမ်းၼုမ်ႇမႃးၼင်ႈတေႃႇၼႃႈၶႃႈသေယဝ်ႉ
“မႂ်းဢၢၼ်းယူႇၸိူင်ႉၼႆၵႂႃႇတေႃႇၸူဝ်ႈႁႃႉ လုၵ်ႈဢမ်ႇမီးလၢၼ်ဢမ်ႇမီး ပီႈၼွင်ႉၸိူဝ်ႉၶိူဝ်းၵေႃႈဢမ်ႇၵႂႃႇႁႃပိူၼ်ႈ”
“ၵဝ်တေမီးလၢၼ်ယဝ်ႉမႂ်းယႃႇမႆႈၸႂ်”
“လုၵ်ႈၽႂ်ဢႃႈလၢၼ်မႂ်းၼႆႉ”
“လုၵ်ႈၼွင်ႉၸၢႆးၵဝ်”
“မႂ်းမေႃလၢတ်ႈတေႃႇၼွင်ႉမႂ်းႁေၵႃႈ”
“မၼ်းလၢတ်ႈတေႃႇၵဝ်မႃးၵူၺ်း”
“မၼ်းမီးလုၵ်ႈယဝ်ႉႁႃႈ”
“ပႆႇမီး..မၼ်းလၢတ်ႈၵဝ်ဝႃႈမၼ်းဢဝ်မေးယဝ်ႉၼႆၵူၺ်း ထႅင်ႈဢိၼ်ႉၵေႃႈဢမ်ႇလွတ်ႈမီး”
“ၼွင်ႉမႂ်းဢဝ်မေးၵေႃႈ ဢမ်ႇတိူဝ်ႉၼဵၼ်မႂ်းၵွၼ်ႇဢိူဝ်ႈၼေႃႈ”
“ယူႇၵႂႃႇၵွၼ်ႇဝၼ်းမၼ်းပႆႇထိုင် မႂ်းဢမ်ႇယၢမ်ႈငိၼ်းႁႃႉ”
“တိူင်းယဝ်ႉၼၼ်..”
ၶႃႈယူႇမႃးလႆႈဢသၢၵ်ႈသၢဝ်းသီႇၸမ်သၢဝ်းႁႃႈယဝ်ႉ ပိူၼ်ႈဝႃႈၶႃႈထဝ်ႈ ၶႃႈတႄႉတိုၵ်ႉဝႃႈတူဝ်ၶႃႈၼုမ်ႇ၊ ပေႃးယၵ်ႉမၢၼ်ႇၸမ်ႈတေႉၵေႃႈ တေႃႈႁေဝႃႈဢမ်ႇတူၵ်းၸႂ်ၵူၺ်းယဝ်ႉလႃႈ။
ၵၢင်ၶမ်ႈမိူဝ်ႈၸမ်တေၼွၼ်း တိုၵ်ႉၽုၺ်ႇၶွမ်းသေ တေတူၺ်းၸိူင်းယူႇၼၼ်ႉ သဵင်တွႆႇၽၵ်းတူႁွင်ႈမေႃးမႃး
“ၽႂ်ဢႃႈ”
“ၵဝ်ဢိူဝ်ႈ”
သဵင်ပဝ်းႁွမ်လင်မေႃး တင်းသီၼႃႈဢမ်ႇလီၼၼ်ႉသေ
“ၵိၼ်ၶဝ်ႈယဝ်ႉႁႃႉ” မၼ်းၶွၼ်းႁူဝ်ၼႄယဝ်ႉ
“ၵိၼ်ၶဝ်ႈၵွၼ်ႇလႄႈပေႃးၼၼ်..”
ၶႃႈဢဝ်တင်းၶဝ်ႈသွႆးဢေႃႇတေႃႇသႂ်ႇၾႆးသေတူမ်ႈ မိူဝ်ႈတႄႇဢၢင်ႈတူမ်ႈလဵင်ႉမၼ်း သႂ်ႇၵႂႃႇသႂ်ႇမႃး ၶႃႈသမ်ႉတွင်ႇမႆႈယဝ်ႉလႄႈ တူမ်ႈႁေသွင်ထူင်ယဝ်ႉ။
ပေႃးလဵင်ႉၶဝ်ႈမၼ်းတိုၼ်းဢမ်ႇၵိၼ် ပေႃးပဵၼ်ၶဝ်ႈသွႆးဢေႃႇတေႃႇၼႆတႄႉ ၶႃႈႁူႉလီၼႃႇမၼ်းတိုၼ်းတေၵိၼ် လိူဝ်သေၼၼ်ႉ မိူဝ်ႈၼႆႉၵေႃႈ ဢွၵ်ႇလူမ်းၶႂ်ႈမဝ်းမႃးလႄႈ ၸင်ႇဢဝ်ဢႅပ်ႇၼိူဝ်ႉယွင်းၶူဝ်ႈဢွၵ်ႇမႃးယဝ်ႉ မႃးမႄးထုပ်ႉထုပ်ႉသေ မႄးၶူဝ်ႈၶွပ်ႈဢိတ်ႉၼိုင်ႈယဝ်ႉ သႃႈသႂ်ႇၽၵ်းၽႆႇႁွမ်လူၼ်ႇမီႇလႅင်၊ မၢၵ်ႇၽိတ်ႉ မၢၵ်ႇၽႃႈမိပ်ႇႁေဢိၼ်ႉၼႆၵေႃႈ ဢလူဝ်ႈဝၢၼ်ထူၼ်ႈ တင်းပီႇယႃႇႁေၵေႃႈ ၼင်ႈတူၺ်းၸိူင်းႁေၼႆ ၶိုၵ်ႉပေႇၸႂ်ယဝ်ႉ။
ၶႃႈၵေႃႈႁဵတ်းႁေတမ်းပၢၵ်ႇၼႃႈမၼ်းယဝ်ႉ ၼင်ႈၵိၼ်ႁင်းၶႃႈယဝ်ႉတူၺ်းၸိူင်းၵႂႃႇ မၼ်းၵေႃႈၵိၼ်ၵႂႃႇၸွမ်းၶႃႈတေႉဢိူဝ်ႈ
ႁႃးတူၺ်းၸိူင်းသေလပ်းၵႂႃႇမိူဝ်ႈလႂ်ဢမ်ႇတၼ်းႁူႉ တိုၼ်ႇမႃးၵေႃႈမိူင်းလႅင်းယဝ်ႉ။ သမ်ႉဝႃႈမၼ်းဢမ်ႇလႆႈမႃးယူႇၸွမ်းၶႃႈသေတႃႉ မီးမၼ်းၵူၺ်းဢၼ်ၵႆႉမႃးႁႃၶႃႈတႃႇသေႇလႄႈ ပဵၼ်ၵေႃႉပဵၼ်သႄႈၵၼ်ပိုင်ႈဢိင်ၵၼ်လႆႈ။
မိူဝ်ႈၼႆႉဢမ်ႇမီးၵၢၼ်ၼႆၵေႃႈ မႄးၼွၼ်းပၼ်ဢိမ်ႇဢိမ်ႇ လႃႈယဝ်ႉၸွင်ႇၵွႆႈလုၵ်ႉ၊ ဢွၼ်ၵၼ်လုၵ်ႉၽဵဝ်ႈလုၵ်ႉသိမ်းသေ
“သႅင်..ၵဝ်ဝႃႈၵဝ်ၶႂ်ႈတေႇၼႃႈႁိူၼ်းယဝ်ႉၵဝ်”
မိူဝ်ႈမၼ်းလၢတ်ႈမႃးၸိူင်ႉၼႆ ပႃးလူၺ်ႈသၢႆတႃဢၼ်တဵမ်လူၺ်ႈတၢင်းဢၢၼ်း သမ်ႉဝႃႈသေလၢႆယူႇၵေႃႈ တၢင်းလိူၵ်ႈမၼ်းယဝ်ႉလူး ၶႃႈသမ်ႉမီးသုၼ်ႇသင်ႁၢမ်ႈသီးမၼ်းလႆႈ။
“တေႇလႄႈ..မီးၵူၼ်းဢဝ်မႂ်းယူႇႁိုဝ်လႃႇ”
“ဢမ်ႇမီးယဝ်ႉ..”
“ႁႃထႅင်ႈဢိူဝ်ႈမႂ်းၵေႃႈ..ႁၢင်ႈလီပေႃးတၢၼ်ႇမႂ်းၼႆႉယၢပ်ႇတီႈလႂ်”
“ပွၵ်ႈၼႆႉမႂ်းဢမ်ႇဝႃႈယဝ်ႉၵႃႈ..တေဢဝ်ႁဵတ်းႁင်တုၵ်ႉၶၵူၺ်းဢိူဝ်ႈ တူၺ်းဢေးၼုမ်ႇဢေးယွတ်ႈၶဝ်ၼၼ်ႉလေႃႇၼႆ မႂ်းလႅၵ်ႈလၢႆႈၵႂႃႇယဝ်ႉလႃႇ”
ၵူႈပွၵ်ႈၶႃႈၵေႃႈၵူဝ်မၼ်းဢဝ်ပႅတ်ႈၶႃႈလႄႈ ႁႃၶေႃႈဢၢင်ႈတင်းၼမ်တင်းလၢႆမႃးလၢတ်ႈၼႄမၼ်း ၵူၺ်းၵႃႈ ပွၵ်ႈၼႆႉ ၼႂ်းဢူၵ်းၼႂ်းၸႂ်ဢၼ်မၼ်းပိုတ်ႇလၢတ်ႈၼႄၶႃႈၶမ်ႈဝႃးၼၼ်ႉ ႁဵတ်းႁႂ်ႈၶႃႈဢမ်ႇၶႂ်ႈႁၢမ်ႈသီးမၼ်းထႅင်ႈယဝ်ႉ။
“မႃးဝူၼ်ႉတူၺ်းယဝ်ႉ..ႁၢမ်ႈၵေႃႈဢမ်ႇလႆႈႁင်မႃးၵွၼ်ႇ မႂ်းၶႂ်ႈဢဝ်ၵေႃႈမႂ်းၵေႃႈတေဢဝ်ယူႇယဝ်ႉဢမ်ႇႁိုဝ်လႃႇ”
“ယဝ်ႉမႂ်းလူး”
“ၵဝ်ၵေႃႈယူႇႁင်းၵဝ်ၸိူင်ႉၼႆၵူၺ်း ဢမ်ႇမီးမႂ်းၵေႃႈၵဝ်ယူႇလႆႈယူႇ”
သဵင်မၼ်းယဵၼ်ၵႂႃႇတင်းႁိုင် ၶႃႈယၵ်ႉတူၺ်းႁၼ်မၼ်း မိူၼ်မီးလွင်ႈၶမ်ၸႂ်ဝႆႉယူႇ၊ ၶႃႈၵေႃႈပႂ်ႉႁႂ်ႈမၼ်းလၢတ်ႈဢွၵ်ႇမႃး ယူႇၸူဝ်ႈၼိုင်ႈ မၼ်းၵေႃႈလၢတ်ႈဢွၵ်ႇမႃး
“ၵဝ်ဝႃႈ..ၵဝ်ၶႂ်ႈၶိုၼ်းလီတင်းၸူႉၵဝ်ႇၵဝ်ၵူၺ်းယဝ်ႉ”
“ၵေႃႉလႂ်လႃႇ..” ၶႃႈဢမ်ႇတၼ်းဝူၼ်ႉၵေႃႈလႆႈထၢမ်ၵႂႃႇယဝ်ႉ။
“ပီႈမွၼ်းၼၼ်ႉဢိူဝ်ႈ..”
“ၵေႃႉၵဝ်ႇၸဵမ်လႂ်ပုၼ်ႉႁိုဝ်လႃႇ မၼ်းပႆႇဢဝ်မေးႁႃႉ”
“ပႆႇ..”
“ပႆႇဢဝ်ၵေႃႈၶေးမီးၸူႉယူႇၵူၺ်းယူဝ်ႉ..တေႃႈမႂ်းပေႃးတၼ်းလၢႆၵေႃႉယဝ်ႉ”
“ယူႇယူႇပေႃးဝူၼ်ႉလွင်ႈတေႇၼႃႈႁိူၼ်းၵေႃႈ ၶုၵ်းၸႂ်လႆႈမၼ်းမႃးဢိူဝ်ႈ”
“မႂ်းႁဵတ်းလႆႈမၼ်းပေႉတၢၼ်ႇၼၼ်ႉ ဢမ်ႇၸင်းမႂ်းၵေႃႈၵၢမ်ႇလီၼႃႇယဝ်ႉ”
“ၵဝ်တေလႆႈႁဵတ်းႁိုဝ်လီ”
“ပေႃးမႂ်းဝူၼ်ႉဝႃႈမႂ်းၼႃႈလိူမ်ႈယူႇၵေႃႈ တၵ်ႉၸူးမၼ်းၶိုၼ်းၵေႃႈလႆႈယူႇၵူၺ်း”
“လၢတ်ႈႁႂ်ႈၵူၼ်းမီးႁႅင်းၸႂ်ၵေႃႈဢမ်ႇပဵၼ်လူင်ၸိူင်ႉမႂ်းၼႆႉ”
ယွၼ်ႉပိူဝ်ႈလၢတ်ႈသိုဝ်ႈၼႃႇလႄႈ ဢူၺ်းၵေႃႉၵေႃႈဢမ်ႇပေႃးၶႂ်ႈၶၢမ်ႇလႆႈ၊ ၵိုတ်းဢၼ်ဢမ်ႇၸၢင်ႈၵႂႃႇလႂ်သေ ၶၢမ်ႇယူႇၸိူင်ႉၼႆၵူၺ်း။
ၸမ်ၶဝ်ႈဝႃႇမႃးၵေႃႈ ၵမ်ႈၽွင်ႈႁိပ်ႈတႄႇၼႃႈႁိူၼ်းယဝ်ႉ ၶႃႈတႄႉၵေႃႈ ႁပ်ႉထႆႇၶႅပ်းႁၢင်ႈပၢင်ၶႅၵ်ႇသေ ပဝ်းႁွမ်သမ်ႉပဵၼ်ၵူၼ်းႁၢင်ႈၶိူင်ႈလႄႈ ႁႃးၵေႃႈၵႂႃႇလႂ်ၵႂႃႇၸွမ်းၵၼ်တႃႇသေႇယဝ်ႉ။
ယူႇၸွမ်းၵၢၼ်ၸိူင်ႉၼႆ မၼ်းၵေႃႈတႃႉလီၶွႆယဝ်ႉၼႃႇ ႁၼ်ပိူၼ်ႈႁၵ်ႉၵၼ်ဝၢၼ်ၵၼ် ႁၼ်ယူႇသေႇသေႇ မိူဝ်ႈလႂ်တေပဵၼ်ၵမ်းႁဝ်းၼေႃ မၼ်းၵေႃႈလၢတ်ႈယူႇသေႇသေႇယဝ်ႉ။
မိူဝ်ႈယၢမ်းၵၢင်ၼႂ်ၸဝ်ႉ မီးၵူၼ်းသိုပ်ႇၾူင်းမႃး ၵပ်းသိုပ်ႇတွင်ႈထၢမ်လွင်ႈထႆႇၶႅပ်းႁၢင်ႈၼႆလႄႈ လႆႈႁွင်ႉႁူပ်ႉၵၼ်ဝႆႉတီႈသႅင်ႇ ၶမ်းၼုမ်ႇ၊ သႅင်ႇမၼ်းၼၼ်ႉတႄႉၵေႃႈ ပဵၼ်မိူၼ်ၼင်ႇတီႈႁဵတ်းၵၢၼ်ၶႃႈယဝ်ႉ ၶႃႈပိုတ်ႇၽုၺ်ႇဝႆႉၼိူဝ်ဢွၼ်ႇလၢႆးၵူၺ်း ဢမ်ႇလႆႈမီးသႅင်ႇပိုတ်ႇဝႆႉ ပေႃးလူဝ်ႇႁူပ်ႉၵၼ်ၵေႃႈ ႁွင်ႉမႃးႁူပ်ႉတီႈၼၼ်ႈလၢႆလၢႆ ၶႃႈၵေႃႈတိုၵ်ႉသၢင်ႈတူဝ်မႃးၵူၺ်းလႄႈ ႁဵတ်းလႆႈမွၵ်ႈႁိုဝ်ၵေႃႈႁဵတ်းၵႂႃႇမွၵ်ႈၼၼ်ႉယဝ်ႉ။
မိူဝ်ႈၶႃႈလႄႈတင်းပဝ်းႁွမ် မႃးသင်ႇၵိၼ်ၵေႃႇၾီႇပႂ်ႉယူႇၼၼ်ႉ လႆႈႁၼ် မၢဝ်ႇသၢဝ်ၵူႈၼိုင်ႈၶဝ်ႈမႃးသေ ၶႃႈၵေႃႈပူၵ်းမိုဝ်းႁွင်ႉၸူး ၸဝ်ႈသၢဝ်ၵေႃႈ တွႆးမိုဝ်းၸဝ်ႈမၢဝ်ႇမၼ်းမႃးယဝ်ႉ။
မိူဝ်ႈႁၼ်ၸဝ်ႈမၢဝ်ႇၵေႃႉၼၼ်ႉၼႆၵေႃႈ ဢဝ်ၶႃႈပေႃးငိူဝ်ႈလူင်ၵႂႃႇၵႅပ်ႉၼိုင်ႈယူႇ။ ၶႃႈၵေႃႈၵဵပ်းသီၼႃႈဝႆႉယဝ်ႉ ပဝ်းႁွမ်ၵေႃႈႁူႉၸၵ်းယူႇလႄႈ
“ပီႈၼေႃႇငိုၼ်းဢမ်ႇၸႂ်ႈႁိုဝ်လႃႇၼႆႉ”
မၼ်းၼၼ်ႉၵေႃႈယုမ်ႉယုမ်ႉၼင်ႇၵဵင်ၸႂ်သၢဝ်မၼ်းဝႆႉယူႇ။
“ၸႂ်ႈယဝ်ႉ ဢမ်ႇႁၼ်ၵၼ်ႁိုင်ပဵၼ်ႁိုဝ်ၽွင်ႈလီယူႇၼႄႇ”
“မိူၼ်ၼႆၼၼ်ႉယိုင်”
“ပီႈၶဝ်ႁူႉၸၵ်းၵၼ်ၶႃႈႁႃႉ” သၢဝ်မၼ်းထၢမ်ၸူး
“ၸႂ်ႈယဝ်ႉ ယၢမ်ႈယူႇႁူင်းႁဵၼ်းၸွမ်းၵၼ် ၶဝ်ႁဵၼ်းၸၼ်ႉယႂ်ႇလိူဝ်ႁဝ်း”
“တေႉၼႆ ပီႈၵေႃႈပဵၼ်ၵူၼ်းတီႈၼႆႈၵူၺ်းလူးၼေႃႈ”
သၢဝ်မၼ်းၵေႃႈ ၼႃႈယုမ်ႉယုမ်ႉဢွၼ်ႇသေ ႁူၺ်ႇတႃသႂ်သႂ် ၽိဝ်ၼိူဝ်ႉၶၢဝ်ၶွင်ႇ ၵႅမ်ႈပွင်ႇပွင်ႇဝႆႉ တူဝ်ၶိင်းၵူမ်လဝ်း လႅပ်ႈၵၼ်တေႉၼင်ႇဝႃႈ မၼ်းၵေႃႈတူဝ်သုင်ယွမ်ၵႅင်း ၵႅၼ်ႇၶႅင်မီးႁႅင်း ၼႃႈၸိုၼ်ႈတႃသႂ် ၵႆႉတၵ်ႉၵႆႉလၢတ်ႈ မေႃဢုပ်ႇမေႃယေႃး လၢတ်ႈၵႂၢမ်းၼိုင်ႈၶေႃႈ သမ်ႉပေႃးလိုမ်းၵိၼ်ၶဝ်ႈၼိုင်ႈၵမ်းဢၼ်ဝႃႈၼၼ်ႉယဝ်ႈ။
“ၸဵမ်မိူဝ်ႈပီႈဢွၵ်ႇႁူင်းႁဵၼ်းၵႂႃႇ ႁဝ်းၵေႃႈဢမ်ႇႁၼ်ပီႈထႅင်ႈႁေပွၵ်ႈတေႉဢိူဝ်ႈ”
“ပီႈၵႂႃႇၶိုၼ်ႈႁဵၼ်းထႅင်ႈဢိူဝ်ႈ ႁိုင်ၼႃႇတေႉၼႆ သူသွင်ၵေႃႉၵေႃႈလႅၵ်ႈလၢႆႈမႃးတေႉလူး”
“လၢႆႈၽႅဝ်ဢေႃႈ”
ၶႃႈတႄႉၵေႃႈၼင်ႈထွမ်ႇၶဝ်ဢုပ်ႇၵၼ်ၵူၺ်း ဢမ်ႇပေႃးႁတ်းတၵ်းသဵင်ၸွမ်းၼႃႇ၊ မိူဝ်ႈၶဝ်ႈလွင်ႈၵၢၼ်မႃးတႄႉၵေႃႈ ၵႃႈလႆႈလၢတ်ႈယဝ်ႉ ဢုပ်ႇၵၼ်တူၵ်းလူင်းၵၼ်သေ ၼၢတ်ႉမၢႆဝၼ်းပၼ်ၵၼ်ယဝ်ႉၵေႃႈ ပွၵ်ႈၵႂႃႇႁင်းၽႂ်ႁင်းမၼ်းၶိုၼ်းယဝ်ႉ။
ၶႃႈတႄႉၵေႃႈပႆႇမိူဝ်း ပႃးၶွမ်းသေ သိုပ်ႇၼင်ႈႁဵတ်းၵၢၼ်ထႅင်ႈ။
ဢေးၼုမ်ႇၵွၼ်ႉၶဝ်ႈမႃးတမ်းၽိူၼ်တၢင်းၼႃႈသေ
“ၼၼ်ႉၸူႉငဝ်ႈမႂ်းဢမ်ႇၸႂ်ႈႁႃႉ”
“ပိူၼ်ႈဢမ်ႇႁွင်ႉၸူႉငဝ်ႈယူဝ်ႉၸိူင်ႉၼၼ် ၵဝ်ၵျိူၵ်ႈမၼ်းၽၢႆႇလဵဝ်ၵူၺ်းၼင်”
“ဢေးပဝ်းလူးၵႂႃႇလႂ်ယဝ်ႉ”
“မိူဝ်းႁိူၼ်းယဝ်ႉ”
“ၽွင်းၼႆႉဢမ်ႇပေႃးၵႆႉႁၼ်မၼ်းမႃးတီႈလၢၼ်ႉယဝ်ႉ”
“မီးၸူႉမႂ်ႇယဝ်ႉယူဝ်ႉ”
“ဢၢပ်ႈၸႂ်ႈယူႇ မႂ်းလူးၸူႉငဝ်ႈပေႃးတေတေႇၼႃႈႁိူၼ်းပႅတ်ႈယဝ်ႉၼႆႉ”
“ၵေႃႈယဝ်ႉမၼ်းလႄႈ”
“ထၢမ်တေႉ မႂ်းတိုၵ်ႉၵျိူၵ်ႈမၼ်းယူႇႁႃႉမိူဝ်ႈလဵဝ်ၵေႃႈ”
ၶႃႈၵေႃႈၼင်ႈဝူၼ်ႉႁၼ်ၶိုၼ်း မိူဝ်ႈတႄႇတႄႇႁၵ်ႉမႅၼ်ႈမၼ်းၼၼ်ႉ ဢၢပ်ႈဝႃႈၼႂ်းမိူင်းၶူင်းၵၢင်ၼႆႉ မီးမၼ်းၵူၺ်းယဝ်ႉဢၼ်ၶႃႈတေႁၵ်ႉလႆႈ ႁၵ်ႉမၼ်းၵေႃႉလဵဝ် ဢမ်ႇႁၵ်ႉၽႂ်လႆႈထႅင်ႈယဝ်ႉလိူဝ်သေမၼ်း ၵူၺ်းၵႃႈ တၢင်းႁၵ်ႉၶႃႈလႄႈမၼ်းၼၼ်ႉ ပဵၼ်လႆႈလူမ်းပဝ်ႇ ပဵၼ်ၼင်ႇလူမ်းထွင်း ပဵၼ်တၢင်းႁၵ်ႉမွင်းလၢႆလၢႆၵူၺ်း။ ၶႃႈဢမ်ႇႁတ်းတႃႇတေ မွၵ်ႇလၢတ်ႈမၼ်းဝႃႈႁၵ်ႉ လၢတ်ႈတေႃႇတူင်ႉတၵ်ႉမၼ်းၵူၺ်းတင်းဝႃႈယၢပ်ႇလႃႈ။
ယွၼ်ႉပိူဝ်ႈ ၶႃႈပဵၼ်ၽူႈယိင်းဢၼ်ၶဝ်ဝႃႈႁၢင်ႈၸႃႉလိူဝ်ပိူၼ်ႈၼႂ်းႁွင်ႈႁဵၼ်း၊ ပဵၼ်ၵူၼ်းၵေႃႉဢၼ်ၶဝ်ၵိူဝ်ႉၵိုၵ်းၵေႃႉပုၼ်ႉၵေႃႉၼႆႉသေ မီးလွင်ႈဢဵတ်ႇသဵတ်ႇတေႃႇၶႃႈမႃး၊ ႁၢင်ႈၸႃႉပေႃးတၢၼ်ႇၶႃႈၼႆႉ ၶဝ်တေဢဝ်သၢႆတႃၶဝ်ယၵ်ႉတူၺ်းလႆႈယူႇႁိုဝ် ၶႃႈၵေႃႈ ဢမ်ႇမီးလွင်ႈယုမ်ႇယမ်ၼိူဝ်ႁၢင်ႈၽၢင်တူဝ်ၵဝ်ႇမိူၼ်ၵၼ်ယဝ်ႉ။
လႆႈယူႇၵႆၵႆသေႁၵ်ႉ ယူႇၵႆၵႆသေယၵ်ႉတူၺ်းၵူၺ်းၵေႃႈ ပၼ်လွင်ႈမူၼ်ႈသိူဝ်းဝႆႉယူႇဢိူဝ်ႈ၊ မိူဝ်ႈလႆႈႁူပ်ႉတေႃႇၼႃႈ မိူဝ်ႈလႆႈႁၼ်မၼ်းလဵပ်ႈမႃးၸမ် ၸၼ်ဢဝ်ႁူဝ်ၸႂ်သၼ်ႇဝႆတူင်ႉၶွၼ်းမႃး ပေႃးဢမ်ႇႁတ်းဝၢႆႇၼႃႈယၵ်ႉတူၺ်းမၼ်းၼၼ်ႉယဝ်ႉ။
ၵူၺ်းၵႃႈ မိူဝ်ႈၶိုၼ်းလႆႈႁူပ်ႉႁၼ်ထႅင်ႈပွၵ်ႈၼိုင်ႈ ၼႂ်းႁွပ်ႈ 10 ပီ ၸႂ်ၵေႃႈၼိမ်မႃး ႁၼ်ယူႇၵေႃႈဢမ်ႇတိုၼ်ႇတဵၼ်ႈသင်ယဝ်ႉ၊ ၶၢဝ်းယၢမ်းႁဵတ်းႁႂ်ႈၸႂ်ၵူၼ်းလႅၵ်ႈလၢႆႈဢၼ်ဝႃႈၼၼ်ႉ တေၸႂ်ႈယူႇႁိုဝ်၊ ၶိုၼ်းဝူၼ်ႉတူၺ်းမိူဝ်ႈၼၼ်ႉ လွင်ႈဢၼ်ပဵၼ်ယူႇယၢမ်းၼၼ်ႉ မၼ်းယွင်ႇၸွမ်းၵႃႈႁိုဝ်ၼႆ။
ထိုင်ဝၼ်းထႆႇႁၢင်ႈယဝ်ႉလႄႈ ႁဝ်းၵေႃႈဢွၼ်ၵၼ်ၵႂႃႇထႆႇၸွမ်းၼင်ႇၽႅၼ်ႁဝ်းမီးဝႆႉၼၼ်ႉယဝ်ႉ။
ထႆႇယဝ်ႉၵေႃႈပႆႇယဝ်ႉ မႃးၼင်ႈလိူၵ်ႈၶႅပ်းႁၢင်ႈသေ တႅင်ႇပၼ်ထႅင်ႈ မိူဝ်ႈလႆႈႁၼ်သွင်ၵေႃႉ ထႆႇႁၢင်ႈၵိုၵ်းၵၼ်ၸိူင်ႉၼၼ် ၼႂ်းၸႂ်ဝူၼ်ႉၶိုၼ်းႁၼ် ၾၼ်မိူဝ်ႈၼၼ်ႉမႃးယဝ်ႉ ႁဵတ်းႁႂ်ႈသမ်ႉပေႃးၶႂ်ႈၶူဝ်တူဝ်ၵဝ်ႇမႃးယူႇဢိူဝ်ႈ ဢမ်ႇဝူၼ်ႉဝႃႈ တေလႆႈမႃးၼင်ႈယၵ်ႉၶႅပ်းႁၢင်ႈၵူႈႁၵ်ႉၶဝ် ထိုင်တီႈပေႃးဢမ်ႇလႆႈလပ်းလႆႈၼွၼ်းယွၼ်ႉမၼ်းၸိူင်ႉၼႆ။
ထႆႇယဝ်ႉၵေႃႈပႆႇယဝ်ႉ ဝၼ်းပၢင်ၶႅၵ်ႇၶဝ်ၵေႃႈ လႆႈၵႂႃႇထႆႇပၼ်ၶဝ်ထႅင်ႈ တေႃႇပေႃးယဝ်ႉပွႆးယူႇ။ မိူဝ်ႈၶဝ်ယွၼ်းမႃး ႁဝ်းၵေႃႈၵႂႃႇယဝ်ႉ ယွၼ်ႉပိူဝ်ႈမၼ်းလႆႈငိုၼ်းလူး။ သမ်ႉဝႃႈႁဝ်းဢမ်ႇပဵၼ်ၵူၼ်းၵေႃႉၼၼ်ႉလႆႈၵေႃႈ ႁၼ်ၶဝ်ၸူမ်းသိူဝ်း ႁဝ်းၵေႃႈယိၼ်းၸူမ်းၸွမ်းယဝ်ႉ။
တေႁဵတ်းႁိုဝ်လႃႇ ပဝ်းႁွမ်ၼႆၵေႃႈတွႆးပီႈမွၼ်းယူႇယဝ်ႉၼႃႇ၊
ဢမ်ႇႁိုင်ၵေႃႈ တေထိုင်ဝၼ်းမၼ်းယဝ်ႉ။ ၸူႉငဝ်ႈတေႇၼႃႈႁိူၼ်းၼႆႉ ဢမ်ႇမွင်ၸႂ်တၢၼ်ႇ ႁူႉဝႃႈဢူၺ်းၵေႃႉလီတေတေႇၼႃႈႁိူၼ်းလႃႈ။
ဝၢႆးသေပၢင်ၶႅၵ်ႇယဝ်ႉ ၵၢၼ်ႁႃးၵေႃႈယဝ်ႉၵႂႃႇ ဢွၼ်ၵၼ်မႃးၵိၼ်လဵင်ႉၵၼ်ယူႇတီႈသႅင်ႇၶမ်းၼုမ်ႇ။
“သႅင် ၵဝ်ဝႃႈမႂ်းႁႃၽူဝ်လႆႈယဝ်ႉဝႃႈ”
“ဢိုမ်ႈ..ဢဝ်လႄႈမႂ်းၶႂ်ႈဢဝ်ၵေႃႈ တေဢဝ်မိူဝ်ႈလႂ်လႃႇ ၼႅတ်ႈဢဝ်လႄႈပိူၼ်ႈတေၶဝ်ႈဝႃႇယဝ်ႉဢိူဝ်ႈၼႆႉ”
“မိူဝ်ႈႁိုဝ်းမၼ်းတေမႃးထၢမ်ဝႃႇ”
ၶမ်းၼုမ်ႇလႆႈငိၼ်းယဝ်ႉ ၼႅတ်ႈမႃးငွၵ်ႈၶေႃးမၼ်းလၢတ်ႈၸွမ်း “ဝႆးၵျႃႉလႃႇ”
“မၼ်းဝႃႈ ပေႃးဢၢၼ်းတေႇၵေႃႈ ဢမ်ႇလူဝ်ႇပဵၼ်ၸူႉယဝ်ႉ ဢဝ်ၵၼ်သေဢိူဝ်ႈ ၼႆၼႃႇ”
“မႂ်းၵေႃႈၽွမ်ႉ”
“ၽွမ်ႉၵူၺ်းဢိူဝ်ႈ..ၵဝ်ဢၢၼ်းဢဝ်တေႉလူး”
တူၺ်းသၢႆတႃမၼ်းၵေႃႈ ပွၵ်ႈၼႆႉဢမ်ႇၸႂ်ႈလဵၼ်ႈလဵၼ်ႈၵူၺ်းယဝ်ႉ။ ၶႃႈၵေႃႈၼိမ်ယဵၼ်သေထွမ်ႇၶဝ်ႁဵတ်းၼၼ်ၵေႃႈ
“မႂ်းလူးသႅင် ဢမ်ႇမီးၵူၼ်းၵဝ်းၼႄႇ”
ဢမ်ႇႁူႉမိူဝ်ႈၼႆႉ ၶႂ်ႈၵိၼ်ၼမ်ဝႆႉႁိုဝ် လွင်ႈၶမ်ၸႂ်ၼၼ်ႉ သမ်ႉပေႃးလႆႈလၢတ်ႈဢွၵ်ႇမွၵ်ႇမႃးယူႇဢိူဝ်ႈ။
“ၵူၼ်းၸိူင်ႉၵဝ်ၼႆႉႁႃႉ ၽႂ်တေမႃးၵျိူၵ်ႈ ၽႂ်တေမႃးသူၼ်ၸႂ်တေႉတေႉ သင်ဢမ်ႇသင်ၵေႃႈၶႂ်ႈၵဝ်းလဵၼ်ႈလဵၼ်ႈၵူၺ်းဢိူဝ်ႈ ၵူၼ်းႁၢင်ႈၸႃႉၸိူင်ႉၵဝ်ၼႆႉ ၽႂ်တေၶႂ်ႈလႆႈၶိူဝ်ဝႃႈ”
“ၽႂ်ဝႃႈမႂ်းႁၢင်ႈၸႃႉ ယႃႇထၢင်ႇလဵၵ်ႉတူဝ်ၵဝ်ႇၼႃႇၽႅဝ်လေႃႇ ၼႃႈတႃႁၢင်ႈၽၢင်တူဝ်ၶိင်းၼင်ႇမႂ်းၼႆႉ ဢဝ်ၵႂႃႇႁဵတ်းၼၢင်းႁၢင်ႈလီပေႃးလႆႈလႃႈ” ပဝ်းႁွမ်တင်းလၢတ်ႈတင်းယိပ်းၼႃႈၶႃႈယူႇ။
“မႂ်းတမ်ႉဢမ်ႇႁဵတ်းႁၢင်ႈ တင်းႁၢင်ႈလီမွၵ်ႈၼႆႉ ပေႃးႁဵတ်းႁၢင်ႈမႃးတေႁၢင်ႈလီမွၵ်ႈႁိုဝ်” ၶမ်းၼုမ်ႇၸိမ်ၸွမ်း။
“ၵဝ်ဢမ်ႇယွင်ႇၸွမ်းၵႂၢမ်းၶိူဝ်လေႃႇၼႃႈ”
“တေႉဢိူဝ်ႈၼႆႉ ပၼ်ၵဝ်ႁဵတ်းပၼ်မႂ်းတူၺ်းလႄႈ”
“ဢၢၼ်းၼႃႇၼႃႇ”
“မၼ်းဢမ်ႇယူႇတီႈႁၢင်ႈၽၢင်လေႃႇမႂ်း သမ်ႉဝႃႈႁၢင်ႈလီတၢၼ်ႇႁိုဝ်ၵေႃႈ မၼ်းၵေႃႈမီးယူႇၵူၺ်းၵူၼ်းမႃးၵဝ်းလဵၼ်ႈၵဝ်းလၢႆ၊ ၵူၺ်းၵႃႈ ၸိူင်ႉၼင်ႇမႂ်းၼႆႉ ပေႃးဝႃႈ ထူပ်းၵူၼ်းၵေႃႉဢၼ် ၵျိူၵ်ႈမႂ်းတေႉ ၵျိူၵ်ႈဢၼ်မႂ်းပဵၼ် ၵျိူၵ်ႈၵူႈလွင်ႈဢၼ်ပဵၼ်မႂ်းၼႆ မႂ်းၵေႃႈထုၵ်ႈလီဝူၼ်ႉတူၺ်းၽွင်ႈဢိူဝ်ႈ”
“ၵူၺ်းၵႃႈ ပေႃးဝႃႈဢမ်ႇၵျိူၵ်ႈမၼ်းလူး”
“ၼၼ်ႉၼႃႇ ၵဝ်တိုၵ်ႉလၢတ်ႈၵူၺ်း”
“ပၼ်ႁႂ်ႈမၼ်းယူႇၸိူင်ႉၼႆၵူၺ်းလႃႈ ပေႃးဝႃႈမၼ်းထိုင်မႃး မၼ်းၵေႃႈဢမ်ႇၸၢင်ႈႁဵတ်းႁိုဝ်ၵွၼ်ႇ” ပဝ်းႁွမ်ၵေႃႈၶၢၼ်ႉလၢတ်ႈၸွမ်းယဝ်ႉ။
“ၸွင်ႇမႂ်းယုမ်ႇလွင်ႈၼမ်ႉယၢတ်ႇႁႃႉ”
“ဢမ်ႇယုမ်ႇ”
“လီယဝ်ႉ..”
ၶႃႈၵေႃႈၵိၼ်ပၼ်မဝ်းပေႃးဢမ်ႇႁူႉႁူဝ်ႁူႉႁၢင်ယဝ်ႉဢိူဝ်ႈလေႃႇ။
ထိုင်မိူဝ်ႈႁိုဝ်းမႃး ဝၼ်းမၼ်ႈဢူၺ်းၵေႃႉႁႃးၵေႃႈထိုင် ဢမ်ႇႁိုင်ၵေႃႈပၢင်ၶႅၵ်ႇ။ ပၢင်ၶႅၵ်ႇပဝ်းႁွမ်ၼႆၵေႃႈ သမ်ႉႁိပ်ႈႁိပ်ႈၼႅတ်ႈၼႅတ်ႈႁေ သႂ်ႇၵႂႃႇသႂ်ႇမႃး ဢဝ်ၶႃႈပဵၼ်ဢူၺ်းၵေႃႉၸဝ်ႈသၢဝ်ဝႃႇ တေဝႃႈႁိုဝ်ၵေႃႈ ဢူၺ်းၵေႃႉမၼ်းသမ်ႉၵိုတ်းၶႃႈၵူၺ်းယဝ်ႉၼႃႇ။
ၶေးတေပဵၼ်ပွၵ်ႈဢွၼ်တၢင်းသုတ်းယဝ်ႉႁိုဝ် လႆႈႁၢင်ႈၶိူင်ႈတႃးၼႃႈယွမ်ႉသူပ်းတႃးတႃ သႂ်ႇၶူၼ်တႃတု ၼႃႈလုပ်ႈမုၼ်ႈၸိူင်ႉၼႆ ၼႃႈလမ်လမ်ၶႃႈပေႃးဢမ်ႇႁၼ်သိဝ်သေမဵတ်ႉယဝ်ႉၼႃႇ။
ပေႃးဢမ်ႇၶိုၼ်ႈဝတ်ႉၶိုၼ်ႈၵျွင်းၶႃႈတင်းဢမ်ႇသႂ်ႇလႃႈသိၼ်ႈတူင်ႇ၊ ၶၢၼ်ႉၼုင်ႈသိၼ်ႈႁေလႄႈ ပေႃးဢမ်ႇလူဝ်ႇၼႃႇ ၶႃႈတင်းဢမ်ႇၶႂ်ႈၵႂႃႇၵျွင်းယဝ်ႉ။ မိူဝ်ႈၼႆႉသမ်ႉ လႆႈမႃးၼုင်ႈသုပ်းသႂ်ႇၶူဝ်းတႆးတဵမ်ၸုမ်ႇသေ တိုဝ်းတင်းၶႅပ်းတိၼ်ၶတ်ႈတီႇပႃႇ ဝၢင်ထႅပ်ႇယႅပ်ႉၼၼ်ႉႁေ တင်းသမ်ႉလူဝ်ႇပႆၵႂႃႇပႆမႃး ထႆႇၶႅပ်းႁၢင်ႈပၼ်မၼ်းထႅင်ႈ ပေႃးပဵၼ်ၸိူင်ႉၼႆၵတ်ႉၵႃႈဢမ်ႇမီးဢူၺ်းၵေႃႉၼမ်လႃႈ။
ပေႃးဢဝ်ၽူဝ်မႃးၵေႃႈ ယဵၼ်ႁူယဵၼ်ၸႂ်ဝႆႉတေႉၵွၼ်ႇ ပေႃးဢမ်ႇလူဝ်ႇႁဵတ်းၵၢၼ်ၵေႃႈ ပေႃးဢမ်ႇတၼ်းႁူပ်ႉၵၼ်ယဝ်ႈ၊ မၼ်းဢမ်ႇမီးၶၢဝ်းယၢမ်းသုမ်းႁၵ်ႉယဝ်ႉလႄႈ ဢမ်ႇတၼ်းလၢတ်ႈတေႃႇၶႃႈယဝ်ႉမိူဝ်ႈလဵဝ်။ မၢင်ၵမ်းမႃးၵေႃႈ မိူၼ်သုမ်းဢူၺ်းၵေႃႉၵႂႃႇၵေႃႈလူဝ်လူဝ် လၵ်ႉၸႂ်လဵၵ်ႉဝႆႉယူႇၵွၼ်ႇ။ မၢင်ၵမ်းၵေႃႈယိၼ်းငဝ်ငႅဝ်ၸႂ်ထိုင်ၶၢဝ်းယၢမ်းပူၼ်ႉမႃးၸိူဝ်းၼၼ်ႉယူႇဢိူဝ်ႈ။
တီႈသႅင်ႇၶမ်းၼုမ်ႇ
“မိူဝ်ႈပၢင်ၶႅၵ်ႇဢေးပဝ်း ႁၢင်ႈမီးၵူၼ်းသူၼ်ၸႂ်မႂ်းၵျႃႉႁိုဝ်လႃႇ”
“ၶွင်ၵဝ်ဢမ်ႇသူၼ်ၸႂ်လႄႇ”
“ဢိူဝ်ႈၼႆ လႆႈဝႃႈမႂ်းပဵၼ်ၵူၼ်းမီးၼမ်ႉၵတ်ႉဝႆႉၵွၼ်ႇၼႆႉ”
“ၼမ်ႉၵတ်ႉ..ႁင်လႃႇဢမ်ႇပွင်ႇၸႂ်”
“ၼမ်ႉၵတ်ႉယူႇလွတ်ႈလႅဝ်းၼၼ်ႉၼႃႇ”
“ပဵၼ်ၼမ်ႉၵတ်ႉလႆႈယူႇႁႃႉၸိူင်ႉၼႆ”
“ပေႃးဢမ်ႇမီးၼမ်ႉၵတ်ႉ မႂ်းဢမ်ႇယူႇမႃးလႆႈထိုင်မိူဝ်ႈၼႆႉလေႃႇ”
“တေၸႂ်ႈယူႇ ၵဝ်ၶႅၼ်ႇၽၢႆႇထဵင်ပိူၼ်ႈၼႃႇ ဢၼ်ထဵင်ၸႃးၼႃႇၼႆႉၵူၼ်းမႃးယွၼ်းႁၵ်ႉၼၼ်ႉယိုင်”
“လႅပ်ႈၼႃႇယဝ်ႉဝႃႈ ၵဝ်ၶႂ်ႈႁၼ်ၼႃႇၵဝ် ၵူၼ်းတေမႃးပေႉမႂ်းလႆႈၼႆႉပဵၼ်ၽႂ်ဢႃႈ”
“ပႂ်ႉတူၺ်းလႄႈ ပေႃးမႂ်းဢမ်ႇထဝ်ႈတၢႆပႅတ်ႈၵေႃႈ”
ၶႃႈယၢမ်ႈဢွၵ်ႇတၢင်းယူႇတီႈၵႆၵႆလႄႈ မိူဝ်ႈယူႇၵႆဢမ်ႇမီးၽႂ်ၼၼ်ႉ မၢင်ပွၵ်ႈမႃးၵေႃႈၶုၵ်းၸႂ်လႆႈဢူၺ်းၵေႃႉ ဢၼ်ႁဝ်းယၢမ်ႈႁဵၼ်းၸွမ်းၵၼ်ၼၼ်ႉသေ ငိၼ်းငဝ်မႃးယူႇ။ ၼႂ်းၽဝၶႃႈၼၼ်ႉ တၢင်းႁၵ်ႉဢမ်ႇတွၼ်ႉလမ်ႇလွင်ႈသေပွၵ်ႈ ၶႃႈမီးဢူၺ်းၵေႃႉၵူၺ်းၵေႃႈလႆႈယဝ်ႉၼႆသေ ၸင်ႇၶၢႆႉမႃးယူႇၶိုၼ်းတီႈဝၢၼ်ႈၵိူတ်ႇမိူင်းၼွၼ်းၶႃႈ ဢၼ်ဢူႈမႄႈၶႃႈၵေႃႈဢမ်ႇလႆႈယူႇသဝ်းယဝ်ႉၼၼ်ႉ မႃးယူႇၸွမ်းဢူၺ်းၵေႃႉ ႁဵတ်းၵၢၼ်ၸွမ်းဢူၺ်းၵေႃႉၸိူင်ႉၼႆ ဝူၼ်ႉဝႃႈမၼ်းတေယိုၼ်းယူႇ ၵူၺ်းၵႃႈ မၼ်းၵေႃႈဢမ်ႇႁိုင် ၽႂ်ၵေႃႈမီးၶိင်ႇမီးၶၢဝ်းမၼ်းယူႇယဝ်ႉ။ ၶႃႈၵေႃႈတေႃႈၼင်ႇၼၼ် ဝူၼ်ႉဝႃႈ တေၶိုၼ်းပွၵ်ႈၵႂႃႇၸွမ်းသဵၼ်ႈတၢင်းၶႃႈယဝ်ႉမိူၼ်ၵၼ်။
တီႈၼႃႈသႅင်ႇၶမ်းၼုမ်ႇ
“ပွၵ်ႈၼႆႉတေၵႂႃႇလႂ်လႃႇ”
“ဢမ်ႇႁူႉယဝ်ႉ ၵႂႃႇၸွမ်းတၢင်းဢၼ်ၶႂ်ႈၵႂႃႇၼၼ်ႉၵူၺ်းယူဝ်ႉ”
“ၵႂႃႇႁိုင်ယူႇႁႃႉ”
“ႁိုင်ယူႇ..”
“တေပွၵ်ႈမႃးၶိုၼ်းမိူဝ်ႈလႂ်”
“ဢမ်ႇႁူႉ”
“ၵႂႃႇယဝ်ႉၵေႃႈ ၵပ်းသိုပ်ႇမႃးႁႃၽွင်ႈလႄႈ ဢွၵ်ႇတၢင်းမိူဝ်ႈလႂ် ၵဝ်ဢမ်ႇတွၼ်ႉၵပ်းသိုပ်ႇမႂ်းလႆႈသေပွၵ်ႈ”
ၶႃႈၵေႃႈယုမ်ႉတေႃႇမၼ်းၵႂႃႇၵူၺ်း
“ဢေးပဝ်းလူး ဢမ်ႇႁၼ်မၼ်းမႃးလႃႇ မႂ်းဢမ်ႇလၢတ်ႈမၼ်းႁႃႉ”
“လၢတ်ႈယဝ်ႉ..မိူၼ်ဝႃႈမၼ်းတေဢမ်ႇတၼ်း”
“မီးႁင်ၵေႃႈလၢတ်ႈမႃးဢိူဝ်ႈၼႃႈ လႄႇႁႂ်ႈၵျေႃႇၵျေႃႇလႄႈ”
“ဢူဝ်ႇၶေႇ ပၢႆးပၢႆ”
ပဝ်းႁွမ်ၵေႃႈ ဝၢႆးသေတေႇၼႃႈႁိူၼ်းယဝ်ႉ ၵုမ်ႇသုၵ်ႉၸွမ်းၵၢၼ်ဝၢၼ်ႈၵၢၼ်ႁိူၼ်းၵူၺ်း သမ်ႉလႆႈၶိုၼ်ႈပႂ်ႉပိူၼ်ႈထႅင်ႈႁေ ဢမ်ႇမီးၶၢဝ်းယၢမ်းသုၼ်ႇတူဝ်မိူၼ်ၼင်ႇၵူႈပွၵ်ႈယဝ်ႉ၊ ႁိုင်ႁိုင်ၶႃႈၸင်ႇမိူဝ်းလႄႇမၼ်းၵူၺ်းလႄႈ ဝၼ်းမိူဝ်ႈၼႆႉၶႃႈတေၵႂႃႇယဝ်ႉၼႆၵေႃႈ သူင်ႇၶေႃႈၵႂၢမ်းဝႆႉပၼ်မၼ်း မၼ်းတင်းဢမ်ႇတၼ်းတူၺ်းၵွၼ်ႇလႃႈ။
ၶႂ်ႈႁၼ်ၼႃႈမၼ်းသေလၢတ်ႈၼႄမၼ်းဝႃႈ “ၵႂႃႇၵွၼ်ႇၼႃႈ ပဝ်းႁွမ်” ၵူဝ်ဝႃႈတေပဵၼ်ပွၵ်ႈလိုၼ်းသုတ်းဢၼ်ႁဝ်းတေလႆႈႁူပ်ႉၵၼ်ထႅင်ႈၼၼ်ႉဢိူဝ်ႈ။
ၶႃႈၵေႃႈၽၢတ်ႇဢွၵ်ႇၵႂႃႇ ဢမ်ႇလႆႈသူင်ႇသင်ႇတူင်ႉတၵ်ႉမၼ်း လႄႈၶၢဝ်းတၢင်းၶႃႈၵေႃႈလႆႈတႄႇမႂ်ႇထႅင်ႈ ယုမ်ႇဝႃႈ တေလႆႈႁူပ်ႉဢူၺ်းၵေႃႉမႂ်ႇမႂ်ႇထႅင်ႈယူႇၼႃ။
သမ်ႉဝႃႈဢမ်ႇမီးၸူႉ ဢမ်ႇမီးၵေႃႉႁူႉၼင်ႇၵဝ်ႇဝႃႈ ၼႂ်းၸႂ်ႁဝ်းႁၵ်ႉၽႂ်ယူႇၼႆ၊ ပေႃးဢမ်ႇလၢတ်ႈၵေႃႈဢမ်ႇမီးၽႂ်ႁူႉၼင်ႇၵွၼ်ႇသႄႈ တေႃႈၼင်ႇၸဝ်ႈတူဝ်မၼ်းတင်းဢမ်ႇႁူႉလႄႈ ဝႃႈၶႃႈႁၵ်ႉမၼ်းယူႇၼႆ။
တႅမ်ႈ – သႅၼ်ငဝ်း
23/06-16/07 2026
