ၵူၼ်းၵေႃႉဢၼ်ႁၵ်ႉ ဢမ်ႇလႆႈငိူဝ်ႈလေႃႇ ဢၼ်ငိူဝ်ႈၼၼ်ႉ ၵူၼ်းဢၼ်ဢမ်ႇႁၼ်ၵႃႈၶၼ်တၢင်းႁၵ်ႉၵူၺ်း။
ၸွင်ႇယၢမ်ႈပဵၼ်ယူႇႁိုဝ် ၵႂႃႇဢုပ်ႇတင်းဢူၺ်းၵေႃႉယဝ်ႉ ၶဝ်ၵေႃႈလၢတ်ႈဝႃႈ “မႂ်းပေႉမႃးငိူဝ်ႈ” ၵွပ်ႈယွမ်းပၼ်ၶဝ်သုတ်းႁူဝ်ၸႂ်ယဝ်ႉ။
တီႈတေႉ တၢင်းႁၵ်ႉဢမ်ႇယၢမ်ႈႁဵတ်းႁႂ်ႈၽႂ်ငိူဝ်ႈလေႃႇ တၢင်းႁၵ်ႉၸႅတ်ႈၼၼ်ႉ ပဵၼ်ၾိင်ႈယၢမ်ႈၵူၼ်းဢၼ်ယူႇၸၼ်ႉသုင်သုတ်းၼၼ်ႉယဝ်ႉ။
ယင်းတိုၵ်ႉယုမ်ႇယမ်ယူႇ သမ်ႉဝႃႈဢမ်ႇမီးသၢၵ်ႈသေႇသင်ၵေႃႈယဝ်ႉ၊ ယင်းတိုၵ်ႉယွမ်းႁပ်ႉလႆႈ သမ်ႉဝႃႈဢမ်ႇမီးသင်တွပ်ႇတႅၼ်း လႄႈ ယင်းဢမ်ႇသုတ်ႉႁူၼ် မိူဝ်ႈႁူႉဝႃႈမၼ်းႁဵတ်းႁႂ်ႈၸဵပ်းၵေႃႈယဝ်ႉ။
ထၢမ်တေႉ ပေႃးဝႃႈၵူၼ်းၵေႃႉၼိုင်ႈ ႁတ်းၸုၼ်ႉသုၼ်ႇတူဝ် တႃႇၽႂ်သေၵေႃႉၼၼ်ႉ ပိူၼ်ႈႁွင်ႉဝႃႈငိူဝ်ႈႁႃႉ၊ ဢမ်ႇၼၼ် ပဵၼ်ၸၼ်ႉပၢႆးၸႂ်ဢၼ်ၵူၼ်းႁၼ်သုၼ်ႇတူဝ်ၶဝ်ၶဝ်ႈဢမ်ႇထိုင်။
တၢင်းႁၵ်ႉ မၼ်းပဵၼ်လွင်ႈဢၼ်မီးလွင်ႈႁူမ်ႇလူမ်ႈလႄႈမီးတၢင်းသိူဝ်းၼၼ်ႉယဝ်ႉ။
တၢင်းႁၵ်ႉဢမ်ႇလႆႈယူႇၼႂ်းၸႂ် မၼ်းယူႇတီႈဢွၵ်းဢေႃ မိူဝ်ႈဢွၵ်းဢေႃလၢတ်ႈဝႃႈ ၼႆႉယဝ်ႉၵူၼ်းၵေႃႉဢၼ်ၸႂ်ႈတွၼ်ႈတႃႇသူ သမ်ႉဝႃႈမၼ်းဢမ်ႇပဵၼ်ၵႂႃႇလႆႈသေတႃႉ။
ၼၼ်ႉပွင်ႇဝႃႈ ၵူၼ်းၵေႃႉဢၼ်ႁၵ်ႉၼၼ်ႉ ဢမ်ႇၸႂ်ႈၵူၼ်းငိူဝ်ႈ ၵူၺ်းၵႃႈ ပဵၼ်ၵူၼ်းဢၼ်ဢွၵ်းဢေႃႁဵတ်းၵၢၼ်လီ။
ဢၼ်ႁၼ်ၶဝ်ႁဵတ်းလွင်ႈယွင်ႇယွင်ႇယူႇၽွင်ႈၼၼ်ႉၵေႃႈ ဢမ်ႇၸႂ်ႈဝႃႈပဵၼ်ၵူၼ်းငိူဝ်ႈ မၼ်းပဵၼ် လွၵ်းလၢႆးဢွၵ်းဢေႃ ႁဵတ်းၵၢၼ်တွၼ်ႈတႃႇထိင်းသိမ်းဝႆႉ လွင်ႈၸမ်ၸႂ်ၵၼ်ၼၼ်ႉယဝ်ႉ။
ၵွပ်ႈသင်လႄႈမိူၼ်ၺႃးလႅၼ်ၵႂႃႇလႃႇ ၵွပ်ႈပိူဝ်ႈမၢင်ပွၵ်ႈ ၵူၼ်းၵေႃႉဢၼ်ႁဝ်းႁၵ်ႉ ၶဝ်ဢမ်ႇလႆႈႁၵ်ႉႁဝ်းၶိုၼ်းလႄႈ ၶဝ်ႁၼ်တၢင်းႁၵ်ႉပဵၼ်ၶွင်လၢႆ ၶဝ်ဢဝ်လွင်ႈသႂ်ႇၸႂ်ႁဝ်းၵႂႃႇလႅၵ်ႈလွင်ႈယူႇလူမ်ၶဝ်ပႅတ်ႈ။
ၼၼ်ႉယဝ်ႉ မၼ်းမိူၼ်ႁၼ်ဝႃႈ ၵူၼ်းၵေႃႉဢၼ်ႁၵ်ႉၼၼ်ႉ ပဵၼ်ၵူၼ်းဢၼ်ယွမ်းသုမ်းပႅတ်ႈ။
ၵူၺ်းၵႃႈ ၵူၼ်းၵေႃႉဢၼ် ႁတ်းႁၵ်ႉ ႁတ်းပၼ် ႁတ်းယွမ်း ၼၼ်ႉပဵၼ်ၵူၼ်းဢၼ်မီးႁႅင်းယႂ်ႇတေႉယဝ်ႉ။
သင်ယၢမ်ႈသႂ်ႇၸႂ်ႁၵ်ႉၽႂ်သေၵေႃႉၵေႃႉၼၼ်ႉ ဢမ်ႇၸႂ်ႈယွၼ်ႉသူငိူဝ်ႈလေႃႇ သူမီးၼမ်ႉၵတ်ႉလိူဝ်သေဢၼ်ဝူၼ်ႉၼၼ်ႉလူးၵွၼ်ႇ။
တၢင်းႁၵ်ႉဢမ်ႇလႆႈႁဵတ်းႁႂ်ႈၽႂ်ငိူဝ်ႈလေႃႇ ၵူၼ်းၵေႃႉဢၼ်ဢမ်ႇမေႃႁၼ်ၵႃႈၶၼ်တၢင်းႁၵ်ႉၼၼ်ႉၵူၺ်းယဝ်ႉ လီဢီးလူ။
ၵၢၼ်ယွမ်းပၼ်ၼၼ်ႉ ပဵၼ်ဢဵၼ်ႁႅင်း ဢမ်ႇၸႂ်ႈလွင်ႈဢူၼ်ႈဢွၼ်ႇ၊ မိူဝ်ႈလႂ်သူမီးႁၵ်ႉၼၼ်ႉ ပဵၼ်မိူဝ်ႈဢၼ်သူမီးႁႅင်းဢၼ်ၵႅၼ်ႇၶႅင်တေႉယဝ်ႉ။
သင်ဝႃႈလူမႃးထိုင်တီႈၼႆႈယဝ်ႉ သူပဵၼ်ၵူၼ်ဢၼ်မီးႁူဝ်ၸႂ်တေႉဢိူဝ်ႈ။
သင်ဝႃႈထုၵ်ႇၶဝ်ပွႆႇၽႃႈ ဢမ်ႇၸမ်ပဵၼ်ဝႃႈ တေလႆႈလႅၵ်ႈလၢႆႈပဵၼ်ၵူၼ်းဢမ်ႇမေႃႁၼ်ၸႂ်ပိူၼ်ႈလေႃႇ။
ႁႂ်ႈႁူႉဝႆႉဝႃႈ ၵူၼ်းၵေႃႉဢၼ်ပၼ်တၢင်းႁၵ်ႉလႆႈတၢၼ်ႇၼႆႉၼၼ်ႉ ၸိူင်ႉႁိုဝ်ၵေႃႈမၼ်းမီးၵႃႈၶၼ်ယူႇယဝ်ႉ။
ယႃႇၵူဝ်တေႁၵ်ႉၽႂ်ထႅင်ႈၼႃႈ ယွၼ်ႉသူဢမ်ႇလႆႈငိူဝ်ႈ သူမီးႁူဝ်ၸႂ် ဢၼ်ၽႂ်ၵေႃႈၶႂ်ႈလႆႈယဝ်ႉ လိူဝ်သေဝႃႈမၢင်ၵေႃႉၼၼ်ႉ ၶဝ်ဢမ်ႇၵိုင်ႇထိူၵ်ႈၵူၺ်း။
ပိၼ်ႇ-ငဝ်မွင်မိုတ်းမူဝ်း
