တွၼ်ႈသွင်
ဝၼ်းၶိုၼ်းပူၼ်ႉၵႂႃႇ ဢုပ်ႇလၢတ်ႈၵႂၢမ်းႁၵ်ႉ ၶၢၼ်တၵ်ႉၵႂၢမ်းဝၢၼ် ယၢမ်းဢၼ်ၸႂ်ႁၵ်ႉ ယွမ်းပၼ်ၵူႈၸိူဝ်း ယွၼ်ႉတေပဵၼ်ၵူႈၸၢတ်ႈပၢၼ်လႆႈ ၽဝတင်းတူဝ်လႄႈႁူဝ်ၸႂ် ဢၢပ်ႈဝႆႉပၼ်ၵႂႃႇ ဝူၼ်ႉဝႃႈတေပဵၼ်ၼႃႈႁိူၼ်းမူၼ်းဢွၼ်ႇၼႆယူႇဢိူဝ်ႈ။
ႁိုင်မႃးၼင်ႇႁၢင်ႈတူဝ်ဢွၼ်ႇၵူမ်ပီး မိူၼ်တေႁူႉတူဝ်မႃးယဝ်ႉဝႃႈ ဢွမ်သႂ်ၸပ်းတွင်ႉယဝ်ႉဢိူဝ်ႈၼႆ။
သမ်ႉဝႃႈၸွမ်ၾႃႉ ဢမ်ႇလႆႈယူႇတီႈလဵဝ်ၵၼ်တင်းဢွမ်သႂ်သေတႃႉ သမ်ႉပဵၼ်ၸဝ်ႈၵႃး ၵႆႉၵႂႃႇၵႆႉမႃးလႄႈ မႃးလိုဝ်ႈမႃးသဝ်းယူႇတီႈႁိူၼ်းဢွမ်သႂ်ၶဝ်ၵူၺ်းသေ တီႈႁိူၼ်းၵေႃႈမီးမႄႈလႄႈဢွမ်သႂ်ၵူၺ်းၼၼ်ႉ ဢမ်ႇတေႇၼႃႈႁိူၼ်းၵၼ်ၼႆၵေႃႈ ၼပ်ႉသွၼ်ပဵၼ်လုၵ်ႈၶူၺ်ၶဝ်ၵႂႃႇယဝ်ႉ။
ၶမ်ႈၶိုၼ်းၸွမ်ၾႃႉဢွၵ်ႇတၢင်းမႃးတီႈႁိူၼ်း ဢွမ်သႂ်မႃးပိုတ်ႇၽုၺ်ႇၽၵ်းတူသေ
“ပၢတ်ႈၼႆႉႁႆၢၵႂႃႇႁိုင် ယူဝ်ဝႃႈတေဢမ်ႇမႃးယဝ်ႉ”
“ၸႂ်ထိုင်သူတေႉယဝ်ႉ” ၶဝ်ႈမႃးၵွတ်ႇဢဝ်ဢွမ်သႂ်သေယဝ်ႉ ဢုမ်ႈႁွပ်ႇၶဝ်ႈမိူဝ်းၵႂႃႇၼႂ်းႁိူၼ်းၼၼ်ႉယူႇ။
“သူတေမႃးလႆၢဝၼ်းလႃႇ”
“သူသမ်ႉတေပၼ်ႁဝ်းယူႇလႆၢဝၼ်း”
“ႁႂ်ႈသူယူႇတေႃႇၸူဝ်ႈဢမ်ႇလႆႈႁႃႉ”
“လႆႈဢေႃႈ”
“မိူဝ်ႈၽုၵ်ႈႁဝ်းၵၼ်ႇတေႃးမႄႈႁဝ်းသေၼေႃႈ ဢွၵ်ႇဝႃႇယဝ်ႉလူး”
“ဢဝ်သူဝႃႈ”
ယၢမ်းၵၢင်ၼႂ် ဢွမ်သႂ်ၵေႃႈၽိတ်ႈမွၵ်ႇၵူၼ်းထဝ်ႈၵူၼ်းၵႄႇမႃးတီႈႁိူၼ်းသေ ႁဵတ်းၶႅၵ်ႇၵႂႃႇလူၺ်ႈတီႈၸွမ်ၾႃႉဢမ်ႇႁူႉတူဝ်၊ ၸွမ်ၾႃႉ မိူၼ်ထုၵ်ႇတဵၵ်းတဵင်ဝႆႉလႄႈ မိူၼ်ဢမ်ႇတဵမ်ၸႂ်သေၵႃႈႁိုဝ် ၵူၺ်းၵႃႈႁၼ်ထိုင်ၼႃႈမႄႈဢွမ်သႂ်ၶဝ်လႄႈ မၼ်းၵေႃႈလႆႈယွမ်းၵႂႃႇ။
“သူၶႂ်ႈႁဵတ်းၶႅၵ်ႇပဵၼ်သင်လႄႈဢမ်ႇလၢတ်ႈႁဝ်း”
“ႁဝ်းယၢမ်ႈလၢတ်ႈယဝ်ႉ ၵူၺ်းၵႃႈသူၵေႃႈဝႃႈပႂ်ႉၵွၼ်ႇၼႆတိၵ်းတိၵ်း ႁဝ်းပႂ်ႉဢမ်ႇလႆႈယဝ်ႉ ႁဝ်းတေယွမ်းႁႂ်ႈမၼ်းပဵၼ်ၸိူင်ႉၼႆၵႂႃႇတိၵ်းတိၵ်းဢမ်ႇလႆႈ”
“သူၵေႃႈၶႂ်ႈႁဵတ်းၽႆၢႇလဵဝ်ၵူၺ်းပေႃးဢမ်ႇထၢမ်ၵၢင်ၸႂ်ႁဝ်းသေဢိတ်း”
“ပေႃးသူတေဢမ်ႇဢၢၼ်းႁဵတ်းၶႅၵ်ႇ သူသမ်ႉတေမႃးယူႇၸွမ်းႁဝ်းႁဵတ်းသင် ႁဝ်းၵေႃႈဢမ်ႇၶႂ်ႈသဵင်ႈၶၢဝ်းယၢမ်းမိူၼ်ၵၼ်”
“ဢမ်ႇၸႂ်ႈဝႃႈႁဝ်းတေဢမ်ႇႁဵတ်းလူးသူ”
“မိူဝ်ႈလႂ်လႃႇ”
“ထႅင်ႈဢိတ်ႉၼိုင်ႈ”
“ႁဝ်းၸပ်းတွင်ႉယဝ်ႉ..”
သဵင်ၸွမ်ၾႃႉလႆႈယဵၼ်ၵႂႃႇ လူၺ်ႈသီၼႃႈဢမ်ႇလီမႃးယဝ်ႉ
“သူဢမ်ႇလႆႈႁႄႉၵင်ႈႁႃႉ”
“ႁဝ်းလၢတ်ႈယဝ်ႉႁဝ်းဢမ်ႇၸၢင်ႈႁႄႉၵင်ႈ ၵိၼ်ယႃဢမ်ႇလႆႈ၊ သမ်းၵေႃႈဢမ်ႇလႆႈ”
“လႆၢလိူၼ်ယဝ်ႉ..”
“ၸမ်သၢမ်လိူၼ်ယဝ်ႉ”
“ႁဝ်းပႆႇၽွမ်ႉတႃႇတေမီးလုၵ်ႈၼႃ”
“သူသမ်ႉတေႁႂ်ႈႁဝ်းႁဵတ်းၸိူင်ႉႁိုဝ်”
“ဢဝ်ဢွၵ်ႇပႅတ်ႈလႄႈ”
“ႁၼ်ပုၼ်ႈသုၼ်ႇတူဝ် ပေႃးၼၼ်..သူၵေႃႈပၢတ်ႇပႅတ်ႈၶွင်သူဢဝ်လႄႈ တေဢမ်ႇလႆႈမီးလုၵ်ႈလႆႈ” လၢတ်ႈယဝ်ႉတိုပ်ႈတိၼ်ဢွၵ်ႇႁိူၼ်းၵႂႃႇၵမ်းလဵဝ်။
“သူ!!..ဢွမ်သႂ်!!”
ၼႅတ်ႈလမ်းၸွမ်းၵႂႃႇယဝ်ႉ။
တင်းၸႂ်လမ်သေဢွၵ်ႇႁိူၼ်းၵႂႃႇ ဢမ်ႇသူၼ်ၸႂ်မၼ်းယူႇယဝ်ႉ၊ မိူဝ်ႈၵႂႃႇတီႈသႅင်ႇ လုၵ်ႈၼွင်ႉမၼ်းလႆႈႁၼ် ဢွမ်သႂ်ၼႆၵေႃႈ ၼႃႈပေႃးဢမ်ႇၵီႈဢမ်ႇသိူဝ်းသေၵေႃႉ၊ ယၵ်ႉတူၺ်းၼႃႈဢွမ်သႂ်ယဝ်ႉ သွပ်ႉသႅပ်ႉၵၼ်ယူႇႁဵတ်းၼၼ်လႆၢၵမ်း။
“လုၵ်ႈဢွၼ်ႇ သူပဵၼ်ႁင်လႃႇ”
“ဢမ်ႇပဵၼ်ႁင်ၶႃႈ”
ယၢမ်းၼၼ်ႉဢွမ်သႂ်ၵေႃႈလႆႈႁပ်ႉၶေႃႈၵႂၢမ်း
“ၸွင်ႇႁူႉၸၵ်းပီႈၸွမ်ၾႃႉႁိုဝ်”
“သူပဵၼ်ၽႂ်ၶႃႈ..”
“ႁဝ်းပဵၼ်မေးမၼ်း”
မိူဝ်ႈလႆႈငိၼ်းၼင်ႇၼၼ် ႁူဝ်ၸႂ်သမ်ႉပေႃးၶႂ်ႈတႅၵ်ႇလႅဝ်ၵႂႃတင်းသဵင်ႈယဝ်ႉ။ ယူႇႁဵတ်းၼၼ် ၼမ်ႉတႃၵေႃႈၸိုမ်ႉမႃးဢမ်ႇတၼ်းႁူႉ မၼ်းပႆႇတၼ်းတွပ်ႇ ၽူႈယိင်းၵေႃႉၼၼ်ႉၵေႃႈ သူင်ႇၶႅပ်းႁၢင်ႈလႄႈ တႅမ်ႈလိၵ်ႈသူင်ႇမႃးပၼ်ထႅင်ႈ “ၼႆႉပဵၼ်လုၵ်ႈၶဝ်လႄႈ ႁဝ်းတေႇၼႃႈႁိူၼ်းၸွမ်းၵၼ်မႃးလႆႈ 10 ပီယဝ်ႉ ငိၼ်းဝႃႈမၼ်းလႄႈတင်းသူၵဝ်းၵၼ်ယူႇၼႆ”
ဢွမ်သႂ်ၵေႃႈဢမ်ႇၸၢင်ႈလၢတ်ႈသင်လႆႈယဝ်ႉ ၾူၼ်းမၼ်းသမ်ႉပေႃးလူၼ်ႇတူၵ်းမိုဝ်းၵႂႃႇ ၸွမ်ၾႃႉၼႅတ်ႈဝၵ်ႉႁပ်ႉဢဝ်လႄႈ လႆႈႁၼ်ၼႂ်းၾူၼ်းဢွမ်သႂ် ဢၼ်ၼႃႈမၼ်ႈပႆႇလပ်းပႅတ်ႈၼၼ်ႉ သမ်ႉပေႃးဢဝ်သီၼႃႈမၼ်းပိူင်ႈၵႂႃႇၵမ်းလဵဝ်။
“သူ..”
ဢွမ်သႂ်ၸၵ်ႉဢဝ်ၾူၼ်းမၼ်းသေယဝ်ႉ “မိူဝ်းဢုပ်ႇၵၼ်တီႈႁိူၼ်းလႄႈ”
တီႈၼႂ်းႁိူၼ်းဢၼ်တဵတ်ႇယဵၼ်သီႇသီႇလူင်ၼၼ်ႉ သမ်ႉပေႃးဢမ်ႇလႆႈငိၼ်းသဵင်မူတ်ႉသဵင်မႅင်းသင်သေဢိတ်း။
“ၸွင်ႇမီးသင်တေၵႄႈတူဝ်ႁိုဝ်”
“သူ..ထွမ်ႇႁဝ်းလၢတ်ႈၵွၼ်ႇလႄႈ”
“ဢိုမ်ႈ..ႁဝ်းၼင်ႈပႂ်ႉထွမ်ႇယူႇတင်းႁိုင် ၵူၺ်းၵႃႈသူၵေႃႈဢမ်ႇပိုတ်ႇသူပ်းလၢတ်ႈဢွၵ်ႇမႃးသေၶေႃႈ”
ယိပ်းၸၼ်ဢဝ်မိုဝ်းဢွမ်သႂ်သေယဝ်ႉ “ဢမ်ႇႁိုင်ႁဝ်းလႄႈတင်းၶဝ်တေပႅတ်ႈၵၼ်ယဝ်ႉ ႁဝ်းဝႃႈပေႃးႁဝ်းပႅတ်ႈၵၼ်တင်းၶဝ်ယဝ်ႉ တေမႃးယူႇၸွမ်းသူၼႆဢိူဝ်ႈ”
ဢွမ်သႂ်ဢမ်ႇတၵ်းသဵင် ယၵ်ႉတူၺ်းၼႃႈမၼ်းယူႇႁဵတ်းၼၼ် ဢဝ်မၼ်းသမ်ႉပေႃးၵူဝ်မႃးယဝ်ႉ။
“ႁဝ်းလၢတ်ႈတေႉဢိူဝ်ႈ ႁဝ်းဢမ်ႇလႅၼ်သူလေႃႇ ႁဝ်းႁၵ်ႉသူတေႉဢိူဝ်ႈၼႃႈ” ဢဝ်ၶႅၼ်မၼ်းသွတ်ႇၶဝ်ႈၵွတ်ႇတၢင်းလင်ဢွမ်သႂ်သေယဝ်ႉ ၸုပ်ႇၼူမ်ၵႅမ်ႈၵမ်းၼိုင်ႈ။
“သူ..” ဢွမ်သႂ်ဢဝ်မိုဝ်းမၼ်းဢွၵ်ႇယဝ်ႉ”သူပွၵ်ႈမိူဝ်းၵႂႃႇသေလႄႈ ဝၼ်းမိူဝ်ႈၼႆႉၵေႃႈ ဝႆႉဝႃႈပဵၼ်ဝၼ်းလီဢၼ်ႁဝ်းလႆႈႁဵတ်းၵုသူဝ်ႇႁူမ်ႈၵၼ် ဢဝ်ၵၼ်မိူဝ်ႈၼႆႉၵေႃႈ ပႅတ်ႈၵၼ်မိူဝ်ႈၼႆႉသေ ႁဝ်းဝူၼ်ႉဝႃႈ သိုပ်ႇၼႆႉၵႂႃႇတေဢမ်ႇယူႇၸွမ်းသူလႆႈယဝ်ႉ”
“ဢမ်ႇၼႃ ဢွမ်သႂ် ပေႃးပဵၼ်လွင်ႈမၼ်းၼၼ်ႉ ႁဝ်းလၢတ်ႈယဝ်ႉႁဝ်းတေပႅတ်ႈမၼ်းၵူၺ်း”
“သူပႅတ်ႈမၼ်းလႆႈသေတႃႉ ႁဝ်းဢမ်ႇယုမ်ႇဝႃႈသူတေပႅတ်ႈတၢင်းယၢမ်ႈသူလႆႈ”
“ႁဝ်းပၼ်ၵႂၢမ်းမၼ်ႈယူႇ ႁဝ်းတေဢမ်ႇႁဵတ်းႁႂ်ႈသူလႆႈတိူဝ်ႉၸႂ်ထႅင်ႈ ႁဝ်းႁၵ်ႉသူတေႉဢိူဝ်ႈ”
“တူၵ်းလိုၼ်းယဝ်ႉၼႃႈ ႁဝ်းလႆႈတႅပ်းတတ်းယဝ်ႉ”
“ပေႃးသူပႅတ်ႈႁဝ်းယဝ်ႉ ဢမ်ႇၵူဝ်ဝႃႈၵူၼ်းႁိူမ်းႁွမ်းပိူၼ်ႈတေဝူၼ်ႉၸိူင်ႉႁိုဝ်ႁႃႉ”
“ပေႃးသူဝူၼ်ႉလႆႈၸိူင်ႉၼႆ ၸဵမ်မိူဝ်ႈလႂ်သူၵေႃႈတေဢမ်ႇႁဵတ်းႁႂ်ႈမၼ်းပဵၼ်မႃးၸိူင်ႉၼႆ”
မၼ်းမႃးယိပ်းဢဝ်ၶေႃႈမိုဝ်းဢွမ်သႂ်ယဝ်ႉ “ဢွမ်သႂ်..”
“လွင်ႈၼႆႉ ႁဝ်းတေဢမ်ႇလၢတ်ႈတီႈမႄႈႁဝ်း သူပွၵ်ႈမိူဝ်းၵႂႃႇသေလႄႈ ႁဝ်းတေယူႇၵိၼ်ၸိူင်ႉႁိုဝ်ၼၼ်ႉ ဢမ်ႇၵဵဝ်ႇၶွင်ႈၵၼ်ယဝ်ႉၼႃႈ”
“လႆႈဢိူဝ်ႈ ပေႃးဝႃႈဢမ်ႇမီးႁဝ်းယဝ်ႉသူယႃႇမႃးဢွၼ်ႈဝွၼ်းႁဝ်းၵူၺ်းလႃႈ”
မၼ်းၵေႃႈႁႅၼ်းၶူဝ်းမၼ်းသႂ်ႇၵႃးၵႂႃႇယဝ်ႉ။
သိုပ်ႇလူၵႂႃႇထႅင်ႈတွၼ်ႈတေမႃးၶႃႈ
