တွၼ်ႈသိပ်း
ၵၢၼ်ငၢၼ်း၊ ငိုၼ်းတွင်း ပဵၼ်ဢၼ်လမ်ႇလွင်ႈၼႃႇလႄႈ သင်ဢမ်ႇမီးမၼ်း ၼႃႈႁိူၼ်းၵေႃႈ တေဢမ်ႇယူႇလႆႈ၊ တွၼ်ႈတႃႇၼႃႈႁိူၼ်းပေႃးတေယူႇလွတ်ႈ လႆႈၵိၼ်လီၼုင်ႈလီ ယူႇသဝ်းၵတ်းယဵၼ် ၵေႃႉပဵၼ်ႁူဝ်ႁိူၼ်းၼၼ်ႉ ႁူႉတိုၼ်းတေလႆႈၶတ်းၸႂ်သႂ်ႇႁႅင်းလိူဝ်ပိူၼ်ႈယူႇယဝ်ႉ။ ယွၼ်ႉၵၢၼ်ငၢၼ်းလႄႈ ဢမ်ႇမီးၶၢဝ်းယၢမ်းယူႇၸွမ်းၼႃႈႁိူၼ်း၊ ဢမ်ႇမီးၶၢဝ်းယၢမ်းယူႇၸွမ်းလုၵ်ႈလုၵ်ႈ ဢမ်ႇပၼ်ၶၢဝ်းယၢမ်းလႆႈ၊ ၵၢၼ်တူၺ်းထိုင်လုၵ်ႈၼၼ်ႉ မီးငိုၼ်းၵူၺ်းၵေႃႈ ဝူၼ်ႉဝႃႈ ပဵင်းပေႃးတႃႇၶဝ်ယဝ်ႉ။ ၵူၺ်းၵႃႈ လုၵ်ႈဢွၼ်ႇမၢင်ၵေႃႉ တေဢမ်ႇဝူၼ်ႉဝႃႈငိုၼ်းၼၼ်ႉ တေလမ်ႇလွင်ႈတၢၼ်ႇ လွင်ႈဢုၼ်ႇၸႂ် ဢၼ်ၼႃႈႁိူၼ်းၼိုင်ႈလင် ထုၵ်ႇလီမီးၼၼ်ႉလူးၵွၼ်ႇ။
ၶူးၽိဝ်ၾႃႉၵေႃႈ ယၵ်ႉတူၺ်းၸူးၶႃႈသေယဝ်ႉ
“မီးၶၢဝ်းယၢမ်းပဵၼ်ဝၼ်းပၢႆၼေႃႈ တွပ်ႇလႆႈယူႇၵူၺ်းယူဝ်ႉ”
ၶႃႈၵေႃႈ လုၵ်ႉၸုၵ်းသေ မႄးတွပ်ႇၵႂႃႇ ၶေႃႈထၢမ်ဢၼ်ဝႃႈ “မီးႁိူၼ်းလင်ၼိုင်ႈ ၵေႃႉပဵၼ်ပေႃႈၸဝ်ႈႁိူၼ်းၼၼ်ႉ တေဢဝ်ငိုၼ်းသၢမ်ႁဵင် ပၼ်ၵူၼ်းၼႂ်းႁိူၼ်း ဢၼ်မီးသၢမ်ၵေႃႉ ၼႂ်းၼၼ်ႉပဵၼ် မႄႈၸဝ်ႈႁိူၼ်း၊ လုၵ်ႈဢွၼ်ႇ၊ ၵူၼ်းထဝ်ႈ ဢၼ်ၼွၼ်းပဵၼ်ယူႇ ၼင်ႇႁိုဝ်ၶဝ်ပေႃးလႆႈၸႂ်ႉသုင်း ႁႂ်ႈပဵၼ်ၽွၼ်းလီမိူၼ်ၵၼ်ၼၼ်ႉ ထုၵ်ႇလီပၼ်ၸိူင်ႉႁိုဝ်?” ၼႆၼၼ်ႉၵႂႃႇ။
“ထုၵ်ႇလီပၼ်ၸိူင်ႉႁိုဝ်ဢၼ်ဝႃႈၼၼ်ႉ ပၼ်တီႈၵူၼ်းၵေႃႉဢၼ် မေႃဝႆႉၵႃႈၶၼ်လႄႈ မေႃဢဝ်ပုၼ်ႈၽွၼ်းၼၼ်ႉၶႃႈ”
ၶူးၵေႃႈယုမ်ႉမႃးသေ ယၵ်ႉတူၺ်းၸူးလုၵ်ႈႁဵၼ်းၼႂ်းႁွင်ႈႁဵၼ်းၼၼ်ႉယဝ်ႉ
“ၽႂ်မီးတၢင်းႁၼ်ထိုင်ၸိူင်ႉႁိုဝ်ၽွင်ႈ ၶႂ်ႈထၢမ်သင်ထႅင်ႈ”
ၸၢႆးယွတ်ႈသႅင် ထၢမ်ၸူးၵႂႃႇ “တေႁဵတ်းႁိုဝ်ႁူႉဝႃႈ ၽႂ်ၵေႃႉပဵၼ်ၵူၼ်းဢၼ်ဝႆႉၵႃႈၶၼ်ၼၼ်ႉလႃႇ”
“ၵေႃႉပၼ်ၼၼ်ႉ မၼ်းပဵၼ်ပေႃႈၸဝ်ႈႁိူၼ်းယဝ်ႉလူး တေႁူႉလွင်ႈၼႃႈႁိူၼ်းမၼ်းလီယူႇဢမ်ႇၸႂ်ႈႁိုဝ်၊ သင်ၸိူဝ်ႉဝႃႈ ပၼ်ၵႂႃႇသေယဝ်ႉ မီးပၼ်ႁႃၸွမ်းမႃး ၶႂ်ႈဝႃႈ..ပေႃႈၸဝ်ႈႁိူၼ်းၼၼ်ႉၵေႃႈ ယင်းပႆႇႁူႉလွင်ႈၼႃႈႁိူၼ်းမၼ်းလီၼၼ်ႉၼႃႇ၊ ဢမ်ႇဝႃႈတေပၼ်ၽႂ် ပၼ်ၸိူင်ႉႁိုဝ်ၵေႃႈယဝ်ႉ ပၼ်တီႈၵူၼ်းဢၼ်ဝႆႉၵႃႈၶၼ်လႄႈ ၵူၼ်းၵေႃႉဢၼ်ႁပ်ႉၵႂႃႇယဝ်ႉၼၼ်ႉ တေၸႂ်ႉၸၢႆႇၸိူင်ႉႁိုဝ်ၼႆၵေႃႈ တေလႆႈမေႃဢဝ်ပုၼ်ႈၽွၼ်း၊ မၼ်းၸင်ႇၸၢင်ႈၸႂ်ႉသုင်း ပၼ်ၽွၼ်းလီလႆႈၼၼ်ႉယဝ်ႉ လွင်ႈဢၼ်ၶႃႈဝူၼ်ႉတႄႉမီးၸိူင်ႉၼႆ” ၶႃႈၵေႃႈၼင်ႈၵႂႃႇၶိုၼ်းယဝ်ႉ
“မီးၽႂ်ၶႂ်ႈလၢတ်ႈလွင်ႈၶေႃႈထၢမ်ၼႆႉထႅင်ႈ သင်ႁၼ်ပၼ်ႁႃ ဢၼ်ႁဝ်းၶႆႈဢုပ်ႇလၢတ်ႈမိူဝ်ႈဝၼ်းပူၼ်ႉၼၼ်ႉၵေႃႈ ဢဝ်မႃးလၢတ်ႈၶိုၼ်းလႆႈယူႇ”
ၵမ်းၼၼ်ႉ ၸၢႆးၶမ်းၶိူဝ်း ၸင်ႇၶိုၼ်းလုၵ်ႉထၢမ်ၵႂႃႇ
“ပေႃးဝႃႈပၼ်ၽဵင်ႇၽဵင်ႇၵၼ်သေ လွင်ႈၸႂ်ႉလွင်ႈၸၢႆႇဢမ်ႇမိူၼ်ၵၼ် တေဢမ်ႇမီးပၼ်ႁႃမႃးၸွမ်းၽၢႆႇလင်ၶႃႈႁႃႉ”
“ပေႃးၼၼ် ဢၼ်ပၼ်ဢမ်ႇၽဵင်ႇၵၼ်ႁေ ၸိူင်ႉၼၼ်သမ်ႉ.. တေဢမ်ႇမီးပၼ်ႁႃသင်မႃးႁႃႉ၊ တေၸၢင်ႈမီးၵၢၼ်ႁိမ်ၵၼ်၊ ၽိတ်းမေႃးၵၼ်၊ ၼႃႈႁိူၼ်းတႅၵ်ႇယၢႆႈၵၼ်ၵေႃႈပဵၼ်လႆႈ” သႅင်ဢွင်ႇၼၼ်ႉတွပ်ႇၸူး။
“ၵူႈၵေႃႉသမ်ႉ ႁၼ်ထိုင်ၸိူင်ႉႁိုဝ်လႃႇ” ယဝ်ႉၶိုၼ်းယၵ်ႉတူၺ်းၼႃႈၶႃႈသေ“သႅင်ၶမ်း! ဝူၼ်ႉၸိူင်ႉႁိုဝ်ၼိူဝ်လွင်ႈၼႆႉ”
ပဵၼ်သင်လႄႈတေလႆႈမႃးထၢမ်ၶႃႈ၊ ၶႃႈၵေႃႈဢမ်ႇႁူႉယဝ်ႉ ဢမ်ႇတၼ်းလႆႈဝူၼ်ႉသင် ၶႃႈၵေႃႈတွပ်ႇၵႂႃႇဝႃႈ
“ၶႃႈဝူၼ်ႉဝႃႈ ဢိင်ၼိူဝ်ငဝ်းလၢႆး ၵူၼ်းၵေႃႉပၼ် လႄႈ ၵူၼ်းၵေႃႉတေႁပ်ႉၼၼ်ႉယူႇ ပေႃးပဵၼ်ငိုၼ်းၸၢႆႇၼႆၵေႃႈ မၼ်းၶႂ်ႈပၼ်ၽႂ်ၵႃႈႁိုဝ်ၵေႃႈပၼ်၊ ပေႃးဝႃႈပၼ်ငိုၼ်းၸႂ်ႉၸၢႆႇၼႂ်းႁိူၼ်းၼႆၵေႃႈ မၼ်းထုၵ်ႇလီတူၺ်းတၢင်းလူဝ်ႇ ၵူၼ်းၵေႃႉဢၼ်တေလႆႈႁပ်ႉသေၵွၼ်ႇ၊ သင်ဝႃႈၼႃႈၵၢၼ်ပုၼ်ႈၽွၼ်း လွင်ႈၸႂ်ႉၸၢႆႇမၼ်းမိူၼ်ၵၼ် ထုၵ်ႇလီပၼ်ၽဵင်ႇၽဵင်ႇၵၼ်ယူႇ၊ ၵူၺ်းၵႃႈ သင်မၼ်းပိူင်ႈၵၼ်ၼႆ ထုၵ်ႇလီတူၺ်းႁႂ်ႈသၢင်ႇထုၵ်ႇယဝ်ႉၸင်ႇပၼ်”
“ယဝ်ႉၶေႃႈတွပ်ႇဢၼ်မၢၼ်ႇမႅၼ်ႈမၼ်းၶႃႈလူး” သႅင်လိုၼ်းၼၼ်ႉထၢမ်ၸူး။
“ၵူႈၵေႃႉလၢတ်ႈမႃးထုၵ်ႇမႅၼ်ႈမူတ်းယဝ်ႉ.. မၼ်းဢမ်ႇမီးၶေႃႈတွပ်ႇဢၼ်တၢႆတူဝ် ၶေႃႈတွပ်ႇၵူႈဢၼ်၊ မီးလွင်ႈမီးတၢင်းႁင်းၽႂ်ႁင်းမၼ်းယူႇ သင်ဢမ်ႇမၼ်ႈၸႂ်ၼိူဝ်ၶေႃႈတွပ်ႇၸဝ်ႈၵဝ်ႇၼၼ်ႉၼႆၵေႃႈ ဢဝ်ၶေႃႈတွပ်ႇၵူႈၵေႃႉ ဢၼ်ဢွၼ်ၵၼ်တွပ်ႇမႃးၼၼ်ႉသေ မႃးထတ်းသၢင်တူၺ်းဢဝ်ၼႆ၊ ၶူးယုမ်ႇဝႃႈတေလႆႈၶေႃႈတွပ်ႇ ဢၼ်ၸဝ်ႈၵဝ်ႇယုမ်ႇၸႂ်လႆႈဝႃႈ မၼ်းထုၵ်ႇမႅၼ်ႈၼၼ်ႉယူႇၵူၺ်း”
ၶူးၵေႃႈ ႁႂ်ႈဢွၼ်ၵၼ်ၼပ်ႉသွၼ်ႇ ဢၼ်ၶူးတႅမ်ႈပၼ်ဝႆႉမိူဝ်ႈၵႆႈၼၼ်ႉၵႂႃႇ၊ လုၵ်ႈႁဵၼ်းၼႂ်းႁွင်ႈၼၼ်ႉၵေႃႈ ဢွၼ်ၵၼ်ႁဵတ်းၵႂႃႇႁင်းၽႂ်ႁင်းမၼ်းယူႇ၊ ပေႃးဢမ်ႇပွင်ႇၸႂ်ၵေႃႈ ထၢမ်ၶူးႁေ ထၢမ်ၵၼ်ၶိုၼ်းႁေ။ ၶႃႈတႄႉ ဢမ်ႇႁဵတ်းလေႃႇ မိူဝ်ႈၶူးသပ်းလႅင်းၼၼ်ႉ ၶႃႈယင်းဢမ်ႇတူၺ်းသေဢိတ်း ဢဝ်ၼႃႈငူပ်ႉၽိူၼ်သေ လပ်းတႃၵူၺ်းၵေႃႈ ၶႅမ်ႉလႅပ်ႈယဝ်ႉ ၶိင်ႇပၢႆးၼပ်ႉ။
ၵူၺ်းၵႃႈ ပဵၼ်သင်လႄႈ တေလႆႈမႃးငိၼ်းသဵင်ၽႂ်တူပ်းၽိူၼ်လင်ဝႃႈလင် ဢဝ်ၶႃႈသမ်ႉပေႃးၽႅတ်းတိုၼ်ႇတူၵ်းၸႂ်လူင်ၵႂႃႇ၊ ႁူဝ်ၸႂ်တွတ်ႇပေႃးဢမ်ႇၶိုတ်းၵၼ်လႆႈ သမ်ႉပၢႆမႃးယူႇတေႃႇၼႃႈသေယဝ်ႉ။
“ႁဵတ်းယဝ်ႉယဝ်ႉႁႃႉ!” ၶူးၽိဝ်ၾႃႉထၢမ်။
“တိုၵ်ႉတေႁဵတ်းၶႃႈ!”
လၢၵ်ႈဢဝ်ပပ်ႉၶႃႈၵႂႃႇတူၺ်းယဝ်ႉ။ ဢမ်ႇႁၼ်သင်လႄႈ ဝၢင်းဝႆႉၶိုၼ်းသေ
“ႁဵတ်းႁႂ်ႈယဝ်ႉမိူဝ်ႈၼႆႉလႄႈ ပေႃးဢမ်ႇယဝ်ႉႁေ ဢမ်ႇမႃးသူင်ႇၵေႃႈ ဢမ်ႇလူဝ်ႇမိူဝ်းႁိူၼ်း”
ၶူးၵေႃႉၼႆႉမၼ်းပဵၼ်ၽႂ်လႃႇ ပဵၼ်သင်လႄႈမႃးၶတ်းတၢင်းသိူဝ်းၶႃႈၸိူင်ႉၼႆ၊ ႁၼ်ထိုင်ၶႃႈပဵၼ်ၽႂ် ပဵၼ်လုၵ်ႈႁဵၼ်းဢၼ်ၶတ်းၸႂ်ၸိူင်ႉၼၼ်ႁႃႉ၊ ဢမ်ႇႁူႉႁႃႉ ၶႃႈပဵၼ်လုၵ်ႈႁဵၼ်းဢၼ်ၺၢမ်ႉသုတ်း၊ ဢွၵ်းဢေႃဢမ်ႇႁဵတ်းၵၢၼ်မႃးပဵၼ်ပီႊယဝ်ႉ တေႁဵတ်းႁိုဝ်ႁဵတ်းလႆႈလႃႇ၊ လိူဝ်သေၺႃးထူၺ်ႈယိူဝ်ႈ ဝၢႆးလူင်းႁူင်းႁဵၼ်းယဝ်ႉ ပေႃးဢမ်ႇႁဵတ်းပၢႆးၼပ်ႉ သမ်ႉဝႃႈတေဢမ်ႇလႆႈမိူဝ်းထႅင်ႈႁေၵွၼ်ႇ။ လူဝ်ႇပႃးၽႃႈႁေမွၼ်ႁူဝ်ႁေ မႃးႁူင်းႁဵၼ်းယူႇယူဝ်ႉပေႃးၼႆ၊ မိူဝ်ႈငိၼ်းၸိူင်ႉၼၼ်ၵေႃႈ ႁဵတ်းႁႂ်ႈၶႃႈၸႂ်လမ်တေႉၼၼ်ႉယဝ်ႉ။
ၶိင်ႇသုတ်းသဵင်ႈယဝ်ႉၼႆၵေႃႈ ၵူၼ်းၼႂ်းႁွင်ႈၼၼ်ႉတႄႉ ဢွၼ်ၵၼ်ႁဵတ်းယဝ်ႉသေ ၵႂႃႇသူင်ႇတီႈၶူးႁင်းၽႂ်ႁင်းမၼ်းယဝ်ႉ၊ ၵိုတ်းၶႃႈၵေႃႉလဵဝ် ဢၼ်ၼႂ်းပပ်ႉတိုၵ်ႉမီးၶေႃႈထၢမ်မၼ်းၵူၺ်း၊ ဢမ်ႇႁူႉဝႃႈတေလႆႈၼပ်ႉလႆႈသွၼ်ႇၸိူင်ႉႁိုဝ်၊ မိူဝ်ႈဢွၼ်တၢင်းၵေႃႈ ဢမ်ႇတွၼ်ႉႁဵတ်းဢမ်ႇတွၼ်ႉသွၼ်ႇသေပွၵ်ႈလူး၊ သွၼ်မႃးၼမ်ပေႃးတၢၼ်ႇၼႆႉ တေႁႂ်ႈမႃးသွၼ်ႇၶေႃႈထၢမ်မိူဝ်ႈလဵဝ်ၼႆႉၵေႃႈ ပဵၼ်ဢၼ်ယၢပ်ႇယူႇၵူၺ်းလေႃႇ မိူဝ်ႈဝူၼ်ႉဝႃႈတေယွၼ်းၵူးပိူၼ်ႈၼႆၵေႃႈ ၶူးပေႃးဢဝ်ပပ်ႉၶဝ်ၸိူဝ်းၼၼ်ႉၵႂႃႇမူတ်းယဝ်ႉလူး။ ၼႂ်းပၢႆးဝူၼ်ႉၶႃႈ ဢၼ်ဝူၼ်ႉလႆႈယၢမ်းၼႆႉတႄႉ တေဢမ်ႇလႆႈမိူဝ်းႁိူၼ်းတေႉတေႉၸွင်ႇၸႂ်ႈႁိုဝ်၊ တေဢမ်ႇလႆႈမိူဝ်းႁိူၼ်းယဝ်ႉၸွင်ႇၸႂ်ႈႁိုဝ်ၼႆၵူၺ်းယဝ်ႉ။ ၽွင်းၼၼ်ႉ ၽူၼ်ၵေႃႈသမ်ႉတူၵ်းမႃးထႅင်ႈႁေ တေႁဵတ်းႁိုဝ်လႃႇၵမ်းၼႆႉ ၶႂ်ႈႁႆႈၸွမ်းၽူၼ်ႁေယဝ်ႉဝႃႈ။
ဢဝ်ဝႃႈလႄႈ ဢမ်ႇလႆႈမိူဝ်းၵေႃႈ ၸၢမ်းတူၺ်းလူႉမႃႈ ဢမ်ႇမိူဝ်းႁိူၼ်းႁေဝၼ်းတေမိူၼ်ႁိုဝ်။ ၶၢဝ်းယၢမ်းလူင်းႁူင်းႁဵၼ်းၵေႃႈထိုင်ယဝ်ႉ ယွၼ်ႉၽူၼ်တူၵ်းလႄႈ လုၵ်ႈႁဵၼ်းၵေႃႈ ဢွၼ်ၵၼ်ပွၵ်ႈမိူဝ်းၵႂႃႇႁင်းၽႂ်ႁင်းမၼ်းၵူၺ်းယူႇ။ မိူၼ်ဝႃႈၼႂ်းႁွင်ႈၼၼ်ႉၵေႃႈ လႆႈႁၼ်ယွတ်ႈသႅင်ဢမ်ႇပႆႇမိူဝ်းၸွမ်းပိူၼ်ႈလႄႈ
“ပဵၼ်သင်လႄႈဢမ်ႇမိူဝ်းလႃႇ!”
“မိူၼ်ဝႃႈတေလိုမ်းၽႃႈယၢင်မႃး! ပႂ်ႉၽူၼ်ႁိူတ်ႇသေၸင်ႇၵွႆႈမိူဝ်းၵႂႃႈ”
“မီးၾူင်းယူႇဢမ်ႇၸႂ်ႈႁႃႉ ဢမ်ႇလၢတ်ႈႁႂ်ႈၵူၼ်းတီႈႁိူၼ်းမႃးႁပ်ႉလႃႇ!”
“ၶဝ်ဢမ်ႇတၼ်းလေႃႇ…” သဵင်မၼ်းၼၼ်ႉၵေႃႈ လေႃးပႃးသဵင်ၶေႃႈမွင်ၸႂ်ၸွမ်းယူႇယဝ်ႉ။ ၶႃႈၵေႃႈ ပဵၼ်ဢၼ်ႁၼ်ၸႂ်ႁိုဝ်ဢမ်ႇႁူႉ ဢဝ်ၽႃႈယၢင်ၶႃႈၼၼ်ႉ ပၼ်မၼ်းသေ
“ဢဝ်မိူဝ်းလႄႈ!”
“ယဝ်ႉသူလူးဢမ်ႇလူဝ်ႇမိူဝ်းႁႃႉ!”
“ၸိူင်ႉႁိုဝ်ၵေႃႈဢမ်ႇလႆႈမိူဝ်းယူႇယဝ်ႉ!..မိူဝ်းၵွၼ်ႇလႄႈ ႁဝ်းမီးပီႈဢၢႆႈယူႇယွၼ်းမိူဝ်းၸွမ်းၶဝ်ၵေႃႈလႆႈ”
“ၸိူင်ႉၼၼ်ႁႃႉ!..ပေႃးၼၼ်ၵေႃႈၸူမ်းယဝ်ႉၼႃႈ”
ၼႂ်းႁွင်ႈၼၼ်ႉၵေႃႈ ၵိုတ်းၶႃႈၵေႃႉလဵဝ်ၵူၺ်း၊ ယွၼ်ႉၽူၼ်တူၵ်းလႄႈ ႁႃးဢၢႆႈဝိၵေႃႈဢမ်ႇလႆႈၵႂႃႇမၢႆယိူဝ်ႈယဝ်ႉ။ ၶႃႈၵေႃႈဢမ်ႇႁူႉဝႃႈတေႁဵတ်းသင် လိူဝ်သေ ငူပ်ႉၼႃႈၼွၼ်းၵႂႃႇၼိူဝ်ၽိူၼ်ၼၼ်ႉၵူၺ်း၊ တင်းသဵင်ၽူၼ်ၼၼ်ႉသေ ဢိုၼ်းႁႂ်ႈၶႃႈၼွၼ်းလပ်းၵႂႃႇယူႇယဝ်ႉ။
ၶႃႈတိုၼ်ႇမႃးၶိုၼ်းၵေႃႈ ၵၢင်ဝၼ်းသမ်ႉပေႃးလပ်းသိင်ႇၼႃႇယဝ်ႉလႄႈ ၽူၼ်ၼၼ်ႉၵေႃႈ ယင်းတိုၵ်ႉတူၵ်းယူႇဢမ်ႇထၢတ်ႇဢမ်ႇဝၢႆး မိူဝ်ႈၶႃႈဢွၵ်ႇၵႂႃႇငွၵ်ႈတီႈၽၵ်းတူၼၼ်ႉ၊ လိူၵ်ႈလိူၵ်ႈၾႃႉသမ်ႉမႅပ်ႈမႃးသေ ၽွင်းၼၼ်ႉ ဢဝ်ၶႃႈတူၵ်းၸႂ်သမ်ႉပေႃးၼင်ႈငွမ်လူင်လူင်းၵႂႃႇၵမ်းလဵဝ်၊ သဵင်ၾႃႉလင်ၵေႃႈလင်မေႃးႁႅင်းမႃး ၶႃႈႁဵတ်းသင်ၵႂႃႇၵေႃႈ ဢမ်ႇႁူႉတူဝ်သေဢိတ်း၊ မိုဝ်းၶႃႈသွင်ၶွၼ်ဢိုတ်းဝႆႉႁူသွင်ၽၢႆႇ တူဝ်ၶႃႈၼင်ႈငွမ်ယူႇၼႂ်းၸွၵ်ႉၼၼ်ႉ ဢမ်ႇတၼ်းႁူႉဝႃႈၵႂႃႇၼင်ႈၸဵမ်မိူဝ်ႈလႂ်၊ ၼႂ်းလပ်းသိင်ႇလူင်ၼၼ်ႉ ႁဵတ်းႁႂ်ႈၶႃႈၵူဝ်တေႉယဝ်ႉ။
ယၢမ်းၵၢင်ၼႂ်ၽူၼ်ဢွႆယွႆးယွႆး မွၵ်ႇၵုမ်ႈသုမ်ႇတၼ် ၶႃႈၵေႃႈႁူႉတူဝ်မႃးႁေ ႁၼ်ၼၢႆးႁဝ်းမီးယူႇႁိမ်းၶႃႈယဝ်ႉ။
“တိုၼ်ႇယဝ်ႉႁႃႉလုၵ်ႈ! ပဵၼ်ၸိူင်ႉႁိုဝ်မႃးလႃႇ”
ၶႃႈၵေႃႈ ၵွတ်ႇဢဝ်ၼၢႆးႁဝ်းဝႆႉသမ်ႉပေႃးမၼ်ႈတဵင်ႈတဵင်ႈ။
“ၶႃႈၵူဝ်တေႉယဝ်ႉ! ၶႃႈၵူဝ်တေႉယဝ်ႉဝႃႈ” လၢတ်ႈယဝ်ႉၵေႃႈ ႁွင်ႉႁႆႈဢွၵ်ႇမႃးယူႇ။
“ၼၢႆးမီးယူႇႁိမ်းလၢၼ်ယဝ်ႉ ဢမ်ႇလူဝ်ႇၵူဝ်ၼႃ” လုပ်ႈပၼ်လင်ၶႃႈလွႆးလွႆးယဝ်ႉ။
လွင်ႈဢၼ်ပဵၼ်ယူႇၶမ်ႈဝႃး ၶႃႈႁဵတ်းႁိုဝ်မႃးႁိူၼ်းၼၼ်ႉတႄႉ ၶႃႈဢမ်ႇတွင်းမၼ်းလႆႈသေဢိတ်းယဝ်ႉ။ ၼၢႆးႁဝ်းၵေႃႈ ဢဝ်ယႃပၼ်ၶႃႈၵိၼ်သေ ၶႃႈၵေႃႈၼွၼ်းလိုဝ်ႈၵႂႃႇယဝ်ႉ။
ၶႃႈဢမ်ႇႁူႉဝႃႈၶႃႈပဵၼ်သင် ၵူၺ်းၵႃႈ ဝၼ်းမိူဝ်ႈၼႆႉ ၶႃႈႁိူဝ်ႉတေႉယဝ်ႉ၊ ဢမ်ႇမီးႁႅင်းၶႂ်ႈဝူၼ်ႉၶႂ်ႈႁဵတ်းသင်သေဢိတ်း၊ လွင်ႈလႆႈလိုဝ်ႈႁိူဝ်ႉၼွၼ်းယူႇၼၼ်ႉ ပဵၼ်ဢၼ်လီလိူဝ်ပိူၼ်ႈ တွၼ်ႈတႃႇၶႃႈၼႂ်းဝၼ်းမိူဝ်ႈၼႆႉယဝ်ႉ။
ဢမ်ႇတၼ်းႁူႉသင် ၶႃႈၼွၼ်းလိုဝ်ႈၵႂႃႇ တိုၼ်ႇမႃးၶိုၼ်းၵေႃႈ မိူၼ်ႁၢင်ႈမိူင်းပေႃးၶႂ်ႈလပ်းသိင်ႇယဝ်ႉ။ ယွၼ်ႉပိူဝ်ႈၽူၼ်ၵေႃႈတူၵ်း မွၵ်ႇၵုမ်ႈၵေႃႈသုမ်ႇမိုတ်းတၼ်လူင်ဝႆႉၼၼ်ႉယဝ်ႉ။ ယၢမ်းၼၼ်ႉ ဢၢႆႈၸၢႆးႁဝ်းလႄႈဢူၺ်းၵေႃႉမၼ်းၵေႃႈ ဢွၼ်ၵၼ်ၶဝ်ႈႁိူၼ်းမႃးသေ
“ပဵၼ်ၸိူင်ႉႁိုဝ်မႃးလႃႇ ၶႅၼ်းမႃးယဝ်ႉႁႃႉ” သႅင်ၶိူဝ်းထၢမ်။
“ဢိုမ်ႈ! ပဵၼ်သင်လႄႈ တေလႆႈဢွၼ်ၵၼ်မႃးပေႃးတဵမ်ႁိူၼ်းၸိူင်ႉၼႆလႃႇ” ၶႃႈဢၼ်ၼွၼ်းယူႇၼႂ်းၵၢင်ႁိူၼ်းၼၼ်ႉ လႆႈလုၵ်ႉမႃးၼင်ႈဢိင်ၽႃသေ လၢတ်ႈၸူးၶဝ်ၵႂႃႇယူႇ။
“လၢတ်ႈၸိူင်ႉၼႆလႆႈယဝ်ႉတႄႉ ႁၢႆယဝ်ႉ” ၸွမ်ၶိူဝ်းလၢတ်ႈ။
“ပီႈဢၢႆႈသိူဝ်ၵေႃႈမႃးႁႃႉၼႆႉ ပၢၵ်ႇဝၼ်းႁဵင်ပီႊ ၸင်ႇတေႁၼ်မႃးႁိူၼ်းႁဝ်း”
“မိူဝ်းၶိုၼ်းႁေယဝ်ႉဢမ်ႇလီႁိုဝ်!”
“ၵိၼ်ၶဝ်ႈယဝ်ႉၸင်ႇမိူဝ်းလႄႈ” သဵင်ၼၢႆးႁဝ်းဢၼ်မေႃးယူႇၼႂ်းသွင်ႇၾႆးၼၼ်ႉလၢတ်ႈၸူး။
“ယိၼ်းလီယိၼ်းၸူမ်းၶႃႈၼၢႆး”
“မႃးၸႂ်းၶႃႈႁႃႉ မႃးၵိၼ်ၶဝ်ႈႁိူၼ်းႁဝ်းလႃႇ!!”
“ၵွပ်ႈဝႃႈတီႈႁိူၼ်းႁဝ်း ဢမ်ႇပေႃးမီးၶဝ်ႈၵိၼ်ၼၼ်ႉၼႃႇ” ၸၢႆးသိူဝ် လၢတ်ႈၵိူဝ်ႉၸူးယူႇ။
ၼိူဝ်ၽိူၼ်မူႇၶဝ်ႈပၢင်မူၼ်းၼၼ်ႉ ၶဝ်ၸိူဝ်းၼၼ်ႉၵေႃႈ ဢွၼ်ၵၼ်တၵ်းၽၵ်းပၼ်ၶႃႈသေ ႁိမ်ၵၼ်တၵ်းသႂ်ႇယူႇ။ မိူၼ်တေသႂ်ႇတေႉ ၵူၺ်းၵႃႈ ၶဝ်ၵေႃႈႁဵတ်းၵႅင်ႈၵူၺ်း ၶႃႈႁူႉၶိုတ်းယူႇယဝ်ႉ၊ ၶဝ်တေဢွၼ်ၵၼ်တၵ်းမိူဝ်ႈလဵဝ်ၵၼ်သေ ယိုၼ်ႈပၼ်ၶႃႈမိူဝ်ႈလဵဝ်ၵၼ်ယဝ်ႉ၊ မိူဝ်ႈၶႃႈတုင်းဝၢၼ်ႇပႂ်ႉႁပ်ႉယူႇၼၼ်ႉ ၶဝ်ၵေႃႈ တၵ်းသႂ်ႇၵိၼ်တႃႇၶဝ်ႁေ ၼေးၵၼ်ၵႂႃႇၵႂႃႇၶိုၼ်းၶိုၼ်း ၵဝ်ၵေႃႈဝႃႈမႂ်းတေသႂ်ႇပၼ် မႂ်းၵေႃႈဝႃႈမႂ်းတေသႂ်ႇပၼ် ထဵင်ၵၼ် ထိုင်တီႈၶႃႈယဵၼ်ႉၸႂ်ဢမ်ႇလႆႈ ပေႃးလႆႈႁိုတ်းႁႂ်ႈၶဝ်ၵိုတ်းထဵင်ၵၼ်ၼၼ်ႉၼႃႇ။ ၵူၺ်းၵႃႈ ပွၵ်ႈၼႆႉ ၶႃႈၵေႃႈ တင်ႈၸႂ်ဢမ်ႇသူၼ်ၸႂ်သေ ပၼ်ႁႂ်ႈၶဝ်ထဵင်ၵၼ်ယူႇႁဵတ်းၼၼ်ယဝ်ႉ ၶႃႈၵေႃႈ ၼင်ႈၵိၼ်ၶဝ်ႈႁေတူၺ်းၶဝ်ၵႂႃႇၵူၺ်း။ မိူဝ်ႈၶႃႈယဵၼ်ၸိူင်ႉၼၼ်ၵေႃႈ ၶဝ်ၵေႃႈယဵၼ်ၵႂႃႇသေ တူၺ်းၼႃႈၶႃႈယဝ်ႉ
“ပဵၼ်သင်လႄႈၼင်ႈယဵၼ်ၸိူင်ႉၼႆလႃႇ” ၸွမ်ၶိူဝ်းထၢမ်။
“ႁၼ်ဝႃႈ ပီႈဢၢႆႈၶဝ်ထဵင်ၵၼ် မၼ်းလီတူၺ်းဝႆႉၶႃႈသမ်ႉတေႁၢမ်ႈႁဵတ်းသင်လႃႇ”
“မၼ်းတၼ်းၵႂႃႇလႅတ်းမႃးမိူဝ်ႈလႂ်လႃႇ” သၢႆႈႁိူဝ်ႈၼင်ႈၸိူဝ်ႈသေတူၺ်းၶႃႈယူႇ။
ပီႈဢၢႆႈၶႃႈ ၼုမ်ႇႁိူင်းၼၼ်ႉတႄႉ တူၺ်းဝၢၼ်ႇၽၵ်းသေ “မၼ်းၵိၼ်ၽၵ်းဝၢၼ်ႁဝ်းမူတ်းယဝ်ႉ! တင်းၵိုတ်းဢဝ်ဝၢၼ်ႇလဵဝ်ၵူၺ်းႁေ”
ၶႃႈၵေႃႈ မိူၼ်တေဢိမ်ႇယဝ်ႉလႄႈ လုၵ်ႉၵႂႃႇပႅတ်ႈၶဝ်ယဝ်ႉ ၶဝ်ႈၵႂႃႇၼွၼ်းၶူတ်းၽႃႈၶိုၼ်းယူႇ။ ၵတ်းၵတ်းၸိူင်ႉၼႆ မိူဝ်ႈၵိၼ်ဢိမ်ႇယဝ်ႉၵေႃႈ လူဝ်ႇၼွၼ်းၵူၺ်းဢမ်ႇၸႂ်ႈႁႃႉ။
တွၼ်ႈသိပ်းသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈသိပ်းဢဵတ်းၶႃႈ။
တႃႇတွင်း။ ။ ၸိူင်းႁူဝ်ၼႆႉ ဢွင်ႈတီႈ၊ ပိူင်ပဵၼ်၊ ငဝ်းလၢႆးၼၼ်ႉ ဝူၼ်ႉသၢင်ႈမႃးဢဝ်ၵူၺ်း။
