မိူဝ်ႈမိူဝ်းလႄႇႁိူၼ်း

မိူဝ်ႈမိူဝ်းလႄႇႁိူၼ်းပႃႈႁဝ်းၼၼ်ႉ ႁၼ်မႅၼ်ႈမၢဝ်ႇၵေႃႉ သုင်သုင်ၶၢဝ်ၶၢဝ် ၼႃႈပွတ်ႇလုပ်ႇႁေဢိူဝ်ႈ ၶႂ်ႈလဝ်းဝႆႉၵွၼ်ႇ ၶႃႈထၢမ်ပႃႈႁဝ်းၵႃႈၼေႃႈ
“ၽႂ်ၼၼ်ႉပႃႈ”
“လုၵ်ႈၼႆၢးဢွင်ႇႁိူၼ်းႁွင်ႇႁိုဝ်”
“ဢႆၢႈယွႆႉၵႃႈ”
“ၸႂ်ႈဢိူဝ်ႈ..”
“လဝ်းမႃးၵျႃႉ”
“လဝ်းဢိူဝ်ႈလေႃႇ ၵႂႃႇမိူင်းထႆးမႃးလူႉ”
ၵမ်းၼၼ်ႉဢႆၢႈယွႆႉၵေႃႈၽႅတ်ႈမႃးတၢင်းႁႃးၼၼ်ႉသေ ပႃႈႁဝ်းၵေႃႈသူပ်းဝႆးၼႃႇ
“ဢႆၢႈယွႆႉ.. ဢေးၼၢင်းၵျိူၵ်ႈမႂ်းဝႃႇ”
ဢႆၢႈယွႆႉယၵ်ႉတူၺ်းၼႃႈၶႃႈၼင်ႇဢဵတ်ႇသဵတ်ႇသေ
“ၶီႈလေႇၶၼၢတ်ႇၼီႉ ႁဝ်းမႃႇသွပ်ႉ”
“မၼ်းဝႃႈႁင်ၵေႃးပႃႈ..”
“မၼ်းဝႃႈမႂ်းၶီႈလေႇၼႃႇၼႆဢိူဝ်ႈၼၼ်ႉ”
“ပႃႈႁဝ်းမေႃၵႂၢမ်းထႆးႁေၵႃႈ”
“ၵဝ်ၵေႃႈႁူႉယူႇၵႃႈမႂ်းၵေႃႈ”
“ၵႂႃႇမိူင်းထႆးၼႆၵေႃႈပေႃးဢမ်ႇလၢတ်ႈၵႂၢမ်းတႆးႁေဢိတ်းတေႉ ၵဝ်ဝႃႈမႂ်းၶီႈလေႇလိူဝ်ၵဝ်ၵွၼ်ႇယဝ်ႈ ၵႂႃႇၽႅဝ်မိူင်းထႆးပုၼ်ႉ” ၶႃႈႁွင်ႉသႅၼ်ႇၽႆၢႇလင်မၼ်း
“ၵဝ်လၢတ်ႈၶၼၢတ်ႇၼီႉ မိုင်းဢမ်ႇႁူႉလိူင်ႈၵႃ”
“တေႁူႉႁႅင်ႉႁင်လိူင်ႈၵႃ မႂ်းၵေႃႈလၢတ်ႈၵႂၢမ်းၵူၼ်းလေႃႇ”
“ၵူၼ်းႁႅင်ၶုၺ်းၸွမ်းၵေႃႈမႃႇႁူႉလိူင်ႈ”
“ၵႂၢမ်းထႆးဢီႈႁင်မႂ်းဝႃႈၼၼ်ဝႆႉ ၵဝ်တူၺ်းၸလၢၼ်းထႆးၵဝ်တင်းပွင်ႇယူႇမေႃႉ လၢတ်ႈတေႃႇမႂ်းၼႆႉ ၵဝ်ဢမ်ႇပွင်ႇသေၶႅၵ်း”
မၢင်ပွၵ်ႈဢွင်ႈတီႈႁဝ်းယူႇၼၼ်ႉ ၸွမ်းလူၺ်ႈတူင်ႇဝူင်းႁိမ်းႁွမ်းႁဝ်းသေ ၽႃႇသႃႇၵႂၢမ်းလၢတ်ႈႁဝ်းၵေႃႈ ယဵၼ်းငႆၢႈမႃးယဝ်ႉ။

သင်ၸိူဝ်ႉဝႃႈႁဝ်းဢၼ်ႇၵႆႉၸႂ်ႉ ၶေႃႈၵႂၢမ်းထွႆႈၵႂၢမ်းလၢတ်ႈႁဝ်းၵေႃႈ မေႃလိုမ်းမေႃႁူင်ႈႁႆၢၵႂႃႇလႄႈ ၶၢဝ်းယၢမ်းႁိုင်မႃးပၢၼ်သိုပ်ႇပၢၼ် ၶူၼ်ႉၶိုၼ်းငဝ်ႈတိုၼ်းၵႂၢမ်းတႆးႁဝ်းၵူၺ်းၵေႃႈ ဢမ်ႇပွင်ႇၸႂ်ၵေႃႈမီးယဝ်ႉ။

ၵွပ်ႈၼၼ် ၵႂၢမ်းလၢတ်ႈႁဝ်းယဵၼ်းႁႆၢဝႆးသေတႃႉ လိၵ်ႈႁဝ်းတႄႉ တေမီးၵိုၵ်းဝႆႉယူႇၼႂ်းပပ်ႉလႄႈ ၶေႃႈၵႂၢမ်း ထွႆႈၵႂၢမ်းႁဝ်းၼၼ်ႉတႄႉ တေၵိုၵ်းမီးဝႆႉယူႇၼႂ်းပပ်ႉဝႆႉယဝ်ႉ။

သႅၼ်ငဝ်း
22/12/2025