တွၼ်ႈသိပ်းဢဵတ်း
ဢူႈမႄႈၵူႈၵေႃႉ ဢမ်ႇဝႃႈလုၵ်ႈတေပဵၼ်ၸိူင်ႉႁိုဝ် ၵူၼ်းၵေႃႉဢၼ်ၶဝ်ၵိူတ်ႇမႃးၼၼ်ႉ ႁူႉတိုၼ်းႁၵ်ႉႁွမ်လႄႈ ၶႂ်ႈႁၼ်ၶဝ်ယူႇလီၵိၼ်ဝၢၼ်၊ ၵတ်းယဵၼ်သိူဝ်းသႃႇ ဢမ်ႇဝႃႈမိူဝ်ႈလဵဝ်ႁိုဝ်၊ မိူဝ်းၼႃႈ သုၼ်ႇၼိုင်ႈၼႂ်းၸၢတ်ႈပၢၼ်ဢူႈမႄႈၼၼ်ႉ ႁူႉတိုၼ်းတေဝူၼ်ႉထိုင်လုၵ်ႈယူႇတႃႇသေႇ။ လုၵ်ႈယူႇလီယူႇႁိုဝ်၊ လႆႈၵိၼ်ဢိမ်ႇယူႇႁႃႉ၊ ၶဝ်ႁဵတ်းသင်ယူႇ၊ ၶဝ်ပဵၼ်ၸိူင်ႉႁိုဝ် ၶႂ်ႈႁူႉၶႂ်ႈႁၼ်ၸွမ်းယူႇတႃႇသေႇၼၼ်ႉယဝ်ႉ။
ၼႂ်းဢူၵ်းႁူဝ်ၸႂ် ဢူႈမႄႈၼၼ်ႉပဵၼ်ၸိူင်ႉႁိုဝ်တေႉတေႉၼႆ ၶဝ်ဢမ်ႇတွၼ်ႉလၢတ်ႈဢွၵ်ႇမႃးသိုဝ်ႈသိုဝ်ႈ၊ မႆႈၸႂ်ယူႇၵေႃႈဢမ်ႇလၢတ်ႈႁေ ဢဝ်ၶေႃႈဢၢင်ႈဢၼ်ပုၼ်ႉဢၼ်ၼႆႉ ယႃႇႁဵတ်းၼၼ်ယႃႇႁဵတ်းၼႆလႄႈ၊ ပိူၼ်ႈဢမ်ႇလီႁဵတ်း ပေႃးႁဵတ်းမၼ်းဢမ်ႇလီ၊ ပႂ်ႉႁႄႉႁၢမ်ႈဢမ်ႇပၼ်လုၵ်ႈႁဵတ်း လွင်ႈမဵဝ်းဢမ်ႇလီလႄႈ သူၼ်းဢီးႁႂ်ႈလုၵ်ႈႁဵတ်းလွင်ႈလီ ဢၼ်ထုၵ်ႇမႅၼ်ႈၵူၺ်းၵူၺ်း ၼၼ်ႉယဝ်ႉ။ ယွၼ်ႉပိူဝ်ႈ မိူဝ်ႈလုၵ်ႈ ၸဵပ်း၊ ၶႆႈ၊ ဢမ်ႇယူႇလီမႃးၼၼ်ႉ ၵေႃႉပဵၼ်ဢူႈမႄႈၵေႃႈ မိူၼ်တေၸဵပ်းၸွမ်းယဝ်ႉ။
ပေႃးဢူႈမႄႈဢမ်ႇလၢတ်ႈ ၵေႃႉပဵၼ်လုၵ်ႈတေႁူႉယူႇႁႃႉ လုၵ်ႈတေပွင်ႇၸႂ်ယူႇႁႃႉ ဝႃႈယွၼ်ႉသင်၊ လုၵ်ႈဢွၼ်ႇတေဢမ်ႇပွင်ႇၸႂ်ဝႃႈ လွင်ႈဢၼ်ဢူႈမႄႈႁၢမ်ႈၼၼ်ႉ မၼ်းပဵၼ်သင်၊ လုၵ်ႈၵူၺ်းႁူႉဝႃႈ ဢူႈမႄႈဢမ်ႇပၼ်ႁဵတ်းလႄႈ ဢမ်ႇထုၵ်ႇလီႁဵတ်းၵူၺ်း၊ သင်ပဵၼ်လုၵ်ႈဢွၼ်ႇဢၼ်ၶႂ်ႈၸၢမ်း ၶႂ်ႈႁူႉၶႂ်ႈႁၼ်ၼၼ်ႉ ယိုင်ႈဢူႈမႄႈႁၢမ်ႈ ယိုင်ႈၶႅၼ်းၶႂ်ႈႁဵတ်းထႅင်ႈလူးၵွၼ်ႇ။
မိူဝ်ႈၶႃႈတိုၵ်ႉဢၢင်ႈတေၵႂႃႇၼွၼ်းၶူတ်းၽႃႈယူႇၼၼ်ႉ ၼၢႆးႁဝ်းၵေႃႈ မိူၼ်တေႁူႉၶိုတ်းလႄႈ
“ပဵၼ်သင်လႄႈၵိၼ်ၶဝ်ႈယဝ်ႉ မႂ်းၵႂႃႇၼွၼ်းၵမ်းလဵဝ်လႃႇ လၢတ်ႈယူႇသေႇသေႇ ပိူၼ်ႈဢမ်ႇလီႁဵတ်းၼႆ”
ၵိၼ်ဢိမ်ႇတွင်ႉတဵမ်ယဝ်ႉၵေႃႈ လူဝ်ႇၼွၼ်းၵူၺ်းဢမ်ႇၸႂ်ႈႁိုဝ်၊ ဢၼ်ၶႃႈႁူႉတႄႉ။
“ၼၢႆး.. ပဵၼ်သင်လႄႈၵိၼ်ၶဝ်ႈယဝ်ႉ ပိူၼ်ႈဢမ်ႇလီၼွၼ်းၵမ်းလဵဝ်လႃႇ ၵႆႉႁၼ်မႄႈႁဝ်းၵေႃႈလၢတ်ႈၸိူင်ႉၼႆႁင်းၶႃႈတႃႇသေႇ” သၢႆႁိူဝ်ႈၼၼ်ႉထၢမ်တီႈၼၢႆးႁဝ်းယူႇ။
ၼၢႆးၵေႃႈ ထူၺ်ႈၸႂ်လူင်မႃးသေ “လုၵ်ႈဢွၼ်ႇၸိူဝ်းၼႆႉမဵဝ်းဢမ်ႇႁူႉသင်တေႉလူင် ပေႃးၵိၼ်ယဝ်ႉ ၵိုင်ႉၵၢင်ႉၼွၼ်းၵမ်းလဵဝ်ၼႆ ၵႆႉၸၢင်ႈပဵၼ်တွင်ႉၵပ်ႉတွင်ႉပိၵ်ႉလႆႈဢိူဝ်ႈ လိူဝ်ၼၼ်ႉသမ်ႉ ၸၢင်ႈမီးလူမ်းႁူင်းၶဝ်ႈထႅင်ႈဢွၼ်ႇဢိူဝ်ႈ”
မိူဝ်ႈၶႃႈငိၼ်းၸိူင်ႉၼၼ်ၵေႃႈ ၼႅတ်ႈလုၵ်ႉမႃးၼင်ႈသေ ဝူၼ်ႉတူၺ်းၶိုၼ်းယူႇ ၶႂ်ႈၸႂ်ႈၵေႃႈလႅပ်ႈတေၸႂ်ႈယူႇၵူၺ်း၊ ယွၼ်ႉပိူဝ်ႈၶႃႈၼၼ်ႉ တွင်ႉၵႆႉၵႆႉပိၵ်ႉယူႇတႃႇသေႇ မိူၼ်မၼ်းပဵၼ်သၽႃႇဝၵႂႃႇယဝ်ႉ။
ယၢမ်းၼၼ်ႉ ၸွမ်ၶိူဝ်းၵေႃႈ ႁွင်ႉၸူးၶႃႈမႃးသေ
“ဢေးယိင်း ၸွင်ႇၶႂ်ႈတူၺ်းၸိူင်းႁႃႉ!”
ပေႃးဝႃႈတူၺ်းၸိူင်းၼႆ ၼင်ႇႁၢင်ႈလူမ်းၶႂ်ႈၼွၼ်းၼၼ်ႉ ပေႃးႁၢႆလူင်ၵႂႃႇမူတ်းယဝ်ႉ။
“ၶႂ်ႈတူၺ်းဢိူဝ်ႈ!”
“ပႂ်ႉၵမ်ႉၼႃႈပေႃးၼႆ တေမိူဝ်းဢဝ်ၶွမ်းမႃး”
“ဢမ်ႇမီးၵၢၼ်ႁိူၼ်းတေႁဵတ်းၵၼ်ႁႃႉ မႃးဢွၼ်မၼ်းတူၺ်းၸိူင်းၸိူင်ႉၼႆ” ၼၢႆးႁဝ်းလၢတ်ႈ။
“တေဢဝ်မႃးပၼ်မၼ်းတူၺ်းၵူၺ်း ႁဝ်းၵေႃႈႁဵတ်းၵၢၼ်ႁဝ်းယူႇၵူၺ်းၼင်ႇၵဝ်ႇၵႂႃႈ ၼၢႆးၵေႃႈ” ၸွမ်ၶိူဝ်းတွပ်ႇၶိုၼ်း။
“ၶႃႈတေမိူဝ်းၸွမ်း!”
မွင်းလၢတ်ႈၸိူင်ႉၼႆၵူၺ်း ၶႃႈသမ်ႉပေႃးၶုၼ်ႇလုၵ်ႉမိူဝ်းၵႂႃႇၸွမ်းမၼ်းယူႇယဝ်ႉ။ ဢမ်ႇႁူႉဝႃႈ တၼ်းႁၢႆလွင်ႈၸႂ်လမ်ၵၼ်ၵႂႃႇမိူဝ်ႈလႂ်။ မိူဝ်ႈမိူဝ်းၸွမ်းတၢင်းယူႇၼၼ်ႉ ၶႃႈၵေႃႈ လႆႈထၢမ်ၸူးမၼ်းၵႂႃႇ
“ၶႃႈႁဵတ်းႁိုဝ်မႃးတီႈႁိူၼ်းလႃႇ ပီႈၸွင်ႇႁူႉႁႃႉ”
“ဢိူဝ်ႈ! ၶမ်ႈဝႃးႁၼ်မႂ်းဢမ်ႇမႃးႁိူၼ်းႁေပွၵ်ႈၵေႃႈ ႁဝ်းလႆႈဢွၼ်ၵၼ်ၸွမ်းၶႆႈမႂ်းၼၼ်ႉၼႃႇ..မိူၼ်ၶူးၽိဝ်ၾႃႉတေႁူႉဝႃႈမႂ်းမီးတီႈႁူင်းႁဵၼ်းလႄႈ လႆႈဢဝ်ၵႃးမၼ်းၵႂႃႇၸွမ်းၶႆႈသေ မၼ်းၵေႃႈလႆႈဢဝ်မႂ်းမႃးၼၼ်ႉယဝ်ႈ”
“ၸိူင်ႉၼၼ်ႁႃႉ!”
“ႁူႉယူႇဝႃႈၾူၼ်တူၵ်းၼႆ ပဵၼ်သင်လႄႈဢမ်ႇမႃးၸဵမ်ၸဝ်ႉၸဵမ်ၸဵဝ်းလႃႇ!”
“ၵေႃႈၶူးဝႃႈ ဢမ်ႇလူဝ်ႇမိူဝ်းႁိူၼ်းၼႆၼႃႇ! ၶႃႈၵေႃႈဢမ်ႇမႃးႁေၵူၺ်းဢိူဝ်ႈ!”
“မႂ်းတၼ်းပဵၼ်လုၵ်ႈႁဵၼ်းထွမ်ႇၶူးၸဵမ်မိူဝ်ႈလႂ်လႃႇ!”
လိူၵ်ႈလိူၵ်ႈ တၢင်းၵေႃႈသမ်ႉဢုင်လႄႈ မွၵ်ႇၵုမ်ႈၵေႃႈသမ်ႉသုမ်ႇ၊ မိူင်းၵေႃႈၸမ်ၶမ်ႈယဝ်ႉ၊ ၶႃႈၵေႃႈပႆတၢင်းဢမ်ႇပေႃးမေႃတူၺ်းတၢင်းၵႃႈႁိုဝ်၊ သမ်ႉပလၢတ်ႈသေ ၸွမ်ၶိူဝ်းၼၼ်ႉၵေႃႈမိုဝ်းဝႆးၼႃႇလႄႈ ၶုၼ်ႇဝၵ်ႉတၢဝ်းဢဝ်ၶႅၼ်ၶႃႈသေ ၼႅတ်ႈႁုၵ်ႉၸၼ်ၶဝ်ႈၸူးတူဝ်မၼ်းၵႂႃႇ၊ ၶႃႈၼၼ်ႉၵေႃႈ ပုင်ႈၶဝ်ႈၵွတ်ႇသႂ်ႇမၼ်းဢဝ်လီလီ၊ မိူဝ်ႈၼၼ်ႉ မၼ်းၵေႃႈ ၵိုင်ႉၵၢင်ႉဢီးၶႃႈဢွၵ်ႇပႅတ်ႈၵမ်းလဵဝ်။ ဢမ်ႇႁူႉဝႃႈမၼ်းတေႁပ်ႉၶႃႈဝႆႉႁဵတ်းသင်၊ ပေႃးဝႃႈမၼ်းတေဢီးၶႃႈပႅတ်ႈ၊ ဢဝ်ၶႃႈလူမ်ႉၼင်ႈလူင်းၵႂႃႇၼႂ်းဢုင်ႁေယဝ်ႉၼႃႇ။
ၶႃႈၵေႃႈတေၸၢင်ႈႁဵတ်းႁိုဝ်လႃႇ ၼင်ႈၸႄႈယူႇၼႂ်းၼမ်ႉဢုင်ၼၼ်ႉႁေယဝ်ႉလေႃႇ။ ၵၼ်ႉဝႃႈမိူဝ်ႈၼႆႉၵတ်းၼႃႇ ဢမ်ႇၵႂႃႇတၢင်းလႂ် ဢၢၼ်းတေဢမ်ႇဢၢပ်ႇၼမ်ႉၼႆၵႂႃႈ ႁိုဝ်ၸႂ်ႈလၢႆးမၼ်းၼႄႇၸိူင်ႉၼႆ။
“တင်ႈၸႂ်ဢီးၵၼ်ၸွင်ႇၸႂ်ႈ ပဵၼ်သင်လႄႈႁဵတ်းၸိူင်ႉၼႆလႃႇ ဢၢၼ်းႁဵတ်းၶဵၼ်ၵၼ်ၸွင်ႇၸႂ်ႈႁိုဝ်”
“ဢမ်ႇၸႂ်ႈၸိူင်ႉၼၼ်! ႁဝ်းၵေႃႈဢမ်ႇလႆႈတင်ႈၸႂ်.. ပဵၼ်သင်ဢမ်ႇမေႃပႆလီလီလႃႇ”
“ၸၼ်ၶႃႈလုၵ်ႉလႄႈပေႃးၼႆ”
မၼ်းၼၼ်ႉၵေႃႈ ထွတ်ႇသိူဝ်ႈယၢဝ်းမၼ်းသေ ပၼ်ႁႂ်ႈၶႃႈယိပ်းယဝ်ႉ
“ၵေႃႈယဝ်ႉလႄႈ လုၵ်ႉႁင်းၵူၺ်းၵေႃႈလႆႈယူႇ ၶႃႈဢမ်ႇမိူဝ်းၸွမ်းယဝ်ႉ ၸဵဝ်းမိူဝ်းၸဵဝ်းမႃးလႄႈ”
ပေႃးၶႃႈဢမ်ႇလူဝ်ႇတူၺ်းၸိူင်းတႄႉ တေဢမ်ႇၸႂ်လီမိူၼ်ၼႆလေႃႇ၊ တေလႃႇပၼ် ယႃႇႁႂ်ႈမၼ်းပေႃးၶႂ်ႈမႃးယဵပ်ႇၼႂ်းဝၢင်းႁိူၼ်း ၼၼ်ႉယဝ်ႉ။ မိူဝ်ႈႁဝ်းလူဝ်ႇပိူၼ်ႈၵေႃႈ လူဝ်ႇလႆႈမေႃဢုပ်ႇလၢတ်ႈတေႃႇပိူၼ်ႈ လူဝ်ႇလႆႈမေႃယဵၼ်ႉၵၼ်ႈဝႆႉဢမ်ႇၸႂ်ႈၼႄႇ၊ သမ်ႉဝႃႈႁဵတ်းၵႅင်ႈၵေႃႈယဝ်ႉ ႁၼ်ၵူၼ်းႁိမ်းႁိူၼ်းႁဝ်း ၵႆႉႁဵတ်းၸိူင်ႉၼႆၵူၺ်းၼင်ႇၵဝ်ႇ။
မိူဝ်ႈဢၼ်ပွၵ်ႈမိူဝ်းၶိုၼ်းၼၼ်ႉ လိူၵ်ႈလိူၵ်ႈသမ်ႉ လႆႈႁၼ်ၽူႈၸၢႆးတူဝ်သုင် ၵင်ႈၸွင်ႈသီလမ်လူင်ၼၼ်ႉသေ ပႆမႃးႁိမ်းၶႃႈယဝ်ႉ။
“ဢေးၼွင်ႉ! ၶႅၼ်းလီယဝ်ႉႁႃႉ ၶၢဝ်းၼႆႉယဝ်ႉတေၵႂႃႇတၢင်းလႂ်လႃႇ မွၵ်ႇၵုမ်ႈသုမ်ႇပေႃးပဵၼ်တၢၼ်ႇၼႆႉ ၸွင်ႈၵေႃႈဢမ်ႇပႃး”
မိူဝ်ႈဢွၵ်ႇႁိူၼ်းမႃးၼၼ်ႉ ၵင်ႈၸွင်ႈမႃးၸွမ်းၸွမ်ၶိူဝ်းၼၼ်ႉၼႃႇ၊ ၵူၺ်းၵႃႈ မၼ်းဢီးၶႃႈလူမ်ႉႁေယဝ်ႉ ဢဝ်ၶႃႈယမ်းသေ မၼ်းၵေႃႈဢဝ်ၸွင်ႈမိူဝ်းၵႂႃႇႁင်းၵူၺ်းမၼ်းၼၼ်ႉယိုင်။ ၶူးၵေႃႈ ဢဝ်ၸွင်ႈမၼ်းၼၼ်ႉ မႃးၵင်ႈပၼ်ၶႃႈယဝ်ႉ တူၺ်းၸွင်ႈၼၼ်ႉလီလီ မၼ်းဢမ်ႇၸႂ်ႈသီလမ် မၼ်းပဵၼ်သီၵမ်ႇၵႄႇၵႄႇ၊ မိူင်းမူဝ်းၶႂ်ႈလပ်းသိင်ႇဝႆႉလႄႈ ႁၼ်ပဵၼ်သီလမ်ၵူၺ်း။
“ၶူးၵႂႃႇတၢင်းလႂ်မႃးၶႃႈလႃႇ!”
“ၵႂႃႇတီႈလၢၼ်ႉမႃး!”
“ဢေႃႈ!..”
မိူဝ်ႈယူႇႁိမ်းၶဝ်ၼၼ်ႉ ဢမ်ႇႁူႉဝႃႈပဵၼ်သင် မၼ်းတင်းၵပ်ႉဢူၵ်းၵပ်ႉၸႂ် ယူႇယၢပ်ႇၸိူင်ႉႁိုဝ်ၵေႃႈဢမ်ႇႁူႉယဝ်ႉ။ တေလၢတ်ႈသင်တေႃႇၵေႃႈဢမ်ႇႁူႉ မိူဝ်ႈဢွၼ်တၢင်း ၼင်ႇႁၢင်ႈဢမ်ႇႁၼ်ပဵၼ်ၸိူင်ႉၼႆ၊ ယွၼ်ႉသင်လႄႈ ၶႃႈတေလႆႈပဵၼ်ၸိူင်ႉၼႆ၊ မိူၼ်ၶႃႈၶႂ်ႈလႅၼ်ႈပၢႆႈၶဝ်ၵႂႃႇၵႆၵႆၼၼ်ႉယဝ်ႉ၊ ဢမ်ႇႁူႉဝႃႈပဵၼ်သင် ၶႃႈၸင်းၶဝ်ဢၼ်ၶဝ်ႁဵတ်းႁႂ်ႈၶႃႈပဵၼ်ၸိူင်ႉၼႆႁႃႉ၊ မၼ်းၵေႃႈလႅပ်ႈဢမ်ႇၸႂ်ႈ၊ ယဵၼ်ႉၵႂႃႇၸွမ်းၶဝ်ၸိူင်ႉၼႆဢမ်ႇလႆႈယဝ်ႉလႄႈ လႆႈလၢတ်ႈၸူးၶဝ်ၵႂႃႇ သမ်ႉပေႃးၶမ်ၵိုတ်းၶမ်ၵၢတ်းလူင်ဝႆႉယူႇ။
“ၶႃႈ..ဢမ်ႇ…ပဵၼ်သင်ယဝ်ႉၶႃႈ ၶႃႈ..တိုၵ်ႉၼင်ႈလူမ်ႉတီႈ…ၵၢင်တၢင်းၼၼ်ႉၵူၺ်း ၸိူင်ႉႁိုဝ်ၵေႃႈ ၶႃႈ…ပေႃးယမ်းယူႇယဝ်ႉ တေမိူဝ်းထႃႈဢွၼ်တၢင်းၵွၼ်ႇ..”
လႅၼ်ႈဢွၵ်ႇတႂ်ႈႁူမ်ႈၸွင်ႈၶူးၼၼ်ႉပႅတ်ႈ ယူႇယဝ်ႉ။
ထိုင်မႃးထႅင်ႈဝၼ်းၼိုင်ႈ…
မိူဝ်ႈၼႆႉၵေႃႈ ၾႃႉယင်းပႆႇပၢင်ႇထႅင်ႈ မိူင်းမူဝ်းမွၵ်ႇၵုမ်ႈသုမ်ႇၸိူင်ႉၼႆ၊ ၶႃႈၶၢၼ်ႉၵႂႃႇႁူင်းႁဵၼ်းလိူဝ်ပိူၼ်ႈၼၼ်ႉယဝ်ႉ။ ၶႃႈဢမ်ႇထုၵ်ႇလီ ၼင်ႈတူၺ်းၸိူင်းသေဢိတ်းၶမ်ႈဝႃးၼႆႉ သင်ႁူႉဝႃႈတေလႆႈၵႂႃႇႁူင်းႁဵၼ်း၊ ၼၢႆးႁဝ်းႁူႉယဝ်ႉဝႃႈ ၶႃႈၶႅၼ်းလီယဝ်ႉၼႆၵေႃႈ၊ ႁွင်ႉႁႂ်ႈလုၵ်ႈၸဵမ်ၸဝ်ႉ ႁၢင်ႈႁႅၼ်းပၼ်ၶဝ်ႈၽၵ်းႁႂ်ႈၶႃႈ ၵႂႃႇႁူင်းႁဵၼ်းၵမ်းလဵဝ်။
တၢင်းၵေႃႈသမ်ႉဢမ်ႇၸႂ်ႈတၢင်းၶႅမ်ႉလႄႈ သမ်ႉမိုၼ်ႈႁေ ပၼ်ႇလူတ်ႉထိပ်ႇၵႂႃႇၵေႃႈဢမ်ႇလႆႈ၊ ယွၼ်ႉတေလႆႈပႆၵႂႃႇၼၼ်ႉယဝ်ႉ ၼၢႆးႁဝ်းၵေႃႈႁွင်ႉလုၵ်ႉၸဵမ်ၸဝ်ႉၸိူင်ႉၼၼ်။ လိူၵ်ႈလိူၵ်ႈ ၶႃႈသမ်ႉငိၼ်းသဵင်ၵႃးမေႃးဢွၵ်ႇႁိူၼ်းၶူးပိူင်းၾႃႉလႄႈ ၶႃႈၵေႃႈဢမ်ႇသူၼ်ၸႂ်သင်သေ ၼႅတ်ႈၵႅတ်ႇၼႃႈၵႃးယဝ်ႉ။
“ၶူးၶႃႈ…ယွၼ်းၵႂႃႇၸွမ်းၵေႃႉၼိုင်ႈ”
“လႆႈဢိူဝ်ႈ! ၶိုၼ်ႈမႃးလႄႈ!” ၶူးပိူင်းၾႃႉလၢတ်ႈသေ ၵေႃႉၶပ်းလူတ်ႉၼၼ်ႉတႄႉပဵၼ်ၶူးၽိဝ်ၾႃႉယဝ်ႉ။
ၶူးပိူင်းၾႃႉၼၼ်ႉၵေႃႈလၢတ်ႈတေႃႇၸူးၶႃႈယူႇ။
“ၶႅၼ်းလီယဝ်ႉႁႃႉ ထိုင်တီႈၵႂႃႇႁူင်းႁဵၼ်းလႆႈၸိူင်ႉၼႆ
“ဢမ်ႇပႆႇပေႃးၶႅၼ်းလီၵႃႈႁိုဝ်ၶႃႈ!”
“လၢတ်ႈၸိူင်ႉၼႆလႆႈယဝ်ႉတႄႉ ၶႅၼ်းလီယဝ်ႉ”
“ၶူးဢမ်ႇၸႂ်ႈတူဝ်ၶႃႈ ၶူးႁူႉလႆႈၸိူင်ႉႁိုဝ် ဝႃႈၶႃႈၶႅၼ်း မၢင်ၽၢဝ်ႇၶႃႈတေၸၢင်ႈမၢတ်ႇၸဵပ်းထိုင်ဢူၵ်းထိုင်ၸႂ် ၵေႃႈပဵၼ်လႆႈ”
“တူၺ်းၸိူင်းၼမ်ၼႃႇယဝ်ႉယူဝ်ႉ!”
“ၶူးႁဵတ်းႁိုဝ်ႁူႉလႃႇဝႃႈၶႃႈတူၺ်းၸိူင်း!”
“သဵင်ၶူဝ်၊သဵင်ႁွင်ႉ၊သဵင်ႁႆႈ ပူၼ်ႉႁိူၼ်းပူၼ်ႉယေးၸိူင်ႉၼၼ် မီးၽႂ်တေဢမ်ႇႁူႉလႃႇ၊ ၸိုင်ႁဵတ်းၼၼ်ယူႇတႃႇသေႇ သင်ဢမ်ႇၸႂ်ႈဢေးယိင်းတႄႉတေဝႃႈယူႇ ဢမ်ႇဢၢႆပိူၼ်ႈႁႃႉၼႆ”
ၶူးၽိဝ်ၾႃႉၼၼ်ႉတႄႉ ဢမ်ႇလၢတ်ႈသင်ၸွမ်း ယုမ်ႉယူႇၸုတ်းၵုတ်းႁင်းမၼ်း၊ ပဵၼ်သင်လႄႈႁၼ်မၼ်းယုမ်ႉယဝ်ႉ ၶႃႈတေလႆႈယုမ်ႉၸွမ်းလႃႇ၊ ႁူဝ်ၸႂ်ၶႃႈၼၼ်ႉၵေႃႈၵီႈၶိုၼ်ႈမႃး ယၢမ်းၼၼ်ႉ ၼႃႈၶႃႈၵေႃႈလႅင်မႃး မိူၼ်တေမႆႈမႃးယူႇယဝ်ႉ။
“ပဵၼ်သင်လႄႈၶႃႈတေဢမ်ႇမီးတၢင်းဢၢႆလႃႇ”
“ၵေႃႉယႂ်ႇမႃးဢိတ်ႉၼိုင်ႈယဝ်ႉပေႃးၼႆ မေႃလၢတ်ႈၸိူင်ႉၼႆႁေ”
မိူၼ်ၶႃႈတေလၢတ်ႈၵႂႃႇလူၺ်ႈဢမ်ႇႁူႉတူဝ်ယူႇ၊ ဝႆႉဝႃႈၶႃႈလၢတ်ႈၽိတ်းႁေလႄႈ ယွၼ်းၵႄႈၵႂၢမ်းၶိုၼ်း
“တၢင်းဢၢႆၵိၼ်လႆႈၵေႃႈဢမ်ႇၸႂ်ႈ မိူဝ်ႈသိူဝ်းၵေႃႈသိူဝ်း၊ မိူဝ်ႈလီၵေႃႈၸူမ်း၊ မိူဝ်ႈတုၵ်ႉၵေႃႈ…ႁွင်ႉႁႆႈ တိုၼ်းပဵၼ်သၽႃႇဝ ၵူၺ်းၶႃႈႁိုဝ် ပဵၼ်လွင်ႈလီဢၢႆတီႈလႂ်”
ၶူးပိူင်းၾႃႉၵေႃႈ ပေႃးဢမ်ႇၸၢင်ႈလၢတ်ႈသင်ၸွမ်းယဝ်ႉ ၶူဝ်ဢွၵ်ႇမႃးၵူၺ်းယူႇ။
တီႈၼႂ်းႁွင်ႈႁဵၼ်းၼၼ်ႉၵေႃႈ သမ်ႉပေႃးမိုၵ်းယမ်းလူင်ဝႆႉယူႇယဝ်ႉ။ မိူၼ်ဝႃႈ ၵူႈၵေႃႉၼႂ်းႁွင်ႈ တေမႃးၸဝ်ႉၵၼ်ႁင်းၽႂ်ႁင်းမၼ်းယဝ်ႉ။ မိူဝ်ႈၶႃႈတိုၵ်ႉၼင်ႈယဵတ်ႇၶၢၼ်ႉယူႇၼၼ်ႉ ဢမ်ႇလႆႈတင်ႈၸႂ်သေ ငိၼ်းၶဝ်ၸိူဝ်းၼၼ်ႉဢုပ်ႇၵၼ်မႃးဝႃႈ
“မူၺ်လိုၼ်း ၶမ်ႈဝႃးၺႃးမႄႈသူလႃႇႁႃႉ ”
“ဢိူဝ်ႈ!..ႁူႉယူႇယဝ်ႉတေမႃးထၢမ်ႁဵတ်းသင် ဝူၼ်ႉဝႃႈတူဝ်ၸဝ်ႈၵဝ်ႇဢမ်ႇယၢမ်ႈၺႃးမႄႈလႃႇၼၼ်ႉယဝ်ႉ” လၢတ်ႈၸူး သႅင်လိူၼ်။
“ၵေႃႈၸႂ်ႈယူႇလႂ်..ပဵၼ်သင်လႄႈၵူၼ်းလူင်ၶဝ်တေလႆႈလႃႇႁဝ်းတိၵ်းတိၵ်းလႃႇ ပေႃးပိူၼ်ႈဢမ်ႇႁဵတ်းၸွမ်းၼင်ႇၵၢင်ၸႂ်ၶဝ်ၵေႃႈ ပေႃးလႄႇၸွမ်းပွင်ႉထႃႉယူႇသေႇသေႇယဝ်ႉ”ၶိူဝ်းႁွမ်လၢတ်ႈ။
“ၼၼ်ႉယဝ်ႉ ပေႃးၸႂ်ႉပိူၼ်ႈႁေပိူၼ်ႈဢမ်ႇႁဵတ်းသမ်ႉ လႃႇပဵၼ်ထႅဝ်ပဵၼ်ထႅဝ် ပေႃးတၢၼ်ႇပိူၼ်ႈႁေႃးတြႃးယဝ်ႉ ဢမ်ႇဝႃႈၼၼ်ႁႃႉ”သီၼုမ်ႇလၢတ်ႈ။
“ယဝ်ႉထႅင်ႈလွင်ႈၼိုင်ႈ ပေႃးတေယွၼ်းၵႂႃႇတၢင်းလႂ်ၼႆၵေႃႈ ထၢမ်ပေႃးၸွတ်ႇပေႃးၸေး၊ မၢင်ပွၵ်ႈၵၢၼ်ႉႁၢင်ႈႁႅၼ်းတူဝ်ဝႆႉ လူမ်းၶႂ်ႈၵႂႃႇမၼ်းပေႃးဢမ်ႇမီးယဝ်ႉ၊ ဢမ်ႇႁူႉပေႉထၢမ်ႁဵတ်းသင်” သႅင်လိုၼ်းလၢတ်ႈ။
“ပေႃးၵႂႃႇမႃးသမ်ႉၼႃ ၼႅတ်ႈထၢမ် ၵႂႃႇႁဵတ်းသင်၊ ပဵၼ်ႁိုဝ်လႃႇ၊ မီးၸိူင်ႉႁိုဝ်လႃႇ၊ ပိူၼ်ႈႁဵတ်းသင်ၽွင်ႈလႃႇၼႆဝႃႇ ၵဝ်ဝႃႈမႄႈႁဝ်းၶဝ်ၼႆႉ သင်ႁဵတ်းၽူႈၸွပ်ႇတႄႉ လႅပ်ႈတေလႆႈယူႇယူဝ်ႈမႃႈ” ၶိူဝ်းႁွမ် လၢတ်ႈ။
“ဢိူဝ်ႈၵဝ်ၵေႃႈဝႃႈၼၼ်ယဝ်ႉ”
“တေႁဵတ်းႁိုဝ်ၵေႃႈဢမ်ႇႁူႉယဝ်ႉၵဝ် ပေႃးမိူဝ်းႁိူၼ်းႁေ ႁၼ်ပိူၼ်ႈယူႇလၢႆဢိတ်ႉၵူၺ်းၵေႃႈ၊ ပေႃးလႄႇၸွမ်းပွင်ႉတႂ်ႈပွင်ႉၼိူဝ်ယဝ်ႉ၊ ပေႃးလႆႈလႃႇသမ်ႉ လႃႇသႂ်ႇသဵင်ယႂ်ႇသဵင်လူင်လင်ပေႃးၸွတ်ႇဝၢၼ်ႈ မၢင်ပွၵ်ႈၵေႃႈ ၵဝ်ၵေႃႈလီဢၢႆပိူၼ်ႈၵူၺ်းၵဝ်ႇ၊ ပေႃးလၢတ်ႈၼႄၶိုၼ်းသမ်ႉဝႃႈပိူၼ်ႈတွပ်ႇ ပိူၼ်ႈလၢတ်ႈယၢပ်ႇၼႃႇ ဢမ်ႇထွမ်ႇၵႂၢမ်းဝႃႇ” မူၺ်လိုၼ်းၼၼ်ႉၵေႃႈ မိူၼ်တေၼၵ်းဢူၵ်းၼၵ်းၸႂ်မၼ်းဝႆႉယူႇမိူၼ်ၵၼ်။
သိုပ်ႇလၢတ်ႈထႅင်ႈ “ပဵၼ်သင်လႄႈၶဝ်တေလႆႈႁဵတ်းၸိူင်ႉၼၼ်လႃႇ ၶဝ်ဢမ်ႇပွင်ႇၸႂ်ႁဝ်းသေဢိတ်းလူင်၊ သမ်ႉဝႃႈၶဝ်တေလဵင်ႉႁဝ်းမႃးၵေႃႈ ႁဝ်းၵေႃႈမေႃၵေႃႉယႂ်ႇယူႇၵူၺ်းဢမ်ႇၸႂ်ႈႁႃႉ၊ ႁၼ်ဝႃႈႁဝ်းပဵၼ်လုၵ်ႈဢွၼ်ႇယူႇသေႇသေႇ ႁိုဝ်တေလႆႈၼႄႇ မၢင်ပွၵ်ႈၵေႃႈၶႆႈပၢႆႈၵႂႃႇၵႆၵႆႁေယဝ်ႉဝႃႈ”
ထွမ်ႇတူၺ်းဢၼ်ၶဝ်ဢုပ်ႇၵၼ်ၼၼ်ႉ မီးပေႃႈမီးမႄႈ မီးၼႃႈႁိူၼ်းဢၼ်ဢုၼ်ႇၸႂ်ၵေႃႈ မိူၼ်တေပဵၼ်ပၼ်ႁႃ တွၼ်ႈတႃႇၶဝ်ဝႆႉယူႇမိူၼ်ၵၼ်။ မိူဝ်ႈပူၼ်ႉမႃး ၶႃႈၵေႃႈယၢမ်ႈဝူၼ်ႉၸိူင်ႉၼႆယူႇၵူၺ်းၼႃ မႄႈၶႃႈ လႆႈၸႂ်ပွင်ႉၶႃႈယူႇတႃႇသေႇၼၼ်ႉယဝ်ႉ၊ ဢမ်ႇဝႃႈၶႃႈတေႁဵတ်းသင် တေႃႈၼင်ႇၶီႈလိုတ်းလူမ်ႉႁေႁႆႈၵူၺ်းၵေႃႈ ယင်းတိုၵ်ႉပွင်ႉၶႃႈယူႇ။ ထၢင်ႇတႄႉတေလႆႈမႃးတီႈၼၢႆးႁဝ်းၵႂႃႈ။ ၵူၺ်းၵႃႈ မိူဝ်ႈလဵဝ် ၶႃႈၵေႃႈၸႂ်ထိုင်ၶဝ်တေႉယဝ်ႉ ၶႂ်ႈငိၼ်းၵႂၢမ်းပွင်ႉၶဝ်ၼၼ်ႉယူႇမိူၼ်ၵၼ် ၶႂ်ႈႁႂ်ႈၶဝ်ပွင်ႉၶႃႈၵူႈဝၼ်းၼၼ်ႉယဝ်ႉ။
တွၼ်ႈသိပ်းဢဵတ်းသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းသွင်ၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
