ၶၢဝ်းယၢမ်းပွတ်းပွတ်းဢွၼ်ႇၵူၺ်း

ၸွင်ႇႁူႉႁိုဝ် လုၵ်ႈဢွၼ်ႇၼၼ်ႉမၼ်းၸဵဝ်းၵေႃႉယႂ်ႇၼႃႇ မိူၼ်မိူဝ်ႈဝႃးတိုၵ်ႉႁႃပဵၼ်လုၵ်ႈဢွၼ်ႇလႅင်ဢၼ်ႁွင်ႉႁႆႈႁႃႁဝ်းယူႇတႃႇသေႇၼၼ်ႉ ယၢမ်းၼႆႉ ၶဝ်ၵေႃႈလႅၼ်ႈလႆႈယဝ်ႉ မိူဝ်ႈၽုၵ်ႈၵေႃႈၵေႃႉယႂ်ႇထႅင်ႈယဝ်ႉ။

ၽွင်းယၢမ်းဢၼ်ၶဝ်လူဝ်ႇႁဝ်း မၼ်းဢမ်ႇမီးႁိုင်တေႉဢိူဝ်ႈ ၶၢဝ်းယၢမ်းပွတ်းပွတ်းဢွၼ်ႇၵူၺ်း ဢၼ်ၶဝ်တေလုၵ်ႉမႃးႁွင်ႉႁႃ ပေႃႈ မႄႈ ပဵၼ်ၵေႃႉဢွၼ်တၢင်းသုတ်း၊ ၶဝ်တေဢႃႈၶႅၼ်ႁႂ်ႈႁဝ်းဢုမ်ႈ ပႃးလူၺ်ႈသၢႆတႃဢွၼ်ႈဝွၼ်းယူႇ လႄႈ ၶဝ်တေၼင်ႈတၵ်းႁဝ်းဢမ်ႇမေႃဢၢႆ ၊ ၶႆႈလၢတ်ႈၼႄၵူႈလွင်ႈ ဢမ်ႇဝႃႈမႅင်းတူဝ်လဵၵ်ႉဢွၼ်ႇ တေႃႇထိုင်လွင်ႈၼွၼ်းၾၼ်ဢၼ်ယိုင်ႈယႂ်ႇၶွင်ၶဝ်။

ဝၼ်းၼိုင်ႈ ၵူႈလွင်ႈၵေႃႈလႆႈလႅၵ်ႈလၢႆႈၵႂႃႇ..

လုၵ်ႉတီႈၶဝ်ယၢမ်ႈၼွၼ်းၵွတ်ႇႁဝ်းၵူႈၶိုၼ်းၼၼ်ႉ ဝၼ်းၼိုင်ႈၵေႃႈတေၶႂ်ႈၼွၼ်းႁင်းၵူၺ်းယဝ်ႉ၊

လုၵ်ႉတီႈ ၶဝ်ၶႂ်ႈၵႂႃႇလႂ်မႃးလႂ်ၸွမ်းႁဝ်းၼၼ်ႉ ဝၼ်းၼိုင်ႈ ၶဝ်ၵေႃႈတေမီးဢူၺ်းၵေႃႉဢၼ်ၶႂ်ႈၵႂႃႇၸွမ်း။

လုၵ်ႉတီႈ လွင်ႈဢၼ်ၶဝ်ယၢမ်ႈလၢတ်ႈၼႄၵူႈလွင်ႈၼၼ်ႉ ဝၼ်းၼိုင်ႈၶဝ်ၵေႃႈတေမီးလွင်ႈဢၼ်ၵဵပ်းဝႆႉယူႇၼႂ်းၸႂ်ယဝ်ႉ။

ဝၼ်းၼိုင်ႈၶဝ်ၵေႃႈတေၵေႃႉယႂ်ႇပဵၼ်ၵူၼ်းလူင်လႄႈ မီးသဵၼ်ႈတၢင်းပဵၼ်ၶွင်တူဝ်ၵဝ်ႇ၊ မီးၸၢတ်ႈပၢၼ်ႁင်းၶဝ် ဢၼ်တေလႆႈသိုပ်ႇၵႂႃႇတၢင်းၼႃႈ။

ဢွင်ႈဢူၵ်းပေႃႈမႄႈၼၼ်ႉၵေႃႈ ပဵၼ်တီႈပိုင်ႈဢိင်ၸႂ်ၶဝ် မၢင်ပွၵ်ႈမၢင်လႂ်ၵူၺ်းယဝ်ႉ။

မိူဝ်ႈဝၼ်းဢၼ် ၶဝ်လူဝ်ႇႁဝ်း၊ ဝၼ်းဢၼ်ၶဝ်ယိုၼ်ႈမိုဝ်းႁႂ်ႈႁဝ်းယိပ်း၊ ဝၼ်းဢၼ်ၶဝ်ယင်းၶႂ်ႈႁႂ်ႈႁဝ်းၼွၼ်းၵွတ်ႇ၊ ဝၼ်းဢၼ်ၶဝ်ၶႂ်ႈလဵၼ်ႈၸွမ်းႁဝ်း ၶႂ်ႈယူႇၸွမ်းႁဝ်းယူႇၼၼ်ႉ ႁဵတ်းပၼ်ၶဝ်တဵမ်တီႈ။

ႁဝ်းၵေႃႈတေလႆႈၵေႃႉယႂ်ႇၵႂႃႇၸွမ်းၶဝ် ၵွတ်ႇၶဝ်ႁႂ်ႈၼမ်မႃးထႅင်ႈ၊ ယူႇၸွမ်းၶဝ်ႁႂ်ႈႁိုင်မႃးထႅင်ႈ၊ ႁပ်ႉထွမ်ႇၶဝ်ႁႂ်ႈၼမ်မႃး ၶၢဝ်းယၢမ်းၸိူဝ်းၼၼ်ႉ မၢႆတွင်းဝႆႉယူႇၼႂ်းၸႂ်။

ယႃႇၵုမ်ႇပႂ်ႉမိူဝ်ႈၽုၵ်ႈယူႇယဝ်ႉ ယွၼ်ႉဝၼ်းမိူဝ်ႈၼႆႉ တေယဵၼ်းပဵၼ်မိူဝ်ႈဝႃးၵႂႃႇယဝ်ႉ။

ၸႂ်ႉၶၢဝ်းယၢမ်းႁႂ်ႈလီလိူဝ်ပိူၼ်ႈ၊ ႁၵ်ႉၶဝ်ၼမ်လိူဝ်ပိူၼ်ႈ ၶၢဝ်းယၢမ်းၼႆႉ မၼ်းႁူၼ်ပွၵ်ႈၶိုၼ်းမႃးဢမ်ႇလႆႈယဝ်ႉ။

ပိၼ်ႇ-ငဝ်မွင်မိုတ်းမူဝ်း

ၵႂၢမ်းလႅၼ်ၽၢင်း

သိုဝ်ႉၵိၼ်ဢမ်ႇမူတ်း ၵူတ်ႉၵိၼ်ဢမ်ႇႁိုင် မိူဝ်ႈထိုင်ၶၢဝ်းယၢမ်း မၼ်းတေၼႄဢွၵ်ႇမႃးၵူၺ်း ၽႂ်ထုၵ်ႇလီလႆႈႁပ်ႉလွင်ႈယုမ်ႇယမ်။ ၵႂၢမ်းလႅၼ်ၽၢင်းၼၼ်ႉ မၼ်းတုမ်ႉတိူဝ်ႉလႆႈၶၢဝ်းယၢဝ်းယဝ်ႉ သမ်ႉဝႃႈဝၼ်းၼိုင်ႈ ၶႂ်ႈလၢတ်ႈလွင်ႈတေႉယူႇၵေႃႈ ဢမ်ႇမီးၼမ်ႉၼၵ်းႁႂ်ႈပိူၼ်ႈပေႃးယုမ်ႇၸႂ်လႆႈ။ ၵႂၢမ်းယွၵ်ႇလႅၼ်...

ၵႂၢမ်းလၢတ်ႈဢၼ်ႁဵတ်းႁႂ်ႈလီထွမ်ႇ

သင်ထူပ်းၺႃးၵူၼ်းတိုၵ်ႉမွင်ၸႂ်ယူႇ ဢမ်ႇလၢတ်ႈဝႃႈ “သူတေလႆႈၵႅၼ်ႇၶႅင်ဢိူဝ်ႈ ၽႂ်ၵေႃႈမီးလွင်ႈဢမ်ႇလီၵၼ်ၵူႈၵေႃႉယဝ်ႉ” သင်ၸၢမ်းလၢတ်ႈဝႃႈ“ႁဝ်းဢမ်ႇႁူႉသူလႆႈထူပ်းလွင်ႈသင်မႃးလၢႆလၢႆ သူပဵၼ်ယူႇယၢမ်းလဵဝ်ၼႆႉလႆႈၵေႃႈ ၶႅၼ်ႇၼႃႇယဝ်ႉဢိူဝ်ႈၼႃႈ” သင်ထူပ်းၺႃးၵူၼ်းၵေႃႉဢၼ်ဝူၼ်ႉၽိတ်းယူႇ ဢမ်ႇလၢတ်ႈဝႃႈ “လၢတ်ႈယဝ်ႉဝႃႈယႃႇႁဵတ်းၸိူင်ႉၼၼ်ၼႆ” သင်လၢတ်ႈဝႃႈ “ၽႂ်ၵေႃႈယၢမ်ႈႁဵတ်းၽိတ်းၵၼ်ၵူႈၵေႃႉယဝ်ႉ ၵူၺ်းၵႃႈ လွင်ႈဢၼ်သူႁတ်းယွမ်းႁပ်ႉမၼ်းၼႆႉၵူၺ်းၵေႃႈ...

ပၢႆးဝူၼ်ႉၵူၼ်းၶႂ်ႈၶိုၼ်ႈယႂ်ႇ

ပေႃးၶႂ်ႈႁႂ်ႈတူဝ်ၵဝ်ႇပဵၼ်ၵူၼ်းလီၼၼ်ႉ ဢမ်ႇလူဝ်ႇလႆႈပႂ်ႉႁႅင်းၸႂ်တီႈၽႂ်သေၸင်ႇတႄႇၵေႃႈလႆႈ ႁဝ်းၸၢင်ႈသၢင်ႈဢဝ်ႁင်းၵူၺ်းလႆႈ ယူႇတီႈတၢင်းဝူၼ်ႉႁဝ်းၵူၺ်း။ ယုမ်ႇယမ်ဝႃႈတူဝ်ၵဝ်ႇ မီးလွင်ႈၶိုပ်ႈၼႃႈလႆႈတႃႇသေႇ ဢမ်ႇဝူၼ်ႉဝႃႈတူဝ်ၵဝ်ႇဢမ်ႇၵတ်ႉၶႅၼ်ႇ မၼ်းယင်းပႆႇထိုင်ၶိင်ႇထိုင်ၶၢဝ်းမၼ်းၵူၺ်း ၵူၼ်းၶႅၼ်ႇၵေႃႈပဵၼ်ၵူၼ်းၵေႃႉဢၼ်ႁတ်းႁဵတ်းႁတ်းၸၢမ်း ဢမ်ႇၵူဝ်ဝႃႈတေၽိတ်း...