ၼိူဝ်သဵၼ်ႈတၢင်းၵူၼ်းပႆထၢၼ်ႈပေႃးၵိုၼ်းဢိုၵ်ႉဢိုၵ်ႉ ပေႃႈမႄႈၵူၼ်းမိူင်းၼုင်ႈသုပ်းသႂ်ႇသိူဝ်ႈၶူဝ်းတႆး ဢွၼ်ၵၼ်ပႆၵႂႃႇတၢင်းပၢင်ပွႆး ၵူၼ်းသိုၵ်းၶဝ်ၸႅၼ်ႇထႅဝ်ၵၼ် ပႆၵႂႃႇၸွမ်းသဵင်တွႆႇတိုင်ႈတူႇရိယႃႇ ၵႂႃႇၵွင်ၵၼ်ယူႇၼႂ်းပၢင်ႇၼၼ်ႉ ၵူၼ်းထၢၼ်ႈပေႃးတဵမ်ဝႆႉယူႇ။
လႅင်းမိူင်းၼၼ်ႉတႄႉၵေႃႈ ၼုင်ႈၶူဝ်းသိုၵ်းတဵမ်ၸုမ်ႇသေ ႁေႃႈလူတ်ႉသူင်ႇၸဝ်ႈသိုၵ်းၸွမ်ၶိူဝ်းသေယဝ်ႉ သိုပ်ႇဢဝ်ၵႃးမၼ်းႁေႃႈၵႂႃႇၵိုတ်းတီႈပွမ်ႈသိူဝ်ဝႅၼ်ၼၼ်ႉယဝ်ႉ ၸုၵ်းပႂ်ႉယူႇတီႈႁိမ်းၼၼ်ႉသေ ဝၢႆႇမုင်ႈတူၺ်းလူင်းၵႂႃႇတၢင်းႁွင်ႈၼႄပိုၼ်းၼၼ်ႉလႄႈ လိူၵ်ႈလိူၵ်ႈသမ်ႉႁၼ်မႅၼ်ႈၺႃး ၵူၼ်းၵေႃႉဢၼ်မိူၼ်ယၢမ်ႈႁူႉၸၵ်းၵေႃႈလူဝ်လူဝ် တင်းလုၵ်ႈဢွၼ်ႇၸၢႆးဢႃႇယုတေမီးယူႇမွၵ်ႈ 7 ၶူပ်ႇလႄႈ ဢွၼ်ႇယိင်း 3 ၶူပ်ႇပၢႆပၢႆ ပႆၶိုၼ်ႈမႃးၸွမ်းတၢင်းၼၼ်ႉယဝ်ႉ။
ယိင်ႈၶဝ်ပႆမႃးၸမ်ယိင်ႈႁၼ်ၸႅင်ႈ ႁူဝ်ၸႂ်သၼ်ႇၼိုင်ၶွၼ်းပၼ်ၾၢင်ႉၸဝ်ႈၶွင်မၼ်းဝႃႈ ၵူၼ်းၵေႃႉၼၼ်ႉပဵၼ်ၵူၼ်းဢၼ်မီးယူႇၼႂ်းၸႂ်မၼ်းတႃႇသေႇၼၼ်ႉယူႇၼႆႁိုဝ်။ မၼ်းၵေႃႈလႅၼ်ႈလူင်ၵႂႃႇၸူးၵူၼ်းၵေႃႉၼၼ်ႉၵမ်းလဵဝ် ဢမ်ႇတၼ်းတူၺ်းၽႂ်ယဝ်ႉ။
“ၶမ်းႁွမ်!!”
ၽူႈယိင်းၵေႃႉၼၼ်ႉၵေႃႈဝိၼ်ႇဝၢႆႇတူၺ်းမၼ်းၵမ်းလဵဝ် ၶုၼ်ႇမိုင်ၵိုတ်းၵႂႃႇၵမ်းၼိုင်ႈယဝ်ႉ ၸုင်မိုဝ်းလုၵ်ႈမၼ်းသေ ပႆၵႂႃႇၼင်ႇဢမ်ႇသူၼ်ၸႂ်ယဝ်ႉ။
လႅင်းမိူင်းၵေႃႈဢမ်ႇသူၼ်ၽႂ်သေ ပႆၵႂႃႇတတ်းၼႃႈၶဝ်မႄႈလုၵ်ႈ ယၵ်ႉတူၺ်းဢွၼ်ႇၸၢႆးၵေႃႉၼၼ်ႉသေ “ၼေႃႇမိူင်း!..ၸွင်ႇတွင်းပေႃႈလႆႈႁိုဝ်”
ဢွၼ်ႇၸၢႆးၼၼ်ႉၵေႃႈ ၵွတ်ႇၵွပ်ႈဢဝ်လႅင်းမိူင်းဝႆႉယူႇယဝ်ႉ။ လႅင်းမိူင်းၵေႃႈၵူမ်ႈၵွတ်ႇဢဝ်ၼေႃႇမိူင်းဝႆႉသေ ၼမ်ႉတႃသမ်ႉပေႃးၸိုမ်းမႃးယူႇ၊ ၶမ်းႁွမ်ၼၼ်ႉၵေႃႈ ၼမ်ႉတႃၸိုမ်းလၢႆႇတႃမႃးမိူၼ်ၵၼ် ၸဵမ်မိူဝ်ႈၽၢတ်ႇယၢၼ်ၵၼ်ၵႂႃႇ ၼေႃႇမိူင်းၵေႃႈ ဢမ်ႇမီးဝၼ်းလႂ်ဢၼ်မၼ်းဢမ်ႇၸႂ်ထိုင်ပေႃႈၼႆသေပွၵ်ႈ ယွၼ်ႉလွင်ႈသုၼ်ႇတူဝ်မၼ်းၼၼ်ႉသေ ႁဵတ်းႁႂ်ႈၶႃလႆႈၽၢတ်ႇယၢၼ်ၵၼ်ၵႂႃႇပဵၼ်သီႇပီလႄႈ တွၼ်ႈတႃႇၼေႃႇမိူင်းၼႆၼၼ်ႉ ဢမ်ႇဝႃႈပဵၼ်ၸိူင်ႉႁိုဝ် မၼ်းၵေႃႈလႆႈဢွၼ်ဢဝ်ၼေႃႇမိူင်းမႃးလႄႇပွႆး ၼင်ႇႁိုဝ်တေလႆႈထူပ်းတင်းလႅင်းမိူင်းၼႆၼၼ်ႉယူႇ။
“မႄႈမႄႈ ၽႂ်”
“ပေႃႈဢၢႆႈပီႈလုၵ်ႈဢိူဝ်ႈ..” လုပ်ႈႁူဝ်လုၵ်ႈယိင်းဢွၼ်ႇမၼ်းၼၼ်ႉယူႇ။
“ပေႃႈပေႃႈ..”ယိင်းဢွၼ်ႇႁွင်ႉလၢတ်ႈမႃး သဵင်ၼၼ်ႉၵေႃႈၸိုင်ပေႉမႃးတုမ်ႈယွၼ်ႈထိုင်ၼႂ်းဢူၵ်းႁူဝ်ၸႂ်ၼၼ်ႉဢမ်ႇႁူႉ။ ဢွၼ်ႇယိင်းၼၼ်ႉၵေႃႈလႅၼ်ႈၵႂႃႇၵွတ်ႇသႂ်ႇလႅင်းမိူင်းၸွမ်းၼေႃႇမိူင်းၼၼ်ႉယူႇ။
ၶမ်းႁွမ်ၼၼ်ႉတႄႉၵွင်လင်ၵႂႃႇပႅတ်ႈၵူၺ်း။ လႅင်းမိူင်းၼၼ်ႉၵေႃႈ ဢုမ်ႈႁွပ်ႇဢဝ်ဢွၼ်ႇယိင်းၼၼ်ႉသေ ၵႂႃႇၸုင်ဢဝ်မိုဝ်းၶမ်းႁွမ် ၼေႃႇမိူင်းၵေႃႈယိပ်းဢဝ်မိုဝ်းၶမ်းႁွမ်ထႅင်ႈၽၢႆႇၼိုင်ႈ လူင်းၵႂႃႇတၢင်းႁွင်ႈၼႄပိုၼ်းၼၼ်ႉသေ ၼင်ႈယူႇတၢင်းၼႃႈၼၼ်ႉယဝ်ႉ။
“လုၵ်ႈ…ဢွၼ်ၼွင်ႉၵႂႃႇၼင်ႈပႂ်ႉတၢင်းၼႂ်းၵမ်ႉၼိုင်ႈၸွင်ႇလႆႈႁိုဝ်…ပေႃႈမီးလွင်ႈတေလၢတ်ႈတေႃႇမႄႈၵမ်းၼိုင်ႈ”
ၼေႃႇမိူင်းၵေႃႈ ၸူဝ်းဢဝ်ၼွင်ႉယိင်းမၼ်း ၶဝ်ႈၵႂႃႇၼင်ႈပႂ်ႉတီႈၽိူၼ်တၢင်းၼႂ်းၼၼ်ႉသေ ၶမ်းႁွမ်ၵေႃႈ ဢဝ်ၼူမ်းပၼ်ၵႂႃႇၵေႃႉဢႅပ်ႇဢႅပ်ႇယူႇ။
ဝၢႆးသေလုၵ်ႈဢွၼ်ႇၵႂႃႇယဝ်ႉ လိူဝ်သေသဵင်ၵူၼ်းတၢင်းၼွၵ်ႈဢူၼ်ပၼ်းယဝ်ႉ သဵင်ၶႃၼၼ်ႉတႄႉယဵၼ်ဝႆႉယူႇၵူၺ်း။ ၶမ်းႁွမ်ၼၼ်ႉတႄႉ ဢမ်ႇယၵ်ႉတေႃႇၼႃႈမၼ်းသေဢိတ်း ပေႃးဢမ်ႇဝိၼ်ႇပႅတ်ႈၵေႃႈၵူမ်ႈပႅတ်ႈၵူၺ်း၊ လႅင်းမိူင်းတႄႉ ယၵ်ႉတူၺ်းၶမ်းႁွမ်ပေႃးဢမ်ႇသုတ်းသၢႆတႃလႆႈယဝ်ႉ။
“သူလဵင်ႉလုၵ်ႈၵေႃႉလဵဝ်မႃးတႃႇသေႇႁႃႉ..”
“ႁဝ်းတေႇၼႃႈႁိူၼ်းယဝ်ႉၼႃႈ…သူၵေႃႈတေတေႇၼႃႈႁိူၼ်းယဝ်ႉၼႆဢမ်ႇၸႂ်ႈႁႃႉ”
“ၽႂ်ဝႃႈၶမ်းမိူင်းလၢတ်ႈၼႄသူႁႃႉ…”
“ဢမ်ႇၸႂ်ႈၼႃ…ဢူၺ်းၵေႃႉႁဝ်းၵူၺ်း”
“ငိၼ်းဝႃႈဝၢႆးပွၵ်ႈမိူဝ်းၵေႃႈသူၵႂႃႇမိူင်းထႆးၵမ်းလဵဝ်ၼႆ…မၼ်းပဵၼ်သင်လႃႇႁဝ်းဢမ်ႇထၢင်ႇဝႃႈသူတတ်းၶတ်ႇၼႃႈၵၢၼ်မေႃသွၼ်လႆႈ”
“လွင်ႈဢမ်ႇထၢင်ႇမၼ်းၵေႃႈၵိူတ်ႇၶိုၼ်ႈမႃးလႆႈယူႇယဝ်ႉလူး…ပေႃးဝႃႈမီးလွင်ႈသုၼ်ႇတူဝ်ၶဝ်ႈမႃး…ၼႃႈၵၢၼ်တွၼ်ႈတႃႇၵူၼ်းတင်းၼမ်ၼၼ်ႉၵေႃႈလႆႈၵိုတ်းၵႂႃႇပႅတ်ႈယဝ်ႉ…ၽူႈယိင်းၼၼ်ႉမၼ်းဢမ်ႇမိူၼ်ၽူႈၸၢႆးလေႃႇၼႃႈ…သမ်ႉဝႃႈၸႂ်ႁၵ်ႉယူႇသေတႃႉၵေႃႈ…မၼ်းဢမ်ႇၸၢင်ႈႁဵတ်းယဝ်ႉလႄႈ…ၵႃႈတေလႆႈဢဝ်ၵမ်ႈမၼ်းဝႃႈၵူၺ်း…”
“သူတေႇႁိုင်ယဝ်ႉႁႃႉ…”
“ဢိုမ်ႈ…”
“ၶဝ်ယူႇတီႈလႂ်လႃႇမိူဝ်ႈလဵဝ်…”
“မီးမိူင်းထႆးၵူၺ်း…ၶဝ်ႁဵတ်းၵၢၼ်လႄႈဢမ်ႇတၼ်းမႃး..”
“ၶဝ်ႁၵ်ႉၼေႃႇမိူင်းယူႇႁႃႉ…”
“ဢိုမ်ႈ”
“သူဢမ်ႇႁႂ်ႈၶဝ်မႃးၸွမ်းလႃႇ တင်းလုၵ်ႈဢွၼ်ႇသေမႃးႁင်းၵူၺ်း သူဢမ်ႇႁိူဝ်ႉႁႃႉ”
“မၢင်ပွၵ်ႈၵေႃႈႁိူဝ်ႉယူႇ မၢင်ပွၵ်ႈၵေႃႈသိူဝ်းယူႇ”
လႅင်းမိူင်းယိပ်းဢဝ်ႁူဝ်မႃႇၶမ်းႁွမ်တင်းသွင်ၽၢႆႇသေ “တူၺ်းတႃႁဝ်းသေလၢတ်ႈၽွင်ႈဢမ်ႇလႆႈႁႃႉ…” ၶမ်းႁွမ်ဝၢႆႇတူၺ်းမၼ်းသေ “သူပွႆႇႁႂ်ႈလုၵ်ႈဢွၼ်ႇဢၼ်မီးပေႃႈယူႇယဝ်ႉ မႃးႁွင်ႉပိူၼ်ႈဝႃႈပေႃႈလႆႈၸိူင်ႉႁိုဝ်လႃႇ သူပွႆႇႁႂ်ႈလုၵ်ႈသူၶၢတ်ႇတၢင်းႁၵ်ႉတီႈပေႃႈလႆႈယူႇႁႃႉ သၢႆတႃလုၵ်ႈဢွၼ်ႇဢၼ်လႅၼ်ႈမႃးၵွတ်ႇႁဝ်းၼၼ်ႉ မၼ်းလၢတ်ႈၼႄႁဝ်းမူတ်းယဝ်ႉၼႃႈ”
လႅင်းမိူင်းၵူမ်ႈၼႃႈသေယဵၼ်ၵႂႃႇ “လုၵ်ႈႁဝ်းၸွင်ႇၸႂ်ႈႁိုဝ်…သူပၢႆႈၵႂႃႇယွၼ်ႉပိူဝ်ႈသူမီးလုၵ်ႈႁဝ်းၸွင်ႇၸႂ်ႈ…သမ်ႉဝႃႈႁဝ်းပဵၼ်သိုၵ်းၵေႃႈႁဝ်းဢမ်ႇၸႂ်ႈၵူၼ်းပႅတ်ႈလၢႆထိုင်တီႈဢမ်ႇမေႃဢဝ်ပုၼ်ႈၽွၼ်းၼႃ…သူၸႂ်ႁၢႆႉတေႃႇႁဝ်းၵူၺ်းၵေႃႈပေႃးယဝ်ႉ…ပဵၼ်သင်တေလႆႈၸႂ်ႁၢႆႉတေႃႇလုၵ်ႈလုၵ်ႈထိုင်တၢၼ်ႇၼႆႉလႃႇၶမ်းႁွမ်”
“ႁဝ်းၼွမ်းၽိတ်း” တင်းႁႆႈတင်းလၢတ်ႈၸူးလႅင်းမိူင်းယဝ်ႉ။
လႅင်းမိူင်းၵေႃႈၵွတ်ႇဢဝ်ၶမ်းႁွမ်မႃးဝႆႉၼႂ်းဢွင်ႈဢူၵ်းမၼ်းၼၼ်ႉယူႇ။
“ပွႆႇႁဝ်းလႄႈ…ပိူၼ်ႈတူၺ်းၼႃႇယဝ်ႉ…”
“ဢမ်ႇပဵၼ်သင်လေႃႇၼႃႈ…”
“ပီႈလႅင်းမိူင်း!!” သဵင်ၽူႈယိင်းလင်မေႃးယူႇတၢင်းၼႃႈၶႃၼၼ်ႉလႄႈ
လုၵ်ႈဢွၼ်ႇသွင်ၵေႃႉဢၼ်ယူႇၼႂ်းႁွင်ႈၼၼ်ႉၵေႃႈလႅၼ်ႈဢွၵ်ႇမႃးတူၺ်း လႅင်းမိူင်းၶႃၵေႃႈဝိၼ်ႇယၵ်ႉတူၺ်းသဵင်ႁွင်ႉၼၼ်ႉသေ
“သႅင်ႁွမ်…”
သိုပ်ႇလူထႅင်ႈတွၼ်ႈတေမႃးၶႃႈ
