တွၼ်ႈပႅတ်ႇ
ဝၢႆးသေသႅင်ၽွင်းၶဝ်ဢွၵ်ႇၵႂႃႇဢမ်ႇတၼ်းႁိုင် သဵင်လူတ်ႉၶိူင်ႈၵေႃႈမေႃးမႃး ၵိုတ်းယဝ်ႉတဵၵ်းသဵင်လူတ်ႉမၼ်းသေ ႁွင်ႉၶမ်းႁွမ်ယူႇတၢင်းၼႃႈႁူင်းသဝ်း ဢမ်ႇလႆႈႁၼ်ၶမ်းႁွမ်ဢွၵ်ႇမႃးလႄႈ သိုပ်ႇၾူၼ်းၵေႃႈဢမ်ႇႁပ်ႉ၊ ဢမ်ႇႁူႉဝႃႈတေလႆႈႁဵတ်းႁိုဝ် ၵႃႈလႆႈၼင်ႈပႂ်ႉယူႇၵူၺ်း။ ၶမ်းႁွမ်ပေႃးၼွၼ်းသွပ်ႉလပ်းၵႂႃႇယဝ်ႉ သမ်ႉဝႃႈငိၼ်းသဵင်ယူႇၵေႃႈ သဵင်ၼၼ်ႉႁိုဝ်ပေႉတႃၼွၼ်းလႆႈ ၼွၼ်းလပ်းၵႂႃႇတၢင်းႁိုင် ၽိူဝ်ႇတိုၼ်ႇမႃးၶိုၼ်းၵေႃႈပေႃးၶမ်ႈႁႅင်းၼႃႇယဝ်ႉ။ ဢၢၼ်းတေၵႂႃႇဢၢပ်ႇၼမ်ႉၼႆလႄႈ ဢွၵ်ႇၽၵ်းတူမႃးႁၼ်ၵူၼ်းၼင်ႈပႂ်ႉဝႆႉယူႇတၢင်းၼႃႈႁူင်းသဝ်းၼၼ်ႉသေ ႁွင်ႉထၢမ်
“မႃးႁႃၽႂ်ၶႃႈ!!”
လႅင်းမိူင်းငိၼ်းသဵင် ဝိၼ်ႇယၵ်ႉဝၢႆႇတူၺ်း “မႃးႁႃသူဢေႃႈ”
“မႃးႁႃႁဝ်းႁဵတ်းသင်လႃႇ..”
“သႅင်ၽွင်းလၢတ်ႈဝႃႈမီးသူၵေႃႉလဵဝ်ၵူၺ်းတီႈၼႆႈ…ႁဝ်းၵေႃႈလႆႈမႃးပႂ်ႉၼၼ်ႉၼႃႇ”
“ပႂ်ႉႁိုင်ယဝ်ႉႁႃႉ..ၵတ်းၼႃႇယဝ်ႉယူဝ်ႉ..ၶိုၼ်ႈမႃးယူႇၼႂ်းႁွင်ႈၵွၼ်ႇၶႃႈလႄႈ”
လႅင်းမိူင်း ၶိုၼ်ႈၶူဝ်လႆၶဝ်ႈမိူဝ်းၵႂႃႇၼႂ်းႁွင်ႈႁပ်ႉၶႅၵ်ႇၶဝ်ၼၼ်ႉသေ ၶမ်းႁွမ် ႁိုဝ်ႈၼမ်ႉဢုၼ်ႇတမ်းပၼ်ယဝ်ႉ။
“ႁူႉယူႇဝႃႈဢမ်ႇမီးၽႂ်ၼႆၵေႃႈ…သမ်ႉပေႃးလီမိူဝ်းၶိုၼ်းႁေယဝ်ႉ…ယင်းတိုၵ်ႉယဵၼ်ႉသေၶၢမ်ႇၵတ်းယူႇတၢင်းၼွၵ်ႈၸိူင်ႉၼၼ်…ဢမ်ႇယူႇလီမႃးတေႁဵတ်းႁိုဝ်”
လႅင်းမိူင်းၵေႃႈယၵ်ႉတူၺ်းၶမ်းႁွမ်သေ ၵိၼ်ၼမ်ႉဢၼ်မၼ်းမႃးတမ်းပၼ်ၼၼ်ႉယဝ်ႉ လၢတ်ႈၸူး
“မႆႈၸႂ်ႁဝ်းယူႇႁႃႉ..”
ၶမ်းႁွမ်ယၵ်ႉတူၺ်းၼင်ႇဢမ်ႇတဵမ်ၸႂ်ဢိတ်ႉၼိုင်ႈၼၼ်ႉလႄႈ “ၽႂ်တေၶႂ်ႈမႃးမႆႈၸႂ်ၵူၼ်းၸိူင်ႉၼႆ…”
လႅင်းမိူင်းၵေႃႈဢႆၶူၵ်ႉၶူၵ်ႉမႃးယဝ်ႉ “ၼၼ်ႉၼႃႇ..ဢမ်ႇယူႇလီယဝ်ႉႁိုဝ်…ၸွင်ႇတေၵိၼ်ယႃယူႇႁႃႉ”
“မိူၼ်ႁဝ်းတေဢမ်ႇယူႇလီမႃးတေႉဢိူဝ်ႈၼႆႉ”
ၶမ်းႁွမ်ပႃးတင်းလွင်ႈမႆႈၸႂ်တေႉသေ ဢဝ်မိုဝ်းသဵမ်ႈၼုမ်ႇၶၢဝ်ပွတ်ႇမၼ်းၼၼ်ႉ ၵမ်းတူၺ်းၼႃႈၽၢၵ်ႇလႅင်းမိူင်းလႄႈတင်းမၼ်းၼၼ်ႉတႅၵ်ႈတူၺ်းၵၼ်သေ
“ဢမ်ႇမီးလူမ်းၼၢဝ်သင်လူး”
“လိူဝ်သေမႄႈႁဝ်း…သူပဵၼ်ၽူႈယိင်းဢၼ်မႃးတိူဝ်ႉလႆႈၼႃႈၽၢၵ်ႇႁဝ်းယဝ်ႉ…သူတေလႆႈဢဝ်ပုၼ်ႈၽွၼ်းၼႃ…”
“ႁဝ်းၵၢၼ်ႉမႆႈၸႂ်ၵေႃႈ…သင်ႁူႉၼၼ်ႁဝ်းတေဢမ်ႇ…”
“ႁဝ်းၸူမ်းတေႉယဝ်ႉ…လိူဝ်သေမႄႈႁဝ်းယဝ်ႉ…ယင်းမီးသူဢၼ်မႆႈၸႂ်ႁဝ်း…ဝၢႆးသေႁဝ်းၽၢတ်ႇမႄႈႁဝ်းၵႂႃႇ…ဢမ်ႇယၢမ်ႈမီးၽႂ်လၢတ်ႈဝႃႈ…ယႃႇတၢၵ်ႇၽူၼ်ၼႃႈၵူဝ်ဢမ်ႇယူႇလီ…ယႃႇတၢၵ်ႇလႅတ်ႇၼႃႈၵူဝ်ပဵၼ်ဝတ်း…ယႃႇတၢၵ်ႇလူမ်းၼႃႈၵူဝ်ၵတ်း…ဢမ်ႇယၢမ်ႈမီးၽႂ်မႃးၵမ်းၼႃႈၽၢၵ်ႇႁဝ်းဝႃႈၸွင်ႇႁဝ်းယူႇလီႁိုဝ်…ဢမ်ႇမီးမႄႈယဝ်ႉ…ပဵၼ်သင်မႃးၵေႃႈ…ႁဝ်းတေႁူႉတူဝ်သေႁႃယူတ်းယႃႁင်းၵူၺ်းယဝ်ႉ…ယွၼ်ႉပိူဝ်ႈပေႃးႁဝ်းပဵၼ်မႃး…ႁဝ်းႁူႉဝႃႈတေဢမ်ႇမီးမႄႈပႂ်ႉလုမ်းလႃးႁဝ်းယဝ်ႉ…ၵူၺ်းၵႃႈမိူဝ်ႈလဵဝ်…သူႁဵတ်းႁႂ်ႈႁဝ်းပေႃးဢမ်ႇၶႂ်ႈယူႇလီလူင်ၵႂႃႇတေႉဢိူဝ်ႈ…”
မိူဝ်ႈလၢတ်ႈမႃးၸိူင်ႉၼၼ် ၶမ်းႁွမ်ၵေႃႈပေႃးဢမ်ႇၸၢင်ႈလၢတ်ႈသင်ယဝ်ႉလႄႈ လၢႆႈၵႂၢမ်းၵႂႃႇသေ
“လိုၵ်းၼႃႇယဝ်ႉမိူဝ်းလိုဝ်ႈႁိူဝ်ႉသူသေလႄႈ…”
“လိုၵ်းတီႈလႂ်လႃႇ…တိုၵ်ႉလႆႈပႅတ်ႇမူင်းပၢႆၵူၺ်း…ၵႃႈသူဢမ်ႇၵႂႃႇလႄႇပွႆးၸွမ်းႁဝ်း…ႁဝ်းၵေႃႈတေပႂ်ႉယူႇႁဵတ်းၼႆယဝ်ႈ”
“ၵူၼ်းတိုဝ်ၸိူင်ႉၼႆ…ၶၢၼ်ႉလၢတ်ႈတေႃႇသူယဝ်ႉဝႃႈ”
ၶမ်းႁွမ်ၵေႃႈၵႂႃႇႁႃဢၢပ်ႇၼမ်ႉလၢႆႈၶူဝ်းမၼ်းယဝ်ႉ၊ ငွၵ်ႈတူၺ်းလႅင်းမိူင်းတိုၵ်ႉမီးယူႇၼႂ်းႁွင်ႈႁပ်ႉၶႅၵ်ႇၼၼ်ႉယူႇလႄႈ
“ပႆႇမိူဝ်းၵွၼ်ႇႁႃႉၼႆႉ…”
“သူဢမ်ႇၵႂႃႇၵေႃႈ..ႁဝ်းတေပဵၼ်ၵေႃႉသူယူႇတီႈၼႆႈယဝ်ႉ”
“ပေႃးၵႂႃႇၵေႃႈ..ပွႆးပေႃးဝၢႆးယဝ်ႉယူဝ်ႉ”
“ၶၢဝ်းၼႆႉပိူၼ်ႈတိုၵ်ႉၸင်ႇႁႃတႄႇၵူၺ်း..”
ၶမ်းႁွမ်ၵေႃႈ ဢဝ်တၢင်းသိူဝ်ႈသွၼ်ႉမၼ်းသေ ၶီႇလူတ်ႉၶိူင်ႈၵႂႃႇၸွမ်းလႅင်းမိူင်းယဝ်ႉ၊ ၵိုတ်းလူတ်ႉၶႃယူႇၶၢင်ႈတၢင်းလူင်းႁူင်းႁဵၼ်းၼၼ်ႉသေယဝ်ႉ၊ ပႆၽိုတ်ႉဢီးၵူၼ်း ၶဝ်ႈၵႂႃႇၼႂ်းသဵၼ်ႈတၢင်း ဢၼ်မီးၾႆးႁိူဝ်ႈလႅင်း ဝႆႉသွင်ၶၢင်ႈတၢင်း မီးသုမ်ႉတၢင်းၶၢႆၶပ်ႉယႆၸႅၼ်ႇၵၼ်ၽၢႆႇၸၢၼ်းတၢင်း ပေႃးယၢဝ်းလူင်ဝႆႉ လၢၼ်ႉတၢင်းၶၢႆၼႆၵေႃႈ မီးၵူႈမဵဝ်း၊ ၵူၼ်းပေႃးတဵမ်ယူႇၵူႈသႅင်ႇၵူႈလၢၼ်ႉယဝ်ႉ၊ သဵၼ်ႈတၢင်းၵႂၢင်ႈၵေႃႈ ၵူၼ်းၼမ်ၼႃႇသမ်ႉပေႃးၵႅပ်ႈယဝ်ႉ၊ တႃႇဝႄႈၵၼ်ၵူၺ်းဢမ်ႇၶႂ်ႈပေႃး မိူဝ်ႈႁၼ်ၵူၼ်းၼမ်ၸိူင်ႉၼၼ် ၶမ်းႁွမ်ဢမ်ႇမေႃၵႂႃႇ ဢမ်ႇႁူႉတေႁဵတ်းႁိုဝ်ၵႂႃႇ၊ လႅင်းမိူင်းလႆႈႁၼ်ၵိုတ်းဝႆႉယူႇလႄႈ ၸင်ႇမႃးၸၼ်ဢဝ်ၶႅၼ်မၼ်းယဝ်ႉ ပႆၵႂႃႇၸွမ်းၵၼ်ယူႇ။
ၶမ်းႁွမ်မိုင်ၵႂႃႇၸွမ်းလႅင်းမိူင်း ဢၼ်ဢွၼ်လတ်းၽၢၼ်ႇၼႂ်းၵႄႈၵူၼ်းၼမ်ၼၼ်ႉ သမ်ႉပေႃးပူၼ်ႉၵႂႃႇယဝ်ႉ။ ၽိူဝ်ႇႁူႉတူဝ်မႃးၶိုၼ်းၵေႃႈ မိုဝ်းသွင်ၶႃသွတ်ႇၵွင်ႉယိပ်းၵၼ် သမ်ႉပေႃးမၼ်ႈတဵင်ႈတဵင်ႈ။ လႅင်းမိူင်းဢဝ်မိုဝ်းဢုၼ်ႇဢုၼ်ႇမၼ်းလႄႈၶမ်းႁွမ် ယိပ်းၸွမ်ႇသႂ်ႇထွင်းသိူဝ်ႈၼႃမၼ်းၼၼ်ႉသေ ၶမ်းႁွမ်ၵေႃႈတင်ႈၸႂ်ႁဵတ်းမိူၼ်ဢမ်ႇသူၼ်ၸႂ်ယဝ်ႉ လၵ်ႉယုမ်ႉယူႇ ၵူၺ်းၵႃႈ လႅင်းမိူင်းၵေႃႈလၵ်ႉလေႉတႃတူၺ်းယူႇ။
တီႈၼႂ်းပၢင်မူၼ်ႈသိူဝ်း ဢၼ်မီးၵူၼ်းၼမ်ပေႃးတဵမ်ပၢင်ႇ တီႈၶဵင်ႇမူၼ်ႈသိူဝ်းပၢၼ်မႂ်ႇ မီးၸဵမ်တၢင်းၵႃႈပၢၼ်မႂ်ႇ၊ ၵႃႈၼူၵ်ႉၵႃႈတူဝ်းၸိူဝ်းၼႆႉသေ မီးပႃးတၢင်းၵႃႈႁၢင်ႈလီလီ မႃးၼႄပၼ်လၢႆဢၼ်လၢႆမဵဝ်းလႄႈ ၸုမ်းတၢင်းၵႃႈလၢႆတီႈလၢႆတၢင်းမႃးမူၼ်ႈသိူဝ်းၼႄ လိူဝ်သေတၢင်းၵႃႈယဝ်ႉ ၸဵမ်ၽူႈႁွင်ႉၵႂၢမ်း ၸိုဝ်ႈသဵင်ယႂ်ႇၼႂ်းမိူင်းတႆးၼၼ်ႉၵေႃႈဢွၼ်ၵၼ်ႁွတ်ႈမႃးယဝ်ႉ။
လိူဝ်သေၶဵင်ႇမူၼ်ႈသိူဝ်းပၢၼ်မႂ်ႇယဝ်ႉ ပၢၼ်ၵဝ်ႇၼႆၵေႃႈမီးထႅင်ႈၶဵင်ႇၼိုင်ႈႁင်းမၼ်း မေႃၵႂၢမ်းလူင်လၢႆလၢႆၵေႃႉႁွတ်ႈၽႅဝ်မႃးႁွင်ႉ ၵူၼ်းၼမ်ၵိုၼ်းဢမ်ႇပိူင်ႈသင်တင်းပၢၼ်မႂ်ႇၼင်ႇၵဝ်ႇ။
လႅင်းမိူင်းဢၼ်ၸုၵ်းယူႇႁိမ်းၶမ်းႁွမ်ၼၼ်ႉၵေႃႈ ႁိုဝ်တေႁၢမ်ႈသၢႆတႃလႆႈတႃႇတေဢမ်ႇဝၢႆႇတူၺ်းၶမ်းႁွမ်ၼၼ်ႉလႆႈလႃႇ ယူႇယူႇၵေႃႈ ၸၢႆႉသၢႆတႃတူၺ်းၶမ်းႁွမ် ဢၼ်ၸုၵ်းသေမုင်ႈတူၺ်းၼႂ်းပွႆးယူႇၼၼ်ႉ လႆႈႁၼ်ၶမ်းႁွမ်မီးတၢင်းသိူဝ်းၵေႃႈ ယုမ်ႉဢွၵ်ႇမႃးႁင်းၵူၺ်းမၼ်းယဝ်ႉ။ ယိုင်ႈၵူၼ်းၵိုၼ်း တီႈယူႇယိုင်ႈၵပ်ႉၵႅပ်ႈ မိူဝ်ႈတီႈယူႇၵႅပ်ႈ ၵူၼ်းၵေႃႈၽိုတ်ႉၵၼ်ယူႇ သမ်ႉပေႃးဢမ်ႇၶႂ်ႈမီးတီႈတမ်းတိၼ်ယဝ်ႉ တူဝ်ဢွၼ်ႇၶမ်းႁွမ်ၼၼ်ႉၵေႃႈ ၵိုၵ်းၸပ်းလႅင်းမိူင်းယူႇယဝ်ႉလူး။
ၶမ်းႁွမ်ၵေႃႈ မိူဝ်ႈလႆႈမႃးလႄႇတူၺ်းၼႂ်းပွႆးၸိူင်ႉၼႆ တႃၼွၼ်းသမ်ႉပေႃးၸိုၼ်ႈ ႁိူဝ်ႉသမ်ႉပေႃးႁၢႆ၊ သမ်ႉဝႃႈလူမ်းထွင်းယူႇသေတႃႉ ၵတ်းယူႇၵေႃႈ ယင်းဢုၼ်ႇထိုင်ၼႂ်းၸႂ်ယဝ်ႉ။ ယူႇယူႇငိၼ်းသဵင်ၸၢၵ်ႈမေႃးမႃးလႄႈ လႅင်းမိူင်း ၸၼ်ဢဝ်ၶမ်းႁွမ်ၽၢတ်ႇဢွၵ်ႇမူႇၵူၼ်းၼမ်ၼၼ်ႉ လူင်းၵႂႃႇတၢင်းႁွင်ႈၼႄပိုၼ်းယဝ်ႉ ႁႂ်ႈၶမ်းႁွမ်ၼင်ႈပႂ်ႉတၢင်းၼႃႈႁွင်ႈၼၼ်ႉသေ ၵႂႃႇၵပ်းၸၢၵ်ႈမၼ်းယဝ်ႉ ၶိုၼ်းမႃးၸူးၶမ်းႁွမ်
“ၶမ်းႁွမ်!…ႁဝ်းတေလႆႈၵႂႃႇယဝ်ႉ”
ဢဝ်ၶမ်းႁွမ်တူၵ်းၸႂ်လႄႈ “သူတေၵႂႃႇလႂ်..”
“သူလၢတ်ႈႁႂ်ႈသႅင်ၽွင်းမႃးႁႃသူတီႈၼႆႈၸွင်ႇလႆႈႁိုဝ်”
“ႁဝ်းထၢမ်ဝႃႈသူတေၵႂႃႇလႂ်…ယူႇယူႇၵေႃႈလၢတ်ႈဝႃႈတေၵႂႃႇၸိူင်ႉၼႆ တေပွႆႇႁႂ်ႈႁဝ်းယူႇၵေႃႉလဵဝ်ၸိူင်ႉၼၼ်ႁႃႉ”
လႅင်းမိူင်းၵေႃႈထွတ်ႇဢဝ်သိူဝ်ႈမၼ်းႁူမ်ႇပၼ်ၶမ်းႁွမ်ယဝ်ႉ “ႁဝ်းဢမ်ႇမီးၶၢဝ်းယၢမ်းယဝ်ႉ…ၸွင်ႇၵွႆႈလၢတ်ႈသူၵမ်းလင်ၼႃႈ”
သမ်ႉပေႃးဢဝ်ၶမ်းႁွမ်ဢမ်ႇၸၢင်ႈတၵ်းသဵင်လၢတ်ႈၸိူင်ႉႁိုဝ်ယဝ်ႉ လူတ်ႉဢၼ်မႃးႁပ်ႉလႅင်းမိူင်းၼၼ်ႉၵေႃႈႁွတ်ႈမႃးသေ လႅင်းမိူင်းတင်းမႆႈၸႂ်တင်းၸႂ်ဢမ်ႇလီ ၶိုၼ်ႈလူတ်ႉၽႃႇၽုင်ၵူၼ်းၼမ်ဢွၵ်ႇပၢင်ပွႆးၵႂႃႇယဝ်ႉ။
ၶမ်းႁွမ်ၵေႃႈၵပ်းသိုပ်ႇသႅင်ၽွင်းဢမ်ႇလႆႈလႄႈ ၵႃႈလႆႈပႂ်ႉယူႇတီႈႁွင်ႈၼႄပိုၼ်းၼၼ်ႉၵူၺ်း၊ မိူဝ်ႈႁၼ်ၵူၼ်းၶဝ်ႈၶဝ်ႈဢွၵ်ႇဢွၵ်ႇယူႇၼႂ်းႁွင်ႈၼၼ်ႉ ႁွပ်ႇတင်းသိူဝ်ႈလႅင်းမိူင်းယဝ်ႉ ၶဝ်ႈလႄႇလဵပ်ႈတူၺ်းၼႂ်းႁွင်ႈၼႄပိုၼ်းၼၼ်ႉယူႇ။
တီႈၼႂ်းႁွင်ႈၼႄပိုၼ်းၼၼ်ႉတေမီးဝႆႉယူႇသွင်ႁွင်ႈ ႁွင်ႈၼႄပိုၼ်းတႆးလႄႈ ႁွင်ႈၼႄပိုၼ်းယႃႈမဝ်းၵမ်ၼႆသေ ၶမ်းႁွမ်ၶဝ်ႈၵႂႃႇဢႅဝ်ႇယဵမ်ႈတူၺ်း ၼႂ်းႁွင်ႈၼႄပိုၼ်းတႆးဢွၼ်တၢင်း တီႈၼႂ်းႁွင်ႈၼႄပိုၼ်းတႆးၼၼ်ႉ လႆႈႁၼ်ၶႅပ်းႁၢင်ႈၵဝ်ႇၵႄႇတင်းၼမ်ဢၼ်ၼႄဝႆႉလႄႈ ၶႅပ်းႁၢင်ႈဢၼ်ဢမ်ႇပႆႇႁိုင်ၵေႃႈမီးယူႇ။ တေမီးၶႅပ်းႁၢင်ႈၽူႈဢွၼ်ႁူဝ်တႆး၊ ၶႅပ်းႁၢင်ႈၵၢၼ်တူင်ႉၼိုင်တႆး ပၢၼ်သိုပ်ႇပၢၼ် ဢၼ်ပူၼ်ႉမႃးတေႃႇထိုင်မိူဝ်ႈလဵဝ်လႄႈ ၶူဝ်းၸႂ်ႉၶူဝ်းသွႆတႆးႁဝ်း ၾိင်ႈငႄႈၾိင်ႈထုင်းတႆးၸၵႂႃႇၸိူဝ်းၼႆႉယဝ်ႉ။
မိူဝ်ႈတိုၵ်ႉပႆလဵပ်ႈတူၺ်းယူႇၼၼ်ႉ သႅင်ၽွင်းၵေႃႈႁွတ်ႈမႃး ပႃးလွင်ႈမႆႈၸႂ်သေ လၢၵ်ႈၶႅၼ်ၶမ်းႁွမ်ဢွၵ်ႇမႃးတၢင်းၼွၵ်ႈယဝ်ႉ။
“ၸွင်ႇသူပဵၼ်သင်ႁိုဝ်!!… ”
“ဢမ်ႇ!…သူပဵၼ်သင်ပေႉႁိူဝ်ႉလူင်ႁိူဝ်ႉလၢင်လႃႇ”
“လႅင်းမိူင်းလၢတ်ႈဝႃႈသူယူႇၵေႃႉလဵဝ်ၼႆ…ႁဝ်းၵေႃႈမႆႈၸႂ်…ၼႅတ်ႈမႃးၼၼ်ႉၼႃႇ…”
“လႅင်းမိူင်းသိုပ်ႇၾူၼ်းၸူးသူႁ… ”
“ဢမ်ႇ…ႁူပ်ႉၺႃးမၼ်းၸွမ်းတၢင်း…ၶဝ်မႆႈၸႂ်သူ…လၢတ်ႈသမ်ႉယဝ်ႉသမ်ႉထႅင်ႈၼၼ်ႉယဝ်ႉ…”
“သႅင်ၽွင်းႁဝ်းၶႂ်ႈမိူဝ်းယဝ်ႉ…”
“ပေႃးတၼ်းၶႂ်ႈမိူဝ်းယဝ်ႉႁ…ႁဝ်းယင်းပႆႇတၼ်းလႆႈလႄႇၸွတ်ႇ… ”
သႅင်ၽွင်းဢွၼ်ဢဝ်ၶမ်းႁွမ် ဢွၵ်ႇပၢင်မူၼ်ႈသိူဝ်းမႃးသေ မႃးလႄႇၸွမ်းတႅဝ်းသႅင်ႇၸိူဝ်းၼၼ်ႉထႅင်ႈ။ သႅင်ႇတၢင်းၶၢႆၵေႃႈ မီးၵူႈၸိူဝ်းၵူႈပိူင် သႅင်ႇတၢင်းၵိၼ်၊ ၶူဝ်းၶွင်ၸႂ်ႉတိုဝ်း ၵူႈမဵဝ်းမဵဝ်း ၸွမ်းၼင်ႇဢၼ်ႁဝ်းၶႂ်ႈလႆႈၶႂ်ႈၵိၼ်ၶႂ်ႈသိုဝ်ႉၸိူဝ်းၼၼ်ႉမီးမူတ်းယဝ်ႉ။
သႅင်ႇတၢင်းၵိၼ်ၼႆၵေႃႈ မီးၸဵမ်တၢင်းၵိၼ်တႆး၊ တၢင်းၵိၼ်ထႆး၊ တၢင်းၵိၼ်ပၢင်ႇလၢႆႇ၊ တၢင်းၵိၼ်ဢၼ်ဢမ်ႇယၢမ်ႈႁူႉၸၵ်း ဢၼ်ဢမ်ႇယၢမ်ႈႁၼ်ၸိူဝ်းၼႆႉၵေႃႈမီးယဝ်ႉ။ သင်မၵ်ႉလႄႈၶႂ်ႈၵိၼ်ၶႂ်ႈၸၢမ်းၵေႃႈ တေႃႈႁိုဝ်ပႂ်ႉၶၢဝ်းယၢမ်းသင် သိုဝ်ႉၵိၼ်ၵမ်းလဵဝ်ႁေယဝ်ႉၼႃႇ။ လိူဝ်သေတၢင်းၵိၼ်ယဝ်ႉ လၢၼ်ႉၶၢႆၶူဝ်းၵေႃႈ မီးၶူဝ်းၵူႈၸိူဝ်ႉၵူႈပိူင်ၼၼ်ႉယဝ်ႉ ၶူဝ်းတႆး၊ ၶူဝ်းသိုၵ်း၊ သိူဝ်ႈၶူဝ်းမၢႆတွင်း၊ ၶူဝ်းၼုင်ႈၼွၵ်ႈၼုင်ႈၼႂ်း ၸဵမ်ႁူဝ်တေႃႇတိၼ်ၼၼ်ႉယဝ်ႉ။ လိူဝ်သေၶူဝ်းၼုင်ႈယဝ်ႉ ၶူဝ်းၸႂ်ႉၶူဝ်းသွႆ ၸွမ်းတူဝ်ၸွမ်းၶိင်း ၸွမ်းႁိူၼ်းၸွမ်းယေး မီးၵူႈၸိူဝ်းၵူႈလွင်ႈ။ လိူဝ်သေၼၼ်ႉၵေႃႈ သမ်ႉမီးပႃးသႅင်ႇလဵၼ်ႈၵဵမ်း ၵဵမ်းလုၵ်ႈဢွၼ်ႇၵူၼ်းလူင် တႃႇမူၼ်ႈတႃႇၵျေႃႇ မီးတဵမ်တဵမ်ထူၼ်ႈထူၼ်ႈ ယူႇယဝ်ႉ။
ၵၢင်ဝၼ်းႁိူဝ်ႈဢွၵ်ႇမွၵ်ႈၸိၵ်းလွႆ သဵင်တူႇရိယႃႇလႄႈ သဵင်ၵွင်ႁူမ်ႈလင်မေႃး သၢႆသိုၵ်းၶပ်ႉယႆၸႅၼ်ႇပႆၸွမ်းတၢင်း ပၢႆတိၼ်ယုၵ်ႉယၢင်ႈတမ်းၸွမ်းသဵင်ၵွင် ပႆၽတ်ႉၽဵင်ႇၵၼ်ပဵၼ်ထႅဝ်သိုဝ်ႈယၢဝ်းပဵၼ်တႅဝ်းလီ ယၵ်ႉတူၺ်းၸွမ်းၵႂႃႇ လီၵျေႃႇၼႃႇ ၼႂ်းၵၢင်သဵၼ်ႈတၢင်းသၢႆသိုၵ်းပေႃးတဵမ်ၼႆၵေႃႈ ၸွမ်းၶၢင်ႈတၢင်းၼၼ်ႉတေႃႈႁိုဝ်တေယွမ်း သိူဝ်ႈၶူဝ်းတႆး လိူင်လႅင်ၶွၼ်ႇသွမ်ႇသီလၢႆးလေႃး ယိပ်းတင်းၸွမ်ပိဝ်တႆးယဝ်ႉ တူၺ်းႁူမ်ႈၵၼ် ႁၼ်ႁၢင်ႈလီၼႃႇ မၢင်ၵေႃႉဢဝ်တင်းၾူၼ်း၊ မၢင်ၵေႃႉဢဝ်တၢင်းၵွင်ႈထႆႇသေ ဢွၼ်ၵၼ်ထႆႇၶႅပ်းႁၢင်ႈယူႇ။ ၵူၼ်းပဵၼ်မူႇပဵၼ်ၸုမ်း ၸုၵ်းဝႆႉၶႅပ်ႇၶၢင်ႈတၢင်းပေႃးသတ်ႉတဵမ်ၵႂႃႇသဵင်ႈ။
ဝၢႆးသေသၢႆသိုၵ်းပႆပူၼ်ႉၵႂႃႇယဝ်ႉ ၵူၼ်းႁူမ်ႈမူႇၵိုၼ်းၶွၼ်ႈတီႈၼႂ်းပၢင်ပွႆး သမ်ႉပေႃးၽိုတ်ႉၵၼ်ယူႇ ၶႂ်ႈႁၼ်ပိူၼ်ႈလဵၼ်ႈၸိူင်းတိုၵ်း လၢႆးၸိူင်းသိုၵ်း ဢၼ်မႃးၼႄၼႂ်းပွႆးၼၼ်ႉယဝ်ႉ။ မိူဝ်ႈၽွင်းသၢႆသိုၵ်းၶဝ်ႈမႃး ၵူၼ်းတူၺ်းပေႃးဢမ်ႇၶႂ်ႈမီးတီႈယူႇယဝ်ႉလူး ဢမ်ႇႁိုင်သၢႆသိုၵ်းၵေႃႈၶဝ်ႈဢဝ်တီႈယူႇၵၼ်မူတ်းယဝ်ႉ။
ယၢမ်းၼၼ်ႉသဵင်ၵွင်တူႇရိယႃႇၵေႃႈဢွၵ်ႇမႃးသေ ဢွၼ်ၵၼ်ႁွင်ႉၵႂၢမ်းၸိူဝ်ႉၸၢတ်ႈၸွမ်းၵွင် သဵင်ၵွင်လႄႈသဵင်ၵူၼ်းႁွင်ႉၵႂၢမ်းယွၼ်ႈတုမ်ႉပေႃးၵွင်ႈႁူၺ်ႈၵွင်ႈလွႆယဝ်ႉ။
ၶမ်းႁွမ်ၵေႃႈယူႇတီႈၽူႈၶဝ်ႈႁူမ်ႈပွႆးၵေႃႉၼိုင်ႈသေ လႆႈမႃးၶဝ်ႈႁူမ်ႈၼၼ်ႉပဵၼ်ဢၼ်ၸူမ်းသိူဝ်းတႄႉယဝ်ႉ။ ပဵၼ်ပွႆးဢၼ်ယိုင်ႈယႂ်ႇ ပဵၼ်ဝၼ်းဢၼ်ၵိုၵ်းပိုၼ်းမိူင်းတႆးႁဝ်းၼၼ်ႉယဝ်ႉ။ ၸဵတ်းဝၼ်းလိူၼ်သွင်ၼႆႉ ပဵၼ်ဝၼ်းဢၼ်ၼႄသၢၵ်ႈသေႇလႆႈဝႃႈ ႁဝ်းမီးမိူင်း၊ မီးၽႅၼ်ႇလိၼ်ႁင်းၶေႃ၊ မီးၸွမ်ပိဝ်တႆး၊ မီးၵႂၢမ်းၸိူဝ်ႉၸၢတ်ႈပဵၼ်ၶွင်တူဝ်ၵဝ်ႇၼၼ်ႉယဝ်ႉ။ ယဝ်ႉပဵၼ်မိူဝ်ႈၽွင်းဢၼ်တိုၵ်ႉ ၶတ်းၸႂ်ဢဝ်လွတ်ႈလႅဝ်းသဝ်းၶေႃတႂ်ႈမိုဝ်းဢိင်းၵလဵတ်ႈၼၼ်ႉသေ သမ်ႉပဵၼ်လိူၼ်လဵဝ်ၵၼ်တၢင်း ဝၼ်းထီႉ12.02.1947 ဝၼ်းဢၼ်လႆႈလူင်းလၢႆးမိုဝ်းလိၵ်ႈႁူမ်ႈမၢႆပၢင်လူင်ၼၼ်ႉယူႇ။ ပေႃးတွင်းဝၼ်းၸိူဝ်ႉၸၢတ်ႈၵေႃႈ ႁဵတ်းႁႂ်ႈတွင်းလႆႈဝႃႈ ပဵၼ်ဝၼ်းဢၼ်ႁဝ်းတူၵ်းယူႇ ၼႂ်းမိုဝ်းၽူႈၶႂၢၵ်ႈမိူင်းမႃးၵႃႈႁိုဝ်ၼႆၼၼ်ႉယဝ်ႉ။
ဢၼ်ႁဵတ်းပွႆးယူႇၵူႈပီၼႆႉ ဢမ်ႇၸႂ်ႈဝႃႈတႃႇၵျေႃႇၵူၺ်း ၶႂ်ႈႁႂ်ႈတူၺ်းၶိုၼ်းဝႃႈ တွၼ်ႈတႃႇလွင်ႈလွတ်ႈလႅဝ်း၊ တွၼ်ႈတႃႇလွင်ႈၵတ်းယဵၼ်၊ တွၼ်ႈတႃႇသုၼ်ႇလႆႈႁဝ်းၼၼ်ႉ ႁဝ်းလႆႈဝႆႉၵႃႈႁိုဝ်ယဝ်ႉလႃႇ၊ ပုၼ်ႈၽွၼ်းႁဝ်းၼၼ်ႉႁဝ်းႁဵတ်းပၼ်လႆႈၵႃႈႁိုဝ်ယဝ်ႉ ထိုင်ဝၼ်းမိူဝ်ႈၼႆႉၼၼ်ႉ ႁဝ်းလႆႈႁဵတ်းသင်ပၼ်ၽွင်ႈယဝ်ႉ ပီၵေႃႈယၢဝ်းၶၢဝ်းၵေႃႈႁိုင်မႃး သင်ဝႃႈပႆႇလႆႈႁဵတ်းသင်ပၼ်ၵေႃႈ တႄႇႁဵတ်းၵႂႃႇလႄႈယင်းပႆႇတူၵ်းလိုၼ်းလူး။ ႁဵတ်းႁႂ်ႈၶမ်းႁွမ်ဝူၼ်ႉလႆႈမႃးတင်းၼမ် ဢၼ်လႆႈပဵၼ်တႆးၵေႃႉၼိုင်ႈ လႆႈမႃးၸုၵ်းယူႇတီႈၼႂ်းပၢင်ႇၼႆႉၼၼ်ႉ ၵၢမ်ႇလီၵႃႈႁိုဝ် လႆႈမႃးယုၵ်ႉယွင်ႈဢူမုၼ်ၽူႈဢၼ် ႁဵတ်းၵၢၼ်ပၼ်တွၼ်ႈတႃႇတႆးမႃးၸိူဝ်းၼၼ်ႉ။
တီႈၼႂ်းပၢင်ၵႅဝ်ႈပွတ်းၼႂ်ၼၼ်ႉၵေႃႈ ၵေႃႉပဵၼ်ၽူႈၵႅဝ်ပၢင် ၵႅဝ်လၢတ်ႈၸွမ်းၶပ်ႉမၢႆဢၼ်ယဝ်ႉဢၼ်ယူႇ။ ၽူႈၼင်ႈၸိုင်ႈၼႂ်းပၢင်ပွႆးၵေႃႈ ပိုတ်ႇပၢင်ၵႂႃႇ ၽူႈတၢင်လၢတ်ႈၵေႃႉၼိုင်ႈယဝ်ႉၵေႃႉၼိုင်ႈၵေႃႈဢွၵ်ႇမႃးလၢတ်ႈ ၵဵဝ်ႇၵပ်းဝၼ်းၸိူဝ်ႉၸၢတ်ႈၸိူဝ်းၼႆႉသေလႄႈ ၶၢဝ်းယၢမ်းႁိုင်ယူႇတၢၼ်ႇတၢၼ်ႇ ၵူၼ်းမိူင်းၸိူဝ်းယူႇတၢင်းၶၢင်ႈၼၼ်ႉ မၢင်ၸိူဝ်းၵေႃႈမႆႈၼႃႇ၊ မၢင်ၸိူဝ်းၵေႃႈဢမ်ႇၶႂ်ႈထွမ်ႇယဝ်ႉ..မၼ်းႁိုင်ၼႃႇ၊ မၢင်ၸိူဝ်းၵေႃႈၵူၼ်ႉၼႃႇ၊ မၢင်ၸိူဝ်းၵေႃႈဢမ်ႇလီထွမ်ႇ ထွမ်ႇဢမ်ႇပွင်ႇ၊ ဢမ်ႇလီသူၼ်ၸႂ်လႄႈ ဢွၵ်ႇပၢင်ပွႆးၵႂႃႇၸိူဝ်းၼႆႉၵေႃႈမီးတင်းၼမ် ၵူၼ်းဢၼ်ၵိုတ်းၸွမ်းၶၢင်ႈၼၼ်ႉ ၵိုတ်းႁၢင်ႇႁၢင်ႇၵူၺ်းယဝ်ႉ။
ၶမ်းႁွမ်ၵေႃႈၸုၵ်းသေထွမ်ႇၸွမ်းပိူၼ်ႈၼၼ်ႉယဝ်ႉ။ သမ်ႉဝႃႈတေၸုၵ်းၵူၼ်ႉတၢၼ်ႇလႂ်လႅတ်ႇမႆႈႁႅင်းၼႃႇသေတႃႉ ပေႉၸႂ်ၵူၼ်းသိုၵ်းဢၼ် ၸုၵ်းပေႃးၼိမ်ၸိုင်ႈၸိုင်ႈ ဢမ်ႇၸၢင်ႈတူင်ႉၵႂႃႇလႂ်လႆႈသေဢိတ်းၼၼ်ႉၶဝ်တေၵူၼ်ႉၵႃႈႁိုဝ်။ ၶမ်းႁွမ်ၵေႃႈတင်ႈၸႂ်ထွမ်ႇယူႇ ၼိုင်ႈပီမီးၼိုင်ႈပွၵ်ႈၵူၺ်းလူး ဢမ်ႇႁူႉဝႃႈမိူဝ်ႈလႂ်တေလႆႈမီးတိုဝ်ႉတၢင်းၸိူင်ႉၼႆထႅင်ႈ။
ဝၢႆးသေမွၵ်ႇလၢတ်ႈၶေႃႈၵႂၢမ်းယဝ်ႉတူဝ်ႈၵႂႃႇ သၢႆသိုၵ်းၸိူဝ်းၼၼ်ႉၵေႃႈဢွၼ်ယုၵ်ႉတိၼ်တမ်းယၢင်ႈၸွမ်းသဵင်ၵွင်ယဝ်ႉ ၶဝ်ႈထႅဝ်ၼပ်ႉယမ်ဢွၵ်ႇၵႂႃႇၵမ်းၸုမ်းၸုမ်း ၶပ်ႉယႆၸႅၼ်ႇၵၼ်လူင်ၵႂႃႇ ပဵၼ်ဢၼ်လီတူၺ်းၼႃႇ။ လၢႆးၼပ်ႉယမ်ၶဝ်ၵေႃႈ ဢမ်ႇၸႂ်ႈဝႃႈၼပ်ႉယမ်ယူဝ်းယူဝ်းၵူၺ်း ယၢင်ႈယၢဝ်းပႆသေၼပ်ႉယမ်ဝႃႇ တိၼ်ၵေႃႈယၢင်ႈယၢဝ်းၽတ်ႉၽဵင်ႇၵၼ်ပဵၼ်ထႅဝ်ၵႂႃႇၵမ်းၶၵ်ႉၶၵ်ႉၼၼ်ႉယဝ်ႉ။ ၼႆႉသေဢမ်ႇၵႃး မီးပႃးလႅၼ်ႈသိူဝ်ၾႆးသေၼပ်ႉယမ် ပဵၼ်ဢၼ်လႅၼ်ႈဝႆးၾႆးၶၼ် ၸၼ်တိၼ်ယုၵ်ႉၶိုၼ်ႈသုင်ၵျွၵ်းလႅၼ်ႈလူင်ၵႂႃႇ ၽတ်ႉၽဵင်ႇၵၼ်ပဵၼ်ဢၼ် လႆႈႁၼ်ယဝ်ႉၶႂ်ႈႁၼ်ထႅင်ႈၼၼ်ႉယူႇ။ တေဝႃႈႁိုဝ်ၵေႃႈ လႅၼ်ႈသိူဝ်ၾႆးလူးမၼ်းဝႆးလႄႈဢမ်ႇတၼ်းလႆႈႁၼ်ၼၼ်ႉၼႃႇ။
မိူဝ်ႈၼႆႉတၢင်းဝၼ်းလႅင်းမိူင်းႁၢႆၵႂႃႇ ၼႂ်းၾူၼ်းၵေႃႈဢမ်ႇလၢတ်ႈတေႃႇမႃး ႁႃတူၺ်းၼႂ်းပွႆးၵေႃႈ ဢမ်ႇႁၼ်ငဝ်း ၶမ်းႁွမ်ယၵ်ႉတူၺ်းသိူဝ်ႈသွၼ်ႉ ဢၼ်ပၼ်ဝႆႉၶမ်ႈဝႃးၼၼ်ႉ မွင်းပႂ်ႉၸဝ်ႈၶွင်မၼ်းတေမႃးဢဝ်ၶိုၼ်းယူႇ။ မိူဝ်ႈတိုၵ်ႉၼင်ႈမိုင်ယူႇၼၼ်ႉ ……
“ၶမ်းႁွမ်!… ဢမ်ႇၵႂႃႇပွႆးႁၶမ်ႈၼႆႉ”
“ဢမ်ႇယဝ်ႉ……” မိူၼ်ဝႃႈဢမ်ႇမီးႁႅင်းတႃႇတေၵႂႃႇထႅင်ႈၼၼ်ႉယဝ်ႉ။
“ယႃႇလႅၼ်ၵၼ်လႄႈ…တေႃႈၼင်ႇၶမ်ႈဝႃး…ယင်းလၢတ်ႈဝႃႈဢမ်ႇၵႂႃႇယူႇ…”
“မၼ်းၵေႃႈပဵၼ်ၶမ်ႈဝႃးၵူၺ်း…ၶမ်ႈၼႆႉတႄႉဢမ်ႇၵႂႃႇတႄႉယဝ်ႉ…”
“ဢဝ်ဝႃႈလႄႈ…ပေႃးၶႂ်ၵႂႃႇၵေႃႈပိူၼ်ႈတေမႃးႁပ်ႉၵူၺ်းၼေႃ…”
သႅင်ၽွင်းၵေႃႈယွၵ်ႇၶမ်းႁွမ်သေဢွၵ်ႇၽၵ်းတူၵႂႃႇပႅတ်ႈဝႆးဝႆးယဝ်ႉ။
သိုပ်ႇလူထႅင်ႈတွၼ်ႈတေမႃးၶႃႈ။
