တွၼ်ႈၸဵတ်း
သဵင်ၽၵ်းတူလင်မေႃးႁႅင်း ဢဝ်ၸိုၼ်ႈၶိူဝ်းလႄႈတင်း တိုၼ်းႁၢၼ်ၶႃ ပေႃးတူၵ်းၸႂ်ၵူဝ်မႃးယဝ်ႉ ယိုင်ႈႁၼ်ၼႃႈလိုၼ်းၼုမ်ႇ ဢၼ်ၸႂ်လမ်ယူႇၼၼ်ႉ ယိုင်ႈၶႅၼ်းလီၵူဝ်မႃးထႅင်ႈ။
“ပဵၼ်သင်ၶဝ်ႈမႃးပေႃးဢမ်ႇတွႆႇၽၵ်းတူလႃႇ”
လိုၼ်းၼုမ်ႇဢၼ်ၶတ်းၸႂ်ႁႂ်ႈၸႂ်ယဵၼ်ယူႇၼၼ်ႉၵေႃႈ
“ဢေႃႈ! မီးၵၢၼ်လမ်ႇလွင်ႈၼႃႇၶႃႈလႄႈ..လိုမ်းတွႆႇၶႃႈဢေႃႈ ပဵၼ်လွင်ႈႁဵတ်းသၢင်ႈ..ဢၼ်ဢမ်ႇမီးလွင်ႈယဵၼ်ႇငႄႈတႄႉယဝ်ႉၶႃႈ မိူဝ်းၼႃႈမႃး ပေႃးတေၶဝ်ႈၽၵ်းတူ..ၶႃႈတေၶတ်းၸႂ်တွႆႇပၼ်ယူႇ”
“မီးၵၢၼ်သင်ဝႆႉလႃႇ တူၺ်းမိူၼ်ပဵၼ်ၵၢၼ်လမ်ႇလွင်ႈတေႉယဝ်ႉ”
လိုၼ်းၼုမ်ႇၵေႃႈ ႁႃတူၺ်းလုင်းဢွင်ႇဢမ်ႇႁၼ်ယဝ်ႉသေ
“ဢမ်ႇမီးလွင်ႈသင်ယဝ်ႉၶႃႈ!” ဝိၼ်ႇၼႃႈပႆဢွၵ်ႇၵႂႃႇၶိုၼ်းယူႇ။
ၸိုၼ်ႈၶိူဝ်းမိူၼ်တေၶၢတ်ႈလၢမ်းလႆႈယဝ်ႉလႄႈ
“ပေႃးလွင်ႈၵူၼ်းဢၼ်ထုၵ်ႇလိုပ်ႈဢွၵ်ႇၵၢၼ်ၼၼ်ႉတႄႉ.. လၢတ်ႈတီႈႁဝ်းၵေႃႈလႆႈ”
ဢဝ်လိုၼ်းၼုမ်ႇၵိုတ်းလူင်ၵႂႃႇ ၼႅတ်ႈဝိၼ်ႈၼႃႈၸူးယဝ်ႉ၊ ၸိုၼ်ႈၶိူဝ်းၵေႃႈ သိုပ်ႇလၢတ်ႈထႅင်ႈဝႃႈ
“မိူဝ်ႈဝႃး.. ယွၼ်ႉၶဝ်လႄႈ..သူထုၵ်ႇၶႅၵ်ႇတူပ်းၼႃႈဢမ်ႇၸႂ်ႈႁိုဝ်”
မိူၼ်ဝႃႈ တိုၼ်းႁၢၼ်ၼၼ်ႉၵေႃႈ တိုၵ်ႉႁႃႁူႉလွင်ႈၼႆႉၵူၺ်းလႄႈ ပဵၼ်ဢၼ်တူၵ်းၸႂ်လူင်မႃးသေ
“ႁႃ! ႁင်ႈႁႃးဢမ်ႇႁူႉလွင်ႈၼႆႉလႃႇ.. ဝႃႈယူႇယဝ်ႉ ၵွပ်ႈႁင်လႄႈလႆႈသင်ႇႁႂ်ႈလုင်းဢွင်ႇၼႅတ်ႈၸတ်းၵၢၼ်ၵႂႃႇၵမ်းလဵဝ် တိုၵ်ႉဝူၼ်ႉယူႇဝႃႈ.. ၵေႃႉႁဝ်းပဵၼ်ၵူၼ်းဢမ်ႇမီးလွင်ႈမီးတၢင်းၸဵမ်မိူဝ်ႈလႂ် တီႈတေႉၵေႃႈ..လွင်ႈတၢင်းပဵၼ်ၸိူင်ႉၼႆလူး..”
မိူဝ်ႈႁူႉဝႃႈ ၸိုၼ်ႈၶိူဝ်းပဵၼ်ၵူၼ်းသင်ႇၼႆၵေႃႈ ဢဝ်လိုၼ်းၼုမ်ႇယဵၼ်ၵႂႃႇၵမ်းၼိုင်ႈသေ ယိုင်ႈၸႂ်လမ် ယိုင်ႈၶႅၼ်းလူဝ်ႇၸႂ်ယဵၼ်ၼႆလႄႈ
“ၶႃႈၵေႃႈတိုၵ်ႉႁႃမႃးႁဵတ်းၵၢၼ်ၵူၺ်း.. ဢမ်ႇႁူႉဝႃႈပိူင်ၵၢၼ်ၸတ်းၵၢၼ်ၼႂ်းလၢၼ်ႉၼႆႉပဵၼ်ၸိူင်ႉႁိုဝ် မီးၶၵ်ႉတွၼ်ႈၵၢၼ်သင်ႇၵၢၼ်ၸိူင်ႉႁိုဝ် ၵူၺ်းၵႃႈ..မိူဝ်ႈၶႃႈလႆႈႁပ်ႉပုၼ်ႈၽွၼ်းယဝ်ႉ ၶႃႈၵေႃႈတေႁဵတ်းၸွမ်းပုၼ်ႈၽွၼ်းၶႃႈ..ၼင်ႇဢၼ်မီးၼၼ်ႉႁႂ်ႈလီ ၵူၺ်းၵႃႈ.. လွင်ႈဢၼ်ၵူၼ်းႁဵတ်းၵၢၼ်..ဢၼ်ၶႃႈမီးပုၼ်ႈၽွၼ်းတူၺ်းထိုင်ၼၼ်ႉ ထုၵ်ႇလိုပ်ႈဢွၵ်ႇၵၢၼ်ၵႂႃႇ..လူၺ်ႈဢမ်ႇလႆႈႁူႉၸွမ်းၸိူင်ႉၼႆ ၸွင်ႇတေလႆႈဝႃႈ ပဵၼ်တီႈယူပ်ႈယွမ်းၶႃႈယူႇႁိုဝ်..”
လၢတ်ႈဢဝ်တိုၼ်းႁၢၼ်တူၺ်းၼႃႈၸိုၼ်ႈၶိူဝ်းသေ လၵ်ႉယုမ်ႉယူႇၸုတ်းၵုတ်းယဝ်ႉ။ လိုၼ်းၼုမ်ႇသိုပ်ႇလၢတ်ႈထႅင်ႈ
“ပေႃးဝႃႈတေႉ ၶဝ်ၵေႃႈဢမ်ႇလႆႈႁဵတ်းႁႂ်ႈမီးလွင်ႈလူႉသုမ်းသင်ၶႃႈလူး လွင်ႈဢၼ်ၶႃႈထုၵ်ႇတူပ်းၼႃႈၼၼ်ႉၵေႃႈ ဢမ်ႇလႆႈၵဵဝ်ႇၶွင်ႈတင်းၶဝ် ပဵၼ်ယွၼ်ႉၶႃႈတင်ႈၸႂ်ႁႂ်ႈမၼ်းပဵၼ်ၵူၺ်း သင်ပဵၼ်လွင်ႈၼႆႉၵူၺ်းတႄႉ ၶႃႈဝႃႈ..မၼ်းဢမ်ႇမီးလွင်ႈတၢင်းပဵင်းပေႃး တေႁႂ်ႈၶဝ်ထုၵ်ႇလိုပ်ႈဢွၵ်ႇၵၢၼ်ၵႂႃႇၶႃႈၼႃ”
“သူႁပ်ႉႁွင်းလႆႈယူႇႁႃႉ..ဝႃႈမၼ်းဢမ်ႇလႆႈမီးလွင်ႈလူႉသုမ်းသင် လွင်ႈဢၼ်သူဢဝ်တူဝ်သူၶဝ်ႈၸွႆႈၵႄႈပၼ်ႁႃၼၼ်ႉ တေႁဵတ်းလႆႈတႃႇသေႇယူႇႁႃႉ”
“ဢမ်ႇၸႂ်ႈဝႃႈ လွင်ႈၸိူင်ႉၼႆ..တေၵိူတ်ႇၶိုၼ်ႈပဵၼ်မႃးတႃႇသေႇလူး”
“သူဢဝ်သင်မႃးႁပ်ႉႁွင်းလႆႈလႃႇ..ဝႃႈမၼ်းတေဢမ်ႇၵိူတ်ႇၶိုၼ်ႈပဵၼ်လွင်ႈၸိူင်ႉၼႆမႃးထႅင်ႈ တူဝ်သူၵူၺ်းၼၼ်ႉ..ဢမ်ႇႁပ်ႉဢဝ်ပၼ်ႁႃၼႂ်းလၢၼ်ႉၼႆႉလႆႈလေႃႇၼႃႈ သူၵေႃႈႁဵတ်းၵၢၼ်သူၼၼ်ႉၵႂႃႇႁႂ်ႈလီၵူၺ်းလႄႈ လွင်ႈၵူၼ်းတေၶဝ်ႈႁိုဝ်တေဢွၵ်ႇၼၼ်ႉ ၽၢႆႇၸတ်းၵၢၼ်ၶဝ်တေၸတ်းၵၢၼ်ၵႂႃႇၵူၺ်း”
လိုၼ်းၼုမ်ႇၵေႃႈ မိူၼ်တေပွင်ႇၸႂ် ယိူင်းဢၢၼ်းဢၼ်ၸိုၼ်ႈၶိူဝ်းၶႂ်ႈလၢတ်ႈၼၼ်ႉလီသေ လွင်ႈဢၼ်ဝႃႈ ႁႂ်ႈၼွင်ႉဢွမ်မႃးႁဵတ်းၵၢၼ်လႆႈၶိုၼ်းၼၼ်ႉၵေႃႈ တေဢမ်ႇမီးတိုဝ်ႉတၢင်းမၼ်းယဝ်ႉၼႆယူႇ ၵူၺ်းၵႃႈ မၼ်းၵေႃႈ ယင်းဢမ်ႇပႆႇယွမ်း
“ၸွႆႈလၢတ်ႈၼႄဢိတ်းၼိုင်ႈၸွင်ႇလႆႈၶႃႈ ၶဝ်ႁဵတ်းၽိတ်းလွင်ႈသင်လႄႈ ထိုင်တီႈထုၵ်ႇလိုပ်ႈဢွၵ်ႇၸိူင်ႉၼႆ ၶႃႈယင်းဢမ်ႇႁၼ်ဝႃႈၶဝ်ႁဵတ်းၽိတ်းတီႈလႂ် လွင်ႈဢၼ်ၶဝ်ႁဵတ်းၼၼ်ႉၵေႃႈ မၼ်းၵေႃႈၵိူတ်ႇၶိုၼ်ႈလႆႈတီႈ ၵူၼ်းႁဵတ်းၵၢၼ်ၶဝ်ယူႇတႃႇသေႇယဝ်ႉ ပေႃးတေလိုပ်ႈၵူၼ်းဢွၵ်ႇၵႂႃႇ..ၸွမ်းလူၺ်ႈလွင်ႈလဵၵ်ႉလဵၵ်ႉၸိူင်ႉၼႆၵူၺ်းၸိုင် မၼ်းတေဢမ်ႇပဵၼ်ပၼ်ႁႃယႂ်ႇမႃးၶႃႈႁႃႉ ၸွႆႈဝူၼ်ႉထတ်းသၢင်ႈဢိတ်းၼိုင်ႈၶႃႈလႄႈ.. ၸွႆႈႁႂ်ႈၶဝ်ပွၵ်ႈမႃးႁဵတ်းၵၢၼ်ၶိုၼ်းၸွင်ႇလႆႈၶႃႈႁိုဝ်”
“သူၵေႃႈႁူႉယူႇဝႃႈ… မၼ်းၵိူတ်ႇၶိုၼ်ႈမႃးလႆႈယူႇတႃႇသေႇၼႆ ၼင်ႇႁိုဝ်ပၼ်ႁႃမၼ်းတေဢမ်ႇၵိူတ်ႇၶိုၼ်ႈပဵၼ်မႃးထႅင်ႈၼၼ်ႉ ထုၵ်ႇလီၵႄႈၶႆၵႂႃႇဢမ်ႇၸႂ်ႈႁိုဝ်.. ႁဝ်းၵေႃႈလႆႈတႅပ်းတတ်းၵႂႃႇယဝ်ႉ”
တိုၼ်းႁၢၼ်ၵေႃႈ တူၺ်းငဝ်းလၢႆးတင်းသွင်ၵေႃႉ ဢမ်ႇပေႃးလီယဝ်ႉလႄႈ ၸွမ်းလူၺ်ႈမၼ်းႁူႉလွင်ႈႁဵတ်းသၢင်ႈၸိုၼ်ႈၶိူဝ်းလီသေ မိူဝ်ႈလႂ်မၼ်းတႅပ်းတတ်းယဝ်ႉ ဢမ်ႇမီးလွင်ႈသင်တေမႃးလႅၵ်ႈလၢႆႈမၼ်းလႆႈ၊ ၽၢႆႇလင်ၵၢၼ်တႅပ်းတတ်းမၼ်းၼၼ်ႉၵေႃႈ တိုၼ်းမီးလွင်ႈမီးတၢင်းမၼ်းဝႆႉယူႇၼႆ မၼ်းၸင်ႇလၢတ်ႈတီႈလိုၼ်းၼုမ်ႇၵႂႃႇ
“ႁဝ်းပွင်ႇၸႂ်လွင်ႈဢၼ်သူထူပ်းၼၼ်ႉယူႇၼႃ ၵူၺ်းၵႃႈႁဝ်းၵေႃႈ.. ဢမ်ႇၸၢင်ႈၸွႆႈလၢတ်ႈတၢင်သူလႆႈ..မိူဝ်ႈလႂ်ၶဝ်တႅပ်းတတ်းႁဵတ်းၵႂႃႇယဝ်ႉၼၼ်ႉ ဢမ်ႇဝႃႈၽႂ်ၼႃႈလႂ်ၵေႃႈယဝ်ႉ တိုၼ်းလႅၵ်ႈလၢႆႈၸႂ်ၶဝ်ဢမ်ႇလႆႈၼၼ်ႉယဝ်ႉ”
ၶွၼ်းႁူဝ်ဝႆဝုတ်းဝုတ်းတေႃႇလိုၼ်းၼုမ်ႇ တႃႇပၼ်ၾၢင်ႉဝႃႈ မၼ်းႁဵတ်းသင်ဢမ်ႇလႆႈယဝ်ႉၼႆယူႇ။ လိုၼ်းၼုမ်ႇၵေႃႈ ဢမ်ႇၸၢင်ႈလၢတ်ႈသင်လႆႈယဝ်ႉလႄႈ ယွၼ်းဢွၵ်ႇႁွင်ႈၵႂႃႇယဝ်ႉ။
မၼ်းၵေႃႈၸႂ်ဢမ်ႇလီမိူၼ်ၵၼ် သိုပ်ႇပွင်ႇလႅင်းပၼ်တီႈ ၼွင်ႉဢွမ်ၵႂႃႇလူၺ်ႈတင်းၸႂ်ဢမ်ႇလီၸွမ်းယဝ်ႉ။
ဝၢႆးသေလိုၼ်းၼုမ်ႇဢွၵ်ႇၵႂႃႇယဝ်ႉ တိုၼ်းႁၢၼ်ၵေႃႈ ယၵ်ႉတူၺ်းၼႃႈၸိုၼ်ႈၶိူဝ်းၼၼ်ႉလီလီသေ
“မိူဝ်ႈလဵဝ်ၼႆႉ ပေႉသူၼ်ၸႂ်ၵၢၼ်တီႈလၢၼ်ႉၼႃႇလႃႇ ၵႆႉၵေႃႉၵႆႉမႃးၼႃႇ မီးလွင်ႈဢၼ်လီသူၼ်ၸႂ်ဝႆႉႁႃႉ..” တိုၼ်းႁၢၼ်ယုမ်ႉၸူးမိူၼ်ႁူႉဝႆႉသေ သိုပ်ႇလၢတ်ႈထႅင်ႈ
“မိူဝ်ႈဢွၼ်တၢင်းၼႆႉ ပၢၵ်ႇဝၼ်းႁဵင်ပီႊၸင်ႇၶဝ်ႈလၢၼ်ႉ လိူဝ်သေၼၼ်ႉ..ဢမ်ႇတွၼ်ႉႁၼ်ၽူႈလူင်းတိုၼ်းၸိူင်ႉၼင်ႇၸိုၼ်ႈၶိူဝ်းၼႆႉ..သူၼ်ၸႂ်လွင်ႈၵၢၼ်ၼႂ်းလၢၼ်ႉၼႆႉသေပွၵ်ႈ ပေႃးလၢတ်ႈၼႄၵေႃႈ.. ႁႂ်ႈမႃးပဵၼ်ၸဝ်ႈၶွင်လၢၼ်ႉယဝ်ႉ လွင်ႈၼႆႉၵူၺ်းဢမ်ႇမေႃၸတ်းၵၢၼ်ႁႃႉ.. တေႁႂ်ႈႁႃးၵႂႃႇႁဵတ်းပၼ်ၵူႈလွင်ႈ ၵေႃႉႁႃးၵေႃႈ..ဢမ်ႇလူဝ်ႇႁဵတ်းၵၢၼ်ႁေယဝ်ႉလေႃႇ မိူဝ်ႈလဵဝ်ၼႆႉ မိူၼ်ဝႃႈႁႃးတေဢမ်ႇလႆႈႁဵတ်းၵၢၼ်တေႉတေႉယဝ်ႉ မၢင်လွင်ႈႁႃးယင်းပႆႇႁူႉ ၵေႃႉႁႃးသမ်ႉပေႃးႁူႉမူတ်းယဝ်ႉ ႁႃးၶႂ်ႈထၢမ်ဝႃႈ…ၽႂ်တေႉလႃႇ..ဢၼ်ပဵၼ်ၸဝ်ႈၶွင်လၢၼ်ႉၼႆႉ လူဝ်ႇထၢမ်လုင်းဢွင်ႇလီလီယဝ်ႉ”
“မိူဝ်ႈပဵၼ်ၸဝ်ႈၶွင်လၢၼ်ႉယဝ်ႉ လွင်ႈပဵၼ်ယူႇၼႂ်းလၢၼ်ႉၼၼ်ႉ.. တူၺ်းၸွမ်းၽွင်ႈလႄႈ ယႃႇပေပႂ်ႉလုင်းဢွင်ႇၵူၺ်း ပေႃးဢမ်ႇၼၼ် တေလၢႆႈၸဝ်ႈၶွင်လၢၼ်ႉပႅတ်ႈႁေ..”
ပႆဢွၵ်ႇႁွင်ႈၵႂႃႇပႅတ်ႈတိုၼ်းႁၢၼ်ယူႇယဝ်ႉ။ လိုၼ်းၼုမ်ႇ ဢၼ်ယင်းတိုၵ်ႉပႂ်ႉတူၺ်းလွင်ႈၶႅမ်ႉလႅပ်ႈယူႇၼႂ်းလၢၼ်ႉၼၼ်ႉၵေႃႈ မိူဝ်ႈလႆႈႁၼ် ၸိုၼ်ႈၶိူဝ်းၼႃႈတူႇတူႇလူင်ဢွၵ်ႇလၢၼ်ႉၵႂႃႇၼႆ ၶိုၼ်းဝူၼ်ႉထိုင်ၶိုၼ်းမိူဝ်ႈၶမ်ႈၼၼ်ႉယဝ်ႉၵေႃႈ မိူၼ်ပဵၼ်လွင်ႈၼွၼ်းၾၼ်ၵူၺ်းယူႇယဝ်ႉ။
ၼွင်ႉလႅင်းၵေႃႈ မိူဝ်ႈႁူႉဝႃႈၼွင်ႉဢွမ်ထုၵ်ႇလိုပ်ႈဢွၵ်ႇၵၢၼ်ယဝ်ႉၼႆ ၽႅၼ်ၵၢၼ်ဢၼ်မၼ်းဝၢင်းဝႆႉတေႁဵတ်းမိူၼ် ၼွင်ႉဢွမ် ဢၼ်ပဵၼ်ၽႅၼ်ၵၢၼ်တႃႇတေႁဵတ်းႁၢႆႉ လိုၼ်းၼုမ်ႇၼၼ်ႉၵေႃႈ လႆႈၵိုတ်းလိုဝ်ႈၵႂႃႇပႅတ်ႈယဝ်ႉ။ သင်မၼ်းႁဵတ်းၸိူင်ႉၼၼ်မႃး မၼ်းတေၸၢင်ႈထုၵ်ႇလိုပ်ႈဢွၵ်ႇၵၢၼ်လႆႈ ၼႆၼၼ်ႉယဝ်ႉ။
ပေႃးဝႃႈတႄႉ ၵူၼ်းႁၢင်ႈလီမီးၼမ်ႉၵတ်ႉၸိူင်ႉၼင်ႇၼွင်ႉလႅင်းၼႆႉ တေၵႂႃႇႁႃႁဵတ်းၵၢၼ်တီႈလႂ်ၵေႃႈလႆႈယဝ်ႉ၊ ၵူၺ်းၵႃႈ ယွၼ်ႉလွင်ႈတၢင်းမၢင်လွင်ႈသေ ၸင်ႇလႆႈၶဝ်ႈမႃးႁဵတ်းၵၢၼ်တီႈလၢၼ်ႉၼႆႉယူႇ။
မိူဝ်ႈၸဵတ်းပီႊပူၼ်ႉမႃး ယၢမ်းၵၢင်ၶမ်ႈလိုၵ်းယဵၼ် ပဵၼ်ၽွင်းၽူၼ်တူၵ်းႁႅင်းဝႆႉယူႇတၢၼ်ႇတၢၼ်ႇ ၼွင်ႉလႅင်းဢၼ်တိူဝ်ႉၸႂ်ႁွင်ႉႁႆႈယူႇၼိူဝ်ၵၢင်တၢင်း ယွၼ်ႉထုၵ်ႇၵေႃႉႁၵ်ႉပွႆႇၽႃႈၼႆၼၼ်ႉ ႁဵတ်းႁႂ်ႈမၼ်းတိူဝ်ႉၸႂ်ႁႅင်းၼႃႇသေ ပႆတၢၵ်ႇၽူၼ်လူင်ၵႂႃႇၸွမ်းတၢင်း ပေႃးဢမ်ႇႁူႉၵတ်းႁူႉၼၢဝ်သင်ၼၼ်ႉယဝ်ႉ၊ မိူဝ်ႈယင်းတိုၵ်ႉပႆၵႂႃႇလွႆးလွႆးယူႇၼိူဝ်သဵၼ်ႈတၢင်းလူင်ၼၼ်ႉ ယူႇယူႇၾႃႉမႅပ်ႈလင်မေႃးႁႅင်းၼႃႇလႄႈ သဵင်ႁွင်ႉႁႆႈလင်ဢွၵ်ႇမႃးသေ ၼင်ႈလူမ်ႉလူင်းၵႂႃႇယူႇ ယၢမ်းၼၼ်ႉ ၸင်ႇသမ်ႉမီးၵူၼ်းၵေႃႉၼိုင်ႈ ၸုၵ်းယူႇၽၢႆႇၼႃႈမၼ်းယဝ်ႉ ဢဝ်ၸွင်ႈမႃးၵင်ႈပၼ်မၼ်းလႄႈ ယိုၼ်ႈမိုဝ်းၸူးမၼ်းၵႂႃႇ။
မိူဝ်ႈယူႇၼႂ်းၵႄႈလွင်ႈၵူဝ် လွင်ႈတိူဝ်ႉၸႂ်လူင်ၼၼ်ႉ မီးၵူၼ်းယိုၼ်ႈမိုဝ်းၸူးၸိူင်ႉၼႆ မၼ်းၸင်ႇႁႅၼ်ၼႃႈယၵ်ႉတူၺ်းၵူၼ်းၵေႃႉၼၼ်ႉသေ မိူၼ်တေမီးႁႅင်းမႃးယဝ်ႉလႄႈ ယိုၼ်ႈမိုဝ်းယိပ်းဢဝ်ၵႂႃႇယူႇ ၵူၼ်းၵေႃႉၼၼ်ႉတႄႉပဵၼ်ၸိုၼ်ႈၶိူဝ်းယဝ်ႉ။ ၸိုၼ်ႈၶိူဝ်းၼၼ်ႉၵေႃႈ ၸွႆႈမၼ်းမိူဝ်းသူင်ႇပၼ်တီႈႁိူၼ်းၶဝ်ၵႂႃႇသေ ၼႂ်းဝၼ်းၼၼ်ႉ.. ပဵၼ်ဝၼ်းဢၼ်မၼ်းလိုမ်းဢမ်ႇလႆႈသေပွၵ်ႈၼၼ်ႉယဝ်ႉ။ ႁဵတ်းႁႂ်ႈမၼ်းလႆႈၸွမ်းႁႃၸိုၼ်ႈၶိူဝ်းမႃးယူႇလၢႆပီႊ တေႃႇထိုင်ပေႃးလႆႈထူပ်းၸိုၼ်ႈၶိူဝ်းတီႈလၢၼ်ႉၼႆႉ မိူဝ်ႈသၢမ်ပီႊပူၼ်ႉမႃးၼၼ်ႉလႄႈ ႁဵတ်းႁႂ်ႈမၼ်းပွႆႇပႅတ်ႈၼႃႈၵၢၼ်မၼ်းသေ တႅပ်းတတ်းမႃးႁဵတ်းၵၢၼ်တီႈလၢၼ်ႉၼႆႉယူႇ။
ၸွမ်းၼင်ႇတၢင်းမုင်ႈမွင်းမီးဝႆႉဝႃႈ ဝၼ်းၼိုင်ႈ ၵူၼ်းၸိူင်ႉၼင်ႇၸိုၼ်ႈၶိူဝ်း တေတူၺ်းႁၼ်မႅၼ်ႈမၼ်းမႃးၼႆၼၼ်ႉ ၶတ်းၸႂ်ႁဵတ်းၵၢၼ်တႄႉတႄႉလႄႈ ၶတ်းၸႂ်ႁႂ်ႈပဵၼ်တီႈသူၼ်ၸႂ်ၵူၼ်းတင်းၼမ်ယူႇ၊ မၼ်းၵေႃႈ လႆႈပဵၼ်တီႈသူၼ်ၸႂ်တီႈၵူၼ်းတင်းၼမ်မႃးတႄႉၼင်ႇဝႃႈ ၵူၺ်းၵႃႈၼႂ်းၵူၼ်းၸိူဝ်းၼၼ်ႉတႄႉ ဢမ်ႇၸႂ်ႈယိူင်းဢၢၼ်းမၼ်းလူး ၵူၼ်းၵေႃႉဢၼ်မၼ်းယိူင်းဢၢၼ်းဝႆႉယူႇၵေႃႉလဵဝ်ၼၼ်ႉသမ်ႉ ဢမ်ႇႁၼ်ငဝ်းလၢႆး တေသူၼ်ၸႂ်မၼ်းမႃးသေဢိတ်း ၼၼ်ႉယဝ်ႉ။
ၵူၼ်းႁဵတ်းၵၢၼ်ၶဝ်ၵေႃႈ ဢွၼ်ၵၼ်ႁူႉယူႇဝႃႈ ၼွင်ႉလႅင်းၼၼ်ႉ တေၶိုၼ်ႈမႃးပဵၼ်ႁူဝ်ၼႃႈၶဝ်ၼႆ ၽွင်းဢမ်ႇမီးႁူဝ်ၼႃႈၼၼ်ႉၵေႃႈ ၵူၼ်းႁဵတ်းၵၢၼ်ၶဝ် တေၸူးဢဝ်ၼွင်ႉလႅင်းၵေႃႉဢွၼ်ႁဵတ်းၵၢၼ်ၵၼ်ၵႂႃႇယူႇ။
ၼွင်ႉလႅင်းၵေႃႈ လွမ်ဝူၼ်ႉယူႇဝႃႈ ပေႃးလႆႈၶိုၼ်ႈပဵၼ် ႁူဝ်ၼႃႈၵူၼ်းႁဵတ်းၵၢၼ်မႃးယဝ်ႉ မၼ်းတေၸၢင်ႈမီးတိုဝ်ႉတၢင်း ၶဝ်ႈၸမ်ၸိုၼ်ႈၶိူဝ်းၶိုၼ်ႈမႃးလႆႈထႅင်ႈၼႆ ယိၼ်းၸူမ်းဝႆႉထႃႈယူႇ။ ၵူၺ်းၵႃႈ ဝၢႆးသေႁူႉဝႃႈလိုၼ်းၼုမ်ႇ ဢၼ်တိုၵ်ႉႁႃမႃးၼၼ်ႉ ၶိုၼ်ႈမႃးပဵၼ်ႁူဝ်ၼႃႈၼႆၵေႃႈ ႁဵတ်းႁႂ်ႈမၼ်းဢမ်ႇႁၢၼ်ႉၸႂ်တေႉတေႉယဝ်ႉ။
မိူဝ်ႈၽွင်း လိုၼ်းၼုမ်ႇၵႆႉလႆႈႁူပ်ႉထူပ်းၸိုၼ်ႈၶိူဝ်းၶဝ်ၼၼ်ႉၵေႃႈ ႁဵတ်းႁႂ်ႈမၼ်းပေႃးဢမ်ႇလႆႈၸႂ်လိုၼ်းၼုမ်ႇမႃးယူႇယဝ်ႉ မိူဝ်ႈႁူႉဝႃႈလိုၼ်းၼုမ်ႇႁိမ်ဢဝ်တီႈယူႇႁူဝ်ၼႃႈၼၼ်ႉၵႂႃႇၼႆ မၼ်းယိုင်ႈၶႅၼ်းၸဵပ်းၸႂ်မႃးထႅင်ႈ ၶတ်းၸႂ်ႁႃၵူႈလၢႆးတၢင်း ၼင်ႇႁိုဝ်လိုၼ်းၼုမ်ႇပေႃးတေလႆႈႁပ်ႉလွင်ႈလူႉသုမ်း လႄႈ သင်လိုၼ်းၼုမ်ႇပေႃးဢွၵ်ႇၵၢၼ်ၵႂႃႇလႆႈၼၼ်ႉ ယိုင်ႈၶႅၼ်းလီ ၼႆယဝ်ႉ။
ၼႂ်းမူႇၸုမ်းၵူၼ်းႁပ်ႉၶႅၵ်ႇၼၼ်ႉၵေႃႈ တႅၵ်ႇပဵၼ်သွင်ၽၢႆႇ ဢမ်ႇမႅၼ်ႈၵၼ်မႃး မီးလွင်ႈထဵင်မေႃးၵၼ်မႃး ႁဵတ်းၵၢၼ်ယူႇၵေႃႈ ၸႅၵ်ႇၽႄၵူၼ်းၶွင်ၵေႃႉၼႆႉ ၵူၼ်းၶွင်ၵေႃႉၼၼ်ႉမႃးယူႇ။ မိူဝ်ႈၵူၼ်းႁဵတ်းၵၢၼ် ဢမ်ႇမီးလွင်ႈႁူမ်ႈတိၼ်ႁူမ်ႈမိုဝ်းၵၼ်မႃးယဝ်ႉၵေႃႈ လွင်ႈၶႅမ်ႉလႅပ်ႈၼႃႈၵၢၼ်ၼၼ်ႉ ယူပ်ႈယွမ်းလူင်းၵႂႃႇတႄႉတႄႉယဝ်ႉ။
လိူဝ်သေၼၼ်ႉ ၼွင်ႉလႅင်းၵေႃႈ ဢီးသူၼ်းႁႂ်ႈမီးၵူၼ်းဢမ်ႇႁၼ်လီၼိူဝ်လိုၼ်းၼုမ်ႇ မီးလွင်ႈပႅင်းၸင်းတေႃႇလိုၼ်းၼုမ်ႇမႃးယဝ်ႉ ဢဝ်လွင်ႈၼွင်ႉဢွမ်ၼၼ်ႉ လၢတ်ႈၼႄၵူၼ်းႁဵတ်းၵၢၼ်ၶဝ် ႁႂ်ႈပိူၼ်ႈပေႃးၸင်းလိုၼ်းၼုမ်ႇမႃးယူႇ။
ဝၼ်းၼိုင်ႈယဝ်ႉဝၼ်းၼိုင်ႈ လွင်ႈဢၼ်ၼွင်ႉလႅင်းလၢတ်ႈဢွၵ်ႇၵႂႃႇၼၼ်ႉၵေႃႈ ၽႄႈလၢမ်းလိုဝ်းလူင်ၵႂႃႇ ၵေႃႉတေႃႇၵေႃႉ ဢွၼ်ၵၼ်ဢုပ်ႇလၢတ်ႈၵၼ် သမ်ႉပေႃးၸွတ်ႇၵႂႃႇမူတ်း လွင်ႈတေႉႁိုဝ်လွင်ႈလဵၼ်ႈႁိုဝ် ဢမ်ႇမီးၵူၼ်းထတ်းသၢင်လႄႈ ၶၢဝ်ႇလိုဝ်းၵေႃႈပဵၼ်ၶၢဝ်ႇၸိုဝ်ႈၸႂ်ႈၵႂႃႇယဝ်ႉ။
“ၸွင်ႇႁူႉႁႃႉ လိုၼ်းၼုမ်ႇၼၼ်ႉ ပဵၼ်ၵူၼ်းဢၼ်လီၵူဝ်တႄႉဢိူဝ်ႈ တူၺ်းဢဝ်ၼွင်ႉဢွမ်ၼၼ်ႉၵူၺ်းလႃႈ ပေႃးဝႃႈတႄႉ မၼ်းယင်းဢမ်ႇႁဵတ်းသင်ၽိတ်းလူးၵွၼ်ႇ ထုၵ်ႇလိုပ်ႈဢွၵ်ႇၵၢၼ်ၵႂႃႇႁဵတ်းၼၼ် ႁဝ်းဝႃႈမၼ်းဢမ်ႇထုၵ်ႇမႅၼ်ႈၼႃ လွင်ႈႁဵတ်းသၢင်ႈၶဝ်ၼၼ်ႉ ပေႃးဝႃႈမၼ်းႁိုင်မႃး ႁဝ်းၸိူဝ်းၼႆႉ တေၸၢင်ႈထုၵ်ႇလီလိုပ်ႈဢွၵ်ႇၵႂႃႇၵေႃႈပဵၼ်လႆႈ”
“ၼၼ်ႉယဝ်ႉ သင်ၶဝ်တေသိုပ်ႇပဵၼ်ႁူဝ်ၼႃႈၵႂႃႇထႅင်ႈၼႆ ႁဝ်းဝႃႈ ဢမ်ႇႁိုင်သင်ၼႆႉၵေႃႈ ႁဝ်းလူဝ်ႇႁၢင်ႈႁႅၼ်းဢွၵ်ႇၵၢၼ်ၵႂႃႇၵူၺ်းယဝ်ႉ”
“ႁဝ်းၵေႃႈၼၼ် ပေႃးတေႁႂ်ႈၶဝ်ပဵၼ်ႁူဝ်ၼႃႈယူႇတႄႉ လူဝ်ႇႁႃၵၢၼ်မႂ်ႇဝႆႉယဝ်ႉ”
“ၵူၺ်းၵႃႈ ၵူၼ်းဢႃႇယုယႂ်ႇၸိူင်ႉၼင်ႇႁဝ်းၼႆႉဢိူဝ်ႈ မီးလုၵ်ႈမီးလၢင်းသေ တေႁႃၵၢၼ်လီလီႁဵတ်းထႅင်ႈၵေႃႈ တေႁႃယၢပ်ႇယူႇၼၼ်ႉယဝ်ႉ သမ်ႉဝႃႈဢမ်ႇၵျိူၵ်ႈၵေႃႈ ၵႃႈတေလႆႈယဵၼ်ႉယူႇၵႂႃႇၵူၺ်း”
“ပေႃးဝူၼ်ႉႁၼ်ပၼ်ႁႃၼႃႈႁိူၼ်းၵေႃႈ ၵႃႈတေလႆႈယဵၼ်ႉယူႇ..ၵူၺ်းယဝ်ႉ သင်ၶဝ်ဢမ်ႇမႃးပဵၼ်ႁူဝ်ၼႃႈ ႁဝ်းၵေႃႈဢမ်ႇၸင်းၶဝ်တၢၼ်ႇၼၼ်ႉၵဝ်ႇလေႃႇ”
“တူၺ်းၶဝ်ႁဵတ်းတေႃႇၼွင်ႉဢွမ်ယဝ်ႉ ၸိူင်ႉၼင်ႇႁဝ်းၼႆႉၵေႃႈ ထုၵ်ႇလီၾၢင်ႉၵၼ်ယဝ်ႉၼႃႈ ”
“ပေႃးဢမ်ႇၾၢင်ႉၵၼ်ၵေႃႈ မိူဝ်ႈၽုၵ်ႈမိူဝ်ႈႁိုဝ်းၼႆႉ ယူဝ်ၸၢင်ႈထုၵ်ႇလိုပ်ႈဢွၵ်ႇၵၢၼ်ၵႂႃႇၵေႃႈပဵၼ်လႆႈ”
ပီႈၸိင်ႇၶႃလိူၼ်သႂ် ဢၼ်ယူႇၸွမ်းလိုၼ်းၼုမ်ႇယူႇတႃႇသေႇၼၼ်ႉ မိူဝ်ႈဢွၼ်တၢင်းၶၢဝ်ႇလိုဝ်းလိုၼ်းၼုမ်ႇၸိူဝ်းၼၼ်ႉတႄႉ ၶဝ်ၵေႃႈဢမ်ႇပေႃးလႆႈသူၼ်ၸႂ်သင် ၵူၺ်းၵႃႈ ဝၢႆးသေမီး လွင်ႈဢၼ်ၼွင်ႉဢွမ် ထုၵ်ႇလိုပ်ႈဢွၵ်ႇမႃးယဝ်ႉၼႆ လွင်ႈယုမ်ႇယမ်ၼိူဝ်လိုၼ်းၼုမ်ႇၼၼ်ႉၵေႃႈ သၼ်ႇၶွၼ်းမႃးယူႇယဝ်ႉ။ ထွမ်ႇတၢင်းၼိုင်ႈယဝ်ႉတၢင်းၼိုင်ႈလၢတ်ႈ ထတ်းသၢင်တူၺ်းၸွမ်းလွင်ႈဢၼ်ႁၼ်ၼၼ်ႉၵေႃႈ သမ်ႉလႅပ်ႈပဵၼ်လွင်ႈတႄႉဝႆႉယူႇ ဝၢႆးလိုၼ်းၼုမ်ႇၶိုၼ်ႈပဵၼ်ႁူဝ်ၼႃႈယဝ်ႉ ၶဝ်ၵေႃႈဢမ်ႇလႆႈမီးၶၢဝ်းယၢမ်းဢုပ်ႇဢူဝ်းၵၼ် မိူၼ်မိူဝ်ႈဢွၼ်တၢင်းလႄႈ ၵုမ်ႇႁဵတ်းၵၢၼ်ၽႂ်ၵၢၼ်မၼ်းၵူၺ်း ၼၼ်ႉယဝ်ႉ။
လိုၼ်းၼုမ်ႇၵေႃႈ တႄႇၸဵမ်မိူဝ်ႈလႆႈႁပ်ႉပုၼ်ႈၽွၼ်းပဵၼ်ႁူဝ်ၼႃႈမႃးၼၼ်ႉ လွင်ႈၸမ်ၸႂ်ၼႂ်းၵႄႈၵၢင်ႁူဝ်ၼႃႈ လႄႈတင်း ၵူၼ်းႁပ်ႉၶႅၵ်ႇၶဝ် ၶၢတ်ႇၵၢၼ်ၵပ်းသိုပ်ႇၵၼ်မႃးသေ မိူၼ်ဝႃႈမီးလွင်ႈႁၢင်ႇၵႆၵၼ်ၵႂႃႇတိၵ်းတိၵ်းယူႇ ဢမ်ႇမိူၼ်ၵူၼ်းႁဵတ်းၵၢၼ်ႁူမ်ႈၵၼ်သေဢိတ်းၼၼ်ႉယဝ်ႉ။ ၵမ်ႈၽွင်ႈႁၼ်မၼ်းၵေႃႈ မိူၼ်သမ်ႉပေႃးၶႂ်ႈၵူဝ်မၼ်းၵႂႃႇယဝ်ႉ ၊ ၵမ်ႈၽွင်ႈၵေႃႈ ဢမ်ႇယၵ်ႉတူၺ်းၼႃႈမၼ်းသေဢိတ်း၊ ၵမ်ႈၽွင်ႈၵေႃႈ မီးသၢႆတႃဢၼ်ပႅင်းၸင်းသေ ယၵ်ႉတူၺ်းၸူးမၼ်းၵႂႃႇ။ ပေႃးဝႃႈမၼ်းမႃးယူႇတေႃႇၼႃႈ ၸုမ်းၵူၼ်းႁဵတ်းၵၢၼ်ၶဝ်ၼႆ သီၼႃႈလွင်ႈႁဵတ်းသၢင်ႈၶဝ်ၼၼ်ႉ သမ်ႉပေႃးပႅၵ်ႇပိူင်ႈလူင်ၵႂႃႇမူတ်း ႁၼ်ယဝ်ႉၵေႃႈ သမ်ႉပေႃးယၢပ်ႇလူင်ၵႂႃႇယဝ်ႉ။
ၶၢဝ်းတၢင်းၼိုင်ႈလိူၼ် တႄႇၸဵမ်မိူဝ်ႈလိုၼ်းၼုမ်ႇၶိုၼ်ႈမႃးပဵၼ်ႁူဝ်ၼႃႈ လၢတ်ႈလႆႈဝႃႈ ၶႅၵ်ႇဢၼ်ၶဝ်ႈမႃးၼႂ်းလၢၼ်ႉၼႆႉယွမ်းလူင်းမႃးတႄႉတႄႉယူႇ။ မိူဝ်ႈဢွၼ်တၢင်းၼၼ်ႉ တီႈၼင်ႈ ႁွင်ႈၵိၼ်ၶဝ်ႈ ဢမ်ႇတွၼ်ႉပဝ်ႇႁေပွၵ်ႈ ၵူၺ်းၵႃႈ ၽွင်းဢၼ်လိုၼ်းၼုမ်ႇၶိုၼ်ႈမႃးပဵၼ်ႁူဝ်ၼႃႈၼႆႉ ၶႅၵ်ႇၵေႃႈဢမ်ႇတွၼ်ႉတဵမ်သေပွၵ်ႈ ႁွင်ႈၵေႃႈ ၵႆႉပဝ်ႇဝႆႉတႃႇသေႇ ထတ်းသၢင်တူၺ်းယဝ်ႉ ငိုၼ်းၶဝ်ႈၼႂ်းလၢၼ်ႉၵေႃႈ လႆႈဝႃႈဢေႇလိူဝ်သေမိူဝ်ႈပူၼ်ႉမႃးတႄႉတႄႉ။
တီႈၼႂ်းပၢင်ၵုမ်လွင်ႈလၢၼ်ႉၼၼ်ႉ ၽူႈမၢႆလုင်းဢွင်ႇလႆႈတၢင်ႇလၢတ်ႈၼႄ ႁူဝ်ႁုပ်ႈငိုၼ်းၶဝ်ႈငိုၼ်းဢွၵ်ႇၵႂႃႇယဝ်ႉ။
“ပေႃးတူၺ်းႁူဝ်ၼပ်ႉငိုၼ်းၶဝ်ႈၼႆ ၶၢဝ်းတၢင်းၼိုင်ႈလိူၼ်ပူၼ်ႉမႃးၼႆႉ လႆႈဝႃႈယွမ်းလူင်းမႃးၼမ်တႄႉတႄႉ” လုင်းဢွင်ႇလၢတ်ႈ။
ၸိုၼ်ႈၶိူဝ်းဢၼ်ၼင်ႈထွမ်ႇယူႇၼၼ်ႉ မိူၼ်တေႁူႉလွင်ႈတၢင်းမၼ်းမႃးသေ တူၺ်းၼႃႈလိုၼ်းၼုမ်ႇယဝ်ႉၵေႃႈ
“လွင်ႈၼႆႉ..သူၵေႃႈႁႃလွၵ်းလၢႆးၵႄႈၶႆမၼ်းၵႂႃႇလႄႈ ပေႃးဢမ်ႇလႆႈၵေႃႈ.. ႁၢင်ႈႁႅၼ်းဢဝ်ငိုၼ်းလိူၼ်သူ..သၢႆႈတႅၼ်းဝႆႉၵူၺ်းလႄႈၼႃႈ”
လိုၼ်းၼုမ်ႇဢၼ်လႆႈငိၼ်းၸိူင်ႉၼၼ်ၵေႃႈ လၢတ်ႈသင်ပေႃးဢမ်ႇဢွၵ်ႇယဝ်ႉ၊ တႃႉႁၵ်းငိုၼ်းလိူၼ် တႃႉထုၵ်ႇလိုပ်ႈဢွၵ်ႇၵၢၼ်ႁေဢမ်ႇလီႁိုဝ်.. ႁၼ်ယူႇဝႃႈၶဝ်ပဵၼ်ၵူၼ်းလၢတ်ႈၵူၺ်း “မၼ်းၵေႃႉလဵဝ်ၼၼ်ႉ ႁပ်ႉဢဝ်ပၼ်ႁႃတင်းလၢၼ်ႉဢမ်ႇလႆႈ” မိူဝ်ႈမီးပၼ်ႁႃမႃးသမ်ႉ ဢဝ်ဢၢပ်ႈပၼ်မၼ်းဝႆႉတင်းမူတ်းၸိူင်ႉၼႆ မၢင်ၵမ်းမႃးၵေႃႈ ၶႂ်ႈဢွၵ်ႇၵၢၼ်ၵႂႃႇမိူၼ်ၵၼ်ယဝ်ႉ။
ပေႃးတေမႃးတူၺ်းၽၢႆႇၼႃႈၵၢၼ်မၼ်းၼႆ မၼ်းၵေႃႈယင်းဢမ်ႇလႆႈႁဵတ်းသင်လူး တေဝႃႈၵုမ်းၵူၼ်းႁပ်ႉၶႅၵ်ႇၼႆၵေႃႈ ၶဝ်ၵေႃႈယင်းႁဵတ်းၵၢၼ်ၵႂႃႇမိူၼ်ၵဝ်ႇယူႇ တေဝႃႈပဵၼ်ၵူၼ်းႁုင်မိုဝ်ႉၵေႃႈ မၼ်းသမ်ႉဢမ်ႇၵဵဝ်ႇၶွင်ႈသင်သေလွင်ႈ ဢမ်ႇၸႂ်ႈဝႃႈပဵၼ်ပၼ်ႁႃၼႂ်းလၢၼ်ႉၵူၺ်းႁိုဝ် ႁဵတ်းၵၢၼ်ၸွမ်းၵူၼ်းၼင်ႇၶဝ်ၼၼ်ႉၵေႃႈ မိူၼ်ၶႂ်ႈသဵင်ႈၸႂ်မႃးယဝ်ႉ။
မိူဝ်ႈဢၼ်ၸိုၼ်ႈၶိူဝ်းလၢတ်ႈၸိူင်ႉၼႆမႃး ၽႂ်ၵေႃႈႁိုဝ်ႁတ်းထဵင်ၶိုၼ်းလႆႈ ၸုမ်းႁူဝ်ၼႃႈၶဝ်ၸိူဝ်းၼၼ်ႉတႄႉ လႆႈပၼ်ႁႅင်းၸႂ်မၼ်းၵႂႃႇၵူၺ်း ဢွၼ်ၵၼ်ဢွၵ်ႇႁွင်ႈၵႂႃႇပႅတ်ႈမၼ်းမူတ်းယူႇ။
ၼွင်ႉလႅင်းၵေႃႈ မိူဝ်ႈႁူႉဝႃႈ လိုၼ်းၼုမ်ႇထုၵ်ႇႁႅင်းဢီးလွင်ႈၼႃႈၵၢၼ်မႃးၼႆ ပဵၼ်ဢၼ်ႁၢၼ်ႉၸႂ်ႁၢၼ်ႉၶေႃးဝႆႉယူႇ မၼ်းယင်းဢမ်ႇဝူၼ်ႉမႅၼ်ႈဝႃႈ လွင်ႈဢၼ်မၼ်းၶတ်းၸႂ်မႃးတင်းလိူၼ်ၼၼ်ႉ တေလႆႈႁပ်ႉၽွၼ်းလႆႈၼမ်ထိုင်တၢၼ်ႇၼႆႉ။
လိုၼ်းၼုမ်ႇၵေႃႈ မႃးယူႇၼႂ်းႁွင်ႈသေ ၼင်ႈဝူၼ်ႉၶိုၼ်းၼႂ်းၶၢဝ်းတၢင်းဢၼ်မၼ်းပဵၼ်ႁူဝ်ၼႃႈမႃးၼႆႉ ဢမ်ႇတွၼ်ႉမီးဝၼ်းလႂ် ဢၼ်မၼ်းလႆႈမိူဝ်းၸဝ်ႉ လႆႈမိူဝ်းႁပ်ႉလုၵ်ႈသေပွၵ်ႈ မၢင်ဝၼ်း..ဝၼ်းလိုဝ်ႈၵေႃႈ ယင်းလႆႈမႃးတူၺ်းၵၢၼ်ယူႇ။ ၶၢဝ်းယၢမ်းမၼ်းလႄႈတင်းလုၵ်ႈၼၼ်ႉ မိူၼ်ဢမ်ႇပေႃးမီးပၼ်ၵၼ်လႆႈၵႃႈႁိုဝ်၊ ဝူၼ်ႉၸွမ်းၵၢၼ်..ဝူၼ်ႉၸွမ်းလုၵ်ႈသေ မိူၼ်တေႁိူဝ်ႉမႃး ၸွမ်းၼႃႈၵၢၼ်ဢၼ်ဢမ်ႇတဵမ်ၸႂ်ၼႆႉယဝ်ႉ။ ယူႇယူႇၵေႃႈ သႅင်ႁိူၼ်းၼုမ်ႇသိုပ်ႇၽူင်းမႃးႁႃမၼ်း
“လိုၼ်းၼုမ်ႇ! လႅင်းဢွၼ်ႇ..လူမ်းမႆႈသုင်ႁႅင်းၼႃႇ မိူၼ်တေဢမ်ႇယူႇလီ ႁဝ်းတေဢဝ်ၶဝ်ၵႂႃႇႁူင်းယႃယၢမ်းလဵဝ်ၼႆႉယဝ်ႉ”
မိူဝ်ႈငိၼ်းၸိူင်ႉၼၼ် ၼႅတ်ႈလႅၼ်ႈဢွၵ်ႇလၢၼ်ႉၵႂႃႇၵမ်းလဵဝ် လူၺ်ႈတီႈဢမ်ႇတၼ်းတူၺ်းၽႂ်သေၵေႃႉၼၼ်ႉယဝ်ႉ။ ၽွင်းၼၼ်ႉ ၸိုၼ်ႈၶိူဝ်း လႄႈတင်း တိုၼ်းႁၢၼ်ၵေႃႈ သမ်ႉတိုၵ်ႉဢွၵ်ႇလၢၼ်ႉမႃး တေဢၢၼ်းပွၵ်ႈမိူဝ်းၼႆယူႇ၊ မိူဝ်ႈလႆႈႁၼ်လိုၼ်းၼုမ်ႇလႅၼ်ႈဢွၵ်ႇလၢၼ်ႉၵႂႃႇၸိူင်ႉၼၼ် တိုၼ်းႁၢၼ်ဢၼ် မီးလွင်ႈၶႂ်ႈႁူႉၶႂ်ႈႁၼ်ၼၼ်ႉၵေႃႈ ၸွမ်းႁွင်ႉထၢမ်မၼ်းၵႂႃႇ ၵူၺ်းၵႃႈ မၼ်းၵေႃႈဢမ်ႇလႆႈငိၼ်း ႁွင်ႉဢဝ်လူတ်ႉလႆႈယဝ်ႉၵေႃႈ ႁိပ်ႈၼႅတ်ႈဢွၵ်ႇၵႂႃႇ လူၺ်ႈဢမ်ႇလႆႈသူၼ်ၸႂ်ၽႂ်ၼၼ်ႉယဝ်ႉ။
တွၼ်ႈၸဵတ်းသုတ်းၵႂႃႇယဝ်ႉ ပႂ်ႉသိုပ်ႇတူၺ်းတွၼ်ႈပႅတ်ႇထႅင်ႈၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube ၵေႃႈလႆႈၶႃႈ။
