ၵူၼ်းၵေႃႉဢၼ်ႁၼ်လွင်ႈလီလႄႈလွင်ႈဢမ်ႇလီႁဝ်း ၵူၺ်းၵႃႈၶဝ်ယင်းတိုၵ်ႉယူႇၸွမ်းႁဝ်းယူႇၼၼ်ႉ မၼ်းၵေႃႈပဵၼ်ဢူၺ်းၵေႃႉလီတေႉယဝ်ႉ။
တႃႇပဵၼ်ဢူၺ်းၵေႃႉတင်းၽႂ်သေၵေႃႉၵေႃႉ ၼႂ်းၶၢဝ်းယၢမ်းလီၼၼ်ႉ မၼ်းဢမ်ႇၸႂ်ႈလွင်ႈယၢပ်ႇ ၽႂ်ၵေႃႈ ယုမ်ႉၶူဝ်ၵႂႃႇၸွမ်းၵၼ်လႆႈ ၼႂ်းဝၼ်းဢၼ်ၵူႈလွင်ႈသိူဝ်းလႄႈလူမ်ၸႂ် ၽႂ်ၽႂ်ၵေႃႈ ၶႂ်ႈယူႇၸွမ်းႁဝ်းမိူဝ်းႁဝ်းသိူဝ်းၸႂ်ယူႇ။
ၵူၺ်းၵႃႈ ဢူၺ်းၵေႃႉဢၼ်တိုၵ်ႉယူႇမိူဝ်ႈႁဝ်းထူပ်းလွင်ႈဢမ်ႇလီ ၸႂ်လမ် ဢမ်ႇမီးလွင်ႈမီးတၢင်း၊ လၢတ်ႈၵႂၢမ်းဢမ်ႇလီထွမ်ႇ ဝၼ်းဢၼ်ႁဝ်းယဵၼ်ႁၢႆၵႂႃႇ ဢမ်ႇၶႂ်ႈဢုပ်ႇၽႂ် ဝၼ်းဢၼ်ႁဝ်းႁဵတ်းၽိတ်း ႁဵတ်းဢမ်ႇမိူၼ်ၸႂ်ၼၼ်ႉ သင်ၵူၼ်းၵေႃႉၼၼ်ႉယင်းတိုၵ်ႉယူႇဢုပ်ႇလၢတ်ႈၸွမ်း သမ်ႉဝႃႈႁၼ်လွင်ႈဢမ်ႇလီႁဝ်းမူတ်းယဝ်ႉၵေႃႈ တိုၵ်ႉႁပ်ႉထွမ်ႇ ၼႂ်းဝၼ်းဢၼ်ႁဝ်းဢမ်ႇမီးသင်လီသေဢိတ်းၼၼ်ႉ ယင်းယဵၼ်ႉၵၼ်ႈလႆႈ လႄႈ ဢမ်ႇပွႆႇႁႂ်ႈႁဝ်းႁၢင်ႇၵၼ်ၵႂႃႇလႆႈ ၵူၼ်းၸိူင်ႉၼႆ ၶဝ်ႁွင်ႉဝႃႈ “ဢူၺ်းၵေႃႉလီ ပဵၼ်ၵူၼ်းလီတေႉတေႉ”။
မိူဝ်ႈလႆႈၸိုဝ်ႈဝႃႈ ဢူၺ်းၵေႃႉလီၼႆၼၼ်ႉ ဢမ်ႇၸႂ်ႈယူႇၸွမ်းမိူဝ်ႈမီးတၢင်းသိူဝ်းၵူၺ်း ၵူၺ်းၵႃႈပဵၼ်ၵူၼ်းဢၼ်ယူႇၸွမ်းႁဝ်း မိူဝ်ႈႁဝ်းပဵၼ်ၵူၼ်းဢမ်ႇလီၼၼ်ႉလႆႈ ပဵၼ်ၵူၼ်းဢၼ်ႁူႉၸၵ်းႁဝ်းၵူႈလွင်ႈယဝ်ႉ ဢမ်ႇၽၢတ်ႇၵႂႃႇတၢင်းလႂ်။
သင်မီးဢူၺ်းၵေႃႉၸိူင်ႉၼႆၸိုင် ႁႂ်ႈထိင်းသိမ်းမၼ်းဝႆႉလႄႈ ၵွပ်ႈပိူဝ်ႈၼႂ်းၶူင်းၵၢင်ၼႆႉ မီးလွင်ႈၸမ်ၸႂ်ၸူဝ်ႈၶၢဝ်းၼမ်ၼႃႇ။
ပိၼ်ႇ-ငဝ်မွင်မိုတ်းမူဝ်း
