တွၼ်ႈႁႃႈ
တီႈၼႂ်းသူၼ်ၼမ်ႉ ဢၼ်မီးလုၵ်ႈဢွၼ်ႇလဵၼ်ႈပေႃးတဵမ်လူင်ၵႂႃႇမူတ်း လႅင်းဢွၼ်ႇ လႄႈ ၼူၼ်းလၢဝ် ၵေႃႉပဵၼ်လုၵ်ႈယိင်းမေႃသွၼ်သႅင်ႁိူၼ်းၼုမ်ႇ မိူဝ်ႈလႆႈႁၼ်ၸိူင်ႉၼၼ်ယဝ်ႉ ပဵၼ်ဢၼ်လီသူၼ်ၸႂ်ၼႃႇလႄႈ ဢွၼ်ၵၼ်လႅၼ်ႈလူင်ၵႂႃႇတူၺ်းပိူၼ်ႈၵမ်းလဵဝ်။ လိုၼ်းၼုမ်ႇတင်း သႅင်ႁိူၼ်းၼုမ်ႇ ၼၼ်ႉၵေႃႈ တေၸၢင်ႈႁၢမ်ႈသင်လႆႈ ဢွၼ်ၶဝ်မႃးလႄႇယဝ်ႉလူး ၵႃႈလႆႈၸွမ်းၸႂ်ၶဝ်သေ ပၼ်ၶဝ်လဵၼ်ႈၵႂႃႇယဝ်ႉ။ ဝၢႆးသေလႄႇယဝ်ႉ ၸင်ႇဢွၼ်ၵႂႃႇၵိၼ်ၶဝ်ႈၵုမ်းၵၼ်သေ ၽႄၵၼ်ပွၵ်ႈမိူဝ်းၵႂႃႇႁင်းၽႂ်ႁင်းမၼ်းယူႇ။
လိုၼ်းၼုမ်ႇၶႃသွင်ၵေႃႉမႄႈလုၵ်ႈတႄႉ ဢွၼ်ၵၼ်ၵႂႃႇဝႄႉၼႂ်းၵၢတ်ႇ ႁႃသိုဝ်ႉၽၵ်းယဝ်ႉ။ ယွၼ်ႉဝႃႈ ပေႃးဝၼ်းလိုဝ်ႈမႃးၼႆ လိုၼ်းၼုမ်ႇ တေၵႆႉၵႆႉဢွၼ် လႅင်းဢွၼ်ႇၵႂႃႇလႄႇယူႇတႃႇသေႇလႄႈ ပေႃးၵႂႃႇလႄႇမႃးယဝ်ႉၵေႃႈ တေဢွၼ်ၵၼ်ဝႄႉၼႂ်းၵၢတ်ႇယဝ်ႉ ၸင်ႇတေပွၵ်ႈမိူဝ်း။
မွင်းႁွတ်ႈၼႂ်းၵၢတ်ႇၵူၺ်း ၵူၼ်းၼႂ်းၵၢတ်ႇသမ်ႉပေႃးႁူႉၸၵ်းၶႃမူတ်းယဝ်ႉ ပႃႈပႃႈၼႂ်းၵၢတ်ႇၶဝ်ၵေႃႈ ပေႃးဝႃႈလႆႈႁၼ်လႅင်းဢွၼ်ႇမႃးၸွမ်းၼႆ ဢွၼ်ၵၼ်ယဝ်ႉယဝ်ႉယွၵ်ႇယွၵ်ႇမၼ်းယူႇ တေဝႃႈႁိုဝ်ၵေႃႈ ပဵၼ်လုၵ်ႈဢွၼ်ႇဢၼ်လီႁၵ်ႉလူး ၼႃႈတႃၵေႃႈႁၢင်ႈလဝ်းတေႉတေႉၼၼ်ႉယဝ်ႉ မၢင်ၵေႃႉၵေႃႈလၢတ်ႈဝႃႈ ႁႂ်ႈမိူဝ်းယူႇၸွမ်းၶဝ် မိူဝ်းႁဵတ်းလုၵ်ႈၶူၺ်ၶဝ်လၢၼ်ၶူၺ်ၶဝ် ၸိူဝ်းၼႆႉယူႇ။
လိုၼ်းၼုမ်ႇၵေႃႈ မိူဝ်ႈလႆႈႁၼ် လုၵ်ႈၸၢႆးမၼ်းၼၼ်ႉ ယဵၼ်ႉဢမ်ႇလႆႈ တေဢၢမ်းဝႃႈမၼ်းလဝ်းမိူၼ်ၵၼ်ယဝ်ႉ၊ မၢင်ၵမ်းမႃးၵေႃႈ ဝူၼ်ႉၶႂ်ႈႁၼ်ၼႃႈဢူႈမႄႈၶဝ်မိူၼ်ၵၼ်ယူႇဝႃႈ မၼ်းတေႁၢင်ႈလီတၢၼ်ႇႁိုဝ်ၼႆ။ မိူဝ်ႈတိုၵ်ႉဢွၼ်ၵၼ်သိုဝ်ႉၽၵ်းယူႇၼၼ်ႉ လိူၵ်ႈလိူၵ်ႈသမ်ႉ မီးၽူႈယိင်းၵေႃႉၼိုင်ႈ မႃးတူင်ႉတၵ်ႉၶႃၵႂႃႇ။
“လိုၼ်းၼုမ်ႇၸွင်ႇၸႂ်ႈႁိုဝ်…”
လိုၼ်းၼုမ်ႇၵေႃႈ မိူဝ်ႈလႆႈႁၼ်ၵူၼ်းၵေႃႉၼၼ်ႉယဝ်ႉ မိူၼ်ႁူႉၸၵ်း ယၢမ်ႈႁၼ်တီႈလႂ်သေတီႈတီႈယူႇ ၵူၺ်းၵႃႈဢမ်ႇတွင်းလႆႈလႄႈ
“ၸႂ်ႈဢေႃႈ… ဢမ်ႇႁူႉဝႃႈပဵၼ်…”
“ႁဝ်းပဵၼ်ၼၢင်းၶမ်း… သူတေဢမ်ႇတွင်းႁဝ်းလႆႈယဝ်ႉ… ယွၼ်ႉႁဝ်းမႃးႁဵတ်းၵၢၼ်ၼႂ်းဝဵင်းၼႆႉႁိုင်ၼႃႇယဝ်ႉ..”
“ၸွင်ႇၸႂ်ႈပီႈၶမ်း.. ဢၼ်ႁိူၼ်းမီးႁူဝ်ဝၢၼ်ႈသုတ်းၼၼ်ႉၶႃႈႁ!”
ပီႈၶမ်းၵေႃႈ မိူဝ်ႈလိုၼ်းၼုမ်ႇတွင်းလႆႈၼၼ်ႉ ယုမ်ႉဢွၵ်ႇမႃးသေ
“ၸႂ်ႈယဝ်ႉ… ၸႂ်ႈယဝ်ႉဝႃႈ…”
မိူဝ်ႈႁူႉဝႃႈ ပဵၼ်ၵူၼ်းဝၢၼ်ႈလဵဝ်ၵၼ်ၼႆ သွင်ၶႃၵေႃႈ ၸူမ်းဢုပ်ႇၸူမ်းလၢတ်ႈတေႃႇၵၼ်ၵႂႃႇယူႇ။ ပီႈၶမ်းၼၼ်ႉ မိူဝ်ႈလႆႈႁၼ်လႅင်းဢွၼ်ႇယဝ်ႉ ယဵၼ်ႉၸႂ်ဢမ်ႇလႆႈ တေယွင်ႈဢၢမ်းဝႃႈမၼ်းလီႁၵ်ႉၼႆ၊ ၶဝ်ၵေႃႈ ဢွၼ်ၵၼ်သိုဝ်ႉၽၵ်း လႄႇၵၢတ်ႇၵႂႃႇၸွမ်းၵၼ် တေႃႇပေႃးဢွၵ်ႇၵၢတ်ႇၵႂႃႇယဝ်ႉ။ ၸွမ်းလူၺ်ႈပဵၼ်ၵူၼ်းဝၢၼ်ႈလဵဝ်ၵၼ် ၵႆၵႆတေလႆႈထူပ်းၵၼ်ထႅင်ႈၼၼ်ႉ လႆႈဢဝ်တီႈၵပ်းသိုပ်ႇၵၼ်ဝႆႉသေ ၸင်ႇတေၽၢတ်ႇၽႄၵၼ် ပွၵ်ႈမိူဝ်းၵႂႃႇႁင်းၽႂ်ႁင်းမၼ်းယူႇ။
လိုၼ်းၼုမ်ႇသွင်ၵေႃႉမႄႈလုၵ်ႈၵေႃႈ ဢွၼ်ၵၼ်မႃးႁဵတ်းၶဝ်ႈၽၵ်း ၵိၼ်ၶဝ်ႈၸွမ်းၵၼ်ၵႂႃႇ၊ ယွၼ်ႉလႅင်းဢွၼ်ႇ လႆႈၸႂ်ၵိၼ်ၶဝ်ႈသွႆး ဢၼ်လိုၼ်းၼုမ်ႇႁဵတ်းၼၼ်ႉၼႃႇလႄႈ ပေႃးဝႃႈဝၼ်းလိုဝ်ႈၼႆ တိုၼ်းတေႁဵတ်းလဵင်ႉတၢင်ႇမဵဝ်းဢမ်ႇလႆႈ လိူဝ်သေၶဝ်ႈသွႆး။
မိူဝ်ႈတိုၵ်ႉတေၵိၼ်ၶဝ်ႈၵၼ်ယူႇၼၼ်ႉ ယူႇယူႇၵေႃႈငိၼ်းသဵင်ၵႃးလင်မႃး ၵိုတ်းယူႇၼႃႈႁိူၼ်းလႄႈ လႅင်းဢွၼ်ႇ ၼႅတ်ႈလႅၼ်ႈပိုတ်ႇၽၵ်းတူတူၺ်းၵမ်းလဵဝ် လႆႈႁၼ်မူၺ်ႁွမ်လူင်းလူတ်ႉမႃးယဝ်ႉၵေႃႈ သဵင်လႅမ်လဵၵ်ႉလဵၵ်ႉဢွၼ်ႇမၼ်းၼၼ်ႉ ႁွင်ႉမွၵ်ႈလၢတ်ႈၼႄလိုၼ်းၼုမ်ႇၵႂႃႇသေတႃႉ တူဝ်မၼ်းၼၼ်ႉတႄႉ လႅၼ်ႈၵႂႃႇၸူးမူၺ်ႁွမ်ၵမ်းလဵဝ်
“ၼႃႉမူၺ်မႃးယဝ်ႉ!!”
မူၺ်ႁွမ်ၵေႃႈ မိူဝ်ႈဢၼ်လႆႈႁၼ် လႅင်းဢွၼ်ႇမႃးႁပ်ႉမၼ်းၼႆ ၸူမ်းသိူဝ်းသေႁွပ်ႇဢုမ်ႈဢဝ်မၼ်းၵႂႃႇယူႇ။ ၵူၺ်းၵႃႈ မိူၼ်ဝႃႈမီးၵူၼ်းမႃးၸွမ်းမူၺ်ႁွမ်ၼႆသေ လႅင်းဢွၼ်ႇလႆႈႁၼ်ယဝ်ႉၵေႃႈ
“ၼႃႉမူၺ်ႁွင်ႉၽႂ်မႃးလႃႇ”
ပိုၼ်းမိူင်းၵေႃႈ ၼႄႉၼမ်းတူဝ်ၵႂႃႇ
“မႂ်ႇသုင် လႅင်းဢွၼ်ႇ!.. ႁဝ်းၸိုဝ်ႈပိုၼ်းမိူင်းၼႃ ပဵၼ်ဢူၺ်းၵေႃႉမႄႈလႅင်းဢွၼ်ႇလႄႈ ၼႃႉမူၺ်သူ”
မိူဝ်ႈလိုၼ်းၼုမ်ႇ ႁၼ်ပိုၼ်းမိူင်းၶဝ်ႈႁိူၼ်းမႃး လူၺ်ႈဢမ်ႇထၢင်ႇဢမ်ႇထိူမ်ၼၼ်ႉၵေႃႈ
“ၶူးၵေႃႈမႃးၶႃႈႁႃႉ! ၸွင်ႇပႃႈလႆႈၵိၼ်ၶဝ်ႈၵၼ်မႃးႁိုဝ်”
“ပႆႇလႆႈၵိၼ်သင်.. ဢၢၼ်းႁွင်ႉၶူးမႃးၵိၼ်ၶဝ်ႈသွႆးသူၼၼ်ႉယဝ်ႉ” မူၺ်ႁွမ်လၢတ်ႈ
“ပေႃးၼၼ်တေမႃးမႅၼ်ႈၶၢဝ်းယၢမ်းလီယဝ်ႉ..”
“လိုၼ်းၼုမ်ႇႁဵတ်းၶဝ်ႈသွႆးဝၢၼ်တၢၼ်ႇႁိုဝ်ၼႆ တေလႆႈႁူႉဢရသႃႇမၼ်းမိူဝ်ႈၼႆႉယဝ်ႉၶႃႈၼႃ”
ပိုၼ်းမိူင်းၵေႃႈ မိူဝ်ႈလႆႈၵိၼ်ယဝ်ႉၼၼ်ႉ ဢဝ်ၵိုတ်းမိုင်လူင်ၵႂႃႇ ႁူၺ်ႇတႃမိုၼ်းၵႂၢင်ႈမႃး ၵဵဝ်ႉၵိၼ်ဢရသႃႇမၼ်းၵမ်းလွႆးလွႆးယဝ်ႉ။ သၢႆတႃမူၺ်ႁွမ်ၸွမ်းတူၺ်းသေ
“ဝၢၼ်ၼႃႇၸွင်ႇၸႂ်ႈၶႃႈ”
“ပဵၼ်သုၼ်ႇလီႁဝ်းတေႉယဝ်ႉ ဢမ်ႇယၢမ်ႈလႆႈၵိၼ် ၶဝ်ႈသွႆးတီႈလႂ်ဝၢၼ်တၢၼ်ႇၼႆႉႁေပွၵ်ႈ..” ယုၵ်ႉၼိဝ်ႉပၼ်ပႃးယဝ်ႉ။
ၶဝ်ၵေႃႈ တင်းဢုပ်ႇၵၼ်၊ တင်းၵိၼ်ၶဝ်ႈၵုမ်းၵၼ်ၵႂႃႇ ၼင်ႇႁၢင်ႈဝၢၼ်ႁၢင်ႈမၼ်းၵၼ်ယူႇ။
ထိုင်မႃးထႅင်ႈဝၼ်းၼိုင်ႈ လိုၼ်းၼုမ်ႇၵေႃႈ လႆႈၶဝ်ႈၵၢၼ် မိူၼ်ၼင်ႇၵူႈဝၼ်းယူႇ ၵူၺ်းၵႃႈ မိူဝ်ႈၶဝ်ႈလၢၼ်ႉၵႂႃႇၼၼ်ႉ မီးၵူၼ်းႁဵတ်းၵၢၼ်တင်းၼမ် တူင်ႉတၵ်ႉယုမ်ႉၸူးမၼ်းသေဢမ်ႇၵႃး ႁွင်ႉမၼ်းဝႃႈႁူဝ်ၼႃႈၼႆယဝ်ႉ။ ယွၼ်ႉမိူဝ်ႈဝႃးၼၼ်ႉပဵၼ်ဝၼ်းလိုဝ်ႈလႄႈ ဢမ်ႇႁူႉဝႃႈ တီႈလၢၼ်ႉမီးလွင်ႈလႅၵ်ႈလၢႆႈသင်မႃးထႅင်ႈၼၼ်ႉယဝ်ႉ မိူဝ်ႈမီးလွင်ႈပႅၵ်ႇပိူင်ႈၼိူဝ်မၼ်းမႃးၸိူင်ႉၼႆ ႁဵတ်းႁႂ်ႈမၼ်းဢမ်ႇထၢမ်ဢမ်ႇလႆႈယဝ်ႉ ယၢမ်းၼၼ်ႉ ၸင်ႇမီးၵူၼ်းမႃးတူင်ႉတၵ်ႉမၼ်းထႅင်ႈလႄႈ
“မႂ်ႇသုင်ၶႃႈ ႁူဝ်ၼႃႈ..”
“မႂ်ႇသုင်မိူၼ်ၵၼ်ၶႃႈ ၵူၺ်းၵႃႈ ပဵၼ်သင်လႄႈဝႃႈ ႁဝ်းပဵၼ်ႁူဝ်ၼႃႈလႃႇ”
“သူထုၵ်ႇတၢင်ႇၸၼ်ႉ ၶိုၼ်ႈပဵၼ်ႁူဝ်ၼႃႈၽၢႆႇႁပ်ႉၶႅၵ်ႇၼႆဢေႃႈ”
“ႁဝ်းၼႆႉႁႃႉ! တၼ်းတၢင်ႇၸၼ်ႉပဵၼ်ႁူဝ်ၼႃႈ မိူဝ်ႈလႂ်လႃႇ ႁဝ်းယင်းဢမ်ႇႁူႉလွင်ႈသင်လူး”
“မိူဝ်ႈဝႃးၼၼ်ႉ ၶဝ်လႆႈသူင်ႇလိၵ်ႈၸူး တင်းဢီးမႄးလ်မႃး သူဢမ်ႇလႆႈႁပ်ႉႁႃႉ”
ပေႃးမႃးဝူၼ်ႉတူၺ်းၶိုၼ်းယဝ်ႉ မိူၼ်ဝႃႈ မၼ်းၵေႃႈလႆႈႁပ်ႉယူႇမိူၼ်ၵၼ် ၵူၺ်းၵႃႈ မၼ်းဢမ်ႇလႆႈၶဝ်ႈတူၺ်းၼၼ်ႉယဝ်ႉ။ ၸင်ႇတေဢဝ်ၽူင်းမၼ်းဢွၵ်ႇမႃးတူၺ်းယူႇ။
“ယိၼ်းၸူမ်းယဝ်ႉၶႃႈ”
လိုၼ်းၼုမ်ႇ ဢၼ်လႆႈငိၼ်းၶေႃႈၵႂၢမ်းဢၼ်ပိူၼ်ႈႁွင်ႉဝႃႈႁူဝ်ၼႃႈၼႆၼၼ်ႉ မိူၼ်ဢမ်ႇထုၵ်ႇႁူၸိူင်ႉႁိုဝ်ၵေႃႈဢမ်ႇႁူႉယဝ်ႉ ယူႇယူႇၵေႃႈ သမ်ႉလႆႈမႃးပဵၼ်ႁူဝ်ၼႃႈၸိူင်ႉၼႆ တေၵႂႃႇႁဵတ်းၵၢၼ်မိူၼ်ၵဝ်ႇၵေႃႈ ၵူၼ်းႁဵတ်းၵၢၼ်ၵမ်ႈၽွင်ႈသမ်ႉ ဢမ်ႇပၼ်မၼ်းႁဵတ်းသင်လႄႈ မၼ်းၵေႃႈဢမ်ႇႁူႉဝႃႈ တေလႆႈႁဵတ်းသင် လိူဝ်သေၼင်ႈပႂ်ႉၽူႈၸတ်းၵၢၼ်မႃးၵူၺ်း။
မိူဝ်ႈဢၼ်ၼင်ႈယူႇႁင်းၵူၺ်းၼၼ်ႉ ၸုမ်းၵူၼ်းႁဵတ်းၵၢၼ် ၸုမ်းၼိုင်ႈလႆႈမႃး ၸုၵ်းမူႇလွမ်ႉဢုပ်ႇၵၼ်ၵႂႃႇႁိမ်းမၼ်း မိူၼ်ၶႂ်ႈႁႂ်ႈမၼ်းငိၼ်းၼၼ်ႉယဝ်ႉ။
“ၼႆႉႁႃႉ ႁူဝ်ၼႃႈၵူၼ်းႁပ်ႉၶႅၵ်ႇ ဢမ်ႇႁၼ်ႁဵတ်းၵၢၼ်ႁင်လူး”
“ၼၼ်ႉယဝ်ႉ ႁဵတ်းၸိူင်ႉႁိုဝ်သေဢဝ်ၶဝ်မႃးပဵၼ်ႁူဝ်ၼႃႈလႃႇ ”
“ႁၢင်ႈတိုၵ်ႉမႃးႁဵတ်းၵၢၼ်ၵူၺ်းဢမ်ႇၸႂ်ႈႁိုဝ် ”
“ၼၼ်ႉယဝ်ႉ ဢမ်ႇႁူႉဝႃႈၸႂ်ႉလွၵ်းလၢႆးသင်ၼႃႇ”
“ႁဝ်းႁဵတ်းၵၢၼ်မႃးမီးပဵၼ်လၢႆပီႊယဝ်ႉ ဢမ်ႇႁၼ်ဝႃႈၽူႈပွင်ၵၢၼ်တေႁွင်ႉထူပ်းသေပွၵ်ႈ”
ၵမ်းၼၼ်ႉ ၽူႈယိင်းတူဝ်သုင် ႁၢင်ႈလီငၢမ်းလဝ်း ၽိဝ်ၼိူဝ်ႉၼင်ၶၢဝ်ဢူၼ်ႈၼူၼ်း တၢင်းႁၢင်ႈလီမၼ်းၼၼ်ႉတႄႉ ပဵၼ်တီႈဢၼ်ၽူႈၸၢႆးႁၼ်ပေႃးၶႂ်ႈလႅၼ်ႈၸွမ်း ၽူႈယိင်းႁၼ်ၵေႃႈပေႃးယွင်ႈဢၢမ်းၶွႆၼၼ်ႉယဝ်ႉ ၸိုဝ်ႈၶဝ်တႄႉႁွင်ႉဝႃႈ ၼွင်ႉလႅင်းၼႆသေ ပႆမႃးၸူးၸုမ်းၶဝ်ၼၼ်ႉယဝ်ႉ လၢတ်ႈၵႂႃႇဝႃႈ
“မႃးႁဵတ်းၵၢၼ်ဢမ်ႇပႆႇႁိုင် ပေႃးဢမ်ႇၸႂ်ႉလွၵ်းလၢႆးၸၼ်ႉတႅမ်ႇ ဢမ်ႇမီးဝၼ်းၶိုၼ်ႈပဵၼ်ႁူဝ်ၼႃႈလႆႈလေႃႇ ”
“တူၺ်းၶဝ်ၵေႃႈလႅပ်ႈပဵၼ်ၵူၼ်းလီယူႇ ဢမ်ႇထၢင်ႇဝႃႈတေႁဵတ်းၸိူင်ႉၼႆ”
လိုၼ်းၼုမ်ႇဢၼ်ၼင်ႈယူႇၼၼ်ႉၵေႃႈ လႆႈငိၼ်းၸႅင်ႈလီယူႇၵူႈၶေႃႈၵူႈၵမ်းၼၼ်ႉယဝ်ႉ ၵူၺ်းၵႃႈ ဢမ်ႇလႆႈဢဝ်မႃးသႂ်ႇၸႂ်သင်၊ ၵူၺ်းမွင်းႁႂ်ႈၽူႈၸတ်းၵၢၼ်မႃးသေ လူဝ်ႇဢုပ်ႇၵၼ်ႁႂ်ႈၸႅင်ႈၸႅင်ႈလႅင်းလႅင်းၼၼ်ႉၵူၺ်း။
မိူဝ်ႈဢၼ်ၽူႈၸတ်းၵၢၼ် လုင်းဢွင်ႇႁွတ်ႈထိုင်ယဝ်ႉၼႆ လိုၼ်းၼုမ်ႇၵေႃႈ ၼႅတ်ႈၵႂႃႇၸူးၵမ်းလဵဝ် ၶဝ်ၸိူဝ်းၼၼ်ႉတႄႉ တူၺ်းၸွမ်းၽၢႆႇလင်သေ သႄႉသွမ်းလွင်းႁဵတ်းသၢင်ႈလိုၼ်းၼုမ်ႇ မႃးယူႇ။
ၸွမ်းလူၺ်ႈလိုၼ်းၼုမ်ႇၼၼ်ႉ ၵႆႉလႆႈၶဝ်ႈႁူပ်ႉထူပ်းဢုပ်ႇဢူဝ်းတင်း ၸိုၼ်ႈၶိူဝ်း၊ တိုၼ်းႁၢၼ်ၶဝ်ၼႃႇလႄႈ သမ်ႉလႆႈၶိုၼ်ႈမႃးပဵၼ်ႁူဝ်ၼႃႈၵူၼ်းႁပ်ႉၶႅၵ်ႇထႅင်ႈသေ ၵူၼ်းၶတ်းၸႂ်ႁဵတ်းၵၢၼ်မႃးပဵၼ်လၢႆပီႊ ၸိူင်ႉၼင်ႇၼွင်ႉလႅင်းၼၼ်ႉၵေႃႈ ပဵၼ်ဢၼ်ဢမ်ႇႁၼ်လီၼိူဝ်လိုၼ်းၼုမ်ႇမႃးယူႇမိူၼ်ၵၼ်။
ၼင်ႇႁိုဝ်တေမီးၵူၼ်းထၢင်ႇၽိတ်းလိုၼ်းၼုမ်ႇ တေဢမ်ႇမီးလွင်ႈၼပ်ႉထိုဝ်ၼိူဝ်လိုၼ်းၼုမ်ႇမႃးၼၼ်ႉ မၼ်းၵေႃႈၶတ်းၸႂ် သူၼ်းၾႆးသေႃႇသူၼ်း လၢတ်ႈၼိူဝ်လိုၼ်းၼုမ်ႇလွင်ႈဢမ်ႇလီမႃးယဝ်ႉ။ ပဵၼ်ၵူၼ်းႁၢင်ႈလီယဝ်ႉ သမ်ႉမေႃဢုပ်ႇမေႃလၢတ်ႈႁေၼႆ ဢမ်ႇၸႂ်ႈၽူႈၸၢႆးၵူၺ်းၶႂ်ႈၶဝ်ႈႁႃ ၽူႈယိင်းၵေႃႈတေႃႈမေႃၶႂ်ႈလဵၼ်ႈၵေႃႉယဝ်ႉ မွင်းမၼ်းပိုတ်ႇလၢတ်ႈဢုပ်ႇပိူၼ်ႈၵူၺ်း ဢမ်ႇဝႃႈၸႂ်ႈႁိုဝ်ဢမ်ႇၸႂ်ႈ ၽႂ်ၽႂ်ၵေႃႈဢွၼ်ယုမ်ႇၸွမ်းယူႇ။
ၵႂၢမ်းသိုပ်ႇၵႂၢမ်းၵၼ်ၵႂႃႇ ၵေႃႉၼိုင်ႈလၢတ်ႈမဵဝ်းၼိုင်ႈ ထႅင်ႈၵေႃႉၼိုင်ႈလၢတ်ႈမဵဝ်းၼိုင်ႈ ပၼ်ႇၵႂႃႇပၼ်ႇမႃး မိူၼ်ဝႃႈ လွင်ႈဢမ်ႇလီလိုၼ်းၼုမ်ႇၼၼ်ႉ ဢွၵ်ႇမႃးပဵၼ်လၢႆလွင်ႈလၢႆဢၼ်ယူႇယဝ်ႉ။
လိုၼ်းၼုမ်ႇၵေႃႈ ၸွမ်းလူၺ်ႈဢၼ်မီးလွင်ႈၶႂ်ႈလၢတ်ႈတင်းၼမ်ၼၼ်ႉသေ ႁိပ်ႈႁိပ်ႈၼႅတ်ႈၼႅတ်ႈလၢတ်ႈၵႂႃႇ
“ၶႃႈဢမ်ႇႁူႉဝႃႈ ပဵၼ်ၶေႃႈသင်ႇမႃးႁိုဝ် မၼ်းမီးၸၼ်ႉထၢၼ်ႈၸိူင်ႉႁိုဝ် ပဵၼ်တီႈလီၶႅမ်ႉၸိူင်ႉႁိုဝ် ၵူၺ်းၵႃႈ ၶႃႈၵေႃႈဢမ်ႇၶႂ်ႈလႆႈမၼ်းၶႃႈၼႃ ၶႃႈယွၼ်းပဵၼ်ၵူၼ်းႁဵတ်းၵၢၼ်မိူၼ်ၵဝ်ႇၵူၺ်း ၵေႃႈလႆႈယဝ်ႉ”
လုင်းဢွင်ႇၵေႃႈ ထူၺ်ႈၸႂ်လူင်သေ “ႁဝ်းဢမ်ႇဝူၼ်ႉဝႃႈ မိူဝ်ႈလႆႈထူပ်းသူယဝ်ႉတေလႆႈငိၼ်းၵႂၢမ်းၶေႃႈၼႆႉဢွၵ်ႇမႃး တၢင်းဝူၼ်ႉၵူၼ်းၼုမ်ႇၼႆႉ လၢမ်းယၢပ်ႇတေႉယဝ်ႈ”
ၶဝ်ႈၵႂႃႇၼင်ႈၼႂ်းႁွင်ႈသေ ဢုပ်ႇၵုမ်ၵၼ်ၵႂႃႇ
“သူမီးလွင်ႈတၢင်းၸိူင်ႉႁိုဝ်လႃႇ.. ၼႃႈၵၢၼ်လီလီၸိူင်ႉၼႆ ဢမ်ႇထၢင်ႇဝႃႈ တေထဵင်ၶိုၼ်းလႆႈ.. ၽူႈပွင်ၵၢၼ်ႁဝ်းတႄႉႁၼ်ဝႃႈ သူႁဵတ်းၽွၼ်းလီပၼ်တီႈလၢၼ်ႉတင်းၼမ်လႄႈ ၸင်ႇလႆႈယုၵ်ႉယွင်ႈသူယဝ်ႉ ၼင်ႇႁိုဝ်တေပဵၼ်ၶူဝ်းတွၼ်ႈလီၼၼ်ႉ ၸိုၼ်ႈၶိူဝ်းၵေႃႈ ယင်းလႆႈၼႄႉၼမ်းသူ ႁႂ်ႈၶိုၼ်ႈပဵၼ်ၽူႈႁူဝ်ၼႃႈၽူႈႁပ်ႉၶႅၵ်ႇၼႆၵွၼ်ႇ ၶိုၼ်ႈၸၼ်ႉပဵၼ်ႁူဝ်ၼႃႈမႃး မၼ်းဢမ်ႇလီတီႈလႂ်လႃႇ ၽႂ်ၽႂ်ၵေႃႈၶႂ်ႈပဵၼ်ၼၼ်ႉယဝ်ႉ..”
လိုၼ်းၼုမ်ႇ ၸႂ်ဢမ်ႇယဵၼ်လႆႈယဝ်ႉ
“ၽႂ်ၶႂ်ႈပဵၼ်ၵေႃႈပၼ်ႁႂ်ႈမၼ်းပဵၼ်ၶႃႈလႄႈ.. ဢမ်ႇၸႂ်ႈၶႃႈၵေႃႈလႆႈယဝ်ႉ.. ပေႃးၶႃႈပဵၼ်ႁူဝ်ၼႃႈၼႆ တေဢမ်ႇမီးပၼ်ႁႃၸွမ်းမႃးတၢင်းလင်ၶႃႈႁႃႉ တေဝႃႈၶႃႈၵေႃႈတိုၵ်ႉႁႃမႃးႁဵတ်းၵၢၼ်ၵူၺ်း ၵူၼ်းဢၼ်ၶတ်းၸႂ်ႁဵတ်းၵၢၼ်ၵၼ်မႃးလၢႆပီႊၼၼ်ႉ ၶဝ်တေဝူၼ်ႉၸိူင်ႉႁိုဝ်ၶႃႈလႃႇ တေဢမ်ႇႁၼ်ဝႃႈၶႃႈပေႉပုၼ်ႈၶဝ်ဝႆႉယူႇၶႃႈႁႃႉ လိူဝ်ၼၼ်ႉ ၶဝ်တေဢမ်ႇဝူၼ်ႉဝႃႈ ၽူႈပွင်ၵၢၼ်ၶဝ်တူၺ်းၼႃႈလဵၵ်ႉၼႃႈယႂ်ႇၼႃႇၶႃႈႁိုဝ် ”
“ၶဝ်တေဝူၼ်ႉၸိူင်ႉႁိုဝ်ၼၼ်ႉယူႇတီႈၶဝ်ၵူၺ်း ပုၼ်ႈၽွၼ်းႁဝ်းမီးႁဝ်းၵေႃႈထုၵ်ႇလီႁဵတ်းၵႂႃႇဢမ်ႇၸႂ်ႈႁႃႉ ႁဝ်းဝူၼ်ႉဝႃႈသူမီးၼမ်ႉၵတ်ႉတေမႃးပဵၼ်ႁူဝ်ၼႃႈလႆႈၼႆ.. ႁဝ်းလႅပ်ႈတေဝူၼ်ႉၽိတ်းယဝ်ႉ” ၸိုၼ်ႈၶိူဝ်းၼၼ်ႉၵေႃႈ တင်းလၢတ်ႈတင်းပႆၶဝ်ႈႁွင်ႈမႃး ၸွမ်းၵၼ်တင်း တိုၼ်းႁၢၼ်ၼၼ်ႉယူႇ။
“ၶႃႈႁပ်ႉဢဝ်ပုၼ်ႈၽွၼ်းဢၼ်ၼႆႉဢမ်ႇလႆႈၶႃႈ ”
“ႁဝ်းၵေႃႈတေႁႂ်ႈသူမႃးႁဵတ်းၵၢၼ်တီႈၼႂ်းလၢၼ်းႁဝ်းဢမ်ႇလႆႈမိူၼ်ၵၼ်”
ဢဝ်တိုၼ်းႁၢၼ်လႄႈလုင်းဢွင်ႇတူၵ်းၸႂ် လိူၵ်ႇတႃတူၺ်းၸိုၼ်ႈၶိူဝ်းလူင်ၵႂႃႇၵမ်းလဵဝ်။ လိုၼ်းၼုမ်ႇၵေႃႈ လၢတ်ႈၵႂၢမ်းဢမ်ႇလႆႈမိူၼ်ၵၼ် ယၢမ်းၼၼ်ႉတိုၼ်းႁၢၼ်ၸင်ႇလၢတ်ႈၼႄၵႂႃႇ..
“လိုၼ်းၼုမ်ႇ ယႃႇထွမ်ႇမၼ်း!… မၼ်းဢမ်ႇပေႃးမေႃလၢတ်ႈၵႂၢမ်းထွမ်ႇလႆႈၵႃႈႁိုဝ်.. ႁဝ်းၵေႃႈယွမ်းၼွမ်းယူႇ ဢမ်ႇႁူႉဝႃႈၼႃႈၵၢၼ်ပုၼ်ႈၽွၼ်းၼႆႉ မၼ်းတေႁဵတ်းႁႂ်ႈသူယၢပ်ႇၸႂ်.. ၽၢႆႇတၢင်းႁဝ်းၵေႃႈ ဢမ်ႇမီးႁူဝ်ၼႃႈၽၢႆႇႁပ်ႉၶႅၵ်ႇမႃးႁိုင်ၼႃႇယဝ်ႉ ၵၢၼ်ၵူႈလွင်ႈၵူႈၽၢႆႇၽၢႆႇၵေႃႈ ယဝ်ႉတီႈလုင်းဢွင်ႇၸတ်းၵၢၼ်မူတ်းမူတ်းၵူၺ်း မၢင်လွင်ႈမၼ်းၵေႃႈဢမ်ႇၸၢင်ႈၶဝ်ႈထိုင်လႆႈမူတ်း လႄႈ ဢမ်ႇႁူႉဝႃႈတေဢဝ်ၽႂ်မႃးတႅၼ်းတၢင်လႆႈ ၵူၼ်းဢၼ်ႁူႉလွင်ႈလၢၼ်ႉႁဝ်း၊ ပွင်ႇၸႂ်ၼိူဝ်ၵၢၼ်ငၢၼ်းဢၼ်မီးၼႂ်းလၢၼ်ႉၼႆႉလီလီ ၵူၺ်းၵႃႈ မိူဝ်ႈလႆႈႁၼ် လွင်ႈႁဵတ်းသၢင်ႈသူ ဢၼ်ၸွႆႈၵႄႈပၼ်ႁႃၼႂ်းလၢၼ်ႉမႃးလႆႈလၢႆပွၵ်ႈလၢႆၵမ်းၼၼ်ႉ ႁဝ်းယုမ်ႇဝႃႈ သူၼႆႉယဝ်ႉ တေၸၢင်ႈမႃးပဵၼ်ႁူဝ်ၼႃႈၽၢႆႇႁပ်ႉၶႅၵ်ႇလႆႈ..
သင်သူဝႃႈတိုၵ်ႉမႃးၵူၺ်း ဝူၼ်ႉဝႃႈၵူၼ်းဢၼ်ႁဵတ်းၵၢၼ်ႁိုင်ၼၼ်ႉ ထုၵ်ႇလီလႆႈႁပ်ႉၼႆ ႁဝ်းပွင်ႇၸႂ်ဢၼ်သူဝူၼ်ႉယူႇ ပေႃးတေႁႂ်ႈလၢတ်ႈသိုဝ်ႈသိုဝ်ႈၵေႃႈ ၸဝ်ႈၵၢၼ်ၼၼ်ႉ မိူၼ်ပဵၼ်ၵူၼ်းၸႂ်ႁၢႆႉ ဢမ်ႇႁၼ်ထိုင်ၵၢင်ၸႂ်ပိူၼ်ႈၼႆၵေႃႈဝႃႈလႆႈယူႇ တွၼ်ႈတႃႇၼႃႈၵၢၼ်တႃငၢၼ်းပေႃးတေၶိုပ်ႈၼႃႈၼၼ်ႉ တေတူၺ်းတီႈၵူၼ်း ဢၼ်ဝႃႈယူႇႁိုင်ၵႃႈႁိုဝ်ၼၼ်ႉ လွင်ႈလဵဝ်ၵူၺ်းဢမ်ႇလႆႈ တေလႆႈတူၺ်းပႃး ၼမ်ႉၵတ်ႉ၊ လၢႆးႁဵတ်းလၢႆးသၢင်ႈ၊ ဢၵျၢင်ႉတၢင်းယၢမ်ႈ တႄႇဢဝ်ၸိူဝ်းၼႆႉၵႂႃႇယဝ်ႉ သင်သူၶႂ်ႈႁူႉဝႃႈ ယွၼ်ႉသင်လႄႈ လိူၵ်ႈသူမႃးပဵၼ်ႁူဝ်ၼႃႈၼႆ သူၵေႃႈၸၢမ်းမႃးပဵၼ်တူၺ်းလႄႈ သူတေပွင်ႇၸႂ်ၵႂႃႇၵူၺ်း”
လိုၼ်းၼုမ်ႇၵေႃႈ မိူဝ်ႈထွမ်ႇတူၺ်းဢၼ်တိုၼ်းႁၢၼ်လၢတ်ႈမႃးၼၼ်ႉ မိူၼ်တေၸႂ်ႈယူႇလႄႈ ၸင်ႇၶိုၼ်းဝၢႆႇတူၺ်းၸိုၼ်ႈၶိူဝ်း မိူၼ်ဢမ်ႇမီးတၢင်းလိူၵ်ႈၼၼ်ႉယဝ်ႉ။
“သင်ၶႃႈဢမ်ႇႁပ်ႉႁဵတ်းၼႆ တေပဵၼ်ႁိုဝ်မႃးၶႃႈ”
တိုၼ်းႁၢၼ်ၵေႃႈ ယၵ်ႉတူၺ်းၸိုၼ်ႈၶိူဝ်းၵမ်းၼိုင်ႈယဝ်ႉ “ၸွမ်းၼင်ႇႁဝ်းၵေႃႈ ပဵၼ်ၽူႈပွင်ၵၢၼ်ၸွမ်းၸိုဝ်ႈသဵင်ၵူၺ်း.. ဢမ်ႇမီးသုၼ်ႇတႅပ်းတတ်းလႆႈၵူႈလွင်ႈၼင်ႇၵဝ်ႇၼႃ ”
လိုၼ်းၼုမ်ႇမိူၼ်တေပွင်ႇၸႂ်ယဝ်ႉ လႅပ်ႈဢမ်ႇမီးတၢင်းလိူၵ်ႈဝႆႉလႄႈ ၵႃႈလႆႈတူၵ်းလူင်းႁဵတ်းၵႂႃႇယူႇ။ တေႁဵတ်းၵၢၼ်ၸိူင်ႉႁိုဝ် ပုၼ်ႈၽွၼ်းမီးၸိူင်ႉႁိုဝ်ၼၼ်ႉ လုင်းဢွင်ႇၵေႃႈ ႁႂ်ႈၽူႈမၢႆမၼ်းသပ်းလႅင်းလၢတ်ႈၼႄၵႂႃႇယဝ်ႉ ၵမ်ႈၼမ်ၵေႃႈ တေလႆႈတူၺ်းၵူၼ်းႁဵတ်းၵၢၼ် လွင်ႈပဵၼ်ယူႇၼႂ်းလၢၼ်ႉမီးၸိူင်ႉႁိုဝ်လႄႈ ႁဵတ်းပႃးလၢႆးငၢၼ်းၸိူဝ်းၼႆႉယူႇ။
ဝၢႆးသေၵႂႃႇတီႈလၢၼ်ႉမႃးယဝ်ႉၵေႃႈ ၸိုၼ်ႈၶိူဝ်းၼႅတ်ႈမႃးတီႈၶွမ်ႇပၼီႇမၼ်း ၵမ်းလဵဝ်သေ ႁိပ်ႈၼႅတ်ႈၵႂႃႇတင်းႁွင်ႈပၢင်ၵုမ်ၼၼ်ႉယူႇ။ ယၢမ်းၼၼ်ႉ တိုၼ်းႁၢၼ်ဢၼ်ပႆၶဝ်ႈမႃးၸွမ်းမၼ်းၼၼ်ႉ လႆႈႁၼ် မၼ်းမုင်ႈၼႃႈၵႂႃႇၸူးႁွင်ႈပၢင်ၵုမ်ၼႆၵေႃႈ မိူၼ်ၶုၵ်းၸႂ်လႆႈမႃးသေ
“မိူဝ်ႈၼႆႉဢမ်ႇၸႂ်ႈဝႃႈမီးပၢင်ၵုမ်ၵၼ်ႁႃႉ”
“ဢိုမ်ႈ!”
“မီးပၢင်ၵုမ်!..ယဝ်ႉ.. ပဵၼ်သင်လႄႈ တေလႆႈႁွင်ႉႁႃးၵႂႃႇတီႈလၢၼ်ႉၸဵမ်ၸဝ်ႉလႃႇ”
“ပေႃးဢမ်ႇၵႂႃႇ ဢမ်ႇၸႂ်ႈဝႃႈ လုင်းဢွင်ႇတေသိုပ်ႇၽူင်းထၢမ်မႃး တီႈၵေႃႉႁႃးယဝ်ႉ သမ်ႉတေမႃးထၢမ်တီႈႁႃး မိူဝ်ႈတိုၵ်ႉႁဵတ်းပၢင်ၵုမ်ယူႇႁႃႉ”
“ၵေႃႈၸႂ်ႈယူႇ ပဵၼ်ၵေႃႉႁႃးၵူၺ်းလူး ဢၼ်လိူၵ်ႈၶဝ်ၶိုၼ်ႈမႃး ႁူႉၵႃႈတေလႆႈထၢမ်ယူႇၵူၺ်းလေႃႇ.. ထၢမ်တေႉ.. ဢၼ်လၢတ်ႈမိူဝ်ႈၵႆႈၼၼ်ႉတင်ႈၸႂ်တေႁဵတ်းတေႉယူႇႁႃႉ”
“ဢိုမ်ႈ!!.. ပေႃးဢမ်ႇလၢတ်ႈၸိူင်ႉၼၼ် ၶဝ်ၵေႃႈတေဢမ်ႇယွမ်းငၢႆႈငၢႆႈ”
“ပေႃးၶဝ်ဢွၵ်ႇတေႉတေႉလူး တေႁဵတ်းႁိုဝ်လႃႇၼၼ်ႉ..”
ၸိုၼ်ႈၶိူဝ်းဝူၼ်ႉတူၺ်း လွင်ႈႁဵတ်းသၢင်ႈလိုၼ်းၼုမ်ႇ ဢၼ်ၶတ်းၸႂ်ႁဵတ်းမႃးၸိူဝ်းၼၼ်ႉယဝ်ႉ လၢတ်ႈၵႂႃႇၼင်ႇမၼ်ႈၸႂ်ဝႃႈ “ၶဝ်ဢမ်ႇဢွၵ်ႇယွၼ်ႉၵႂၢမ်းၶေႃႈၼၼ်ႉၵူၺ်းလေႃႇ သင်ၶဝ်ဢွၵ်ႇ လႆႈဝႃႈ ၶဝ်ၼၼ်ႉ ဢမ်ႇမီးၼမ်ႉၵတ်ႉပဵင်းပေႃး တေသိုပ်ႇယူႇၵႂႃႇလႆႈမိူၼ်ၵၼ်”
“တူၺ်းၸိူင်ႉႁိုဝ်ၵေႃႈ မီးၼႃႈတႃၵူၺ်းဢၼ်လီ ၼမ်ႉၸႂ်လီၼၼ်ႉ ႁႃပေႃးဢမ်ႇႁၼ်သေဢိတ်းတေႉလူင်”
သွင်ၶႃၵေႃႈ ၶဝ်ႈၵႂႃႇၼႂ်းႁွင်ႈပၢင်ၵုမ် ဢၼ်မီးၵူၼ်းတဵမ်ဝႆႉထႃႈၼၼ်ႉယူႇယဝ်ႉ။
လိုၼ်းၼုမ်ႇၵေႃႈ လႆႈသႂ်ႇသိူဝ်ႈၶူဝ်း ဢၼ်မၵ်းမၼ်ႈဝႃႈပဵၼ် ႁူဝ်ၼႃႈၵူၼ်းႁပ်ႉၶႅၵ်ႇၼၼ်ႉယဝ်ႉသေ ဢွၵ်ႇမႃးတူၺ်းလွင်ႈတူင်ႉၼိုင်ၼႂ်းလၢၼ်ႉၼၼ်ႉယူႇ ပီႈၸိင်ႇၶႃလိူၼ်သႂ်ၵေႃႈ လႆႈမႃးယိၼ်းၸူမ်းၸွမ်းယူႇ။ ၵူၺ်းၵႃႈ ၽၢႆႇတၢင်းၵူၼ်းၵဝ်ႇၵႄႇ ဢၼ်ႁဵတ်းၵၢၼ်မႃးႁိုင်ၸိူဝ်းၼၼ်ႉတႄႉ မိူဝ်ႈႁၼ်ၸိူင်ႉၼၼ် မီးလွင်ႈဢမ်ႇႁၢၼ်ႉၸႂ်မႃးယဝ်ႉ။ မိူဝ်ႈမီးၵူၼ်းဢမ်ႇႁၼ်လီၵေႃႈ မီးယူႇၵူၺ်း ၵူၼ်းဢၼ်ႁၼ်လီမၼ်း မိူၼ်ၼင်ႇ ၵူၼ်းဢၼ်ႁၼ်ၼမ်ႉၵတ်ႉလိုၼ်းၼုမ်ႇတႄႉတႄႉၼၼ်ႉ ပွင်ႇၸႂ်သေ ယွမ်းႁပ်ႉႁဵတ်းၵၢၼ်ၵႂႃႇယူႇ။ သမ်ႉဝႃႈမီးႁူဝ်ၼႃႈႁိုဝ် ဢမ်ႇမီးၼၼ်ႉ ၼႃႈၵၢၼ်ၵေႃႈဢမ်ႇလႆႈမီးသင်လႅၵ်ႈလၢႆႈမႃးၼင်ႇၵဝ်ႇ ၵူၼ်းႁဵတ်းၵၢၼ်ၵေႃႈ ယင်းလႆႈႁဵတ်းၵၢၼ်မိူၼ်ၵဝ်ႇၵူၺ်း။
တွၼ်ႈတႃႇလိုၼ်းၼုမ်ႇၼၼ်ႉ မိူၼ်ဝႃႈ ဝၼ်းမိူဝ်ႈၼႆႉ ၼႂ်းလၢၼ်ႉၼႆႉ မၼ်းတဵတ်ႇယဵၼ်ႁႅင်းလိူဝ် ဢမ်ႇလႆႈငိၼ်းသဵင်ၵူၼ်းႁွင်ႉ၊ ဢမ်ႇလႆႈလႅၼ်ႈၵႂႃႇလႅၼ်ႈမႃးယဝ်ႉ မိူၼ်ၵၢၼ်တေမဝ်မႃးသေတႃႉ ၶၢဝ်းယၢမ်းဢၼ်လႆႈႁဵတ်းၵၢၼ် ဢၼ်လႆႈၵႂႃႇပႂ်ႉဢဝ်ၶဝ်ႈၽၵ်း ၸုၵ်းတူၺ်းၵၢၼ်ႁုင်မိုဝ်ႉၼႂ်းႁွင်ႈမိုဝ်ႉၼၼ်ႉ ပဵၼ်ဢၼ်ႁဵတ်းႁႂ်ႈမၼ်း ဢမ်ႇၶႂ်ႈၽၢတ်ႇၵၢၼ်ဢၼ်ၼႆႉၼၼ်ႉယဝ်ႉ။ မိူဝ်ႈဝူၼ်ႉဝႃႈ ဢမ်ႇမီးတိုဝ်ႉတၢင်းယဝ်ႉၼႆ ပဵၼ်ဢၼ်ငိၼ်းသေလၢႆမႃးတႄႉတႄႉယူႇ။
ယၢမ်းၼၼ်ႉ ၸင်ႇမီးယိင်းၵေႃႉၼိုင်ႈ ၵႂႃႇတမ်းပၼ်ပႃႈၵေႃႉၼိုင်ႈ ဢၼ်ၼင်ႈဢုပ်ႇၽူင်း မိူၼ်ၸႂ်လႅပ်ႈတေသုၵ်ႉသၵ်ႉဝႆႉၼၼ်ႉယဝ်ႉ။ မိူဝ်ႈယိင်းၵေႃႉၼၼ်ႉ တိုၵ်ႉယုၵ်ႉဝၢၼ်ႇၽၵ်းၵႂႃႇတမ်းပၼ်မၼ်းလွႆးလွႆးၼၼ်ႉ မိူၼ်ဝႃႈမၼ်း တေဢဝ်မိုဝ်းပၢႆႇၺႃးဝၢၼ်ႇၽၵ်းၼႆလႄႈ ယိင်းၼၼ်ႉၵေႃႈလႆႈဢဝ်ဝၢၼ်ႇၼၼ်ႉငိူင်ႉပၢႆႈ ၵူၺ်းၵႃႈမၼ်းမႆႈၼႃႇသေ ဢမ်ႇၶၢမ်ႇလႆႈယဝ်ႉ လႆႈဢဝ်ဝၢၼ်ႇၽၵ်းတူၵ်းႁေႈၵႂႃႇ သဵင်ဝၢၼ်ႇလင်တူဝ်ႈတၢင်းလၢၼ်ႉ သၢႆတႃၵူၼ်းၼမ်ယၵ်ႉၸူးမၼ်းၵမ်းလဵဝ်။ ယွၼ်ႉပဵၼ်ၼမ်ႉၽၵ်းသေ ၸၢၵ်ႇမၼ်းသမ်ႉလႆႈၽူင်ႉသႂ်ႇသိူဝ်ႈၶူဝ်းပႃႈၼၼ်ႉဢိတ်းၼိုင်ႈ တၢင်းဢၼ်ပႃႈၼၼ်ႉလူမ်းဢမ်ႇလီသေ သဵင်ဝၢၼ်ႇၼၼ်ႉၵူၺ်းၵေႃႈယႃႉၸႂ်မၼ်းၼႃႇယဝ်ႉ သမ်ႉဢဝ်ၼမ်ႉၽၵ်းဢိူၵ်ႇၶူဝ်းမၼ်းထႅင်ႈသေ ၶိုၼ်ႈသဵင်သႂ်ႇလႃႇသႂ်ႇယိင်းၵေႃႉၼၼ်ႉမႃး လူၺ်ႈဢမ်ႇသူၼ်ၸႂ်ၽႂ်သေ
“ႁိူၺ်ႉ! ပဵၼ်သင်ဢမ်ႇတမ်းလီလီလႃႇ ဢမ်ႇႁၼ်ႁႃႉဢိူၵ်ႇၶူဝ်းႁဝ်းမူတ်းယဝ်ႉ!”
ယိင်းၵေႃႉၼၼ်ႉၵေႃႈ ဢမ်ႇႁၢၼ်ႉၸႂ်ၼိူဝ်လွင်ႈပႃႈၼၼ်ႉမိူၼ်ၵၼ် ဢၼ်ႁဵတ်းႁႂ်ႈမိုဝ်းမၼ်းလိူတ်ႇမႆႈ၊ မိူဝ်ႈဢၼ်သဵင်ပႃႈၼၼ်ႉလင်ၸီးၶဝ်ႈမႃးၼႂ်းႁူၵေႃႈ ၵေႃႉတေတုမ်ႉတွပ်ႇၶိုၼ်းၼၼ်ႉ ႁိုဝ်တေၸႂ်ယဵၼ်လႆႈယဝ်ႉ လၢတ်ႈပုတ်းၶၢတ်ႇသဵင်ၶႅင်ၵႂႃႇဝႃႈ
“ဢမ်ႇလႆႈတင်ႈၸႂ်ၶႃႈ! ပေႃးပႃႈဢမ်ႇမႃးၶႂၢင်ႁဝ်း မၼ်းၵေႃႈတေဢမ်ႇတူၵ်းၸိူင်ႉၼႆ”
ၶေႃႈၵႂၢမ်းမၼ်းၼၼ်ႉထွမ်ႇၶတ်းႁူဝႆႉလႄႈ ယိုင်ႈၶႅၼ်းသူၼ်းႁႂ်ႈမီးလူမ်းၸႂ်လမ်ၶိုၼ်ႈမႃးထႅင်ႈသေ ၶိုၼ်ႈသဵင်လင်သႂ်ႇ ယိင်းၵေႃႉၼၼ်ႉမႃးထႅင်ႈ
“ၶႂၢင်တီႈလႂ်! သူပဵၼ်ၵူၼ်းတမ်းၵေႃႈလူဝ်ႇတမ်းပၼ်ၵူၺ်းဢမ်ႇၸႂ်ႈႁိုဝ် ဢဝ်တူၵ်းၵေႃႈယွမ်းႁပ်ႉလေႃႇ သမ်ႉပၢႆဢမ်ႇၶႂ်ႈယွမ်းႁပ်ႉထႅင်ႈႁေ ၼႆႉႁႃႉ လၢၼ်ႉဢၼ်ပိူၼ်ႈယွင်ႈဢၢမ်းဝႃႈ မၼ်းလီမၼ်းၶႅမ်ႉၼၼ်ႉ တီႈတေႉၵေႃႈ မီးၵူၼ်းႁဵတ်းၵၢၼ်ၸၼ်ႉတႅမ်ႇၸိူင်ႉၼႆၵူၺ်းလူး ”
“ၼေႈပႃႈ! ၶႂ်ႈဝႃႈၸိူင်ႉႁိုဝ်လႃႇ”
“ၶႂ်ႈဝႃႈမႂ်းၼၼ်ႉၼႃႇ!”
ယိင်းၵေႃႉၼၼ်ႉၵေႃႈ သမ်ႉၸႂ်ဝႆးလႄႈ ဢဝ်မိုဝ်းငႃႇသႂ်ႇပႃႈၵေႃႉၼၼ်ႉယဝ်ႉ ထုၵ်ႇမိုဝ်းၶွၼ်ၼိုင်ႈလိုၼ်းၼုမ်ႇၼၼ်ႉမႃးႁၢမ်ႈဝႆႉယူႇ ၵူၺ်းၵႃႈ ပႃႈၼၼ်ႉၵေႃႈမိုဝ်းဝႆးမိူၼ်ၵၼ်လႄႈ ဢမ်ႇတၼ်းတူၺ်းၽႂ်ယဝ်ႉ ပၢပ်းသႂ်ႇမႅၼ်ႈၺႃးၼႃႈလိုၼ်းၼုမ်ႇၵႂႃႇ ပဵၼ်ႁၢင်ႈၽႃႇမိုဝ်းသမ်ႉပေႃးလႅင်လူင်ဝႆႉယူႇယဝ်ႉ။
တွၼ်ႈႁႃႈသုတ်းၵႂႃႇယဝ်ႉ ပႂ်ႉသိုပ်ႇတူၺ်းထႅင်ႈတွၼ်ႈႁူၵ်းၶႃႈ။
ႁပ်ႉထွမ်ႇပၼ်ႁႅင်းလူၺ်ႈသဵင် တၢင်း YouTube ၵေႃႈလႆႈၶႃႈ။
