ၶႅပ်းႁၢင်ႈဢၼ်ၼႆႉ

ပွင်ႈၵႂၢမ်းႁူဝ်ၼႆႉ မၼ်းၶႂ်ႈၶႅမ်ႉဝႆႉလႄႈ ဝူၼ်ႉဝႃႈမၼ်းတေပၼ်တွၼ်ႈသွၼ်လီ တွၼ်ႈတႃႇပေႃႈမႄႈၸိူဝ်းမီးလုၵ်ႈၶဝ်ၼႆလႄႈ လႆႈပိၼ်ႇမႃးၶႃႈဢေႃႈ။

မိူဝ်ႈၶူးသွၼ်လုၵ်ႈဢွၼ်ႇႁူင်းႁဵၼ်းၽၢၵ်ႇၵေႃႉၼိုင်ႈၼၼ်ႉ လႆႈႁၼ်ၶႅပ်းႁၢင်ႈဢၼ်ၼႆႉၼႆ မၼ်းလၢတ်ႈႁႂ်ႈလုၵ်ႈဢွၼ်ႇၼၼ်ႉ ၵႂႃႇၸူးႁူင်းယႃပၢႆးၸႂ်ၵမ်းလဵဝ်ၼႆဝႃႇ။

တူၺ်းႁၢင်ႈၼႆႉတႄႉ မၼ်းဢမ်ႇႁၼ်မီးသင် မၼ်းၵေႃႈပဵၼ်ႁၢင်ႈၸၼ်ၸိူင်ႉၼၼ်ၵူၺ်း၊ ၵူၺ်းၵႃႈ ပေႃးဝႃႈၽၢႆႇပၢႆးၸၼ်ႁၢင်ႈၼႆၸိုင် လုၵ်ႈဢွၼ်ႇတၢင်ႇၵေႃႉၼၼ်ႉ မၼ်းမီးႁၢင်ႈဢၼ်ၸိုၼ်ႈပၢင်ႇသႂ်၊ ဢၼ်သိူဝ်းၸႂ် ၵူၺ်းၵႃႈ ႁၢင်ႈဢၼ်မီးႁူဝ်ၶေႃႈဢၼ်ဝႃႈ “ႁိူၼ်းၶွင်ႁဝ်း” ၼႆၼၼ်ႉသမ်ႉ တီႈလုၵ်ႈဢွၼ်ႇၵေႃႉၼႆႉ ပဵၼ်ႁၢင်ႈဢၼ်ၼႄပၼ်လွင်ႈတဵတ်ႇယဵၼ်ငႅဝ်မွင်၊ ၼႂ်းႁၢင်ႈဢၼ်မီးၵမ်ႁႅင်ႈသီလမ်ၵူၺ်းလႄႈ တူၼ်ႈမႆႉႁႅင်ႈႁဵဝ်ႇ ၵူၼ်းၼႂ်းႁၢင်ႈၵေႃႈဢမ်ႇမီးတၢင်းယုမ်ႉသင်၊ တီႈႁိူၼ်းလင်ၼၼ်ႉၵေႃႈ မီးပေႃႈလႄႈမၼ်းၵူၺ်း ဢမ်ႇမီးမႄႈယူႇၸွမ်း။

ၵေႃႉပဵၼ်မႄႈၵေႃႈဝူၼ်ႉယူႇဝႃႈ လုၵ်ႈဢွၼ်ႇမၼ်းဢမ်ႇတွၼ်ႉၸႃႉတေႃႇ ဢမ်ႇတွၼ်ႉထဵင်သင်၊ ယွၼ်ႉၶေႃႈပၼ်ၾၢင်ႉၶူးၼၼ်ႉသေ မၼ်းၸင်ႇလႆႈဢဝ်လုၵ်ႈဢွၼ်ႇမၼ်းၵႂႃႇၸူးမေႃယႃ မိူဝ်ႈလႆႈႁူႉၶေႃႈတွပ်ႇယဝ်ႉၵေႃႈ ၸႂ်ပေႃးဢမ်ႇလီလႆႈယဝ်ႉ။

မေႃယႃပၢႆးၸႂ်ၶဝ်ၵေႃႈ သပ်းသေးၼႄပၼ်ၼႂ်းႁၢင်ႈဢၼ်ၼၼ်ႉဝႃႈ

ၵၢၼ်ၸႂ်ႉသီလမ်မဵဝ်းလဵဝ်ၵူၺ်းၼၼ်ႉ ၼႄပၼ်လွင်ႈဝႃႈ ဢမ်ႇမီးတၢင်းသိူဝ်း

ၽၵ်းတူဢၼ်ပိၵ်ႉဢိုတ်းဝႆႉ ႁူးလႅင်းဢၼ်ပိုတ်ႇဝႆႉၼၼ်ႉၵေႃႈ လၢတ်ႈထိုင် လွင်ႈဢမ်ႇႁူမ်ႇလူမ်ႈတီႈဢၼ်ထုၵ်ႇလီမီးလွင်ႈဢုၼ်ႇၸႂ် မီးလွင်ႈၶႂ်ႈပၢႆႈဢွၵ်ႇႁိူၼ်း။

ဢၼ်ဢမ်ႇမီးႁၢင်ႈမႄႈယူႇၼႂ်းၶႅပ်းႁၢင်ႈၼၼ်ႉၵေႃႈ ဢမ်ႇၸႂ်ႈယွၼ်ႉလိုမ်း ပဵၼ်ယွၼ်ႉ ငိူင်ႉဝႄႈၽႂ်သေၵေႃႉ ဢၼ်ႁဵတ်းႁႂ်ႈမၼ်းယူႇဢမ်ႇလူမ်ၸႂ်လႆႈ။

ၵမ်းလိုၼ်း မႄႈလုၵ်ႈဢွၼ်ႇၼၼ်ႉၵေႃႈ ယွမ်းႁပ်ႉဝႃႈ ၸဵမ်မိူဝ်ႈလုၵ်ႈၶဝ်ႈႁဵၼ်း မၼ်းၵေႃႈလႆႈၸႂ်ႉႁႂ်ႈလုၵ်ႈမၼ်း ႁဵၼ်း၊ ဢၢၼ်ႇ၊ တႅမ်ႈ ၼမ်ႉပူၼ်ႉၼႃႇ ဢမ်ႇပၼ်ၶၢဝ်းယၢမ်းလုၵ်ႈဢွၼ်ႇလႆႈလဵၼ်ႈ မိူၼ်ၼင်ႇလုၵ်ႈဢွၼ်ႇတၢင်ႇၵေႃႉၼၼ်ႉလႆႈ။

လွင်ႈၼႆႉမၼ်းသွၼ်ႁႂ်ႈႁူႉဝႃႈ လုၵ်ႈဢွၼ်ႇဢမ်ႇၸၢင်ႈလၢတ်ႈၼႄတၢင်းတုၵ်ႉဢွၵ်ႇမႃးလႆႈတင်းသဵင်ႈ ၵူၺ်းၵႃႈ တေသူင်ႇဢွၵ်ႇမႃးၼႄ တီႈဢၼ်ၶဝ်ႁဵတ်းယူႇၼၼ်ႉယဝ်ႉ။

မၢင်ပွၵ်ႈၶႅပ်းႁၢင်ႈယူဝ်းယူဝ်းဢွၼ်ႇၵူၺ်းၼႆၵေႃႈ ၸၢင်ႈၶေးပဵၼ်သဵင်ဢၼ်ဢွၵ်ႇမႃးတီႈႁူဝ်ၸႂ်ၶဝ်ၼၼ်ႉလႆႈယဝ်ႉ။

ပိၼ်ႇ – ငဝ်မွင်မိုတ်းမူဝ်း