ဢမ်ႇထၢင်ႇသေလႆႈႁၵ်ႉမႅၼ်ႈယဝ်ႉ တၢင်းႁၵ်ႉၼၼ်ႉသမ်ႉပဵၼ်တၢင်းၽိတ်းယႂ်ႇလူင်ဝႆႉယူႇဢိူဝ်ႈ။
တွၼ်ႈၼိုင်ႈ
လုၵ်ႈဢွၼ်ႇဢသၢၵ်ႈသိပ်းသီႇ ပဵၼ်သၢဝ်သိၵ်းႁိၵ်း ပဵၼ်လုၵ်ႈဢွၼ်ႇဝႃႈငႆၢႈလႅတ်းသႅဝ်းလၵ်းလႅမ်သႅမ်းၵႃႈ ၸွႆႈၵၢၼ်ၼႃႈႁိူၼ်းတႃယေး ႁဵတ်းလႆႈၵူႈၸိူဝ်ႉၵူႈလွင်ႈ လၢတ်ႈငႆၢႈထွမ်ႇၵႂၢမ်း။ ယၢမ်းၶမ်ႈၶိုၼ်းလပ်းသိင်ႇၽွင်းၼွၼ်းလပ်းမွႆႈ သဵင်ယိင်းဢွၼ်ႇၵၢၼ်းၶဝ်ႈမႃးၼွၼ်းၶူတ်းမႄႈၶဝ်သေ
“မႄႈ ယိင်းၶႂ်ႈၼွၼ်းၸွမ်းမႄႈ”
“မႃးလႄႈမႄႈ”
“မႄႈဢႃႈ..”
“ႁိုမ်..”
“မႄႈႁဝ်းၵႂႃႇပၢင်ၶႅၵ်ႇပႃႈသူၺ်ႇၶဝ်ယူႇႁႃႈ”
“ၵႂႃႇဢိူဝ်ႈ ႁႅင်ႉႁင်”
“မႄႈႁဝ်းလူးဢမ်ႇဝူၼ်ႉၶႂ်ႈမီးၼႃႈႁိူၼ်းထႅင်ႈႁႃႉ”
သဵင်ၵေႃႉပဵၼ်မႄႈယဵၼ်ၵႂႃႇ
“မီးလုၵ်ႈၵေႃႉလဵဝ်ၵူၺ်းၵေႃႈလႆႈယဝ်ႉ”
“မႄႈ..”
“ႁိုမ်..”
“ယိင်းၶႂ်ႈႁူႉမဵဝ်းၼိုင်ႈၵူၺ်းဢေႃႈ”
“ၶႂ်ႈႁူႉဢီႈႁင်လႃႇ”
“မႄႈ..ဢူႈႁဝ်းဢမ်ႇပွၵ်ႈမႃးႁႃႁဝ်းယဝ်ႉၸွင်ႇၸႂ်ႈႁိုဝ်”
“ဢိုမ်ႈ…”
“ဢူႈႁဝ်းပဵၼ်ၵူၼ်းၸိူင်ႉႁိုဝ်လႃႇ”
“ဢူႈသူႁႃႉ…”
သဵင်မႄႈယဵၼ်ၵႂႃႇယဝ်ႉ ၼႂ်းတၢင်းဝူၼ်ႉမႄႈၼၼ်ႉၵေႃႈ ႁၼ်ႁၢင်ႈမၼ်းမႃးယူႇယဝ်ႉ။
မိူဝ်ႈပူၼ်ႉမႃး သိပ်းႁႃႈပီ
ၼႂ်းသႅင်ႇၶဝ်ႈၽၵ်းဝၢၼ် ၸဝ်ႈလူတ်ႉၸဝ်ႈၵႃးၵႆႉမႃးၵိုတ်းလိုဝ်ႈၵိၼ်ယူႇတႃႇသေႇ၊ မိူဝ်ႈႁူႉဝႃႈမီးသၢဝ်ၵေႇဢမ်ႇတေႇၼႃႈႁိူၼ်း မၢဝ်ႇၼုမ်ႇပေႃႈႁၢင်ႉပေႃႈႁိူၼ်းၵႆႉမႃးတၵ်ႉမႃးထၢမ်ဢုပ်ႇၶႆႈ ဢမ်ႇလႆႈတူဝ်ဢမ်ႇႁူႉၸႂ်ၼႆၵေႃႈ ႁႂ်ႈပေႃးလႆႈယၵ်ႉႁၼ် ပၼ်တၢင်းသိူဝ်းၸႂ်ၸူဝ်ႈၵႅပ်ႉၵမ်းယူႇဢိူဝ်ႈ။
ၶူပ်ႇမိူဝ်ႈယၢမ်းၼၼ် ၸင်ႇသမ်ႉမီးမၢဝ်ႇၼုမ်ႇႁၢင်ႈလဝ်း ဢသၢၵ်ႈဢမ်ႇလဵၵ်ႉဢမ်ႇယႂ်ႇ ၶႂ်ႈတၢၼ်ႇပဵင်းၵၼ် ၸၼ်ဢဝ်ၸႂ်ယိင်း ထိင်းဝႆႉဢမ်ႇမၼ်ႈ လွင်ႈလၢတ်ႈလွင်ႈၸႃ လွင်ႈသႂ်ႇၸႂ်လုမ်းလႃး လွင်ႈမေႃဢွၼ်ႈမေႃဝွၼ်း သၼ်ႇၶွၼ်းၸႂ်ပႃးၵႂႃႇၸွမ်းတင်းသဵင်ႈတင်းလူင်ယဝ်ႉ။
“သူ..မႃးယဝ်ႉႁႃႉ” တီႈၼႂ်းသႅင်ႇၵူၼ်းႁၢင်ႇဢမ်ႇပေႃးမီး
“မိူဝ်ႈၼႆႉၵူၼ်းႁၢင်ႇၼႃႇၼေႃ”
“ၼၼ်ႉယဝ်ႉ..ဢမ်ႇၸႂ်ႈၶိင်ႇၸႂ်ႈၶၢဝ်းမၼ်းယဝ်ႉလႄႇ”
“ႁိူဝ်ႉယူႇႁႃႉသူ”
“ဢိုမ်ႈ..သူလူး”
“မိူဝ်ႈၵႆႈတႄႉႁိူဝ်ႉယူႇ..ႁၼ်သူယဝ်ႉၵေႃႈႁႆၢမူတ်းယဝ်ႉ”
တီႈၼႂ်းသႅင်ႇၼၼ်ႉၵေႃႈ ဢမ်ႇၵွမ်ႉဝႃႈမီးၶႃၵူၺ်း လုၵ်ႈလဵင်ႉဢွမ်သႂ်ၼၼ်ႉၵေႃႈ ႁူႉၵၼ်မူတ်းယဝ်ႉဝႃႈၶႃပဵၼ်ၸူႉၵၼ်ၼႆ။
ဢွမ်သႂ်ၼင်ႈယူႇတေႃႇၼႃႈၸွမ်ၾႃႉၼၼ်ႉသေ ယၵ်ႉတူၺ်းၼႃႈၵေႃႉႁၵ်ႉမၼ်းဢၼ်တိုၵ်ႉၵိၼ်ၶဝ်ႈယူႇၼၼ်ႉလႄႈ ဢဝ်ၸဝ်ႈတူဝ်မၼ်းသမ်ႉပေႃးဢမ်ႇႁတ်းတေႃႇၼႃႈၶိုၼ်းယဝ်ႉ။
“ၼႃႈႁဝ်းမီးသင်လႃႇ”
“ႁဝ်းဝႃႈ ယိင်ႈတူၺ်းယိင်ႈၶႅၼ်းၶႂ်ႈႁႂ်ႈမႃးႁဵတ်းလုၵ်ႈၶူၺ်မႄႈႁဝ်းၵူၺ်းယဝ်ႉ”
“ယႃႇယဝ်ႉၵၼ်လဵၼ်ႈလႄႈ ပေႃးမိူဝ်းႁဵတ်းတႄႉတေႁဵတ်းႁိုဝ်”
“မိူဝ်းထၢမ်တီႈမႄႈတူၺ်းလႄႈ” သႆၢတႃလႄႈသဵင်လၢတ်ႈဢွမ်သႂ်ၼၼ်ႉဢမ်ႇၸႂ်ႈယဝ်ႉလဵၼ်ႈယဝ်ႉလႄႈ သမ်ႉပေႃးဢဝ်ၶူၼ်တုမ်ႇၼိူဝ်ႉၵီႈမႃးယူႇဢိူဝ်ႈ။
“မၼ်းဢမ်ႇဝႆးၼႃႇႁႃႉ”
“ဢမ်ႇၼႃ..သၢမ်လိူၼ်ၸမ်ယဝ်ႉလူး ႁဝ်းၵေႃႈဢသၢၵ်ႈယႂ်ႇယဝ်ႉ ဢမ်ႇၶႂ်ႈပႂ်ႉယဝ်ႉဢိူဝ်ႈ ပေႃးထူပ်းၵူၼ်းထုၵ်ႇၸႂ်ၵေႃႈ ဢမ်ႇၶႂ်ႈပွႆႇယဝ်ႉၼႃႈ”
လၢတ်ႈဢဝ်တီႈၼၼ်ႈသမ်ႉပေႃးယဵၼ်ၵႂႃႇတင်းႁိုင်
“လဵပ်ႈႁဵၼ်းၵၼ်ၵႂႃႇတူၺ်းထႅင်ႈဢိတ်ႉၼိုင်ႈၵွၼ်ႇလႄႈ”
“ၼၼ်ႁႃႉ..”
“ဢိုမ်ႈ” သႆၢတႃမွင်မွင်ယၵ်ႉတူၺ်းၸူး ဢွမ်သႂ်သေ ယိပ်းဢဝ်မိုဝ်းယဝ်ႉ “ႁဝ်းႁၵ်ႉသူဢိူဝ်ႈၼႃႈ ဢွမ်”
ၵႂၢမ်းၶေႃႈၼၼ်ႉၵူၺ်းၵေႃႈ သမ်ႉပေႃးဢဝ်ဢွမ်သႂ်ၸႂ်ဢူၼ်ႈဢွၼ်ႇသေထွမ်ႇၵႂၢမ်းမၼ်းၵႂႃႇယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ
